Idhisangathi News | TeluguOne

బాబుపై కేటీఆర్ ప్రశంసలు: మారిపోయారా.. మరిచిపోయారా.?

బీఆర్ఎస్ కార్యనిర్వాహక అధ్యక్షుడు కల్వకుంట్ల తారకరామారాలు ఇటీవలి కాలంలో ఆంధ్రప్రదేశ్ ముఖ్యమంత్రి నారా చంద్రబాబుపై ప్రశంసలు కురిపిస్తున్నారు. సమయం, సందర్భం కల్పించుకుని మరీ చంద్రబాబు విజనరీనీ, పాలనా దక్షతనూ ప్రస్తుతిస్తూ, తెలంగాణ ముఖ్యమంత్రి రేవంత్ రెడ్డిపై విమర్శల వర్షం కురిపిస్తున్నారు. ఇదే కేటీఆర్ గతంలో పలు సందర్భాలలో చంద్రబాబుపై విమర్శలు గుప్పించారు. తెలంగాణ ద్రోహిగా అభివర్ణించారు. జగన్ హయాంలో అప్పటి ప్రతిపక్షనేతగా ఉన్న చంద్రబాబును స్కిల్ కేసు అంటూ అక్రమంగా అరెస్టు చేసినందుకు నిరసనగా హైదరాబాద్ లో ఆందోళనకు దిగిన టెక్కీలను తప్పుపట్టారు. ఆ ఆందోళనను అణచివేయడానికి శతధా ప్రయత్నించారు. తెలంగాణలో బీఆర్ఎస్ సర్కార్, ఏపీలో జగన్ సర్కార్ పతనమైన తరువాత కూడా ఆయన చంద్రబాబుపై పలు సందర్భాలలో విమర్శలు గుప్పించారు. వైసీపీకి అనుకూలంగా ప్రకటనలు చేశారు. అయితే ఇప్పుడు మాత్రం చంద్రబాబుపై ప్రశంసల వర్షం కురిపిస్తున్నారు. తాజాగా తెలంగాణలో నెలకొన్న కరువు పరిస్థితులపై, రేవంత్ సర్కార్ పని తీరుపై విమర్శలు గుప్పిస్తూ.. ఆంధ్రప్రదేశ్ ముఖ్యమంత్రి చంద్రబాబుపై పొగడ్తల వర్షం కురిపించారు. ఏపీలో తెలంగాణ కంటే తీవ్రమైన కరువు పరిస్థితులు ఉన్నప్పటికీ, చంద్రబాబు అత్యంత సమర్థవంతంగా మేనేజ్ చేశారని ప్రస్తుతించారు. పొరుగున ఉన్న కర్ణాటక, ఆంధ్రప్రదేశ్ రాష్ట్రాలతో పోలిస్తే తెలంగాణలోనే కరువు ప్రభావం ఎక్కువగా కనిపిస్తున్నదన్న కేటీఆర్ ఏపీలో లోటు వర్షపాతం ఉన్నప్పటికీ, చంద్రబాబు సర్కార్ నీటి వనరులను సద్వినియోగం చేసుకుంటూ రైతులను, ప్రజలను ఆదుకుంటోందన్నారు. అదే సమయంలో తెలంగాణలో పుష్కలంగా నీరు ఉన్నప్పటికీ, ప్రణాళికాలోపం, ప్రభుత్వ నిర్లక్ష్యం కారణంగానే ప్రజలు, రైతులు తీవ్ర ఇబ్బందులు ఎదుర్కొంటున్నారని మండిపడ్డారు. కాంగ్రెస్ ప్రభుత్వంపై స్వయంగా ఆ పార్టీకి చెందిన ఎమ్మెల్యేలే విమర్శలు చేస్తున్నారంటూ పలు వ్యాఖ్యలను గుర్తుచేశారు. పాలనపై దృష్టి పెట్టకుండా ప్రతిపక్షాలపై కక్షసాధింపు చర్యలకు పాల్పడటమే పనిగా పెట్టుకున్నారని రేవంత్ రెడ్డి ప్రభుత్వాన్ని ఎద్దేవా చేశారు. కాగా కేటీఆర్ మారిన ధోరణి రాజకీయ ప్రాధాన్యత సంతరించుకుంది. ఆయన మారారా? గతంలో తాను చేసిన విమర్శలు మరిచారా అన్న చర్చ జరుగుతోంది. ఏపీలో, జాతీయ స్థాయిలో రాజకీయ పరిస్థితుల నేపథ్యంలో కేటీఆర్ జగన్ తో మైత్రి కంటే.. చంద్రబాబుకు, తెలుగుదేశం పార్టీకీ దగ్గరవ్వడమే తెలంగాణలో బీఆర్ఎస్ కురాజకీయంగా ఒకింత మేలు జరుగుతుందన్నభావనతోనే కేటీఆర్ స్వరం మార్చారని పరిశీలకులు అంటున్నారు. [KTR Praises Chandrababu Naidu, Political, Importance, Jagan, Ycp, Telangana politics, Revanth Reddy, Drought Management, Telugu One]

Published on: Fri Oct 30, 2026 11:03AM

జగన్ కోటకు బీటలు: తెలుగుదేశం బలుపా, వాపా: కడప మేయర్, పులివెందుల చైర్ పర్సన్ గెలుపే గీటురాయి.!

దశాబ్దాలుగా వైఎస్ కుటుంబానికీ, వైసీపీకీ, జగన్ కీ పెట్టని కోటగా నిలిచిన కడప కోట బీటలు వారింది. కడప గడపలో వైపీపీ పట్టు కోల్పోయింది. స్థానిక సమరంలో మెజారిటీ స్థానాలలో కనీసం నామినేషన్ కూడా వేయలేని దయనీయ స్థితిలో నిలిచింది. స్థానిక సమరంలో కడప జిల్లా లో వైసీపీ చేతులెత్తేసింది. రాజంపేట, బద్వేల్, ప్రొద్దుటూరు, కమలాపురం, ఎర్రగుంట్ల, మైదుకూరు వంటి కీలక ప్రాంతాల్లో కూటమి అభ్యర్థులు ఏకగ్రీవ విజయాలు సాధించారు. అన్నిటికీ మించి జగన్ ఎమ్మెల్యేగా ప్రాతినిథ్యం వహిస్తున్న పులివెందుల నియోజకవర్గంలోనూ వైసీపీ చతికిల బడింది. పులివెందుల మునిసిపాలిటీలో సగానికి పైగా వార్డులను తెలుగుదేశం అభ్యర్థులు ఏకగ్రీవంగా ఎన్నికయ్యారు. పులివెందులలోనే వైసీపీకి అభ్యర్థులు కరవయ్యారని ఈ పరిణామం తేటతెల్లం చేసింది. దశాబ్దాలుగా వైసీపీ కుటుంబం ఆధిపత్యం కొనసాగిన పులివెందులలోజగన్ పార్టీ తరఫున అభ్యర్థులు కూడా లేని పరిస్థితిని ఏర్పడడాన్ని బట్టి ఆ పార్టీ దయనీయ స్థితి కళ్లకు కడుతుంది. ఈ ఏకగ్రీవాలతో వైపీపీ కడపలో వెనకడుగు వేసిందని తేటతెల్లమైౌతోంది. అయితే ఇక్కడ వైసీపీపి తెలుగుదేశం పై చేయి సాధించినా, దీనిని నిజమైన విజయంగా భావించి సంబరాలు చేసుకునే పరిస్థితి లేదు. ఎందుకంటే ఎదుటి పక్షం అంటే వైసీపీ చేతులెత్తేయడం వల్ల పోటీ లేకుండా వచ్చిన విజయాలివి. అందుకే వీటిని సాంకేతిక విజయాలుగానే తెలుగుదేశం భావించాల్సి ఉంటుంది. క్షేత్రస్థాయిలో కూటమి నాయకులు సమన్వయంతో వ్యవహరించడం, వ్యూహాత్మక సాగడం వల్లే ఇది సాధ్యమైంది. గతంలో వైకాపా ఏకపక్షంగా గెలుపొందిన ప్రాంతాల్లోనూ ఇప్పుడు కూటమి పార్టీలు బలాన్ని చాటింది. అది పక్కన పెడితే ఏకగ్రీవాల కారణంగా వైసీపీ.. తెలుగుదేశం అధికార బలంతో తమ పార్టీ అభ్యర్థులు నామినేషన్లు వేయనీయకుండా అడ్డుకున్నారని ఆరోపణలు గుప్పిస్తోంది. వాస్తవానికి ప్రజా మద్దతు లేకపోవడం వల్లనే వైసీపీ అభ్యర్థులు నామినేషన్లు వేయలేదు. లేకుంటే పులివెందుల, కడప వంటి చోట్ల వైపీపీని ఎంత అధికార పార్టీ అయినా తెలుగుదేశం అడ్డుకునే పరిస్థితి ఉండదు. ఇది అందరికీ తెలిసిన సత్యమే అయినా ఏకగ్రీవం అన్న సాంకేతిక కారణాన్ని చూపి వైసీపీ అధికార దుర్వినియోగం ఆరోపణలు చేస్తోంది. అయితే పరిశీలకులు మాత్రం గతంలో అంటే జగన్ అధికారంలో ఉండగా స్థానిక ఎన్నికలలో ఏకగ్రీవాలలో రికార్డు సృష్టించారు. ప్రత్యర్థి పార్టీల అభ్యర్థులను నామినేషన్లు వేయడానికి వీలులేని పరిస్థితులను సృష్టించడం ద్వారా ఆ రికార్డు సాధించారు. ఇప్పుడు తెలుగుదేశం జగన్ కు రిటర్న్ గిఫ్ట్ ఇచ్చినట్లు అయ్యిందని పరిశీలకులు విశ్లేషిస్తున్నారు. ప్రస్తుతం కడప కార్పొరేషన్ మేయర్, పులివెందుల మున్సిపాల్ చైర్ పర్సన్ స్థానాలకు జరిగే ప్రత్యక్ష పోలింగ్‌లోనే అసలైన ఓటర్ల తీర్పు తేలనుంది. ఇంకా ఓటింగ్ జరగాల్సిన కడప మేయర్, పులివెందుల మున్సిపల్ చైర్మన్ స్థానాల్లో కూటమి అభ్యర్థులు ఓట్ల రూపంలో విజయం సాధిస్తేనే, ఈ ఏకగ్రీవాలకు సార్థకత చేకూరుతుంది. ఆ స్థానాలను గెలుచుకోలేని పక్షంలో లేనిపక్షంలో, కేవలం నామినేషన్ల ఉపసంహరణలు, రాజకీయ ఒత్తిళ్ల మధ్య జరిగిన ఏకగ్రీవ విజయాలు వాపే కానీ బలుపు కావని పరిశీలకులు అంటున్నారు. ఏది ఏమైనా కడప పరిణామాలు వైసీపీ అధినేత జగన్ మనోధైర్యాన్ని దెబ్బతీస్తాయనడంలో ఇసుమంతైనా సందేహం లేదు. ఈ ఏకగ్రీవలు వైసీపీ శ్రేణులలో కూడా నిరుత్సాహాన్నీ, నిస్తేజాన్నీ నింపుతాయని పరిశీలకులు విశ్లేషిస్తున్నారు. ఇక తెలుగుదేశం విషయానికి వస్తే కడప మేయర్, పులివెందుల చైర్ పర్సన్ స్థానాలలో విజయం సాధిస్తేనే ఈ ఏకగ్రీవాలకు సార్ధకత, ఈ విజయాలకు గుర్తింపు లభిస్తుందని పరిశీలకులు అంటున్నారు. అంత వరకూ కడపలో నిజంగా వైసీపీ నుంచి తెలుగుదేశానికి ఓటు బ్యాంకు బదలీ అయ్యిందని చెప్పడానికి అవకావాలు లేవు. [Kadapa Local Body Elections, TDP Unanimous Wins, Y CP Bastion Pulivendula, Andhra Pradesh Politics, TeluguOne News]

