గుంటూరు టాకీస్ లో రష్మి రచ్చ

టీడీపీ, బీజేపీ.. కలిసుండలేమంటున్న నేతలు

  టీడీపీ, బీజేపీ పార్టీలు రెండూ మిత్రపక్షాలని అందరికి తెలిసిందే. ఈ రెండు పార్టీలు మిత్రపక్షాలైనప్పటికీ అప్పుడప్పుడూ తమ విభేదాలను మాత్రం బయటపెడుతూనే ఉంటారు. ఏదో కేంద్రం ఒకపక్క.. చంద్రబాబు మరోపక్క ఉంటున్నారు కాబట్టి నేతలు ఒకరిపై ఒకరికి ఎంత కోపమున్నా వాటిని మనసులో దాచుకుంటూ కాలం నెట్టుకొస్తున్నారు. అయితే పశ్చిమగోదావరిలో జరిగిన సంఘటనతో ఇది పైపైన నేతలు చేస్తున్న మెరుపులే అని స్వచ్ఛంగా అర్ధమయింది. పశ్చిమగోదావరి జిల్లా తాడేపల్లిగూడెంలో బీజేపీ, టీడీపీ నేతలు మధ్య గొడవ రాజుకుంది. తాడేపల్లిగూడెంలో నిట్ శంకుస్థాపన విషయంలో రెండు పార్టీల మధ్య గొడవ ముదిరి ఇరు పార్టీల సభ్యలు వాదులాడుకున్నారు. దీంతో గూడెం మున్సిపల్ ఛైర్మన్.. ఇక బీజేపీతో కలిసి ఉండలేమని చెప్పేసినట్లు తెలుస్తోంది. టీడీపీ అన్యాయ చేస్తోందంటూ బీజేపీ... బీజేపీ అన్యాయ చేస్తోందంటూ టీడీపీ ఒకరిపై ఒకరు దుమ్మెత్తి పోసుకున్నారట. ఒకమెట్టెక్కి ఇక కలిసుండేది లేదని కూడా అనుకున్నారు. మొత్తానికి ఈరకంగా ఇరు పార్టీనేతలు తమ కోపమంతా కక్కేసుకుంటూ నిజాన్ని మాత్రం వెళ్లగక్కారు.

అది చంద్రబాబుకు మంచి వార్తనే

  ఏపీ సీఎం చంద్రబాబు నాయుడు విజయవాడలో రాష్ట్ర నూతన పర్యాటక విధానాన్ని ఆవిష్కరించారు. ఈ సందర్బంగా ఆయన మాట్లాడుతూ ఆంధ్రప్రదేశ్ ను పర్యాటక హబ్ గా తీర్చిదిద్దడమే తమ లక్ష్యమని.. దీనికి సంబంధించి వివిధ ప్యాకేజీలు, రాయితీలతో పెట్టుబడులను ఆకర్షించేలా దీనిని రూపొందించామని తెలిపారు. ఈ నూతన పర్యాటక విధానం ద్వారా 5 లక్షల ఉద్యోగాలు కల్పించవచ్చని అన్నారు. అంతేకాదు పంచంలోనే అత్యంత ధనవంతమైన, పవర్ ఫుల్ గాడ్ శ్రీవారు అని.. వెంకటేశ్వర స్వామి బిగ్గెస్ట్ క్రౌడ్ పుల్లర్ అని.. ఆయనకు రూ.10,000 కోట్ల ఫిక్స్‌డ్ డిపాజిట్లు ఉన్నాయని ఆక్కడ ఉన్నవారిని నవ్వించారు. కాగా ఆంధ్రప్రదేశ్ కు అరుదైన ఘనత లభించింది. ఏంటంటే ప్రపంచ బ్యాంకు తాజాగా ఒక ప్రకటన చేసింది. వ్యాపార అనుకూల వాతావరణ రాష్ట్రాలను జాబితాలో గుజరాత్‌కు తొలి స్థానం లభించగా ఏపీకి రెండో స్థానం దక్కింది. మొత్తానికి ఇది చంద్రబాబుకు తీపి కబురు లాంటిదే.

ఫిటింగ్ వీహెచ్.. ఫిటింగ్ పెట్టాడా?

