Home  
కవితలు

భాష

భాష ఒక అవసరం భావ ప్రసారానికి బాదుకు చావడానికి. నింగిలో చంద్రుడు నేలపై సముద్రుడు ఇద్దరికీ ప్రియురాళ్ళు ఎక్కువ. కవి, గాయకుల్లేని నింగి తారల షోకేసు భూమితోనా దాని పోటీ. - డా.వై. రామకృష్ణారావు

ఆ వైపు

ఆ వైపు - డా.సి. భవానీదేవి ఈ మట్టి మత్తుగా ఆకర్షిస్తుంది సుతి మెత్తని మాటలా ఈ సముద్రం ఉవ్వెత్తున ఎగిసి పడుతుంది దృశ్యాన్ని వరించిన కనుపాపలా ఈ గాలి మురళిలా తాకుతుంది మమకారం నిండిన స్పర్శలా ఈ ఆకాశం నిలువునా కమ్మేస్తుంది మనసంతా ఆవరించిన రూపంలా ఈ దాహం అగ్నిలా రగులుతుంది ప్రతిక్షణం జ్వలించే వేదనలా పంచభుతాల పరికల్పిత శరీరం అటువైపే తిరిగి చూస్తోంది గమ్యాన్ని అన్వేషిస్తూ కాలం సాయంతో ఆవైపే నడుస్తూ

ప్రయత్నం

ప్రయత్నం - డా.సి. భవానీదేవి   ఇన్నిన్ని పుస్తకాలు చదివాను కానీ చదవలేకపోయింది నా మనసునే ! పిల్లగాలిలా తాకవు నిప్పుకణికలా కాల్చేస్తున్నావు తలమీద గోడుగువనుకున్నాను వంద పీలికల వికృత ఛాయావైనావు సముద్రమంత అందం నీది మునక వేస్తే ఊపిరి ఆడదు కదా!  భ్రమకి వాస్తవానికి మధ్య విభజన రేఖని స్పర్శించేది మనసే! ప్రేమించడం నా బలమైన బలహీనత దాన్ని ఆవిరి చేయటం నిర్విర్యత ఇప్పుడైనా మన అభిజాత్యపు పొరల్ని వొల్చుకుంటూ ఒకరిలోకి ఒకరు గా ప్రవహిస్తూ చీకటి ముసిరినప్పుడు మెరిసే నక్షత్రాల్లా కాసేపు చీకట్లోనే మాట్లాడుకుందాం, హృదయ నేత్రాల్ని విప్పార్చి చూసుకుందాం!

పగటి తలపుల పుంత

పగటి తలపుల పుంత -వి.బ్రహ్మానంద చారి     పగటి తలపుల పుంత రేయంత గిలిగింత రావె నా రాయంచ కవన భుజ కీర్తులతో స్వాగతమ్మిదె గొనుము గగన తలమును వీడి సుజల ధారల గ్రోలి సుధను పంచగ రావె ప్రణయమ్ములే లేని హృదయమ్ములేలనె కావ్యనాయికవీవె రా.... జాబిలమ్మ                  

అక్షరం భయపడదు

అక్షరం భయపడదు డా. సి.భవానీదేవి నచ్చని భావాన్ని దాచుకోవటం అక్షరానికి అలవాటులేదు భావాల మధ్య ఘర్షణ కొత్తకాదు ఇవ్వాళ మౌడ్యం కళ్ళెర్రజేస్తే తలొంచుతుందా ? నిత్య సజీవం అక్షరాత్మకరకు గుండెల్ని కూడా కరిగించగలననే నమ్మకం తుటాల్ని గూడా త్రుటిలో అధిగమించే వ్యక్తిత్వం అక్షరం బెదరదు ఆకాశమంత శక్తిని వెదజల్లే ఎండుటాకులు విలవిల్లాడుతున్నాయి నిర్భయంగా తలెత్తెన శిరస్సుకు వెలకట్టి నిర్లజ్జగా ఎగిరిపడ్తున్నై అక్షరం ఇప్పుడు జెండరై నిలదీస్తుంటే దౌర్జన్యం ముసుగులో దాక్కుని ఓడింది వాడే ! ఓటమికి కూడా సిగ్గేసిందప్పుడే !

