TeluguOne Health
● # Tweets

Download the TeluguOne App

Choose your platform to continue

political-news-img

జగన్ పాదయాత్ర 2.o: ఆరు నెలల ముందుకు.. కారణాలేంటంటే.?

ఆంధ్రప్రదేశ్ రాజకీయాల్లో వైసీపీ అధినేత వైఎస్ జగన్ మోహన్ రెడ్డి చేపట్టబోయే పాదయాత్రకు సంబంధించి ఆసక్తికరమైన ఊహాగానాలు జోరందుకున్నాయి. ఇంతకాలం 2027 అక్టోబర్ లేదా నవంబర్లో జగన్ తన పాదయాత్ర ప్రారంభిస్తారని వైసీపీ వర్గాలు చెబుతూ వచ్చాయి. అయితే ఇప్పుడు తాజాగా ఆయన తన పాదయాత్ర ఆరు నెలలు ముందుకు జరిపే యోచనలో ఉన్నట్లు విస్తృతంగా ప్రచారం జరుగుతోంది. జగన్ తన పాదయాత్రను వచ్చే ఏడాది మార్చి నుంచే ఆరంభించే అవకాశాలు మెండుగా ఉన్నాయని వైసీపీ వర్గాల ద్వారా తెలుస్తోంది. అన్ని అనుకున్నట్లు జరిగితే 2027 మార్చి నుంచే జగన్ తన పాదయాత్రకు శ్రీకారం చుట్టే అవకాశం ఉందని అంటున్నారు. అయితే ఇందుకు సంబంధించి వైసీపీ నుంచి కానీ, స్వయంగా జగన్ నుంచి కానీ ఇప్పటి వరకూ ఎటువంటి అధికారిక ప్రకటనా వెలువడలేదు. గతంలో జగన్ చేపట్టిన ప్రజా సంకల్ప యాత్ర ఆయన రాజకీయ ప్రస్థానంలో కీలక మలుపుగా నిలిచిన సంగతి విదితమే. 2017లో ప్రారంభమై దాదాపు 3,648 కిలోమీటర్లకు పైగా సాగిన ఆ యాత్ర ద్వారా ప్రజల సమస్యలను నేరుగా తెలుసుకోవడం, స్థానిక నాయకులు, కార్యకర్తలతో మమేకం కావడం అప్పట్లో జగన్ కు, వైసీపీకి గణనీయమైన రాజకీయ బలాన్ని చేకూర్చింది. ఆ తర్వాత 2019 ఎన్నికల్లో వైసీపీ ఘన విజయం సాధించింది. ఇప్పుడు 2029 ఎన్నికలలో విజయం సాధించి మరో సారి అధికారాన్ని దక్కించుకోవాలంటే పాదయాత్ర వినా మరో మార్గం లేదన్న అభిప్రాయం జగన్ లోనూ, పార్టీ వర్గాల్లోనూ బలంగా ఉంది. అందుకు అనుగుణంగానే జగన్ తాను 2027లో మరో సారి రాష్ట్రవ్యాప్తంగా పాదయాత్ర చేపట్టనున్నట్లు ప్రకటించిన సంగతి తెలిసిందే. ముందస్తుగా ఆయన తన పాదయాత్రను 2027 అక్టోబర్ లేదా నవంబర్ లొ మొదలు పెట్టాలని భావించినట్లు ప్రచారం జరిగింది. అయితే ఇప్పుడు అంత వరకూ కాకుండా ఓ ఆరు నెలలు ముందుగానే అంటే వచ్చే ఏడాది మార్చి నుంచే పాదయాత్రకు శ్రీకారం చుట్టాలని జగన్ భావిస్తున్నట్లు పార్టీ వర్గాల ద్వారా తెలుస్తోంది. అయితే.. పాదయాత్రను ముందుకు జరపాలనే ఆలోచన వెనుక ఉన్న కారణాలపై పరిశీలకులు పలు రకాలుగా విశ్లేషణలు చేస్తున్నారు. ఈ సారి కేవలం పాదయాత్ర ద్వారా పార్టీ పుంజుకునే అవకాశం లేదనీ, పార్టీ అంతర్గత ప్రక్షాళన కూడా అవసరమన్న ఉద్దేశంతోనే పుణ్యం పురుషార్థం కలిసివచ్చేలా పాదయాత్రను ఓ ఆరు నెలల ముందుకు జరిపి.. పార్టీ ప్రక్షాళన కూడా చేపట్టాలని జగన్ భావిస్తున్నట్లు చెబుతున్నారు. అలాగే వచ్చే ఎన్నికలలో ప్రతి నియోజకవర్గంలో సమర్థవంతమైన నాయకత్వం, చురుకైన క్యాడర్, ప్రజలతో నిరంతర సంబంధాలు ఏర్పరుచుకునేలా ఈ సారి జగన్ తన పాదయాత్ర సాగించాలని భావిస్తున్నట్లు చెబుతున్నారు. కొన్ని నియోజకవర్గాల్లో పార్టీ పనితీరు ఆశించిన స్థాయిలో లేదనే అభిప్రాయాలు ఉన్న నేపథ్యంలో, పనితీరు సరిగా లేని నియోజకవర్గాలలో ప్రస్తుత ఇన్ చార్జీల స్థానంలో కొత్త వారికి అవకాశం ఇవ్వడం, అలాగే తన పాదయాత్రలో భాగంగా నియోజవర్గాలలో పార్టీ పరిస్థితిని పరిశీలించి అవసరమైన చర్యలు తీసుకోవడం అన్నీ కూడా పాదయాత్రలో భాగంగానే చేపట్టాలని జగన్ భావిస్తున్నట్లు చెబుతున్నారు. ప్రజల్లో పలుకుబడి లేని నేతలు, కార్యకర్తలను పట్టించుకోని నేతలకు ప్రాధాన్యత తగ్గించి, కొత్తవారు, సమర్ధులకు బాధ్యతలు అప్పగించే అవకాశాలున్నాయంటున్నారు. తన పాదయాత్రలోనే ప్రతి నియోజకవర్గ వాస్తవ పరిస్థితిని జగన్ స్వయంగా అంచనా వేయాలని నిర్ణయించుకున్న జగన్, తన పాదయాత్రను మార్చి నుంచే మొదలు పెట్టడం ద్వారా అందుకు అవసరమైన సమయం లభిస్తుందని భావిస్తున్నట్లు చెబుతున్నారు. మరోవైపు దేశవ్యాప్తంగా చర్చనీయాంశంగా మారిన జమిలి ఎన్నికల అంశం కూడా జగన్ తన పాదయాత్రను ముందుకు జరపాలన్న నిర్ణయానికి రావడానికి ఒక కారణంగా పరిశీలకులు విశ్లేషిస్తున్నారు. సాధారణ షెడ్యూల్ ప్రకారం 2029లో లోక్‌సభతో పాటు ఆంధ్రప్రదేశ్ అసెంబ్లీ ఎన్నికలు జరగాల్సి ఉన్నప్పటికీ, ఒకేసారి ఎన్నికల నిర్వహణపై జరుగుతున్న చర్చల నేపథ్యంలో 2028 చివరి నాటికే ఎన్నికలు రావచ్చన్న ఊహాగానాల నేపథ్యంలో జగన్ తన పాదయాత్రను 2027 మార్చి నుంచే ప్రారంభించాని నిర్ణయించుకున్నట్లు చెబుతున్నారు. వినిపిస్తున్నాయి. ఈ అంశంపై ఇంకా అధికారిక నిర్ణయం లేకపోయినా, ఒకవేళ ఎన్నికలు ముందుకు వస్తే సమయం తక్కువగా ఉంటుందనే లెక్కతో 2027 మార్చి నుంచే యాత్ర ప్రారంభిస్తే రాష్ట్రవ్యాప్తంగా పర్యటించడానికి, పార్టీని సిద్ధం చేయడానికి తగినంత వ్యవధి లభిస్తుందని రాజకీయ విశ్లేషకులు అంచనా వేస్తున్నారు. ఇది కూడా చదవండి: జగన్ పాదయాత్ర ముహూర్తం ఖరారు.. ఎప్పటి నుంచంటే?​ గతంలో పాదయాత్ర చేసినప్పటి పరిస్థితులతో పోలిస్తే ప్రస్తుత రాజకీయ వాతావరణం భిన్నంగా ఉందనే అభిప్రాయం కూడా ఉంది. అప్పుడు ప్రతిపక్షంలో ఉంటూ ప్రభుత్వ వ్యతిరేకతను మలుచుకునే అవకాశం లభించగా, అయితే 2019 ఎన్నికలలో విజయం తరువాత ఐదేళ్లు అధికారంలో ఉండి ప్రజా వ్యతిరేకతను మూటగట్టుకున్న నేపథ్యంలో 2014 ఎన్నికలలో పార్టీ ఘోర పరాజయం పాలైంది. ఇప్పుడు ఆ ప్రాజా వ్యతిరేకతను పోగొట్టుకోవడమే కాకుండా, పార్టీని క్షేత్రస్థాయిలో బలోపేతం చేయాల్సిన అవసరం కూడా ఉండటంతో వచ్చే ఎన్నికలకు వైసీపీని ఎదుర్కోవసలిన సవాళ్లు భిన్నంగా ఉన్నాయి. ప్రజల విశ్వాసాన్ని తిరిగి పొందడం, క్షేత్రస్థాయిలో క్యాడర్‌లో కొత్త ఉత్సాహం నింపడం, యాత్రలో భాగస్వాములయ్యే నేతలు, ఇంచార్జీల సమన్వయం వంటి అంశాలు కూడా కీలకంగా మారాయి. రాజకీయ కోణంలో చూస్తే, నియోజకవర్గాల వారీగా మార్పులు చేయడం, కార్యకర్తలను సమాయత్తం చేయడం, ప్రజలతో నేరుగా మమేకం కావడం వంటి బహుళ లక్ష్యాలను సాధించేందుకు ఈ వ్యూహం దోహదపడుతుందని విశ్లేషిస్తున్నారు. ఎన్నికలు ఎప్పుడు వచ్చినా సిద్ధంగా ఉండాలనే ముందస్తు ప్రణాళికతోనే పార్టీ నిర్మాణ ప్రక్రియను వేగవంతం చేస్తున్నట్లు కనిపిస్తోంది. ఏదేమైనా రానున్న ఎన్నికల కోసం వైసీపీ ఇప్పటి నుంచే వ్యూహాలకు పదును పెడుతోందనే సంకేతాలు స్పష్టంగా కనిపిస్తున్నాయి. జగన్ మరోసారి పాదయాత్రతో ప్రజల్లోకి వస్తే ఏపీ రాజకీయాల్లో ఎలాంటి పరిణామాలు చోటుచేసుకుంటాయి, ఆ యాత్ర పార్టీకి ఏ మేరకు కలిసి వస్తుందనే దానిపై ప్రజలు, రాజకీయ వర్గాల్లో ఆసక్తి నెలకొంది. మీకు నచ్చవచ్చు: పాదయాత్రలతోనే విజయం సాధ్యమా..? ఏపీ రాజకీయాల్లో కొత్త అధ్యాయం..!​ జగన్ పాదయాత్ర..ముహూర్తం మారింది.!? [JaganPadayatra, YCP, AP Politics, Sixmonths, Early, Partyneeds, Leaderscoordination, TeluguOne]

