Home  
కవితలు

సౌందర్యవతి వీవు

సౌందర్యవతి వీవు - వి.బ్రహ్మానంద చారి సౌందర్యవతి వీవు ఆనందమతి నేను ఇరుడెందములు వూగ అరుదెంచె శ్రీలక్ష్మీ ఏ నందనోద్యాన నవపారిజాతమ్మొ ఇంతింతగా ఎదిగి అంతయూ తానాయే శ్రీనివాసుని కరుణ ఆనంద పద్మమై వికసించు చిరునగవు ఓ......జాబిలమ్మ  

పావురం రెక్కలకు

పావురం రెక్కలకు - డా.వై. రామకృష్ణారావు   పావురం రెక్కలకు రక్తం మరకలేమిటి ? వార్త పత్రికపై వాలిందేమో ! వీచి వీచీ అలసిపోయిందేమో పాపం! స్తంభించిపోయింది పవనం. ఆకాశం తలుపు తెరిచి చూడు సూర్యుడి రహస్యం తెలుస్తుందేమో!

నువ్వు నాతో లేవని ఎవరన్నారు ?

నువ్వు నాతో  లేవని ఎవరన్నారు ? నువ్వు నా మనసులో  భద్రంగా ఉన్నావ్ నా ప్రతీ ఆలోచనలో ఉన్నావ్ నా ఊపిరిలో ఉన్నావ్ నా రక్తంలో ఉన్నావ్ నా చూపులో ఉన్నావ్ నా కనుపాపలో ఉన్నావ్ నా కన్నీరులో ఉన్నావ్ నా చిరునవ్వులో ఉన్నావ్ నా ప్రతీ అణువులో ఉన్నావ్ నువ్వు నాకు దూరమైనా మరుక్షణం నీ జ్ఞాపకాలు నాకు చేరువయ్యాయి నువ్వు చెంతలేవు లేవు అన్న సంగతి మర్చిపోవడానికి నీతో  ఉన్న మధురస్మృతులే చాలు నాకు ! ప్రతీక్షణం నువ్వు నా చెంతే ఉన్నావ్ అని చెప్పడానికి - ప్రియ

తొలి కోడి జామునే

తొలి కోడి జామునే - వి.బ్రహ్మానంద చారి   తొలి కోడి జామునే పనులు నిను లేపంగా లేచి లేచీ నడువ లేత నడుముగంగ వయ్యారి వాల్జెడ నాగుబామై ఎగసె ముంగిటా ముత్యాల రంగ వల్లులు వెలసె తిలకించు నా కనుల సిరివెన్నెలలు విరిసె పులకించి పాడనా ఓ......జాబిలమ్మ

చివరి పేజి

చివరి పేజి - డా.సి.భవానీదేవి  రహస్యమైన నిశబ్ద రాత్రి చీకటి దీపం వెలుగులో బతుకు పేజీల రెపరెపలు ఒక్కొక్క మడతలోంచి మల్లెపూల మంటలు ఇంతకాలంగా రాస్తున్న కలం శూన్యం ముట్టడిలో చిక్కుకుని స్తబ్దంగా ఆగిపోయింది రాసుకున్న పేజీల్లోంచి నెమలీకలన్ని ఒక్కసారిగా కళ్ళు తెరిచాయి ఆత్మీయంగా కలాన్ని పెనవేసుకున్నాయి మా గురించి మర్చిపోయావా? విచలిత కంఠంతో ప్రశ్నించాయి కలం ఉలిక్కిపడింది ఆత్మీయ బలంతో నిటారుగా నిలబడింది మళ్ళీ నడక ప్రారంభించింది ఇప్పుడు కలం కళ్ళల్లో కలలు పింఛాలు విప్పుతున్నాయి చివరి పేజీకేసి నడుస్తూ నేను

హృదయం

హృదయం స్ఫటికమైతే బావుణ్ణు అన్నిరంగులూ బైటపడతాయి కవిత చిరకాలపు రహదారి నేను బహుదూరపు బాటసారి కవిత్వం నిండా ఒకటే దడదడల రొద రైల్లో కూర్చొని రాశాడేమో - డా.వై. రామకృష్ణారావు  