  రాష్ట్రాన్ని విడదీసిన కాంగ్రెస్ పార్టీకి ప్రజలు ఊహించని రీతిలో సమాధానం చెప్పారు. ఏపీలో కాంగ్రెస్ పార్టీకి ఉనికి లేనట్టే మళ్లీ ఏపీలో ఆపార్టీ కోలుకోవాలంటే కొన్ని సంత్సరాలు పట్టినా ఆశ్చర్యపోనక్కర్లేదు. కాని కాంగ్రెస్ తెలంగాణలో మాత్రం ఆపరిస్థితి కనిపించడంలేదు. గత కొద్దికాలంగా సైలెంట్ గా ఉన్న టీ కాంగ్రెస్ నేతలు మాత్రం ఇప్పుడు వారికి అందివచ్చిన ఛాన్స్ లను ఏ మాత్రం వదలిపెట్టుకోకుండా ప్రతిపక్షాలపై ఎదురుదాడికి దిగుతున్నాయి. ముఖ్యంగా కాంగ్రెస్ పార్టీ రైతు ఆత్మహత్యలపై ఎక్కువగా ఫోకస్ చేస్తున్నట్టు కనిపిస్తుంది. దీనికి తోడు తెలంగాణ ప్రభుత్వం కూడా రైతుల ఆతహత్యలను పట్టించుకోకపోవడం వారికి కలిసి వచ్చింది. దీంతో కాంగ్రెస్ నాయకులు ఎవరికి తోచినట్టు వాళ్లు తమ పర్పెర్మెన్స్ ఇస్తున్నారు. ముఖ్యంగా ఇందులో కాంగ్రెస్ సీనియర్ నాయకుడు వీహెచ్ అత్యుత్సాహం చూపిస్తున్నారు. ఇప్పటికే టీఆర్ఎస్ ప్రభుత్వం రైతుల ఆత్మహత్యలను పట్టించుకోవడం లేదని.. కేసీఆర్ నియంతలా వ్యవహరిస్తున్నారు.. కనీసం రైతుల కుటుంబాలను కూడా పరామర్శించకుండా నిర్లక్ష్యంగా వ్యవహరిస్తున్నారని మండిపడ్డారు. ఇదిలా ఉండగా వీహెచ్ మరో ఫిటింగ్ కూడా పెట్టినట్టు తెలుస్తోంది. అటు టీఆర్ఎస్ సర్కార్ పై మండిపడుతూనే ఇటు కాంగ్రెస్ నేతలపై కూడా తన అసంతృప్తిని వ్యక్తపరిచినట్టు తెలుస్తోంది. ఎందుకంటే రైతు ఆత్మహత్యలపై కాంగ్రెస్ పార్టీలో ఉన్న కొంతమంది నాయకులు టీఆర్ఎస్ ప్రభుత్వం పై దాడి చేస్తూ యాక్టివ్ గా ఉంటే కొంత మంది మాత్రం అవేమి పట్టనట్టూ ఇంట్లోనే  కూర్చొని కాలక్షేపం చేస్తున్నారంట. దీంతో ఆయన కాంగ్రెసులో రైతు ఆత్మహత్యలపై ప్రభుత్వాన్ని నిలదీయకుండా - పోరాడకుండా ఉన్న నాయకుల పేర్లను రాసుకొని దానిని టీపీసీసీ చీఫ్ ఉత్తంకుమార్ రెడ్డికి అందించినట్లుగా తెలుస్తోంది. ఈవిషయాన్ని ఆయనే ప్రకటించారు. అయితే రాష్ట్రంలో జరిగే ప్రతి విషయాన్ని కేంద్రంతో చెప్పే వీహెచ్ ఇప్పుడు ఈ విషయాన్ని కూడా కేంద్రంతో చెప్పి ఉంటారని.. దీంతో వీహెచ్ మళ్లీ ఫిటింగ్ పెట్టారని నేతలు అనుకుంటున్నారు.

సీఎం అవుతాడో లేదో... జైలుకైతే ఖాయం

  ప్రతిపక్ష నేత వైఎస్ జగన్మోహన్ రెడ్డిపై ఆర్ధికమంత్రి యనమల రామకృష్ణుడు తీవ్ర స్థాయిలో విరుచుకుపడ్డారు. మరో మూడేళ్లలో తానే సీఎం అవుతానని చెప్పుకుంటున్న జగన్ కలలు నెరవేరవని, మరో ముప్పై ఏళ్లయినా ముఖ్యమంత్రి కాలేడంటూ చురలంటించారు. కోర్టు అనుమతి లేకుంటే, కనీసం అసెంబ్లీకి కూడా రాలేని జగన్...ప్రతిపక్ష నేతగా ఉండటం ఆంధ్రప్రదేశ్ ప్రజల దౌర్భాగ్యమన్నారు. ముఖ్యమంత్రి కావాలని ఉవ్విళ్లూరుతున్న జగన్...ప్రజలను పక్కనబెట్టి... జ్యోతిష్యులను నమ్ముకున్నారంటూ ఎద్దేవా చేశారు. సీఎం కావాలన్న జగన్ ప్రయత్నాలు ఎప్పటికీ ఫలించబోవన్న యనమల... మరో 20ఏళ్ల వరకూ టీడీపీనే అధికారంలో ఉంటుందని ధీమా వ్యక్తంచేశారు. జ్యోతిష్కుడు చెప్పినట్లు జగన్‌ సీఎం అవుతాడో లేదో తెలియదు గానీ...రేపోమాపో జైలుకెళ్లడం మాత్రం ఖాయమంటూ సెటైర్లు వేశారు.

వైసీపీ పోయింది.. టీడీపీలోకి

  ఇప్పటి వరకూ చాలా మంది నేతలు వైసీపీ పార్టీలోకి చేరిన సంగతి తెలసిందే. అయితే ఇప్పుడు వైసీపీ నేత ఆదిరెడ్డి అప్పారావు టీడీపీలోకి చేరనున్నట్లు.. అందుకు రంగం సిద్దమవుతున్నట్టు వార్తలు వినిపిస్తున్నాయి. వైసీపీ అధినేత జగన్మోహన్ రెడ్డి ఆదిరెడ్డిని ఎమ్మెల్సీ ఫ్లోర్ లీడర్ పదవి నుండి తప్పించి అతని స్థానంలో  ఉమ్మారెడ్డి వెంకటేశ్వర్లును నియమించారు. నిజానికి ఆదిరెడ్డి ఎమ్మెల్సీ పదవి దక్కడం ఆతర్వాత ఎమ్మెల్సీ ఫ్లోర్ లీడర్ పదవి దక్కడం ఊహించని రీతిలో జరిగాయి. అయితే ఇప్పుడు తనను కాదని ఆపదవి వేరే వాళ్లకి కట్టబెట్టడంతో ఆసంతృప్తికి గురైన ఆదిరెడ్డి టీడీపీలోకి మారనున్నట్టు తెలుస్తోంది. అయితే దీనికి వేరే కారణం లేకపోనూలేదు. ఏంటంటే గత కొద్దికాలంగా ఆదిరెడ్డి టీడీపీకి అనుకూలంగా పని చేస్తున్నారన్న ఆరోపణలు వస్తున్నాయి. ఆదిరెడ్డి అప్పారావుకి టీడీపీ నేత ఎర్రన్నాయుడు కుటుంబానికి మంచి సంబంధాలు ఉన్నాయి. అయినా ఆదిరెడ్డి మాత్రం వైసీపీలో చేరారు. అయితే ఇప్పుడు ఆదిరెడ్డి ఎర్రన్నాయుడు తమ్ముడైన అచ్చెన్నాయుడితో రాజకీయ రాయబారాలు నడుపుతున్నారని అనుమానంతో జగన్ అతనిని పదవిని తప్పించినట్టు చెబుతున్నారు. దీంతో ఆదిరెడ్డి కూడా ఎలాగూ టీడీపీ మంత్రి వర్గంలో అచ్చెన్నాయుడు కీలకంగానే ఉన్నారు.. మరోవైపు ఎర్రన్నాయుడు కొడుకు రామ్మోహన్ నాయుడు కూడా ఎంపీ గా ఉండటంతో వాళ్ల అండతో అండతో టీడీపీలో ఎదగొచ్చని ఆలోచించి తాను కూడా టీడీపీలోకి చేరడానికే సముఖత చూపినట్టు తెలుస్తోంది.