Published on: Wed Oct 28, 2026 4:28PM

బొద్దింకల ఉద్యమం: ఓ హిస్టారికల్ నెసిసిటీ.!

ప్రజాస్వామ్య వ్యవస్థలు, రాజ్యాంగ సంస్థలు తమ విధులను సక్రమంగా నిర్వర్తించడంలో విఫలమైనప్పుడు ప్రజా ఉద్యమాలు పోటెత్తడం సహజం. ఇండియాలో ఇప్పుడు అదే జరుగుతోంది. దర్యాప్తు సంస్థల నుంచి కేంద్ర ఎన్నికల సంఘంవరకూ అన్నిటిపైనా ప్రజా విశ్వాసం ఒకింత మసకబారింది. రాజ్యంగ సంస్థల విశ్వసనీయత దెబ్బతింది. పార్లమెంటు, , ఎన్నికల సంఘం, కేంద్ర దర్యాప్తు సంస్థల తీరు పట్ల ప్రజలలో అసహనం ప్రస్ఫుటంగా కనిపిస్తోంది. ఆ వైఫల్యాల ఫలితమే దేశంలో ఉవ్వెత్తున ఎగసి పడుతున్న పోరాట జ్వాలలు, నిరసనల మంటలు. ముఖ్యంగా బొద్దింకల వీధి పోరాటాలు.. కేంద్రంలోని మోడీ సర్కార్ పునాదులను కదిలిస్తున్నాయి. కనీసం కదులుతున్నాయన్న భయాన్ని మోడీషాలో వ్యక్తమయ్యేలా ఈ ఉద్యమాలు చేశాయి. అన్ని వ్యవస్థలను ప్రధాన మంత్రి నరేంద్ర మోడీ ప్రభుత్వం తన గుప్పిట్లోకి తీసుకున్న తర్వాత న్యాయం ఒక్కొక్కరికి ఒక్కో రకంగా అందుతోదన్న ఆరోపణలు వెల్లువెత్తుతున్నాయి. గతంలో కూడా ఇలాంట పరిస్థితి ఏర్పడించి కానీ.. ఇంతల ఈ రాజ్యంగ సంస్థలను వ్యవస్థీకృతంగా గుప్పెట పెట్టుకున్న సందర్భం మాత్రం గతంలో ఎన్నడూ లేదు. కాక్రోచ్ జనతా పార్టీ (సిజెపి) ఆందోళనలతో తీవ్రమైన చిక్కులు ఎదుర్కున్న కేంద్ర ప్రభుత్వం జంతర్ మంతర్‌ను ఆందోళనల నిషేధిత ప్రాంతంగా ప్రకటించింది. ఆందోళనలకు, ధర్నాలకు ఇంత కాలం వేదికగా వుంటూ వస్తున్న జంతర్ మంతర్ ఇప్పుడు ఆందుకు ఏ మాత్రం అవకాశం లేని ప్రాంతంగా మారిపోయింది. అయితే, సిజెపి నాయకులు ఆశుతోష్ రానా, సౌరవ్ దాస్ జంతర్ మంతర్‌లో జాతీయ పతాకాన్ని ఎగురేసినందుకు అరెస్టయ్యారు. దేశానికి స్వాతంత్య్రం వచ్చిన తర్వాత జాతీయ పతాకాన్ని ఎగురవేసినందుకు అరెస్టయిన తొలి భారతీయులుగా వారు చరిత్రలో నిలిచిపోతారు వారిని అరెస్టు చేసి తీహార్ జైలులో వుంచి, బెయిల్ ఇవ్వడానికి అనేక సాకులు చూపుతూ వారి ఆత్మస్థయిర్యాన్ని దెబ్బ తీయాలని కేంద్రం ప్రయత్నిస్తోంది. అవసరమైన షూరిటీలు సమర్పించినప్పటికీ వారి విడుదలకు అడ్డంకులు సృష్టించారు. అది పక్కన పెడితే.. అంకితా భండారి హత్య కేసులో ఆరోపణలు ఎదుర్కుంటున్న ఆర్ఎస్ఎస్ కార్యకర్త దుష్యంత్ కుమార్ గౌతమ్‌ను సిక్కిం గవర్నర్‌గా నియమిస్సూ నిస్పిగ్గుగా వ్యవహరించింది కేంద్రం. అలా నియమించడం ద్వారా హత్య కేసులో విచారణను ఎదుర్కోవాల్సిన అవసరం లేకుండా దుష్యంత్ కుమార్ గౌతమ్ కు వెసులుబాటు కల్పించింది. ఇక ఉత్తరప్రదేశ్ ఎన్నికల్లో బిజెపి నుంచి పోటీ చేయడానికి ఉత్సుకత చూపిన హత్య కేసులో దోషిగా నిర్దారించబడిన దోషి నందలాల్ రాయ్ అలియాస్ బబ్లూ రాయ్‌ని అలహాబాద్ హైకోర్టు విడుదల చేసింది. ఇక్కడ చెప్పుకోవలసిన విషయం ఏమిటంటే.. జంతర్ మంతర్ వద్ద జాతీయ పతకాన్ని ఎగురవేసిన ఇద్దరు యువకులకు బెయిల్ ఇవ్వడానికి స్పెషల్ ఎగ్జిక్యూటివ్ మెజిస్ట్రేట్ రితూ రాజ్ మీనమేషాలు లెక్కించారు. షూరిటీ ఇవ్వడానికి వచ్చిన ఓ వ్యక్తి జుట్టు ఆధార్ కార్డులో అతపి ఫొటోలో వున్న జుట్టులా లేదంటూ అభ్యంతరం చెప్పారు. షూరిటీలు అంగీకరించకుండా వారిద్దరి జ్యుడిషియల్ కస్టడీని పొడగించారు. గ్యాంగస్టర్లు, రేపిస్టులు, హంతకులు దేశంలో స్వేచ్ఛగా తిరుగుతున్నారంటూ సీజేపీ కీలక నాయకుడు ధ్రువ్ రాఠీ విమర్శించడాన్ని, అకారణంగా ఆశుతోష్ రానా, సౌరవ్ దాస్ జ్యుడిషియల్ కస్టడీనికి పొడగించారనీ, కళ్ల ముందే న్యాయవ్యవస్థ విఫలమవుతున్నదనడానికి ఇదే నిదర్శనమని సీజేపీ లీగల్ అఫైర్స్ హెడ్ రత్న సింగ్ ఆక్షేపించడాన్నిఎవరూ తప్పుపట్టలేరు. ఎన్నికల ర్యాలీల సందర్భంగా గంటల తరబడి ట్రాఫిక్ జామ్‌లు కావడం లేదా, నిరసనల వల్ల మాత్రమే ట్రాఫిక్ జామ్‌లు అవుతున్నాయా అంటూ పలువురు ప్రశ్నించడాన్ని కూడా ఈ కోణంలోనే చూడాల్సి ఉంటుంది. న్యాయం ఒకేరకంగా అందరికీ అందడం లేదనడానికి ఆశుతోష్ రానా, సౌరవ్ దాస్ ఉదంతమే తాజా నిదర్శనం. [CJP Agitation Historic Necicity, Jantar Mantar Protests,Arrest Ashutosh Rana, Dhruv Rathee,Constitutional Institutions, Telugu One]

