Home  
Politics
samaradeeksha

"సమరదీక్ష"వద్ద టి ఉద్యోగుల అత్యవసర భేటి

        ఇందిరాపార్క్ వద్ద నిర్వహిస్తున్న సమరదీక్ష వేదిక వద్ద తెలంగాణ ఉద్యోగులు అత్యవసరంగా భేటీ అయ్యారు. ఆదివారం ఆజాద్, షిండేల వ్యాఖ్యల అనంతరం నెలకొన్న పరిస్థితులపై, భవిష్యత్‌ కార్యాచరణపై చర్చిస్తున్నారు. 100 రోజుల సమ్మెను చెప్పట్టే దిశగా ఉద్యోగులు సిద్ధమవుతున్నట్టు తెలుస్తోంది. కేంద్ర ప్రభుత్వ నిర్ణయాన్ని తేలికగా తీసుకుంటే కాంగ్రెస్ పార్టీ తెలంగాణ అంశాన్ని మరుగున పడేస్తుందని, అందుకే ఈ సమయంలోనే కేంద్రం మీద వత్తిడి పెంచేలా కార్యాచరణ ఉండాలని భావిస్తున్నారు. ఇంతకుముందే 100 రోజుల సమ్మెకు అనుకూలంగా క్షేత్రస్థాయిలో ఉద్యోగులను సంసిద్దం చేశారు. ఇప్పుడు మరింత నాన్చివేత ధోరణి నేపథ్యంలో తీవ్ర నిర్ణయం తీసుకోవాలని ఉద్యోగసంఘాలు భావిస్తున్నాయి.

samara deeksha protest

"సమరదీక్ష"కు సబిత అనుమతి

        తెలంగాణ ఐక్యకార్యాచరణ సమితి నిర్వహించనున్న "సమరదీక్ష"కు పోలీసులు అనుమతినిచ్చారు. 36 గంటల దీక్షకు అనుమతించకుండా అడ్డుకోవడంతో తెలంగాణవాదులు ఆందోళన బాట పట్టారు. ఎంఎల్ సీ చుక్కా రామయ్య, ప్రజా గాయకుడు గద్దర్ అనుమతి కోసం హోంమంత్రిని ఆశ్రయించారు. దీంతో హోంమంత్రి సబిత సమర దీక్షకు అనుమతిని ఇచ్చారు. వినతి పత్రాన్ని సైబరాబాద్ కమిషనర్‌కు ఇవ్వాలని సూచించారు. సోమవారం సాయంత్రం వరకు దీక్ష చేసుకోవాలని పోలీస్ కమిషనర్ అనురాగ్ శర్మ సూచించారు. దీక్షకు పోలీసుల అనుమతి లభించడంతో తెలంగాణ రాజకీయ జేఏసీ నేతలు, విద్యార్థులు, తెలంగాణవాదులు ఇందిరాపార్క్‌కు భారీగా చేరుకుంటున్నారు. ఇప్పటికే సమరదీక్ష ప్రాంగణం తెలంగాణవాదులతో నిండిపోయింది.  

osmania Tense

ఓయూ క్యాంపస్ టెన్షన్, పోలీసుల పై రాళ్ళ వర్షం

        సమర దీక్షకు మద్దతుగా ఉస్మానియా విశ్వవిద్యార్థులు భారీ ర్యాలీ చేపట్టారు. దీనిని పోలీసులు అడ్డుకున్నారు. ఓయు గేటు వద్ద, విద్యానగర్ చౌరస్తా వద్ద బారీకేడ్లు ఏర్పాటు చేశారు. ఉస్మానియా క్యాంపస్ చుట్టూ పోలీసులను మోహరించారు. విద్యార్థులు బయటకు వెళ్లకుండా పోలీసులు చూస్తున్నారు. విద్యార్థులు రాజ్ భవన్ ముట్టడించేందుకు ర్యాలీగా బయలుదేరారు. పోలీసులు తమను అడ్డుకోవడంతో వారిపై రాళ్లు రువ్వారు. పోలీసులు బాష్పవాయువును ప్రయోగించారు. దీంతో ఓయు మరోసారి ఉద్రిక్తంగా మారింది.

Samara Deeksha

కేటీఆర్‌, స్వామిగౌడ్‌ అరెస్ట్

        తెలంగాణ ఐక్యకార్యాచరణ సమితి నిర్వహించ తలపెట్టిన ‘సమరదీక్ష’ను పోలీసులు అడ్డుకుంటున్నారు. ఎక్కడికక్కడ తెలంగాణ నేతలను అరెస్టు చేస్తున్నారు. విద్యార్థులను అడ్డుకుంటున్నారు. అయితే ఎట్టి పరిస్థితుల్లోనూ సమరదీక్షను నిర్వహించి తీరుతామని పొలిటికల్ జేఏసీ చైర్మన్ ప్రొఫెసర్ కోదండరాం స్పష్టం చేశారు. నిర్బంధం ద్వారా దీక్షను ఆపాలని చూస్తున్నారని ఆయన ఆగ్రహం వ్యక్తం చేశారు. ఉద్యమాన్ని మరింత ఉదృతం చేసేందుకు ఆదివారం సాయంత్రంలోగా భవిష్యత్‌ కార్యాచరణ ప్రకటిస్తామని కోదండరాం తెలిపారు. ఫిబ్రవరిలో ‘చలో హైదరాబాద్’ లాంటి కార్యక్రమానికి రూపకల్పన చేస్తామన్నారు. అసెంబ్లీ నుంచి జేఏసీ కార్యాలయం వరకు టీఆర్ఎస్ ఎమ్మెల్యేలు ర్యాలీ నిర్వహించనున్నారు. ఆదిలాబాద్, ఖమ్మం జిల్లాలో టీఎన్‌జీవో జేఏసీ నేతలను అరెస్ట్ చేసినట్టు తెలుస్తోంది. టీఆర్ఎస్ ఎమ్మెల్యే కేటీఆర్‌తో సహా టీఆర్‌ఎస్ కార్యకర్తలను, టీఆర్‌ఎస్‌వీ విద్యార్థులను పోలీసులు న్యూ ఎమ్మెల్యే క్వార్టర్స్‌లో అరెస్టు చేశారు. వీరిని గోషామహాల్ పోలీస్‌స్టేషన్‌కు తరలించారు. ఖైరాతాబాద్ చౌరస్తాలో రాజ్‌భవన్ ముట్టడికి బయలుదేరిన ఓయూ విద్యార్థులను పోలీసులు అరెస్టు చేశారు. అరెస్టు చేసిన విద్యార్థులను పంజాగుట్ట పీఎస్‌కు తరలించారు. రాజ్‌భవన్ రోడ్డుని పూర్తిగా మూసేసిన పోలీసులు ట్రాఫిక్‌ను మళ్లించారు. మరోవైపు ఓయూలో విద్యార్థులు భారీ ర్యాలీగా బయలుదేరారు. గన్‌పార్క్ వద్దకు కార్యకర్తలో చేరుకున్న టీఆర్‌ఎస్ నేత స్వామిగౌడ్‌ను పోలీసులు అదుపులోకి తీసుకున్నారు. స్వామిగౌడ్‌ను వెంటనే విడుదల చేయాలని జేఏసీ చైర్మన్ కోదండరాం డిమాండ్ చేశారు. అరెస్టులకు పాల్పడితే తీవ్ర పరిణామాలు ఉంటాయని ఆయన హెచ్చరించారు. దానికి తెలంగాణ ప్రాంత మంత్రులే బాధ్యత వహించాలని ఆయన తెలిపారు.  