నేను పోటీచేయట్లేదు.. గద్దర్

వరంగల్ లోక్‌సభ సిట్టింగ్ ఎంపీగా ప్రజాగాయకుడు గద్దర్ పోటీచేయనున్నట్లు గతంలో వార్తలు వచ్చిన సంగతి తెలిసిందే. దీనిలో భాగంగానే వామపక్షాలు అతనిని పోటీ చేయమని అందుకు ఆయన కూడా సముఖత చూపించారని అన్నారు. అయితే ఇప్పుడు ఈ విషయంలో ఓ క్లారిటీ వచ్చింది. వరంగల్ వరంగల్ లోక్‌సభకు జరిగే ఉప ఎన్నికల్లో తాను పోటీ చేయబోనని గద్దరే స్వయంగా ప్రకటించారు. ఈ రోజు గద్దర్ దళిత సంఘాలతో భేటీ అయన నేపథ్యంలో వారితో మాట్లాడిన అనంతరం తాను ఈ ప్రకటన చేసినట్టు తెలుస్తోంది. ప్రస్తుతానికి తాను ఉద్యమపాటగానే ఉంటానని తెలిపారు. కాగా వరంగల్ లోక్‌సభ సిట్టింగ్ ఎంపీగా ఉన్న కడియం శ్రీహరిని కేసీఆర్ తన మంత్రివర్గంలోకి తీసుకోవడంతో ఈ స్థానానికి ఉప ఎన్నిక అనివార్యమైంది.

కిరణ్ పేరు చెప్పి టీసర్కార్ నాటకాలాడుతోందా?

  ఉద్యోగుల  ప్రమోషన్ పై కిరణ్ కుమార్ రెడ్డి అప్పట్లో నిషేదం విధించిన సంగతి తెలిసిందే. అయితే దీనివల్ల ఇప్పుడు ఉద్యోగులు ఇబ్బంది పడుతున్నారా అంటే అవుననే సంకేతాలే వినిపిస్తున్నాయి. రాష్ట్రం విడిపోకముందు కిరణ్ కుమార్ రెడ్డి 2013లో ఈ నిషేదం విధించారు. అయితే రాష్ట్రం విడిపోయి ప్రత్యేక రాష్ట్రం ఏర్పడి దాదాపు పదిహేను నెలలు గడిచిన తెలంగాణ ఉద్యోగులకు మాత్రం ప్రమోషన్లు కరువయ్యాయి. మరోవైపు తెలంగాణ ప్రభుత్వం కూడా కిరణ్ కుమార్ రెడ్డి పెట్టిన నిషేదింపునే కొనసాగించడం గమనార్హం. ఎందుకంటే ఏపీ ఏ పని చేసినా దానికి వ్యతిరేకంగా చేయడమే కేసీఆర్ నైజం అలాంటిది.. మరి ఉద్యోగుల ప్రమోషన్ నిషేదం మాత్రం ఎందుకు పట్టించుకోవడంలేదని పలువురు చర్చించుకుంటున్నారు. ఈ నిషేదం మూలంగానే ఇప్పటి వరకూ రిటైర్ మెంట్ అయిన ఉద్యోగులు ప్రమోషన్ లు వాటికి సంబంధించిన ప్రయోజనాలు పొందకుండానే పాపం రిటైర్ కావాల్సి వచ్చింది. ఇదిలా ఉండగా ప్రస్తుతం ఇరు రాష్ట్రాల మధ్య విద్యుత్ ఉద్యోగుల వివాదంపై ఇంకా చర్చలు జరుగుతూనే ఉన్నాయి. హైకోర్టు కూడా ఈవిషయంపై సీరియస్ అవడంతో తొందరలోనే ఈ సమస్య కూడా ఓ కొలిక్కి రావచ్చు. అయితే ఇప్పుడు ఈ ఉద్యోగులు కూడా ప్రమోషన్లపై దృష్టి సారించాలని... ప్రమోషన్ల అంశం లేకుండా ఉద్యోగుల పంపిణీ చేయోద్దని కోరుతున్నారు.   అయితే అసలు విషయం ఏంటంటే అప్పట్లో ఉమ్మడి రాష్ట్రంగా ఉన్నప్పుడు కిరణ్ కుమార్ రెడ్డి తీసుకున్న నిర్ణయం రాష్ట్రం విడిపోయిన తరువాత దానిని ఒక్క తెలంగాణ రాష్ట్రంలో మాత్రమే ఇది సమస్యగా మారింది. ఎందుకంటే ఆంధ్ర రాష్ట్రంలో మాత్రం ప్రమోషన్లు అమలు చేస్తుంది. మరి తెలంగాణ ప్రభుత్వం మాత్రం ప్రమోషన్లు ఇవ్వడానికి కిరణ్ కుమార్ రెడ్డి విధించిన నిషేదం అడ్డుగా ఉందని కుంటి సాకులు చెబుతుంది. మొత్తానికి తెలంగాణ ప్రభుత్వం ప్రమోషన్లు ఇవ్వకుండా ఆ నెపాన్ని కిరణ్ కుమార్ రెడ్డిమీదకి తోసి నాటకాలాడుతున్నట్టు స్పష్టంగా అర్ధమవుతోంది.  ఆంధ్రాకి అడ్డురాని నిషేదం.. టీ సర్కార్ కు అడ్డు వచ్చిందా అంటూ కొంతమంది మండిపడుతున్నారు.

