శత్రువును గెలవడానికి చాణక్యుడు చెప్పిన న్యాయబద్దమైన మార్గం.. !

 

శత్రువును గెలవడానికి చాణక్యుడు చెప్పిన న్యాయబద్దమైన మార్గం.. !

ఆచార్య చాణక్యుడు భారత చరిత్రలో గొప్ప వ్యూహకర్త, విధాన రూపకర్తగా ప్రసిద్ధి చెందాడు.  రాజకీయ పాలనలో అయినా, నిత్య జీవితంలో అయినా  చాణక్య నీతి యొక్క ప్రాముఖ్యత మాటల్లో చెప్పలేనిది.  చాణక్య నీతిని ఆచరిస్తూ బ్రతికేవాడు జీవితంలో ఉన్నత స్థాయికి తప్పక ఎదుగుతాడు.  సాధారణంగా ప్రతి వ్యక్తికి శత్రువు అంటూ ఒకరు ఉంటారు.  కొందరికి ఎక్కువ మంది శత్రువులు కూడా ఉంటారు.   శత్రువులను ఎదుర్కోవడానికి చాణక్యుడు  అనేక విలువైన సూచనలు ఇచ్చాడు. కష్ట సమయాల్లో ఈ సూత్రాలను అవలంబిస్తే, ఏ శత్రువు కూడా  హాని చేయలేడని ఆయన అంటున్నారు. శత్రువును గెలవడానికి చాణక్యుడు చెప్పిన న్యాయబద్దమైన మార్గం ఏమిటో తెలుసుకుంటే..

శ్లోకం..

అనులోమ్నే బలినాం ప్రతిలోమ్నే దుర్జనం.
ఆత్మతుల్యబలం శత్రు: వినయేన్ బలేన్ వా.

అర్థం..

 శత్రువు మీకంటే శక్తివంతుడైతే, అతన్ని ఓడించడానికి  అనుకూలమైన ప్రవర్తనను అవలంబించాలి. అతను దుష్ట స్వభావి అయితే, మీరు అతనికి వ్యతిరేకంగా వ్యవహరించాలి.  శత్రువు  బలవంతుడైతే వినయం లేదా శక్తి ద్వారా ఓడించవచ్చు.

శత్రువును ఓడించాలంటే..

 ప్రత్యర్థిని ఎదుర్కొంటున్నప్పుడు భావోద్వేగాలకు లోనయ్యే బదులు ఓర్పు,  సంయమనంతో వ్యవహరించాలి. ఇది పరిస్థితిని అర్థం చేసుకోవడానికి,  సరైన నిర్ణయం తీసుకోవడానికి  సహాయపడుతుంది. సంయమనం అనవసరమైన నష్టాల నుండి కూడా  రక్షిస్తుంది.

ఏదైనా అడుగు వేసే ముందు సరైన సమయాన్ని ఎంచుకోవడం చాలా ముఖ్యం. ఆలోచించకుండా తీసుకున్న నిర్ణయం వల్ల ఎదురుదెబ్బ తగలవచ్చు. శత్రువుపై గెలవడానికి  ప్రణాళిక వేయవలసి వచ్చినప్పుడు, సరైన సమయంలో దాన్ని అమలు చేయండి.

శత్రువును ఓడించడానికి ఉత్తమ మార్గం శత్రువు బలహీనతలను తెలుసుకోవడమే. వారి బలహీనతలు  తెలిసినప్పుడు వారిని  ఓడించడం చాలా సులభం అవుతుంది. కానీ శత్రువు ఎదుట మీ బలహీనతలు  ఎప్పుడూ బయటపెట్టకూడదు.

                                 *రూపశ్రీ.