ఆకాశమంటే అవనికి ప్రేమ

ఆకాశమంటే అవనికి ప్రేమ - డా. సి.భవానీదేవి ఆకాశమంటే అవనికి ప్రేమ అంతులేని నిర్మలందనిస్తుందని సుర్యోదయమంటే చెట్లకు మారాకు అతికిస్తుందని హరివిల్లంటే పిల్లలకు ఆశల ఉయ్యాలలూగిస్తుంటుందని మబ్బులంటే మట్టికి జీవనాంకురాల్ని మొలకెత్తిస్తాయని నదులంటే సముద్రుడికి నిలవలేని దూరాలు దాటివస్తాయని అరణ్యాలంటే కొండలకి వేళ్ళతో వెన్నుపూసలౌతాయని వెన్నలంటే కొండలకి నిలువెల్ల వెలుగు హత్తిస్తుందని కవిత్వమంటే అక్షరాలను నిలబెట్టి అస్తిత్వాన్నిస్తుందని!

గువ్వెగిరి పోయింది

గువ్వెగిరి పోయింది బువ్వెగిరి పోయింది గురుడు అనతి  అంది అవ్వెగిరి పోయింది గూడు చెదిరిపోయె వాడ వెలుగే పోయె ఏడున్న నీ తలపె నీడల్లె కదిలెనే గడిలోన వెదకేను గుడిలోన వెదకేను కనరాదే నీ జాడ ఓ......జాబిలమ్మ   వి.బ్రహ్మానంద చారి  

లిప్ లాంగ్వేజ్

లిప్ లాంగ్వేజ్ డా.సి.భవానీదేవి   ఈ మాటల విత్తనాలు ఎంతకి నాటుకోవేంటి ? నాటుకొని మనసు చిగురించదేంటి ? నవ్వుల ముసుగుల్లో కెమికల్ వాసనల్తో రంగుల్ని పులుముకుని పెదవుల వేదికపై నటించే పదాలు నిర్జీవంగా రాలిపోతై ఎన్ని భాషలు భూగోళంపై ఐనా లిప్ లాంగ్వేజ్ అర్ధాలేవేరు మమకారపు పొరల్ని కరిగించలేదు కనీసం ప్లాస్టిక్ దండనలయినా ఏ మనసుల్లోనూ ఊగించలేదు చెట్లు రాల్చేఆకుల్లా ఆనవాళ్ళయినా మిగుల్చుకోకుండా పెదవుల అంచులపై  నించి జారిపోతూ అస్తిత్వం లేకుండా మాయమైపోతూ

పరుగెత్తి పరుగెత్తి

పరుగెత్తి పరుగెత్తి -డా.వై. రామకృష్ణారావు పరుగెత్తి పరుగెత్తి పాదాలు నొప్పేమో నిల్చిపోయింది నీరు మంచుగడ్డై ఏరు యవ్వనం నది నడి వయసు సాగరం సన్యాసం నీటికి మరి మోక్షం ? తీరం చేరేదాకా తీరని ఉద్వేగం తీరా చేరాక ఏదో నిర్వేదం