గృహ నిర్భందంలో బైరెడ్డి..

  రాయలసీమ పరిరక్షణ సమితి అధినేత మాజీ ఎమ్మెల్యే బైరెడ్డి రాజశేఖరరెడ్డిని పోలీసులు గృహ నిర్భందం చేయడంతో అక్కడ ఉద్రిక్తత వాతావరణం నెలకొంది. వివరాల ప్రకారం కర్నూలు జిల్లా  తంగడంచ మండలంలో ఏపీ ప్రభుత్వం పరిశ్రమల కోసం చేపట్టిన భూసేకరణకు వ్యతిరేకంగా ఆయన రైతు బతుకు దెరువు యాత్ర, కలెక్టరేట్ ముట్టడికి పిలుపునిచ్చారు. ఈ సందర్బంగా ఆయన తగడంచ నుంచి కర్నూలు వరకు ఈ పాదయాత్ర ప్రారంభించేందుకు సన్నాహాలు చేశారు. ఈకారణంగా పాదయాత్రంలో పాల్గొనేందకు గాను పెద్ద ఎత్తున కార్యకర్తలు, పార్టీ నేతలు బెరెడ్డి నివాసానికి తరలివచ్చారు. ఈ నేపథ్యంలో పోలీసులు ముందస్తుగానే కొంత మంది రైతులను అరెస్ట్ చేసి బైరెడ్డిని గృహ నిర్బంధంలో ఉంచింది. దీంతో బైరెడ్డి నివాసం వద్ద ఉద్రిక్తత వాతావరణం నెలకొంది.

టీ మంత్రులు.. ఏపీ మంత్రులను చూసి నేర్చుకోండి

  రెండు తెలుగు రాష్ట్రాల్లో రైతులు పోటీ పడి మరీ ఆత్మహత్యలు చేసుకుంటున్నారా అని అన్నట్టు ఉంది ప్రస్తుత పరిస్థితులు చూస్తుంటే. ఎందుకంటే రోజురోజుకి వీరి సంఖ్య పెరుగుతుందే కాని తగ్గడంలేదు. మరోవైపు రెండు రాష్ట్ర రాజకీయ నేతలు ఒకరి మీద ఒకరు మాటల యుద్ధాలు చేసుకోవడం తప్ప ఏ కనిపించట్లేదు. అయితే ఒక రకంగా రైతు ఆత్మహత్యల పట్ల తెలంగాణ ప్రభుత్వ వైఖరి కంటే ఏపీ ప్రభుత్వ వైఖరి ఒక రకంగా మెచ్చుకోదగ్గదేనని అంటున్నారు రాజకీయ విశ్లేషకులు. ఎందుకంటే తెలంగాణ ప్రభుత్వం రైతుల ఆత్మహత్యల పట్ల పెద్దగా పట్టించుకోనట్టే కనిపిస్తుంది. ఆత్మహత్యలు చేసుకున్న రైతుల కుటుంబాలకు వెళ్లడం కాని.. వారిని పరామర్శించడం కాని చేసింది లేదు. అంతెందుకు రెండు రోజుల క్రితం చనిపోయిన లింబయ్య అనే రైతుది ఆత్మహత్యే కాదని దబాయించింది. మరోవైరు ప్రతిపక్ష పార్టీనేతలు కూడా రైతుల ఆత్మహత్యలపై అధికార ప్రభుత్వానికి ఎప్పటికప్పుడు చురకలు వేస్తున్నా.. వారి ఆత్మహత్యల గురించి పట్టించుకోవాలని చెపుతున్నా వారు మాత్రం వినీ విననట్టు ప్రవర్తిస్తున్నారు. ఇదిలా ఉండగా మరోవైపు ఏపీ ప్రభుత్వం రైతుల ఆత్మహత్యల గురించి పట్టించుకుంటన్నట్టే తెలుస్తోంది. ఎందుకంటే పొగాకు రైతు ఆత్మహత్య చేసుకున్న నేపథ్యంలో ఇద్దరు మంత్రులు అక్కడి వెళ్లి వాళ్ల కుటుంబాన్ని పరామర్సించి రైతు మృతి పట్ల సానుభూతి తెలిపారు. అంతేకాక రైతు కుటుంబానికి ప్రభుత్వం తప్పకుండా సహాయం అందిస్తుందని.. పొగాకు తక్కువ క్వాలిటీ ఉన్నా కూడా కొనుగోలు ఏర్పాట్లు ప్రభుత్వం తరఫునే చేయబోతున్నాం కాబట్టి రైతులు ఎవ్వరూ ఆత్మహత్యలు చేసుకోవద్దని చెప్పి వచ్చారు. దీనిని బట్టి కాస్తో కూస్తో రైతుల ఆత్మహత్యలపై తెలంగాణ ప్రభుత్వం కంటే ఏపీ ప్రభుత్వమే పట్టించుకుంటున్నట్టు తెలుస్తోంది. ఈవిషయంలో తెలంగాణ మంత్రులు ఏపీ మంత్రులను చూసి నేర్చుకోవాల్సిందే అని రాజకీయ విశ్లేషకులు అంటున్నారు. రాష్ట్ర కలిసున్నా.. రాష్ట్రం విడిపోయినా రైతు అనే వాడు ఎప్పుడూ ఒకేలా ఉంటాడు. అందులోనూ రెండు రాష్ట్రాలకు వ్యవసాయమే జీవనాధారం. మరి అలాంటి రైతుల గురించి.. వారి బాగోగులు పట్టించుకోవాల్సిన అవసరం ఎంతైనా ఉంది.

