Home  
Politics

ఐపీఎల్ 6 ఫిక్సింగ్ : చెన్నై సీఈవో గురునాథ్ అరెస్ట్

        భారత క్రికెట్ సంఘం సారథి ఎన్.శ్రీనివాసన్ అల్లుడు, చెన్నై సూపర్ కింగ్స్ సీఈవో గురునాథ్ ను ముంబై పోలీసులు అరెస్టు చేశారు. గురునాథ్ మేయప్పన్ మదురై నుంచి ముంబై రాగానే... దాదాపు మూడు గంటలు ప్రశ్నించి... అర్ధరాత్రి సమయంలో అరెస్టు చేసినట్లు ప్రకటించారు. విందూ దారాసింగ్‌తో బంధంపై పక్కా ఆధారాలు సేకరించిన తర్వాతే ఈ నిర్ణయం తీసుకున్నారు. గురునాథ్ బాలీవుడ్ నటుడు, ఈ కేసులో ఇప్పటికే అరెస్టయిన విందూ దారాసింగ్‌తో సన్నిహిత సంబంధాలు నడిపారు. విందూ ద్వారా గురునాథ్ భారీగా బెట్టింగ్‌లకు పాల్పడినట్లు పోలీసులు చెబుతున్నారు. గురునాథ్ ఒక జట్టు యజమానికి అల్లుడై ఉండి, ఆ జట్టు సీఈవోగా వ్యవహరిస్తూ బెట్టింగ్‌లకు పాల్పడటం గమనార్హం. శుక్రవారం తమ ముందు హాజరు కావాల్సిందిగా ముంబై క్రైమ్ బ్రాంచ్ పోలీసులు గురునాథ్‌కు గురువారం సమన్లు జారీ చేశారు. ఆయన సోమవారం వరకు గడువు కోరినప్పటికీ... పోలీసులు అంగీకరించలేదు.

ప్రజాసేవలో తండ్రీ కొడుకులు

  సినిమాలలో ఒంటి చేత్తో వందమందిని చిదగోట్టేసే రామ్ చరణ్ తేజ్, తనకు దారీయని ఇద్దరు సాఫ్ట్ వేర్ ఇంజనీర్లను పోలీసు స్టేషన్ కి ఈడ్చి వారి ఉద్యోగాలు పోగొట్టడం ఇష్టం లేక, ఏదో లైట్ గా చిన్న కోటింగు మాత్రమే ఇచ్చి వదిలేసి తన విశాల హృదయం ప్రదర్శించుకొన్నాడు. సామాన్య ప్రజల పట్ల అతనికున్న అభిమానం అటువంటిది మరి. అందుకు ప్రజలు సర్వదా అతనికి రుణపడి ఉండక తప్పదు. మళ్ళీ ఎప్పుడయినా అతను ఇంట్లోంచి బయలు దేరినప్పుడు మేకల మందల్లాంటి ప్రజలు పొరపాటున కూడా ఆయన కారుకి అడ్డం రాకూడదని, వస్తే ఏమవుతోందో అందరికీ ఇప్పుడు బాగా అర్ధమయింది కనుక మళ్ళీ తమ వల్ల అటువంటి పొరపాటు జరుగకుండా చూసుకొంటారని ఆశించవచ్చును.   ఇక, నిన్నమొన్నటి వరకు మన హృదయాలలో మెగా స్టార్ గా కొలువయిన చిరంజీవి, సామాజిక న్యాయ సూత్రాల ప్రకారమో, మరే సూత్రం ప్రకారమో మన రాష్ట్ర ప్రజల అదృష్టం కొద్దీ కేంద్ర పర్యాటక శాఖా మంత్రి అయ్యారు. ఇక ఆయన రాష్ట్రంలో పర్యాటకానికి పట్టం కడదామని పెద్ద పెద్ద ఆలోచనలు చేస్తూ ఇప్పటికే రెండు మూడు దేశాలు కూడా తిరిగి వచ్చారు. అంటే ఆయన అంతకు ముందు విదేశాలలో తిరుగలేదని కాదు. అప్పుడు నిర్మాతల ఖర్చులతో, తిరిగితే ఇప్పుడు ప్రభుత్వ ఖర్చులతో శ్రమ అనుకోకుండా విదేశాలు తిరిగి మన కోసం చాలా జ్ఞాన సముపార్జన చేసుకొని వచ్చారన్నమాట.   ఆయన ఎంతో ప్రయాస పడి, ఐక్యరాజ్యసమితి సభ్యులను అతి కష్టం మీద ఒప్పించి, హైదరాబాదు రప్పించి పార్క్ హైత్త్ హోటల్లో మూడు రోజులు పాటు ఐక్యరాజ్యసమితి అంతర్జాతీయ పర్యాటక దినోత్సవాలను ఘనంగా నిర్వహించారు. అందుకు ఆయనను ప్రశంశించక పోగా, కొందరు ఉస్మానియా విద్యార్ధులు, 3 రోజుల పర్యాటక ముచ్చట్ల కోసం రూ.2.14 కోట్ల ప్రజా ధనం చిల్లర పైసల కంటే హీనంగా ఖర్చు చేశారని ఆరోపిస్తూ ఆయన ఇంటి ముందు నిన్న సాయంత్రం ధర్నాచేసారు.   పది మంది ఐక్యరాజ్యసమితి సభ్యులకు ఒక్కో కప్పు టీకి రూ.1200ల చొప్పున రూ.2.40 లక్షలు, ఒక్కో ప్లేటు భోజనానికి రూ.3500 చొప్పున రూ.5.25 లక్షలు, వారు వై ఫి(ఇంటర్నేట్) వాడుకొన్నందుకు రూ.2.40 లక్షలు, ఫోన్ కాల్స్‌ చేసుకొన్నందుకు రూ.1.20 లక్షలు పర్యాటక శాఖా ఖర్చు చేయడం చాలా అన్యాయమంటూ, ప్రతీ చిన్నదానికీ విద్యార్ధులు లెక్కలు తీసి చెపుతూ ప్రజా ధనం వృధా చేసినందుకు వెంటనే చిరంజీవి తన పదవికి రాజీనామా చేయాలని ఆందోళన చేయబోయారు.   కానీ, వారిని పోలీసులు అరెస్ట్ చేసి, ‘పెద్దవాళ్ళని అలా నిలదీయడం తప్పునాయనలారా!’ అంటూ క్లాసు పీకి వదిలిపెట్టేసారు.   కానీ, ఉడుకు రక్తం ఉరకలేస్తున్న ఆ యువకులు అక్కడి నుండి నేరుగా సీబీఐ ఆఫీసుకు వెళ్లి, జాయింట్ డైరెక్టర్ లక్ష్మి నారాయణ చేతిలో తమ వద్ద ఉన్న ఆధారాలన్నీ పెట్టి ఈ వ్యవహారంలో చిరంజీవి పాత్రపై ఓ లుక్కేయమంటూ పిర్యాదు చేసారు. మరి, ఇప్పటికే జగన్ మోహన్ రెడ్డి, మంత్రుల, ఐఏయస్ అధికారుల, బళ్ళారి బాబుల కేసులతో క్షణం తీరిక లేకుండా ఉన్న ఆయన, ఇక మరో నెలలో తిరిగి తన హెడ్ ఆఫీసుకి వెళ్లిపోనున్న ఈ తరుణంలో, ఇక ఈ ‘మెగా కేసు’ స్వీకరిస్తారోలేదో అనుమానమే.          అయినా మన దేశంలో ఏదయినా ఒక మంచి పని మొదలుపెట్టాలని ఎవరయినా అడుగు ముందుకు వేస్తే, వారి ఉత్సాహం మీద నీళ్ళు జల్లే ఇటువంటి వారు చాలా మందే ఉంటారు గనుక, పర్యాటక శాఖా మంత్రి గారు ఇవన్నీ పట్టించుకోకుండా మిగిలిన ఈ పది నెలల్లో మరిన్ని విదేశీ పర్యటనలు చేసి, ఇటువంటివి మరనేక సదస్సులు మరింత ఘనంగా నిర్వహించాలని కోరుకొందాము.   వెదవ డబ్బు కోసం ఇంత రచ్చ చేయాలా? నెలకి మరో రెండు సర్ చార్జీలు తగిలిస్తే ప్రజలే ఎంత కావాలంటే అంతా కక్కుతారు కదా!

టీడీపీ కార్యాలయానికి దేవినేని ఉమా తమ్ముడు తాళం

        కృష్ణా జిల్లా టీడీపీ అధ్యక్షుడు దేవినేని ఉమామహేశ్వరరావు కుటుంబ విభేదాలు వీధిన పడ్డాయి. నిన్నటిదాకా అన్నదమ్ముల మధ్య ఉన్న విభేదాలు పార్టీ కార్యాలయానికి తాళాలు వేసేదాకా వచ్చాయి. కృష్ణా జిల్లా కంచికచర్లలోని టీడీపీ కార్యాలయానికి ఈ ఉదయం దేవినేని ఉమ్మ తమ్ముడు చంద్రశేఖర్ తాళం వేశారు. అన్నదమ్ముల మధ్యన ఉన్న ఆస్తి తగాదాలు ఈ సంఘటనకు దారితీసినట్లు సమాచారం. అన్నతో విభేదించిన చంద్రశేఖర్ ఇంతకుముందే వైఎస్ఆర్ కాంగ్రెస్ పార్టీలో చేరారు. ఆ పార్టీ నేతల ప్రోత్పాహంతోనే చంద్రశేఖర్ టీడీపీ కార్యాలయానికి తాళం వేసినట్లు టీడీపీ వర్గాలు అంటున్నాయి.

