Politics

కేటీఆర్ సవాల్ కు రేవంత్ రెడ్టి ప్రతిసవాల్..

తెలంగాణ టీడీపీ నేత రేవంత్ రెడ్డి తెలంగాణ రాష్ట్రంలో నిరంకుశ పాలన కొనసాగుతోందని నిజాం కాలేజీ గ్రౌండ్స్ లో ఏర్పాటు చేసిన బహిరంగ సభలో అన్నారు. గ్రేటర్ ఎన్నికల్లో భాగంగా బీజేపీ-టీడీపీ పార్టీలు నిజాం కాలేజీ గ్రౌండ్స్ లో ఏర్పాటు చేసిన బహిరంగ సభతో తమ ప్రచారాన్నిలాంఛనంగా ప్రారంభించిన సంగతి తెలిసిందే. ఈ సందర్భంగా రేవంత్ రెడ్డి మాట్లాడుతూ అధికారంలోకి వచ్చిన టీఆర్ఎస్ ప్రభుత్వం ఇప్పటి వరకూ ఏ ఒక్క హామీ కూడా నెరవేర్చలేదని అన్నారు. తెలంగాణ రాష్ట్రం అందరి కృషి వల్లే వచ్చింది అంతే కాని మీ ఒక్కరి వల్లే వచ్చింది కాదని ఎద్దేవ చేశారు. అంతేకాదు మంత్రి కేటీఆర్ విసిరిన సవాల్ కు రేవంత్ రెడ్డి ప్రతి సవాల్ విసిరారు. ఈ గ్రేటర్ ఎన్నికల్లో 100 సీట్లు కనుక టీఆర్ఎస్ పార్టీ గెలిస్తే తాను రాజకీయాలనుండి తప్పుకుంటానని రేవంత్ రెడ్డి అన్నారు. మరి ఎవరు రాజీనామా చేస్తారో.. ఎవరు రాజకీయాలనుండి తప్పుకుంటారో తెలియాలంటే కొద్దిరోజులు ఆగాల్సిందే.

నిర్మాతపై పవన్ కళ్యాణ్ ఫిర్యాదు..

హీరో, జనసేన అధినేత పవన్ కళ్యాణ్ ఓ ప్రముఖ సినీ నిర్మాతపై ఫిర్యాదు చేసినట్టు తెలుస్తోంది. 'అత్తారింటికి దారేది' సినీ నిర్మాత బీవీఎస్ఎన్ ప్రసాద్ పై పవన్ కళ్యాణ్ మూవీ ఆర్టిస్ట్స్ అసోసియేషన్ (మా)కు ఫిర్యాదు చేశారు. 'అత్తారింటికి దారేది' సినిమాకు ఇవ్వాల్సిన రెమ్యునరేషన్ విషయంలో ఆయన మాట తప్పారని.. సినిమా సమయంలో ఆయన తనకు కొంత వరకు రెమ్యునరేషన్ ఇచ్చారని, మిగిలినది 'నాన్నకు ప్రేమతో' సినిమా విడుదల సమయంలో ఇస్తానని చెప్పారని.. అయితే ఇప్పుడు తనకు ఇవ్వాల్సిన సొమ్ము ఇవ్వకపోవడంతో పవన్ ఫిర్యాదు చేసినట్లు తెలుస్తోంది.

ఒబామా పై న్యూస్‌ ఛానల్ వ్యాఖ్యత కామెంట్లు.. ఉల్లిపాయతో ఏడ్చారు.

అమెరికా అధ్యక్షుడు బరాక్ ఒబామా ఇటీవల జరిగిన బహిరంగ సభలో శాండీ స్కూల్ లో 2012లో తుపాకీ కాల్పులకు బలైన 20 మంది చిన్నారులను గుర్తుచేసుకొని కన్నీరు పెట్టుకున్న సంగతి తెలిసిందే. అయితే ఇప్పుడు ఆయన పెట్టిన కన్నీళ్లను ఉద్దేశించి ఫాక్స్ న్యూస్‌ ఛానల్ వ్యాఖ్యాత ఆండ్రియా టాంటెరోస్ విమర్సించారు. బరాక్ ఒబామా కన్నీళ్లు పెట్టుకున్నట్టు నటించారని.. ఒబామా ఏడవడం నమ్మశక్యంగా లేదని.. 'ఒబామా మాట్లాడిన తర్వాత వేదిక వద్ద ఉల్లిపాయ లేదా నో మోర్ టియర్స్(జాన్సన్ బేబీ షాంపూ బ్రాండ్ నేమ్) కోసం వెతికాను అని ఎద్దేవ చేశారు. అసలే ఇది అవార్డుల సీజన్' అంటూ వ్యంగ్యంగా వ్యాఖ్యానించారు. అయితే ఆండ్రియా చేసిన వ్యాఖ్యలకు గాను ఫాక్స్ న్యూస్‌ ఛానల్ ఒబామాపై విమర్శలు చేయడం కొత్తేమి కాదని లైట్ తీసుకుంటున్నారట.