తలసాని మాట్లాడితే.. టీడీపీ వెళ్లిపోతుందట

  టీడీపీ పార్టీ నుండి గెలుపొంది ఆ పదవికి రాజీనామా చేయకుండానే టీఆర్ఎస్ పార్టీలో చేరి మంత్రిగా చెలామణి అవుతున్న తలసాని యాదవ్ పై ఇప్పటికే టీ టీడీపీ నేతలు చేయాల్సిన ప్రయత్నాలు అన్నీచేశారు. ఆయనను బర్తరఫ్ చేయించాలని.. రాజీనామాచేసి మళ్లీ పోటీ చేసి గెలవాలని ఇలా ఎన్నో ప్రయత్నాలు చేశారు.. గవర్నర్ కు కూడా ఫిర్యాదు చేశారు. అయితే ఇప్పుడు టీడీపీ నేతలు మరోసారి తలసానిపై స్కెచ్ వేసినట్టు తెలుస్తోంది. ఈనెలలో ప్రారంభంకానున్న అసెంబ్లీ సమావేశాలలో ఏయే పాయింట్ల మీద మట్లాడాలో టీ టీడీపీ నేతలు కలిసి రైతుల ఆత్మహత్యల దగ్గర నుండి మొత్తం 20 పాయింట్లతో కలిసి ఒక జాబితాను రాసుకున్నారట. అందులో తలసాని అంశం కూడా చేర్చారట. ఈసభలో మాత్రం తలసానిని బర్తరఫ్ చేయాలని గట్టిగా డిమాండ్ చేయాలని.. ఒకవేళ తలసాని కనుక తన శాఖకు సంబంధించిన అంశాల గురించి మాట్లాడినట్టయితే సభ నుండి బయటకు వెళ్లిపోవాలని నిర్ణయించుకున్నారంట. అయితే టీ టీడీపీ నేతల ప్లాన్ బాగానే ఉన్నా అధికార ప్రభుత్వం మాత్రం వీరి డిమాండ్ కు ఒప్పుకుంటుందా? టీడీపీ నేతలు సభ నుండి బయటకు వెళ్లినంత మాత్రానా స్పీకర్ తలసానికి మాట్లాడే ఛాన్స్ ఇవ్వకుండా ఉంటారా అని పలువురు అనుమానం వ్యక్తం చేస్తున్నారు. మరి తలసాని పై టీడీపీ వేసిన ప్లాన్ వర్కవుట్ అవుతుందో లేదో చూడాలి.

రఘువీరా పై రాళ్లు ఇసుకతో దాడి

  రైతులకు మద్దతు పలికేందుకు కృష్ణాజిల్లా వెళ్లిన ఏపీ పీసీసీ అధ్యక్షుడు రఘువీరారెడ్డికి చేదు అనుభవం ఎదురైంది. ఏపీ ప్రభుత్వం చేపట్టిన భూసేకరణ నేపథ్యంలోగానూ మచిలీపట్న పోర్టుకు కూడా భూసేకరణ ప్రకటించింది. అయితే దీనికి వ్యతిరేకంగా బందరు మండలం, కోన గ్రామ సెంటర్‌ లో రైతులు నిరసనకు దిగారు. ఈ సందర్భంగా రైతులకు మద్దతు పలికేందుకు వెళ్లిన ఆయన అక్కడ మాట్లాడుతుండగా కొంతమంది ఆయనపై దాడి చేశారు. ఇసుక, కంకర రాళ్లు విసురుతూ రఘువీరాపై గొడవకు దిగారు. ఒకపక్క పోలీసులు వారిని అదుపు చేసే పయత్నం చేసినా వారిమీద కూడా కొందరు యువకులు తిరగబడ్డారు. దీంతో చేసేది లేక రఘువీరా.. ఆయనతో పాటు వెళ్లిన కాంగ్రెస్ నేతలు వెను తిరిగి రావాల్సి వచ్చింది. అయితే ఉరిము ఉరిమి మంగల మీద పడినట్టు... ఈ సంఘటనకు కారణం టీడీపీయే అని రఘువీరా రెడ్డి అంటున్నారు.  సభ సజావుగా జరగకూడదనే ఉద్దేశ్యంతోనే గ్రామానికి చెందిన  యువకులను ఉసి కొల్పి మాపై దాడిచేయించారని ఆరోపించారు. ఏడాదికి రెండు పంటలు పండే భూములను రైతల దగ్గర నుండి ఎలా తీసుకుంటారని అన్నారు. ఒకవేళ రైతుల దగ్గర నుండి భూములు తీసుకున్న వారికి మార్కెట్ ధర కంటే నాలుగు రెట్లు ఎక్కువ చెల్లించాల్సి వస్తుంది.. ప్రస్తుతం ఉన్న పరిస్థితుల్లో ప్రభుత్వానికి అంత సీన్ లేదు కాబట్టి భూసేకరణ జరిగే ప్రసక్తి లేదు.. రైతులంతా ధైర్యంగా ఉండాలని అన్నారు