మొదలయిన రాజకీయ వలసల సీజన్

  ఎన్నికల సమయం క్రమంగా దగ్గర పడుతున్న కొద్దీ మెల్లగా రాజకీయనాయకుల కప్ప గెంతులు కూడా మొదలయ్యాయి. తెదేపా నుండి కొంత మంది తెరాస వైపు వెళ్ళగా, కాంగ్రెస్ నుండి మరికొందరు వైకాపా వైపు దూకుతున్నారు. తెదేపా నుండి బయట పడేందుకు ‘తెలంగాణా’ లేదా ‘పార్టీలో పెత్తందారులు’ కారణాలుగా చెప్పబడుతుంటే, తెరాస నుండి బయట పడేందుకు, కేసీఆర్ నియంతృత్వ ధోరణి, ఆపార్టీకి తెలంగాణాపై చిత్తశుద్ధి లేదనే సాకుతో బయటపడుతున్నారు.   ఇక, ఒకే రక్తం పంచుకు పుట్టిన కాంగ్రెస్, వైకాపాల మధ్య కేవలం ‘జగన్’ అనే ఏకైక అంశంతో మార్పులు జరుగుతున్నాయి తప్ప వేరే ఇతర అంశాలు లేవు. జగన్ వ్యతిరేఖించేవారు కాంగ్రెస్ పార్టీలో మిగిలిపోతే, అతని గెలుపు తద్యం అని భావించేవారు అటువైపు మారుతుంటారు. అయినప్పటికీ, జగన్ అక్రమాస్తుల కేసులు ఆ రెండు పార్టీల మధ్య వీడని, కనబడని ఒక గట్టి బంధం ఏర్పరిచింది. ఆ రెండు పార్టీల వారు ఒకరినొకరు దూషించుకొంటున్నపటికీ, కేసులు రాజీనామాల విషయం వచ్చేసరికి వారందరూ ముక్త కంఠంతో ఎవరూ కూడా తప్పు చేయలేదని చెప్పడం ఇందుకు ఒక చిన్న ఉదాహరణగా చెప్పుకోవచ్చును.   ఈ నాలుగు పార్టీలు తమ అభ్యర్ధుల పేర్లను ప్రకటించడం మొదలుపెట్టగానే ఆ పార్టీల మద్య వలసలు పూర్తి స్థాయిలో జోరందుకోవచ్చును. తెదేప, తెరాసలు రెండు కూడా బహుశః వచ్చే నెలలో ఖచ్చితంగా తమ అభ్యర్ధుల తొలి జాబితాను విడుదల చేసే అవకాశం ఉంది, గనుక అప్పటి నుండి వలసలు మొదలవవచ్చును.   ప్రస్తుతానికి మాజీ మంత్రి డీకే సమరసింహా రెడ్డి, మాజీ రాజ్యసభ సభ్యుడు రుమాండ్ల రామచంద్రయ్య వచ్చి తెలుగుదేశం పార్టీలో చేరారు. రామచంద్రయ్య గతంలో స్వర్గీయ యన్టీఆర్ కి అత్యంత ఆప్తుడుగా, తెదేపాకు తెలంగాణా ప్రాంతంలో బలమయిన పునాది వేశారు. కానీ, తెలంగాణా ఉద్యమాలు ఊపందుకోవడంతో రెండు సం.ల క్రితం ఆయన పార్టీని వీడి తెరాసలో చేరారు. కానీ, మళ్ళీ ఇప్పుడు తిరిగి తెలుగు దేశం గూటికే చేరుకొన్నారు.   అదేవిధంగా కాంగ్రెస్ పార్టీ నుండి బాజపాలోకి అక్కడి నుండి తెరసలోకి వెళ్ళిన సమర సింహా రెడ్డి కూడా ఈ రోజే తెలుగుదేశం పార్టీలో చేరిపోయారు. ఇక, ముగ్గురు తెలంగాణా కాంగ్రెస్ యంపీలు మరియు కే.కేశవ్ రావు తదితరులు వచ్చే నెల 2వ తేదీన కాంగ్రెస్ నుండి తెరాసలో చేరేందుకు ముహూర్తం పెట్టుకొన్నారు. వైకాపా నుండి తాజాగా సస్పెండ్ అయిన కాకాని గోవర్ధన్ త్వరలో కాంగ్రెస్ గూటికి చేరే అవకాశం ఉంది.

వడ దెబ్బకు ఇంటర్ విద్యార్ధి మృతి

        ఇంటర్ సప్లిమెంటరీ పరీక్ష రాసి వస్తుండగా విద్యార్ధి వడదెబ్బతో మృతి చెందిన సంఘటన కరీంనగర్ లో చోటుచేసుకుంది. కుటుంబ సభ్యుల కధనం ప్రకారం జిల్లా కేంద్రానికి చెందిన రాకేష్ రెడ్డి (18) వరంగల్‌లోని ఒక ప్రైవేటు కళాశాలలో ఇంటర్ చదువుతున్నాడు. అక్కడే సప్లిమెంటరీ పరీక్ష రాసి బస్సులో స్వగ్రామానికి బయల్దేరాడు. ఎండ వేడి ఎంత దెబ్బ తీసిందో ఏమో.. ఊరు దాకా రాకముందే బస్సులో స్పృహ కోల్పోయాడు. వడదెబ్బ తాకిడికి ప్రాణాలు ఎప్పుడుపోయాయో తెలియదుగానీ.. కోతిరాంపూర్‌లో దిగాల్సినవాడు దిగనే లేదు. కరీంనగర్ బస్టాండుకు వచ్చాక కూడా అలాగే ఆఖరుసీటులో పడి ఉండటంతో తోటి ప్రయాణికులు డ్రైవర్‌కు విషయం చెప్పారు. ముఖంపై నీళ్లు చల్లినా కదలకపోవడంతో 108కు సమాచారం అందించారు. వచ్చి చూసిన వైద్య సిబ్బంది.. అతడు మృతి చెందినట్లు చెప్పారు.

పార్ధ సారధి రాజీనామాకై ప్రతిపక్షాల వృధాప్రయాస

  ధర్మాన, సబితల రాజీనామాలు చేసామని చెప్పినప్పటికీ, దానిని ముఖ్యమంత్రి కిరణ్ కుమార్ రెడ్డి కానీ, పీసీసీ అధ్యక్షుడు బొత్స సత్యనారాయణ గానీ, దృవీకరించే స్థితిలో లేరు. అసలు వారు నేటికీ మంత్రులుగా కొనసాగుతున్నారా లేక మాజీలుగా మారారా? అనే సంగతి గురించి కూడా కాంగ్రెస్ పార్టీలో ఎవరు స్పష్టంగా చెప్పలేని పరిస్థితి. ప్రభుత్వంలో అవినీతిని ఇక ఎంత మాత్రం సహించేది లేదంటూ హూకరించే కాంగ్రెస్ పెద్దలు కూడా ఈ విషయంలో నోరు మెదపడానికి భయపడుతున్నారు.   అయినా కూడా ఒక్క వైయస్సార్ కాంగ్రెస్ పార్టీ తప్ప మిగిలిన ప్రతిపక్ష పార్టీలన్నీకూడా మిగిలిన నలుగురు మంత్రుల వెంటపడటం మానుకోలేదు. కళంకిత మంత్రుల రాజీనామాల కోసం పట్టుబడుతున్న తెదేపా కూడా తన హాయంలో జైలులో ఉన్న వ్యక్తికి మంత్రి పదవి ఇచ్చింది గనుక, ఆటోమేటిక్ గా ఆ పార్టీకి నైతిక హక్కులు క్యాన్సిల్ అయిపోయినట్లేనని ఆయన ఏదో ఆల్జీబ్రా సిద్ధాంతం ప్రకారం శలవిచ్చారు.   ఇక తను పదవిలో కొనసాగాలా వద్దా? అనేది కాంగ్రెస్ అధిష్టానం మరియు ముఖ్యమంత్రి కిరణ్ కుమార్ రెడ్డి చూసుకొంటారని, అందువల్ల ప్రతిపక్షాల వారు తన రాజీనామా విషయమై శ్రమ పడటం వృధాయని ఆయన సూచించారు. ఇక, తన సంస్థపై ఉన్న ఫెరా ఉల్లంఘన కేసు గురించి తానూ 2004 ఎన్నికల ఎఫిడవిట్ లో సమర్పించానని, కానీ 2009 ఎన్నికల సమయానికి తానూ ఆ సంస్థ డైరెక్టర్ పదవి నుండి తప్పుకొనందువల్లనే తానూ 2009 ఎన్నికల ఎఫిడవిట్ లో పేర్కొనలేదని, ఈ విషయం తెలుసుకోకుండా ప్రతిపక్షాలు అనవసర రాద్ధాంతం చేస్తున్నాయని ఆయన వారిపై విరుచుకు పడ్డారు.   ఆయన ఒకవేళ ప్రతిపక్షాల ఒత్తిడికి లొంగి తన పదవికి రాజీనామా చేస్తే, దానిని కూడా ఆయన కంటే ముందుగా రాజీనామాలు చేసిన ఇద్దరు మంత్రుల రాజీనామాల పత్రాల క్రిందనే పెట్టక తప్పదు గనుక ప్రతిపక్షాలు ఆయన వెంట పడటం మానుకొంటేనే మేలు.