Published on: Thu Nov 19, 2026 9:20AM

political-news-img

సోనియా గాంధీ బిలాంగింగ్ పుస్తకం: వ్యక్తిగతమే కాదు.. రాజకీయ అభివ్యక్తీకరణ కూడా.!

సమకాలీన రాజకీయాలలో సోనియాగాంధీ ఆత్మకథ బిలాంగింగ్: ఏ జర్నీ ఆఫ్ లవ్ పుస్తకం పెను దుమారం రేపిందనడంలో సందేహం లేదు. ఈ పుస్తకం కేవలం ఆమె ఆత్మకథగానే కాకుండా, దేశ రాజకీయాలలో కీలకమైన మలుపులు, కుటుంబ బంధాలు, అంతర్గత సంఘర్షణలను సైతం బహిర్గతం చేసింది. ఈ నేపథ్యంలో ఆమె ఆత్మకథ పుస్తకంలోని అంశాలపై, అందులో ప్రస్తావించిన వివాదాస్పద విషయాలు, అప్పటి రాజకీయాలలో వాటి ప్రభావంపై ఎడతెగని చర్చ జరుగుతోంది. పుస్తకంలోని చరిత్ర , వ్యక్తిగత జీవితం ఒకదానికొకటి ముడిపడి ఉండటం కూడా ఆ పుస్తకంపై పెను చర్చకు, భిన్న అభిప్రాయాలు వ్యక్తం కావడానికి కారణం అయ్యింది. ఒక సాధారణ కుటుంబం నుంచి వచ్చి, భారత రాజకీయాల్లో అత్యున్నత స్థాయికి చేరిన సోనియా ప్రస్థానం అంతా విభేదాలు, వివాదాలు, విషాదాల సమాహారంగా సాగింది. అందులో సందేహం లేదు. అవే విషయాలను ఆమె తన ఆత్మకథలో పొందుపరిచారు. అయితే.. వాటిని పొందుపరిచే క్రమంలో ఆమె కొన్ని అంశాలను ఉద్దేశపూర్వకంగా విస్మరించారనీ, కొన్నిటిని అంతే ఉద్దేశపూర్వకంగా వక్రీకరించారన్న చర్చ జోరుగా సాగుతోంది. అలాంటి వాటిలో ఇందిరా గాంధీ హయాంలో విధించిన ఎమర్జెన్సీ, అలాగే రాజీవ్ హయాంలో ఆయన తీసుకున్న కొన్ని నిర్ణయాలపై సోనియాగాంధీ ప్రస్తావించిన అంశాలపై బీజేపీ సమా కాంగ్రెసేతర పార్టీలు తీవ్ర స్థాయిలో విమర్శలు గుప్పిస్తున్నారు. ఇక తమను తాము తటస్థంగా చెప్పుకునే వ్యక్తులు, మేధావులూ కూడా ఆమె ఆత్మకథలో ప్రస్తావించిన అంశాల నిష్పాక్షితపై సందేహాలువ్యక్తం చేస్తున్నారు. ఇక పోతే కాంగ్రెస్ పార్టీ అంతర్గత వ్యవహారాలు, నాయకుల మధ్య అభిప్రాయ భేదాలు కూడా సోనియా తన ఆత్మకథలో ప్రస్తావించారు. ఇదే ఆమె రాజకీయ ప్రత్యర్థులకు విమర్శించడానికి అవకాశం ఇచ్చింది. ఇక పోతే ఇప్పుడు ఆమె తన ఆత్మకథ ప్రచురణ వెనుక ఉన్న ఉద్దేశాలు, వ్యూహాలపై కూడా పలు రకాలుగా విమర్శలు, వ్యాఖ్యలు, కొండొకచో ప్రశంసలూ వ్యక్తమౌతున్నాయి. రాజకీయ నాయకులు ఆత్మకథ పేర పుస్తకాలు ప్రచురించడం సోనియాతోనే మొదలు కాలేదు కానీ, సోనియా గాంధీ ఆత్మకథ బిలాంగింగ్ ఒకే సమయంలో వివాదాలకు నిలయంగానూ, విశేష పాఠకాదరణ పొందడానికి కారణం ఆమె నేపథ్యం, ఆమె కుటుంబ నేపథ్యం, ఆమె కుటుంబంలో సంభవించిన విషాదాలే కారణం అని చెప్పవచ్చు. అయితే ఆమె తన పుస్తకంలో ప్రస్తవించిన కొన్ని అంశాల విషయంలో సంయమనం పాటింకకపోవడమే అసలు సమస్య అని పరిశీలకులు విశ్లేషిస్తున్నారు. ఇది కూడా చదవండి: ఒత్తిడితో ఓకే చెప్పా: ఆ తరువాత నో అన్నా.. ప్రధాని పదవిపై సోనియాగాంధీ.! ముఖ్యంగా సోనియా ఎమర్జెన్సీ, రాజీవ్ హయాంలో తీసుకున్న కొన్ని వివాదాస్పద నిర్ణయాలను సమర్ధించే క్రమంలో నెపాన్ని పార్టీకే చెందిన కొందరు సీనియర్లపై నెట్టివేయడం ఏకకాలంలో కాంగ్రెస్ కు ఇబ్బందికరంగా, రాజకీయ ప్రత్యర్థులకు విమర్శించడానికి ఒక అవకాశంగా మారిందంటున్నారు. అందుకే సోనియా గాంధీ పుస్తకం బిలాంగింగ్ పై కాంగ్రెస్ లోనే కొన్ని వర్గాల నుంచి భిన్న స్పందన వ్యక్తమౌతోంది. మొత్తంగా సోనియా బిలాంగింగ్: ఏ జెర్నీ ఆఫ్ లవ్ ప్రత్యర్థులకు విమర్శనాస్త్రాలను అందిస్తూనే, వ్యక్తిగతంగా ఆ కుటుంబం పడిన వేదనను కళ్లకు కట్టి నెహ్రూ కుటుంబ త్యాగాలను మరిచిపోతున్నతరానికి గుర్తు చేస్తున్నదన్న అభిప్రాయం పరిశీలకుల నుంచి వ్యక్తం అవుతోంది. మీకు నచ్చవచ్చు: సోనియా ఆత్మకథలో అసలు నిజాలెన్ని.. వైట్‌వాషింగ్ అంటూ బీజేపీ విమర్శలు.! రాజీవ్‌ గాంధీకు నో.. రాహుల్‌కు ఓకేనా? సోనియా ఆత్మకథలో ఆసక్తికర విషయాలు.! [Sonia Gandhi, Belongingbook, Politics, autobiography, TeluguOne]

