Politics

స్పీకర్‌ను కలవనున్న సీమాంద్ర ఎంపిలు

చాల రోజులుగా రాజీనామాలు చేస్తామంటూ చెపుతున్న సీమాంద్ర ఎంపిలు నేడు స్పీకర్‌ కలవనున్నారు. 60 రోజులుగా సీమాంద్రలో ఉద్యమాలు జరుగుతున్నా కేంద్ర ఏ మాత్రం స్పందిచకపోవటంతొ ఎంపిలు రాజీనామలు చేయాలని నిర్ణయించుకున్నారు. అందులో బాగంగానే స్పీకర్‌ను కలిసి తమ రాజీనామలు ఆమోదించాల్సిందిగా కోరనున్నారు. స్పీకర్‌ను కలవనున్న వారిలో లగడపాటి రాజగోపాల్‌, అనంత వెంకట్రామిరెడ్డి, సాయి ప్రతాప్‌, ఉండవల్లి అరుణ్‌కుమార్‌, హర్షకుమార్‌, ఎస్‌పివై రెడ్డి ఉన్నారు. వీరంతా ఆగస్టు 2న ఇచ్చిన తమ రాజీనామలను ఆమోదించాల్సిందిగా స్పీకర్‌ను కోరనున్నారు. మూడు రోజుల కిందటే స్పీకర్‌ ను కలవాల్సి ఉండగా, ఆమె బిజీ ఉండటంతో అపాయింట్‌మెంట్‌ను మూడు రోజులు పోస్ట్‌పోన్‌ చేశారు.

సోనియా అబద్దం చెపుతుంది

రాష్ట్రవిభజన నేపధ్యంలో ఎంపి సాయిప్రతాప్‌ సంచలన వ్యాఖ్యలు చేశారు. అధిష్టానం, సోనియా అందరికి చెప్పి నిర్ణయం తీసుకున్నమనటం అబద్దం అన్నారు సాయిప్రతాప్‌. నవ్వుతూనే మాట్లాడి మమ్మల్ని అన్యాయం చేశారని ఆయన ఆవేదన వ్యక్తం చేశారు. రాష్ట్రాన్ని సమైక్యంగా ఉంచాలని డిమాండ్‌ చేసే దుస్థితి వస్తుందని ఎన్నడూ అనుకోలేదని అన్నారు. విభజన పై నిర్ణయం తీసుకుంటున్నామని అసలెవరికి చెప్పారో కూడా తెలియదన్నారు. తనతో పాటు సీమాంద్ర ఎంపిలు మంత్రులు అందరు చివరి వరకూ సమైక్యాంధ్ర డిమాండ్‌నే వినిపించామని చెప్పారు. తాను భగవద్గీతపై ప్రమాణం చేసి మరీ చెబుతానని.. తమకు పదవులు ముఖ్యం కాదని ఆయన స్పష్టం చేశారు. కేంద్ర తెలంగాణ విషయంలో ఎంత ముందుకు వెళ్లాలని ప్రయత్నించిన అది జరగదని చెప్పారు. తెలంగాణ బిల్లు ఆమోదం పొందే అవకాశం లేదన్నారు. శిక్షపడ్డ ప్రజాప్రతినిధులను కాపాడేందుకు కేబినెట్ జారీ చేసిన ఆర్డినెన్స్‌ను చించి పారేయాలని రాహుల్ గాంధీ చెప్పినప్పుడు.. ఎనిమిది కోట్ల మంది ఐక్యతను కాపాడేందుకు తెలంగాణ పై కేబినెట్ నోట్‌ను ఎందుకు చించే యకూడదని సాయిప్రతాప్ ప్రశ్నించారు. కేంద్ర క్యాబినెట్‌ నిర్ణయాన్ని రాహుల్‌ వ్యతిరేఖించినప్పుడు తాము వ్యతిరేకించటంలో తప్పేముందని ప్రశ్నించారు.

