Home  
Politics

భారత్‌కు వచ్చేందుకు తీవ్రవాదులు... సొరంగం తవ్వేశారు

  పాకిస్తాన్‌ నుంచి మన దేశంలోకి ప్రవేశించేందుకు తీవ్రవాదులు చేయని ప్రయత్నమంటూ లేదు. తాజాగా మన దేశంలోకి భారీ ఆయుధాలతో సహా చొరబడేందుకు, తీవ్రవాదులు 90 అడుగు సొరంగాన్ని తవ్విపారేశారు. ఆర్‌.ఎస్‌. పురా సెక్టారులోని సరిహద్దులో పాకిస్తాన్ వైపు నుంచి ఇండియాలోకి వచ్చేందుకు తవ్విన ఈ సొరంగాన్ని సైన్యం కనిపెట్టడంతో, భారీ ముప్పు తప్పింది. త్వరలోనే మొదలయ్యే అమర్‌నాధ్‌ యాత్రలో భారీ విధ్వంసాన్ని సృష్టించే ప్రయత్నాలలో భాగంగానే తీవ్రవాదులు ఈ సొరంగాన్ని తవ్వినట్లు తెలుస్తోంది. భూమికి 10 అడుగుల దిగువున నాలుగడుగుల వెడల్పుతో తవ్విన ఈ సొరంగాన్ని భారత్‌ భూభాగంలోని ‘అల్లాహ్ మాయి దే కోతే’ అనే ప్రదేశంలో కనుగొన్నారు. ప్రమాదాన్ని గుర్తించిన వెంటనే భారత సైన్యాధికారులు, తమ తోటి పాకిస్తాన్‌ అధికారులకు ఫిర్యాదు చేశారు. కానీ ఎప్పటిలాగే... తమకేమీ తెలియదంట పాకిస్తాన్ సైన్యం నిమ్మకుండిపోయింది!

చక్రి తల్లి, సోదరుడు అరెస్ట్..

దివంగత సినీ సంగీత దర్శకుడు చక్రి ఆస్తిపై గత మూడు రోజులుగా వివాదం జరుగుతున్న సంగతి తెలిసిందే. చక్రి భార్య శ్రావణికి.. చక్రి కుటుంబసభ్యులకు ఆస్తి వ్యవహారంలో వివాదాలు జరుగుతున్నాయి. ఈ నేపథ్యంలో చక్రి తల్లి, సోదరుడు మహిత్ నారాయణ్‌ సోమాజిగూడలోని వరుణ్ స్వర్గం విల్లా అపార్ట్‌మెంట్ వద్ద దీక్ష చేపట్టారు. అయితే వీరిని గురువారం రాత్రి 11 గంటలకు పంజాగుట్ట పోలీసులు అరెస్టు చేసి పోలీస్‌స్టేషన్‌కు తరలించారు. అయితే తమను అరెస్ట్ చేయడంపై మహిత్ నారాయణ్‌ ఆగ్రహం వ్యక్తం చేస్తున్నారు. శాంతియుతంగా దీక్ష చేస్తున్నమమ్మల్ని అరెస్ట్ చేయడం అమానుషం.. దీని వెనుక  ఫ్లాట్ నం. 504ను ఆక్రమించుకున్న అట్లూరి మాధవి హస్తముందని.. ఇంకా ఎవరెవరు ఉన్నారో బయటపెడతానని అన్నారు.

సుజనాకి దక్కని ఊరట...

సుజనా చౌదరికి సుప్రీంకోర్టులో చుక్కెదురైంది. మారిషన్ బ్యాంకు రుణ బకాయిలో కేసులో హైకోర్టు ఇచ్చిన తీర్పును సవాల్ చేస్తూ సుజనా సుప్రీంకోర్టును ఆశ్రయించిన సంగతి తెలిసిందే. అయితే సుజనా పిటిషన్ ను సుప్రీంకోర్టు కొట్టివేసింది.