జూన్ 3న బీజేపీలోకి నాగం

      తెలంగాణ ప్రత్యేక రాష్ట్రం విషయంలో ద్వంద వైఖరి అవలంభిస్తున్నారని టీడీపీ అధినేత చంద్రబాబుతో విభేదించి తెలంగాణ నగారా సమితి ఏర్పాటు చేసిన నాగర్ కర్నూలు ఎమ్మెల్యే నాగం జనార్ధన్ రెడ్డి జూన్ 3న భారతీయ జనతా పార్టీలో చేరుతున్నట్లు ప్రకటించారు. టీడీపీ నుండి ఎన్నికయిన ఎమ్మెల్యే పదవికి రాజీనామా చేసి ఉప ఎన్నికల్లో స్వతంత్ర అభ్యర్థిగా గెలిచిన నాగం 28 వేల ఓట్ల మెజార్టీ సాధించాడు. అయితే అనూహ్యంగా ఆయన బీజేపీలో చేరాలని నిర్ణయం తీసుకున్నాడు. ఢిల్లీలో పార్టీ అధ్యక్షుడు రాజ్ నాథ్ సింగ్ ను కలిసిన ఆయన ఉగాది నాడే బీజేపీ రాష్ట్ర కార్యాలయంలో ఉగాది వేడుకలకు హాజరై తాను బీజేపీలో చేరతానన్న సంకేతాలు ఇచ్చారు. ఈ సారి మహబూబ్ నగర్ ఎంపీ స్థానానికి పోటీ చేస్తానని ప్రకటించారు. నరేంద్రమోడీని ప్రధానమంత్రి అభ్యర్థిగా ప్రకటిస్తే బీజేపీకి మంచి ఊపు వస్తుందని అయన అన్నారు.

సంజయ్ దత్ ఖైదీ నెం.16656

    ముంబయి పేలుళ్ళ కేసులో జైలు శిక్ష అనుభవిస్తున్న సినీ నటుడు సంజయ్ దత్ ను మంగళవారం అర్థరాత్రి అత్యంత రహస్యంగా పూనేలోని ఎరవాడ జైలుకు తరలించారు. సుప్రీం కోర్ట్ ఆదేశాల మేరకు ఈ నెల 16న టాడా కోర్టులో లొంగిపోయిన సంజయ్ దత్ 42నెలల జైలు శిక్షను ఇంకా అనుభవించాల్సి ఉంది. దీనికి గాను తొలుత ఆర్థర్ రోడ్డు జైలులోని అండా గదిలో ఉంచిన విషయం తెలిసిందే. ఈ నేపధ్యంలో మంగళవారం అర్థరాత్రి అత్యంత రహస్యంగా సంజయ్ ను ఆర్థర్ రోడ్డు జైలు నుంచి తరలించారు. బుధవారం వేకువ జామున గంటలకు సంజయ్ ఎర్రవాడ జైలుకు చేరుకున్నారు. ఇక్కడ కట్టుదిట్టమైన భద్రత ఉండే గదిని ఆయనకు కేటాయించినట్లు సమాచారం. భద్రతా కారణాల వల్లే సంజయ్ ను రహస్యంగా తరలించామని అధికారులు చెప్పారు. జైల్లో సంజయ్‌దత్‌కు అధికారులు 16656 నంబరు కేటాయించారు. ఆయన ఎరవాడ జైలుకు రావడం ఇది మూడోసారి.

కెసిఆర్ రహస్యాలు బయటపడ్డాయి!

