హస్తం పార్టీలో కొత్త టెన్షన్ మొదలైంది. తిరువనంతపురం నుంచి బెంగళూరుకు సాగుతున్న ఈ ప్రయాణం.. న్యూఢిల్లీలోని కాంగ్రెస్ పార్టీ అధిష్టానానికి ఒక పెద్ద పొలిటికల్ తలనొప్పిగా మారింది. కేరళ కాంగ్రెస్‌లో దాదాపు 10 రోజుల పాటు సాగిన నాయకత్వ సంక్షోభాన్ని ఒక కొలిక్కి తెచ్చిన ఆ పార్టీ హైకమాండ్‌కు, ఇప్పుడు కర్ణాటకలో సరికొత్త డ్రామా మొదలైంది.

కర్ణాటక  ప్రస్తుత ముఖ్యమంత్రి సిద్ధరామయ్య, ఉప ముఖ్యమంత్రి డీకే శివకుమార్ మధ్య అధిపత్య పోరు పరాకాష్టకు చేరింది. గతంలో జరిగిన 2023 అసెంబ్లీ ఎన్నికల విజయానంతరం అధిష్టానం జోక్యంతో ఇద్దరు నేతల మధ్య ఒక ఒప్పందం కుదిరిందనే ప్రచారం విస్తృతంగా సాగింది. 

ఐదేళ్ల అధికార కాలంలో సిద్ధరామయ్య మొదటి రెండున్నర సంవత్సరాలు (2.5 ఇయర్స్) ముఖ్యమంత్రిగా ఉంటారని, ఆ తర్వాత మిగిలిన రెండున్నర సంవత్సరాలు డీకే శివకుమార్‌కు పగ్గాలు అప్పగిస్తారనేది ఆ ఒప్పందం సారాంశం. ప్రభుత్వం ఏర్పాటైన మూడేళ్ల గడువు సమీపిస్తున్న తరుణంలో, సీఎం కుర్చీ మార్పుపై డీకే శివకుమార్ వర్గం ఒత్తిడిని తీవ్రం చేసింది.

బెంగళూరు రాజకీయ నడిబొడ్డున ఈ అధికార పోరాటం ఇప్పుడు ఢిల్లీ వీధులకు చేరింది. 10 మందికి పైగా ఎమ్మెల్యేల బృందంతో డీకే శివకుమార్ మద్దతుదారులు హైకమాండ్‌కు తమ డిమాండ్లను గట్టిగా వినిపించేందుకు సిద్ధమయ్యారు. ఆర్య ఈడిగ సెంట్రల్ కమిటీ చీఫ్ ప్రణవానంద స్వామీజీ వంటి ప్రముఖ సామాజిక వర్గాల నేతలు సైతం డీకే శివకుమార్‌కు బహిరంగంగా మద్దతు పలికారు. 

డీకే శివకుమార్‌కు తక్షణమే ముఖ్యమంత్రి పదవి ఇవ్వాలని, ఇందులో ఆలస్యం చేయడం ఒక్క శివకుమార్‌నే కాకుండా వొక్కలిగ సామాజిక వర్గాన్ని అవమానించడమేనంటూ ఆయన సంచలన వ్యాఖ్యలు చేశారు. మైసూర్, బెంగళూరు ప్రాంతాల్లో "నెక్స్ట్ సీఎం డీకే" అంటూ ఆయన పుట్టినరోజు సందర్భంగా వెలిసిన భారీ పోస్టర్లు, కేక్‌లు ఈ రాజకీయ వేడిని మరింత పెంచాయి.మరోవైపు ముఖ్యమంత్రి సిద్ధరామయ్య మాత్రం తన స్థానాన్ని వదులుకోవడానికి ఏమాత్రం సిద్ధంగా లేరని స్పష్టం చేస్తున్నారు. 

ప్రజలు తమకు సంపూర్ణ మెజారిటీ ఇచ్చారని, తన అధికారం మరింత బలపడిందని ఆయన ధీమా వ్యక్తం చేస్తున్నారు. కాంగ్రెస్ పార్టీకి అసెంబ్లీలో ఉన్న 137 మంది ఎమ్మెల్యేలతో పాటు 3 గురు స్వతంత్ర అభ్యర్థుల మద్దతు కూడా తమకే ఉందని, ప్రభుత్వం 5 సంవత్సరాల పూర్తి కాలం సుస్థిరంగా కొనసాగుతుందని సిద్ధరామయ్య వర్గం వాదిస్తోంది. పార్టీలో ఒకే వ్యక్తికి ఒకే పదవి (వన్ మ్యాన్, వన్ పోస్ట్) అనే నిబంధన ఉన్నప్పటికీ, 2023లో డీకే శివకుమార్‌కు డిప్యూటీ సీఎం పదవితో పాటు కేపీసీసీ (KPCC) అధ్యక్ష పదవిని కూడా ఉంచడంపై సిద్ధరామయ్య క్యాంప్ అభ్యంతరం వ్యక్తం చేస్తోంది.

ఈ పెను సంక్షోభాన్ని చల్లార్చేందుకు కాంగ్రెస్ అధిష్టానం తీవ్రంగా శ్రమిస్తోంది. పార్టీ జాతీయ అధ్యక్షుడు మల్లికార్జున ఖర్గే, రాష్ట్ర వ్యవహారాల ఇన్‌ఛార్జ్ రణదీప్ సుర్జేవాలా ఇరు వర్గాలతో చర్చలు జరుపుతున్నారు. ప్రస్తుతానికి కర్ణాటకలో ముఖ్యమంత్రి మార్పు లేదని ఖర్గే ప్రకటిస్తున్నప్పటికీ, లోకల్ బాడీ ఎన్నికల ముంగిట ఈ అంతర్గత విభేదాలు పార్టీని దెబ్బతీస్తాయని హైకమాండ్ ఆందోళన చెందుతోంది. రాహుల్ గాంధీ రాష్ట్రంలో రాజకీయ స్థిరత్వం కోసం సిద్ధరామయ్య వైపు మొగ్గు చూపుతుండగా, సోనియా గాంధీ మాత్రం డీకే శివకుమార్ సేవలను గుర్తించి తగిన ప్రాధాన్యత ఇవ్వాలని భావిస్తున్నట్లు సమాచారం. ఈ ఇద్దరు దిగ్గజ నేతల మధ్య నడుస్తున్న కుర్చీలాట కర్ణాటక కాంగ్రెస్ ప్రభుత్వాన్ని ఏ తీరానికి చేరుస్తుందో చూడాలి.