మళ్లీ ప్రధాని.. చంద్రబాబు అభినందనలు

  ఒకటి కాదు రెండు కాదు దాదాపు కొన్ని సంత్సరాల నుండి ఎన్నికల్లో పోటీ చేస్తూ అప్పటి నుండి గెలుస్తూనే ఉంది సింగపూర్ లోని పీపుల్స్ యాక్షన్ పార్టీ. 1965లో ఏర్పాటైన ఈపార్టీ అప్పటినుండి ఇప్పటివరకూ గెలవడం ఆశ్చర్యకరమైన విషయమే. ఒక్కసారి గెలవడమే కష్టం అనుకుంటున్న రోజుల్లో ఈ సారి కూడా ఈ పార్టీ విజయఢంకా మోగించింది. మొత్తం 89 సీట్లకు గాను 83 సీట్లు గెలిచి ఈసారి కూడా లిసీన్ లూంగ్ మళ్లీ ప్రధానిగా ఎంపికయ్యారు. అయితే ఈసారి కూడా లూంగ్ ప్రధాని కావడంతో ఏపీలో టీడీపీ నేతలు పండగ చేసుకుంటున్నారు. ఆయన ప్రధాని అయితే ఇక్కడ వీళ్లు చేసుకోవడం ఏంటనుకుంటున్నారా.. ఎందుకంటే ఏపీ అభివృద్ది దిశగా సింగపూర్ పర్యటించిన చంద్రబాబు అక్కడ పారిశ్రామిక వేత్తలతో మాట్లడటానికి.. పెట్టుబడులు పెట్టడానికి లూంగ్ ఎంతగానో సహకరించారు. ఈ నేపథ్యంలో లూంగ్ మళ్ళీ ప్రధానిగా నియమించబడటం అక్కడ సంగతేమో కాని ఇక్కడ ఏపీకి మాత్రం ఒక రకంగా తీపి కబురు లాంటిదే. అందుకే లూంగ్ ప్రధానిగా ఎన్నికైన నేపథ్యంలో చంద్రబాబు కూడా తనను అభినందిస్తూ ట్విట్టర్ లో పోస్ట్ చేశారు. లూంగ్ నాయకత్వంపై నమ్మకం ఉంది కాబట్టే సింగపూర్ ప్రజలు మళ్లీ అతనిని ప్రధానిని చేశారని కొనియాడారని ట్విట్టర్ లో పేర్కొన్నారు..

గ్యాస్ సిలిండర్ పేలి, 82మంది మృతి

మధ్యప్రదేశ్ లోని జబువాలో జరిగిన గ్యాస్ సిలిండర్ ప్రమాదంలో మృతుల సంఖ్య ఊహించినదానికంటే...చాలా ఎక్కువగా ఉన్నట్లు తెలుస్తోంది. మొదట్లో ఇద్దరే చనిపోయారని అనుకున్నా, శిథిలాల కింద చిక్కుకుని పదుల సంఖ్యలో ప్రాణాలు కోల్పోయారని వార్తలు అందుతున్నాయి. ఇఫ్పటివరకూ అందిన సమాచారం మేరకు 82మంది మృతిచెందారని, ఆ సంఖ్య మరింత పెరిగే అవకాశముందని చెబుతున్నారు. అయితే గ్యాస్ సిలిండర్ పేలి మరణించిన వారి కంటే, ఆ భవనం కింద చిక్కుకుని చనిపోయినవారే ఎక్కువగా ఉన్నారని అధికారులు తెలిపారు. గ్యాస్ సిలిండర్ పేలుడు ధాటికి రెండంతస్తుల బిల్డింగ్ కూలిపోయిందని, ఆ సమయంలో దాన్లో ఉన్నవారంతా దాదాపు మృత్యువాత పడ్డారని జాతీయ ఛానళ్లు చెబుతున్నాయి.

ఉండవల్లి అందుకే జగన్ డ్రమ్స్ వాయిస్తున్నాడా?

ఉండవల్లి కామెంట్స్ ను చూస్తుంటే... జగన్ డైలాగ్స్ నే కొద్దిగా అటూఇటుగా మార్చి చెబుతున్నట్లు అనిపిస్తుంది. పట్టిసీమ ప్రాజెక్టు అయినా, రాజధాని అంశమైనా...సేమ్ టు సేమ్ ఇద్దరి వెర్షనూ ఒకేలాగా ఉంటుంది. జగన్ చెబుతున్నదే కరెక్ట్ అన్నట్లుగా, ఉండవల్లి వ్యాఖ్యలు ఉంటున్నాయని టీడీపీ నేతలు అనుమానిస్తున్నారు. చంద్రబాబుకు తాను వ్యతిరేకం కాదంటూనే, ప్రభుత్వంపైనా, పార్టీపైనా ఉండవల్లి విమర్శలు చేస్తుండటంతో అప్రమత్తమైన తెలుగుదేశం నేతలు...ఎదురుదాడి మొదలుపెట్టారు. వైసీపీలో చేరే ఉద్దేశంతోనే ఉండవల్లి...జగన్ డ్రమ్స్ వాయిస్తున్నాడని, పైగా రాయలసీమ అభివృద్ధి చెందడం ఇద్దరికీ ఇష్టంలేదని, అందుకే పట్టిసీమపై అవినీతి ఆరోపణలు చేస్తున్నారని గాలి ముద్దుకష్ణమనాయుడు ఆరోపించారు. అయితే గాలి ఆరోపించినట్లుగా ఉండవల్లి వైసీపీలో చేరతారో లేదో తెలియదు గానీ, ఉమ్మడి శత్రువైన టీడీపీని దెబ్బకొట్టేందుకు పరోక్షంగా సహకరించుకుంటున్నారని చెప్పుకుంటున్నారు.