పాకిస్థాన్ ను పొగిడితే ముక్కలుగా నరుకుతా.. బీజేపీ నేత సంచలన వ్యాఖ్యలు

  బీజేపీ నేతలు మాత్రం తమ నోటిని ఏ మాత్రం అదుపులో పెట్టుకునే పరిస్థితి కనిపించడంలేదు. ఒకపక్క దేశంలో ఇప్పటికే మతపరమైన ఘటనలు జరుగుతుంటే ఇప్పుడు వారు చేసే వ్యాఖ్యలవల్ల ఇంకా దుమారం రేగుతోంది. తాజాగా వెస్ట్ బెంగాల్ రాష్ట్ర భారతీయ జనతా పార్టీ అధ్యక్షుడు దిలీప్ ఘోష్ వివాదాస్పద వ్యాఖ్యలు చేశారు. దేశంలో యువత ఎవరైనా పాకిస్థాన్ జిందాబాద్ అన్నా.. ఎవరైనా దేశానికి వ్యతిరేకంగా, పాకిస్థాన్‌ను పొగుడుతూ నినాదాలు చేసినా తలలు తీస్తానంటూ..  పై నుంచి కిందకు నిలువునా చీరేస్తాం.. ఆరు అంగుళాల ముక్కల చొప్పున నరుకుతాం అంటూ హెచ్చరించారు. మరి ఈయన చేసిన వ్యాఖ్యలకు ఎంత దుమారం రేగుతుందో చూడాలి.

మీరు టాయిలెట్లు కట్టి ఉంటే అయిపోయేది.. రాహుల్ పై మోడీ

  ప్రధాని నరేంద్ర మోడీ.. కాంగ్రెస్ పార్టీ ఉపాధ్యక్షుడు రాహుల్ గాంధీకి మధ్య మాటల తూటాలు పేలుతున్నాయి. మోడీ మీద విరుచుకుపడిన రాహుల్ గాంధీకి మోడీ నిన్న జరిగిన సభలో బానే చురకలు అంటించారు. కొందరికి వయసు పెరుగుతుంది కాని బుర్ర పెరగదని పరోక్షంగా రాహుల్ గాంధీని ఉద్దేశించి మాట్లాడారు. అయితే ఆ సమయంలో సభ నుండి రాహుల్ గాంధీ వెళ్లడానికి ప్రయత్నించగా..  ప్రధాని మోడీ.. ఇది సరైన పద్ధతి కాదన్నారు. కాంగ్రెస్ పార్టీ లోకసభా పక్ష నేత మల్లిఖార్జున ఖర్గే కూడా చెప్పడంతో రాహుల్ తిరిగి వచ్చి కూర్చున్నారు. అనంతరం మళ్లీ మోడీ ప్రసంగిస్తూ.. కాంగ్రెస్ పార్టీ తమపై చాలా బాధ్యతలు వదిలేసిందని.. పేద ప్రజలకు చేయాల్సిన చాలా పనులను తమపై వదిలేసిందని.. అన్నారు. కాంగ్రెస్ ప్రభుత్వమే కనుక టాయిలెట్లు కట్టి ఉంటే మాకు ఆ పని తప్పేదని.. అందరికీ కరెంట్ ఇవ్వకుండా తమకు వేలాది ఇళ్లకు విద్యుత్ ఇచ్చే పనిని అప్పగించారన్నారని విమర్శించారు. దేశం బలహీనంగా ఉన్నట్లు చూపించడం సరికాదని స్వర్గీయ ఇందిరా గాంధీ అన్నారని మోడీ గుర్తు చేశారు. మొత్తానికి మోడీ తన మార్కును మరోసారి చూపిస్తూ.. అటు మాపై బాధ్యత పెట్టారు అంటూనే ఇటు కాంగ్రెస్ పార్టీ ఏం చేయలేదని మాట్లాడారు.