  -డా.ఎబికె ప్రసాద్ [సీనియర్ సంపాదకులు]     ఒక స్థానిక దినపత్రిక మొదటిపేజీలో [21-05-2013] పాఠకులు ఓ చిత్రమైన ఫోటో చూసి ఉంటారు. అందులో పైనుంచి కిందివరకూ వరసక్రమంలో కనిపించే ఆధునిక "పంచపాండవుల్ని'' [కొందరు వీరిని మంచపుకోళ్ళు'' అని అంటున్నారు] పాఠకులు కనిపెట్టి ఉంటారు! అందులో ఒకాయన బాగా పాలిపోయిన ముఖంతో కనిపిస్తాడు. మిగతావారు మాత్రం తెచ్చిపెట్టుకున్న మందహాసంతో కనిపిస్తారు. అయితే ఈ అయిదుగురిలో ఒక వ్యక్తి పార్టీవేరు, మిగతా నలుగురి పార్టీ వేరు. కాని, పార్టీలు వేరైనా అయిదుగురికీ పొత్తు ఎలా కుదిరిందన్నది పాఠకుల సందేహం. ఆ పొత్తుకోసమే ఆ రెండు పార్టీల మధ్య కొన్ని మాసాలుగా మంతనాలు సాగుతున్నాయి. ఇందులో ఒక పార్టీ "తెలంగాణా'' వేర్పాటు ఉద్యమం పేరిట ముఖ్యమంత్రి పదవి కోసం వెంపరలాడుతూ తెలంగాణాలో "పరకాయప్రవేశం'' చేసిన 'సీమాంధ్ర దొర' కెసిఆర్ పెట్టిన తెలంగాణా రాష్ట్ర సమితి. కాగా మిగతా నలుగురు నాయకులు తెలంగాణా కాంగ్రెస్ ఎం.పీ.లు. రెండు మూడు మాసాల క్రితం ఢిల్లీలో కాంగ్రెస్ అధిష్ఠాన వర్గంతో కె.సి.ఆర్. ప్రారంభించిన చర్చల వేదిక ఇప్పుడు క్రమంగా హైదరాబాద్ లోని "ఫామ్ హౌస్''ల వద్దకు, "వ్యవసాయక్షేత్రం'' వద్దకు చేరుకుంది. దేశ సమైక్యతను, భాషా రాష్ట్రాల సమగ్రతను కోరుకునే కాంగ్రెస్ కూ కేవలం తన ముఖ్యమంత్రి పదవికోసం తెలంగాణలో పాగా వేసి తెలుగుజాతిని విచ్చిన్నం చేయడానికి కంకణం కట్టుకున్న 'సీమాంధ్ర దొర' వేర్పాటువాద స్థానిక పార్టీకీ పొత్తు ఎలా కుదిరింది? ఆంధ్రప్రదేశ్ విభజన సమస్యపై బాధ్యతగల ఒక రాజకీయపక్షంగా ఇందిరాగాంధి మాదిరిగా ఒక మాటమీద నిలబడలేక రోజుకొక తీరుగా 'ధ్వని కవిత్వాలు' నేటి కాంగ్రెస్ కేంద్రనాయకత్వం వినిపిస్తున్నందునే రాష్ట్ర సమస్య జటిలం కావలసి వచ్చింది. ఈ సమయంలో తెలంగాణలో కాంగ్రెస్ ను బతికించుకోవడానికి కేంద్ర నాయకత్వం "తెరాస''లాంటి ఏ పూచికపుళ్ళ కనపడినా దానితో పొత్తు పెట్టుకోడానికి సిద్ధపడుతోంది.   ఈ దౌర్భాగ్యపు వ్యూహంలో భాగంగానే తెలంగాణలో కాంగ్రెస్ ను బతికించుకొనే యత్నంలో తద్వారా తెలంగాణలో తోటి తెలుగువారిపై విద్వేష ప్రచారం ద్వారా సీమాంధ్రులను'' గెంటివేస్తే లక్షలాది ఉద్యోగాలు ఖాళీ అయి స్థానికులకు ఉపాధి దొరుకుతుందన్న ఆశలు కల్పించడం ద్వారా తెలంగాణా బిడ్డలను ఆత్మహత్యలకు పురిగొల్పిన రాజకీయ నిరుద్యోగి కె.సి.ఆర్.కు ముఖ్యమంత్రి పదవిని కాంగ్రెస్ ఆశ చూపించింది ఢిల్లీ చర్చలలో. దాని ఫలితమే నేడు తెలంగాణా కాంగ్రెస్ నూ, "తెరాస'' పార్టీని కలిపేసే ప్రయత్నం. ఇందులో భాగంగానే కాంగ్రెస్ అధిష్ఠానం తన చేతులు కాల్చుకోకుండానే తెలంగాణా కాంగ్రెస్ ను తెరపైనిల్పి కెసిఆర్ తో పొత్తుకు ద్వారాలు తెరిచినట్టు కన్పిస్తోంది.   తద్వారా కెసిఆర్ ఆశ, ఇటు కాంగ్రెస్ కు ఉన్న స్థానిక బలంతో తాను ఆత్మహత్యలపాలైన వారి కుటుంబాలనుంచి ఆగ్రహాన్ని, ప్రమాదాన్నీ తప్పించుకోవచ్చు, అటు ప్రత్యేక తెలంగాణా ఏర్పడని పక్షంలో తెలంగాణా ప్రజలనుంచీ ఆగ్రహావేశాలకు తాను గురికాకుండా కాంగ్రెస్ పార్టీ అండతో బయటపడనూవచ్చు! ఇదీ వ్యూహం.  అందుకనే తన ముఖ్యమంత్రి పదవికోసం, తెలంగాణా పేరిట ఎంతమంది కుర్రకారును ఆత్మహత్యల వైపుకు నెట్టినా అతనికి చింతలేదు. ఆ చింత అతనికి లేదనడానికి తాజాగా గతవారం పదిరోజులలో జరిగిన మూడు యువకుల ఆత్మహత్యలే నిదర్శనం. వీళ్ళ జేబుల్లో దొరికాయని లేదా కనిపించాయని ["పర్ పోర్డెడ్ టు బి''] పత్రికలూ అనుమానాస్పదంగా ప్రకటించిన "సూసైడ్'' లేఖల్లో కెసిఆర్ నాయకత్వాన్ని పొగుడుతూ, మిగతా రాజకీయ పక్షాలను తిడుతూ రాయడాన్ని బట్టి 'తెరాస', ఉస్మానియాలో దాని అనుబంధ విద్యార్థి సంఘమూ కలిసి ఆ లేఖను కెసిఆర్ ప్రయోజనాల కోసమే డ్రాఫ్ట్ చేసినట్టు అనిపిస్తోంది! లేకపోతే ఆ ముగ్గురి యువకుల జేబుల్లో ఒకే తరహా లేఖలు ఉండవలసిన అవసరంలేదు. అంటే ఒక నిరుద్యోగి రాజకీయుడు పదవులకు ఎగబాకడం కోసం తన కుటుంబసభ్యుల్ని తన బంధుమిత్రుల్ని మినహాయించుకుని ముక్కుపచ్చలారని, ఎంతో భవిష్యత్తు చూడవలసిన, అనుభవించవలసిన యువకుల్ని ఆత్మహత్యల వైపునకు తప్పుడు ఆశలతో నెట్టడం ప్రజాస్వామిక రాజకీయ పద్ధతులకు పూర్తి విరుద్ధం. పైగా దశాబ్దాల తరబడి దొరల, భూస్వాముల, జాగిర్దార్ల, దేశ్ ముఖ్ ల దాష్టీకాలకు గురవుతూ వచ్చిన తెలంగాణా ప్రజలను తిరిగి 'దొర'ల పాలనా విషకౌగిలిలోకి నెట్టడమంటే, దారుణ చరిత్రను పునరావృత్తం చేయడమే అవుతుంది.   తెలంగాణా ప్రజా బాహుళ్యంలో, ముఖ్యంగా వెట్టిచాకిరీ ద్వారా బానిస బతుకులు అనుభవించిన దళిత బహుజన అట్టడుగు వార్తాలు ఈ పరిణామాన్ని వ్యతిరేకించి, ప్రతిఘతిస్తారని తెలిసిన కెసిఆర్ పన్నిన కొత్త నాటకం - తన పార్టీ (తెరాస) అధికారంలోకి వస్తే దళితుడ్నే "ముఖ్యమంత్రి''ని చేస్తానని పాత 'దొర'తనపు అహంకారాన్ని ఇంతకుముందే ప్రదర్శించడం జరిగింది. కాని, అదే నోటితో, తెరాసలో కొత్తగా తీర్థం పుచ్చుకున్న దళిత నాయకుడు, నిన్నిటిదాకా "తెలుగుదేశం''పార్టీలో అనేక ప్రధానపదవులను అనుభవించిన కడియం శ్రీహరినే 'తెరాస' గెలిస్తే, గిలిస్తే ముఖ్యమంత్రిగా నియమిస్తామని మాత్రం చెప్పలేకపోయాడు! చెప్పడు. ఎందుకంటే దళితులంటే కెసిఆర్ నాయకత్వానికి ఎంతటి చులకనో ఢిల్లీలోని ఆంధ్రభవన్ లో రాష్ట్రప్రభుత్వ అధికారిగా పనిచేస్తున్న దళిత ఆఫీసరు మీద కెసిఆర్ కుటుంబసభ్యుడే చేయి చేసుకొని గాయపరిచిన సంగతిని తెలంగాణాలోని బడుగు బలహీనవర్గాలు మరిచిపోయే ప్రసక్తిలేదు. ఈ దశలో తిరిగి రకరకాల గొంతెమ్మకోరికలు లేదా ఆశలతో ఇటీవల కెసిఆర్ ప్రకటనలు గుప్పిస్తున్నాడు, అవి అమలుకురాని శుష్క వాగ్దానాలు, శూన్యహస్తాలుగా రూపుదిద్దుకుంటాయి.   కాని ఈలోగా కెసిఆర్ చేస్తున్న మరోకపని - 'తెరాస'లోకి ఇతర పార్టీలనుంచి దూకివచ్చే 'జంప్ జిలానీల' సంఖ్య నామమాత్రమేనని పరిణామాలు నిరూపిస్తున్నందున, "ఆ పార్టీనుంచి ఇద్దరు, ఈ పార్టీనుంచి ముగ్గురు'' టి.ఆర్.ఎస్.లోకి వచ్చేస్తున్నారు, రేపోమాపో చేరబోతున్నారు అంటూ చేరబోయే వారి అనుమతితో నిమిత్తం లేకుండానే ముందస్తు ప్రచార ప్రకటనలు యివ్వడం, వాళ్ళని బలవంతాన 'చక్రబంధం'లోకి లాగడంకోసం శ్రమపడి 'డీలా' అయిపోతున్నాడు! కాని ఈలోగా తెరాసనుంచి ఇతర పార్టీలలోకి జారుకునే వాళ్ళ సంఖ్య పెరిగిపోతోంది. "కాంగ్రెస్ లోనే ఉంటూ తెలంగాణాకోసం పోరాడతామేగాని మరో పార్టీలో చేరే సమస్యలేదని కొందరు తెలంగాణా కాంగ్రెస్ ముఖ్యులు తెగేసి చెబుతున్నారు. కాగా, ఈలోగానే తెలంగాణా విద్యార్థి సంయుక్త కార్యాచరణ సంఘం అధ్యక్ష పదవిలో గత పన్నెండేళ్ళుగా ఉన్న రాజారాం యాదవ్ ఆ పదవికి రాజీనామా చేసి రేపోమాపో "తెలుగుదేశం'' పార్టీ తీర్థం పుచుకోడానికి సిద్ధపడ్డాడు! కెసిఆర్ ముఠా అవకాశవాద రాజకీయాలతో విసిగివేసారిన ఉస్మానియా విద్యార్థి సంఘంలో కూడా తీవ్ర అసంతృప్తి రాజుకుంటోందని కొందరు విద్యార్థి మిత్రులు చెప్పారు.   ఇక టి.ఆర్.ఎస్. రాజకీయంతో, కెసిఆర్ వర్గం కుట్రలతో విసిగివేసారిన టి.ఆర్.ఎస్. పొలిట్ బ్యూరో ముఖ్యసభ్యులు, టి.ఆర్.ఎస్. నాయకుడైన ఎం. రఘునందన్ 'తెరాస' నాయకులు సూటిగా సమాధానం చెప్పలేని కుటుంబ అవినీతి గురించి చేసిన ఆరోపణలు మొత్తం రాష్ట్రరాజకీయాల్లోనే పెద్ద సంచలనం కల్గిస్తున్నాయి.అనేక స్పష్టమైన రుజువులతో ఆ కుటుంబం అవినీతి గురించి రాష్ట్ర హైకోర్టులో ప్రజాప్రయోజన వ్యాజ్యానికి రఘునందన్ సిద్ధం కావడంతో తన ప్రాణానికి ఆ కుటుంబంనుంచి ప్రమాదముందని భావించి, రాష్ట్ర డి.జి.పి.ని కలుసుకుని తనకూ, తన కుటుంబానికీ రక్షణ కల్పించాలని రఘునందన్ విజ్ఞప్తి చేయడం గమనార్హం! అంతేగాదు "సిబీఐ''కి కూడా రఘునందన్ కెసిఆర్ లావాదేవీల గురించి ప్రత్యేక నివేదికను అందజేయడం విశేషం. రఘునందన్ ఆరోపణలకు సమాధానం చెప్పలేక "అతనికి మతిభ్రమించింద''న్న ఒక్క మాటతో తప్పించుకోజూస్తున్నారు కెసిఆర్ కుటుంబసభ్యులు. రఘునందన్ ఆరోపణలకు పునాది, స్వయంగా ఆ కుటుంబానికి ఆయన అతి సన్నిహితంగా ఉండటంతో పాటు కాంగ్రెస్ అధిష్ఠానం వద్ద ఉన్న సమాచారం కూడా రఘునందన్ కు అందినట్టు కాంగ్రెస్ వర్గాలు అభిప్రాయ పడుతున్నాయి! ఇదిలా ఉండగానే "తెరాస''లో కొత్తగా తీర్థం పుచ్చుకున్న "దేశం'' ముఖ్యుడు కడియం శ్రీహరికి గతంలో ఇప్పగూడెంలో జరిగిన 'తెరాస' కార్యకర్త పరుశురాం హత్య కేసుతో సంబంధం ఉందన్న రఘునందన్ ఆరోపణను శ్రీహరి ఖండించాల్సి రావటం 'తెరాస' రాజకీయ కుమ్ములాటల్లో సరికొత్త కోణం! కాగా, ఆ హత్యకు మార్కిస్టుపార్టీ కార్యకర్తలు కారణమని శ్రీహరి ప్రకటించి మరొక కల్లోలానికి దారితీశాడు! ఇది యిలా ఉండగా, తెలంగాణాలోని దళితులలో అసంఖ్యాకులు జిల్లాల్లో మారుమూల ప్రాంతాలలో సహితం, గ్రామాలలోనూ కెసిఆర్ పార్టీకి వ్యతిరేకంగా ప్రచారం చేయడానికి సన్నద్ధమవుతున్నారని దళితమిత్రులు చెబుతున్నారు.