Published on: Sat Oct 24, 2026 4:35PM

కూటమిలో చిచ్చుకు సోషల్ మీడియాలో ఫేక్ ప్రచారం: అరికట్టాల్సిన బాధ్యత జనసేనానిదే.!

రాష్ట్రంలో ఒక కూటమి అధికారంలో ఉన్నప్పుడు, అక్కడ అవాంఛనీయ సంఘటనలు జరగడానికి లేదా కూటమి స్థిరత్వంపై తప్పుడు ప్రచారాలు సాగడానికి అవకాశం ఉంటుంది. ఆంధ్రప్రదేశ్ విషయానికి వస్తే.. రాష్ట్రంలో తెలుగుదేశం కూటమి అధికారంలో ఉంది. ఆ కూటమి సర్కార్ బలంగా ఉన్నట్లు కనిపిస్తున్నా కూటమి ఐక్యత, సీట్ల సర్దుపాట్లు రాజకీయ వర్గాలలో చర్చలకు తావిస్తున్నాయి. ఇక పొత్తు విచ్ఛిన్నం ఊహాగానాలు సంచలనం రేపుతున్నాయి. తాజాగా స్థానిక ఎన్నికల వేళ ఉప ముఖ్యమంత్రి పవన్ కల్యాణ్ నేతృత్వంలోని జనసేన పార్టీ తీరు, దూకుడు పట్ల పెద్ద ఎత్తున చర్చ ఆరంభమైంది. పార్టీ నిర్వహణకు సంబంధించిన కొన్ని అంశాలు సోషల్ మీడియాలో ప్రతికూల ప్రచారానికి దోహదం చేస్తున్నాయి. ముఖ్యంగా, జనసేన పార్టీకి చెందినవిగా చెప్పుకునే కొన్ని సోషల్ మీడియా ఖాతాల ద్వారా కూటమి ఐక్యతను దెబ్బతీసే పోస్టులు కనిపించడం సంచలనం సృష్టిస్తోంది. మొదట, స్థానిక సంస్థల ఎన్నికల్లో తమకు 40 శాతం సీట్లు దక్కుతాయని జనసేన అనుకూల సోషల్ మీడియా ఖాతాలలో పెద్ద ఎత్తున ప్రచారం జరిగింది. వాస్తవానికి వాస్తవానికి ఆ పార్టీకి పొత్తు ధర్మంలో భాగంగా పాతిక శాతం కంటే తక్కువ సీట్లు దక్కాయి. అంతకు ముందు 40 శాతం అంటూ జరిగిన ప్రచారం కారణంగా జనసేన శ్రేణులు, ద్వితీయ శ్రేణి నాయకులలో నిరాశ, నిస్ఫృహలు నెలకొన్నాయి. అది సహజం కూడా. కానీ మొదటే సోషల్ మీడియాలో అదీ జనసేన అనుకూల సామాజిక మాధ్యమంలో అతిగా జరిగిన తప్పుడు ప్రచారాన్ని అరికట్టలేకపోవడం జనసేన తప్పుగా పరిశీలకులు విశ్లేషిస్తున్నారు. అప్పుడు అరికట్టలేదు సరికదా.. ఆ తరువాత కూడా కూటమి ఐక్యతను దెబ్బతీసే ప్రచారం జనసేన అనుకూల సోషల్ మీడియాలో విస్తృతంగా జరుగుతోంది. స్థానిక ఎన్నికల తర్వాత పవన్ కళ్యాణ్ ఉప ముఖ్యమంత్రి పదవికి రాజీనామా చేస్తారని, అలాగే ఆయన పార్టీకి చెందిన మంత్రులు కూడా తమ పదవుల నుంచి వైదొలగుతారంటూ సామాజిక మాధ్యమం కథనాలు వండి వారుస్తుండటం కూటమి పార్టీలలో కలకలం సృష్టిస్తోంది. సీట్ల సర్దుబాటులో జనసేనకు న్యాయం జరగలేదన్న అసంతృప్తి జనసేనానిలో ఉందనీ, అందుకే ఆయన రాజీనామా నిర్ణయానికి వచ్చారన్న ప్రచారం రాజకీయవర్గాలలో సంచలనం సృష్టిస్తోంది. ఈ ప్రచారం జనసేన మద్దతుదారుల పేర జరుగుతుండటం గమనార్హం. ఈ ప్రచారాన్ని ఖండిస్తూ లేదా సమర్థిస్తూ జనసేన నుంచి ఎటువంటి స్పందనా లేకపోవడంతో రాజీనామా ఊహాగాన సభలు జోరుగా సాగుతున్నాయి. వీటన్నిటికీ చెక్ పెట్టడానికి ప్రోటోకాల్ ను కూడా పక్కన పెట్టి జనసేనాని చంద్రబాబు అధికారిక నివాసానికి వెళ్లి భేటీ అయిన తరువాత కూడా ఈ ప్రచారం ఆగలేదు. ఇటువంటి ప్రచారాలు రాజకీయంగా, సామాజికంగా తప్పుడు అంచనాలకు, సంకేతాలకూ దారి తీసే ప్రమాదం ఉంది. ఈ రకమైన ప్రచారం ఇది కూటమి ఐక్యతకు ఏమంత మంచిది కాదని పరిశీలకులు అంటున్నారు. ఒక వైపు జనసేనాని పవన్ కల్యాణ్ 15 ఏళ్ల పాటు కూటమి స్థిరంగా కొనసాగుతుందని పదే పదే చెబుతున్న వేళ.. అదే జనసేన అనుకూల సోషల్ మీడియా ఖాతాలలో పొత్తు విచ్ఛిన్నం అంటూ కథనాలు రావడం పార్టీ క్యాడర్ లో అయోమయానికి దారి తీస్తుంది. ఇటువంటి ప్రచారాన్ని నిర్ద్వంద్వంగా ఖండిచి అరికట్టాల్సిన బాధ్యత జనసేనానిపై ఉంది. ప్రజల్లో ప్రభుత్త్వంపై అనవసరమైన అనుమానాలు రేకెత్తించే ఉద్దేశంతోనే ఇలాంటి వదంతుల ప్రచారం ఉద్దేశపూర్వకంగా జరుగుతోందనడంలో సందేహం లేదు. పార్టీ పేరును అడ్డం పెట్టుకుని ఇష్టానుసారంగా నిరాధార వార్తలను సృష్టిస్తున్న సోషల్ మీడియా ఖాతాల తీరుపై జనసేన అధిష్టానం ఇప్పటికైనా దృష్టి పెట్టాలి. ఇలాంటి దుష్ప్రచారాలను కట్టడి చేయకపోతే, రాబోయే రోజుల్లో ఇది పార్టీకి, ప్రభుత్వ స్థిరత్వానికి సవాలుగా మారే ప్రమాదం ఉంది. ఈ తప్పుడు ప్రచారాలను సకాలంలో అడ్డుకోకపోతే, అది శ్రేణుల్లో గందరగోళానికి దారితీస్తుంది. కాబట్టి జనసేన నాయకత్వం ఈ అంశంపై మరింత కఠినంగా వ్యవహరించి, అసత్యాలను ప్రచారం చేస్తున్న వారిపై చట్టపరంగానూ, పార్టీపరమైన చర్యలు తీసుకోవాల్సిన అవసరం ఉంది. సోషల్ మీడియాలో జరిగే తప్పుడు ప్రచారాలను ఎప్పటికప్పుడు తిప్పికొట్టేలా పటిష్టమైన యంత్రాంగాన్ని ఏర్పాటు చేయడం ద్వారా మాత్రమే ఈ సమస్య పరిష్కారం అవుతుంది. [Jana Sena fake news Social Media, Pawan Kalyan Resignation, Politics, Alliance, Andhra Pradesh, Jana Sena Social Media, Telugu One]

Published on: Fri Oct 23, 2026 9:14AM

పొత్తు ధర్మం తెలుగుదేశం పాటిస్తే సరిపోతుందా: పవన్ మౌనం వెనుక సంకేతమేంటి.?