జెట్‌ ఎయిర్‌వేస్‌ విమానానికి తృటిలో తప్పిన ప్రమాదం

  దిల్లీ నుంచి ముంబైకి ప్రయాణించిన జెట్‌ ఎయిర్‌వేస్ భారీ ప్రమాదాన్ని తృటిలో తప్పించుకుంది. నిన్న ఈ విమానం ముంబైలో దిగే సమయంలో ల్యాండింగ్‌ గేర్‌ మొరాయించడంతో, ఒక్కసారిగా విమానం రన్‌వే మీదకి ఒరిగిపోయింది. ఈ సమయంలో విమానంలో 127మంది ప్రయాణికులు ఉన్నట్లు సమాచారం. ల్యాండింగ్‌ అయ్యే సమయంలో పైలట్‌ ఏమాత్రం అజాగ్రత్తగా వ్యవహరించినా తమ ప్రాణాలు గాల్లో కలిసిపోయి ఉండేవన్న ఊహ ప్రయాణికులకు ముచ్చెమటలు పట్టిస్తోంది. విమానం రన్‌వే మీద అదుపుతప్పే సమయంలో దగ్గరలో మరో విమానం లేకపోవడం వల్లగానీ, ఎలాంటి షార్ట్ సర్క్యూట్ ఏర్పడకపోవడం వల్లగానీ... పెను ముప్పు తప్పినట్లు భావిస్తున్నారు. విమానం కుప్పకూలిన చోట నుంచి ఒక్క అంగుళం కూడా మరి కదిలేందుకు మొరాయించడంతో... ముంబై విమానాశ్రయ అధికారులు ప్రత్యామ్నాయ రన్‌వేలను ఉపయోగిస్తున్నారు.

రేపటినుండే ఏపీ అసెంబ్లీ బడ్జెట్ సమావేశాలు..

  ఏపీ అసెంబ్లీ బడ్జెట్ సమావేశాలు రేపటినుండి ప్రారంభంకానున్నాయి. దీనిపై అసెంబ్లీ స్పీకర్ కోడెల శివప్రసాదరావు మాట్లాడుతూ.. రేపు మధ్యాహ్నం మూడు గంటలకు ప్రారంభమయ్యే సమావేశాల్లో మొదట గవర్నర్ ఈఎస్‌ఎల్ నరసింహన్ ప్రసంగిస్తారని అన్నారు. అంతేకాదు గవర్నర్ ప్రసంగానికి అడ్డు తగలకుండా విపక్ష సభ్యులు సంయమనం పాటించాలని కోరారు. ఈ సమావేశాలు 18 రోజులు జరగుతాయని.. ఆర్థిక మంత్రి యనమల రామకృష్ణుడు పదో తేదీన వచ్చే ఆర్థిక సంవత్సరానికి బడ్జెట్‌ను సమర్పిస్తారని కోడెల అన్నారు. కాగా ఏపీ, తెలంగాణ బడ్జెట్ సమావేశాలు ఈ నెలలోనే జరగనున్న నేపథ్యంలో నగరంలో భారీ బందోబస్తు ఏర్పాట్లు చేయనున్నారు.

లోక్ సభ మాజీ స్పీకర్ పీఏ సంగ్మా కన్నుమూత..

  లోక్ సభ మాజీ స్పీకర్ పీఏ సంగ్మా కన్నుమూశారు. 1988-1990 మధ్య మేఘాలయ ముఖ్యమంత్రిగా పనిచేసిన సంగ్మా.. 1996 నుంచి 1998 వరకు లోక్ సభ 11 వ స్పీకర్ గా పనిచేశారు. ప్రస్తుతం ఆయన మేఘాలయలోని తురా లోక్‌సభ స్థానానికి ప్రాతినిధ్యం వహిస్తున్నారు. మరోవైపు సంగ్మా మృతికి పార్లమెంట్ ఉభయ సభలు సంతాపం తెలిపాయి. ఆయన మృతికి సంతాపంగా ఈనెల 8 వరకు సభను వాయిదా వేస్తున్నట్లు స్పీకర్‌ సుమిత్రా మహాజన్‌ ప్రకటించారు. కాగా సంగ్మా 1947 సెప్టెంబర్ 1 న జన్మించారు.