రెచ్చిపోయిన ఉగ్రవాదులు.. 43 మంది మృతి..

ఉగ్రవాదులు మరోసారి రెచ్చిపోయారు. ఇరాక్ రాజధాని బాగ్దాద్ లో ఎస్ ఉగ్రవాదులు మారణహోమం చేశారు. బాగ్దాద్‌లోని అల్ జదిదా షాపింగ్‌మాల్‌లో ఉగ్రవాదులు భీకర కాల్పులు జరిపారు. ఈ కాల్పుల్లో సుమారు 18 మంది ప్రాణాలు కోల్పోయారు. ఉగ్రవాదులు షాపింగ్ మాల్ ల్లోనే దాక్కోవడంతో భద్రతా బలగాలు భవనం పైనుంచి లోపలికి ప్రవేశించి ఎదురుకాల్పులు చేస్తున్నారు. ఈ కాల్పుల్లో ఇద్దరు ఉగ్రవాదులు ప్రాణాలు కోల్పోగా.. నలుగురు పోలీసులు ప్రాణాలు కోల్పోయారు. ఈ ఒక్క చోటే కాకుండా బాగ్దాద్ లో పలుచోట్ల ఉగ్రవాదులు దాడులకు పాల్పడ్డారు. ఆగ్నేయ బాగ్దాద్‌లోని రద్దీగా ఉండే మార్కెట్‌లో కారు బాంబు పేల్చడంతో ఐదుగురు ప్రాణాలు కోల్పోగా.. మరో ప్రాంతంలో హోటల్‌వద్ద బాంబు దాడికి పాల్పడటంతో సుమారు 20 మంది మృతిచెందారు. మొత్తం 43 మంది ప్రాణాలు కోల్పోయారు.

గ్రేటర్ ఎన్నికలు.. నామినేషన్ల స్వీకరణ షురూ..

గ్రేటర్ ఎన్నికల సమరానికి నగరా మోగనుంది. ఈ ఎన్నికలకు గాను నామినేషన్ల స్వీకరణ ఈ రోజు ఉదయం 11 గంటల నుండి ప్రారంభమైంది. మొత్తం గ్రేటర్లో 150 వార్డులకు నోటిఫికేషన్ విడుదలైంది. ఇదిలా ఉండగా ఈ రోజు నుండి 17వ తేదీ వరకూ నామినేషన్ల స్వీకరణ ఉండగా.. సంక్రాంతి పండుగ సందర్భంగా 14, 15 తేదీల్లో మాత్రం నామినేషన్లు స్వీకరించరు. దీంతో నామినేషన్లకు నాలుగు రోజుల మాత్రమే గడువు ఉంటుంది. ఉదయం 11 గంటల నుంచి మధ్యాహ్నం 3 గంటల వరకు సంబంధిత రిటర్నింగ్ అధికారుల కార్యాలయాల్లో నామినేషన్లు స్వీకరిస్తారు. కాగా ఈరోజు నుండి నామినేషన్లు స్వీకరణ ప్రారంభించగా.. 18వ తేదీ సోమవారం నామినేషన్లను పరిశీలిస్తారు. ఉపసంహరణకు 21వ తేదీ మధ్యాహ్నం 3 గంటల వరకు గడువుంది. అభ్యర్థుల తుది జాబితాలను అదే రోజు సాయంత్రం ప్రకటిస్తారు. అభ్యర్థులు నామినేషన్ డిపాజిట్‌గా రూ. 5 వేలు చెల్లించాలి. ఎస్సీ, ఎస్టీలతో పాటు బీసీలకు నామినేషన్ డిపాజిట్ చెల్లింపులో రాయితీ ఇచ్చారు. వీరు రూ. 2,500 చెల్లిస్తే సరిపోతుంది.