తాతయ్య పెళ్ళిరోజు

      తాతయ్య పెళ్ళిరోజు - శ్రీమతి శారదఅశోకవర్ధన్ మామ్మకి తాతయ్యంటే ఎంతో ఇష్టం!     తాతయ్యకి మామ్మంటే పంచదార     చలకలకన్నా ప్రాణం! పండు మిరప పచ్చడికన్నా పరమఇష్టం!     గతాన్ని రోజుకు ఒకసారైనా నెమరు వేసుకుంటారు     సర్వాన్నీ మరచి నా గొడవల గురించి దెబ్బ లాడుకుంటారు     మరి మొహాలు చూసుకోనంతగా  వాదులాడుకుంటారు     కళ్లూ ముక్కూ కాలువ కట్టి మున్సిపాలిటీ తొంగిచూడని     మురికి బస్తీల్లా అవుతుంది మామ్మ మొహం!     బస్తీనంతా హడలగొట్టి బలాదూర్ తిరిగే రౌడిలా వుంటుంది తాతయ్య వైనం     మామ్మ ముక్కెర మీద విరుచుకు పడతాడు తాతయ్య     'పశువు ముక్కుకు తాడేసి లాగినట్టుంది నీ ముక్కెర' అంటాడు     మామ్మ వాళ్లూ మండి ఏవగించుకుంటుంది తాతయ్య బొద్దు మీసాల్ని!     వయస్సు మళ్లీనా రంగు పూసిన ఆ మీసాలు     బొద్దెంకల్లా వున్నాయంటుంది.     మామ్మకి బొద్దెంకంటే భయమైనా     మీసాలని బొద్దెంకలవగానే     మెల్లగా కఱ్ఱపట్టుకుని లేచి మామ్మమీదికొస్తాడు     కొట్టడానికి కాదు. ముద్దు పెట్టుకోవడానికి తాతయ్య     'బొద్దెంక మీసాలు నా దగ్గరికి రావొద్దు'     భయపడి పోతుంది మామ్మ నిజంగానే     వాటిని బొద్దెంకల్లా ఊహించుకుని!     'ముక్కెర పట్టి లాగి మరీ' ముద్దెట్టుకుంటాను     మూతి కడ్డంగా ముక్కెరెందుకో!     తాతయ్య మామ్మకు దగ్గరగా వెళ్లబోతాడు     మామ్మ భయపడిపోయి     నా వెనకాలే దాక్కుంటుంది     అడ్డు జరగొద్దని నన్ను బతిమాలుకుంటుంది     తాతయ్య నన్ను గట్టిగా ముద్దు పెట్టుకుంటాడు     ముసి ముసిగా నవ్వుకుంటాడు     మామ్మ ముసిముసిగా నవ్వుకుంటుంది.     ఆరోజు తాతయ్య పెళ్ళిరోజట!!     నాన్నా అమ్మా డబ్బిచ్చారు కొత్త బట్టలూ కొన్నారూ.     'కాస్త మీసాలరంగు తెచ్చి పెట్టకూడదు బాబూ అంది మామ్మ     నౌకరు రంగడితో__     తాతయ్య వెళ్ళొచ్చాడు ఎటో ఆటోలో!     మూడు ముత్యాల గుత్తి కొన్నాడు.     ముక్కెరకి తగిలిస్తే ఇంకా అందంగా వుంటుందని     ఇద్దరూ కలుసుకున్నారు భోజనాల దగ్గర.     ఆశ్చర్యంతో నోరు తెరిచారు!!     'బొద్దెంకల్లాంటి  మీసాలు నీకు ఇష్టంలేదని తీయించేశా!'     మెల్లగా నవ్వుతూ అన్నాడు తాతయ్య     'పశువుకు కట్టినట్టున్న  ముక్కెర మీకు     నచ్చలేదని మార్పించేశా!'     బోసినోటితో  పకపకా నవ్వింది మామ్మ.     'హాయిగా ముద్దెట్టుకోవచ్చులే     మీసం బాధా ముక్కెర గొడవా లేదు'     అన్నాడు మామ్మ దగ్గరగా జరిగి తాతయ్య     నా వెనకాలే దాక్కుంది మామ్మ     అడ్డు జరగొద్దని బతిమాలుకుంది.     మామ్మా తాతయ్యల దొంగాటలకి     నేనే తల్లిని!     వారి దెబ్బలాటలకి నేనే న్యాయవాదిని!     వారి ప్రణయ లీలలకి నేనే సాక్షిని!     'ఈసారి దెబ్బలాడితే తాతయ్యని ఏమంటుందో     మామ్మ? చూడాలి!     మరి తాతయ్యేమంటాడో మామ్మని? వినాలి!     మీసాలూ, ముక్కెరా లేవుగా' అనుకున్నాను.     ఆరోజూ వొచ్చింది!     దెబ్బలాటా వొచ్చింది!     'నిక్షేపంలాంటి ముక్కెర మార్చి పారేశావ్!     నీ మొహం చూడబుద్ది కావడం లేదు'     కసిరాడు తాతయ్య.     'సంపెంగపూవుల్లాంటి  లక్షణమైన మీసాలు     తీసి పారేశారు' విసుక్కుంది మామ్మ     'పోనీలే మామ్మా నీ ముద్దికి అడ్డులేదుగా' అన్నాను.     'ఓరి భడవా! అచ్చు తాతయ్య పోలికే'     కౌగిలించుకుంది మామ్మ.     'ఆరిపిడుగా! అన్నీ మామ్మ మాటలే'     ముద్దెట్టుకున్నాడు తాతయ్య     వారి కళ్ళలో కాంతి!     వారి మనసుల్లో శాంతి!     వారి పోట్లాటల్లో హాస్యం!     వారి వాదులాటల్లో లాస్యం!     అది చెరగని తరగని దరహాసం     మనిషికి సగం బలం మందహాసం!     బతుకంతా బాధే అయితే     బతకడమెలా సాధ్యం?     కష్ట సుఖాలు దైవాధీనం     అరికట్టడం ఎవరి తరం?     'ఆటలో అరిటి పండు'లా జీవితం     గడిపెయ్యడమే ఒక వరం!     అనుకుంటేనే వుంది సుఖం     అందులోనే వుంది ఆనందం!