పాలేరు ఎమ్మెల్యే రాంరెడ్డి వెంకటరెడ్డి కన్నుమూత..

  పాలేరు ఎమ్మెల్యే రాంరెడ్డి వెంకటరెడ్డి కన్ను ముశారు. గత కొంత కాలంగా అనారోగ్యంతో బాధపడుతున్న ఆయన కిమ్స్ ఆస్పత్రిలో చికిత్స పొందుతూ మరణించారు. ఐదుసార్లు ఎమ్మెల్యే గా ఎన్నికైన వెంకటరెడ్డి.. ప్రస్తుతం పీఏసీ ఛైర్మన్ గా కొనసాగుతున్నారు. వెంకరెడ్డి మృతికి తెలంగాణ సీఎం కేసీఆర్ తీవ్ర దిగ్భాంతి చెందారు. ఈ సందర్భంగా ఆయన వెంకటరెడ్డి అంటే అందరికీ గౌరవం.. అసెంబ్లీలో అందరితో వెంకటరెడ్డి అన్యోన్యంగా ఉండేవారు.. వెంకటరెడ్డిది గొప్ప వ్యక్తిత్వం అని చెప్పారు. వెంకటరెడ్డి సొంత ఊరు ఖమ్మం జిల్లా కామేపల్లి మండలం

బట్టలు ఉతకనందుకు మెమో

  ప్రభుత్వం రంగంలో ఉండే ఉన్నతాధికారులు, తమ సహాయకుల చేత నానాచాకిరీ చేయించుకుంటారన్న విషయం బహిరంగ రహస్యమే! ఈ విషయం మీద ఎన్ని విమర్శలు వినిపిస్తూనే ఉన్నా, జరిగే పని జరుగుతూనే ఉంది. కానీ ఏకంగా తన బట్టలు సరిగా ఉతకడం లేదంటూ ఓ జడ్జిగారు తన సహాయకురాలికి మెమో ఇచ్చిన వార్త ఇప్పుడు తమిళనాట సంచలనంగా మారింది. ‘నా ఇంట్లో బట్టలను, ముఖ్యంగా లోదుస్తులను సరిగా ఉతకడం లేదంటూ, ఇదేంటని ప్రశ్నించిన నా భార్యకి అమర్యాదగా బదులిచ్చినందుకు... నీ మీద ఎలాంటి క్రమశిక్షణా చర్యలు ఎందుకు తీసుకోకూడదో ఏడు రోజులలోగా బదులు ఇవ్వాలి’ అంటూ డి.సెల్వం అనే సదరు జడ్జిగారు, వసంతి అనే సదరు సహాయకురాలికి ఘాటుగా ఓ శ్రీముఖాన్ని జారీచేశారు. ఈ మెమోని చూసి భయపడిపోయిన వసంతి ‘తప్పు జరిగినందుకు మన్నించమనీ, మున్ముందు ఇలాంటి పొరపాట్లు జరగకుండా జాగ్రత్త పడతాననీ’ వివరణను అందించారు. కాకపోతే ఈ మెమో కబురు కాస్తా బయటకు పొక్కడంతో, ఉద్యోగ సంఘాలు ఈ విషయమై న్యాయస్థానాన్ని ఆశ్రయించే ప్రయత్నంలో ఉన్నాయి.

సూరీడుతో జగన్ చెక్ పెట్టనున్నారా..?