మల్లాదిపై సిట్ పిటిషన్.. సహకరించలేదు..

కల్తీ మద్యం కేసులో నిందితుడిగా ఉన్న మల్లాది విష్ణువు.. ఆయన సోదరుడు శ్రీనివాస్ అరెస్ట్ అయిన సంగతి తెలిసిందే. అయితే ఇప్పుడు వీరిద్దరిని పోలీస్ కస్టడీకి అప్పగించాలని కోరుతూ సిట్‌ బృందం మెట్రోపాలిటన్ కోర్టులో పిటిషన్ వేసింది. తాము రెండు రోజుల పాటు విచారించినా మల్లాది తమకు సహకరించలేదని.. మరో ఏడు రోజుల పాటు కస్టడీకి ఇవ్వాలని కోరింది. మరోవైపు మల్లాది విష్ణు బెయిల్‌ కోసం ప్రయత్నిస్తున్నారు.

పఠాన్ కోట్ ఉగ్రదాడి.. పాకిస్థాన్ లో దర్యాప్తు ముమ్మరం..

పంజాబ్ లోని పఠాన్‌కోట్‌ విమాన స్థావరంపై ఉగ్రదాడి కేసులో నిందితుడిగా ఉన్న గురుదాస్ పూర్ ఎస్పీ సల్పీందర్ సింగ్ ను ఎన్ఐఏ విచారణ జరుపుతున్న సంగతి తెలిసిందే. ఈ నేపథ్యంలో ఆయనను సోమవారం దాదాపు ఎనిమిది గంటల పాటు విచారించగా సల్వీందర్ సింగ్ మాత్రం విరుద్ధ సమాధానాలు చెప్పడంతో లైడిటెక్టర్ పరీక్షలకు పంపిచాలని ఎన్ఐఏ అధికారులు నిర్ణయం తీసుకున్నారు. ఈవిచారణలో భాగంగానే సల్వీందర్ సింగ్‌ వద్ద వంట మనిషిగా ఉన్న మదన్ గోపాల్‌కూ ఎన్ఐఎ సమన్లు జారీ చేసింది. విచారణ నిమిత్తం ఈ నెల 13న హాజరు కావాలని చెప్పింది. ఇదిలా ఉండగా మరోవైపు ఈ దాడిపై విచారణ చేపట్టేందుకు గాను పాకిస్థాన్ ప్రధాని నవాజ్ షరీఫ్ ఐబీ, ఐఎస్ఐ, ఎంఐ, ఎఫ్ఐఏ, స్థానిక పోలీసులతో కలిపి సంయుక్త దర్యాప్తు బృందాన్ని ఏర్పాటు చేసిన సంగతి తెలిసిందే. ఈ నేపథ్యంలో విచారణ బృందం దర్యాప్తు ముమ్మరం చేసింది. ఇప్పటికే దర్యాప్తు బృందం మూడు జిల్లాల్లో ముమ్మర సోదాలు చేసి పదుల సంఖ్యలో అనుమానితులను పోలీసులు అదుపులోకి తీసుకున్నట్టు తెలుస్తోంది. అంతేకాదు ఈ దర్యాప్తుకు సంబంధించిన నివేదికను కూడా భారత్ కు అందజేశారంట. అయితే ఉగ్రవాదులకు సంబంధించిన ఫోన్ నెంబర్లు భారత్ తెలిపినా తమ దేశంలో రిజిష్టర్ కాలేదని ఆ నివేదికలో పాక్ వెల్లడించినట్లుగా తెలుస్తోంది.

బస్సులో చంద్రబాబు నిద్ర.. సీక్రెట్ ఏంటీ..?

