ఐండియన్ ప్రీమియర్ లీగ్ (ఐపీఎల్) 2026 సీజన్‌లో రాజస్థాన్ రాయల్స్ యువ సంచలనం వైభవ్ సూర్యవంశీ  రికార్డుల మోత మోగిస్తున్నాడు. తాజాగా లక్నో సూపర్ జెయింట్స్ తో మంగళవారం ( మే 19) జైపూర్ వేదికగా జరిగిన మ్యాచ్ లో ఆకాశమే హద్దుగా చెలరేగిపోయాడు. లక్నో సూపర్ జాయింట్స్‌తో జరిగిన అత్యంత కీలకమైన ఈ మ్యాచ్ లో  15 ఏళ్ల  లెఫ్ట్ హ్యాండ్ బ్యాటర్ విధ్వంసకర బ్యాటింగ్ తో చెలరేగిపోయాడు.   సిక్సర్ల సునామీ సృష్టించాడు. వైభవ్ బ్యాటింగ్ విధ్వంసంతో   లక్నో నిర్దేశించిన భారీ లక్ష్యం సైతం చిన్నబోయింది. ఈ అద్భుత విజయంతో రాజస్థాన్ రాయల్స్ జట్టు ప్లేఆఫ్స్ రేసులో తన అవకాశాలను  సజీవంగా ఉంచుకుంది.

ఈ మ్యాచ్‌లో మొదట బ్యాటింగ్ చేసిన లక్నో సూపర్ జాయింట్స్ నిర్ణీత ఓవర్లలో 5 వికెట్ల నష్టానికి 220 పరుగుల భారీ స్కోరు సాధించింది. లక్నో ఓపెనర్ మిచెల్ మార్ష్ కేవలం 57 బంతుల్లో 11 ఫోర్లు, 5 సిక్సర్లతో 96 పరుగులు చేసి సెంచరీ చేజార్చుకున్నాడు. హర్ష్ మరో ఓపెనర్ జోష్ ఇంగ్లిస్ 60 పరుగులు  కలిసి  మొదటి వికెట్‌కు 109 పరుగుల భాగస్వామ్యాన్ని నెలకొల్పారు. రాజస్థాన్ బౌలర్లలో యష్ రాజ్ పుంజా రెండు వికెట్లు పడగొట్టి లక్నో పరుగుల వేగానికి కాస్త అడ్డుకట్ట వేశాడు.  అనంతరం 221 పరుగుల భారీ లక్ష్యంతో బరిలోకి దిగిన రాజస్థాన్ రాయల్స్‌కు ఓపెనర్ వైభవ్ సూర్యవంశీ ఊహించని రీతిలో అదిరిపోయే ఇన్నింగ్స్ అందించాడు. సాధారణంగా మొదటి బంతి నుంచే అటాక్ చేసే వైభవ్, ఈ మ్యాచ్‌లో ఆరంభంలో కాస్త సంయమనం పాటించాడు. తొలి 10 బంతుల్లో కేవలం 5 పరుగులు మాత్రమే చేసిన ఈ యువ ఆటగాడు, పిచ్‌పై పట్టు సాధించిన తర్వాత లక్నో బౌలర్లపై నిర్దాక్షిణ్యంగా విరుచుకుపడ్డాడు.

తర్వాతి 28 బంతుల్లోనే ఏకంగా 88 పరుగులు రాబట్టాడు.  మొత్తంగా కేవలం 38 బంతులు ఎదుర్కొన్న వైభవ్ 7 ఫోర్లు, 10  సిక్సర్లతో 93 పరుగులు సాధించాడు. కేవలం 7 పరుగుల తేడాతో సెంచరీ మార్క్‌ను అందుకోలేకపోయినప్పటికీ.. వైభవ్ బ్యాటింగ్ విధ్వంసం  రాజస్థాన్ జట్టుకు విజయాన్నందించింది.   ఈ ఇన్నింగ్స్ ద్వారా వైభవ్ సూర్యవంశీ ఐపీఎల్ చరిత్రలో పలు రికార్డులను తన ఖాతాలో జమ చేసుకున్నాడు.

ఈ సీజన్‌లో పవర్‌ప్లేలో అత్యధిక పరుగులు చేసిన బ్యాటర్ల జాబితాలో ఆస్ట్రేలియా ఆటగాడు ట్రావిస్ హెడ్‌ను వెనక్కి నెట్టి వైభవ్   రెండో స్థానానికి చేరుకున్నాడు. అలాగే ఈ సీజన్‌లో తన సిక్సర్ల సంఖ్యను 53కి పెంచుకుని, క్రిస్ గేల్ నెలకొల్పిన ఒకే సీజన్‌లో అత్యధిక సిక్సర్ల (59) రికార్డుకు కేవలం 7 సిక్సర్ల దూరంలో నిలిచాడు. వైభవ్ అద్భుత ప్రదర్శనకు ప్లేయర్ ఆఫ్ ది మ్యాచ్ అవార్డు లభించింది.