  దివంగత వైయస్ రాజశేఖర రెడ్డి వ్యక్తిగత కార్యదర్శి సూరీడు ఏపీ ముఖ్యమంత్రి చంద్రబాబు నాయుడిని కలిసిన సంగతి తెలిసిందే. ఈనేపథ్యంలో వీరిద్దరి భేటీపై రాజకీయ వర్గాల్లో చర్చలు మొదలయ్యాయి. వైఎస్ కు అత్యంత ముఖ్య అనుచరుడు అయిన సూరీడు చంద్రబాబును కలవడంలో ఆంతర్యం ఏమిటా అని అందరూ అనుమానాలు వ్యక్తం చేస్తున్నారు.   సూరీడు.. వైయస్ రాజశేఖర రెడ్డి ముఖ్యమంత్రిగా ఉన్న సమయంలో సూరీడు ఆయన వ్యక్తిగత కార్యదర్శిగా ఉన్నారు. పార్టీలో ఉన్న అందరి నేతల కంటే రాజశేఖర్ రెడ్డికి సూరీడు నమ్మిన బంటులా ఉండేవాడు.. అంతేకాదు వైఎస్ దగ్గర ఏదైనా పనులు కావాల్సి వస్తే సూరీడుని కలిస్తే చాలు అయిపోతుంది అనే నమ్మకం కలిగిన వ్యక్తి. అయితే వైఎస్ మరణానంతరం మాత్రం సూరీడు రాజకీయాలకు దూరంగా జగన్ కు కూడా కాస్త దూరంగానే ఉంటూ వచ్చారు. అలాంటి నేపథ్యంలో ఇప్పుడు ఈయన చంద్రబాబును కలవడంపై ఏపీ రాజకీయాలు వేడెక్కాయి.   అయితే సూరీడు తన వ్యక్తిగత పనుల మీద చంద్రబాబును కలవడానికి వచ్చారా..? లేక జగన్ టీడీపీ నేతలపై అమరావతి భూములు కొన్నారని ఆరోపణలు చేసిన నేపథ్యంలో.. జగన్ గురించి ఏదైనా సమాచారం తెలుసుకునేందుకు టీడీపీనే సూరీడును పిలిపించిందా..? సూరీడు ద్వారా జగన్‌కు చెక్ పెట్టే ఆలోచన చేస్తున్నారా? అని చర్చ సాగుతోంది. మరి ఎందుకు కలిశారో ఇద్దరిలో ఒక్కరైనా నోరు విప్పితేనే తెలుస్తోంది.

జైలు జీవితంపై బుక్ రాస్తా.. కన్హయ్య కుమార్

జేఎన్యూ విద్యార్ధి సంఘ నేత కన్హయ్య కుమార్ కు హైకోర్టు బెయిల్ మంజూరు చేసిన సంగతి తెలిసిందే. దీంతో తీహార్ జైలు నుండి కన్హయ్య బయటకు వచ్చారు. అయితే కన్హయ్య బయటకు వచ్చిన నేపథ్యంలో క్యాంపస్లో ఒక పక్క సంబరాలు జరుపుకుంటుంటే.. మరోపక్క ఏబీవీపీ సంఘ నేతలు మాత్రం వ్యతిరేకంగా నిరసనలు చేస్తున్నారు. ఈ సందర్భంగా కన్హయ్య మాట్లాడుతూ.. తనపై ఎన్ని కేసులు పెట్టిన బయపడేది లేదని, జెఎన్‌యు విద్యార్థి ఉద్యమ వారసత్వం తనకు అట్లాంటి ధైర్యాన్ని ఇచ్చిందని అన్నారు. అంతేకాదు.. నేను ఎలాంటి దేశ వ్యతిరేక నినాదాలు చేయలేదు.. ఏబీవీపీ నేతలు కావాలనే అలాంటి వీడియోలు స్పంష్టించారని ఆరోపించారు.   అంతేకాదు ఈ సందర్భంగా కన్హయ్య ప్రధాని మోడీ గురించి కూడా ప్రస్తావించి.. చిన్న, చిన్న ఘటనలతో పూర్తిగా జెఎన్‌యునే మూసివేసే కుట్ర జరిగిందని, ప్రభుత్వ కుట్రలను విద్యార్థులు, ప్రొఫెసర్లు అడ్డుకున్నారని.. ఇందిరా గాంధీ లాంటి వారే జెఎన్‌యు వద్ద తల దించుకున్నారనీ మోడీ ఆ రూచి చూసే రోజులు దగ్గర పడ్డాయని హెచ్చరించారు. ఇక జైలు జీవితంపై బుక్ కూడా రాస్తానని కన్హయ్య చెప్పారు.