ఆంధ్రప్రదేశ్ లో పొత్తు ధర్మం పాటించాల్సిన అవసరాన్ని జనసేన విస్మరించిందా? అంటే జరుగుతున్న పరిణామాలను గమనిస్తున్న ఎవరైనా ఔనన్న సమాధానమే ఇస్తారు. స్థానిక ఎన్నికల వేళ సీట్ల సర్దు పాట్లు సజావుగా జరిగాయని కూటమి పార్టీల అగ్రనేతలు చెబుతున్నారు. అయితే క్షేత్రస్థాయిలో మాత్రం పరిస్థితి పూర్తి భిన్నంగా ఉంది. పెద్ద సంఖ్యలో తెలుగుదేశం, జన సేన పార్టీల నుంచి రెబల్స్ రంగంలోకి దిగారు. ఇప్పుడు ఆ రెబల్స్ ను పోటీ నుంచి ఉపసంహరింప చేసుకునేలా బుజ్జగించడమో, హెచ్చరించడమో చేయాల్సిన బాధ్యత తెలుగుదేశం, జనసేన అధినాయకత్వంపై ఉంది. అది పొత్తు ధర్మం కూడా. కానీ ఈ పొత్తు ధర్మాన్ని పాటించే విషయంలో తెలుగుదేశం మాత్రమే ముందుకు వచ్చింది. జనసేన నుంచి పొత్త ధర్మం పాటిస్తున్న దాఖలాలు కనిపించడం లేదు. ఇలా ఎందుకు చెప్పాల్సి వస్తోందంటే... తెలుగుదశం రెబల్స్ కు చంద్రబాబునాయుడు అల్టిమేటం జారీ చేశారు. స్థానక ఎన్నికలలో పార్టీ నిర్ణయానికి వ్యతిరేకంగా దాఖలు చేసిన నామినేషన్లను ఉపసంహరించుకోవాలని విస్పష్ట సందేశం పంపారు. నామినేషన్లు ఉపసంహరించుకోకుంటే సస్పెన్షన్ తప్పదన్న స్ట్రాంగ్ వార్నింగ్ ఇచ్చారు. తెలుగుదేశం పార్టీ నుంచి పొత్తు ధర్మానికి అనుగుణంగా చంద్రబాబు విస్పష్ట నిర్ణయం తీసుకున్నారు. పార్టీ నేతలు, శ్రేణులకు అందుకు అనుగుణంగా హెచ్చరికలు జారీ చేశారు. అయితే అదే సమయంలో జనసేన అధినేత పవన్ కల్యాణ్ మాత్రం తమ పార్టీ రెబల్స్ విషయంలో మౌనం వహించారు. ఇంత వరకూ ఆ పార్టీ రెబల్స్ కు ఎటువంటి హెచ్చరికా జారీ చేయలేదు. ఇది అలుసుగా తీసుకుని జనసైనికులు, ఆ పార్టీ నేతలు లక్ష్మణ రేఖ దాటి తెలుగుదేశం పార్టీకి హెచ్చరికలు జారీ చేస్తున్నారు. ప్రతి నియోజకవర్గంలో జనసేనకు 30% సీట్లు కేటాయించాలని డిమాండ్ చేస్తూ జనసేన నాయకుడు బోలిశెట్టి సత్యనారాయణ ఈ వివాదాన్ని తీవ్రతరం చేశారు. అక్టోబర్ 21న ఆయన తమ 30శాతం సీట్ల డిమాండ్ పై స్పందించేందుకు తెలుగుదేశం పార్టీకి మూడు గంటల టైమ్ లైన్ విధించారు. ఆ గడువులోగా తమ డిమాండ్ కు అంగీకరించకుంటే.. స్థానిక పోరులో తెలుగుదేశం పార్టీకి వ్యతిరేకంగా పని చేయానికి వెనుకాడబోమని అల్టిమేటమ్ ఇచ్చారు. ఇదిలా ఉండగా, తిరుగుబాటు అభ్యర్థులు తమ నామినేషన్లను ఉపసంహరించుకునేలా చూడాలని చంద్రబాబు నాయుడు టీడీపీ నాయకులను ఆదేశించారు. పార్టీ నిర్ణయాన్ని ధిక్కరించిన వారిని సస్పెండ్ చేస్తామని హెచ్చరించారు. జనసేన, బీజేపీలతో పొత్తు ఒప్పందాన్ని గౌరవించాలని మిత్రధర్మానికి అనుగుణంగా వ్యవహరించాలని హితవు పలికారు. పొత్త ధర్మంలో భాగంగా సీట్లు దక్కని వారిని నామినేటెడ్ పదవులకు పరిశీలిస్తామని భరోసా ఇచ్చారు. అయితే జనసేన నుంచి మాత్రం ఇంత వరకూ అలాంటి ప్రకటన ఏదీ వెలువడలేదు. రెబల్స్ ను రంగం నుంచి తప్పుకోవాలన్న హెచ్చరిక, సూచన పవన్ నుంచి రాలేదు. బోలిసెట్టి వంటి వారి నోటి దురుసు ప్రకటనను ఖండించలేదు. అందుకే పవన్ మౌనం పొత్తు ధర్మం విషయంలో జనసేన చిత్తశుద్ధిపై సందేహాలు వ్యక్తమయ్యేలా చేసింది. [Janasena TDP Seat Sharing, Pawan Kalyan Silence, AP Local Body Elections, NDA Alliance Andhra Pradesh, TDP and Janasena Dissent, Telugu One]

Published on: Thu Oct 22, 2026 4:50PM

ఏపీ స్థానిక సమరం: జగన్ సుద్దపూస కబుర్లు.. వినేవారెవరు.?