chandrababu

కృష్ణాజిల్లా యాత్రలో బాబును పరామర్శించిన కుటుంబసభ్యులు

        కృష్ణా జిల్లాలో పాదయాత్ర నిర్వహిస్తున్న టీడీపీ అధినేత చంద్రబాబును కంచికచర్లలో సతీమణి భువనేశ్వరి, కుమారుడు లోకేష్, సోదరి హైమావతి, మరదులు ఇందిర, మేనల్లుడు ఉదయ్, ఎన్టీఆర్ కుమార్తెలు, కోడళ్లు, ఫిట్‌నెస్ ట్రైనర్ దినాజ్ పరామర్శించారు. ఆయన ఆరోగ్య పరిస్థితులను అడిగి తెలుసుకున్నారు. ఈ సందర్భంగా సతీమణి భువనేశ్వరి మీడియాతో మాట్లాడుతూ పాదయాత్రకు విరామం ఇవ్వాలని కోరమాని అయితే చంద్రబాబు అంగీకరించలేదన్నారు. పాదయాత్రను కొనసాగిస్తానని బాబు చెప్పినట్లు ఆమె తెలిపారు. చంద్రాబాబు మానసికంగా బలంగా ఉన్నారని, నడుము, కాలినొప్ప చంద్రబాబుకు తాత్కాలికమే అని ఫిట్‌నెస్ ట్రైనర్ దినాజ్ తెలిపారు.

botsa satyanarayana

తప్పు చేసి బాబును తప్పుపట్టిన బొత్స

  పీసిసి అధ్యక్షులుగా యావత్ రాష్ట్ర పార్టీకి బాద్యత వహించవలసిన బొత్స సత్యనారాయణ నిన్న రాజమండ్రీలో ఉండవల్లి అరుణ్ కుమార్ నిర్వహించిన జై ఆంధ్ర మహా సభలో పాల్గొనడం మొదటి తప్పయితే, హిందీ వాళ్ళకి పది రాష్ట్రాలు ఉన్నపుడు తెలుగువారికి రెండు రాష్ట్రాలు ఉంటే తప్పేమిటని లౌక్యంగా ప్రశ్నిస్తూ పార్టీలో తెలంగాణావాదులనుండి ఇబ్బందులు రాకుండా ఇంతవరకు కాలక్షేపం చేసేసిన ఆయన సమైక్యవాదులు నిర్వహిస్తున్న సభలో పాల్గొంటూ పరోక్షంగా వారికి తన మద్దతు ప్రకటిస్తూ, సభలో చంద్రబాబును లక్ష్యం చేసుకొని ప్రసంగించడం మరో తప్పు. చంద్రబాబు రెండుకళ్ళ సిద్దాంతం అంటూ ఇంతకాలం కాలక్షేపంచేసి హటాత్తుగా ప్లేటు పిరాయించి తెలంగాణాకి అనుకూలంగా లేఖ ఇవ్వడాన్ని అయన తప్పు పట్టారు. అయితే తానూ ఆ సభకి వచ్చి తన రెండు రాష్ట్రాల వాదనను వదిలిపెట్టి సమైక్యాంద్రా వైపు ప్లేటు పిరాయిన్చినట్లు మాత్రం అయన బహిరంగంగా ప్రకటించకపోయినా ఆ విషయాన్ని తెలంగాణా వాదులు మాత్రం బాగానే అర్ధం చేసుకొన్నారు. పార్టీ అధ్యక్షపదవిలో ఉంటూ యావత్ రాష్ట్ర పార్టీకి బాద్యత వహించవలసిన అయన సమైక్యాంద్రావాదుల సభకి హాజరవడం తెలంగాణా వాదులు బాహాటంగానే ఖండించారు కూడా.

