బీఆర్ఎస్ కు ముందు నుయ్యి.. వెనుక గొయ్యి!

తెలంగాణ ముఖ్యమంత్రి, బీఆర్ఎస్ అధినేత కేసీఆర్ కు ఒక దాని తరువాత ఒకటిగా సమస్యలు చుట్టుముడుతున్నాయి. ఆయన ఏ ముహూర్తాన బీఆర్ఎస్ అంటే తెరాసను జాతీయ పార్టీగా మార్చేశారో.. ఆ ముహూర్తం నుంచే ఆయనతో సమస్యలు చెడుగుడు ఆడుకుంటున్నాయి. ఇప్పటి వరకూ కేసీఆర్ పైనా, ఆయన కుటుంబ సభ్యులపైనా వచ్చిన అవినీతి ఆరోపణలు అన్నీ ఒకెత్తయితే.. ఢిల్లీ మద్యం కుంభకోణంలో కేసీఆర్ కుమార్తె కవితపై వచ్చిన అభియోగాలు, అలాగే.. టీపీఎస్సీ పరీక్ష పేపర్ల లీకేజీ వ్యవహారంలో ఆయన కుమారుడు కేటీఆర్ పై వచ్చిన, వస్తున్న ఆరోపణల తీవ్రత మాత్రం బీఆర్ఎస్ ప్రతిష్టకు, కేసీఆర్ పలుకుబడికి డ్యామేజీ జరిగేవిగానే ఉన్నాయి. ముందుగా ఢిల్లీ మద్యం కుంభకోణంలో కవితపై ఆరోపణలు, ఈడీ విచారణకు సంబంధించి జరిగిన హై డ్రామానే తీసుకుంటే.. ఇదే కేసులో ఆరోపణలు ఎదుర్కొంటూ ఇప్పటికే 12 మంది అరెస్టయ్యారు. అలా అరెస్టయిన వారిలో ఆప్ కీలక నేత, ఢిల్లీ మాజీ ఉప ముఖ్యమంత్రి మనీష్ సిసోడియా కూడా ఉన్నారు. వారెవరూ కూడా విచారణను ఎదుర్కొనడానికి వెనుకాడలేదు. బీఆర్ఎస్ ఎమ్మెల్సీ సహా ఆ పార్టీ వారంతా ఎలా అయితే ఈ ఆరోపణలూ, కేసులూ, దర్యాప్తులూ అన్నీ రాజకీయ ప్రేరేపితం అని ఆరోపిస్తున్నారో అలాగే మనీష్ సిసోడియా కూడా ఆరోపించారు. అయితే విచారణను హుందాగా ఎదుర్కొన్నారు. స్టే కోసమో, అరెస్టు చేయకుండా ఆదేశాల కోసమే కోర్టులను ఆశ్రయించలేదు. కానీ బీఆర్ఎస్ ఎమ్మెల్సీ కవిత విషయానికి వచ్చే సరికి విచారణను తప్పించుకోవడానికి చేయగలిగినన్ని ప్రయత్నాలు చేశారు. చివరకు గత్యంతరం లేక రెండో సారి ఈడీ విచారణకు హాజరయ్యారు. ఇదే విధంగా టీఎస్పీఎస్సీ పేపర్ లీకేజీ విషయంలో తనపై వచ్చిన ఆరోపణలకు సంబంధించి కేటీఆర్ కూడా డిఫెన్స్ లో పడినట్లు కనిపిస్తుంది. రాష్ట్రంలోని ప్రభుత్వ కార్యాలయాలలో కంప్యూటర్లన్నీ నా అధీనంలో ఉంటాయా అంటూ బేలగా అడుగుతున్నట్లు కనిపిస్తోంది. విపక్షాల విమర్శలకు వివరణలు ఇచ్చుకోవడానికే ఆయన సమయం అంతా కేటాయిస్తున్నారు తప్ప విమర్శలను గట్టిగా తిప్పికొట్టలేకపోతున్నారు. దీంతోనే టీపీసీసీ చీఫ్ రేవంత్ రెడ్డి కేటీఆర్ పీఏ తిరుపతిపై నేరుగా ఆరోపణలు గుప్పించారు. ఇక బండి సంజయ్ కూడా టీఎస్పీఎస్సీ పరీక్షల్లో అధిక మార్కులు టీఆర్ఎస్ నేతల పిల్లలకే వచ్చాయని ఆరోపించారు. అంతే కాదు.. ఆ వివరాలన్నీ బయటపెట్టాలంటూ డిమాండ్ చేస్తున్నారు. అటు కాంగ్రెస్, ఇటు బీజేపీ కూడా మూకుమ్మడిగా చేస్తున్న విమర్శల దాడిలో బీఆర్ఎస్ ఉక్కిరిబిక్కిరి అవుతోంది. పేపర్ల లీకేజీపై రాష్ట్ర ప్రభుత్వం సిట్ ఏర్పాటు చేసినా.. విపక్షాలు నెమ్మదించడం లేదు. సిట్ పై నమ్మకం లేదంటున్నాయి. ఏ విధంగా చూసుకున్నా ఢిల్లీ మద్యం కుంభకోణం కేసు, పేపర్ల లీకేజీ కేసీ బీఆర్ఎస్ అధినేతకు శిరోభారంగానే పరిణమించాయని చెప్పక తప్పదు. ఈడీ విచారణ విషయంలో బీఆర్ఎస్ హై డ్రామా అభాసుపాలైన సంగతి మరవక ముందే... పేపర్ల లీకేజీ విషయంలో ఆరోపణలు చేసిన రేవంత్ కు ఆధారాలివ్వాలంటూ సిట్ నోటీసు జారీ చేయడమూ అంతే అభాసుపాలయ్యింది.