మునిసిపల్ ఎన్నికల నామినేషన్ల పర్వం గురించి గవర్నర్‌ను కలిసిన జగన్మోహన్ రెడ్డి, మీడియా ముందు వెళ్ళబుచ్చిన ఆవేదనలో ప్రత్యేకత ఉన్నది. అరాచకాలకు సంబంధించిన వివరణలో ఆయన వర్ణన బాగుంటుంది. అది వివేకానందరెడ్డికి తగిలిన గొడ్డలి దెబ్బల గురించి అయినా, వైసీపీ ప్రభుత్వ హయాంలో స్థానిక సంస్థల ఎన్నికలు జరిగిన విధానం గురించి అయినా.. ప్రస్తుతం జరగబోతున్న ఎన్నికలలో కూటమి ప్రభుత్వం అరాచకాలను చేస్తుందేమో అనే ఊహతోనే ఆయన స్పష్టంగా పిన్ టు పిన్ వర్ణిస్తారు. ఈ విషయంలో జగన్మోహన్ రెడ్డి ఇప్పుడున్న అనేకమంది రాజకీయ నాయకుల కంటే తెలివితేటలలో ఆరితేరారు. వైసిపికి స్థానిక సంస్థల ఎన్నికలలో గెలిచే అవకాశం ఇసుమంతైనా కనిపించటం లేదు. వాస్తవంగా చెప్పాలంటే అభ్యర్థులు కూడా దొరకని పరిస్థితి. తన హయాంలో తనకు అండగా నిలిచిన సహచరులు అరెస్ట్ అవుతున్నారు. కొత్త కేసులు ఎప్పుడు వచ్చి తన తలుపు తడతాయో తెలియని పరిస్థితి. పాత కేసులు రోజువారీ విచారణకు రానున్నాయి. వీటన్నిటి మధ్య ఎన్నికల సంరంభం. కార్పొరేషన్ మేయర్లను, మునిసిపల్ చైర్మన్లను ప్రత్యక్ష ఎన్నిక విధానంలో ఎన్నుకునే పద్ధతిని తీసుకువచ్చి చంద్రబాబు నాయుడు వ్యూహాత్మకంగా జగన్మోహన్ రెడ్డిని దెబ్బకొట్టారు. మేయర్, మునిసిపల్ చైర్మన్లను గతంలో మాదిరిగా కౌన్సిలర్లు, కార్పొరేటర్లు ఎన్నుకునే విధానమే ఉంటే.. పోటీ చేయటానికి అభ్యర్థులను వెతుక్కునే పరిస్థితి ఉండేది కాదు. కౌన్సిలర్లు, కార్పొరేటర్లకు ఒక ఆశ ఉండేది. తాము గెలిస్తే మేయర్ పదవి కోసం పార్టీల అధిష్టానాన్ని ఒప్పించుకోవచ్చు. ఇప్పుడు ఆ ఆశ లేదు. గతంలో వారు తమ ఎన్నికకు అయ్యే ఖర్చు ఒక్కటి పెట్టుకుంటే సరిపోయేది. ఇప్పుడు మేయర్ అభ్యర్థికి మిగిలిన సభ్యులతో పని లేదు. మేయర్ అభ్యర్థి తనను తాను గెలిపించుకుంటే సరిపోతుంది. అధికార పార్టీ కౌన్సిలర్లు, కార్పొరేటర్లకు ప్రభుత్వంలో పనులు జరిగే అవకాశం ఉంటుంది కాబట్టి వాళ్లకు అభ్యర్థుల కొరత కనిపించదు. అదే అధికారంలో లేని పార్టీ వారు అయితే చేయగలిగేది ఏమీ ఉండదు అనే నిర్లిప్తతతో పోటీ చేయటానికి వైసీపీ వైపుఎవరూ మొగ్గు చూపడం లేదు. ఆంధ్రప్రదేశ్ మునిసిపల్ ఎన్నికల పోరులో అధికార పక్షానిదీ, వైసీపీదీ ఒకటే దారి. వైసీపీని నామినేషన్లు వేయకుండా చూడాలని అధికార పార్టీ ఆలోచన. 2021 లో జరిగిన స్థానిక పోరులో నామినేషన్లు వేయలేని పరిస్థితుల్లో తెలుగుదేశం పార్టీ ఎన్నికలనే బహిష్కరించింది అనటమే సబబు. ఆ రోజు కుప్పంలో కూడా నామినేషన్ వేయనీయని పరిస్థితి. జగన్మోహన్ రెడ్డి రాజకీయాలను ప్రజల పరంగా కాకుండా వ్యక్తిగతంగా తీసుకోవటం వలన కుప్పం టార్గెట్ అయింది. అందుకే తెలుగుదేశం పులివెందులను టార్గెట్ చేసింది. అది తెలుగుదేశం అధినాయకత్వం ఆదేశాల మేరకా.. లేక గతంలో తమను టార్గెట్ చేసిన వైసీపీ మీద అదే జులుం చేయాలని కార్యకర్తల నిర్ణయమా? అంటే కార్యకర్తల నిర్ణయం అనే చెప్పాల్సి ఉంటుంది. అందుకే జగన్ పోటీ చేసి ఓడిపోవటం కంటే, నామినేషన్లు వేయనీయలేదనే నెపంతో తప్పుకోవటం మంచిది అనే ఆలోచన చేసినట్లుగా కనిపిస్తున్నది. వైసీపీ హయాంలో రాష్ట్రంలో ఎక్కడా తెలుగుదేశం అభ్యర్థులు నామినేషన్లు వేయనీయకుండా చేసింది. తెలుగుదేశం ఇప్పుడే కాదు, ఎప్పుడూ కూడా ఇలాంటి అరాచకాలకు పాల్పడలేదు. ఆ పార్టీ అధినేత అందుకు ఇసుమంతైనా అంగీకరించరు. ఆ విషయం ఆయన ప్రత్యర్థులకే కాదు.. తెలుగుదేశం నాయకులు, శ్రేణులకు కూడా తెలుసు. అందుకే గతంలో అంటే వైసీపీ హయాంలో స్థానిక సమరం సమయంలో వైసీపీ ఎక్కడెక్కడ గూండాయిజం చేసిందో.. అక్కడే సత్తా చూపించాలని ఎక్కడికక్కడ తెలుగుదేశం క్యాడర్, లీడర్ ప్రయత్నం చేసినట్లు కనిపిస్తోంది. రాష్ట్రవ్యాప్తంగా జరిగిన స్థానిక నామినేషన్ల పర్వాన్ని గమనిస్తే, వైసీపీ హయాంలో జరిగినంత అరాచకం లేదనడం వాస్తవం. ఒకటి రెండు చోట్ల మరీ ముఖ్యంగా సీమలో వైసీపీ నామినేషన్లను అడ్డుకోవడం జ.రిగిందంటే.. అక్కడ ఆ పరిస్థితిని సృష్టించింది, అటువంటి అరాచకానికి నాంది పలికిందీ వైసీపీయే అని పరిశీలకులు విశ్లేషిస్తున్నారు. పుంగనూరులో మిథున్ రెడ్డి తన వాహనంతో మొదలుపెట్టిన అరాచకం, రాయలసీమ నుండి ఉమ్మడి గుంటూరు జిల్లా వరకు ఒక హింసాత్మక వాతావరణాన్ని సృష్టించింది. అందుకే టీడీపీ శ్రేణులూ తిరగబడ్డాయి. దీంతో వైసీపీ అభ్యర్థులు నామినేషన్లు వేయలేని పరిస్థితులు కొన్ని చోట్ల నెలకొన్నాయి. అయినా అరాచకం, హింస విషయాలలో వైసీపీయులదే పై చేయి అయ్యింది. అయినా కూడా.. జగన్ పోలీసులు లక్షయంగా రెచ్చిపోయారు. ప్రెస్ మీట్‌లో కర్నూలు డీఐజీ కోయ ప్రవీణ్ పేరు ప్రస్తావించి మరీ వార్నింగ్ ఇచ్చారు. ఆయనను తెలుగుదేశం కార్యకర్తగా అభివర్ణించారు. ఇక పోతే తెలుగుదేశం నాయకుడు బీటెక్ రవి కడప జిల్లాలో తొలి సారిగా ఫెయిర్ ఎలక్షన్ జరుగుతోందని చేసిన వ్యాఖ్యలు.. అక్కడి పరిస్థితికి అద్దం పట్టింది. గతంలో పులివెందులలో వేరే వాళ్లు నామినేషన్లు వేయగలిగే పరిస్థితి ఉండేది కాదు. కానీ ఇప్పడు వైసీపీ అభ్యర్థులు నామినేషన్లు వేయగలిగారు. అందుకే బీటెక్ రవి పులివెందులలో ఫెయిర్ ఎలక్షన్ అన్నారు. పుంగనూరు పుడింగి పెద్దిరెడ్డి రామచంద్రారెడ్డి దూకుడు ప్రదర్శించి హడావుడి చేసినా వెనక్కు తగ్గక తప్పలేదు. మొత్తంగా స్థానిక సమరంలో వైసీపీ అరాచకాలను, హింసను, దౌర్జన్యాలనూ అడ్డుకోవడానికి తెలుగుదేశం శ్రేణులు ఒకింత దూకుడుగానే వ్యవహరించాయి. అవసరమైతే తామూ తిరగబడగలమని నిరూపించుకునే ప్రయత్నం చేశాయి. అది సహజం కూడా. కానీ వైసీపీ అధినేత, మాజీ ముఖ్యమంత్రి జగన్ కు మాత్రం తత్వం బోధపడి బొమ్మ కనిపించింది. ఎలక్షన్ కమిషన్ గొప్ప వ్యవస్థ అనే విషయం గుర్తుకు వచ్చింది. ఆ వ్యవస్థ తన పరువును కాపాడుకోవాలని హితవు పలికారు. తాను అధికారంలో ఉన్నప్పుడు ఆనాటి రాష్ట్ర ఎన్నికల కమిషనర్ నిమ్మగడ్డ రమేష్ కుమార్ పట్ల తాను వ్యవహరించిన తీరుకు, ఆయన సామాజిక వర్గం ఏమిటో తానే ఊహించుకుని ఆయనపై చేసిన నిరాధార ఆరోపణలకు క్షమాపణలు చెప్పి.. ఇప్పుడా హితవు పలికి ఉంటే ఇంకా బాగుండేది. కానీ జగన్ కదా.. అందుకే ఇప్పుడు కూడా నిమ్మగడ్డ ప్రసాద్ ను నిందించే ప్రయత్నమే చేస్తున్నారు. ఈ మధ్య కాలంలో జగన్మోహన్ రెడ్డి ఎన్నికల కమిషనర్ల నియామక చట్టానికి మద్దతు తెలిపి తాను పెద్ద తప్పు చేశానని పదే పదే చెబుతున్నారు. భారత ఎన్నికల సంఘం కమిషనర్ల నియామకంలో భారత ప్రధాన న్యాయమూర్తి ఉండాలంటున్నారు. పాపం ఆయనకు గతం గుర్తులేదేమో.. ఇదే జగన్ ఆంధ్రప్రదేశ్‌కే చెందిన భారత ప్రధాన న్యాయమూర్తిని ఇరుకున పెట్టేందుకు చేసిన ప్రయత్నాలను ఆయనకు గుర్తు చేయాల్సిన అవసరం ఉంది. . ఇప్పుడు రాష్ట్ర ఎన్నికల కమిషనర్ నియామకంలో రాష్ట్ర హైకోర్టు ప్రధాన న్యాయమూర్తి ఉండాలని మరింత గట్టిగా చెబుతున్నారు. కానీ న్యాయవ్యవస్థ పైన, న్యాయమూర్తుల పైన ఇష్టారాజ్యంగా అసభ్యకరమైన పదజాలంతో తన అనుయాయులు పెట్టిన పోస్టుల వ్యవహారంలో హైకోర్టు నోటీసులు ఇచ్చినా మారని పరిస్థితిని ముందు చక్కదిద్దుకుని, వారిని తీసుకుని వచ్చి న్యాయస్థానానికి అప్పజెబితే అప్పుడు జగన్మోహన్ రెడ్డి వ్యవస్థలను గౌరవిస్తారని, నిజంగానే ఆయనలో మార్పు వచ్చింది అని ఎవరైనా నమ్ముతారు. లేకుంటే తాను అధికారంలో ఉన్నప్పుడు ఏ వ్యవస్థలనైతే అవమానపరిచారో, బాధ్యతాయుతమైనపదవుల్లో ఉన్నవారిని వ్యక్తిగతంగా ఎలా దూషించారో, వారిని వారి బాధ్యతలను నిర్వర్తించకుండా ఎలా అడ్డు పడ్డారో విస్మరించి ఇప్పుడు ఇలా సుద్దపూసను అన్నట్లుగా జగన్ చెబుతున్న సుద్దులను నమ్మడానికి జనం సిద్ధంగా లేరని ఆయనకు చెప్పాల్సిన అవసరం ఉంది. ఏది ఏమైనా ఇక్కడ ఒక్క విషయం చెప్పుకోవాలి. స్థానిక ఎన్నికల నామినేషన్ల పర్వంలో వైసీపీ స్థాయిలో కాకున్నా..చోట్ల తెలుగుదేశం కూడా పరిధి దాటింది. అలా జరగాల్సింది కాదు. ఆ పరిస్థితి తెలుగుదేశం పార్టీకే కాదు, ఆంధ్రప్రదేశ్ కు కూడా మేలు చేయదు. ప్రజాస్వామ్య స్ఫూర్తికి కట్టుబడటంలో తెలుగుదేశం పార్టీకి ఉన్న ప్రతిష్టను, గుర్తింపును ఇటువంటి చర్యలు ఏదో ఒక మేరకు మసకబారుస్తాయి. ఈ విషయంపై చంద్రబాబు దృష్టి పెట్టాల్సిన అవసరం ఉంది. [Jagan Change Stand, AP Local Body Elections, Jagan Mohan Reddy, Chandrababu Naidu, YCP, TDP, Nominations, Violence, Andhra Pradesh Politics]