ఏపీ ముఖ్యమంత్రి చంద్రబాబు విశాఖలో నిర్వహిస్తున్న ఐసీసీ సదస్సులో పాల్గొంటున్న సంగతి తెలసిందే. ఈ సదస్సు ద్వారా ఎంతోమంది పెట్టిబడిదారులు ఏపీలో పెట్టుబడులు పెట్టడానికి ముందుకువస్తున్నారు. అయితే ఇక్కడి వరకూ బానే ఉన్నా.. ఈ సదస్సు సందర్బంగా చంద్రబాబు చేస్తున్న ఒక పని గురించి మాత్రం అందరూ చర్చించుకుంటున్నారు. అదేంటంటే పెట్టుబడులు ఆకర్షించేందుకు విశాఖ నగరిలో ఏర్పాటు చేసిన సదస్సులో పాల్గొనేందుకు వైజాగ్ వచ్చిన బాబు.. గవర్నర్ బంగ్లా ఆవరణలో బస్సులో నిద్రపోవటం. దీనిపై పలువురు పలు రకాలుగా మాట్లాడుకుంటున్నట్టు తెలుస్తోంది. ఇప్పటికే చంద్రబాబుపై ఖర్చులు ఎక్కువగా చేస్తున్నారని.. తన ప్రయాణాల నిమిత్తమైతేనేమి.. తన ఇల్లు... ఆఫీసు నిమిత్తమైతేనేమి ఎన్నో విమర్శలు చవిచూశారు. అందుకే ఇలా చేస్తున్నారని అనుకుంటున్నారు. మరోవైపు ఈ సదస్సుకు వచ్చిన పారిశ్రామివేత్తల దృష్టిని ఆకర్షించడానికి ఇలా చేస్తున్నారని.. దీని ద్వారా ఏపీ కోసం ఎంత కష్టపడుతున్నారన్న సంకేతాలు పంపినట్టు అవుతుందని ఇలా చేస్తున్నారని అనుకుంటున్నారు. ఇలా ఉంటే బాబు ఇలా చేయడం వల్ల ఏపీ బ్రాండ్ ఇమేజ్ కు దెబ్బ తీసేలా ఉందన్న వాదన కూడా వినిపిస్తోంది. మరి బాబు నిద్ర వెనుక ఉన్న సీక్రెట్ ఏంటో బాబుకే తెలియాలి.

చైనా మనకు స్ఫూర్తి.. యనమల

అభివృద్ధిలో చైనా మనకు స్ఫూర్తి అని ఏపీ ఆర్ధిక మంత్రి యనమల రామకృష్ణుడు అన్నారు. విశాఖపట్నంలో నిర్వహిస్తున్నసీఐఐ సదస్సు మూడోరోజు సందర్భంగా యనమల ఈ కార్యక్రమానికి హాజరయ్యారు. ఈ సందర్భంగా ఆయన మాట్లాడుతూ ఈ సదస్సు ద్వారా ఆంధ్రప్రదేశ్‌కు పెట్టుబడులు వెల్లువెత్తాయి.. ఏపీ అభివృద్దికి పారిశ్రామికవేత్తలు తోడ్పాటు అందించాలని కోరారు. అంతేకాదు భారీ పరిశ్రమలు, ఆహార ప్రాసెసింగ్‌, మైనింగ్‌, ఇన్ఫర్మేషన్‌ టెక్నాలజీ, ఇంధన, తయారీ, రిటైల్‌, సీఆర్‌డీఏ, గృహ నిర్మాణ, మౌలిక రంగాల్లో పెట్టుబడులు పెట్టేందుకు పలు జాతీయ, అంతర్జాతీయ సంస్ధలు ముందుకొచ్చాయి.. యువతలో నైపుణ్యం పెంపొందించేందుకు ఆంధ్రప్రదేశ్ డెవలప్‌మెంట్ కార్పోరేషన్‌ ఏర్పాటు చేసినట్లు ఆయన పేర్కొన్నారు.

కేటీఆర్ సవాల్ వెనుక అసలు కారణం అదా..?