Published on: Sun Nov 15, 2026 2:53PM

political-news-img

విజయసాయి కొత్త పార్టీ: వైసీపీ బీ టీమ్ అంటూ చర్చలు.!

ఆంధ్రప్రదేశ్ రాజకీయాలలోనూ, జనబాహుల్యంలోనూ కూడా ఇప్పుడు విజయసాయి రెడ్డి కొత్త పార్టీ పీఆర్పీ( పరివర్తన రాజనీతి పార్టీ)పై హాట్ హాట్ గా చర్చ జరుగుతోంది. రంగంలో నిత్యం ఏదో ఒక ఆసక్తికర పరిణామం చోటుచేసుకుంటూనే ఉంటుంది. గతంలో వైసీపీ లో నంబర్ 2 చక్రం తిప్పిన విజయసాయి, 2924 ఎన్నికలలో వైసీపీ ఘోర పరాజయం తరువాత, ఆ పార్టీ నుంచి బయటకు వచ్చారు. బయటకు వస్తూ తాను రాజకీయ సన్యాసం తీసుకుంటున్నట్లు ప్రకటించిన విజయసాయి రెడ్డి ఎక్కువ కాలం ఆ ప్రకటనకు కట్టుబడి ఉండలేదు. అప్పట్లో వ్యవసాయమే వ్యాపకమన్న విజయసాయి, ఇప్పుడు రాజకీయాలే తన వృత్తి అంటున్నారు. తాజాగా ఈ నెల 11న ఆయన పార్టీ పేరు, జెండా, అజెండా ప్రకటించారు. గతంలో వైసీపీలో కీలక నేతగా వ్యవహరించిన విజయసాయి రెడ్డి రాజకీయ ప్రయాణానికి సంబంధించిన విశ్లేషణలు రాష్ట్ర రాజకీయాల్లో తీవ్ర చర్చనీయాంశంగా మారాయి. గత కొంతకాలంగా మారుతున్న రాజకీయ సమీకరణాల నేపథ్యంలో, ఆయన గత ప్రయాణం, ఆర్థిక, వ్యాపార రంగాలకు సంబంధించిన అంశాలు ఇప్పుడు మళ్లీ తెరపైకి వచ్చాయి. చార్టర్డ్ అకౌంటెంట్‌గా తన వృత్తి జీవితాన్ని ప్రారంభించిన విజయసాయి రెడ్డి.. ఆ తర్వాత కాలంలో వైయస్ రాజశేఖర్ రెడ్డి కుటుంబంతో ఏర్పడిన సాన్నిహిత్యంతో రాజకీయాలలోకి ప్రవేశించారు. వైఎస్ రాజశేఖరరెడ్డి హయాం నుంచి ఆ కుటుంబంతో సాన్నిహిత్యం ఉన్న విజయసాయి, జగన్ సొంతంగా రాజకీయ పార్టీ ఏర్పాటు చేసిన తరువాత ఆయన నాయకత్వంలో ఆయనతో అడుగు కలిపి కదిలారు. వైసీపీ ఆవిర్భావానికి ముందు నుంచీ కూడా జగన్ కు చేదోడువాదోడుగా ఉన్న విజయసాయి, ఆ పార్టీలో నంబర్ 2 స్థాయికి ఎదిగారు. 2014 ఎన్నికలలోనూ, ఆ తరువాత 2019 ఎన్నికలలోనూ కూడా విజయసాయిరెడ్డే జగన్ వెనకుండి రాజకీయ వ్యూహరచన చేశారు. 2014లో వైసీపీ పరాజయం తరువాత, తిరిగ 2019లో అనూహ్యంగా పుంజుకుని ఘన విజయం సాధించడంలో విజయసాయి పాత్ర కిలకం అనడంలో సందేహం లేదు. అయితే వైసీపీ అధికారంలోకి వచ్చిన తరువాత కారణాలేమైతేనేం.. క్రమంగా వైసీపీలో విజయసాయి ప్రాభవం తగ్గుతూ వచ్చింది. జగన్ వద్ద ఆయన ప్రతిష్ఠ దిగజారుతూ వచ్చింది. చివరకు 2024లో పార్టీ ఘోర పరాజయం తరువాత విజయసాయి రెడ్డి పార్టీ నుంచి బయటకు వచ్చేశారు. ఆ సందర్భంగా ఆయన ప్రత్యక్షంగా జగన్ కోటరీపైనా, పరోక్షంగా జగన్ పైనా విమర్శలు గుప్పించారు. ఇది కూడా చదవండి: విజయసాయి కొత్త పార్టీ: వైసీపీకి జరిగే నష్ట మేంటి.. రాష్ట్ర రాజకీయాల్లో పీఆర్పీ ప్రభావమెంత.? అది పక్కన పెడితే..జగన్ కు సన్నిహితంగా మెలిగి, అప్పట్లో ఆయన తీసుకున్న ప్రతి నిర్ణయం, అనుసరించిన విధానాలలో విజయసాయి భాగస్వామి అనడంలో సందేహం లేదు. అటువంటి విజయసాయి ఇప్పుడు తగుదునమ్మా అని రాజకీయాలలో పరివర్తన, నాయకులలో నిజాయితీ గురించి ప్రసంగాలు గుప్పించడం హాస్యాస్పదంగా ఉందన్న విమర్శలు వెల్లువెత్తుతున్నాయి. వైసీపీలో ఉన్నంత కాలం కనిపించని తప్పులు, ఇప్పుడు సొంత రాజకీయ ప్రకటన పెట్టగానే కనిపిస్తున్నాయా అని నిలదీస్తున్నారు. మాజీ మంత్రి వివేకా హత్య కేసు విషయంలో కానీ, మద్యం కుంభకోణం విషయంలో కానీ వైసీపీలో ఉన్నంత కాలం జగన్ తరఫున వకాల్తా పుచ్చుకుని సమర్ధించిన విజయసాయి, ఇప్పుడు జగన్ పై విమర్శలు గుప్పించినంత మాత్రాన గతంలో తప్పుల నుంచి విముక్తి పొందలేదని అంటున్నారు. రాష్ట్రంలో మారుతున్న రాజకీయ సమీకరణాల నేపథ్యంలో, విజయాసి పరివర్తన రాజనీతి పార్టీ ఏ మేరకు ప్రభావం చూపుతుందన్న అనుమానాలు వ్యక్తం చేస్తున్నారు. మరి కొందరైతే విజయసాయి పీఆర్పీ ని వైసీపీ బి టీమ్ గా అభివర్ణిస్తున్నారు. భవిష్యత్తులో ఆయన అనుసరించే రాజకీయ వ్యూహాలు ఏపీ రాజకీయాల్లో ఎలాంటి సంచలనాలకు కేంద్ర బిందువుగా మారుతాయనేది వేచి చూడాలి. మీకు నచ్చవచ్చు: విజయసాయి కొత్త పార్టీ పీఆర్ పీ: ఏపీ ప్రయోజనాల పరిరక్షణే లక్ష్యమని ప్రకటన.! వైసీపీలో నన్ను బతకనివ్వలేదు.. 70కి పైగా అవమానాలు భరించా: విజయసాయి రెడ్డి [VijayaSaiReddy, ewparty, PRP, APPolitics, APpolitics, TeluguOne]

Published on: Fri Nov 13, 2026 2:00PM

political-news-img

విపత్తు నిర్వహణలో చంద్రబాబు ఆదర్శం: జాతీయ స్థాయిలో ప్రశంసల వర్షం.!