జగన్ ఆర్ధిక ఉగ్రవాది

        వైయస్సార్ కాంగ్రెస్ పార్టీ అధ్యక్షుడు వైయస్ జగన్‌ పైన రాష్ట్ర ఆర్థిక మంత్రి ఆనం రాంనారాయణ రెడ్డి మరోసారి సంచలన విమర్శలు చేశారు. జగన్ ను ఆర్థిక ఉగ్రవాది అని ఆరోపించారు. ముఖ్యమంత్రి కిరణ్ కు సన్నిహితుడిగా పేరపడ్డ ఆయన కొన్నాళ్లుగా జగన్ మీద ఆరోపణలు చేయడంలో ఉత్సాహంగా ఉంటున్నారు.జగన్ ను దేశం నుండి, రాష్ట్రం నుండి తరిమికొట్టాలని, ఆర్థిక ఉగ్రవాదం దేశానికి మంచిది కాదని, ఇది సమాజాన్ని ముక్కలు చేస్తుందని, అందుకే ఇక్కడి నుండి పారద్రోలాలని అన్నారు. జగన్ నేలమాళిగలలో లక్షల కోట్లు దాచుకున్నారని, ఆయనను చూసి దేశంలో మిగతావారు తయారవుతున్నారని, దోచుకునేందుకు దారులు వెతుకుతున్నారని అన్నారు. వై.ఎస్.హయంలో పీజ్ రీయింబర్స్ మెంట్, తదితర పదకాలకు బకాయిలు పెద్ద ఎత్తున ఉంటే దానిని కిరణ్ ప్రభుత్వం తీర్చిందని అన్నారు.

గద్దె రామ్మోహన్ వర్సెస్ కేశినేని నాని

        విజయవాడ లోక్ సభ టికెట్ ను దక్కించుకునేందుకు తెలుగుదేశం పార్టీలో పోరు రాజుకుంది. ప్రజారాజ్యం నుండి టీడీపీలో చేరిన ట్రావెల్స్ అధినేత కేశినేని నానికి టికెట్ ఇస్తారన్న అనుమానంతో మాజీ ఎంపీ గద్దె రామ్మోహన్ రావు టికెట్ కోసం స్వరం పెంచారు. దీంతో విజయవాడ టీడీపీలో కొత్త పోరు మొదలయింది. మొన్నటిదాకా వల్లభనేని వంశీ – దేవినేని ఉమామహేశ్వరరావు పంచాయితీ, తరువాత కొడాలి నాని పంచాయితి నెలకొంది. అవి సద్దు మణిగాక ఇప్పుడు గద్దె పంచాయితీ ప్రారంభమయింది. “రాజకీయాల్లో డబ్బు ప్రధానం. అయితే డబ్బే రాజకీయం కాదు. ఎప్పటి నుండో పార్టీలో ఉండి డబ్బులు ఖర్చు పెడుతున్నాం. ఇప్పుడు వచ్చినవారు డబ్బులు పెడతారని టికెట్ ఇస్తే ఇన్నాళ్లు ఖర్చుపెట్టిన వారి పరిస్థితి ఏంటి ? అని ఆయన చంద్రబాబును ఉద్దేశించి ప్రశ్నించారు. ఎంపీ సీటు కావాలనడం నా డిమాండ్. డబ్బులు ఖర్చుపెట్టమంటే మేమూ పెడతాం అని ఆయన అన్నారు. విజయవాడ ఎంపీ సీటు విషయంలో నాని – గద్దెల మధ్య ఇప్పుడు తీవ్రపోటీ నెలకొంది.

మళ్ళీ సెల్ఫ్ గోల్ చేసుకొన్నటీ-కాంగ్రెస్ యంపీలు

  సీనియర్ కాంగ్రెస్ నాయకుడు కే.కేశవ్ రావు సోనియా గాంధీతో ఇటీవల సమావేశం అయిన తరువాత అంతా భేషుగ్గా ఉందని సర్టిఫికేట్ జారీ చేసి రెండు రోజులు కూడా కాక మునుపే ఏఐసీసీ అధికార ప్రతినిధి పీసీ చాకో ‘మా ఎజెండాలో తెలంగాణా అంశం లేదంటూ’ బాంబు పేల్చడంతో కేశవ్ రావుతో సహా అందరూ అవాక్కయిపోయారు.   అప్పుడు వారికి కోపం రావడం సహజమే. వారు చాలా తీవ్రంగానే స్పందిస్తూ ఆయన మాటలను ఖండించడమే కాకుండా, తమ అధిష్టానానికి తెలంగాణా అంశంపై స్పష్టమయిన ప్రకటన చేసేందుకు తాజాగా మే 30వ తేదీ డెడ్ లైన్ విదించి, మరో వైపు తెరాసలో చేరబోతున్నట్లు స్పష్టమయిన సంకేతాలు పంపారు.   కానీ, ఆవేశంలో ఆవిధంగా అన్నపటికీ, వారికి నిజానికి పార్టీని వీడేందుకు మనస్పూర్తిగా ఇష్టం లేదనేది అందరికీ తెలిసిన విషయమే. అందుకే, ఇనుము వేడిగా ఉన్నపుడే సమ్మెట దెబ్బ పడాలనే ఆలోచనతో వారిని వెంటనే తెరాసలో చేరమని కేసీఆర్, హరీష్ రావ్ తదితరులు చాల ఒత్తిడి తెచ్చారు. కానీ, వారు మాత్రం తమ పార్టీ అధిష్టానం తెలంగాణా అంశంపై ఏదోఒకటి తేల్చిన తరువాతనే వచ్చి జేరుతామని స్పష్టం చేయడం, వారు ఆలోచించుకోవడానికి మరింత సమయం కోసమే. తద్వారా వారు తెరాసలో చేరాడానికి ఇంకా వెనుకాడుతున్నట్లే స్పష్టం అవుతోంది.   కానీ, వారు మే30వ తేదీ డెడ్ లైన్ విదించడంతో, అధిష్టానం యొక్క ఆగ్రహానికి గురయ్యి, ప్రస్తుతం పార్టీలోకొనసాగలేని, బయటకు వెళ్ళలేని దుస్థితిని తమకు తామే కల్పించుకొన్నట్లయింది. కొద్ది రోజుల క్రితమే సోనియా గాంధీ స్వయంగా కేశవ్ రావును పిలిపించుకొని ఆయనతో అన్ని విషయాలు మాట్లాడిన తరువాత మళ్ళీ ఆయన ఇప్పుడు తనకి డెడ్ లైన్ విదించడంపై పార్టీ సీరియస్ గా ఉన్నట్లు సమాచారం. పార్టీ అధిష్టానం ఎంతగా నచ్చజెప్పుతున్నపటికీ, కొందరు నేతలు పదేపదే ఈవిధంగా తమను ఇరకాటంలో పెట్టి, ఎదురుతిరుగుతుండటం ఇక వారిని ఎంత మాత్రం సహించే పరిస్థిలోలేనట్లు స్పష్టం అవుతుండటంతో, ఇప్పుడు వారి పరిస్థితి ముందు నుయ్యి వెనుక గొయ్యి అన్నట్లు తయారయింది. పార్టీకి విదించిన డెడ్ లైన్ ఇప్పుడు వారి పాలిట ఉరిత్రాడుగా మారింది. వారికి వారే విదించుకొన్న ఈ డెడ్ లైన్ ముగియడానికి ఇంకా కేవలం వారం రోజులు మాత్రమే సమయం మిగిలి ఉన్నందున, మరో కొత్త ప్రయత్నంలో భాగంగా కేశవ్ రావు నిన్న తెలంగాణా జేయేసీ చైర్మన్ ప్రొఫెసర్ కోదండరాం ను కలిసారు.   ఒకవేళ ఆయనచేత కొత్త పార్టీ పెట్టింఛి అందులో చేరేందుకు ప్రయత్నిస్తున్నారేమో ఇంకా స్పష్టం కావాల్సి ఉంది. ఈసారి తెలంగాణా కాంగ్రెస్ యంపీలు ఆవేశంలో తమ మెడకి తామే ఉచ్చు బిగించుకొన్నారనేది మాత్రం సుస్పష్టం.