Publish Date: Mar 20, 2023 3:25PM

రేవంత్ కు సిట్ నోటీసులు.. భయపడేది లేదన్న టీపీసీసీ చీఫ్

దేశ రాజధానిలో మహిళలపై దాడులు పెచ్చరిల్లాయి అన్నందుకు కాంగ్రెస్ మాజీ అధ్యక్షుడు కీలక నేత రాహుల్ గాంధీకి పోలీసులు నోటీసులు ఇచ్చారు. ఆధారాలు చూపమని, అలాగే తెలంగాణలో టీఎస్పీఎస్పీ పేపర్ లీకేజిపై అధికార పార్టీ అగ్రనేతలపై ఆరోపణలు చేసిన రేవంత్ కు నోటీసులు ఇచ్చారు పేపర్ లీకేజీ కేసు దర్యాప్తు చేస్తున్న సిట్ అధికారులు. హస్తినలో మహిళల భద్రత ప్రమాదంలో ఉందన్న మాట కాంగ్రెస్ అగ్రనేత రాహుల్ గాంధీ కొత్తగా చెప్పలేదు. అలాగే టీఎస్పీఎస్సీ పేపర్ లీకేజీలో రాష్ట్ర ఐటీ శాఖ మంత్రిపై ఆరోపణలు చేసినది రేవంత్ ఒక్కరే కాదు. బీజేపీ రాష్ట్ర అధ్యక్షుడు బండి సంజయ్ సైతం ఇవే ఆరోపణలు చేశారు. అయినా ఆరోపణలపై దర్యాప్తు చేసి నిగ్గు తేల్చాల్సిన పోలీసులు ఆరోపణలు చేసిన వారికే నోటీసులు ఇచ్చి ఆధారాలు ఇవ్వాలనడం, తాము చేయాల్సిన పనిని వదిలేయడం గానే భావించాల్సి ఉంటుంది. ఇదిలా ఉండగా కేంద్రంలో బీజేపీ, తెలంగాణలో బీఆర్ఎస్ ప్రభుత్వాలు తమపై ఆరోపణల విషయంలో స్పందించిన తీరు ఒకలాగే ఉండటం ఎంతమాత్రం కాకతాళీయం కాదని పరిశీలకులు విశ్లేషిస్తున్నారు. ఇక పోతే సిట్ నోటీసులకు భయపడేది లేదని టీపీసీసీ అధ్యక్షుడు రేవంత్ రెడ్డి స్పష్టం చేశారు. సిట్టింగ్ జడ్జితో విచారించాలన్న తన డిమాండ్ ను పునరుద్ఘాటించారు. సిట్ దర్యాప్తుపై విశ్వాసం లేదన్న ఆయన తన వద్ద ఉన్న ఆధారాలను సీట్ కు ఇచ్చే ప్రశక్తే లేదన్నారు. స్వయంగా కేసీఆర్ కేంద్రం వద్ద సీబీఐ, ఈడీ, ఐటీ వంటి సంస్థలుంటే తమకు రాష్ట్ర దర్యాప్తు సంస్థలున్నాయని ప్రకటించారనీ, అటువంటి సిట్ ను నమ్మి ఆధారాలెలా ఇస్తామని రేవంత్ అన్నారు. పేపర్ లీకేజీపై సిట్టింగ్ న్యాయమూర్తి చేత విచారణ జరిపిస్తే అప్పుడు తన వద్ద ఉన్న ఆధారాలను బయటపెడతానని స్పష్టం చేశారు.

Publish Date: Mar 20, 2023 2:58PM

ఆసుపత్రిలో ఒక బ్లాక్ కు తారకరత్న పేరు.. బాలకృష్ణ నిర్ణయం

నందమూరి బాలకృష్ణ తారకరత్న పేరు మీద గుండె జబ్బులున్న పేదలకి ఉచితంగా చేసేందుకు నిర్ణయం తీసుకున్నారు తన ఇంట్లో వచ్చిన కష్టం ఎవరికి రాకూడదు అన్న ఉద్దేశంతో హిందూపురంలో తాను ను నిర్మించిన హాస్పటల్ లో హెచ్ బ్లాక్ కి తారకరత్న పేరు పెట్టారు. అలాగే పేదలకు వైద్యం కోసం కోటీ 30 లక్షల రూపాయల విలువ చేసే సర్జికల్ పరికరాలను ఏర్పాటు చేస్తున్నారు. ఈ ఆసుపత్రిలో చిన్నపిల్లలకి ఉచిత భోజనంతో పాటు కావాల్సిన మందులు కూడా మూడు నెలల పాటు ఉచితంగా ఇవ్వనున్నారు.

Publish Date: Mar 20, 2023 2:22PM

ఇప్పుడు వైఎస్ భాస్కరరెడ్డి.. హైకోర్టులో పిటిషన్

Publish Date: Mar 20, 2023 2:13PM

టీఎస్పీఎస్సీ పేపర్ లీకేజీ.. మలుపుల మీద మలుపులు!