ప్రకృతి కన్నెర్ర చేస్తే మనిషి చేతులెత్తేయడమే తప్ప మరేం చేయలేడని ఇంత వరకూ అంతా అనుకుంటున్నారు. కానీ ప్రకృతి విపత్తును ఆపలేకపోయినా, ఆ విపత్తు వల్ల కలిగే నష్టాన్ని కనిష్ట స్థాయికి తగ్గించవచ్చని ఆంధ్రప్రదేశ్ ముఖ్యమంత్రి నారా చంద్రబాబు నాయుడు తన కార్యదక్షతతో నిరూపించారు. రాష్ట్రంలో ఎదురైన రెండు వరుస పెను తుఫానుల ఉద్ధృతిని సమర్థవంతంగా అడ్డుకోవడంలో అత్యంత ప్రశంసనీయమైన రీతిలో వ్యవహరించారు. ప్రకృతి విపత్తుల సమయంలో ఆయన తీసుకున్న ముందస్తు చర్యలు, నూతన పద్ధతుల అమలు ఇతరులకు ఆదర్శంగా నిలిచాయి. ఈ విపత్కర పరిస్థితులను ఎదుర్కొనే క్రమంలో సాంకేతికతను జోడించి ఆయన ముందుకు వెళ్లిన తీరుపై జాతీయ స్థాయిలో ప్రశంసల వర్షం కురుస్తోంది. ముఖ్యంగా ఆర్టిఫిషియల్ ఇంటెలిజెన్స్ ఆధారిత వాతావరణ అంచనాలను ఉపయోగించడం ద్వారా రాబోయే ముప్పును ముందే అంచనా వేసిన చంద్రబాబు.. సమాచార విశ్లేషణ ఆధారంగాయంత్రాంగాన్ని క్షేత్రస్థాయిలో మోహరించారు. విద్యుత్ సరఫరా పునరుద్ధరణ, సహాయక చర్యల కోసం పొరుగు రాష్ట్రాల నుంచి డిస్కం సిబ్బందిని రప్పించడం ఆయన పరిపాలనా దక్షతకు, నష్టాలను, కష్టాలను సత్వరమే పరిష్కరించి ప్రజలకు ఇబ్బందులు కలగనీయకుండా ఆయన ఎంత చురుకుగా, చొరవగా ముందుకు కదులుతారనడానికి తాజా నిదర్శనంగా పరిశీలకులు విశ్లేషిస్తున్నారు. ఈ సందర్భంగా ఆయన గతంలో కోనసీమ తుపాను సందర్భంగా సహాయ పునరావాస చర్యలను ప్రత్యక్షంగా పర్యవేక్షించిన తీరును గుర్తు చేస్తున్నారు. అప్పట్లో స్థానిక అధికారుల కంటే ముందుగా ఆయన ఉప్పెన ప్రభావిత ప్రాంతానికి చేరుకోవడం, రాజమండ్రికి ఆయన కార్యస్థలంగా మార్చుకుని రేయింబవళ్లు శ్రమించి సత్వరమే పరిస్థితిని సాధారణ స్థాయికి తీసుకువచ్చిన విషయాన్ని ఉదహరిస్తున్నారు. అలాగే విశాఖను హుద్ హుద్ తుపాను అతలాకుతలం చేసిన సందర్భంలోనూ ఆయన అరహారం శ్రమించి స్వల్ప వ్యవధిలోనే సాధారణ పరిస్థితులు నెలకొనేలా చేసిన తీరును వివరిస్తున్నారు. ఇప్పుడు తాజాగా రోజుల వ్యవధిలో రాష్ట్రంపై దాడి చేసిన అర్నాబ్, మురసు తుపానులను ఎదుర్కొనడంలోనూ చంద్రబాబు వినూత్న ఆలోచనలు, వేగవంతమైన నిర్ణయాలు ప్రమాద తీవ్రతను గణనీయంగా తగ్గించడంలో కీలక పాత్ర పోషించాయి. ప్రతికూల వాతావరణ పరిస్థితుల్లోనూ ఏమాత్రం తడబాటు లేకుండా, ప్రణాళికాబద్ధంగా వ్యవహరించడం ద్వారా ఆయన తన ప్రత్యేకతను మరోసారి చాటుకున్నారు. ఇది కూడా చదవండి: పెను తుపాను తలొంచి చూసే తొలి నిప్పుకణం: చంద్రబాబుకు జాతీయ స్థాయిలో ప్రశంసలు.! సంక్షోభ సమయంలో అధికారులను సమన్వయం చేస్తూ తీసుకున్న చొరవ ప్రజలకు ఎంతో ఊరటనిచ్చింది. 76 ఏళ్ల వయసులోనూ ఏమాత్రం విశ్రాంతి కోరుకోకుండా, నిరంతరం ప్రజల క్షేమం కోసం తపించడం ఆయన నాయకత్వ లక్షణాలకు అద్దం పడుతోందని జాతీయ మీడియా ప్రముఖంగా ప్రచురించింది, ఈ క్రియాశీలక పాలన (ప్రోయాక్టివ్ గవర్నెన్స్) విధానం మిగతా రాజకీయ నాయకులకు రోల్ మోడల్ లాంటిదని పరిశీలకులు అంటున్నారు. భవిష్యత్తులో ఇలాంటి విపత్తులు ఎదురైనప్పుడు మరింత వేగంగా స్పందించేందుకు ఈ తరహా సాంకేతిక విధానాలు దోహదపడతాయి. నాయకత్వంలో ముందుచూపు, పట్టుదల ఉంటే ఎంతటి క్లిష్ట సమస్యనైనా, ఎలాంటి పెను విపత్తునైనా సులువుగా అధిగమించవచ్చని చంద్రబాబు చేతలలో నిరూపించారని చెబుతున్నారు. మీకు నచ్చవచ్చు: మురసు తుఫానుతో ఏపీకి రూ.1,918 కోట్ల నష్టం.! మురసు తుపాను నష్టాలపై సీఎం చంద్రబాబు ఏరియల్ సర్వే.! [Chandrababu Naidu Proactive Governance, Andhra Pradesh CM, Cyclone Mitigation, AI Forecasting, Minimise, Loss, Telugu One]

Published on: Wed Nov 11, 2026 8:37AM

political-news-img

ఏపీలో వైసీపీ కంటే బీజేపీయే బెటర్: స్థానిక సమరంలో నాలుగో స్థానంతో సరిపెట్టుకున్న జగన్ పార్టీ.!