కోదండరాముడితో కాంగ్రెస్ యంపీలు కొత్త పార్టీ పెట్టిస్తారా

  కాంగ్రెస్ అధిష్టానం ఈనెల 30లోగా తెలంగాణాపై స్పష్టమయిన ప్రకటన చేయకపోయినట్లయితే పార్టీని వీడి తెరాసలో చేరుతామని కాంగ్రెస్ యంపీలు హెచ్చరించినప్పటికీ, అధిష్టానం ఇంతవరకు స్పందించలేదు. కాంగ్రెస్ పార్టీలో స్వేచ్చగా జీవించిన తాము ఇప్పుడు ఆ పార్టీని వీడి, దొరతనం ప్రదర్శించే కేసీఆర్ ముందు చేతులు కట్టుకొని నిలబడటం చాల కష్టమని తెలిసినప్పటికీ గత్యంతరం లేని పరిస్థితులలోనే వారు అయిష్టంగానే తెరసలోకి వెళ్లేందుకు సిద్దపడుతున్నట్లు తెలుస్తోంది.   కానీ, నాలుగయిదు రోజుల క్రితమే కేసీఆర్ ను ఆయన ఫారం హౌస్ లో కలిసివచ్చిన కేశవ్ రావు నిన్నఅకస్మాత్తుగా తెలంగాణా జేయేసీ చైర్మన్ ప్రొఫెసర్ కోదండరాంతో సమావేశం అవడం చాలా ఆసక్తి కలిగిస్తోంది. ఎందుకంటే, ఆయన త్వరలో కొత్త రాజకీయ పార్టీ పెట్టనున్నారనే వార్తలు వస్తున్న నేపద్యంలో కేశవ్ రావు ఆయనతో సమావేశం అవడం చూస్తే, కాంగ్రెస్ యంపీలు తెరాసలో చేరడం కంటే, మేధావి, విద్యావంతుడు, సంస్కారి, పెద్దమనిషిగా తెలంగాణా ప్రజలలో మంచి గౌరవం కలిగిన ఆయన చేతనే రాజకీయ పార్టీ పెట్టించి, ఆయన నేతృత్వంలో పనిచేయడానికే మొగ్గు చూపుతున్నట్లు కనిపిస్తోంది.   ప్రొఫెసర్ కోదండరాంకు కూడా కేసీఆర్ తో గతకొంత కాలంగా తరచూ చేదు అనుభవాలు ఎదురవుతున్న నేపద్యంలో, ఆయనకు రాజకీయాలపట్ల పెద్దగా ఆసక్తి లేకపోయినప్పటికీ, ఆయనపై వస్తున్న ఒత్తిళ్లకు తలొగ్గి రాజకీయ పార్టీ స్థాపనకు ఆలోచిస్తున్నట్లు తెలుస్తోంది.   తెలంగాణా ఉద్యమాలను పక్కన బెట్టి ఎన్నికలు, టికెట్లు అంటూ కేసీఆర్ పక్కదారి పట్టడంతో ఆయనకి తెలంగాణా సాధనపై చిత్తశుద్ధి లేనట్లు ప్రజలలో అభిప్రాయం వ్యక్తం అవుతుండటం, దానికి బలం చేకూరుస్తున్నట్లు రాబోయే ఎన్నికలలో డబ్బు ఖర్చు పెట్టగలవారికే పార్టీ టికెట్స్ అని ఆయన ఇటీవల చేసిన ప్రకటన, ఉద్యమాలు చేసిన వారిని, బడుగు బలహీన వర్గాలవారిని పక్కన బెట్టి ధన రాజకీయాలకు కేసీఆర్ స్వయంగా తెరలేపడం, రఘునందన్ రావు వంటివారు తెరాస నేతల బలవంతపు వసూళ్ల వ్యవహారాలు బయటపెట్టి సీబీఐకి పిర్యాదుచేయడం వంటి అనేక అంశాలు ప్రొఫెసర్ కోదండరాంను కేసీఆర్ కు దూరం చేసాయి. అందుకే ఆయన ఉద్యమ కారులకు, రాజకీయవేత్తలకు, మేధావులకు అందరికీ ప్రాతినిద్యం వహించే ఒక కొత్త రాజకీయ పార్టీ పెట్టేందుకు  ఆలోచిస్తున్నట్లు తెలుస్తోంది.   అయితే, ఉద్యమాలు చేయడం వేరు ఒక రాజకీయ పార్టీ స్థాపించి దానిని సమర్ధంగా నడిపించడం వేరే అనే సంగతి ఆయనకు బాగా తెలుసును గనుకనే ఇంతకాలంగా ఎంతమంది ఆయనపై ఒత్తిడి తెస్తున్నపటికీ ఆయన వెనుకంజ వేస్తునట్లు తెలుస్తోంది. అయితే, రాజకీయాలలో తలపండిన తెలంగాణా కాంగ్రెస్ యంపీలు ఇప్పుడు కొత్త పార్టీ స్థాపనలో, దాని నిర్వహణలో ప్రధాన పాత్ర పోషించేందుకు ముందుకు వస్తునపుడు, ఇక ఆయన కొత్త రాజకీయ పార్టీని స్థాపించడానికి అభ్యంతరం ఉండకపోవచ్చును. అందువల్ల కేశవ్ రావు-ప్రొఫెసర్ కోదండరాంల మధ్య నిన్న జరిగిన సమావేశానికి చాలా ప్రాదాన్యత సంతరించుకొంది.   తెలంగాణా ఉద్యమాలు పూర్తిగా చల్లబడిపోయిన ఈ తరుణంలో వారు తమ సమావేశానికి ఏమి ప్రాదాన్యత లేదని కేవలం తెలంగాణా ఉద్యమం గురించి చర్చించడానికే సమావేశమయ్యామని చెప్పడం మరింత ఆసక్తి కలిగిస్తోంది.   ఏది ఏమయినప్పటికీ, తెలంగాణాలో తెరాసకు ప్రత్యామ్నాయ రాజకీయ పార్టీ మరొకటి లేనంత కాలం కేసీఆర్ ఆడిందే ఆటగా పాడిందే పాటగా సాగుతూనే ఉంటుందని అభిప్రాయపడుతున్నఅనేక మంది రాజకీయ నాయకులు, ప్రజలు కూడా తెలంగాణాలో మరో కొత్త రాజకీయ పార్టీ ఆవశ్యకత ఎంతయినా ఉందని, దానికి ఇదే సరయిన తరుణమని భావిస్తున్నట్లు తెలుస్తోంది.

కాంగ్రెస్ విస్తృత స్థాయి విభేధాల సమావేశం

  ఈ రోజు హైదరాబాదులో జరిగిన కాంగ్రెస్ పార్టీ విస్తృత స్థాయి సమావేశాలు పార్టీ నేతల మద్య సయోధ్య కుదర్చకపోగా నేతల మధ్య ఉన్న అభిప్రాయ బేధాలను కార్యకర్తల ముందు బయటపెట్టుకొనేందుకు మాత్రమే ఉపయోగపడింది. నేతలు తమ అభిప్రాయ బేధాలు బయటపెట్టుకొంటే, ఈసారి సమావేశానికి హాజరయిన ప్రతినిధులు, నేతలను నిలదీయడం మరో విశేషం.   ముఖ్యమంత్రి కిరణ్ కుమార్ రెడ్డి తనకు ప్రభుత్వంలో ప్రాధాన్యత లేకుండా చేస్తున్నారని ఆగ్రహంతో ఉన్న ఉప ముఖ్యమంత్రి దామోదర రాజ నరసింహ, ఈ సమావేశం లో ముఖ్యమంత్రికి కాస్త గట్టిగానే చురకలు అంటించారు. ‘నేను’ అనుకొంటే అది అహంకారమని, ‘మనము’ అది అనుకొంటే మానవత్వం, ఐకమత్యానికి నిదర్శనమని అంటూ కిరణ్ ఒంటెత్తు పోకడలను ఎండగట్టారు. ప్రభుత్వం ఆర్భాటంగా పధకాలను ప్రవేశపెట్టడంతో సరిపెట్టుకోకుండా అవి సరిగ్గా అమలవుతున్నాయో లేదో కాస్త పట్టించుకొంటే మంచిదని అన్నారు. పార్టీలో, ప్రభుత్వంలో అందరినీ కలుపుకుపోగలిగితేనే రాగల ఎన్నికలలో విజయం సాదించగలమని, అలాకాకుండా ఎవరయినా ఒంటరిగా ఏదో సాదించేద్ధామని అనుకొంటే అది భ్రమే అవుతుందని ముఖ్యమంత్రి కిరణ్ కుమార్ రెడ్డికి చురకలు వేసారు.   ఆ తరువాత ముఖ్యమంత్రి కిరణ్ కుమార్ రెడ్డి నేతల మద్య ఐకమత్యం గురించి మాట్లాడుతున్నపుడు, ఆయన స్టేజ్ దిగివెళ్ళిపోయారు. ముఖ్యమంత్రి మాట్లాడుతూ పార్టీలో నేతల మధ్య సమస్యలు ఉంటే వాటిని పార్టీ అంతర్గత సమావేశాల్లోనే పరిష్కరించుకోవాలి తప్ప మీడియాకెక్కి నలుగురిలో తాము పలుచన అయ్యి, పార్టీని కూడా పలుచన చేయరాదని కోరారు. కార్యకర్తల కృషివల్లే నేడు తాము ఈస్థాయిలో ఉన్నామన్న సంగతిని వేదిక మీద ఉన్న ప్రతీ ఒక్కరూ గుర్తుపెట్టుకు మెలగాలని, కార్యకర్తలు లేనిదే పార్టీ లేదంటూ వారి మెప్పుపొందే ప్రయత్నం చేసారు. పార్టీలో పనిచేసే వారికి పదవులు వాటంతట అవే వెతుకొంటూ ఇంటికి వస్తాయని ఆయన అన్నారు.   పీసీసీ అధ్యక్షుడు బొత్స సత్తిబాబు కూడా ఇంచుమించు అవే అభిప్రాయాలు వ్యక్తం చేస్తూ రాబోయే ఎన్నికలలో పార్టీ విజయానికి అందరూ కలిసి కట్టుగా కృషి చేయాలని కోరారు.   అంతకు ముందు కొందరు కార్యకర్తలు మాట్లాడుతూ తాము పార్టీకోసం ఎంత కష్టపడి పనిచేసిన ఎన్నడూ పార్టీ గుర్తించలేదని, గత 30 ఏళ్లుగా పార్టీలో కార్యకర్తల పరిస్థితిలో పెద్దగా మార్పు రాలేదని ఆవేదన వ్యక్తం చేసారు. మరికొంత మంది కార్యకర్తలు నేతలు ఐకమత్యంగా మెలగుతూ పార్టీ విజయానికి కలిసి కట్టుగా కృషి చేయాలని కోరారు.   మొత్తం మీద ఈ సమావేశంలో ప్రసంగించిన నేతలందరూ కార్యకర్తలకి ప్రాధాన్యం ఈయాలని అంటూనే, కొందరు కార్యకర్తలు తమ తీరును తప్పుబడుతుంటే ‘విమర్శలు వద్దంటూ’ వారి మైక్ కట్ చేసి కూర్చోబెట్టేశారు. తమ మద్య ఉన్న అభిప్రాయ బేధాలను మీడియా ముందు బయటపెట్టుకోరాదంటూనే, మీడియా కవరేజ్ చేస్తున్న సమావేశంలో ఒకరిపై మరొకరు బాగానే కత్తులు దూసుకొన్నారు.   మరి కాంగ్రెస్ పార్టీ ఏమాశించి ఇటువంటి సమావేశాలు ఏర్పాటు చేసుకొంటుందో గానీ, ప్రతీ సారి అసలు కంటే ఈ కొసర్లే ఎక్కువ కనిపిస్తుంటాయి. కానీ, ప్రతీ సమావేశంలో పార్టీలో నేతలందరూ కేవలం కాంగ్రెస్ అధిష్టానానికి తప్ప మరెవరిని ఎవరూ కూడా ఖాతరు చేయరని తప్పక ఋజువు చేస్తుంటారు.ఈ సారి కూడా అదే మరో మారు ఋజువు చేసారు.