అధిష్టానంపై సియం తిరుగుబాటు

తొలి నుంచి తనని తాను సమైక్యవాదిగా చెప్పుకుంటున్న కిరణ్‌కుమార్‌ రెడ్డి మరోసారి అధిష్టానం మీద తిరుగుబాటు చేశారు. కిరణ్‌ వైఖరి గురించి దిగ్విజయ్‌సింగ్‌ వ్యతిరేఖ వ్యాఖ్యలు చేసిన నేపధ్యంలో ప్రెస్‌ మీట్‌ పెట్టి మరి తాను సమైక్యవాదినే అని చెప్పారు. రాష్ట్ర విభజన అంత సులువు కాదని మరోసారి తెలిపిన సియం, రాష్ట్రం విడిపోతే వచ్చే సమస్యలు ఎవరు పరిష్కరించలేరన్నారు. రాష్ట్రం విడిపోతే జలయుద్దాలు తప్పవని, మ్యాప్‌ చూపించి మరీ వివరించారు. సమ్మె విరమించమని ఉద్యోగులను కోరడానికి ప్రెస్‌మీట్‌ పెట్టిన సియం తన ప్రసంగం అంతా అథిష్టానం తప్పులను ఎత్తి చూపించడానికి ప్రయత్నించారు. తనకు ప్రదవి కన్నా ప్రజా ప్రయోజనాలే ముఖ్యమని అవసరమైతే ముఖ్యమంత్రి పదవిని కూడా వదులుకోవడానికి సద్దమన్నారు. దిగ్విజయ్‌సింగ్‌ తనను సమైక్యాంద్ర ముఖ్యమంత్రి అని అన్నప్పుడల్లా తనకు పట్టుదల ఇంకా పేరుగుతుందన్నసియం, ప్రజలా పార్టీనా అన్న ప్రశ్న తలెత్తితే ప్రజలవైపే ఉంటామన్న సంకేతాలు ఇచ్చారు. నెహ్రూ, ఇందిర తీసుకున్న నిర్ణయాల కన్నా ఇప్పుడు తీసుకున్న నిర్ణయం గొప్పదా అని సోనియా నాయకత్వాన్ని పరోక్షంగా ప్రశ్నించారు. పార్టీ నిర్ణయానికీ, ప్రభుత్వ నిర్ణయానికీ చాలా తేడా ఉంది. విభజనపై ఇప్పుడు కాంగ్రెస్‌ రాజకీయ నిర్ణయం తీసుకుంది. దానివల్ల తలెత్తే సమస్యలను పరిష్కరించి కేంద్రం ముందుకు వెళ్లాలని సూచించారు. ప్రజల్లో ఉన్న ఆందోళనలు నివృత్తి చేయకుండా మేం అన్నీ చూసుకుంటాం అంటే అది రాజకీయ ప్రకటనే అవుతుంది. పరిష్కారాలపై కేంద్రం లిఖితపూర్వకంగా భరోసా ఇవ్వాలి. సమస్యలకు పరిష్కారం చూపిన తర్వాతే ప్రకటన చేయాల్సింది.

అద్దెకు వచ్చి ఇళ్ళు నాదంటే ఎట్లా?

ఎపిఎన్జీవో అధ్యక్షుడు అశోక్ బాబు, ఎంపి లగడపాటి రాజగోపాల్‌లది ఒకే స్కూలులా ఉందని, ఇల్లు అద్దె కోసం వచ్చి ఇల్లు నాదే అన్న చందంగా అశోక్ బాబు మాట్లాడుతున్నాడని రాజ్యసభ సభ్యుడు వి.హనుమంతరావు ఎద్దేవా చేశారు. కేంద్రం రోడ్ మ్యాప్ అడిగినప్పుడు ముఖ్యమంత్రి కిరణ్ కుమార్ రెడ్డి సమైక్యం గురించి ఎందుకు మాట్లాడలేదని ప్రశ్నించారు. సీమాంధ్ర కాంగ్రెస్ నేతలు సమైక్యాంధ్ర ఆలోచన పక్కన పెట్టి సీమాంధ్రలో కాంగ్రెస్ పార్టీని ఎలా బతికించుకోవాలో ఆలోచించుకోవాలని సూచించారు. తెలంగాణ డిమాండ్ కు వైఎస్ రాజశేఖర్ రెడ్డి విత్తనం వేస్తే, చంద్రబాబు నాయుడు దానికి నీళ్లు పోశారని అన్నారు.ముఖ్యమంత్రిని చూసిన చంద్రబాబు నాయుడు తెలంగాణ విషయంలో రివర్స్ అయ్యారు. బెయిలు మీద జెయిలు నుండి వచ్చిన జగన్ కు అట్టహాసంగా స్వాగతం పలకడం సిగ్గు చేటు అని వి.హనుమంతరావు విమర్శించారు.