congress leaders

సందిగ్ధంలో కాంగ్రెస్ నేతలు

  తెలంగాణపై నిర్ణయానికి మరికొంత సమయం అవసరమన్న గులాం నబీ ఆజాద్ ప్రకటనతో రాష్ట్రంలో రాజకీయ వాతావరణం ఒక్కసారిగా వేడేక్కిపోయింది. ఇంతవరకు డిల్లీచుట్టూ తిరిగిన రాజకీయాలు మళ్ళీ స్వంత గూటికి చేరుకాగానే కొత్త సమీకరణాలు మొదలయ్యాయి.   సీమంద్రా కాంగ్రెస్ నేతల పరిస్థతి కొంత బాగున్నపటికీ, తెలంగాణా కాంగ్రెస్ నేతల పరిస్థితి మాత్రం చాల దారుణంగా ఉందిప్పుడు. తెలంగాణా ఉద్యమానికి పూర్తి పేటెంటు హక్కులు పొందినట్లు ప్రవర్తిస్తున్న తెరాస నేతలు, కాంగ్రెస్ నాయకులపై కూడా హక్కులు కలిగిఉన్నట్లు చాలా అవమానకర రీతిలో మాట్లాడుతూ, వెంటనే పదవులకు రాజీనామాలు చేయాలంటూ ఆజ్ఞాపిస్తున్నారు. ఇటువంటి విపరీత ధోరణి అంటురోగంలా సమైక్యాంధ్రకి కూడా పాకిందిపుడు.     అయితే, కాంగ్రెస్ పార్టీలో ఉంటూ ఆ పార్టీ ద్వారా తమకంటూ ఒక ప్రత్యేక గుర్తింపు, సమాజంలో హోదా, పదవులు ఇత్యాదులన్నీ పొందిన కాంగ్రెస్ నేతలు మాత్రం, తమను తమ పార్టీని ఘోరంగా అవమానిస్తూ, బెదిరిస్తున్న ఉద్యమనాయకులకు దీటుగా జవాబు చెప్పకపోగా, కొందరు ఆత్మగౌరవం మరిచి తమ రాజకీయ భవిష్యత్ దృష్టిలో పెట్టుకొని వారిచుట్టూనే తిరుతున్నారు. ఒకవైపు తమ పార్టీ అధిష్టానం నిజాయితీగా సమస్య పరిష్కారినికి చిత్తశుద్దితో ప్రయత్నిస్తోందని తెలిసిఉన్నపటికీ తమను, తమ కాంగ్రెస్ పార్టీని ఘోరంగా అవమానిస్తూ, బెదిరింపులకి పాల్పడుతున్న ఉద్యమనాయకులను నిలదీయలేక బిత్తర చూపులు చూస్తున్నారు. అది తెలంగాణానా ఉద్యమమా లేక సమైక్యాంధ్ర ఉద్యమమా అన్నదానితో సంబంధం లేకుండా కాంగ్రెస్ వాదులందరూ ఒకే కుటుంబముగా వ్యహరించి, తమ పార్టీపై దాడిచేస్తున్నవారిని సమర్ధంగా ఎదుర్కోనవలసిన తరుణంలో తమలో తామే తిట్టుకొంటూ అందరి ముందూ చుకన అవుతున్నారు..   ఇటువంటి కీలక సమయంలో కాంగ్రెస్ వాదులు తమ పార్టీని రక్షించుకోలేకపోతే, దానివల్ల అంతిమంగా నష్టపోయేదివారే తప్ప వేరొకరు కారని గ్రహించాలి. ఉద్యమనాయకుల చేతిలో కీలుబొమ్మలుగా మారేబదులు తామే సమస్యకి పరిష్కారం చూపగలమనే ఆత్మవిశ్వాసం వ్యక్తం చేయవలసిన తరుణం ఇది. ఎందుకంటే, ఉద్యమనాయకులు ఉద్యామాలు చేయగలరు, ప్రభుత్వం పై ఒత్తిడి తేగలరు తప్ప సమస్యని పరిష్కరించలేరు. ఆ పని చేయవలసింది అధికారంలో ఉన్న కాంగ్రెస్ పార్టీ ఏ తప్ప ఉద్యమనాయకులు మాత్రం కారు.   అందువల్ల డోలాయమానంలో ఉన్న కాంగ్రెస్ వాదులందరూ తమను, తమకు అన్నం పెట్టి ఆదరించిన కాంగ్రెస్ పార్టీని ఉద్యమనాయకుల బారినుండి కాపాడుకోవలసిన బాద్యత తమ మీదే ఉందని గ్రహించాలి. తమను నిర్దేసించవలసింది తమ పార్టీ అధిష్టానం తప్ప ఉద్యమ నాయకులుకారని వారు గ్రహించి పార్టీని తద్వారా తమని తాము కాపాడుకోవాలిసిన తరుణం ఇది.

chandrababu padayatra

కాలి నొప్పితో పాదయాత్ర కొనసాగిస్తున్న బాబు

        కాలి నొప్పితో బాధపడుతూనే తెలుగుదేశం పార్టీ అధ్యక్షుడు చంద్రబాబు నాయుడు జిల్లాలో పాదయాత్ర కొనసాగిస్తున్నారు. ఆయన ఎడమకాలు చిటికెన వేలుకి వాపు వచ్చింది. అయినా కుంటుతునే నెమ్మదిగా పాదయాత్ర చేస్తున్నారు. బాబును కలిసిన టీడీపీ నేతలు జనవరి 26తో యాత్రను ముగించాలని విజ్ఞప్తి చేశారు. మరోవైపు కుటుంబ సభ్యులు కూడా పాదయాత్ర ముగించాలని కోరుతున్నారు. దీనిపై స్పందించిన బాబు యాత్ర ముగించేది లేదని స్పష్టం చేశారు. 'వస్తున్నా...మీకోసం' కార్యక్రమంలో భాగంగా టీడీపీ అధినేత చంద్రబాబు నాయుడు చేపట్టిన పాదయాత్ర శుక్రవారం నాటికి 116వరోజుకు చేరుకుంది.  కృష్ణా జిల్లాలో ఐదో రోజు కొనసాగుతోంది. శుక్రవారం ఉదయం నందిగామ శివారులోని అంబారిపేట నుంచి బాబు పాదయాత్రను ప్రారంభించారు. ఆయన వెంట పెద్ద ఎత్తున పార్టీ శ్రేణులు, అభిమానులు తరలివస్తున్నారు. ఈ సందర్భంగా ఆయన మాట్లాడుతూ ప్రజల సమస్యలను తెలుసుకోవడానికి యాత్రను కొనసాగిస్తానని, ఆపే ప్రసక్తే లేదని ఆయన పేర్కొన్నారు. కాలు నొప్పి బాగానే ఉందని, నడుము నొప్పికూడా వస్తుందని, అయినా యాత్ర కొనసాగించాలని ఉందని అన్నారు. కాలి నొప్పి కారణంగా నిదానంగా పాదయాత్ర చేస్తున్నారు. బాబు యాత్రకు మహిళలు, నేతలు, కార్యకర్తలు, చిన్నారులు స్వాగతం పలుకుతున్నారు.

Komatireddy Venkat Reddy TRS

మాకూ చీము నెత్తురుంది, ప్రభుత్వాన్ని కూల్చగలం: కోమటిరెడ్డి

        రాజీనామాల బెదిరింపులతో సీమాంధ్ర నేతలు ఈ నెల 28న తెలంగాణపై ప్రకటన రాకుండా అడ్డుకున్నారని మాజీ మంత్రి కోమటిరెడ్డి వెంకట రెడ్డి మండిపడ్డారు. మాకూ చీము, నెత్తురు ఉంది. ఈ నెలలో తెలంగాణ రాకపోతే ప్రభుత్వాన్ని కూల్చడానికి సిద్ధంగా ఉన్నామని తేల్చిచెప్పారు.   ఈ రోజు కేసీఆర్‌తో భేటీ ముగిసిన అనంతరం మీడియాతో మాట్లాడుతూ, మున్ముందు కఠిన నిర్ణయాలు తప్పవని అన్నారు. వాయిదాలు వేస్తూ కాలం వెళ్లబుచ్చుతున్న కేంద్రం తెలంగాణ ఇస్తుందో లేదో అని అనుమానం కలుగుతోందని ఆయన అన్నారు. తెలంగాణ ప్రకటనపై ఎల్లుండి వరకూ వేచి చూస్తామని, ప్రకటన వెలువడకుంటే 28 తర్వాత కఠిన నిర్ణయాలు ఉంటాయని హెచ్చరించారు.