చంద్రబాబు పాదయాత్ర తో పార్టీ వెనక్కి

        వైఎస్సార్ కాంగ్రెస్ పార్టీ అధ్యక్షుడు జగన్మోహన్‌రెడ్డి తండ్రి అధికారాన్ని అడ్డం పెట్టుకుని భారత దేశంలో ఎక్కడా లేని విధంగా వేల కోట్లు సంపాదించి ఇప్పుడు జైల్లో ఉన్నారని, అలాంటి వ్యక్తి సీఎం అయితే మన పరిస్థితి ఏమిటన్నది ప్రజలు ఒక్కసారి ఆలోచించాలని ముఖ్యమంత్రి కిరణ్‌కుమార్‌రెడ్డి అన్నారు. కాంగ్రెస్ పార్టీ రాష్ట్ర విస్తృత స్థాయి సమావేళంలో సీఎం మాట్లాడుతూ..దివంగత వైయస్ రాజశేఖర రెడ్డి కాంగ్రెసు పార్టీ ద్వారానే ముఖ్యమంత్రి స్థాయికి ఎదిగాడనే విషయాన్ని ఆయన కుటుంబ సభ్యులు గుర్తుంచుకోవాలని ముఖ్యమంత్రి అన్నారు. కొత్తగా వచ్చిన వైయస్సార్ కాంగ్రెసు పార్టీ కాంగ్రెసు పార్టీ పథకాలను తమ పార్టీ జెండాలో పెట్టుకోవడం విడ్డూరంగా ఉందన్నారు. ప్రస్తుతం కొనసాగుతున్న పథకాలు కాంగ్రెసు పార్టీవే తప్ప కిరణ్ కుమార్ రెడ్డివో మరొకరివో కాదన్నారు. ముఖ్యమంత్రి స్థానంలో తాను ఉన్నా, బొత్స సత్యనారాయణ ఉన్నా కొనసాగుతాయన్నారు. అవి కాంగ్రెసు పార్టీ పథకాలు కాబట్టి వ్యక్తిగతంగా ఎవరివి కావన్నారు. తెలుగుదేశం పార్టీ అధ్యక్షుడు నారా చంద్రబాబు నాయుడు ఎంత దూరం నడిచినా ఒరిగేదేమీ లేదన్నారు. ఆయన ఎంత నడిచారో అంతకంటే ఎక్కువే ఆ పార్టీ నష్టపోతుందన్నారు.  కాంగ్రెసు పార్టీ రెండు రూపాయల బియ్యాన్ని రూపాయికి, పావలా వడ్డీని సున్నా వడ్డీకి చేసిందని, జగన్ పార్టీ జెండాలోని ఆ పథకాలను మార్చుతారా చెప్పాలని సీఎం ప్రశ్నించారు. మన పథకాలు వారి జెండాలో పెట్టుకోవడం విడ్డూరమన్నారు. కాంగ్రెసు పార్టీ తమను గుర్తించి టిక్కెట్ ఇచ్చిందని, కార్యకర్తల సహకారంతో తాము గెలిచామన్నారు.

కాంగ్రెస్ లో చిరంజీవి ఫ్లెక్సీ వివాదం

        కేంద్ర పర్యాటక మంత్రి, మెగాస్టార్ చిరంజీవి ఫోటోకు ముఖ్యమంత్రి వర్గం చెక్ పెట్టింది. కాంగ్రెస్ పార్టీ విస్తృతస్థాయి సమావేశం జరుగుతున్న చోట ఫ్లెక్సీలలో ఆయన ఫోటోకు చోటు లభించలేదు. దీంతో చిరు వర్గం నేత, కాంగ్రెస్ పార్టీ అధికార ప్రతినిధి గౌతం ఈ వ్యవహారంపై ఆందోళన వ్యక్తం చేశాడు. సమన్వయ కమటీ సభ్యుడు, కాంగ్రెస్ పార్టీ ముఖ్యనేత అయిన చిరంజీవి ఫోటో ఇలాంటి ముఖ్యమయిన కార్యక్రమంలో పెట్టకపోవడం ఏంటని ప్రశ్నించారు. అయితే చిరంజీవి ఫోటో పెట్టకపోవడం తప్పిదమేనని, భవిష్యత్ లో ఇలాంటి పొరపాట్లు జరగకుండా చూసుకుంటామని రాష్ట్ర కార్మిక మంత్రి దానం నాగేందర్ సర్ధిచెప్పారు. అయితే ముందస్తు వ్యూహం ప్రకారమే ముఖ్యమంత్రి వర్గం చిరు ఫోటోను దూరం పెట్టిందని తెలుస్తోంది.

రఘునందన్ వెనుక సీఎం కిరణ్

        ''మొదట పద్మాలయ స్టూడియో వ్యవహారంలో డబ్బు తీసుకున్నారని ఆరోపించిన రఘునందన్ తర్వాత సినీమాక్స్, రాజీవ్ రహదారి, ఎమ్మార్ అంటూ రోజుకో మాట మాట్లాడుతున్నాడు. టీఆర్ఎస్ నేతలు అవినీతికి పాల్పడ్డారంటూ చాలా ఆరోపణలు చేశావు. సీడీలు, సీసీ పుటేజిలు చాలా ఆధారాలు ఉన్నాయన్నావు. ఉంటే ఎక్కడికి పోయాయి ? వాటిని ఎందుకు బయట పెట్టలేదు ? నిజాయితీ ఉంటే ఆరోపణలు నిరూపించు. సీబీఐతో కాదు అంతర్జాతీయ దర్యాప్తు ఏజెన్సీలతో విచారణకు టీఆర్ఎస్ సిద్దం” అని టీఆర్ఎస్ పొలిట్ బ్యూరో సభ్యుడు దాసోజు శ్రవణ్ కుమార్ అన్నారు. రఘునందన్ వ్యవహారం చూస్తుంటే ఆయన ముఖ్యమంత్రి కిరణ్ కనుసన్నలలో పనిచేస్తున్నారని తేలిపోయింది. టీఆర్ఎస్ నుండి ఎమ్మెల్సీలుగా ఎన్నికయిన స్వామి గౌడ్, సుధాకర్ రెడ్డిలకు గన్ మెన్లు కావాలని ధరఖాస్తు చేసుకుని 45 రోజులు గడుస్తుంది. ఇప్పటికీ గన్ మెన్లను కేటాయించలేదు. రఘునందన్ డీజీపీని కలిసిన మరుసటి రోజే ఆయన ఇంటికి గన్ మెన్లను పంపారు. తెరవెనుక ముఖ్యమంత్రి ఈ ఆరోపణలు చేయిస్తున్నారని తేలిపోయిందని ఆయన విమర్శించారు.

కొణతాలకు వైకాపా నుండి త్వరలో ఉద్వాసన

  ఒకవైపు కాంగ్రెస్ పార్టీలో కళంకిత మంత్రులను పార్టీలోకి ఆకర్షించేందుకు గాలం వేస్తున్న వైకాపా, మరో వైపు పార్టీకి కష్టకాలంలో వెన్నంటి ఉన్న కొణతాల రామకృష్ణను అదే కాంగ్రెస్ పార్టీకి అప్పగించేందుకు సిద్దం అవుతుండటం విశేషం. దాడి వీరభద్రరావు వైకాపాలో చేరినప్పటి నుండి కొణతాల రామకృష్ణ పార్టీ కార్యక్రమాలకి, సమావేశాలకి కూడా దూరంగా ఉంటున్నారు. తమ రాజకీయ ప్రత్యర్ధిని పార్టీలోకి తీసుకోవడంపై ఆయన తన అసంతృప్తిని పార్టీ అధిష్టానానికి చాలా స్పష్టంగానే తెలియజేసారు. అయినా కూడా జగన్, దాడి వీరభద్రరావుకే ప్రాధాన్యతనీయడంతో కొణతాల వర్గీయులు అందరూ పార్టీకి దూరంగా ఉంటున్నారు.   ఈ సమస్యను పరిష్కరించేందుకు జగన్ తన దూతలుగా సోమయాజులు, సుబ్బారెడ్డి తదితరులను పంపినప్పటికీ, కొణతాల దాడితో కలిసి పనిచేసే ప్రసక్తే లేదని స్పష్టం చేయడమే కాకుండా, చంచల్ గూడా జైలుకి వెళ్లేందుకు కూడా అయిష్టత చూపడంతో సమస్య పరిష్కారం కాలేదు.   దానితో తీవ్ర ఆగ్రహం చెందిన జగన్ మోహన్ రెడ్డి పార్టీలో తన నిర్ణయాలను, ఆదేశాలను మన్నించనివారు వెంటనే తప్పుకోవడం మేలని గాటుగా ఒక సందేశం పంపడమే కాకుండా, దాడి వీరభద్రరావు రాకను నిరసిసస్తూ ఇటీవల కొణతాల సోదరుడు లక్ష్మినారాయణ మరియు ఆయన అనుచరులు సమావేశం నిర్వహించినందుకు, రామకృష్ణతో సహా వారందరికీ కూడా సంజాయిషీ కోరుతూ నోటీసులు పంపినట్లు తాజా సమాచారం.   నోటీసుల వరకు వచ్చిన కధలో సాధారణంగా సదరు నోటీసులు అందుకొన్న నేతలు పార్టీ నుండి బహిష్కరించబడినట్లే భావిస్తారు. కనుక కొణతాల రామకృష్ణ కూడా ఇంక మళ్ళీ కాంగ్రెస్ గూటికే చేరుకొంటారేమో.   అటు కాంగ్రెస్ నుండి ధర్మాన, సబితలు వైకాపాలోకి వస్తే, ఇటు నుండి కొణతాల ఆయన సోదరుడు లక్ష్మి నారాయణ కాంగ్రెస్ పార్టీలోకి వేళతారేమో? కొణతాల రామకృష్ణకు అనకాపల్లి పార్లమెంటు సభ్యుడు సబ్బం హరికి ఉన్న విబేధాలు కూడా ఆయన ఉద్వాసనకు మరో కారణమని తెలుస్తోంది.