టీఎస్‌పీఎస్సీ పేపర్‌ లీకేజీ కేసు రోజుకో మలుపు తిరుగుతోంది. టౌన్‌ ప్లానింగ్ ఎగ్జామ్‌ పేపర్‌ మొదలు గ్రూప్‌ 1 వరకు పలు పరీక్షా పత్రాలు లీక్‌ అయినట్లు అధికారులు గుర్తించారు. దీంతో పలు పరీక్షలను రద్దు చేస్తూ టీఎస్‌పీఎస్సీ నిర్ణయం తీసుకున్న విషయం తెలిసిందే. ఈ కేసును ప్రతిష్టాత్మకంగా తీసుకున్న పోలీసులు ఇప్పటికే 9 మందిని అరెస్టు చేసి విచారిస్తున్నారు. విచారణలో విస్తుపోయే నిజాలు బయటకు వస్తున్నాయి. గ్రూప్ 1 పేపర్‌ను రాజశేఖర్ చాలా మందికి విక్రయించినట్లు ఈ కేసు దర్యాప్తు చేస్తున్న సిట్ అనుమానం వ్యక్తం చేస్తోంది. గ్రూప్ 1 రాసిన వారిలో విదేశాల నుంచి ఇద్దరు ఉన్నట్లు అధికారులు గుర్తించారు. వీళ్లను కూడా విచారించేందుకు సిట్‌ రెడీ అవుతోంది. గత ఏడాది అక్టోబర్ నుంచే పేపర్ల లీక్ మొదలైనట్లు అధికారులు అనుమానాలు వ్యక్తం చేస్తున్నారు. కరీంనగర్‌కు చెందిన ఆరుగురికి రాజశేఖర్‌ గ్రూప్ 1 పేపర్‌ ముందుగానే రాజశేఖర్ ద్వారా అందినట్లు సిట్ అధికారులు చెబుతున్నారు. ఇలా అందుకున్న వారిలో నలుగురు ఎన్‌ఆర్‌ఐలతో పాటు మరో ఇద్దరు స్థానికులు గ్రూప్‌1 పరీక్షలు రాసిసనట్లు అధికారులు గుర్తించారు. పరీక్షలు రాయడానికి నలుగురు ఎన్‌ఆర్‌ఐలు విదేశాల నుంచి వచ్చారు. పేపర్‌ అమ్మడం ద్వారా వచ్చిన డబ్బులను రాజశేఖర్‌ స్నేహితులు, బంధువుల ఖాతాలో జమ చేసినట్లు గుర్తించిన సీట్ ఆ విషయంపై దర్యాప్తు సాగిస్తోంది. అదలా ఉంటే.. టీఎస్‌పీఎస్‌సీ అక్టోబర్‌ తర్వాత 7 పరీక్షలు నిర్వహించింది. దీంతో ఈ 7 పరీక్షల్లో టాప్ మార్క్స్ సాధించిన 500 మందిని విచారించేందుకు సైతం సిట్ సమాయత్తమౌతోంది.

Publish Date: Mar 20, 2023 12:42PM

పులివెందుల.. జగన్ కు ఇక దూరమేనా?

వైసీపీ అధినేత, ఏపీ ముఖ్యమంత్రి వైయస్ జగన్ కు ఇంత కాలం పెట్టని కోటగా ఉన్న పులివెందుల ఇక దూరమైనట్లేనా? తన సొంత నియోజకవర్గంలో జగన్ పట్టు కోల్పోతున్నారా? ఇంత కాలం బ్రహ్మరథం పట్టిన నియోజకవర్గ ప్రజలు ఇక ఆయనను దూరం పెట్టనున్నారా? సొంత నియోజకవర్గం పులివెందుల్లోనే జగన్ తన పట్టు, ప్రతిష్ట కోల్పోతున్నారా అంటే తాజా పరిణామాలను గమనిస్తే ఔననే అనాల్సి వస్తోందని పరిశీలకులు చెబుతున్నారు. మార్చి 15వ తేదీన.. పులివెందుల్లో చోటు చేసుకున్న పరిణామాలను ఇందుకు ఉదాహరణగా చూపుతున్నారు. నాలుగేళ్ల కిందట.. సరిగ్గా చెప్పాలంటే మార్చి 15, 2019న జగన్ సొంత బాబాయ్ వైఎస్ వివేకానందరెడ్డి పులివెందులలోని తన సొంత నివాసంలో దారుణ హత్యకు గురయ్యారు. ఆ దారుణ హత్య జరిగిన మార్చి 15, 2023 నాటికి నాలుగేళ్లు పూర్తయ్యింది. ఈ సందర్భంగా వైఎస్ వివేకా కుమార్తె డాక్టర్ సునీత పులివెందుల్లోని తండ్రి సమాధిని సందర్శించి ఘనంగా నివాళులర్పించారు. అనంతరం ఆమె మీడియాతో మాట్లాడుతూ.. తన తండ్రి హత్య వెనుక ఉన్న పాత్రధారులు, సూత్రధారులెవరన్న దానిపై పలు వ్యాఖ్యలు చేశారు. ఆ తర్వాత పులివెందులలో ఏర్పాటు చేసిన వివేకా వర్థంతి కార్యక్రమంలో ఆమెతో పాటు వైఎస్ ఫ్యామిలీకి చెందిన కొద్ది మంది హాజరయ్యారు. అదలా ఉంటే.. వైయస్ వివేకా వర్థంతి సందర్భంగా పులివెందుల్లోని వివేకా అభిమానులు భారీ ఎత్తున ఫ్లెక్సీలు ఏర్పాటు చేశారు. ఆ ఫ్లెక్సీల్లో వైఎస్ కుటుంబ సభ్యులు దివంగత ముఖ్యమంత్రి, డాక్టర్ వైఎస్ రాజశేఖరరెడ్డి, ఆయన భార్య విజయమ్మ, వారి కుమార్తె షర్మిల, వివేకా కుమార్తె సునీతతోపాటు వైయస్ రాజశేఖర్ రెడ్డి తల్లిదండ్రులు వైయస్ రాజారెడ్డి దంపతుల ఫొటోలు మాత్రమే ఉన్నాయి. ముఖ్యమంత్రి వైఎస్ జగన్ ఫొటో కు ఆ ఫ్లెక్సీలలో స్థానం లేకుండా పోయింది. అలాగే కడప ఎంపీ వైఎస్ అవినాష్ ఫొటో కూడా ఆ ఫ్లెక్సీలలో కనిపించలేదు. వివేకా హత్య కేసులో కడప ఎంపీ అవినాష్ రెడ్డి, ఆయన తండ్రి భాస్కరరెడ్డిలపై అనుమానాలు వ్యక్తమౌతున్నాయి. వైఎస్ వివేకా హత్య కేసు విచారణ తెలంగాణ రాష్ట్రానికి మారిన తరువాత సీబీఐ దర్యాప్తు వేగం పుంజుకుంది. దర్యాప్తులో వెల్లడౌతున్న అంశాల ఆధారంలో కడప ఎంపీ అవినాష్ రెడ్డి, ఆయన తండ్రి భాస్కరరెడ్డిలపై సర్వత్రా అనుమానాలు వ్యక్తమౌతున్నాయి. ఈ కేసులో సక్ష్యాలను మాయం చేశారన్న ఆరోపణలు ఎదుర్కొంటున్న అవినాష్ రెడ్డికి ముఖ్యమంత్రి జగన్ అండ.. దండ మెండుగా ఉన్నాయన్న ప్రచారం జోరుగా సాగుతోంది. ఆ క్రమంలోనే సునీత... తన తండ్రి హత్య లో పాత్రధారులు, సూత్రధారుల బండారం బయటకు రావాల్సిందే అంటూ ఒంటరి పోరాటం చేస్తున్నారని కూడా చర్చ జరుగుతోంది. ఆ క్రమంలో తండ్రి హత్య కేసు.. సీబీఐ చేపట్టడంతోపాటు ఈ కేసు విచారణ మరో రాష్ట్రానికి బదిలీ చేయడం కోసం సునీత చేసిన ప్రయత్నాలన్నీ తెలుగు సమాజం కళ్లారా చూసింది. అయితే ఇంటి ఆడపడుచు ఇంతగా పోరాటం చేస్తున్నా.. సోదరడు ప్లస్ ముఖ్యమంత్రి జగన్ కానీ.. ఆయన ప్రభుత్వం కానీ వీసమెత్తు సహాయ సహకారాలు ఆమెకు అందించ లేదు. అదీకాక.. ఈ హత్య కేసులో వివేకా కారు మాజీ డ్రైవర్ దస్తగిరి అప్రూవర్‌గా మారి చెప్పిన సంగతులన్నీ.. విని తెలుగు సమాజం తీవ్ర దిగ్బ్రాంతికి గురైంది. అలాంటి పరిస్థితుల్లో ఈ హత్య కేసులో దోషులు ఎవరో అధికారికంగా ప్రకటించకపోయినా.. సీబీఐ అధికారులకు దస్తగిరి ఇచ్చిన వాంగ్మూలం మనసా వాచా కర్మణ నిజమని నమ్ముతూ.. వివేకా అభిమానులు ఇలా ఫ్లెక్సీల ఏర్పాటు చేశారని రాజకీయ విశ్లేషకులు అభిప్రాయం వ్యక్తం చేస్తున్నారు. అదీ కాక పులివెందుల మొత్తం వివేకా కుమార్తె డాక్టర్ సునీతకు సానుభూతి వ్యక్తం చేస్తూ ఆమెకు అండగా నిలుస్తున్నారని కూడా అంటున్నారు. ఫ్లెక్సీలలో ఫొటోలే లేకపోవడమే కాకుండా, ఇటీవల జరిగిన పట్టభద్రుల ఎమ్మెల్సీ ఎన్నికలలో కూడా అధికార వైసీపీ ఇక్కడ బాగా వెనుకబడటం కూడా ఇందుకు నిదర్శనంగా పరిశీలకులు విశ్లేషిస్తున్నారు.