Komatireddy Venkat Reddy TRS

కేసీఆర్ తో కోమటిరెడ్డి భేటీ, టీఆర్ఎస్ లోకి జంప్?

        కాంగ్రెస్ ఎమ్మెల్యే కోమటిరెడ్డి వెంకట్ రెడ్డి కేసీఆర్ తో భేటీ అయ్యారు. కేసీఆర్ తో తెలంగాణ ఉద్యమ భవిష్యత్ పరిణామాలపై చర్చించినట్లు వార్తలు వస్తున్నా, ఆయన టీఆర్ఎస్ లో చేరే అవకాశాలు ఉన్నాయి. కోమటిరెడ్డి మొదట జగన్ పార్టీలో చేరాలని భావించినా తెలంగాణ పట్ల ఆ పార్టీ వైఖరి స్పష్టంగా లేకపోవడంతో ఆ ప్రయత్నాలను విరమించుకున్నారు. ప్రస్తుత పరిస్థితులలో టీఆర్ఎస్ లో చేరడమే మేలని ఆయన భావిస్తున్నట్లు తెలుస్తుంది. నల్లగొండ జిల్లాలో గట్టి పట్టున్న కోమటిరెడ్డి టీఆర్ఎస్ లో చేరితే ఆ పార్టీ నల్లగొండలో తిరుగులేని శక్తిగా ఆవిర్భవిస్తుంది.  మంత్రి పదవికి రాజీనామా చేసిన ఆయన తెలంగాణ రాష్ట్రం తన లక్ష్యంగా పోరాడుతున్నారు.

Paritala Sreeram

బాబు ఆదేసిస్తే పరిటాల శ్రీరామ్ పోటి

      తమ పార్టీ అధ్యక్షుడు చంద్రబాబు నాయుడు గారు ఆదేశిస్తే వచ్చే ఎన్నికల్లో పరిటాల శ్రీరామ్ పోటి చేస్తాడని పరిటాల సునీత పేర్కొన్నారు. పరిటాల రవీంద్ర ఎనిమిదో వర్ధంతి సంధర్బంగా వెంకటాపురంలోని ఆయన సమాధి వద్ద కుటుంబసభ్యులు ఘనంగానివాళులర్పించారు. అటు టీడీపీ జిల్లా కార్యాలయంలో నేతలు పరిటాల రవికి నివాళులర్పించారు. ఈ సందర్భంగా పరిటాల రవి సతీమణి ఎమ్మెల్యే పరిటాల సునీత మీడియాతో మాట్లాడుతూ పార్టీ అధినేత చంద్రబాబు ఆదేశిస్తే 2014 ఎన్నికల్లో అభ్యర్థిగా నిలబెడతానన్నారు. సేవా కార్యక్రమాల్లో చురుగ్గా పాల్గొంటున్న శ్రీరామ్‌ను కాంగ్రెస్ నేతలు కుట్రలు పన్ని కేసులో ఇరికించారని సునీత ఆరోపించారు.  

mv mysoora reddy

రాహుల్ ది ఐరన్ లెగ్గు:మైసూర

  ఒకవైపు కాంగ్రెస్ పార్టీ, వైయస్సార్ కాంగ్రెస్ పార్టీతో ఎన్నికల పొత్తుల గురించి మాట్లాడుతుంటే, ఆ పార్టీ నేతలు మాత్రం కాంగ్రెస్ పార్టీని ఇప్పటికీ తీవ్రంగా విమర్శిస్తున్నారు. జగన్ మోహన్ రెడ్డిని జైలు నుంచి విడుదల చేయడం గురించి ముందు మాట్లాడి, ఆ తరువాత పొత్తుల గురించి కాంగ్రెస్ మాట్లాడి ఉంటే వారు కొంత సానుకూలంగా స్పందించే అవకాశం ఉండేదేమో. నిన్నజగన్ బెయిలు పిటిషనుపై జరిగిన విచారణలో, ప్రభుత్వం తమకు సహకరించడం లేదనే నెపంతో సిబిఐ జగన్ బెయిలు రాకుండా చేయడంతో, రాష్ట్రంలో అధికారంలో ఉన్న కాంగ్రెస్ పార్టీ రాజకీయ దురుదేశ్యం బయటపడిందని యస్సార్ కాంగ్రెస్ పార్టీ భావిస్తోంది. ఆ పార్టీకి చెందిన మైసూరా రెడ్డి వంటి నేతలు తమ నాయకుడిని జైల్లో బందించి పొత్తుల గురించి మాట్లాడుతున్న కాంగ్రెస్ పార్టీని తీవ్రంగా విమర్శిస్తున్నారు.   రాహుల్ గాంధీని కాంగ్రెస్ పార్టీ ఉపాధ్యక్షునిగా ఎన్నుకోవడంపై వైయస్సార్ కాంగ్రెస్ పార్టీ నేత మైసూర రెడ్డి స్పందిస్తూ, “వరుసగా మూడు రాష్ట్రాలలో పార్టీని ముంచిన రాహుల్ గాంధీని ఇప్పుడు నాయకుడిగా చేసుకొని, మళ్ళీ ఎన్నికలకి సిద్దమవుతున్న కాంగ్రెస్ పార్టీని చూస్తుంటే నిజంగా జాలేస్తోంది. ఆయనది ఐరన్ లెగ్గని తెలిసీ కూడా కాంగ్రెస్ ఆయనకు నాయకత్వం కట్టబెట్టడం చూస్తుంటే, ఆ పార్టీ తానూ మునగడమే గాకుండా ఏకంగా దేశాన్నికూడా ముంచేందుకు సిద్ధం అవుతున్నట్లు కనిపిస్తోంది. కాంగ్రెస్ పార్టీ పరిస్థితి ఇప్పుడు ఒక ప్రాంతీయ పార్టీ పరిస్థితికన్నా దారుణంగా ఉందని” మైసూరా అన్నారు.   ఇక మజ్లిస్ పార్టీతో స్నేహం కోరుకొంటున్న వైయస్సార్ కాంగ్రెస్ పార్టీ, ఆ పార్టీ నేతల అరెస్ట్ పై సానుభూతిగా స్పందిస్తూ “కాంగ్రెస్ పార్టీకి వారు మద్దతు ఉపసంహరించినందుకే ఇటువంటి వేధింపులకి పాల్పడుతోందని” మైసూరా అన్నారు.