అడ్డు గోడ కట్టినా

అడ్డు గోడ కట్టినా -డా.వై.రామకృష్ణారావు అడ్డు గోడ కట్టినా పక్కింటికి నీడ నిస్తోంది చెట్టుకి వైరం లేదు. కవిత్వం రస్తాల్లో బాటసారిని సంగీతం కెరటాల్లో 'పాటసారి'ని. అందమైన జ్వాల చూసి ఆనందించడానికే ఆలింగానానికి కాదు.

ముంగురుల పైన ముత్యం

ముంగురుల పైన ముత్యం డా.. వై. రామకృష్ణారావు. ముంగురుల పైన ముత్యం పెదవి పైన పగడం ఉనికిని బట్టే చినుకు. స్మృతి కవిత్వంలోని అక్షరాలు గాబోలు అందుకే స్వరంలో గాద్గాద్యం. జారిపడిన తియ్యని స్వప్నాన్ని పైకి తోడుకుంటున్నా కన్నీటి దారంతో....

అందరిలో మంచినీ

అందరిలో మంచినీ వి. బ్రహ్మానంద చారి అందరిలో మంచినీ కొందరే  చుసెదరె అందలాలేలనే ఆనందమున నుండ నా ఊహలో నీవు నా ఈహలో నీవు నా శ్వాసలో నీవు నా ధ్యాసలో నీవు నా అంతరంగాన ఆత్మవై అమరిన అమరజ్యోతివె నీవు నా..... జాబిలమ్మ  

లెన్స్

లెన్స్ - డా.సి. భవానీదేవి కంటికి కంటికి మద్య గాయానికి నెత్తురుకురుకూ మద్య ప్రతి  నిముషాన్నీవార్త గా కోసే ఈ లెన్స్ కత్తి ఎక్కడిది ? అద్భుతం, అవసాన కాలం ఏదైనా బందిపోటులా  గుండెల్లో గుచ్చుకుంటుంది కనురెప్పలు మూసేలోపు కనబోయే కలల్నీ కూడా గాలం వేసి ప్రసారిస్తుంది తెరచాటు దృశ్యాల కోసం ఇన్నిన్ని వేట కుక్కలు పొంచి చూస్తుంటే ఎక్కడని దాక్కోగలం ? ఒంటి స్తంభం మేడలు కీకారణ్యాలు కూడా నాసా కంట్లో లైవ్ టెలికాస్టే ! ప్రతిక్షణాన్నీ మింగే బైట్స్! ప్రతిసందర్భమూ డిజిటల్ పోజే ప్రతి జీవితం ఓ అల్బమే ! ప్రేమ మరణం అన్నీ సామాజికం జాతీయం ఇంక గుండెలు పిండే నీ ఏడుపుకూడా కెమేరా కోసమే! నువ్వు చావాలనుకుంటే మరణ వాగ్మూలం కూడా ముందుగానే చదువుకోవాలకుంటుంది ఆచ్చాదన లేని దృశ్యశకలాలు క్లోజప్స్లో బట్టబయలు ఎఫ్.టి.వి నయం కదూ! నీ బతుకు, నవ్వు,దుఃఖం నీవైతేగా ఆ కన్ను కాసేపు మూసేయ్ మిత్రమా! హాయిగా అమాయకంగా బతికేద్దాం!