లగడపాటి అన్న చీకటి ఒప్పందాలు ఏమిటి?

విజయవాడ ఎమ్.పి లగడపాటి రాజగోపాల్ తమ రాజీనామాలను ఆమోదింప చేసుకున్న తర్వాత కొన్ని చీకటి ఒప్పందాలను బయటపెడతానంటున్నారు. రాజీనామా ఆమోదించుకునేందుకు ఈ నెల 24న స్పీకర్ వద్ద అపాయింట్ మెంట్ తీసుకుంటే స్పీకర్ అందుబాటులోకి రాలేదు. వచ్చే నెల 2న కలవాలని చెప్పారు. దీంతో రాజీనామాల ఆమోదం కోసం చూస్తున్నారు. జగన్ తో కాంగ్రెస్ కుమ్మక్కు అయిందా ? అని లగడపాటిని అడిగితే ఏమో చాలా మంది చాలా మాటలు అంటున్నారు. కానీ నా రాజీనామా ఆమోదం పొందితే నాకు తెలిసిన విషయాలు బయటపెడతా అని అంటున్నారు. అంటే సోనియాగాంధీ, దిగ్విజయ్ సింగ్ లపైనే ఈయన ఆరోపణ చేస్తారా? లేక ఇంకేమైనా కొత్త విషయం చెబుతారా?అన్నది చూడాలి.

కేంద్ర ఆర్డినెన్స్ చించిపారేయాలి: రాహుల్ సంచలన వ్యాఖ్య

కేంద్ర ప్రభుత్వ నిర్ణయంపై కాంగ్రెస్ ఉపాధ్యక్షుడు రాహుల్ గాంధీ సంచలన వ్యాఖ్యలు చేశారు. నేర చరితులను రక్షించడానికి కేంద్రం తీసుకు వచ్చిన ఆర్డినేన్స్‌పై ఆయన మండిపడ్డారు. ఆర్డినెన్స్‌ను చింపి పారవేయాలని రాహుల్ పేర్కొన్నారు. ఇటీవల నేర చరితులు ఎన్నికల్లో పోటీ చేయడానికి అనర్హులని సుప్రీంకోర్టు పేర్కొంటూ తీర్పు ఇచ్చిన విషయం తెలిసిందే. దీనిపై 24న కేబినెట్‌లో చర్చ జరిపి ఆమోదించిన అనంతరం రాష్ట్రపతి ఆమోదం కోసం రాష్ట్రపతి భవన్‌కు పంపారు. ఈ బిల్లు ఇంకా అక్కడే ఉంది. బీహర్ ఆర్జేడీ అధ్యక్షుడు లాలూ ప్రసాద్ పశువుల దాణ కుంభకోణం కేసులో ఆరోపణలు ఎదుర్కొంటూ విచారణ జరుగుతున్న విషయం తెలిసందే. నేరం రుజువు అయితే లాలూ ఎన్నికలలో పాల్గొనే అర్హత కోల్పోతారు. అందుకేసమే కేంద్రం ఈ ఆర్డినెన్స్‌ను తీసుకువచ్చిందని పలువురు రాజకీయవేత్తలు అభిప్రాయపడుతున్నారు. ఈరోజు రాహుల్ గాంధీ చేసిన వ్యాఖ్యలు సమంజసమేనని పలువురు విశ్లేషకులు పేర్కొన్నారు.