political news

గడ్కారి పాయసం గిన్నెలో పిడక వేసిన కాంగ్రెస్

  మేధోమధనంలో కాంగ్రెస్ పార్టీ చెప్పే నీతులు అక్కడివరకే పరిమితం అని మరోసారి ఆపార్టీ నిరూపించింది. భారతీయపార్టీ అధ్యక్షుడు నితిన్ గడ్కారి ఈరోజు మళ్ళీ రెండోసారి పార్టీ అధ్యక్షపదవి చేపట్టనున్న తరుణంలో, మహారాష్ట్ర ఆదాయపన్ను శాఖ ఆయనకి నోటీసులు జారీచేసింది. ఆయన తన నామినేషను పత్రాలు సమర్పించే రోజునే అంటే బుదవారంనాడే, ఆయనని తమ ముందు హాజరయి ఆయనకు చెందిన పూర్తీ పవర్ ప్రాజెక్ట్ లో జరిగిన అవకతవకల గురించి వివరణ ఇవ్వాలని ఆదేశించింది. నిన్న మద్యాహ్నం వరకూ కూడా తానే మళ్ళీ అధ్యక్ష పదవి చేపడతానని కలలుగన్న నితిన్ గడ్కారి కాంగ్రెస్ దెబ్బకి వెనక్కి తగ్గక తప్పలేదు.   అయన రెండో సారి అధ్యక్ష పదవి చెప్పట్టడాన్ని తీవ్రంగా వ్యతిరేఖిస్తున్నమరో సీనియర్ నేత యశ్వంత్ సిన్హా తానూ కూడా బరిలో దిగుతానని ప్రకటించడంతో, పోటీ వల్ల పార్టీ ప్రతిష్టకు భంగం కలుగుతుందని భావించిన భారతీయపార్టీ అధిష్టానం, అందరికీ ఆమోదయోగ్యుడయిన మాజీ అధ్యక్షుడు రాజ్ నాథ్ సింగ్ పేరును నిన్న రాత్రి ప్రతిపాదించడంతో పరిస్థితి సద్దుమణిగింది.   కాంగ్రెస్ పార్టీ తమ అంతర్గత వ్యవహారాలలో ఈవిధంగా వేలు పెట్టి ఆడుకోవడాన్ని భారతీయ జనతా పార్టీ తీవ్రంగా నిరసించింది. సరిగ్గా సమయం చూసుకొని పావులు కదిపి తమ పార్టీని రచ్చ కెక్కించినందుకు భారతీయపార్టీ కాంగ్రెస్ పై తీవ్రంగా మండిపడుతోంది.   అయితే, ఇల్లు కాలుతోందని భారతీయ జనతా పార్టీ ఏడుస్తుంటే, చుట్టకి నిప్పు దొరికిందని సంతోషిస్తున్న కాంగ్రెస్ పార్టీ ఆ ఆరోపణలు యధావిధిగా ఖండించడమే గాకుండా, ఒకే దెబ్బకి రెండు పిట్టలు కొట్టినందుకు చంకలు గుద్దుకొట్టుకొంటోంది.   గడ్కారి మాత్రం తన పాయసం గిన్నెలో కాంగ్రెస్ ఈ విధంగా పిడక వేయడంతో విలవిలలాడుతూ తాను నిర్దోషినని నిరూపించు కోనేంతవరకు పార్టీలో ఏపదవి చేపట్టనని, తన వల్ల పార్టీ ప్రయోజనాలకు భంగం కలగరాదనే ఉద్దేశంతోనే తానూ అధ్యక్షపదవికి పోటీ చేయకూడదని నిర్ణయించుకున్నట్లు మీడియాకు తెలిపారు. మొన్న జైపూరులో కాంగ్రెస్ పార్టీ పగ్గాలు చెప్పటిన తరువాత ఉద్రేకంగా నీతులు చెప్పిన రాహుల్ బాబు ఇప్పుడు దీనిని ఏ నీతి అంటారో ఆయనే వివరించాలి.  

homeminister

24న షిండే నివేదిక, 27న ప్రకటన?

  తాజా సమాచారం ప్రకారం 25వ తేదీన బంగ్లాదేశ్ పర్యటనకు బయలుదేరనున్న హోం మంత్రి సుషీల్ కుమార్ షిండే,24వ తేదీనే తెలంగాణా అంశంపై తన మంత్రిత్వ శాఖా సూచనలు పొందుపరచిన తుది నివేదికను కాంగ్రెస్ అధినేత్రి సోనియా గాంధీ చేతిలోపెట్టి బయలుదేరుతున్నారు. హోం మంత్రిగా తన అభిప్రాయాలు తెలియజేసినా, తుది నిర్ణయం మాత్రం సోనియా గాంధీయే తీసుకొంటారు. మరో రెండు రోజుల తరువాత అనగా 26వ తేదీన గణతంత్ర దినోత్సవం సందర్భంగా ఎర్ర కోటనుండి జాతినుద్దేశించి ప్రధాన మంత్రి చేసే ప్రసంగంలో రాష్ట్ర విభజనపై ప్రకటన వెలువడవచ్చును. ఏ కారణం చేతనయినా ఆ రోజు ప్రకటించకపోయినట్లయితే ఆ మరునాడు అంటే 27వ తేదీన ఖచ్చితంగా ప్రకటన వెలువడవచ్చును. అంతకు రెండు రోజుల ముందే పారా మిలటరీ బలాలు రాష్ట్రం చేరుకొంటాయి. వాటిని మోహరించిన ప్రాంతంబట్టి కేంద్రం ఏమి నిర్ణయం తీసుకోబోతుందో స్పష్టమయిన సంకేతం గ్రహించవచ్చును. ఒకవేళ తెలంగాణాలో మొహరిస్తే, కేంద్రం తెలంగాణాకి వ్యతిరేఖంగా నిర్ణయం తీసుకోబోతున్నట్లు భావించవచ్చును. ఆంధ్రా ప్రాంతాలలో మొహరించినట్లయితే తెలంగణా రాష్ట్రం ప్రకటించబోతున్నట్లు భావించవచ్చును. ఈ నూతన సంవత్సరంలో విడుదల కానున్నఅతి గొప్ప సస్పెన్స్ థ్రిల్లర్ ఇదేనని చెప్పక తప్పదు.

sanja baru

“తెలంగాణా కోసం 101 అబద్ధాలు”