ప్రతి ఏడు వస్తుంది దీపావళి

 దీపావళి -కనకదుర్గ ప్రతి ఏడు వస్తుంది దీపావళి అమావాస్యనాడు భువిలో దీపాలతో పున్నమి వెలుగులు విరజిమ్ముతుంది. నిరాశ అనే చీకటిని తొలగించి ఆశ అనే జ్యోతిని వెలిగించేదే దీపం స్వార్ధచింతన ఎక్కువై మనిషి కష్టాలనే చీకట్లల్లో చిక్కుకుపోయిన వారి గురించి ఆలోచించే మంచితనం కోల్పోతూ మనసుల్లో అంధకారం నింపుకుంటున్నారు. పండగ బోలెడంత డబ్బు పోసి ఇల్లంతా దేధీప్యమానంగా దీపాలతో ఎలక్ట్రిక్ లైట్లతో అలంకరించి శివకాశిలో ప్రమాదకరమైన పరిస్థితుల్లో చిన్నారులు వారి చిన్ని చిన్నిచేతులతో తయారు చేసిన మతాబులను, తెచ్చుకుని కుటుంబం వారితో, స్నేహితులతో జరుపుకుని మురిసిపోవడమే దీపావళి కాదు. ఏనాడైతే స్వార్ధం అనే అంధకారంతో మూసుకుపోయిన హృదయాల్లో ఇతరుల పట్ల, సమాజం పట్ల తమ ధర్మం నిర్వర్తించాలనే దీపం వెలుగుతుందో, పేద, గొప్పా తేడాలు తొలగిపోయి ప్రతి ఒక్కరూ సమానంగా వుండేరోజు వచ్చిననాడు, మన అంతరంగాల్లో జ్యోతులు వెలుగుతాయి మూసుకుపోయిన మనస్సులు తెరుచుకుని ఏ తేడాలు లేకుండా తమస్సుని తరిమికొడతాయి.

సన్నజాజి పూలు

సన్నజాజి పూలు - వి. బ్రహ్మానంద చారి సన్నజాజి పూలు సిగలోన తురుముకుని సువాసనలతోటి సాగిపోయే వేళ సన్నుతీ గీతాల సన్నాయి నొక్కులు సరిచేసుకుని  జూడ సంగీతమేలనే సందెపొద్దు కాడ సాగె మబ్బుల నీడ సంగతులు చెప్పవా నా జాబిలమ్మ

ఆభాష

ఆభాష - డా.సి.భవానీదేవి పుట్టింది మొదలు నేను మాట్లాడిందేది నాకు మిగల్లేదు మానం తప్ప కాలం కొసవెంట నడిచొచ్చే సుదీర్ఘ నిశ్వాసం తప్ప ఉక్కిరిబిక్కిరియ్యే మతాల కుప్పల మద్య ఒక్క క్షణం భుమ్యాకాశాల్నీ బందించే నిశబ్ధం వేలకోట్ల స్వరాల్నీగడ్డ కట్టిస్తుంది దుఃఖం పొరలు పొరలవుతున్నా వెచ్చని అనుభవం తెరలు దించుకుంటున్నా నా పెదవులు మధ్య నలిగిపోతూనే ఉంటుంది దేహనాళాల్లోకి సంచలిస్తూ నన్ను కల్లోలపరుస్తూనే ఉంటుంది మాటలు తాకలేని మూగప్రకంపనలు పలుకు పలుకు చిలకలకి జోలపాడుతుంటాయి మొరటు పిడికిళ్ళు దూసే శబ్దాల ఈటెల మధ్య నిర్వేదపు పెనుచీకటి ముసుగేసిన రెప్పల్లో చైతన్యంలా పురివిప్పే మహా మౌనమే నా అంతర్భాష చివరి క్షణంలో కూడా నన్ను వీడని హృదయశ్వాస

మెరుపు కొరడా

మెరుపు కొరడా డా. వై. రామకృష్ణారావు మెరుపు కొరడా దెబ్బలకేమో కొండ భోరున ఏడుస్తుంది జలపాతంలో ముందరి దృశ్యం కాదు ముందు చూపు నేర్చుకో పత్తి విత్తులో మాన సంరక్షణ స్వేద బిందువుల్ని వెచ్చించి ముత్యాల దండ కొనుక్కున్నది కూలి తల్లి

నిలతీత

నిలతీత - డా.సి భవానిదేవి నాకు తెలీలేదు గానీ నేను పుట్టగానే అమ్మ మొహం వాడిపోయిందిట! అమ్మలక్కలు మూతులు ముడిచారట కులం జాతి చుట్టరికాలు పేరు కన్నా ముందే తగుల్కున్నాయిట! మళ్ళీ ఇంకో ఇంటిపేరు ముల్లకంచేలే మెట్లై బతుకంతా గాయాలై చివురేసేలోపే చిదిమేసే రక్కసిగోళ్ళు మొగ్గలేసేలోపే తుంచేసే 'మను' వాదాలు ఎన్ని తరాల సుదీర్ఘ పోరాటం ఎందుకు ఈ సహజీవన వైరం ? అమ్మకే బరువయ్యే అమ్మాయిలా పుట్టడం నేరమని నాకప్పుడు తెలీదు దేవుడు కనిపిస్తే ఒక్కటే ప్రశ్న అమ్మాయిలా పుట్టి చూడు అంత ధైర్యం ఉందా ? అని...