ఆంధ్రప్రదేశ్ లో జరిగిన మునిసిపల్, పరిషత్ ఎన్నికల ఫలితాలు నిస్సందేహంలో వైసీపీకీ, ఆ పార్టీ అధినేత జగన్ కు ఊహించని షాక్ ఇచ్చాయి. 2019 ఎన్నికలు, ఆ తరువాత 2021 స్థానిక ఎన్నికలలో తిరుగులేని విజయాలను దక్కించుకున్న వైసీపీ, ఆ తరువాత 2024 ఎన్నికలలో ఘోర పరాజయం పాలైంది. ఈ పరాజయానికి కొనసాగింపు అన్నట్లుగా తాజాగా జరిగిన మునిసిల్, పరిషత్ ఎన్నికలలో కూడా ఘోరాతి ఘోరంగా పరాజయం పాలైంది. అది పక్కన పెడితే ఓట్ల శాతంలో ఆ పార్టీ బీజేపీకి దిగువకుంది. ప్రస్తుత స్థానిక సంస్థల ఎన్నికల్లో మాత్రం తీవ్రంగా వెనుకబడిపోయింది. ఎన్నికల ఫలితాల సరళిని పరిశీలిస్తే, వైఎస్సార్‌సీపీ ఏకంగా నాల్గో స్థానానికి పడిపోయి, చివరికి బీజేపీ కంటె కూడా తక్కువ స్థానాలను సాధించడం రాజకీయ వర్గాల్లో సంచలనంగా మారింది. ఈ పరాజయం పార్టీ శ్రేణులను తీవ్ర నిరాశకు గురిచేసింది. తాజాగా వెలువడిన మున్సిపల్ ఎన్నికల ఫలితాలలో తెలుగుదేశం పార్టీ అత్యధిక స్థానాలను కైవసం చేసుకుని తన ఆధిపత్యాన్ని చాటుకుంది. మొత్తం మున్సిపాలిటీలలో టీడీపీ ఏకంగా 61 చోట్ల ఘన విజయం సాధించగా, జనసేన పార్టీ 16 స్థానాలను దక్కించుకుంది. అలాగే బీజేపీ 4 మున్సిపాలిటీలలో గెలుపొందింది. కానీ వై సీపీ కేవలం 3 మున్సిపాలిటీలను మాత్రమే దక్కించుకుంది. దీనితో ఏపీలో కనీసం ఒక శాతం ఓటు స్టేక్ కూడా లేని బీజేపీ కంటే దిగువకు వైసీపీ పడిపోయింది. వార్డుల వారీగా చూస్తే జగన్ పార్టీ పరిస్థితి మరింత దయనీయంగా ఉంది. తెలుగుదేశం కూటమి అభ్యర్థులు మున్సిపల్ వార్డులలో భారీ విజయాలను నమోదు చేశారు. టీడీపీ అభ్యర్థులు ఏకంగా 1,983 వార్డులను కైవసం చేసుకుంటే, జనసేన 363 వార్డుల్లో, బీజేపీ 115 వార్డులలో విజయం సాధించాయి. ఈ మూడు పార్టీల కూటమి మొత్తం 2,461 వార్డులను తన ఖాతాలో వేసుకుంది. వైసీపీ కేవలం 416 వార్డులతో సరిపెట్టుకుంది. ఇక ఇతరులు 99 వార్డులలో గెలుపొందారు. మున్సిపల్ కార్పొరేషన్ల ఫలితాలలోనూ కూడా తెలుగుదేశం కూటమి సత్తా చాటింది. మొత్తం 13 మున్సిపల్ కార్పొరేషన్లలో టీడీపీ-జనసేన-బీజేపీ కూటమి ఏకంగా 12 కార్పొరేషన్లను గెలుచుకోగా, వైసీపీ కేవలం ఒక్క కార్పొరేషన్‌తో సరిపెట్టుకుంది. 2021లో జరిగిన స్థానిక సంస్థల ఎన్నికలతో పోలిస్తే ఇది వైపీకి అత్యంత భారీ పతనం. ఆ సమయంలో అధికారంలో ఉన్న వైఎస్సార్‌సీపీ రాష్ట్రంలోని దాదాపు అన్ని మున్సిపాలిటీలను ఏకపక్షంగా క్లీన్‌స్వీప్ చేసింది. అయితే కొద్ది సంవత్సరాల వ్యవధిలోనే రాజకీయ సమీకరణాలు పూర్తిగా మారిపోవడం, పార్టీ గ్రాఫ్ అథఃపాతాళానికి పడిపోవడం ఆ పార్టీ నాయకత్వాన్ని కలవరపెడుతోంది. 2024 అసెంబ్లీ ఎన్నికలలో ఎదురైన ఓటమి కంటే, ఈ మున్సిపల్ ఎన్నికల ఫలితాలు వై పీకి మరింత కోలుకోలేని దెబ్బగా నిలిచాయని పరిశీలకులు విశ్లేషిస్తున్నారు. ఇది కూడా చదవండి: మున్సిపల్ ఎన్నికల్లో కూటమి అఖండ విజయం సాధించింది: సీఎం చంద్రబాబు మునిసిపోల్స్ తరువాత జరిగిన పరిషత్ ఎన్నికలలో సైతం బీజేపీ అంతకంటే ఘోరంగా పరాజయం పాలైంది. కనీసం పులివెందులలో కూడా ఉనికి మాత్రంగా మిగిలింది. ఉభయగోదావరి, కృష్ణా, గుంటూరు, ఉత్తరాంధ్రలతో పాటు రాయలసీమలో కూడా ఆ పార్టీ పరాజయాలు భారీగా ఉన్నాయి. ఇది వైసీపీ సంస్థాగతంగా ఎంత బలహీనంగా ఉందన్న విషయాన్ని తేటతెల్లం చేశాయి. క్షేత్రస్థాయిలో పార్టీ పట్టు కోల్పోయిందనడానికి ఈ ఫలితాలే నిదర్శనమని పరిశీలకులు విశ్లేషిస్తున్నారు. వైసీపీ అధినేత, మాజీ ముఖ్యమంత్రి, పులివెందుల ప్రస్తుత ఎమ్మెల్యే జగన్ విధానాలు, ముఖ్యంగా రాజధాని అంశానికి సంబంధించి ఆయన పూటకో మాట, రోజుకో తీరు అన్నట్లుగా చేస్తున్న ప్రకటనలు ప్రజలలో ఆయన పట్ల, ఆయన పార్టీ పట్ల ప్రజల్లో వ్యక్తమవుతున్న వ్యతిరేకతకు ఈ ఎన్నికల ఫలితాలు నిదర్శనం అంటున్నారు. ఈ ఘోర పరాజయ పరంపర వైసీపీ కేడర్‌ నైతిక స్థైర్యాన్ని దెబ్బతీసిందని చెబుతున్నారు. మీకు నచ్చవచ్చు: జగన్ కంచుకోటలో కూటమి జెండా.. కడపలో వైసీపీకి భారీ షాక్.! [BJP Ahead of YCP in AP, AP Municipal Polls Results, YSRCP Falls 4th, Below BJP, Telugudesham, alliance, Grand, victory, Telugu One]

Published on: Tue Nov 10, 2026 1:20PM

political-news-img

జగన్ తీరు: వైసీపీ బేజారు.!