రోజులు దగ్గర పడ్డాయి.. వీహెచ్

  కాంగ్రెస్ సీనియర్ నేత వీ హనుమంతురావు మరోసారి తెలంగాణ సీఎం కేసీఆర్ పై విమర్శల బాణాలు వదిలారు.  పార్టీ కార్యకర్తలతో కలిసి మూకుమ్మడిగా ఖమ్మం జిల్లా కలెక్టరేట్ ను ముట్టడించడానికి పూనుకున్న ఆయన ఈ సందర్భంగా ఆయన మాట్లాడుతూ రాష్ట్రంలో రైతుల ఆత్మహత్యలు ఎక్కువవుతున్నాయి.. రోజుకో రైతు ఆత్మహత్య చేసుకుంటున్నాడు అయినా అధికార ప్రభుత్వం మాత్రం ఏం పట్టనట్టు వ్యవహరిస్తుందని విమర్శించారు. కేసీఆర్ రైతులపై వ్యవహరిస్తున్న తీరు ఏమాత్రం బాలేదని.. రైతుల గోడు పట్టించుకోకుండా ఓ నియంతలా వ్యవహరిస్తున్నారని మండిపడ్డారు. రైతుల ఆత్మహత్యలను లెక్కచేయకుండా.. కనీసం వారి కుటుంబాలను కూడా పరామర్శించకుండా కేసీఆర్ ప్రభుత్వం చేస్తున్న తీరుకు ప్రజలు బుద్ధి చెప్పే రోజులు దగ్గర్లోనే ఉన్నాయని.. ఆయన నియంతృత్వ పాలనకు చరమగీతం పాడతారని ఎద్దేవ చేశారు.

దొంగబ్బాయ్ అంటూ లోకేష్ పంచ్ డైలాగ్ లు

వైసీపీ అధినేత జగన్మోహన్ రెడ్డిపై చంద్రబాబు తనయుడు నారా లోకేష్...పంచ్ డైలాగులతో విరుచుకుపడ్డారు. దొంగబ్బాయ్ అంటూ జగన్ ను, మా అక్క అంటూ షర్మిలపై సెటైర్లేశారు. తాతలు, తండ్రుల పేర్లు చెప్పుకుని బతకడం కాదన్న లోకేష్, వాళ్ల స్ఫూర్తితో ప్రజాసేవ చేయాలంటూ, వారసత్వ రాజకీయాలపై కామెంట్ చేశారు. తండ్రి పేరు చెప్పుకుని, సానుభూతి పొందాలని చూస్తున్న దొంగబ్బాయ్ జగన్ ఆటలు ఇంకా ఎంతోకాలం సాగవన్న చినబాబు... మాయమాటలు, అబద్దాలతో టీడీపీ ప్రభుత్వంపై బురద చల్లాలని చూస్తే ఊరుకునేది లేదని హెచ్చరించారు. ఇప్పటికీ తండ్రి పేరు చెప్పుకుని బతుకుతూ, రాజకీయాలు చేస్తున్న జగన్...తన కార్యకర్తలకు ఏం చేశారో చెప్పాలని ప్రశ్నించారు. తామైతే ఎన్టీఆర్ స్ఫూర్తితో కార్యకర్తల సంక్షేమం కోసం చిత్తశుద్ధితో పనిచేస్తున్నామని, జగన్ లాగా అధికారాన్ని అడ్డంపెట్టుకుని వేలకోట్ల దొంగ డబ్బు సంపాదించడం లేదంటూ విపక్ష నేతను చెడుగుడు ఆడుకున్నారు.