Publish Date: Mar 20, 2023 12:31PM

హాజరయ్యారు.. ఇక అరెస్టేనా?

ఢిల్లీమద్యం కుంభకోణంలో అనుమానితురాలిగా ఆరోపణలు ఎదుర్కుంటున్న బీఆర్ఎస్ ఎమ్మెల్సీ, తెలంగాణ ముఖ్యమంత్రి కల్వకుట్ల చంద్ర శేఖర రావు కుమార్తె, కల్వకుట్ల కవిత సోమవారం ( మార్చి 20) ఎన్‌ఫోర్స్‌మెంట్ డైరెక్టరేట్ (ఈడీ) అధికారుల ముందు విచారణకు హాజరయ్యారు. నిజానికి మార్చి 16నే ఈడీ విచారణకు హాజరు కావాల్సి ఉన్నా, ఆమె డుమ్మా కొట్టారు. ఈ నేపథ్యంలోనే సోమవారం (మార్చి 20) ఆమె హాజరు అవుతారా, లేదా ? అనే అనుమానాలు ఆఖరి నిముషం వరకూ కొనసాగాయి. అయితే ఈ అనుమానాలకు ముగింపు పలుకుతూ కవిత ఈడీ కార్యాలయానికి వెళ్లారు. ఇంతకు ముందు మార్చి 11న ఆమెను ప్రశ్నించిన అధికారులు... మార్చి 16న మరోసారి ప్రశ్నించేందుకు సిద్ధమయ్యారు. ఐతే.. ఆమె ఈడీ కార్యాలయానికి తాను రాకుండా, తన బదులు లాయర్‌ను పంపారు. దాంతో.. ఈడీ అధికారులు ఆమెకు మరోసారి నోటీస్ పంపారు. మార్చి 20న వ్యక్తిగతంగా హాజరుకావాలని ఆ నోటీసులో పేర్కొన్నారు. దీంతో.. ఆదివారం (మార్చి 19) సాయంత్రం, కవిత ఢిల్లీకి బయలుదేరి వెళ్లారు. సోమవారం (మార్చి 20) వ్యక్తిగతంగా హాజరయ్యారు. ఆదివారం (మార్చి 19) ప్రత్యేక విమానంలో బేగంపేట్ నుంచి ఢిల్లీ వెళ్లిన కవితతో పాటు ఆమె భర్త అనిల్, సోదరుడు, మంత్రి కేటీఆర్ , రాజ్యసభ సభ్యుడు జోగినపల్లి సంతోష్ కుమార్, వద్దిరాజు రవిచంద్ర తదితరులు కూడా వెళ్లారు. ప్రస్తుతం వారంతా ఢిల్లీ తుగ్లక్ రోడ్డులోని తెలంగాణ ముఖ్యమంత్రి కేసీఆర్ నివాసంలో ఉన్నారు. కవితకు తాను బినామీని అని హైదరాబాద్ వ్యాపారి రామచంద్ర పిళ్లై చెప్పడంతో... ఆ స్టేట్‌మెంట్ ఆధారంగా ఈడీ అధికారులు కవితను ప్రశ్నిస్తున్నారు. ఈ విచారణ తర్వాత ఈడీ అధికారులు ఆమెను మరోసారి విచారణకు రమ్మంటారా లేక ఆమె విచారణను ఈరోజుతో ముగిస్తారా లేక ఆమెను అరెస్టు చేస్తారా, అన్న ప్రశ్నలకు మరి కొద్ది సేపటిలో సమాధానం దొరుకుతుంది. అయితే కవితను వెంటనే అరెస్ట్ చేసే అవకాసం ఉండక పోవచ్చని, విచారణన్ సమయంలో ఆమె సహకరించారా లేదా అన్న దాన్ని బట్టి ఈడీ నిర్ణయం ఉంటుందని న్యాయ నిపుణులు అంటున్నారు. కవిత విచారణకు సహకరిస్తారనే విశ్వాసం కలిగితే ఈడీ అధికారులు, ఇదే విధంగా మరి కొన్ని సార్లు ఆమెను విచారించిన తర్వాతనే అరెస్ట్ పై నిర్ణయం తీసుకుంటారని అంటున్నారు.