నింగి వాకిట్లో

నింగి వాకిట్లో చుక్కలు పెట్టారెవరో కలిప ముగ్గేసుకుందామా పువ్వు గాలిది పండు నేలది రుచి లోకానిది ఆకు మాత్రమే చెట్టుది గోడ భగభగ మండుతోంది అవును దాన్నిండా విప్లవ నినాదాలే. డా . రామకృష్ణారావు.

అందానికి అందం ఈ ప్లాస్టిక్ బొమ్మ

అందానికి అందం ఈ ప్లాస్టిక్ బొమ్మ   -కనకదుర్గ- పొద్దు పొద్దునే వికో టర్మరిక్ రాసుకుని, మరి కాసేపు కాగానే ఫేయిర్ అండ్ లన్లీ రాసి, చర్మం నిగ నిగలాడాలనే ఆత్రం ఇది చాలదన్నట్టు మొటిమల కోసం అమెరికా నుంచి ఫ్రెండ్ పంపించిన ప్రొ ఏక్టివ్ ప్లస్ అనే క్రీం రాసుకుని, తను ఎప్పటికీ చాలా యవ్వనంగా కనిపించడానికి పాండ్స్ క్రీమ్ రాసుకుంటే మంచిదని అది కూడా రాసుకుంది ఓ సుందరి, సబ్బులయితే ఎన్ని కొని పెట్టుకుందో తన చర్మ సౌందర్యాన్ని కాపాడుకోవడానికి, లక్స్, పియర్స్, మైసుర్ సాండల్, సంతూర్, రెక్సోనా రాసుకుంటే అయితే అమ్మాయి చెయ్యి తగిలిందంటే భర్త కానీ, భాయ్ ప్రెండ్ కానీ ఆమెకి, ఆమె శరీర మృదుత్వానికి దూరంగా వుండలేరు అని చూసి అది కూడా రాసేసుకుంటుంది, డవ్ సబ్బు రాసుకుంటే చర్మం ఎంత మెత్తగా వుంటుందంటే ఒకసారి అది రాసుకున్న వారు మరో సబ్బు వాడరంటారు, కానీ అన్ని వాడితే అందరికంటే అందంగా వుండాలనే తాపత్రయంతో అన్ని వాడడం మంచిదనుకుంది మన సుందరి. జుట్టు పొడువుగా, మృదువుగా, నల్లగా  ఉండి ఒక్క వెంట్రుక కూడా వూడిపోకుండా పెరగాలంటే ప్యారాచ్యూట్ కొబ్బరి నూనె రాసుకుంది, జుట్టు పల్చగా వుండకుండా, తన జుట్టు వత్తుగా వుందని తెలియడానికి ఎక్కడైనా పార్టీలో అందరి కళ్ళు తన జుట్టు పైనే వుండేలా డాబర్ ఆమ్లా హేయిర్ ఆయిల్ రాసుకుంది, జుట్టు సాంప్రదాయంగా పొడవుగా జడ వేసుకుని అందరి దృష్టి మీ జుట్టు పైనే వుండాలంటే మందారం, ఉసిరికాయలు, కొబ్బరినూనె కలిపి తయారు చేసిన నూనె రాసుకుంటే మరీ మంచిదనీ అది కూడా పట్టించింది.   జుట్టు టీవిలో చూపించే విధంగా పట్టుకుచ్చులా మెరిసిపోతూ వుండాలంటే, అలాగే ఒక లారీని లాగి పారేసేంత ధృఢంగా, పొడువుగా వుండాలంటే గార్నియర్ షాంపూ రాసుకుని తలార స్నానం ఒకరోజు, మరో రోజు చుండ్రు రాకుండా నల్లగా మెరుస్తూ వుండే జుట్టుకోసం ఒక సినీ హిరోయిన్లా కనపడడానికి హెడ్ అండ్ షౌల్డర్స్ షాంపూ రుద్దుకుని తలకి పోసుకోవడం, జుట్టు రోజంతా మెరుస్తూ మెరిపిస్తూ వుండాలంటే సన్ సిల్క్ షాంపూతో తలకి పోసుకుంటే షైనీ గ్లో వుంటుందని చూడగానే వెంటనే తెచ్చుకుని తలకి పోసేసుకుంది. ట్రెసెమ్మె షాంపూ రాసుకుంటే హేయిర్ సలాన్ కి వెళ్ళకుండానే అలాంటి జుట్టుని సంపాదించుకోవచ్చు. ఇన్నీ కాస్మటిక్స్ వున్నా కూడా తనివి తీరని వారికి అడుగడుక్కి బ్యూటీ సలాన్ లు మొదలయ్యాయి. వయసు తక్కువగా కనపడడానికి చిన్న చిన్న ప్లాస్టిక్ సర్జరీ ప్రొసీజర్స్ ద్వారా ఎంత వయసు వచ్చినా యవ్వనంలో వున్న స్త్రీలానే కనపడేలా, బోటాక్స్ లు, ఫేస్ లిఫ్ట్ లతో,  రక రకాల సర్జరీలతో వయసునే ఆపే ప్రయత్నం చేస్తున్నారు.  ఈ కాస్మటిక్స్ ఇండస్ట్రీలకు లాభాలను ఆర్జించి పెడుతున్న ప్రపంచంలోని మధ్యతరగతి, డబ్బున్న స్త్రీలందరూ పురుషులను తాము అందంగా వుండి వారిని ఆకర్షించి వుంచుకోవాలనే తాపత్రయం.  ఇన్ని చేసినా ఎంతో మంది ముసలి పురుష పుంగవులు  తమ కూతుళ్ళ, మనవరాళ్ళ వయసు వాళ్ళని  పెళ్ళిళ్ళు చేసుకుంటున్నారు పాపం. సహజమైన అందంతో వుండే అమ్మాయిలను అందానికి అందం అయిన పుత్తడిబొమ్మ అనేవారు, కానీ ఈ రోజు ఈ కాస్మెటిక్స్, ప్లాస్టిక్ సర్జరీల మోజులో అందానికి అందం ఈ ప్లాస్టిక్ బొమ్మలు అవుతున్నారు!  