Published on: Tue Oct 20, 2026 11:54AM

జగన్ మాట నిలుపుకుంటారా? పులివెందుల బరి నుంచి తప్పుకుంటారా.?

ఆంధ్ర ప్రదేశ్ లో స్థానక సమరం వైసీపీని ఇరకాటంలో పడేసింది. స్థానక సమరం విషయంలో చాలా చాలా గట్టిగా నిలబడతామనీ, ఏకగ్రీవాలకు అస్సలు అవకాశం ఇవ్వమనీ చాలా చాలా ధీమాగా ప్రకటించిన వైసీపీ అధినేత జగన్.. ఆ ప్రకటన సందర్భంగా పార్టీ నేతలకు పలు హెచ్చరికలు కూడా జారీ చేశారు. ఆ హెచ్చరికలే ఇప్పుడు అసలాయన వచ్చే ఎన్నికలలో పులివెందుల అసెంబ్లీ బరిలో నిలబడతారా? అలా నిలబడితే.. ఆయన స్వయంగా పార్టీ నేతలకు చేసిన హెచ్చరికలు ఏమవుతాయి అన్న చర్చ ఇప్పుడు ఏపీ పొలిటికల్ సర్కిల్స్ లో జోరుగా సాగుతోంది. ఇంతకీ స్థానిక ఏకగ్రీవాలపై ఆయన చేసిన హెచ్చరికలేంటని ఓ సారి చూస్తే.. స్థానిక ఎన్నికల్లో ఎక్కడైనా సరే ఏకగ్రీవాలు జరిగితే ఆయా నియోజకవర్గాల ఇంచార్జిలకు 2029 అసెంబ్లీ ఎన్నికల్లో పోటీ చేసేందుకు టికెట్ కేటాయించబోనని జగన్ స్పష్టమైన హెచ్చరిక జారీ చేశారు. ప్రస్తుతం రాష్ట్రవ్యాప్తంగా జరుగుతున్న పరిణామాలు ఈ నిబంధనను స్వయంగా ఆయన సొంత నియోజకవర్గంతో పాటు పార్టీ సీనియర్ నేతలకే ఎసరుపెట్టే పరిస్థితులు ఏర్పడ్డాయి. జగన్ సొంత నియోజకవర్గం పులివెందులలోనే పరిస్థితి జగన్ కు మింగుడుపడటం లేదు. పులివెందుల నియోజకవర్గంలోనే సుమారు 16 వార్డులు ఏకగ్రీవమైనట్లు తెలుస్తోంది. పులివెందుల మాత్రమే కాకుండా, రాష్ట్రంలోని పలు ప్రాంతాల్లో వైకాపా అభ్యర్థులు నామినేషన్లు వేయకపోవడం లేదా ఎన్నికలకు దూరంగా ఉండటం గమనార్హం. ప్రకాశం జిల్లా దర్శి మున్సిపాలిటీలో చైర్మన్ పదవితో పాటు ఒక్క వార్డుకు కూడా వైకాపా నామినేషన్ దాఖలు చేయకపోగా, కమలాపురం, మైదుకూరు వంటి ప్రాంతాల్లోనూ ఇదే పరిస్థితి. అనంతపురం జిల్లా తాడిపత్రి, గుత్తి, ఎర్రగుంట, తిరుపతి కార్పొరేషన్, పుంగనూరు వంటి పలు నియోజకవర్గాల్లోనూ పార్టీ అభ్యర్థులు నామినేషన్లు వేయలేదు. రాయచోటి, మైదకూరు మునిసిపల్ చైర్మన్ పదవులు ఏకగ్రీవంగా తెలుగుదేశం ఖాతాలో పడ్డాయి. ఈ నేపథ్యంలో జగన్ హెచ్చరిక మేరకు ఆయన పులివెందుల అసెంబ్లీ టికెట్ కు దూరం కావాలి. అలాగే పుంగనూరు పుడింగి.. పెద్దిరెడ్డి రామచంద్రారెడ్డికి కూడా పార్టీ టికెట్ ఇవ్వకూడదు. ఇదే విషయాన్ని తెలుగుదేశం కూటమి నాయకులు ఎత్తి చూపుతూ జగన్ కు సవాల్ విసురుతున్నారు. సొంత కంచుకోట పులివెందులలోనే ఏకగ్రీవాలను నివారించడంలో విఫలమైన జగన్ పులివెందుల నుంచి ఎలా పోటీ చేస్తారని నిలదీస్తున్నారు. జగన్ తన మాటకు కట్టుబడి పోటీకి దూరంగా ఉండటమే కాకుండా, పెద్దిరెడ్డి తదితరులకు కూడా పార్టీ టికెట్ ఇవ్వకూడదని అంటున్నారు. ఎన్నికల్లో అధికార పార్టీ వేధింపులు, పోలీసుల తీరు వల్లే నామినేషన్లు వేయలేకపోయినట్లు జగన్ చెప్పుకుంటున్నప్పటికీ.. పరిశీలకులు మాత్రం జగన్ హయాంలోలా ఏపీలో ఇప్పుడు ఎక్కడా అంతటి అరాచకత్వం లేదని విశ్లేషిస్తున్నారు. అధికారం కోల్పోయిన తర్వాత కూడా పార్టీ శ్రేణుల్లో నైతికస్థైర్యం నింపడంలో నాయకత్వం విఫలమవుతోందనీ, మరీ ముఖ్యంగా బలమైన నాయకులు ప్రాతినిధ్యం వహించే నియోజకవర్గాల్లో సైతం నామినేషన్ల ప్రక్రియలో వెనకడుగు వేయడం పార్టీ అంతర్గత బలహీనతలను బయటపెడుతోందని విశ్లేషకులు అంటున్నారు. మొత్తంగా చూస్తే, జగన్ జారీ చేసిన నిబంధనే ఇప్పుడు ఆయనకు అతిపెద్ద సవాలుగా మారింది. ఇచ్చిన మాటకు కట్టుబడి చర్యలు తీసుకుంటే సీనియర్ నాయకులు దూరం అవుతారు.. ఒకవేళ వెనక్కి తగ్గితే అధినేత మాటపై విశ్వసనీయత సన్నగిల్లుతుంది. [Ap Local body Elections, unanimous, Jagan Caution,municipal elections, Pulivendula, YSRCP politics, Seniors, Assembly Tickete, Telugu One]

Published on: Mon Oct 19, 2026 11:44AM

స్థానిక ఎన్నికలు: తెలుగుదేశం తొలి జాబితా.. సామాజిక సమతుల్యం, యువత, విద్యావంతులకు పెద్దపీట.!