చిన్నదాన

చిన్నదాన - మనోహర బోగా అందరాని  కొమ్మపైన చుక్కనంటినట్టున్న చిన్నదాన నిన్నందుకొనేది ఎలాగో చెప్పవా.... భామా నా ఆశల గుడిలో కపురముండే దేవతవనుకున్నానే. అందరాని కొమ్మ పైనా.......నా ఒక్కసారి పంతం వీడి కొమ్మని వదలి కిందకి దిగి నా గుండెల చప్పుడు విన్నావంటే నీ గుండె చప్పుడు పెరుగునే ఒ చెలి నా చెలి. ఆశలు రేపుతావు అంతలొనే నీళ్ళు పోస్తావు అదేమంటే నాకేమ్ తెలుసున్నంటావ్ మర్మము తెలిసిన వనితలు మాటలడకనే చంపుతారు మగవారిని మా మగవారిని కళ్ళ నిదురా దూరమ్ చేసి మా కల్లల్లో కాపురముంటామంటారు బడాయి ఫొజులు కొడుతుంటారు అందరాని  కొమ్మపైన చుక్కనంటినట్టున్న చిన్నదానా నిన్నందుకొనేది ఎలాగో చెప్పవా.... భామా నా ఆశల గుడిలో కపురముండే దేవతవనుకున్నానే.

పరువంపు మేడలో

పరువంపు మేడలో వి.బ్రహ్మానంద చారి పరువంపు మేడలో పుట్టవూ రాణివై పేరంటమునకేగ పౌష్యలక్ష్మీవోలె నీ తల్లి నిను జూసి ఆనంద భాష్పాల అక్షింతలను చల్లి చల్లగా నుండుమనె ముత్తైదువుల నుదుట మెరిసేటి కుంకుమే మంగళారతి జ్యోతి ఓ......జాబిలమ్మ  

గంగమ్మ

గంగమ్మ - నీలాల శ్రీనివాసులు నీ పేరుకు రెండే అక్షరాలు అమ్మ పేరుకు రెండే అక్షరాలు గలగల పారేటి  సెలయేరు నీవు శివుని శిరస్సున ఉండేది నీవు మానవాళికి జీవనాధారం నీవు ఎండిన మా బ్రతుకుల్లో వెలుగు నింపేది నీవు నీకు ఉన్నది ఇద్దరు స్నేహితులు యమున,సరస్వతి నిన్ను చూస్తేనే ఆనందం మాకు పరమానందం, కరువు కాలంలో మాఆకలిని , దాహాన్ని తీర్చేది నీవు అమ్మా..నీ చల్లని చలువకు పాత్రుడనమ్మా నీలో ఓపిక సహనం నాకెంతో ఆదర్శం  