రాజకీయ పార్టీల మనుగడకు సమర్ధ నాయకత్వం అవసరం. నాయకుడు ముందుండి పార్టీని నడిపిస్తేనే పార్టీ ముందుకు సాగుతుంది. అంతే కానీ, నాయకుడు ప్యాలెస్ లో కూర్చుని కొరడాతో అదిరిస్తాననే అహంకార ధోరణి ప్రదర్శిస్తే ఆ పార్టీకి పురోగతి ఉండదు. ఇప్పుడు వైసీపీ పరిస్థితి అదే. అంతే కాదు.. నాయకుడుకి పార్టీ జెండామోసే కార్యకర్తలకు దూరం ఎంతగా పెరిగితే, పార్టీ అంతగా నష్ట పోతుంది. ఇప్పుడు వైసీపీ గురించి చెప్పుకోవాలంటే నాయకుడికి సమర్ధతా లేదు.. ఆయనది కార్యకర్తలతో మమేకమయ్యే తీరు కాదు. ఔను నిజం. వైఎస్ జగన్మోహనరెడ్డి తీరు నేను ఆదేశిస్తాను, మీరు పాటించండి అన్న చందంగా ఉంటుంది. ఆ కారణంగానే ఆయన అటు ప్రజలతోనూ, ఇటు పార్టీ కార్యకర్తలతోనూ మమేకం కాలేకపోతున్నారు. పార్టీ క్లిష్ట పరిస్థితుల్లో ఉన్నప్పుడు పార్టీ క్యాడర్ కు అందుబాటులో, ప్రజలకు దగ్గరగా మెలగాల్సిన జగన్ ప్యాలెస్ కే పరిమితమౌతున్నారు. దీంతో పార్టీ నేతలూ, కార్యకర్తలూ అయోమయంలో పడిపోతున్నారు. సమకాలీన రాజకీయ నాయకులలో వైసీపీ అధినేత, ఆంధ్రప్రదేశ్ మాజీ ముఖ్యమంత్రి జగన్ రెడ్డిది ఓ విలక్షణ శైలి. తాను పట్టిన కుందేటికి మూడే కాళ్లంటారు. కాదంటే ఒప్పుకోరు. ఒక్కోసారి అదే కుందేటికి ఐదు కాళ్లనడానికీ ఇసుమంతైనా సందేహించరు. తాను ఏది చెప్పినా అందరూ విని తీరాలంటారు. నమ్మి తీరాలంటారు. వైసీపీలో ఆయన కోటరీ జగన్ రెడ్డి తీరును సరిగ్గా అర్ధం చేసుకుంది. దీంతో ఆయన ఓటములను కూడా ప్రత్యర్థుల పరాజయాలుగా అభివర్ణిస్తూ.. ఓ ప్రత్యేక శైలిలో కథనాలు వండి వారుస్తుంటారు. ఆ కథనాలను ప్రసారం చేయడానికీ, ప్రచురించడానికీ, ప్రచారం చేయడానికి జగన్ రెడ్డికి సొంత మీడియా, సోషల్ మీడియా వింగ్ లు ఉన్నాయి. సరే 2024 ఎన్నికలలో ఘోర పరాజయం తరువాత నుంచి జగన్మోహన్ రెడ్డి సందర్భం ఉన్నా లేకున్నా 2029 ఎన్నికలలో మళ్లీ వైసీపీ అధికారంలోకి వస్తుంది. తాను సీఎంను అవుతాను అన్నమాటే వల్లె వేస్తున్నారు. ఆయన మరోసారి రాష్ట్రానికి ముఖ్యమంత్రి కావాలనుకోవడాన్ని ఎవరూ తప్పుపట్టరు. జనం ఆయనను నమ్మి మరోసారి అధికారం అప్పగిస్తే దానినీ ఎవరూ తప్పుపట్టరు. కానీ రాష్ట్రానికి ముఖ్యమంత్రి కావాలనుకునే వ్యక్తి.. రాష్ట్రంలో మాత్రం వారిని ఒక రోజే, మహా అయితే రెండు రోజులకు మించి మకాం వేయరు. ఇలా వచ్చి అలా బెంగళూరు వెళ్లిపోతుంటారు. ఇది కూడా చదవండి: జగనన్నా నిన్ను నమ్మలేమన్నా! మామూలుగా జగన్ షెడ్యూల్ ఎలా ఉంటుందంటే.. బెంగళూరు ప్యాలెస్ నుంచి తాడేపల్లి ప్యాలెస్ గు ప్రతి గురువారం వచ్చి.. ఓ మీడియా సమావేశం ఏర్పాటు చేసి, ఆ సమావేశంలో రాసుకొచ్చిన స్క్రిప్ట్ చదివేసి, ఏపీకి వచ్చిన పనైపోయిందన్నట్లుగా బెంగళూరు ఉడాయించేస్తుంటారు. ఎప్పుడో పరామర్శలకో, ఓదార్పు యాత్రలకో మాత్రం ఈ షెడ్యూల్ లో స్వల్ప మార్పులు ఉంటాయి. అంతే అంతకు మించి మిగతాదంతా సేమ్ టూ సేమ్. అదే విధంగా ఆయన గురువారం (నవంబర్ 5) ఓ మీడియా సమావేశం ఏర్పాటు చేశారు. రాష్ట్రంలో పరిషత్ ఎన్నికల తీరును తూర్పారపట్టారు. అధికార తెలుగుదేశం కూటమి దౌర్జన్యాలకు పాల్పడిందంటూ దుయ్యబట్టారు. తమ పార్టీ వారిని ఓటు వేయకుండా అడ్డుకుందన్నారు. అంతే పరిషత్ ఎన్నికల సందర్భంగా పులివెందుల వంటి కొన్ని చోట్ల జరిగిన అరకొర హింసాత్మక సంఘటనలను జాతీయ స్థాయి సమస్యలుగా అభివర్ణించి మీడియా సమావేశం ముగించి బెంగళూరు వెళ్లిపోయారు. నాయకుడి తీరు ఈ రీతిగా ఉంటే వైసీపీ రాజకీయ భవిష్యత్ ప్రశ్నార్థకం అవుతుందని ఆ పార్టీ శ్రేణుల్లోనే ఆందోళన వ్యక్తమౌతోంది. ఇప్పటికే ఆ పార్టీలో చాలా మంది సీనియర్లు సైలెంట్ అయిపోవడమో, రాజకీయ భవిష్యత్ కోసం ఇతర పార్టీలలోకి జంప్ చేయడమో, చేయడానికి ప్రయత్నాలలోనో ఉన్నారు. మీకు నచ్చవచ్చు: జగన్‌కి సీఎం అపాయింట్‌మెంట్.. ట్రోలింగ్ మామూలుగా లేదుగా? కంగ్రాట్స్ టీమ్ సీబీఎన్ అంటూ ట్వీట్: పుర పోరులో ఓటమిపై జగన్ అక్కసు.! [YS Jagan politics Conine Palace, Distance, Party Cader, Pressmeets, Troll Material, Telugu One]

Published on: Fri Nov 6, 2026 1:31PM

political-news-img

ఏపీ స్థానిక ఎన్నికలు: కాంగ్రెస్ ఊసెక్కడ.. రాష్ట్రంలో గ్రాండ్ ఓల్డ్ పార్టీ ఉనికే ప్రశ్నార్థకం.?

ఆంధ్రప్రదేశ్‌లో ఇటీవల నిర్వహించిన స్థానిక సంస్థలు, మున్సిపల్ ఎన్నికల ఫలితాల్లో అధికార తెలుగు దేశం కూటమి ఘనవిజయం సాధించి తమ ఆధిపత్యాన్ని చాటుకుంది. అయితే, ఈ ఎన్నికల సంగ్రామంలో ఒకప్పుడు రాష్ట్రంలో ఏకఛత్రాధిపత్యం వహించిన కాంగ్రెస్ పార్టీ సోదిలోకి కూడా కనిపించకపోవడం పొలిటికల్ సర్కిల్స్ లో హాట్ టాపిక్ గా మారింది. అలాగే ఈ ఎన్నికలలో కాంగ్రెస్ దయనీయ పరిస్థితిపై ఆ పార్టీ రాష్ట్ర అధ్యక్షురాలు షర్మిల మౌనంపై ప్రశ్నలు వెల్లువెత్తుతున్నాయి. కాంగ్రెస్ ఈ ఎన్నికలలో ఒక్క మునిసిపల్ చైర్ పర్సన్, కార్పొరేషన్ మేయర్ స్థానంలోనూ కూడా కనీస పోటీ ఇవ్వలేదు సరికదా, మెజారిటీ స్థానాల్లో అభ్యర్థులను కూడా నిలబెట్టలేకపోవడం ఏపీలో ఆ పార్టీ పరిస్థితికి అద్దం పడుతోంది. దశాబ్దాల పాటు ఆంధ్రప్రదేశ్ రాజకీయాల్లో తిరుగులేని శక్తిగా నిలిచిన కాంగ్రెస్ ఇప్పుడు రాష్ట్రంలో ఉనికి మాత్రంగానైనా ఉందా అన్న అనుమానాలు వ్యక్తమౌతున్నాయి. గతంలో ఆ పార్టీలో కీలకంగా వ్యవహరించిన నాయకులు ఇప్పుడు ఆ పార్టీతో లేరు. క్యాడర్ కూడా దాదాపు ఇతర పార్టీలకు జంప్ అయిపోయిన పరిస్థితి. పార్టీని క్షేత్రస్థాయి నుంచి పునర్నిర్మించాల్సిన బాధ్యత తీసుకోవలసిన ఏపీసీసీ చీఫ్ షర్మిల ఆ విషయంలో ఘోరంగా విఫలమయ్యారని పరిశీలకులు విశ్లేషిస్తున్నారు. రాష్ట్ర కాంగ్రెస్ అధ్యక్షురాలిగా వైఎస్ షర్మిలను నియమించడం వెనుక అధిష్ఠానం వైఎస్ అభిమానులను పార్టీలోకి తీసుకువస్తుందన్న వ్యూహం ఉందని అప్పట్లో పెద్ద ఎత్తున ప్రచారం జరిగింది. 2024 ఎన్నికలకు ముందు ఆ దిశగా షర్మిల కొంత హడావుడి కూడా చేశారు. అయితే ఆ తరువాత మాత్రం సైలెంట్ అయిపోయారు. ఇక ఇప్పుడు స్థానిక ఎన్నికల సమయంలో షర్మిల పూర్తిగా సైడ్ అయిపోయానన్న విమర్శలు వినిపిస్తున్నాయి. స్థానిక ఎన్నికల సమయంలో పార్టీ క్యాడర్ కు దిశానిర్దేశం చేయడంలోనూ, అభ్యర్థులను సమాయత్తం చేయడంలోనూ షర్మిల ఇసుమంతైనా ఇంట్రెస్ట్ చూపలేదన్న విమర్శలు కాంగ్రెస్ వర్గాల నుంచే వినిపిస్తున్నాయి. స్థానిక సంస్థల వంటి ప్రాథమిక స్థాయి ఎన్నికల్లో మెజారిటీ స్థానాలలో అభ్యర్థులను నిలబెట్టలేకపోవడం, నిలబడిన అభ్యర్థుల విషయంలో కనీస ప్రచారం కూడా లేకపోవడంతో రాష్ట్రంలో ఇక కాంగ్రెస్ కోలుకునే వకాశాలు దాదాపు మృగ్యం అన్న అభిప్రాయాన్ని పరిశీలకులు వ్యక్తం చేస్తున్నారు. వాస్తవానికి రాష్ట్ర విభజన తరువాత నుంచీ రాష్ట్రంలో కాంగ్రెస్ పరిస్థితి నానాటికీ తీసికట్లు అన్న చందంగానే ఉంది. వైఎస్ రాజశేఖర రెడ్డి వారసత్వాన్ని అందిపుచ్చుకుని పార్టీకి కొత్త ఊపిరి పోస్తారని భావించిన షర్మిల ఆ దిశగా ఏ మాత్రం ప్రభావం చూపలేకపోయారన్న అభిప్రాయం సర్వత్రా వ్యక్తం అవుతోంది. [AP Local Body Elections, Congress Performance, Political Disappearance, Sharmila AP Congress President, AP Congress Crisis, AP Politics TeluguOne]