ఆంధ్రప్రదేశ్‌ స్థానిక సంస్థల ఎన్నికల సమరానికి తెలుగుదేశం పార్టీ సన్నద్ధమౌతోంది. ఇందులో భాగంగా ఈ ఎన్నికలలో పోటీ చేసే అభ్యర్థుల తొలి జాబితాను విడుదల చేసింది. సామాజిక సమతుల్యత, యువతకు పెద్ద పీట, విద్యావంతులకు ప్రాధాన్యత ఇస్తూ వెలువడిన తొలి జాబితాపై పార్టీ వర్గాల్లో హర్షాతిరేకాలు వ్యక్తమౌతున్నాయి. మొత్తం ఏడు మున్సిపల్ కార్పొరేషన్లు, 29 మున్సిపాలిటీలకు మేయర్, ఛైర్మన్ అభ్యర్థుల పేర్లను తెలుగుదేశం తొలి జాబితాలో ప్రకటించింది. ఈ జాబితా ద్వారా సామాజిక న్యాయానికి కట్టుబడి ఉన్నట్లు విస్పంష్టంగా చాటింది. విడుదల చేసిన మొత్తం 36 స్థానాల జాబితాను పరిశీలిస్తే, అత్యధికంగా 22 స్థానాలు అంటే దాదాపు 61 శాతం బీసీ, ఎస్సీ, ఎస్టీ, మైనారిటీ వర్గాలకు చెందిన నాయకులకే కేటాయించింది. మరీ ముఖ్యంగా బీసీలకు అత్యధిక ప్రాధాన్యత ఇస్తూ 16 స్థానాలను అంటే రమారమి 44 శాతం సీట్లను కేటాయించింది. అలాగే ప్రకటించిన ఏడు మున్సిపల్ కార్పొరేషన్లలో ఏకంగా ఐదు మేయర్ స్థానాలను బీసీ, ఎస్సీ వర్గాలకే కేటాయించింది. పార్టీ తమ సామాజిక ఆకాంక్షలను ఆచరణలో చూపించింది. ఇక ఆళ్లగడ్డ, రాయచోటి పరిధిలో మైనారిటీ వర్గాలకు అవకాశం ఇచ్చింది. ఈసారి అభ్యర్థుల ఎంపికలో విద్యా అర్హతలకు, యువ నాయకత్వానికి తెలుగుదేశం పెద్ద పీట వేసింది. మొత్తం 36 మంది అభ్యర్థుల్లో 25 మంది అంటే సుమారుగా 76 శాతం మంది డిగ్రీ లేదా అంతకంటే ఎక్కువ చదివిన వారే కావడం విశేషం. ఈ 36 మందిలొ ఏడుగురు పీజీ పట్టభద్రులు, ఎంబీఏ, ఎంసీఏ, ఎంఎస్సీ పూర్తి చేసిన అభ్యర్థులతో పాటు ముగ్గురు వైద్యులు కూడా ఉన్నారు. అభ్యర్థుల సగటు వయస్సు 45.7 సంవత్సరాలుగా ఉండగా, 16 మంది 45 ఏళ్లలోపు వారే కావడం యువ రక్టానికి తెలుగుదేశం ఇచ్చిన ప్రాధాన్యతను ఎత్తిచూపుతోంది. రాజంపేట నుంచి పోటీ చేస్తున్న 26 ఏళ్ల డాక్టర్ దంతం గాయత్రి వీరిలో అత్యంత పిన్న వయస్కురాలైన అభ్యర్థిగా నిలిచారు. స్థానిక సంస్థల్లో మహిళా సాధికారతను ప్రోత్సహించే దిశగా టీడీపీ మరో అడుగు ముందుకేసింది. చట్టబద్ధంగా మహిళలకు రిజర్వ్ అయిన 17 స్థానాల పరిధిని దాటి, మరో రెండు జనరల్ స్థానాల్లోనూ మహిళలకే అవకాశం కల్పించింది. సాధారణ కేటగిరీకి చెందిన చిత్తూరు కార్పొరేషన్, బద్వేల్ మున్సిపాలిటీల్లో మహిళా అభ్యర్థులను ఖరారు చేయడం ద్వారా మొత్తం 19 మంది మహిళలకు అంటే 53 శాతం అవకాశం ఇచ్చింది. క్షేత్రస్థాయిలో ప్రజల ఆమోదం, వ్యక్తిగత ప్రతిష్ట, విద్యా అర్హతలు, సామాజిక వర్గాల ప్రాతినిధ్యం ప్రాతిపదికగానే ఈ ఎంపికలు జరిగాయని పార్టీ వర్గాలు వెల్లడించాయి. సుదీర్ఘంగా నిర్వహించిన అంతర్గత సర్వేలు, స్థానిక నాయకత్వ అభిప్రాయాల సేకరణ తర్వాతే తుది జాబితాను రూపొందించినట్లు తెలుస్తోంది. ఈ ఎంపిక ద్వారా ప్రతిపక్షాలకు ఏమాత్రం అవకాశం లేకుండా, బలమైన ప్రత్యామ్నాయాన్ని ప్రజల ముందు ఉంచినట్లైంది. ప్రజాస్వామ్య వ్యవస్థలో స్థానిక సంస్థలు కీలకమైన ప్రజా ప్రతినిధుల తయారీ కేంద్రాలుగా మారుతాయని, అలాంటి చోట విద్యాధికులు, యువకులు మరియు మహిళలకు పెద్దపీట వేయడం వల్ల సద్పరిపాలన సాధ్యమవుతుందని విశ్లేషకులు భావిస్తున్నారు. [TDP local body candidates 1st List, AP Municipal Elections, TDP Social Justice TDP Candidates, BC SC women Youth, Chandrababu Naidu, Telugu One]

Published on: Sat Oct 17, 2026 2:52PM

నాడు తల్లి, నేడు పిన్ని: జగన్ రాజకీయ ప్రయోగాలు.!