అయ్యో గవర్నర్.. ఇదీ లాగేసుకున్నారు

  రెండు రాష్ట్రాల గవర్నర్ గా ఉన్న నరసింహన్ మొదటి నుండి ఏదో గవర్నర్ గా ఉన్నారు అంటే ఉన్నారు అనే ధోరణిలోనే కొనసాగారు. రాష్ట్రం ఒక్కటిగా ఉన్నప్పుడు పెద్దగా గవర్నర్ గారికి అంత ఇబ్బందికర సమస్యలు ఏం రాలేదు కాని ఎప్పుడైతే రాష్ట్రం విడిపోయిందో అప్పటినుండి ఆయనకు చిక్కులు పోయి మొదలయ్యాయని మాత్రం అందరికి స్పష్టంగా తెలిసిన విషయమే. చిటికీ మాటికీ రెండు రాష్ట్రాలు గిల్జికజ్జాలు పెట్టుకోవడం దాని పరిష్కారానికి గవర్నర్ దగ్గరకి వెళ్లడం ఆయన ఎటూ తేల్చుకోలేక పోవడం దీనివల్ల రెండు రాష్ట్రాలు ఆయనపై విమర్శలు చేయడం ఇదే తంతూ. అయితే నోటు ఓటు కేసు తరువాత గవర్నర్ గారి పరిస్థితి మరీ అయోమయ స్థితిలో పడింది. రెండు రాష్ట్ర ప్రభుత్వాలు.. రెండు రాష్ట్ర సీఎంల మధ్య పోరు కాబట్టి ఏం నిర్ణయం తీసకుంటే ఏం సమస్య వచ్చిపడుతుందో అని తను సొంతంగా తీసుకోవాల్సిన నిర్ణయాలకు కూడా కేంద్రాన్ని ఆశ్రయించే పరిస్థితి వచ్చింది. పాపం ఈవిషయంలో కేంద్రం కూడా గవర్నర్ గారి పనితీరుపై కాస్తంత అసంతృప్తి వెల్లబుచ్చింది కూడా. అన్ని సమస్యలకు కేంద్రం దగ్గరకి వస్తే కాదు మీరే ఇరు ప్రభుత్వాలతో మాట్లాడి సమస్యను పరిష్కరించాలని కూడా సూచించారు. ఇవన్నీ తట్టుకోలేక ఒకానొక దశలో గవర్నర్ నరసింహన్ రాజీనామా చేద్దామనుకున్నారు. కానీ అప్పుడు కేంద్రం బుజ్జగించింది. కానీ ఎప్పుడైతే తను ఆగష్టు 15న ఇచ్చిన విందుకు ఇరు సీఎంలు డుమ్మాకొట్టారో దానికి గవర్నర్ బాగా మనస్తాపం చెంది తానే స్వచ్చందగా పదవి నుండి తొలిగిపోవాలనుకున్నట్టు వార్తలు కూడా వచ్చాయి. అయితే ఈసారి మాత్రం కేంద్రం బుజ్జగించకుండా తను తీసుకున్న నిర్ణయానికి అంగీకరించి ఆయన స్థానంలో ప్రస్తుతం కేరళ గవర్నర్ గా వ్యవహరిస్తున్నసుప్రీంకోర్టు మాజీ ప్రధాన న్యాయమూర్తి జస్టిస్ సదాశివంను నియమించాలని కేంద్రం బలంగా భావిస్తున్నట్టు వార్తలు వినిపిస్తున్నాయి. ఇప్పుడు తెలంగాణ ప్రభుత్వం మరోసారి గవర్నర్ ను చులకన చేసినట్టు కనిపిస్తుంది. ఇప్పటికే తనకు గుర్తింపు లేదని భావించి రాజీనామాకు సిద్దపడిన గవర్నర్ కు తెలంగాణ సర్కార్ మరో విషయంలో కూడా గవర్నర్ కు గుర్తింపు లేకుండా చేస్తుంది. అందేంటంటే సాధారణంగా యూనివర్శిటీలకు గవర్నరే చాన్స్ లర్ గా ఉంటారు. అయితే కేసీఆర్ మాత్రం యూనివర్శిటీలకు చాన్స్ లర్లను నియమించే బాధ్యత రాష్ట్ర అధికార ప్రభుత్వానికే ఉంటుందని.. ఇక నుండి వారిని ప్రభుత్వమే నియమిస్తుందంటూ తేల్చిచెప్పింది. దీనికి సంబంధించిన ఉత్తర్వులను కూడా ఉన్నత విద్యాశాఖ ముఖ్య కార్యదర్శి రంజీవ్ ఆచార్య జారీ చేశారు. అయితే గవర్నర్ కు కాకుండా ఈ బాధ్యతలు వేరేవారికి ఇస్తే కేంద్ర మానవ వనరుల శాఖ ఆధ్వర్యంలోని విశ్వ విద్యాలయాల నిధుల సంఘం (యూజీసీ) ద్వారా విశ్వ విద్యాలయాలకు నిధులు రావడం కష్టసాధ్యమని అధికారులు చెప్పినప్పటికీ సీఎం కేసీఆర్ మాత్రం ఏమాత్రం వెనక్కి తగ్గడం లేదు. అవసరమైతే ఈ విషయంపై కేంద్రంతో కూడా మాట్లాడతానని చాలా పట్టుదలతో ఉన్నారు. అంతేకాదు  చాన్స్ లర్ గా గవర్నరే ఉండాలని ఎక్కడా నిబందనలు ఉన్నాయా అని తిరిగి ఎదురు ప్రశ్నిస్తున్నారు. మొత్తానికి కేసీఆర్ గవర్నర్ కు ఈ అధికారం కూడా లేకుండా లాగేసుకున్నారు.

హైదరాబాద్ లో స్వైన్ ప్లూ స్వైరవిహారం

హైదరాబాద్ లో స్వైన్ ఫ్లూ మళ్లీ స్వైరవిహారం చేస్తోంది. ఈ వైరస్ బారినపడి 2015లో ఇప్పటివరకూ 63మంది మ..త్యువాత పడగా, తాజాగా మరో పది మంది చనిపోయినట్లు తెలుస్తోంది. కొద్దిరోజులుగా నగరంలో కురుస్తోన్న వర్షాలకు,వాతావరణం అనుకూలంగా మారి, వైరస్ మళ్లీ పంజా విసురుతోందని అంటున్నారు. గత పది రోజుల్లో  31 కేసులు నమోదు కాగా, ఇద్దరు మ..త్యువాడ పడ్డారని వైద్యులు చెబుతున్నారు. గ్రేటర్ హైదరాబాద్ లో ప్రతిరోజూ రెండు కేసులు నమోదవుతుండగా, చాలామంది స్వైన్ ఫ్లూ లక్షణాలతో ప్రైవేట్ ఆస్పత్రుల్లో చికిత్స పొంది డిశ్చార్జ్ అవుతున్నట్లు అంచనా వేస్తున్నారు. అయితే వైరస్ వ్యాప్తికి వాతావరణం అనుకూలంగా మారిందని, రానున్నది చలికాలం కావడంతో స్వైన్ ఫ్లూ మరింత విజం..భించే అవకాశముందని వైద్యులు అంటున్నారు. మధుమేహం, రక్తహీనత, గుండెజబ్బులు, టీబీ, హెచ్‌ఐవీ, న్యుమోనియో, ఆస్తమా వంటి జబ్బులున్న వారే ఎక్కువగా దీని బారిన పడుతున్నందున, తగిన జాగ్రత్తలు తీసుకోవాలని సూచిస్తున్నారు.