చంద్రబాబు.. మాట మీరు తప్పారా..? నేనా..?

కాపు సంఘ నేత, మాజీ మంత్రి ముద్రగడ పద్మనాభం మరోసారి ప్రభుత్వ వైఖరిపై మండిపడ్డారు. ఇచ్చిన హామీలను ప్రభుత్వం మరిచిపోయింది.. అదే విషయాన్ని నేను ప్రశ్నించినందుకు నన్ను ఓ దొంగ, ద్రోహీ అని టీడీపీ నేతలతో తిట్టించారు అని అన్నారు. నాపై వ్యతిరేకంగా ఎందుకు ప్రచారం చేస్తున్నారు.. చంద్రబాబు.. మాట మీరు తప్పారా..? నేను తప్పానా..?.. కాపు డిమాండ్లను అవహేళన సమంజసమేనా.. అధికారంలో ఉన్నవాళ్లు అబద్దాలు చెబితే నిజమైపోతాయా అంటూ ప్రభుత్వంపై ప్రశ్నల వర్షం కురిపించారు. ఈనెల 10 వ తేదీలోపు ఇచ్చిన హామీలపై స్పష్టత ఇవ్వాలి లేదంటే 11వ తేదీన దీక్ష చేపడతాం అని చెప్పారు.  

మరోసారి పవన్ ను టార్గెట్ చేసిన రోజా..!

వైసీపీ ఎమ్మెల్యే రోజా ప్రతిపక్షాలపై విరుచుకుపడటంలో దిట్ట. ఆ విషయం ఇప్పటికి ఎన్నోసార్లు రుజువైంది. అయితే ఏపీ అధికార పార్టీపైన ఆ నేతలపైన విమర్శలు చేసే రోజా.. అప్పుడప్పుడు జనసేన అధినేత అయిన పవన్ కళ్యాణ్ కూడా టార్గెట్ చేస్తుంటారు. గతంలో ప్రత్యేక హోదాపైన.. అమరావతి భూముల మీద పవన్ కళ్యాణ్ మాట్లాడాలి అంటూ డిమాండ్ చేసేవారు. ఇప్పుడు మరోసారి భూ దందా వ్యవహారంలోకి పవన్ కళ్యాణ్ ను లాగారు. అమరావతిలో తెలుగుదేశం పార్టీ నేతల భూదందాపై పోరాడాలని..  ప్రశ్నించే తత్వం ఉన్న పవన్ కళ్యాణ్ ఈ వ్యవహారంపై నోరుమెదపాలని.. అసలు గత ఎన్నికల్లో పవన్ కళ్యాణ్‌ను చూసే ప్రజలు చంద్రబాబుకు ఓటు వేశారని అన్నారు. మొత్తానికి రోజా మాత్రం ఏదో ఒక విషయంపై పవన్ ను టార్గెట్ చేస్తూనే ఉంటారు. మరి ఈ విషయంపై పవన్ స్పందిస్తారో లేదో చూడాలి..

కేన్సర్‌ను ఎదుర్కొనే టీకాలు మొదలయ్యాయి!