గ్రేటర్ ఎన్నికల ప్రచారంలో రాజకీయ నేతలు సవాళ్లు విసురుకోవడం సహజమే. అయితే అది గెలుపు పక్కా తమదని తెలిసిన నేతలు.. కచ్చితంగా గెలుస్తామనే భరోసా ఉన్నవాళ్లు చేస్తారు. ఇప్పుడు గ్రేటర్ ఎన్నికల నేపథ్యంలో తెలంగాణ మంత్రి కేటీఆర్ కూడా అలాంటి సవాళ్లే చేసి ప్రతిపక్షాలకు చెమట్లు పట్టిస్తున్నారు. తాజాగా కేటీఆర్ తాము గ్రేటర్ ఎన్నికల్లో ఓడిపోతే తాను మంత్రి పదవి నుండి తప్పుకుంటానని.. ఒకవేళ ప్రతిపక్షాలు కనుక ఓడిపోతే తమ పదవులకు రాజీనామా చేస్తారా అని బహిరంగంగా సవాల్ విసిరిన సంగతి తెలిసిందే. దీంతో ఇప్పుడు ప్రతిపక్షాలు కేటీఆర్ సవాల్ పై ఆశ్చర్యం వ్యక్తం చేస్తున్నాయి. అయితే అసలు కేటీఆర్ సవాల్ విసరడం వెనుక మాత్రం వేరే కారణాలు ఉన్నాయి అంటున్నారు రాజకీయ విశ్లేషకులు. గ్రేటర్లో కచ్చితంగా తాము గెలుస్తామన్న ధీమా కేటీఆర్ విసిరిన సవాల్ కు ఒక కారణం కాగా.. మరొకటి ప్రతిపక్షాల స్థయిర్యాన్ని మానసికంగా దెబ్బతీసే సరికొత్త రాజకీయ క్రీడ అని భావిస్తున్నారు. అంతేకాదు తన సవాల్ ద్వారా గెలుపు విషయంలో ప్రతిపక్షాలను డిఫెన్స్ లో పడేసినట్లు అవుతుందని.. రాజకీయ వర్గాలు చర్చించుకుంటున్నాయి. మరోవైపు కేటీఆర్ సవాల్ కు టీడీపీ స్పందించిది.. కానీ కాంగ్రెస్.. బీజేపీలు స్పందించలేదు. గ్రేటర్ ఎమ్మెల్యే ల గెలుపు కాకుండా..పార్టీ పిరాయించిన ఎమ్మెల్యేలతో రాజీనామా చేయించి గెలవాలని కోరింది. మొత్తానికి కేటీఆర్ బాగానే రివర్స్ గేమ్ ఆడుతున్నారు.. మరి కేటీఆర్ చెప్పినట్టు గెలుపు ఎవరిది అవుతుందో తెలియాలంటే కొన్నిరోజులు ఆగాల్సిందే.

చంద్రబాబుకు భద్రతను పెంచండి.. నిఘా విభాగం

ఏపీ ముఖ్యమంత్రి చంద్రబాబు భద్రత నిమిత్తం నిఘా విభాగం రాష్ట్ర ప్రభుత్వానికి లేఖ రాసినట్టు తెలుస్తోంది. చంద్రబాబుకు భద్రతను పెంచాలని.. సీఎం ప్రయాణించే హెలికాప్టర్, విమానాన్ని ప్రయాణానికి ముందు క్షుణ్ణంగా తనిఖీ చేయాలని పలు సూచనలు చేస్తూ లేఖలో పేర్కొన్నారు. అంతేకాదు హైదరాబాద్ నుండి మకాం మార్చిన చంద్రబాబు లింగమనేని గెస్ట్ హౌస్ కృష్ణా నది ఒడ్డున ఉంటున్న సంగతి తెలిసిందే. దీని గురించి ప్రస్తావిస్తూ సీఎం కృష్ణా నది ఒడ్డున ఉన్నందున, నదిలో మెకనైజ్డ్ బోట్‌లో పోలీసులతో 24 గంటలు పహారా పెట్టాలని.. ఈ బోటులో గజ ఈతగాళ్లు, స్విమ్మింగ్ నెట్, సీఆర్‌పీఎఫ్ బలగాలు ఉండాలని తెలిపింది.

ఉగ్రదాడిపై షరీఫ్ ఆదేశాలు..

పంజాబ్ పఠాన్ కోట్ విమాన స్థావరం పై జరిగిన ఉగ్రదాడి పై సంయుక్త విచారణ బృందం ఏర్పడినట్టు తెలుస్తోంది. ఈ సందర్భంగా ఆర్మీ, ఇంటెలిజెన్స్ అధికారులతో విచారణ బృందం సమావేశమయింది. మరోవైపు ఐబీ (ఇంటెలిజెన్స్ బ్యూరో), ఐఎస్ఐ (ఇంటర్ సర్వీసెస్), ఎంఐ (మిలటరీ) అధికారులతో పాకిస్థాన్ ప్రధాని నవాజ్ షరీఫ్ ఇవాళ సమావేశమయ్యారు. ఈ సందర్భంగా పఠాన్‌కోట్ పైన దాడి కేసులో అత్యున్నత స్థాయి దర్యాప్తు బృందాన్ని ఏర్పాటు చేయాలని పాకిస్థాన్ ప్రధాని నవాజ్ షరీఫ్ ఆదేశించినట్లుగా వార్తలు వినిపిస్తున్నాయి. కాగా భారత్ ఒత్తిడితో పాకిస్థాన్ చర్యలకు సిద్దమైందని అంటున్నారు.