ఆంధ్రప్రదేశ్ మాజీ ముఖ్యమంత్రి, వైసీపీ అధినేత వైఎస్ జగన్ కుటుంబ సభ్యులపై చేసే రాజకీయ ప్రయోగాలు వికటిస్తున్నాయా? అంటే పరిశీలకులు ఔననే అంటున్నారు. 2014 ఎన్నికలలో తల్లి విజయమ్మను విశాఖ లోక్ సభ స్థానం నుంచి పోటీకి దింపారు విజయ్. అయితే ఆ ఎన్నికలలో ఆమె దారుణ పరాజయం పాలయ్యారు. ఆ తరువాత పొలిటికల్ గా ఆమె దాదాపు కనుమరుగయ్యారు. ఇక ఇప్పుడు తన అడ్డాగా చెప్పుకునే పులివెందులలో ఆయన మరో ప్రయోగానికి తెరతీశారు. అదేంటంటే.. పులివెందుల మునిసిపల్ చైర్ పర్సన్ గా సొంత పిన్ని ప్రమీలమ్మను నిలబెట్టనున్నారు. ఈ ప్రయోగమైనా సక్సెస్ అవుతుందా? అన్న చర్చ రాజకీయవర్గాలలోనే కాదు, వైసీపీ శ్రేణులలోనూ, చివరాఖరికి వైఎస్ కుటుంబ సభ్యులలోనూ జోరుగా సాగుతోంది. ఒక వైపు దివంగత వైఎస్ వివేకానందరెడ్డి కుటుంబాన్ని దూరం పెడుతూ, మరో వైపు మరో బాబాయ్ వైయస్ మనోహర్ రెడ్డి కుటుంబానికి పెద్ద పీట వేస్తున్న తీరు కుటుంబంలో విభేదాలకు అద్దంపడుతున్నది. జగన్ తన సొంత కంచుకోట పులివెందులలో మున్సిపల్ చైర్‌పర్సన్ స్థానం కోసం పార్టీ తరఫు అభ్యర్థిగా ఎంపిక చేసిన తీరు సర్వత్రా ఆసక్తిని రేకెత్తిస్తోంది. కుటుంబ సభ్యులను కీలక రాజకీయ పదవులకు పోటీకి పెట్టడంపై గత అనుభవాలను బేరీజు వేస్తూ జగన్ వ్యవహార శైలిపై పరిశీలకులు పలు కోణాల్లో విశ్లేషణలు చేస్తున్నారు. గతంలో జరిగిన ఎన్నికల సరళిని పరిశీలిస్తే, వైయస్ జగన్ కొన్ని కీలక సందర్భాల్లో తన కుటుంబ సభ్యులను ప్రత్యక్ష ఎన్నికల బరిలో నిలిపిన సందర్భాలున్నాయి. ముఖ్యంగా 2014 సాధారణ ఎన్నికల సమయంలో విశాఖపట్నం పార్లమెంటు స్థానం నుంచి తన తల్లి వైయస్ విజయమ్మను పార్టీ తరఫున పోటీకి దింపారు. అప్పట్లో వైయస్ విజయమ్మ ఆ ఎన్నికల్లో ఓటమిని చవి చూశారు. తాజాగా పులివెందుల మున్సిపల్ ఎన్నికల్లో మరోసారి కుటుంబ సభ్యురాలికే పెద్దపీట వేస్తున్నారు. పులివెందుల మున్సిపల్ చైర్‌పర్సన్ అభ్యర్థిగా వైయస్ జగన్ తన బాబాయ్ వైయస్ మనోహర్ రెడ్డి సతీమణి ప్రమీలమ్మను బరిలోకి దించుతున్నారు. పులివెందుల నియోజకవర్గం ఎప్పుడూ వైయస్ కుటుంబానికి తిరుగులేని అడ్డాగా ఉంటూ వస్తోంది. ఇక్కడ పార్టీ అభ్యర్థుల గెలుపుపై ఎలాంటి సందేహాలు లేనప్పటికీ, చైర్‌పర్సన్ పదవికి ప్రమీలమ్మను ఎంపిక చేయడం ద్వారా స్థానిక రాజకీయాల్లో కొత్త సమీకరణాలకు తెరలేపారు. పులివెందుల జగన్ కు పెట్టని కోట అయినప్పటికీ.. ఇటీవలి కాలంలో ఆయనకూ, ఆయన పార్టీ అయిన వైసీపీకి కొన్ని ఎదురుదెబ్బలు గట్టిగానే తగిలాయి. 2024 ఎన్నికలలో పులివెందుల అసెంబ్లీ నియోజకవర్గంలో స్వయంగా జగన్ మెజారిటీ భారీగా తగ్గింది. ఆ తరువాత పులివెందుల జడ్పీటీసీ ఎన్నికలలో వైసీపీ అభ్యర్థి కనీసం డిపాజిట్ కూడా దక్కించుకోలేక ఘోర పరాజయం పాలయ్యారు. ఈ నేపథ్యంలో జగన్ ప్రమీలమ్మను పులివెందుల చైర్ పర్సన్ గా బరిలోకి దింపడం సాహస ప్రయోగంగానే పరిశీలకులు అభివర్ణిస్తున్నారు. ఒక వైపు వైఎస్ వివేకా కుటుంబ సభ్యుల వ్యతిరేకత నిస్సందేహంగా పులివెందుల మునిసిపల్ ఎన్నికలపై పడుతుందని అంటున్నారు. ఈ తరుణంలో ప్రమీలమ్మను బరిలోకి దింపడం ద్వారా ఫలితం ఏమైనా తేడాగా వస్తే కంచుకోటలాంటి పులివెందులలో జగన్ బలం, ప్రతిష్ఠ మసకబారడం ఖాయమంటున్నారు. [YS Jagan Mohan Reddy Political experiments, Pulivendula Municipal Elections, YS Pramilamma, YCP Chairperson Candidate, Telugu One]

Published on: Wed Oct 14, 2026 5:04PM

సీఈసీపై విపక్షాల పోరు: జగన్ మౌనం.. వ్యూహాత్మకమా, కేంద్రానికి మోకరిల్లడమా.?

2024 సార్వత్రిక ఎన్నికల ఫలితాలు వెలువడిన నాటి నుంచి కేంద్ర ఎన్నికల సంఘం తీరుపై, ఈవీఎంల విశ్వసనీయతపై తీవ్ర స్థాయిలో ధ్వజమెత్తిన వైసీపీ అధినేత, మాజీ ముఖ్యమంత్రి జగన్ ప్రస్తుతం వ్యూహాత్మక మౌనం వహిస్తుండడం రాజకీయ వర్గాలను విస్మయపరుస్తోంది. ఒకవైపు కేంద్ర ఎన్నికల ప్రధాన కమిషనర్ జ్ఞానేష్ కుమార్ రాజీనామా చేయాలని డిమాండ్ చేస్తూ ప్రతిపక్షాలు ఆందోళనలు చేస్తుంటే.. వైసీపీ, ఆ పార్టీ అధినేత జగన్ మాత్రం ఈ ఆందోళనలకు దూరంగా ఉంటున్నారు. ఎన్నికల కమిషన్, ఎన్డీఏ ప్రభుత్వంపై రాహుల్ గాంధీ, అరవింద్ కేజ్రీవాల్, మమతా బెనర్జీ వంటి కీలక ప్రతిపక్ష నేతలందరూ నేరుగా వీధుల్లోకి వచ్చి నిరసనలు తెలుపుతూ ఒత్తిడి పెంచుతున్నారు. అయితే.. 2024 ఎన్నికల తరువాత ఎన్నికల సంఘంపైనా, ఈవీఎంల విశ్వసనీయతపైనా గళమెత్తిన జగన్ ప్రస్తుతం సీరియస్ గా జరుగుతున్న ప్రతిపక్షాల ఆందోళనలకు దూరంగా ఉండటం పట్ల పరిశీలకులు విస్మయం వ్యక్తం చేస్తున్నారు. అంతే కాకుండా జగన్ వైఖరి పట్ల సొంత పార్టీలోనే తీవ్ర అసంతప్తి వ్యక్తం అవుతున్నాది. జాతీయ స్థాయిలో సీఈసీకి వ్యతిరేకంగా ఉవ్వెత్తున సాగుతున్న ఉద్యమంలో భాగస్వామ్యం కాకపోవడం సరికాదన్న అభిప్రాయం సొంత పార్టీలోనే గట్టిగా వ్యక్తమౌతుండటంతో ఇక తప్పదన్నట్లు తూతూ మంత్రంగా వైసీపీ సోషల్ మీడియా వేదికగా ఓ పోస్టు షేర్ చేసి చేతులు దులిపేసుకుంది. ప్రధాన ఎన్నికల కమిషనర్ తో పాటు పాటు మొత్తం వ్యవస్థకు సంబంధించి వైసీపీ తన అధికారిక సోషల్ మీడియా హ్యాండిల్‌లో తొమ్మిది ప్రశ్నలు సంధించింది. అయితే ఎక్కడా ఎవరి పేరునూ, రాజ్యాంగ వ్యవస్థ పేరునూ ప్రస్తావించలేదు. ఈ మొత్తం వివాదంలో ఓటు చోరీపై కానీ, సర్ అవకతవకలపై కానీ వైసీపీ ప్రశ్నించలేదు. కేవలం 2024 ఎన్నికలలో పోలింగ్ రాత్రి 11:45 గంటల వరకు ఎలా కొనసాగింది? సాయంత్రం 6 గంటల తర్వాత పోలింగ్ శాతం ఊహించని రీతిలో ఎలా పెరిగింది? అంటూ సందేహాలు వ్యక్తం చేయడానికే పరిమితమైంది. అలాగే ఫారమ్ 20 విడుదల చేయడంలో జరిగిన జాప్యాన్ని కూడా ప్రశ్నించినప్పటికీ, ఈ ప్రశ్నలన్నింటికి నిర్దిష్టమైన కాలపరిమితిని జోడించకుండా కేవలం సాధారణ ప్రశ్నలుగా మాత్రమే వైసీపీ సోషల్ మీడియా పోస్టు చేసింది. వాస్తవానికి దేశవ్యాప్తంగా ఉన్న ప్రతిపక్ష నేతలంతా ఒక్కటై కేంద్రానికి వ్యతిరేకంగా వీధిపోరాటాలు చేస్తుంటే, జగన్ మాత్రం ప్రజాక్షేత్రంలోకి రాకపోవడం, అలాగే వైసీపీ నిరసనను సోషల్ మీడియాలో ఒకే ఒక్క పోస్టుతో సరిపెట్టడం గమనార్హం. ప్రతిపక్షంలో ఉన్నప్పటికీ ఎన్డీఏ ప్రభుత్వంతో ఘర్షణ వైఖరి తగదని భావిస్తున్నారో లేక మరేదైనా కారణం ఉందో కానీ, జగన్ మోహన్ రెడ్డి కేంద్రానికి లోపాయికారీగా సరెండర్ అయ్యారన్న విమర్శలకు ఈ పరిణామం బలం చేకూరుస్తోందని పరిశీలకులు విశ్లేషిస్తున్నారు. [Reason Behind JaganSilence On Opposition Protests, Election Commission CEC, Strategic, Surrender, Center, Modi, Telugu One, Jagan NDA Relations]

Published on: Tue Oct 13, 2026 4:25PM