  ఎంతటి ఆరోగ్యవంతుడైన మనిషినైనా నిర్వీర్యం చేసి, విషమ స్థితిలోకి నెట్టివేసే రోగం కేన్సర్‌. ప్రాథమిక దశలో ఉన్న కేన్సర్‌ను నిర్మూలించడం సాధ్యమైన విషయమే అయినా, అందుకోసం చేసే చికిత్స, శరీరాన్ని నిస్సత్తువకు గురిచేస్తుంది. పైగా కొన్ని రకాల కేన్సర్‌ మళ్లీ మళ్లీ తిరగబెట్టే ప్రమాదమూ ఉంది. ఒకవేళ కేన్సర్‌ను కనుక ఆఖరి దశలో గుర్తిస్తే, దాని నుంచి కోలుకోవడం కష్టం కావచ్చు. అందుకనే ఎలాంటి ప్రతిచర్యలూ లేని కేన్సర్‌ చికిత్స కోసం సుదీర్ఘకాలంగా ప్రపంచం వేచి చూస్తోంది. ఇప్పుడు ఆ శుభసమయం వచ్చేసినట్లే కనిపిస్తోంది. లండన్‌లోని గయ్స్‌ ఆసుపత్రి, మనిషిలోని కేన్సర్‌ కణతుల మీద దాడి చేసే విధంగా ఒక టీకాను అమలుచేస్తోంది. ప్రస్తుతం ప్రయోగ దశలో ఉన్న ఈ టీకాను, ఎంపిక చేసిన కొందరు రోగులకు అందించడం మొదలుపెట్టారు. ట్రాన్స్‌స్క్రిప్టేస్ అనే ఒక ఎంజైము ఆధారంగా రూపొందించిన ఈ టీకాను రోగికి ఇచ్చినప్పుడు, అది విచ్చలవిడిగా పెరిగిపోతున్న కేన్సర్‌ కణాలను గుర్తించి, వాటిని నిర్వీర్యం చేస్తుంది. భారతీయ సంతతికి చెందిన కేన్సర్‌ నిపుణుడు, హర్‌దేవ్‌ పండా కూడా ఈ ప్రయోగంలో ముఖ్యపాత్రను పోషించడం గమనార్హం.  

చంద్రబాబుతో వైఎస్సార్ ముఖ్య అనుచరుడు సూరీడు భేటీ

  ఏపీ సీఎం చంద్రబాబుతో వైఎస్సార్ ముఖ్య అనుచరుడు సూరీడు భేటీ అయ్యాడు. దీంతో ఇప్పుడు ఈ భేటీపై ఆసక్తి నెలకొంది. దాదాపు అరగంట నుండి చంద్రబాబుతో సూరీడు మంతనాలు జరుపుతుండగా.. ముఖ్యంగా రాజధాని భూ దందా కథనాల నేపథ్యంలో భేటీకి ప్రాధాన్యత సంతరించుకున్నట్టు తెలుస్తోంది. వైఎస్ చనిపోయిన తరువాత సూరీడు రాజకీయాలకు దూరంగా ఉన్నారు. అయితే ఇప్పుడు సూరీడు చంద్రబాబుని కలవడంతో మరింత వేడి వాతావరణం నెలకొంది.  

పరకాల ప్రభాకర్ ఎక్కడ..? ఏమైంది..?

  ఎప్పుడూ ఏదో ఒక విషయంపై మీడియా సమావేశాలు ఏర్పాటు చేసి.. మీడియాతో ఎప్పుడూ టచ్ లో ఉండే ఒక వ్యక్తి ఏపీ సర్కారు మీడియా అడ్వైజర్ గా ఉన్న పరకాల ప్రభాకర్ కొంత కాలం నుండి కనిపించడంలేదు.. దీంతో ఇప్పుడు అసలు పరకాలా ఎక్కడికి వెళ్లారు.. ఏం చేస్తున్నారు అన్న ప్రశ్నలు తెలత్తుతున్నాయి. అయితే ఈయన అంతగా కనిపించకపోవడానికి గల పలు కారణాలు రాజకీయ వర్గాలు చెబుతున్నారు. గత ఏడాది రెండు రాష్ట్రాల్లో సంచలనం సృష్టించిన ఓటు నోటు కేసుకు సంబంధించి మాట్లాడిన మాటల్లో తప్పు బాబు చేశారనే అర్దం వచ్చేలా కన్ఫ్యూజన్ లో ఇరికించారని బాబు ఆయన మీద కోప్పడ్డారట. అది అయిపోయిందంటే.. ఆ తరువాత జరిగిన గోదావరి పుష్కరాలకు సంబంధించి జరిగిన తప్పిదంలో.. ఏర్పాట్లు సరిగా చేయలేదని పరకాలపైన ఆగ్రహం వ్యక్తం చేశారంట చంద్రబాబు. అంతేకాదు మీడియా సమావేశంలో కూడా విలేఖరులు ఏదో అడిగితే ఆయన మరేదో చెబుతుండటంతో…టీడీపీ ఇరుకున పడాల్సి వస్తుంది. దీంతో ఆయన్ను రాజకీయ పరమైన నిర్ణయాలకు దూరంగా ఉంచుతున్నారట చంద్రబాబు. అయితే ఇవన్నీ నిజమో కాదో తెలియదు కానీ.. పరకాల ప్రస్తుతం ఏదో అనారోగ్య సమస్య మీద ముంబై వెళ్లారని.. అక్కడ ఓ హాస్పిటల్లో చికిత్స చేయింటుకుంటున్నారని టీడీపీ నేతలు అనుకుంటున్నారు. మరి అది ఎంత వరకూ నిజమో తెలియదు. ఏది ఏమైనా ఒకవేళ నిజంగానే పరకాల ఆస్పత్రిలో ఉంటే తొందరగా కోలుకోవాలని కోరుకుందాం..