నిజం బయటకు రాకుండా ఉండాలనే.. మమతా బీజేపీ ఫైర్..

బీజేపీ నేతలు పశ్చిమబెంగాల్ సీఎం మమతా బెనర్జీపై ఆగ్రహం వ్యక్తం చేస్తున్నారు. ఉత్తర ప్రదేశ్‌లో ఒక రాజకీయ నాయకుడు చేసిన వ్యాఖ్యలపై గత ఆదివారం బెంగాల్‌లోని ఘర్షణలు చెలరేగిన సంగతి తెలిసిందే. అయితే దీని గురించి వివరాలు తెలుసుకోవడానికి బీజేపీ నిర్ధారణ కమిటీ మాల్దా వెళ్లింది. అయితే వారిని పోలీసులు అక్కడే అడ్డగించి శాంతి భద్రతలకు విఘాతం కలుగుతుందన్న కారణంతో వారిని తిరిగి కోల్‌కతా పంపించేశారు. దీంతో బీజేపీ నేతలు ఆగ్రహం వ్యక్తం చేశారు. వాస్తవాలు బయటకు రాకుండా ఉండాలని మమతా బెనర్జీ ఇలా చేస్తున్నారని మండిపడ్డారు. కాగా ఈ ఘటనపై కేంద్రం ప్రభుత్వాన్ని నివేదిక ఇవ్వాలని కోరగా.. అవి మత ఘర్షణలు కావని బీఎస్‌ఎఫ్‌కు స్థానిక ప్రజలకు మధ్య జరిగిన చిన్న గొడవ మాత్రమేనని బెంగాల్‌ సీఎం మమతా బెనర్జీ అన్నారు.

రోజాకు చేదు అనుభవం.. రోజా గోబ్యాక్ అంటూ నినాదాలు..

వైసీపీ ఎమ్మెల్యే రోజాకు చేదు అనుభవం ఎదురైంది. ఈరోజు ఆమె పశ్చిమ గోదావరి జిల్లా చింతలపూడిలో వైసిపి మండల కార్యాలయాన్ని ప్రారంభించేందుకు వెళ్లగా టీడీపీ కార్యకర్తలు ఆమెను అడ్డుకున్నారు. మంత్రి పీతల సుజాతను రోజా.. సుజాతకు వడ్డాణాలు, డబ్బుల పైన ఉన్న ఆసక్తి ప్రజా సమస్యల పైన లేదని..ఆమెకు చంద్రబాబు భజన తప్ప ఇంకొకటి తెలియదని ఎద్దేవ చేశారు. ఈ నేపథ్యంలో ఓ దళిత మంత్రిని అవమానపరిచేలా మాట్లాడిన ఆమె క్షమాపణ చెప్పాలని టిడిపి కార్యకర్తలు ధర్నాకు దిగారు. రోజా గోబ్యాక్ అంటూ నినాదాలు చేశారు. దీంతో వైసీపీ నేతలు కూడా రావడంతో టీడీపీ.. వేసీపీ కార్యకర్తల మధ్య వాగ్వాదం జరిగింది. దాంతో పోలీసులు అక్కడకి వచ్చి పరిస్థితిని చక్కదిద్ది.. రోజాని వెనక్కి వెళ్లమని సూచించారు.