Publish Date: Mar 20, 2023 12:04PM

ఆ నలుగురు.. ఏం చేస్తారు?

Publish Date: Mar 20, 2023 11:45AM

పట్టభద్ర ఎమ్మెల్సీ ఎన్నికలలో ఓటమిని అంగీకరిస్తున్నామన్న బాలినేని

కొంచం ఆలస్యంగానైనా వైసీపీకి వాస్తవం బోధపడినట్లు కనిపిస్తోంది. ఇప్పటి వరకూ ప్రభుత్వ సలహాదారు సజ్జల సహా మాట్లాడిన వారంతా పట్టభద్రులు మా ఓటర్లు కాదు, సమాజంలో వారు చిన్న సెక్షన్ మాత్రమే అంటూ వచ్చారు. కానీ తొలి సారిగా ఆ పార్టీ సీనియర్ నేత, మాజీ మంత్రి, ఒంగోలు ఎమ్మెల్యే, అన్నిటికీ మించి ముఖ్యమంత్రి జగన్ కు బంధువు అయిన బాలినేని శ్రీనివాసరెడ్డి పట్టభద్రుల్లో, ఉపాధ్యాయుల్లో మా ప్రభుత్వం పట్ల అసంతృప్తి ఉందని ఈ ఎన్నికలు నిరూపించాయని అంగీకరించారు. అయితే అంత మాత్రాన తెలుగుదేశం సంబరాలు చేసేసుకోవలసిన అవసరం ఏముందని ప్రశ్నించారు. పట్టభద్రుల ఎన్నికల్లో ఓటమిపై సమీక్షించుకుని ముందుకు వెళతామని ఆయన అన్నారు. పట్టభద్ర ఎమ్మెల్సీ ఎన్నికల్లో ఓటమిని అంగీకరిస్తున్నామని, ఉద్యోగులు, ఉపాధ్యాయులు అసంతృప్తిగా ఉన్నట్టు ఈ ఎన్నికల్లో అర్థమయిందని వ్యాఖ్యానించారు. రాష్ట్ర ఓటర్లలో వీరు కేవలం రెండు శాతం మాత్రమేననీ, అయినా ఓ మూడు ఎమ్మెల్సీ సీట్లకే రాష్ట్రంలో అధికారం చేపట్టేసినట్లు టీడీపీ నేతలు సంబరపడిపోవడం హాస్యాస్పదంగా ఉందని బాలినేని ఎద్దేవా చేశారు. 2024 అసెంబ్లీ ఎన్నికల్లో వైసీపీ విజయం ఖాయమని ధీమా వ్యక్తం చేశారు.

Publish Date: Mar 20, 2023 11:20AM

ఏపీ అసెంబ్లీలో డిష్యూం డిష్యూం

ఆంధ్రప్రదేశ్ అసెంబ్లీలో వైసీపీ, టీడీపీ ఎమ్మెల్యేల మధ్య ఘర్షణ జరిగింది. బాహాబాహీకి దిగారు. జీవో నంబర్ 1 రద్దు చేయాలన్న డిమాండ్ తో తెలుగుదేశం సభ్యులు స్పీకర్ పోడియంను చుట్టుముట్టారు. దీంతో ఆయన తన స్థానం నుంచి లేని లోనికి వెళ్లిపోయారు. ఆ సందర్భంగా తెలుగుదేశం, వైసీపీ సభ్యుల మధ్య తీవ్ర వాగ్వాదం ఘర్షణకు దారి తీసింది. తెలుగుదేశం ఎమ్మెల్యే డోలా శ్రీబాల వీరాంజనేయ స్వామి, వైసీపీ ఎమ్మెల్యే సుధాకర్ లు ఒకరితో ఒకరు తలపడ్డారు. దీంతో సభలో తీవ్ర గందరగోళ పరిస్థితి ఏర్పడటంతో తిరిగి వచ్చిన స్పీకర్ సభను వాయిదా వేశారు. అయినా తెలుగుదేశం సభ్యులు అసెంబ్లీ వెల్‌లో కూర్చొని నిరసన చేపట్టారు.

Publish Date: Mar 20, 2023 11:04AM

కాంగ్రెస్ గెలుస్తుంది.. నేనే సిఎం.. రేవంత్ ధీమా ఏంటి?