ఒక్కణ్ణి ఎక్కడని

ఒక్కణ్ణి ఎక్కడని వి.బ్రహ్మానంద చారి   ఒక్కణ్ణి ఎక్కడని వెదకేను నీ కొరకు ఎక్కడుంటివె వీవు చుక్కల్లో చేరితివ ? బిక్కమొగమేసుకొని ఎక్కిదిగి గడపలూ నిక్కముగ  నీ కొరకె మ్రొక్కి వేడ్కొంటినె చిక్కులా పాల్జేసి చక్కగా పోయితివె దిక్కు నాకెవరే ఓ......జాబిలమ్మ  

మెరుపుల అగ్ని

మెరుపుల అగ్ని డా.వై. రామకృష్ణారావు మెరుపుల అగ్నిలో కాగినా మబ్బు కురిసే చినుకు చల్లగానే ముందుంటే నాయకుడు వెనకుంటే అనుచరుడు మరి ప్రక్కన? స్నేహితుడా. లోకం నిన్ను వేలేసిందా? పర్లేదు ఎదురుగా నేస్తం ఆశ్యర్యంగా ప్రత్యక్షం.

జలపాతం

జలపాతం డా.వై. రామకృష్ణారావు జలపాతం ఎంత సాహసి! అంతెత్తు కొండపై నుండి అమాంతం దూకుతుంది బాగా చెప్పావ్ అనిపించుకోనేకన్నా బాగా చేశావ్ అనిపించుకోవడం మిన్న గెలుపు మీద విశ్వాసం లేకుంటే పోటీ ఎందుకు ? ప్రత్యర్ధితో భేటి ఎందుకు ?  

ఇనుప కమ్మీలపై

ఇనుప కమ్మీలపై - వి. బ్రహ్మనందచారి ఇనుప కమ్మీలపై నడిచేటి పొగబండి కృష్ణమ్మ చేరగనె వింత సవ్వడి చేయ అంతలా నవ్వితివె అందాల బాలా! పాల పుంతలో దివ్వెలే వుసురనె నినుజూచి విచ్చుకత్తుల కొనలు గుచ్చితివె గుండెలో పిచ్చినై తిరిగితినె నా....జాబిలమ్మ

నా వల్ల కావడం లేదు నిన్ను అర్ధం చేసుకోవడం

నా వల్ల కావడం లేదు నిన్ను అర్ధం చేసుకోవడం - ప్రియా    ఒకోసారి  ఎంతో ప్రేమ చుపిస్తావ్ ఇంకోసారి   నేనెవరో తెలినట్టే  ప్రవర్తిస్తావ్ నీ ప్రేమను  మొత్తం నా మీద కుమ్మరిస్తావ్  ఆ ప్రేమలో పూర్తిగా మునిగి పోతాను నేను ఇంకోన్నిసార్లు  అర్ధించిన కనీసం నీ మాటకు కూడా నోచుకోను ఎందుకిల చేస్తున్నావ్ నా మీద నీకు ఎంతో ప్రేమ వుంది ! అనీ మురిసిపోయే క్షణం లోనే నువు నా వాడివి కాదు   అనేల చేస్తావ్ నా ప్రాణం నువ్వెనన్న విషయం నికేప్పుడు తెలుస్తుంది నా ప్రతి తలపు నీతోనే మొదలు నాలోని  బావలని  అక్షరాలుగా చేయడానికి నా జీవితం కూడా సరిపోదు ఈ జన్మకు ఏ జన్మకు నీకోసం నిరీక్షిస్తూ ఉంటాను నా ప్రతి ప్రయత్నం నిన్ను చదవడానికే అయిన ఏదో లోపం నా ప్రయత్నంలో అందుకే నా వల్ల కావడం లేదు నిన్ను అర్ధం చేసుకోవడం

ఆమె ముందు

ఆమె ముందు డా.వై. రామకృష్ణారావు ఆమె ముందు మోకరిల్లాను పిల్లాడు వీపెక్కి ఛల్ ఛల్ గుర్రం ఆడాడు ఎడబట్లా కన్నీళ్లు కలయికల కలువలూ ప్లాట్ ఫారం అంటే ఇదే! విగ్రహం జాగ్రత! పంచాంగాన్నీ సప్తమి తత్పురుషం చేస్తే ప్రమాదం.