సీఎం కావాలని కోరుకోలేదు.. నాకు మంత్రి పదవే ఎక్కువ.. కేటీఆర్

గ్రేటర్ ఎన్నికల నేపథ్యంలో కేటీఆర్ ప్రతిపక్షాలకు ఓ సవాల్ విసిరారు. గ్రేటర్ ఎన్నికల్లో గెలుపు తమదేనని.. గ్రేటర్ ఎన్నికల్లో తాము కనుక ఓడిపోతే మంత్రి పదవి నుండి తప్పుకుంటా.. ఒకవేళ ప్రతిపక్షాలు కనుక ఓడిపోతే వారు తప్పుకోవడానికి సిద్దమా అని అన్నారు. అంతేకాదు నాకు మంత్రి పదవే ఎక్కువ.. ప్రజలు ఇచ్చిన అవకాశంతోనే మంత్రి పదవి వచ్చింది.. కలలో కూడా సీఎం కావాలని కోరుకోలేదు అని అన్నారు. ఈ సందర్భంగా ఆయన బీజేపీ పై కూడా నాలుగు విమర్శల బాణాలు వదిలారు. రామమందిరం కడతామని రాముడికే కమలం పార్టీ శఠగోపం పెట్టిందని.. అది భారతీయ జనతా పార్టీ కాదని భారతీయ జోక్ పార్టీ అని విమర్శించారు. ప్రదానమంత్రి నరేంద్ర మోడీ తమ రాష్ట్రానికి ఇవ్వాల్సిన నిధులు కాకుండా ప్రత్యేకంగా ఏమీ ఇవ్వలేదన్నారు. ఆయన అన్ని రాష్ట్రాలకు ప్రధాని అని, ఇంతవరకు తెలంగాణకు రాకపోవడం శోచనీయమన్నారు.

జీహెచ్ఎంసీ ఎన్నికలు.. సెటిలర్లకు కేసీఆర్ గాలం

గ్రేటర్ ఎన్నికల నేపథ్యంలో అధికార పార్టీ సెటిలర్ల దృష్టిని ఆకర్షించడానికి పలు వ్యూహాత్మక రచనలు చేస్తంది. ఇప్పటికే కేటీఆర్ సీమాంధ్రులను ఆకట్టుకోవడానికి వాక్చాతుర్యాన్ని వాడుతున్నారు. ఇప్పుడు కేసీఆర్ మరో నిర్ణయం తీసుకొని వారికి గాలం వేసినట్టు కనిపిస్తుంది. అదేంటంటే.. జిహెచ్ఎంసి ఎన్నికల్లో పది నుంచి 12 మంది సెటిలర్లను పోటీకి దింపాలనే యోచన చేయడం. ఎందుకంటే గత 15 ఏళ్ల టిఆర్ఎస్ చరిత్రలో గ్రేటర్ ఎన్నికల్లో నిలబడే అవకాశాన్ని సెటిలర్లకు ఇవ్వనే లేదు. అలాంటిది ఇప్పుడు సెటిలర్లకు ఆ ఛాన్స్ ఇస్తుండటంతో సీమాంధ్రులకు బాగానే గాలం వేస్తున్నట్టు కనిపిస్తుందని రాజకీయ వర్గాలు చర్చించుకుంటున్నాయి. మరోవైపు ఇప్పటికే జీహెచ్ఎంసి ఎన్నికల్లో టిఆర్ఎస్ తరఫున పోటీ చేయడానికి ఆసక్తి కనబరుస్తూ దాదాపు 140 మంది సీమాంధ్ర సెటిలర్లు దరఖాస్తులు పెట్టుకున్నారట. దీంతో సీమాంధ్ర సెటిలర్లు అధికంగా ఉన్న డివిజన్లలో వారిని పోటీకి దింపాలని కెసిఆర్ భావిస్తున్నారు.

కేసీఆర్, బాబుల ఫ్రెండ్‌షిప్ పై రేవంత్ రెడ్డి..

తెలంగాణ టీడీపీ నేత రేవంత్ రెడ్డి అధికార పార్టీపై విమర్శలు చేయడంలో ఎప్పుడూ ముందుంటారు. కేసీఆర్.. చంద్రబాబు ఇద్దరూ సన్నిహితంగా ఉన్న తాను మాత్రం ప్రభుత్వంపై విమర్శలు కొనసాగిస్తూనే ఉంటానని.. వారి ఫ్రెండ్‌షిప్ తన చేతులు కట్టేయలేదని అని రేవంత్ రెడ్డి మీడియా సమావేశంలో అన్నారు. కెసిఆర్ మిత్రుత్వం తెరాసపై రేవంత్ రెడ్డి చేయి కట్టేసినట్లయిందనే వాదనలు వినిపిస్తున్నాయని అడగ్గా ఆయన పైవిధంగా స్పందించారు. ప్రధాని నరేంద్ర మోడీ, సీఎం కెసిఆర్ ఒకటి రెండుసార్లు కలిశారని, అలాంటప్పుడు మంత్రి కెటిఆర్ ప్రధాని పైన, బిజెపి పైన విమర్శలు చేయడం లేదా అని తిరిగి ప్రశ్నించారు. ముఖ్యమంత్రి కెసిఆర్‌ను గద్దె దించడమే తన లక్ష్యమని చెప్పారు. అంతేకాదు గ్రేటర్ ఎన్నికల గురించి మాట్లాడుతూ గ్రేటర్ హైదరాబాద్ ఎన్నికల్లో టిడిపి - బిజెపి గెలుపు ఖాయమని.. గ్రేటర్ హైదరాబాద్ ఎన్నికల్లో టిడిపి పునర్వైభవం కోసం పాకులాడటం లేదని, ఇప్పటికి తమ పార్టీకి నగరంలో పట్టు ఉందని వ్యాఖ్యానించారు.