ఈ అవినీతి పాలనకు అంతం ఎప్పుడు?

        ఈనాటి దేశ, ఆంధ్ర రాష్ట్రాల రాజకీయాల పరిస్థితి చాలా దుర్భరంగా ఉంది. ముందు రాష్ట్రం గురించి ప్రస్తావిస్తే .... రాష్ట్రంలో కాంగ్రెస్ ముందు రెండు పెను సవాళ్లు ఉన్నాయి. ఒకటి తెలంగాణ సమస్య, రెండవది వైకాపా. ఇక అవినీతి భాగోతం ఎటూ ఉండనే ఉంది. ఇప్పటికే జగన్ అవినీతి నేపథ్యంలో ఇద్దరు మంత్రులు పదవిని కోల్పోగా ఇప్పటికే పదవి కోల్పోయిన మంత్రి మోపిదేవి వెంకట రమణ .... ఇదే వరుసలో మరి కొందరు.... అయినా సరే 2014 ఎన్నికలలో కిరణ్ చాకచక్యంతో, బొత్స మంత్రాంగం తో పార్టీ నెగ్గుకు వచ్చేస్తుందని వారి ప్రగల్భాలు. మరి తెలంగాణ విషయానికి వస్తే అదో రగులుతున్న కుంపటి. ఎన్నికల వేళ ప్రతి వారికి అదొక అస్త్రం. దాన్ని తేల్చని వారు ఒకరు... అది తేలడం ఇష్టం లేని వారు ఒకరు .... దాని పేరు చెప్పి ఉద్యమం మాటున పార్టీని బలోపేతం చేసుకునే ధన అహంకారి మరొకరు. ఇదిలా ఉంటే ఈ రోజు ముగ్గురు టి- కాంగ్రెస్ ఎంపీలు వివేక్, మంద జగన్నాధం, రాజయ్యలు తెరాస తీర్థం పుచ్చుకున్నారు. రఘునందన్ గత కొద్ది రోజులగా తెరాస అధినేత కేసీఆర్ పై నిప్పులు చెరుగుతూ ఆధారాలతో కూడిన ఆరోపణలు చేస్తున్న సమయం లో కాంగ్రెస్ నుండి తెరాస లోకి ఇలాంటి వలసల వెనుక ఆంతర్యం ఏమిటనేది ప్రజలందరికీ విదితమే. ఈ 4 సం.రాలు గా మన రాష్ట్రం సాధించిన దానికన్నా కోల్పోయినదే ఎక్కువ.  కేంద్రంలో మరో పరిస్థితి. రైల్వే మంత్రిని, న్యాయ శాఖా మంత్రిని పదవుల నుండి తొలగించడం వెనుక సోనియా గాంధీ దురుద్దేశం ఉన్నట్లు సమాచారం. కారణం ... మన్మోహన్ సింగ్ తన రాష్ట్రానికి చెందిన బన్సాల్, అశ్విని కుమార్, కపిల్ సిబాల్... ఇలా చెప్పుకుంటూ పోతే చాంతాడంత వరుసతో ఆయన తన అనుకూల వర్గాన్ని తయారు చేసుకున్నాడని, అంతే కాక పలు రాజకీయ కీలక అంశాలలో ఆయన సతీమణి గుర్శరన్ కౌర్ కీలక పాత్ర వహిస్తున్నారని సోనియా గాంధీ కినుక వహించింది. అందులో భాగంగానే పంజాబ్ కు చెందిన ఇద్దరు కేంద్ర మంత్రులను అధికారం నుండి తప్పించింది.             అయితే రాష్ట్రానికి, కేంద్రానికి సంబందించి ఒక విషయం లో పోలిక ఉంది. ఇక్కడ రాజశేఖర రెడ్డికి అనుయాయులుగా ఉన్న మంత్రులు అవినీతి ఆరోపణలు ఎదుర్కొని పదవులు కోల్పోతున్నారు. పైగా తప్పును సమర్ధించటం, సహకరించటం కూడా తప్పే కదా అంటూ వారిపై అభియోగాలు మోపారు. అటువంటి తరుణం లో కేంద్ర ప్రభుత్వంలో ఉన్న కాంగ్రెస్ పార్టీ 2జీ స్పెక్ట్రం కుంభకోణం మొదలుకుని నిన్నటి సీబీఐ నివేదిక నిర్వాకం వరకు జరిగిన అన్ని అంశాలకు ప్రధాని నైతిక బాధ్యత వహించరా? అన్ని కుంభకోణాల మరకలు తమ ప్రభుత్వం పై పడుతుంటే కూడా ఆయన మౌనమే వహిస్తారా? మరి కుంభకోణాలను సమర్ధించడం కూడా తప్పే కదా. రాష్ట్రంలో ఒక న్యాయం .... కేంద్రంలో ఒక న్యాయమా? సోనియా గాంధీ అల్లుడు రాబర్ట్ వాద్రా గురించి కూడా ఏమీ మాట్లాడరు. అంటే ఇక్కడ ధర్మాన, సబితల లాగానే అక్కడ మన్మోహన్ కి కూడా అధికారం లేకపోయినా పదవి ఉంటే చాలా? అధికారం ఎంత దుర్వినియోగం అవుతున్నా పర్వాలేదా?              అసలు ఏమిటీ రాజకీయ కాంక్ష, పదవీకాంక్ష? ఏ మాత్రం రాజకీయ సామర్థ్యం, పరిపాలనచేవా లేని తన కొడుకు రాహుల్ గాంధీ కోసం అతని రాజకీయ భవిష్యత్తు కోసం 120 కోట్ల భారత ప్రజానీకం భవిష్యత్తును కాలరాయాలని చూస్తున్న సోనియా గాంధీని ఏమనాలి? 2014 ఎన్నికల నాటికి తన కొడుకు రాహుల్ చుట్టూ అంత ఆయన అనుయాయులే ఉండాలనే ఆమె తాపత్రయానికి మళ్ళీ త్యాగం అనే పేరెందుకు? సోనియా గాంధీ ఈ తాపత్రయం కారణంగా ప్రధాని త్వరలోనే తన పదవిని కోల్పోయినా ఆశ్చర్యపోనవసరం లేదు. కేంద్ర ప్రభుత్వానికి అంటిన కుంభకోణాల మరకల విషయంలో మన్మోహన్ సింగ్ తో పాటు సోనియా గాంధీ నైతిక బాధ్యత వహించదా? అలా బాధ్యత వహిస్తే రాహుల్ ను ప్రజలు ఎలా ఆదరించాలి?                    సోనియా గాంధీకి యావత్ రాజకీయ నాయకులందరూ ఎందుకు భయపడుతున్నారు? 10 సం.రాల క్రితం సోనియా గాంధీ ప్రధాని అవ్వడానికి వీల్లేదని అడ్డుపడిన భాజపా ఆమె అల్లుడు అవినీతి కేసుల విషయంలో సీబీఐ విచారణకు భాజపా కాని ఇతర పార్టీలు కానీ ఎందుకు పట్టుపట్టడం లేదు?ఒకనాడు రాజశేఖర రెడ్డి నియంతలా వ్యవహరించిన ఫలితం సదరు కేబినెట్ మంత్రులు ఒక్కొక్కరుగా అవినీతి ముద్ర వేయించుకుంటూ ఉంటే, సోనియా గాంధీ నియంత ధాటికి కాంగ్రెస్ పునాదులే కదిలిపోతున్నాయి. తద్వారా దేశ పురోగతి చిన్నాభిన్నమైపోతొంది.                  ఏది ఏమైనా అంతరిక్షం వైపు పరుగులు పెడుతున్న ఈ ఆధునిక యుగంలో భారత దేశం లో సోనియా గాంధీ హయాంలో కాంగ్రెస్ పార్టీ నిర్వహిస్తున్నది నియంత పరిపాలన. మళ్ళీ దానికి ప్రజాస్వామ్యమనే పేరెందుకు? కేవలం ఓట్లు అడుక్కోవడానికి తప్ప. కాబట్టి సగటు భారతీయుడా! మేలుకో! నీలో చేవ ఉంటే ... చైతన్యం ఉంటే ... నీజాతిని జాగృతం చెయ్యి. అది నీ బాధ్యత... నీ కర్తవ్యం.