Publish Date: Mar 20, 2023 10:05AM

వైసీపీ కాదు.. వై ఛీ పీ.. ఇది జనం మాట.. చంద్రబాబు

పట్టభద్రులు ఇచ్చిన తీర్పు వచ్చే ఎన్నికలలో జగన్ ఎదుర్కొనబోయే పరాజయానికి నాంది. జనం వైసీపీని తిరస్కరించారు. ఆ పార్టీ వైసీపీ కాదు, వై ఛీపీ అని జనం అంటున్నారు. అహంకారంతోఅహంకారంతో విర్రవీగుతున్న జగన్ రెడ్డికి పట్టభద్రులు గుణపాఠం చెప్పారు. రాజ్యాంగ వ్యవస్థలను నిర్వీర్యం చేసి, అరాచకత్వమే పాలన అనుకుంటున్న జగన్ రెడ్డి ప్రభుత్వానికి పట్టభద్రులు కొర్రు కాల్చి వాత పెట్టారు. ఇంతటి అరాచకత్వాన్ని తాను జీవితంలో చూడలేదని తెలుగుదేవం అధినేత నారా చంద్రబాబునాయుడు అన్నారు. పశ్చిమ రాయలసీమ నియోజకవర్గ పట్టభద్రుల నియోజకవర్గం నుంచి తెలుగుదేశం అభ్యర్థి భూమిరెడ్డి రామగోపాల్ రెడ్డి విజయం సాధించారు. ఇది అధికార వైసీపీకి కచ్చితంగా జీర్ణించుకోవడానికి సాధ్యం కాని విషయమే. అయినా తప్పదు వాస్తవాన్ని అంగీకరించాలి. అలా అంగీకరించేసినట్లైతే అది వైసీపీ పార్టీ ఎందుకు ఔతుంది. అందుకే తెలుగుదేశం అభ్యర్థి విజయాన్ని ప్రకటించిన రిటర్నింగ్ అధికారి కమ్ కలెక్టర్ డిక్లరేషన్ పత్రం మాత్రం ఇవ్వలేదు. అలా ఇవ్వవద్దంటూ స్వయంగా సీఎం ఫోన్ చేసి ఆమెను ఆదేశించారని చెబుతున్నారు. ఏది ఏమైనా శనివారం రాత్రి తెలుగుదేశం అభ్యర్థి విజయాన్ని ప్రకటించిన తరువాత డిక్లరేషన్ పత్రం ఏకంగా కేంద్ర ఎన్నికల సంఘం నుంచి అక్షింతలు వేసి మరీ ఆదేశించిన తరువాతే ఆదివారం మధ్యాహ్నం ఇచ్చారు. ఈ లోగా కావలసినంత హై డ్రామా నడిచింది. డిక్లరేషన్ పత్రం ఎందుకు ఇవ్వరంటూ తెలుగుదేశం శ్రేణులు ఆందోళణకు దిగాయి. దీంతో అర్ధరాత్రి వారిని విజయం సాధించిన భూమిరెడ్డి రామగోపాల్ రెడ్డి పోలీసులు అరెస్టు చేశారు. బలవంతంగా తరలించారు. తెలుగుదేశం అధినేత ఈమెయిల్ ద్వారా ఈ విషయాన్ని కేంద్ర ఎన్నికల సంఘానికి ఫిర్యాదు చేశారు. విజయం సాధించిన అభ్యర్థికి అధికారిక పత్రం ఇచ్చి తీరాలి. ఈ విషయం ఘనత వహించిన వైసీపీ అధినాయకత్వానికి తెలియకపోయినా రిటర్నింగ్ అధికారికి తప్పనిసరిగా తెలిసి ఉంటుంది. కాదు కాదు తెలిసి తీరాలి. అయినా ఆమె నిస్సహాయంగా ఉండిపోయారు. తాను విధి ప్రకారం చేయాల్సిన క్రతువును చేయకుండా మిన్నకుండిపోయారు. ఇంతా చేసి అధికార వైసీపీ ఏమైనా బావుకుందా అంటే ఏమీ లేదు. కేంద్ర ఎన్నికల సంఘం రిటర్నింగ్ అధికారికి అక్షింతలు వేసి మరీ ఆదేశాలు జారీ చేసిన తరువాత రిటర్నింగ్ అధికారి బతిమలాడుకుని మరీ భూమిరెడ్డి రామగోపాల్ రెడ్డికి డిక్లరేషన్ పత్రం ఇవ్వాల్సి వచ్చింది. ఈ మొత్తం తతంగంలో నష్టపోయినదెవరయ్యా అంటూ మళ్లీ వైసీపీయే. జగన్ ప్రభుత్వమే. ప్రభుత్వం ప్రజాస్వామ్య విరుద్ధంగా వ్యవహరిస్తోందని… ప్రజా తీర్పును కూడా లెక్క చేయకుండా అహంకారం తలకెక్కి వ్యవహరిస్తోందన్న ముద్రను మరింత బలంగా పడేలా చేసుకుంది. జగన్ సర్కార్ అధికారంతో ఏమైనా చేయవచ్చన్న దురహంకారంతో వ్యవహరిస్తున్న విషయం మరోసారి రాష్ట్ర ప్రజలకు కళ్లకు కట్టింది. పశ్చిమ రాయలసీమ పట్టభద్రుల నియోజకవర్గ ఎన్నికలో విజయం తెలుగుదేశం పార్టీకి నిజంగా ఒక నైతిక బలాన్ని ఇచ్చింది. ముఖ్యమంత్రి వైఎస్ జగన్ రెడ్డి ఇలాకా పులివెందులలో సైతం తెలుగుదేశం అభ్యర్థి ఘనమైన మెజారిటీ సాధించారు. అలాగే వైసీపీకి కంచుకోటగా ముద్రపడిన పులివెందులలో ఆ పార్టీకి జనం పెట్టిన వాత కీలెరిగిపెట్టిన చందంగా ఉంది. ఇక పట్టభద్రుల ఎమ్మెల్సీ మూడు స్థానాలలోనూ తెలుగుదేశం అభ్యర్థులు విజయం సాధించడం ఆ పార్టీ శ్రేణుల్లో నూతనోత్సాహం వెల్లి విరుస్తోంది. ఆ పార్టీ అధినేత చంద్రబాబు నాయుడు ఆదివారం (మార్చి 19)న ఏర్పాటు చేసిన మీడియా సమావేశంలో ఆయన ప్రసంగంలో ఈ సంగతి ప్రస్ఫుటంగా ప్రతిఫలించింది. ముఖ్యంగా పశ్చిమ రాయలసీమలో భూమిరెడ్డి రామగోపాల్ రెడ్డి విజయం వైసీపీపై ప్రజలలో వ్యక్తమౌతున్న ఆగ్రహానికి అద్దంపట్టినట్లుగా ఉంది. అందుకే చంద్రబాబు ఈ విజయాన్ని ప్రజా విజయంగా అభివర్ణించారు. జగన్ రెడ్డి సర్కార్ పై ప్రజల తిరుగుబాటుగా ఆయన పట్టభద్రుల ఎమ్మెల్సీ ఎన్నికలలో విజయాన్ని పేర్కొన్నారు. చైతన్యం, బాధ్యతతో వచ్చి ప్రజలు ఎమ్మెల్సీ ఎన్నికల్లో ఓట్లు వేశారని తెలిపారు. ఉగాది పంచాంగాన్ని ప్రజలు రెండ్రోజులు ముందే చెప్పారని చంద్రబాబు అన్నారు.నాలుగేళ్ల జగన్ రెడ్డి పాలనలో రాజ్యాంగ వ్యవస్థలను నిర్వీర్యం చేశారనీ, విధ్వంస పాలన చేశారని చంద్రబాబు విమర్శించారు. ఒక్క చాన్స్ అంటూ గద్దెనెక్కిన జగన్ రెడ్డికి జనం మరో చాన్స్ ఇవ్వరనీ, వచ్చే ఎన్నికలలో జగన్ పార్టీ గెలిచే పరిస్థితి లేదనీ చెప్పారు. జగన్ బాధ్యతలేని వ్యక్తి అని, మోసాలు చేయడంలో దిట్ట అని పేర్కొన్నారు. తాత్కాలికంగా ఇబ్బందులు ఉన్నప్పటికీ, టీడీపీది జనబలం అని చంద్రబాబు ధీమా వ్యక్తం చేశారు.