  ఈ రోజు ప్రధాని మాజీ సలహాదారు డా.సంజయ్ బారు డిల్లీలో విశాలాంధ్ర వారు నిర్వహించిన ఒక పుస్తకా విష్కరణ సభలో పాల్గొన్నారు. యన్. చక్రవర్తి రచించిన ఆ పుస్తకం పేరు “తెలంగాణా కోసం 101 అబద్ధాలు, అర్ధరహిత వాదనలు.” ఆ పుస్తకంపై తీవ్ర అభ్యంతరాలు వ్యక్తం చేసిన తెలంగాణావాదులు, తెలంగాణాకు చెందిన సంజయ్ బారు ఆ సభలో పాల్గొనడంపై మరింత ఆగ్రహంతో ఉన్నారు.   పుస్తకావిష్కరణ సభలో పాల్గొన్న సంజయ్ బారు మాట్లాడుతూ, తనని ఆ సభలో పాల్గొనవద్దని హెచ్చరిస్తూ తనకు అనేక ఈ మెయిల్స్ వచ్చినట్లు తెలిపారు. అయినా కూడా వ్యక్తుల భావప్రకటన స్వేచ్చను గౌరవిస్తున్న కారణంగా అయన ఈ సభకు హాజరయినట్లు తెలిపారు. పుస్తకంలో వివిధ అంశాలతో తానూ పూర్తిగా ఏకీభవించకపోయినా, పూర్తిగా నిరాకరించడం లేదని ఆయన అన్నారు. తెలంగాణా ప్రజలలో రాష్ట్రం ఏర్పడాలనే బలమయిన కాంక్ష ఉందని పేర్కొంటూనే కేవలం సెంటిమెంటు కారణంగానే రాష్ట్రాలు విభజించుకుపోవడం మంచిదికాదని అయన అన్నారు.   వెనకబాటుతనం, నీటి సమస్యల గురించి ప్రస్తావిస్తూ దానికి కారణం రాష్ట్రాన్ని పరిపాలించిన మంత్రులు, ముఖ్యమంత్రులదే బాధ్యత అన్నారు. రాష్ట్రంలో మూడు ప్రాంతాల నుండి కూడా మంత్రులు, ముఖ్య మంత్రులు పాలన చేసినా వారి నిర్లక్ష్యం, అలసత్వం కారణంగానే రాష్ట్రంలో వివిధ ప్రాంతాలు వెనకబడిపోయున్నాయని అయన అన్నారు. అందువల్ల, కొత్త రాష్ట్రాల ఏర్పాటు కన్నా, రాష్ట్రాభివృద్దే ముఖ్యమని అయన అన్నారు. తమవల్లే హైదరాబాదు అభివృద్ధి చెందిందని వాదించే వారిని విమర్శిస్తూ ముంబై, గుజరాత్ రెండు రాష్ట్రాలుగా విడిపోయిన తరువాత, హైదరాబాదులో భారీ ప్రభుత్వ సంస్థల స్థాపన జరగడంవల్లనే అందరూ హైదరాబాదు వైపు ఆకర్షితులయ్యి చిన్న పరిశ్రమల స్థాపనకు దోహదపడ్డారని అయన అన్నారు.   అటు ఆంధ్రాలోనూ ఇటు తెలంగాణాలోను వ్యాపించి ఉన్న తమ కుటుంబం రెండు ప్రాంతాల మద్య వారధి వంటిది కనుక, తానూ నిర్ద్వందంగా మాట్లాడేందుకు అన్ని విధాల అర్హుడినని ఆయన అన్నారు. రాష్ట్ర విభజన సమస్యపై సలహా ఇచ్చేందుకు నియమించిన జస్టిస్ శ్రీ కృష్ణా కమిటీ సర్వోతమయిన సూచనలు చేసిందని ఆయన అభిప్రాయపడ్డారు.

హర్యానా మాజీ సీఎం కు పదేళ్ళ జైలు శిక్ష

      ఉపాధ్యాయ నియామకాల కుంభకోణం కేసులో హర్యానా మాజీ ముఖ్యమంత్రి ఓం ప్రకాశ్ చౌతాలా, ఆయన కుమారుడు అజయ్ చౌతాలాలకు పదేళ్ల చొప్పున జైలు శిక్ష విధిస్తూ ఢిల్లీ కోర్టు సంచలన తీర్పునిచ్చింది. ఈ కేసుకు సంబంధించి చౌతాలాను పోలీసులు వారం రోజుల క్రితం అరెస్టు చేశారు. ఈ కేసులో చౌతాలా, ఆయన తనయుడితో పాటు 53 మందిని కోర్టు దోషులుగా నిర్ధారించింది. ఈ రోజు నిందితులకు శిక్షను విధించింది.   అంతకముందు దక్షిణ ఢిల్లీలోని రోహిణీ ప్రాంతంలోని కోర్టు వద్ద చౌతాలా మద్దతుదారులు ఆందోళనకు దిగారు. పోలీసుల పైకి వారు రాళ్లు రువ్వారు. దీంతో పోలీసులు ఆందోళనకారుల పైకి భాష్పవాయువు ప్రయోగించారు. లాఠీఛార్జి చేసి వారిని చెదరగొట్టారు. చౌతాలాకు శిక్షను ఖరారు చేయడానికి ముందు కోర్టు వద్ద ఆయన మద్దతుదారులు భారీగా తరలి వచ్చి ఆందోళన చేపట్టారు. చౌతాలా ముఖ్యమంత్రిగా ఉన్న కాలంలో హర్యానాలో 3000 మంది ఉపాధ్యాయులను అక్రమంగా నియమించారనే ఆరోపణలున్నాయి. ఒక్కో అభ్యర్థి తమ ఎంపిక కోసం రూ.3, 4 లక్షలు లంచంగా ఇచ్చినట్లు తేలింది.

"హైదరాబాద్'' ప్రత్యేక రాష్ట్ర నినాదం వెనక రహస్యం!