Published on: Thu Nov 5, 2026 10:37AM

political-news-img

వైనాట్ కుప్పం నుంచి పులివెందులలో ఓటమి వరకూ: జగన్ పతన ప్రస్థానం.!

ఆంధ్రప్రదేశ్ రాజకీయాల్లో 2019 సార్వత్రిక ఎన్నికల ఫలితాలు చారిత్రకమైనవిగా నిలిచాయి. వైఎస్ జగన్ మోహన్ రెడ్డి నాయకత్వంలో వైసీపీ 151 స్థానాలను కైవసం చేసుకుని అఖండ విజయం సాధించింది. ఈ విజయంతో రాష్ట్రంలో ప్రతిపక్ష పార్టీల కథ ముగిసిపోయిందని అప్పట్లో పరిశీలకులు విశ్లేషణలు చేశారు. ఆ ఫలితాల మత్తులోఆ సమయంలో ఆ విజయంపై జగన్ హర్షం వ్యక్తం చేస్తూ తదుపరి ఎన్నికలలో వైనాట్ 175 అంటే వ్యాఖ్యలు చేశారు. అందులో భాగంగానే వైనాట్ కుప్పం అని కూడా ప్రకటించారు. 2024 ఎన్నికలకు ముందు కుప్పంలో విజయంపై భారీ భారీ ప్రకటనలూ చేశారు. అంతే కాకుండా వైనాట్ కుప్పం అన్న నినాదాన్ని బలంగా ప్రజలలోకి తీసుకు వెళ్లారు. కుప్పం నియోజకవర్గంలో పట్టు సాధించాలనే ఉద్దేశంతో వైసీపీ నాయకత్వం చేయని ప్రయత్నం లేదు. జగన్ హయాంలో స్థానిక సంస్థల ఎన్నికల్లో ప్రత్యేక వ్యూహాలు అమలు చేయడంతో, 2021లో కుప్పం మున్సిపాలిటీని వైపీపీ కైవసం చేసుకుంది. ఆ సందర్భంగా జగన్ అతికి పోయి.. ఇప్పుడు చంద్రబాబు ముఖం చూడాలని ఉందంటూ వ్యాఖ్యానించారు. అయితే 2024 ఎన్నికలలో జగన్ కు తేరుకోలేని పరాభాం ఎదురైంది. వైనాట్ 175, వైనాట్ కుప్పం నినాదాలు మరుగున పడిపోయాయి. సొంత అడ్డా పులివెందులలో జగన్ మెజారిటీ గణనీయంగా తగ్గింది. కడప జిల్లాలోనూ పలు అసెంబ్లీ నియోజకవర్గాలు కూటమి వశమయ్యాయి. అలా 2024 ఎన్నికల్లో జగన్ పార్టీ ఊహించని విధంగా ఘోర ఓటమిని చవిచూడటమే కాకుండా, కనీసం ప్రతిపక్ష హోదాను కూడా దక్కించుకోలేకపోయింది. కేవలం 11 స్థానాలకే పరిమితం అయ్యింది. ఇప్పుడు రాష్ట్రంలో జరిగిన పురపోరులో పులివెందుల మునిసిపాలిటీలో వైసీపీ ఘోరంగా ఓడిపోయింది. ఒకప్పుడు చంద్రబాబును కుప్పంలో ఓడిస్తామంటూ ప్రగల్భాలు పలికిన జగన్, ఇప్పుడు సొంత నియోజకవర్గమైన పులివెందులలో పట్టు కోల్పోయి, మునిసిపాలిటీని కోల్పోయిన పరిస్థితి ఎదురైంది. చరిత్రలో తొలిసారిగా పులివెందుల కంచుకోటను తెలుగుదేశం బద్దలు కొట్టడం సంచలనంగా మారింది. 2019 ఎన్నికలతో పోలిస్తే 2024లో పులివెందులలో జగన్ మెజారిటీ దాదాపు 30 వేలు తగ్గింది. తాజాగా పులివెందుల గడ్డపైనే టీడీపీ విజయం సాధించడం ఆ పతనాన్ని మరింత పెంచింది. 2019 విజయం తర్వాత మరింత దూకుడుగా వ్యవహరించిన జగన్, కుప్పంలో పాగా వేసి చంద్రబాబును రాజకీయంగా దెబ్బతీయాలని భావించారు. అయితే అదే వ్యూహం ఇప్పుడు రివర్స్ అయ్యింది. పులివెందుల మునిసిపాలిటీలో వైసీపీ ఘోర పరాజయం పాలైంది. [Why not Kuppam to Pulivendula defeat, Jagan, Pulivendula, Kuppam, TDP, Andhra Pradesh Politics, Chandrababu Naidu, AP Localbody Elections, Telugu One]

Published on: Wed Nov 4, 2026 8:18AM

political-news-img

అమిత్ షా హైదరాబాద్ పర్యటన: గులాబీ పార్టీతో కాషాయం చెలిమి సూచన.?