Publish Date: Mar 19, 2023 4:28PM

పది మంది మంత్రులకు పదవీ గండం?

ఎంకి పెళ్లి సుబ్బి చావు కొచ్చింది అంటే ఇదే నేమో.. ఆంధ్ర ప్రదేశ్ ఎమ్మెల్సీ ఎన్నికలలో పట్టభద్రులు అధికార వైసీపీకి కొర్రుకాల్చి వాత పెట్టారు. గట్టిగా మొట్టి కాయలు వేశారు. మీటలు నొక్కి , వై నాట్ 175? అని మురిసి పోతున్న అహంకారానికి కళ్లెం వేశారు. మూడు పట్టభద్రుల నియోజక వర్గాలకు ఎన్నికలు జరిగితే, మూడింటికి మూడు నియోజక వర్గాల్లోనూ అధికార పార్టీ అభ్యర్ధులను పట్టభద్రులు చిత్తు చిత్తుగా ఓడించారు. ఒక్క ఛాన్స్ ముఖ్యమంత్రికి చుక్కలు చూపించారు. అధికార పార్టీ అభ్యర్ధులు ఓడిపోతే ఓడి పోయారు, ఏ స్వతంత్ర అభ్యర్దులో,అధికార పార్టీ రహస్య మిత్రపక్షం, బీజేపీ అభ్యర్దులో గెలిచారా అంటే అదీ లేదు. నిజానికి, జగన్ రెడ్డితో అంటకాగుతున్న బీజేపీ మరింత గట్టిగా వాతలు పెట్టారు. ఏపీలో బీజేపీకి ఉనికి లేదని మరో మారు రుజువు చేశారు. ప్రధాన ప్రతిపక్షం తెలుగు దేశం పార్టీ బలపరిచిన అభ్యర్ధులు విజయ కేతనం ఎగరేశారు. చివరకు ముఖ్యమంత్రి సొంత గడ్డ పులివెందుల అసెంబ్లీ నియోజక వర్గంలోనూ పట్టభద్రులు .. జగన్ రెడ్డికి బై ..బై చెప్పేశారు. సహజంగానే, ఈ ఓటమి అధికార పార్టీలో గుబులు రేపుతోంది. ప్రతికూల ఫలితాలు కాక పుట్టిస్తున్నాయి. ముఖ్యంగా మంత్రుల గుండెల్లో రైళ్ళు పరిగెడుతున్నాయి. నిజానికి, ఎమ్మెల్సీ ఎన్నికల్లో వైసీపీ ఓటమిని ముఖ్యమంత్రి జగన్ రెడ్డి ముందుగానే పసిగట్టారో ఏమో కానీ, మంత్రులను మాత్రం ముందుగానే హెచ్చరించారు. ముఖ్యంగా, ఉత్తరాంధ్ర పట్టభద్రుల నియోజక వర్గంలో ఓటమి ఎదురైతే, మంత్రులపై వేటు తప్పదని, ముఖ్యమంత్రి ముందుగానే హెచ్చరించారు. అయితే ఇప్పడు ఒక ఒక్క ఉత్తరాంద్రలోనే కాదు, పశ్చిమ రాయలసీమలో, వైసీపీకి తిరుగులేదనుకున్న ఒంగోలు,నెల్లూరు,చిత్తూరు జిల్లాలోనూ ప్రతికూల ఫలితాలే వచ్చాయి. దీంతో ముఖ్యమంత్రి ఎలాంటి నిర్ణయం తీసుకుంటారో, ఎవరిపై వేటు వేస్తారో అని, ఓటమి ఎదురైన తొమ్మిది జిల్లాల మంత్రులు భయంతో వణికి పోతున్నారు. నిజానికి ముఖ్యమంత్రి జగన్ రెడ్డి గురించి తెలిసిన వారు, ఈ ఓటమిని జగన్ రెడ్డి జీర్ణించు కోలేరని, అదే సమయంలో ఓటమికి తనదే బాధ్యతని ఒప్పుకునే నాయకత్వ లక్షణాలు, వ్యక్తిగత హుందాతనం ఆయనలో లేవని, అందుకే ఆయన మంత్రులను బలిపశువులను చేయడం ఖాయమని అంటున్నారు. ఉత్తరాంధ్రకు చెందిన సీదిరి అప్పలరాజు, బొత్స సత్యనారాయణ, ధర్మాన ప్రసాదరావు, గుడివాడ అమర్నాథ్‌లతో పాటుగా మొత్తం పది మంది వరకు మంత్రుల పదవులకు గండం పొంచి ఉందన్న అభిప్రాయం వినిపిస్తోంది. ముఖ్యంగా మీటలు నొక్కితే ఓట్లు రాలతాయనే భ్రమల్లో ఉన్న ముఖ్యమంత్రి, గతంలోనూ తాను చేయవలసిన పని (మీటలు నొక్కడం) తాను చేస్తున్నాని, అయినా నియోజక వర్గాల్లో ప్రతికూల పరిస్థితులు కొనసాగితే సిట్టింగ్ ఎమ్మెల్యేలకు టికెట్ ఇచ్చేదిలేదని హెచ్చరించిన విషయాన్ని పార్టీ నాయకులు ఈ సందర్భంగా గుర్తు చేస్తున్నారు. అందుకే ముఖ్యమంత్రి జగన్ రెడ్డి ఎన్నికలు జరిగిన తొమ్మిది జిల్లాల్లోని మంత్రులందరికి ఉద్వాసన పలికినా పలుకుతారని అంటున్నారు. ఆలాగే సిట్టింగ్ ఎమ్మెల్యేలకు టికెట్ విషయంలో పునరాలోచించే అవకశం లేక పోలేదని అంటున్నారు. అదలా ఉంటే ఇంచు మించుగా వందకు పైగా అసెంబ్లీ నియోజక వర్గాల పరిధిలో ఓటరు నాడిని పట్టి ఇచ్చిన ఎమ్మెల్సీ ఎన్నికల ఫలితాలు ముఖ్యమంత్రి జగన్ రెడ్డి, వై నాట్ 175..? ప్రశ్నకు సరైన సంధానం ఇచ్చాయని అంటున్నారు.