నేనేం చంద్రబాబు బినామీని కాదు..

  ఏపీ నూతన రాజధానిలో టీడీపీ నేతలకు భూములు ఉన్నాయంటూ వార్తలు వచ్చిన నేపథ్యంలో.. ఆపార్టీ నేతలు జగన్ పై తీవ్ర స్థాయిలో మండిపడుతున్నారు. దీనిపై సినీ నటుడు.. టీజీపీ నేత మురళీ మోహన్ మాట్లాడుతూ.. మాపై జగన్ మీడియా లేనిపోని ఆరోపణలు చేస్తుందని..హాయ్ లాండ్ కొన్నానని లేనిపోని పుకార్లు సృష్టించార అని అన్నారు. నేను 1993 లో హైదరాబాద్ షిప్ట్ అయ్యాను.. అప్పటినుండి రియల్ ఎస్టేట్ వ్యాపారం చేస్తున్నాను.. నా దగ్గర అపార్ట్ మెంట్లు కొన్నవారు హ్యాపీగా ఉన్నారు అని ఆయన తన గతాన్ని గుర్తుచేశారు. చంద్రబాబుకు నాకు ఎలాంటి వ్యాపార సంబంధాలు లేవు.. నేను చంద్రబాబుకి బినామీని కాదు అని ఆయన అన్నారు. పీజేఆర్, వైఎస్సార్ కూడా నా మీద ఆరోపణలు నిరూపించలేకపోయారు అని చెప్పారు. ఎన్నికలకు ముందే భూములు కొన్నాను.. ఇప్పటి వరకూ అనుమతులు రాలేదు.. అనుమతులు రాకముందే బురద చల్లుతున్నారు అని ఆరోపించారు.

టీడీపీ ఎమ్మెల్యేలకు స్పీకర్ నోటీసులు.. వివరణ ఇవ్వండి..

  తెలంగాణ టీడీపీ నుండి ఇప్పటివరకూ పది మంది ఎమ్మెల్యేలు టీఆర్ఎస్ పార్టీలోకి జంప్ అయిన సంగతి తెలిసిందే. ఈనేపథ్యంలో పార్టీ ఫిరాయించిన ఐదుగురు ఎమ్మెల్యేలకు నోటీసులు జారీ చేశారు. ఎమ్మెల్యేలు ఎర్రబెల్లి, వివేకానంద్ గౌడ్, ఎస్ రాజేందర్ రెడ్డి, ప్రకాశ్ గౌడ్, సాయన్నలకు స్పీకర్ మధుసూధనాచారి నోటీసులు జారీ చేశారు. వారం రోజుల్లోగా వివరణ ఇవ్వాలని స్పీకర్ మధుసూధనాచారి ఆదేశాలు జారీ చేశారు. కాగా గతంలో గతంలో ఐదుగురు ఎమ్మెల్యేలకు నోటీసులు జారీ అయిన సంగతి తెలిసిందే.