-డా. ఎబికె ప్రసాద్ [సీనియర్ సంపాదకులు]         "ఆలూ, చూలూ లేదు కొడుకు పేరు సోమలింగం'' అని ముందుగానే పెళ్ళిగాని ఓ ఉత్సాహవంతుడు పేరు పెట్టుకున్నాడట! అలాగే ఆంధ్రప్రదేశ్ రాష్ట్ర విభజన సమస్య ఒక కొలిక్కి రాలేదు, వచ్చే లక్షణాలు కూడా కనిపించడం లేదు. దానికితోడు జైపూర్ సమావేశాల్లో కాంగ్రెస్ అధిష్టానవర్గం చర్చలలో కూడా తెలంగాణా సమస్యే ఒక ప్రధానాంశంగా ప్రస్తావనకు సహితం రాలేదని పత్రికలూ వార్తలు మోసుకొచ్చాయి. ఈ సందర్భంలోనే రాష్ట్ర మంత్రివర్గంలో హైదరాబాద్ మంత్రులయిన దానం నాగేందర్, ముఖేష్ గౌడ్ ఒక సంచలన ప్రకటనతో ముందుకొచ్చారు. " ఆంధ్రప్రదేశ్ ను విభజించే పక్షంలో హైదరాబాద్ నగరాన్ని కూడా ప్రత్యేక రాష్ట్రంగా ఏర్పాటు చేయాలి'' అని ప్రకటించారు [16-01-2013]! ఒక రకంగా వారు తమ వాదనకు చెప్పిన కారణం కూడా చూడ్డానికి సబబుగానే ఉన్నట్టుతోస్తుంది. రాష్ట్రానికి రాజధానిగా గత 56 ఏళ్ళనుంచి ఉన్న మహానగరాన్ని ఇలా "ప్రత్యేక రాష్ట్రం''గా గుర్తించాలన్న ఈ మంత్రుల కోర్క వెనక ఓ వాస్తవం దాగి ఉంది. తెలంగాణాలోని వేర్పాటువాదులుగా మారిన కొందరు రాజకీయ నిరుద్యోగులు - "తెలుగువారైన ఆంధ్రులంతా తెలంగాణా నుంచి హైదరాబాద్ నుంచీ వెళ్ళిపోవాలి, హైదరాబాద్ మాది, సీమాంధ్రుల శ్రమతోనూ, పెట్టుబడులతో నిర్మించింది కాదు, తెలంగాణా ప్రజల కష్టార్జితం హైదరాబాద్'' అంటూ ఇటీవల కొంతకాలంగా నినాదాలు వల్లిస్తున్నారు. కాని పెడమార్గం పట్టిన ఈ రాజకీయ నిరుద్యోగుల వాదనలోని డొల్లతనాన్ని తెలంగా బిడ్డలే అయిన ఆ ఇరువురు మంత్రులూ ఇలా బయటపెట్టారు. "హైదరాబాదు, సికింద్రాబాదు జంటనగరాల్లో భారతదేశంలోని అన్నివర్గాలు, మతాలు, కులాలు, వివిధ ప్రాంతాలకు చెందినవారు నివసిస్తున్నారు. అందువల్ల ఒకవేళ రాష్ట్రాన్ని విభజించవలసివస్తే నగరవాసులకు సకల ప్రయోజనాలు చేకూరేలా చర్యలు తీసుకోవాలి. అందుకే హైదరాబాదు మహానగరాన్ని ప్రత్యేక రాష్ట్రంగా ఏర్పాటు చేయాలి'' [16-01-2013 నాటి ప్రకటన]! నాగేందర్, ముఖేష్ గౌడ్ ళ ప్రకటన పూర్వరంగంలో, తెలుగుజాతి ఐక్యతను భగ్నం చేసే రాజకీయ నిరుద్యోగులు తమ వేర్పాటువాదం చాటున పచ్చిఅబద్ధాలూ, విషప్రచారంతోటి తెలుగు ప్రజల పైననే చేస్తున్న సందర్భంలో ఒక ముఖ్యవిషయం మరుగున పడుతోందని గమనించాలి. మొత్తం ఉభయప్రాంతాలలోని తెలుగుజాతికి బద్ధశత్రువులుగా రాజ్యాలు ఏలిన పాలనావ్యవస్థలు రెండూ [నిజం, బ్రిటిష్ రాజ్యవ్యవస్థలు] పరాయివాళ్ళవే, ఆ పాలనల కింద నలిగిపోయిన వారిలో తెలుగువారితో పాటు మహారాష్ట్రులూ, కన్నడిగులు కూడా ఉన్నారు. కాగా, భాషా ప్రయుక్త రాష్ట్రాలు ఏర్పడిన తరువాత కన్నడిగులూ, మహారాష్ట్రీయులూ తమతమ భాషా రాష్ట్రాలలో విలీనమైపోయారు. అదే ప్రాతిపదికపైన ఆంధ్రప్రదేశ్ భాషా రాష్ట్రంలో విలీనమైపోయిన వారు పరాయి పాలనలలో మగ్గిన ఇరుప్రాంతాల (ఆంద్ర, హైదరాబాద్ సంస్థానంలోని తెలుగుప్రజలంతా)ప్రజలూ, రాష్ట్ర రాజధానిగా ఉన్న హైదరాబాదును అభివృద్ధి చేయడంలో నాగేందర్, ముఖేష్ గౌడ్ లు చెప్పినట్టుగా కోస్తా, రాయలసీమ ప్రాంతాల వారినేగాక, పంజాబీలు, రాజస్థాన్, మహారాష్ట్ర మార్వాడీలు, సింథీలు, కాశ్మీరీలు, తమిళులూ, అన్ని ప్రాంతాల ఎన్.ఆర్.ఐ.లూ కూడా బహుళసంఖ్యలో ఉన్నారు. అయినప్పుడు రాజకీయ నిరుద్యోగులుగా ఉన్న కొందరు 'వేర్పాటు'వాదం చాటున దాటి తోటి తెలుగువారిపైనే విరుచుకుపడడం దేనికి? ప్రతి విషయాన్నీ వివాదాస్పదం చేయవలసిన అవసరం ఏమొచ్చింది. హైదరాబాద్ అభివృద్ధిలో తెలంగాణాలోని మోతుబరులుసహా ఇతర ప్రాంతాలలోని సంపన్నులైన సోదర తెలుగు మోతుబరులు కూడా ఉన్నారు. వాటితోపాటు వివిధ ప్రాంతాలకు చెందిన, ఉపాధికోసం పొట్టచేత పట్టుకుని జంటనగరాలలో అంతే స్థితిలో ఉన్న పేదబడుగువర్గాలతో కలిసి రెక్కలు ముక్కలు చేసుకుని బతుకులీడుస్తున్నవారు బహుళ సంఖ్యలోనే ఉన్నారు. అయినా, తెలుగువారి రాజధానీ నగరంలో గణనీయమైన సంఖ్యలో ఉన్న తెలుగేతర రాష్ట్రాలకు చెందిన వారిని మినహాయించి వేర్పాటువాదులు సోదర తెలుగువారిపైన కాలుదువ్వడానికి సాహసించడాన్ని ఎలా అర్థం చేసుకోవాలో చెప్పగలరా? ఈ బాపతు ప్రచారకులు చరిత్రను మరిచిపోతున్నారు. మాహారాష్ట్ర, కర్నాటక యుద్ధాలలో దక్కన్ యుద్ధాల్లో దేశీయ రాజుల మధ్య కుమ్ములాటల్లో తలదూర్చి అస్తవ్యస్థ పరిస్థితులను దేశంలో సృష్టించిన ఫ్రెంచి, బ్రిటిష్ సామాజ్యశక్తులు రెండు విదేశీ వర్తకవాణిజ్య కంపెనీలను (ఫ్రెంచి-బ్రిటిష్) రంగంలోకి దించి ఇతోధికంగా 18-19 శాతాబ్దాలల్లో మొత్తం దక్కన్ భూభాగమంతటా ప్రజలను దోచుకు తిని, పిప్పిపిప్పి చేసి వదిలిన ఘట్టాలను వేర్పాటువాద సోదరులు మరిచిపోతున్నారు. లేదా మభ్యపెడుతున్నారు! ఫ్రెంచివాళ్ళను తరిమేసి దక్కన్ లో పాగావేసిన బ్రిటిష్ ఈస్ట్ ఇండియా కంపెనీ, దాని రాజకీయాధికార వ్యవస్థ అయిన బ్రిటిష్ పాలనాశక్తి పరమాధికార శక్తిగా ఇండియాలో అవతరించిన దరిమిలా ఇంగ్లీషువారిని అంటకాగినవారు నిజం పాలకులు, కర్నాటక, మహారాష్ట్రులతో నిత్యం తగాదాలతో ఉన్న నిజం పాలకులకు, బ్రిటిష్ వాళ్ళకి పొత్తు కుదిరింది. ఫలితంగా తమ రాజ్యప్రయోజనాల కోసం ఉభయులూ చేతులుకలిపారు. ఆ వూపులో ఉత్తర సర్కారుల(కోస్తా)ను, రాయలసీమ జిల్లాలనూ నిజం పాలకులు స్వార్థప్రయోజనాలకోసం "అత్తసొమ్మును అల్లుడు దానం చేసిన''ట్టుగా బ్రిటిష్ వాడికి కట్టబెట్టి, అపారమైన పరిహారం పొంది, బలిశారన్న సంగతి వేర్పాటువాదులకు పరగడుపు అయిపోతే ఎలా? మైసూర్ యుద్ధాల్లో తాను కాజేసిన ప్రాంతాలను కూడా నిజంపాలకులు బ్రిటిష్ వాడికి డబ్బులకోసం అమ్మేశారన్న 'యాది'కూడా వేర్పాటువాదులకు లేకపోవడం హాస్యాస్పదం కాదా? తెలుగుప్రజల భూభాగాల్ని బ్రిటిష్ వాడికి అమ్మియా సొమ్ము చేసుకున్న పాపపు సంపదతోనే, తెలుగుప్రజల కష్టార్జితాన్ని తాకట్టుపెట్టిన ఫలితమే హైదరాబాద్ కు సోకులు దిద్దాడని మరచిపోరాదు. ఇప్పటికైనా వెనుతిరిగి చరిత్ర పాఠాలను చదివి, గుణపాఠం నేర్చుకుని బాధ్యతాయుత పౌరులుగా మెలగగలరని మనం ఆశించవచ్చా? మరికొన్ని విషయాలను వచ్చే ఆర్టికల్ లో వివరిస్తాను ....