Publish Date: Mar 19, 2023 3:36PM

సుప్రీంలో కవిత పిటిషన్ పై ఈడీ కేవియెట్

ఢిల్లీ లిక్కర్ స్కామ్ కేసులో ఈడీ దర్యాప్తును సవాల్ చేస్తూ బీఆర్ఎస్ ఎమ్మెల్సీ కవిత సుప్రీంకోర్టును ఆశ్రయించిన విషయం తెలిసిందే. కవిత పిటిషన్ ఈ నెల 24వ తేదీన సుప్రీంకోర్టులో విచారణకు రానుంది. అయితే కవిత పిటిషన్‌కు సంబంధించి కేంద్ర దర్యాప్తు సంస్థ ఈడీ సుప్రీంకోర్టులో శనివారం (మార్చి 18) కేవియట్ పిటిషన్ దాఖలు చేసింది. ఎమ్మెల్సీ కవిత పిటిషన్‌పై తమ వాదనలు కూడా వినాలని ఈడీ పిటిషన్‌లో కోరింది. అంతేకాకుండా కవిత కేసు విషయంలో ఎలాంటి ముందస్తు ఆదేశాలు ఇవ్వొద్దని.. తమ వాదన కూడా విన్న తర్వాతే నిర్ణయం తీసుకోవాలని ఈడీ ఆ పిటిషన్‌లో కోరింది. ఇక ఈడీ తాజాగా కేవియట్ పిటిషన్‌తో దాఖలు చేయడంతో సుప్రీంకోర్టు కవిత వాదనతో పాటు ఈడీ వాదనలు కూడా విననుంది. ఆ తర్వాతే కవిత పిటిషన్‌పై సుప్రీంకోర్టు తీర్పు వెలువరించనుంది. దేశ వ్యాప్తంగా సంచలన సృష్టిస్తోన్న ఢిల్లీ లిక్కర్ స్కామ్‌‌లో ఆరోపణలు ఎదుర్కొంటున్న కవిత.. ఈ నెల 11వ తేదీన ఈడీ ఎదుట విచారణకు హాజరయ్యారు. 16‌వ తేదీన మరోసారి విచారణకు రావాలని ఈడీ పిలిచింది. అయతే సుప్రీంకోర్టులో పిటిషన్ దాఖలు చేసిన నేపథ్యంలో ఆమె 16వ తేదీన విచారణకు హాజరు కాలేదు. దీంతో ఈ నెల 20వ తేదీన మరోసారి విచారణకు హాజరు కావాలని నోటీసులు జారీ చేసింది.

Publish Date: Mar 19, 2023 9:14AM

బీజేపీలో చేరితే అవినీతి పరులు పునీతులైపోతారా అమిత్ షా జీ?

Publish Date: Mar 19, 2023 9:08AM

Food

Health

Ladie's corner

Devotional

Nri

బీఆర్ఎస్ కు ముందు నుయ్యి.. వెనుక గొయ్యి!

రేవంత్ కు సిట్ నోటీసులు.. భయపడేది లేదన్న టీపీసీసీ చీఫ్

ఆసుపత్రిలో ఒక బ్లాక్ కు తారకరత్న పేరు.. బాలకృష్ణ నిర్ణయం

ఇప్పుడు వైఎస్ భాస్కరరెడ్డి.. హైకోర్టులో పిటిషన్

టీఎస్పీఎస్సీ పేపర్ లీకేజీ.. మలుపుల మీద మలుపులు!

పులివెందుల.. జగన్ కు ఇక దూరమేనా?

హాజరయ్యారు.. ఇక అరెస్టేనా?

ఆ నలుగురు.. ఏం చేస్తారు?

పట్టభద్ర ఎమ్మెల్సీ ఎన్నికలలో ఓటమిని అంగీకరిస్తున్నామన్న బాలినేని

ఏపీ అసెంబ్లీలో డిష్యూం డిష్యూం

కాంగ్రెస్ గెలుస్తుంది.. నేనే సిఎం.. రేవంత్ ధీమా ఏంటి?

వైసీపీ కాదు.. వై ఛీ పీ.. ఇది జనం మాట.. చంద్రబాబు

పది మంది మంత్రులకు పదవీ గండం?

సుప్రీంలో కవిత పిటిషన్ పై ఈడీ కేవియెట్

బీజేపీలో చేరితే అవినీతి పరులు పునీతులైపోతారా అమిత్ షా జీ?

ALSO ON TELUGUONE NEWS

Rss Feeds

Copyright © 2023 TeluguOne NEWS - All Rights Reserved

Disclaimer:

You may not copy, reproduce, distribute, publish, display, perform, modify, create derivative works, transmit, or in any other way exploit any part of copyrighted material without permission from ObjectOne Information Systems Ltd or our associates.