దినేష్ రెడ్డికి క్యాట్ లో మళ్ళీ ఎదురుదెబ్బ

డీజేపీ దినేష్ రెడ్డికి ఈ నెల 30వ తేదీతో పదవీకాలం ముగుస్తుంది. సరిగ్గా ఇటువంటి సమయంలోనే ఆయన ఒకేసారి అనేక వివాదాలలో చిక్కుకొన్నారు. పైగా అతని ఆస్తులపై సీబీఐ విచారణ కూడా మొదలయింది. అందువల్ల ప్రభుత్వం అతని పదవీ కాలం పొడిగించేందుకు నిరాకరించడంతో ఆయన కేంద్ర పరిపాలన ట్రిబ్యునల్ ను ఆశ్రయించారు. కానీ అక్కడ కూడా ఆయనకు చుక్కెదురయింది. ట్రిబ్యునల్ కూడా ప్రభుత్వ నిర్ణయాన్నే సమర్ధించడంతో ఆయన మళ్ళీ మరో ప్రత్యేక పిటిషను వేసారు. కానీ ట్రిబ్యునల్ ఆయన రెండో పిటిషన్నుకూడా ఈ రోజు తిరస్కరించింది. ప్రభుత్వం ఆయన సమర్ధతను గుర్తించి, తనంతట తానుగా ఆయన పదవీ కాలం పొడిగించి ఉంటే అది ఆయనకు ఎంతో గౌరవ ప్రదంగా ఉండేది. కానీ సమస్యలు చుట్టుముట్టిన ఈ తరుణంలో తను అధికారంలో ఉండటం చాలా అవసరమని ఆయన భావిస్తున్నందునే ఆయన తన పదవిని కాపాడుకోవడానికి ఇంత పోరాటం చేస్తున్నారనిపిస్తుంది. ఇంకా కేవలం మూడు రోజులు మాత్రమే పదవీ కాలం మిగిలిన ఈ తరుణంలో ఆయన హుందాగా వ్యవహరించి తప్పుకొంటే బాగుంటుందేమో.

కిరణ్ సర్కార్ కి కౌంట్ డౌన్

అంటోనీ కమిటీ తో సంబంధం లేకుండా అక్టోబర్ మొదటి వారంలో తెలంగాణ నోట్ ని కేంద్ర మంత్రిమండలి సమావేశంలో ప్రవేశపెడతామని కాంగ్రెస్ పార్టీ రాష్ట్ర వ్యవహారాల ఇన్-చార్జ్ దిగ్విజయ్ సింగ్ నిన్న ముహూర్తం ఖరారు చేసారు. ఇక అక్టోబర్ 3లోగా విభజన ప్రక్రియ మొదలుపెట్టకపోతే మళ్ళీ సకలజనుల సమ్మెకు దిగుతామని టీ-ఉద్యోగులు తాజాగా హెచ్చరికలు జారీ చేసారు. అదేవిధంగా టీ-నోట్ ను ముందుకు కదిపితే హైదరాబాదులో మిలియన్ మార్చ్ చేపడతామని ఏపీఎన్జీవోల నేత అశోక్ బాబు గతంలోనే హెచ్చరించారు. ఒకవేళ టీ-నోట్ పై ఏ మాత్రం అడుగు ముందుకు వేసినా వెంటనే తమ పదవులకు రాజీనామాలు చేస్తామని కొందరు సీమాంధ్ర యంపీలు కేంద్ర ప్రభుత్వాన్ని హెచ్చరిస్తున్నారు. ఒకే అంశంపై ఇన్నిప్రతిస్పందనలు వస్తున్నఈ సమయంలో కాంగ్రెస్ అధిష్టానం ఇక దైర్యంగా ముందుకు సాగాలంటే బహుశః రాష్ట్రపతి పాలన ఒక్కటే శరణ్యం. తెలంగాణా నేతలు కూడా రాష్ట్రపతి పాలన విధించి విభజన ప్రక్రియను పూర్తి చేయమని గట్టిగా కోరుతున్నారు. ఒకవేళ కాంగ్రెస్ అధిష్టానం టీ-నోట్ తయారు చేసి శాసనసభ ముందుకు పంపినా అది ఆమోదం పొందే అవకాశం లేదు. ఎందుకంటే ముఖ్యమంత్రి కిరణ్ కుమార్ రెడ్డితో సహా సీమాంధ్ర నేతలందరూ కేవలం తెలంగాణా బిల్లును శాసనసభలో ఓడించేందుకే ఇంకా పదవులలో కొనసాగుతున్నారు. ఇటువంటి పరిస్థితిలో కాంగ్రెస్ అధిష్టానం టీ-నోట్ ను ముందుకు పంపి భంగపడే కంటే తనకున్న విచక్షణాధికారాలను ఉపయోగించుకొని దానిని నేరుగా పార్లమెంటులోనే ప్రవేశ పెట్టవచ్చును. ఇక తన చేతికి మట్టి అంటకుండా జగన్మోహన్ రెడ్డి ద్వారా కిరణ్ కుమార్ రెడ్డిని, అతని ప్రభుత్వాన్నివదిలించుకొని రాష్ట్రంలో రాష్ట్రపతి పాలన విధించడానికే మొగ్గు చూపవచ్చును. ఈ లోగా అతని ద్వారానే ఏపీఎన్జీవోల సమ్మెను పక్కదారి పట్టించి దానిలో చీలికలు తీసుకువచ్చినిలిచిపోయెలా చేయవచ్చును. ఇప్పటికే జగన్ ఆ రెండు పనులలో కొంత ముందడుగు వేసారు. త్వరలోనే అతను మిగిలిన పని కూడా పూర్తి చేయగానే, రాష్ట్రపతి పాలన విధించి రాష్ట్ర విభజన ప్రక్రియను మొదలుపెట్టవచ్చును.అంటే దిగ్విజయ్ ప్రకటించిన అక్టోబర్ మొదటి వారమే కిరణ్ సర్కారుకి ఆఖరి వారం అయ్యే అవకాశున్నాయి.