జీలకర్ర బెల్లం

జీలకర్ర బెల్లం - వి.బ్రహ్మానంద చారి జీలకర్ర బెల్లం ఇరువురీ తలపైన చలువమదినీ చేయ చెలిమి చేరువ కాగ కరము పట్టిన యంత నరనరము పులకింత తనువెల్ల హిమశృంగ మయ్యెనో రాణమ్మ దోసిటా ముత్యాలు బాసటగ పదములు చాటువుగ చెప్పనా నా...జాబిలమ్మ

కొత్తలిపి

కొత్తలిపి - డా.సి.భవానీదేవి  నా దినచర్యలో మరోపేజీ అంతా కొత్త లిపి ఆమూలాగ్రం ఎన్నిసార్లు చదివినా ఆదరం కావటంలేదు అక్షరాల పలకరింతకి మూలాలు చిక్కటం లేదు నాకోసం కలాన్ని తిరగరాసింది నాచేతుల్లోని నవతగా నమ్మబలికింది మర్నాడు సూర్యోదయానికి పుస్తకంలో మరో ఖాళీపేజీ కొత్త దస్తూరి కోసం ఎదురుచూస్తూ  

పట్టు పావడ

పట్టు పావడపైన బుట్ట చేతుల రైక చుట్టెనే జరివోణి గుట్టు దాచిన బోణి ఎడమ బుగ్గన చుక్క నుదుట లగ్గపు చుక్క కనుల వెల్గుల సుక్క కనికట్టు చేసెనే తడబడే అడుగులా అదిరేటి పెదవులా బెదిరేటి చూపులా నవ వధువుగా వచ్చె నా....జాబిలమ్మ   వి. బ్రహ్మనందచారి  

జీవించటం

జీవించటం పగిలిన అద్దాన్ని అతికించలేని అసహాయతని తలచుకుని రోదించటం కంటే స్మృతుల నుంచి విసిరేసి ... కొత్త అద్దం అందాన్ని బ్రతుకు నిండా నింపుకోవటమే ... జీవించటం ...