అలా చేస్తేనే పాక్-భారత్ ల మధ్య చర్చలు..

పంజాబ్ లో పఠాన్ కోట్ విమాన స్థావరంపై ఉగ్రవాదులు దాడి చేసిన సంగతి తెలిసందే. ఈనేపథ్యంలో భారత్-పాక్ ల మధ్య ఈ నెల 15 న జరగనున్న ద్వైపాక్షిక చర్చలు రద్దయ్యాయి. పఠాన్ కోట్ పై దాడి చేసిన సూత్రధారులపై పాకిస్థాన్ చర్యలు తీసుకునే వరకు చర్చలు జరగవని కేంద్ర భద్రతా సలహాదారు అజిత్ దోవల్ స్పష్టం చేశారు. పాక్ చర్యలపై భారత్ సంతృప్తి చెందిన తర్వాత చర్చలపై పునరాలోచిస్తామని.. అప్పటి వరకు భారత్, పాకిస్థాన్‌ల మధ్య చర్చల ప్రక్రియ కొనసాగదని ఆయన పేర్కొన్నారు. ఇదిలా ఉంటే పఠాన్‌కోట్ ఉగ్రదాడికి సంబంధించిన సాక్ష్యాలను భారత్ తమకు అందించిందని పాక్ విదేశాంగశాఖ సైతం అంగీకరించింది. సాక్ష్యాల ప్రకారం దోషులపై చర్యలు తీసుకుంటామని పాకిస్థాన్ ప్రభుత్వం పేర్కొంది.

రెండో రోజు ప్రారంభమైన పార్టనర్ షిప్ సదస్సు..

విశాఖలో రెండో రోజు పార్టనర్ షిప్ సదస్సు ప్రారంభమైంది. ఈ రెంజో రోజు సమావేశంలో ఏపీ సీఎం చంద్రబాబు. కేంద్రమంత్రి వెంకయ్యనాయుడు, జయంత్ సిన్హా తదితరులు పాల్గొన్నారు. ఈ సందర్భంగా ఏపీ ప్రభుత్వం పలు ఐటీ సంస్థలతో ఒప్పందం చేసుకున్నట్టు తెలుస్తోంది. కాగా నిన్న ప్రారంభమైన ఈ సదస్సులో దాదాపు రూ.2 లక్షల కోట్ల పెట్టుబడులు వచ్చాయి. మొదటి రోజే 32 సంస్థలతో ఏపీ ప్రభుత్వం ఒప్పందం కుదుర్చుకుంది. 49 ఐటీ సంస్థలతో ఎంవోయూలు కుదుర్చుకోనుంది. ఈ సందర్బంగా చంద్రబాబు మాట్లాడుతూ దేశం నలు మూలల నుంచి 1100 మంది ప్రతినిధులు, 41 దేశాల నుంచి 315 మంది విదేశీ ప్రతినిధులు, ఇతరులతో సహా అందరూ కలిపి 1450 మంది పాల్గొన్నారన్నారు. ఆదివారం జరిగిన 32 ఒప్పందాల ఆచరణలోకి వస్తే మొత్తం 94,748 మందికి ఉద్యోగాలు వస్తాయన్నారు. అంతేకాదు ప్రపంచంలో భారత్ కు ఉన్న అనుకూలతలు మరే దేశానికి కూడా లేవని.. భవిష్యత్ లో భారత్ సూపర్ పవర్ గా ఎదుగుతోందని.. మోడీ ప్రభుత్వంలో భారత్ దూసుకెళ్తుందని..భారతీయులు సాంకేతిక అంశాల్లో ముందంజలో ఉన్నారని చంద్రబాబు వ్యాఖ్యానించారు.

News

Movie News

Movies

Photos

Grandalayam

Shortfilms

Bhakthi

Videos

Recipes

Comedy

Vanitha