తెలంగాణా ఇస్తే సంతోషమే, కానీ...

తెలంగాణా ఉద్యమం తీవ్రంగా సాగుతున్న సమయంలో కూడా సమైక్యాంధ్రకి అనుకూలంగా మాట్లాడిన ఒకరిద్దరు కాంగ్రెస్ తెలంగాణా నేతల్లో మంత్రి దానం నాగేందర్ కూడా ఒకరు. అయన ఇంతవరకు ఏరోజూ కూడా మిగిలిని తెలంగాణా కాంగ్రెస్ నేతలతో కలిసి ఉద్యమాల బాట పట్టలేదు కూడా. అయితే, ఇక నేడో రేపో కేంద్రం తెలంగాణాకి అనుకూలంగా ప్రకటన చేయబోతోందని బలమయిన సంకేతాలు వెలువడుతున్న ఈ తరుణంలోకూడా ఇంకా తెలంగాణాకి వ్యతిరేఖంగా మాట్లాడి మరింత మంది శత్రువులను పోగేసుకోవడం ఎందుకనుకోన్నారో మరేమో, ఆయన ఈ రోజు హైదరాబాదులో మీడియావారితో మాట్లాడుతూ “ఇంతవరకూ నేనెప్పుడూ తెలంగాణాకి వ్యతిరేఖంగా మాట్లాడలేదు. ఆవిధంగా మాట్లాడిన లాగడపాటి రాజగోపాల్ వంటి వారివల్లనే తెలంగాణా ఉద్యమాలు మరింత తీవ్రతరమయ్యాయి. అటువంటి వారిని తప్పు పట్టకుండా నన్ను వేలెత్తి చూపడం చాల తప్పు. కేంద్రం హైదరాబాదుని ఎక్కడ కేంద్రపాలిత ప్రాంతంగా ప్రకటించేస్తుందో అనే ఆదుర్దతో నేను హైదరాబాదుని ప్రత్యేక రాష్ట్రంగా ప్రకటించాలని కోరాను తప్ప, తెలంగాణా వద్దని గానీ, దానిని తెలంగాణాకి రాజధానిగా చేయోద్దనిగానీ నేనెన్నడూ అనలేదు. తెలంగాణా ఇస్తే నాకంటే సంతోషించేవారుండరు అని ఖచ్చితంగా చెప్పగలను. కానీ, మా అధిష్టానం ఏ నిర్ణయం తీసుకొన్న నేను కట్టుబడి ఉంటాను. అది ప్రత్యేక తెలంగాణా అయిన సమైక్యంద్రా అయినా సరే.”

ఓవైసీ అరెస్టు: పాతబస్తీలో టెన్షన్ టెన్షన్

        ఎంఐఎం ఎంపీ అసదుద్దీన్ ఒవైసీ అరెస్ట్‌కు నిరసనగా పార్టీ కార్యకర్తలు బంద్‌కు పిలుపు నిచ్చారు. బలవంతంగా షాపులను మూసివేయిస్తున్నారు. బంద్ చేయని దుకాణాలపై రాళ్లతో దాడి చేశారు. పలుచోట్ల దుకాణాదారులు స్వచ్ఛందంగా షాపులను మూసివేశారు. కవరేజీకి వెళ్లిన మీడియాపై ఆందోళనకారులు రాళ్లతో దాడి చేశారు. దీంతో పాతబస్తీలో పరిస్థితి ఉద్రిక్తంగా మారింది. ఎలాంటి అవాంఛనీయ సంఘటనలు జరగకుండా పాతబస్తీలో భారీగా పోలీసు బలగాలు మోహరించారు. పాతబస్తీలో పరిస్థితిపై సీపీ అనురాగశర్మ మాట్లాడుతూ చిన్నచిన్న ఘటనలు మినహా పరిస్థితి ప్రశాంతంగా ఉందన్నారు. సభలు, సమావేశాలు నిర్వహించరాదని ఆదేశించారు. ఎలాంటి ఘటనలనైనా ఎదుర్కుంటామని సీపీ అనురాగ్‌శర్మ తెలిపారు.