తెలంగాణ రాజకీయాల్లో కేంద్ర హోంమంత్రి అమిత్ షా పర్యటన బీజేపీ, బీఆర్ఎస్ మైత్రిపై సరికొత్త చర్చకు తెరలేపింది. అమిత్ షా హైదరాబాద్‌లో సోమవారం (నవంబర్ 2) నిర్వహించిన మహా పాదయాత్ర, భారీ బహిరంగ సభలో అమిత్ షా ప్రసంగం కమలం, గులాబీ పార్టీల పొత్తు చర్చలకు ఆస్కారం ఇచ్చింది. అమిత్ షా తన ప్రసంగంలో రాష్ట్రంలోని కాంగ్రెస్ ప్రభుత్వంపై ఓ రేంజ్ లో విరుచుకుపడ్డారు. స్థాయిలో విరుచుకుపడ్డారు. ముఖ్యమంత్రి ఎనుముల రేవంత్ రెడ్డి పాలనా తీరును తప్పుపడుతూ, రాష్ట్రంలో అవినీతి పెరిగిపోయిందని, కాంగ్రెస్ ఇచ్చిన హామీలన్నీ నీటిమూటలయ్యాయని ధ్వజమెత్తారు. తెలంగాణను కొందరు ఢిల్లీ పెద్దలకు ఏటీఎంలా రేవంత్ మార్చేస్తున్నారని తూర్పారపట్టారు. రాష్ట్రంలో జరుగుతున్న పరిణామాలపై ప్రజలు తీవ్ర అసంతృప్తితో ఉన్నారని, కేవలం బీజేపీ మాత్రమే రాష్ట్రానికి నిజమైన ప్రత్యామ్నాయంగా చెప్పారు. కాంగ్రెస్ పార్టీ నాయకులు ఎన్నికల సమయంలో ఇచ్చిన ఆరు గ్యారెంటీలను అమలు చేయడంలో పూర్తిగా విఫలమయ్యారని విమర్శించారు. ఈ సందర్భంగా కాంగ్రెస్ అగ్రనేత రాహుల్ గాంధీ విమర్శలను కూడా అమిత్ షా గట్టిగా తిప్పికొట్టారు. ఈవీఎంల పనితీరుపై ప్రతిపక్షాలు చేస్తున్న ఆరోపణలను తప్పుపడుతూ, ఒకవేళ ఈవీఎంలు లోపభూయిష్టంగా ఉంటే తెలంగాణ, కేరళ, తమిళనాడు రాష్ట్రాల్లో కాంగ్రెస్, దాని మిత్రపక్షాలు ఎలా అధికారంలోకి వచ్చాయని ప్రశ్నించారు. ఎన్నికల్లో గెలిస్తే ప్రజల తీర్పని, ఓడిపోతే ఈవీఎంల తప్పు అనడం కాంగ్రెస్ కు అలవాటుగా మారిందన్నారు. అయితే ఇక్కడో విషయం ప్రత్యేకంగా చెప్పుకోవాలి. గతంలో రాష్ట్రంలో బీఆర్ఎస్ అధికారంలో ఉన్న సమయంలో ఆ పార్టీపై తీవ్ర స్థాయిలో విమర్శలు గుప్పించిన అమిత్ షా తన తాజా పర్యటనలో మాత్రం బీఆర్ఎస్ పై విమర్శల పదును తగ్గించారు. ఇందుకు కారణం తెలంగాణలో బీజేపీ పరిస్థితి ఒక అడుగు ముందుకు రెండడుగులు వెనక్కు అన్న చందంగా మారడమేనని పరిశీలకులు విశ్లేషిస్తున్నారు. రాష్ట్రంలో వచ్చే అసెంబ్లీ ఎన్నికలలో ఒంటరిగా అధికార పగ్గాలు చేపట్టే బలం కమలం పార్టీకి లేదన్న అంచనాతోనే ఆయన గులాబీ పార్టీపై విమర్శల పదును తగ్గించి ఆ పార్టీతో చెలిమికి తలుపులు తెరిచి ఉంచారని అంటున్నారు. అమిత్ షా మొత్తం ప్రసంగంలో గులాబీ పార్టీ ప్రస్తావన నామమాత్రంగానే ఉండటంతో.. గతంలో అంటే బీఆర్ఎస్ అధికారంలో ఉన్న సమయంలో ఆయన చేసిన అవినీతి, అరాచకం, దుర్మార్గాలు అన్న విమర్శలను ఉపసంహరించుకున్నట్లేనా అన్న చర్చ రాష్ట్రంలో జరుగుతోంది. [Amit Shah Hyderabad Tour, Mahapadayatra, Criticise, Congress, Politics, Softcorner, Brs, Telangana Politics, Telugu One]

Published on: Tue Nov 3, 2026 4:14AM

political-news-img

ఇంక సింహం సింగిల్ గా రాదా.. ఇండియా కూటమివైపు జగన్ మెగ్గు.!

సింహం సింగిల్ గానే వస్తుందంటూ డైలాగులు దంచే జగన్ ఇప్పుడు రాజకీయ పొత్తు కోసం తహతహలాడుతున్నారు. ఇంత కాలం బీజేపీకి మద్దతుగా వ్యవహరిస్తూ వచ్చిన జగన్ ఇప్పుడు ఇండియా కూటమి వైపు మొగ్గు చూపుతున్నారు. రాజకీయ అవసరం కోసం తన సింగిల్ నినాదాన్ని మడిచి జేబులో పెట్టుకుని ఇండియా కూటమితో కలిసి నడవడానికి రెడీ అయిపోయారు. జాతీయ స్థాయిలో వైసీపీ వైఖరి ఏమిటన్నది ఇప్పటి వరకూ బాహాటంగా స్పష్టత ఇవ్వని జగన్.. లోపాయికారీ మద్దతు మాత్రం మోడీ నాయకత్వంలోని ఎన్డీయే కూటమికే ఇస్తూ వచ్చారు. అంతలోనే ఏమైందో ఏమో కానీ, ఇప్పుడు ఆయన మొగ్గు ఇండియా కూటమి వైపు తిరిగినట్లు కనిపిస్తోంది. పార్లమెంట్‌లో ఇప్పటివరకు కేంద్రంలోని ఎన్‌డీఏ ప్రభుత్వ విధానాలకు బేషరతు మద్దతు ఇస్తూ వచ్చిన జగన్ ఇప్పుడు అందుకు భిన్నంగా వ్యవహరిస్తున్నారు. కేంద్ర ఎన్నికల సంఘం ఈసీఐ పనితీరులో మరియు నిబంధనలలో సమూలమైన మార్పులు రావాలని, కొత్త సంస్కరణలను తీసుకురావాలని జగన్ గట్టిగా డిమాండ్ చేయడం ద్వారా తాను ఇండియా కూటమివైపు అడుగులు వేస్తున్నానని స్పష్టమైన సంకేతాలిచ్చారు. ఎన్నికల నిర్వహణలో పారదర్శకత లోపిస్తే దేశంలో ప్రజాస్వామ్యం మనుగడ సాగించలేదని పేర్కొన్న జగన్.. ఇండియా కూటమి ఎన్నికల సంఘం అక్రమాలకు వ్యతిరేకంగా నిర్వహిస్తున్న నిరసనలు, ఉద్యమాలకు సంఘీభావం ప్రకటించారు. కేంద్ర ప్రభుత్వం ఇప్పటికైనా స్పందించి ఎన్నికల నిబంధనలను సవరించేందుకు చొరవ తీసుకోవాలని డిమాండ్ చేశారు. రాష్ట్రంలో స్థానిక ఎన్నికల సమయంలో జరిగిన పరిణామాలను ప్రస్తావిస్తూ.. కేంద్రం, రాష్ట్రంలో ఉన్న అధికార పక్షాలు ఏకపక్షంగా వ్యవహరిస్తున్నాయని విమర్శలు గుప్పించారు. ఈ అంశంపై అవసరమైతే తమ పార్టీ నేరుగా సుప్రీంకోర్టును ఆశ్రయించి న్యాయపోరాటం చేస్తుందన్న జగన్.. ఎన్నికల సంఘం తీరుకు వ్యతిరేకంగా ప్రతిపక్షాలు చేపడుతున్న ఆందోళనలకు బేషరతు మద్దతు ప్రకటించారు. జాతీయ స్థాయిలో ఎన్నికల పారదర్శకతను కోరుతూ జరుగుతున్న ఈ ఉద్యమంలో భాగస్వామ్యం కావడం ద్వారా ఆయన ఇండియా కూటమి వైపు మొగ్గు చూపుతున్నాననే స్పష్టమైన సంకేతాలు ఇచ్చారు. ఇప్పటివరకు కేంద్రంలోని బీజేపీ నాయకత్వంతో సత్సంబంధాలు కొనసాగిస్తూ వచ్చిన జగన్ ఒక్కసారిగా ఇలా ప్లేటు ఫిరాయించడంపై పరిశీలకులు సైతం విస్మయం వ్యక్తం చేస్తున్నారు. జాతీయ స్థాయిలో మోడీ సర్కార్ విధానాలను ఇంత వరకూ కనీసం మాట మాత్రంగానైనా వ్యతిరేకించని జగన్ ఒకే సారి నేరుగా ఇండియా కూటమి ఆందోళనలకు సంఘీ భావం ప్రకటించడం ఆయన బీజేపీకి దూరం జరుగుతున్నారన్న విశ్లేషణలకు తెరతీసింది. [Jagan Support India Bloc, YSJagan, National, Politics, ECI, Reforms, Ycp, Political, Stand, Telugu One]

Published on: Mon Nov 2, 2026 2:08PM