ఎన్నికల బరిలో స్టార్ హీరో..!!
తమిళ సినిమాలో విప్లవాత్మక నిర్ణయాలతో సంచలనం సృష్టిస్తున్న నటుడు విశాల్ రాజకీయాల్లోనూ సత్తా చాటుకునేందుకు సిద్ధమైనట్టు కనిపిస్తోంది. రాజకీయాల్లో విశాల్ ప్రయాణం గతేడాదిలోనే ఆరంభమైంది. 2017, డిసెంబరులో జరిగిన ఆర్కేనగర్ ఉప ఎన్నికల్లో పోటీ చేయనున్నట్లు ప్రకటించి, ప్రచారానికి సంబంధించిన ఏర్పాట్లు కూడా సిద్ధం చేసుకున్నారు. అయితే ఆయన దాఖలు చేసిన నామినేషన్ పత్రాన్ని రిటర్నింగ్ అధికారి నిరాకరించడంతో ఆ ఎన్నికల్లో పోటీ చేయలేకపోయారు.
ఆ తరువాత మళ్లీ సినిమాల్లో బిజీ అయినప్పటికీ, తరచూగా ప్రజా సమస్యలపై గళం విప్పుతూనే ఉన్నారు. ఇటీవల అభిమాన సంఘాలను ‘మక్కల్ నల ఇయక్కం’గా మార్చుతున్నట్టు ప్రకటించారు. ఈ నేపథ్యంలో విశాల్ తాజాగా మీడియాతో మాట్లాడుతూ, గ్రామాల్లో ప్రతి ఇంటా సిరులు కురవాలని, భావితరం భవిత బాగుండాలని కాంక్షిచే ప్రతి ఒక్కరూ తనకు మద్దతు పలకాలని పిలుపునిచ్చారు. తాను స్థాపించిన 'మక్కల్ నల ఇయక్కం' పార్టీగా మారుతుందని, ఇక నుంచి తాను క్రియాశీల రాజకీయాల్లో పాల్గొనబోతున్నట్టు ప్రకటించారు. అంతేకాకుండా తిరుప్పరంకుండ్రం శాసనసభ నియోజకవర్గ ఉప ఎన్నికల్లో పోటీచేయనున్నట్టు విశాల్ సూచన ప్రాయంగా వెల్లడించడంతో అభిమానులను ఉత్సాహంలో నెలకొంది.