సుప్రీంకోర్టు సంచలన తీర్పు

ఇటీవల సుప్రీంకోర్టుకి కేంద్ర ప్రభుత్వానికి మధ్య ప్రచ్చన్నయుద్ధం జరుగుతున్నట్లు కనిపిస్తోంది. కొద్ది వారాల క్రితం సుప్రీంకోర్టు “నేరాభియోగాలు ఎదుర్కొంటూ జైలుపాలయిన ప్రజాప్రతినిధులు ఎన్నికలలో పోటీకి అనర్హులని” తీర్పు ప్రకటించగానే, ప్రభుత్వం హుటాహుటిగా కోర్టు ఆదేశాలను కొట్టి వేస్తూ ఒక చట్ట సవరణ చేసింది. ఆ తరువాత గ్యాస్ వినియోగదారులకు ఆధార్ కార్డుతో అనుసంధానం తప్పని సరిచేస్తూ ప్రభుత్వం ప్రకటించగానే, ఒక్క గ్యాస్ మాత్రమే కాక, దేనికి కూడా ఆధార్ తో అనుసంధానం చేయవలసిన అవసరం లేదని సుప్రీంకోర్టు తాజాగా తీర్పు చెప్పింది. ఇక లోక్ పాల్ బిల్లు కోసం, ప్రస్తుత ఎన్నికల విధానంలో సవరణల కోసం పోరాడిన అన్నాహజారే, ప్రభుత్వ వైఖరిని ఇక మార్చలేమని తన పోరాటం విరమించుకొన్న తరువాత, ఆయన ప్రధాన డిమాండ్లలో ఒకటయిన ‘ఓటర్లకు అభ్యర్థులను తిరస్కరించే హక్కును’ కల్పిస్తూ సుప్రీం కోర్టు శుక్రవారం తీర్పునిచ్చింది. ఓటర్లకు పోటీ చేస్తున్నఅభ్యర్ధులలో ఎవరూ నచ్చకపోతే అటువంటి వారిని తిరస్కరించేందుకు వీలుగా ఎలక్ట్రానిక్ ఓటింగ్ మెషిన్లలోతప్పనిసరిగా ‘రిజక్ట్’ బటన్ కూడా ఏర్పాటు చేయవలసిందేనని కోర్టు ఎన్నికల సంఘానికి ఆదేశాలు జారీ చేసింది. దీనివల్ల రాజకీయ పార్టీలు సరయిన అభ్యర్ధులను మాత్రమే పోటీలో నిలబెట్టగలవని కోర్టు ఆశాభావం వ్యక్తం చేసింది. మరో రెండు నెలలలో మధ్యప్రదేశ్, ఛత్తీస్ ఘర్ రాష్ట్రాలలో శాసనసభ ఎన్నికలు జరుగనున్న ఈ తరుణంలో సుప్రీంకోర్టు ఇటువంటి ఆదేశాలు జారీ చేయడం అన్ని రాజకీయ పార్టీలకు కూడా జీర్ణించుకోవడం కష్టమే. గనుక మళ్ళీ అన్ని రాజకీయపార్టీలు చేతులు కలిపి కోర్టు తీర్పుని రద్దు చేస్తూ త్వరలోనే మరో మారు చట్ట సవరణ చేస్తారేమో!

రాజీనామాలు వెనక్కి తీసుకొండి ; అశోక్‌బాబు

ఇన్నాళ్లు ప్రజా ప్రతినిధులు రాజీనామాలు చేయాలని పట్టుపట్టిన అశోక్‌బాబు ఇప్పుడు మాట మార్చారు. ఎమ్మెల్యేలు రాజీనామలు చేయాల్సిన అవసరం లేదన్న ఆయన ఇప్పటికే రాజీనామ చేసిన వారిని కూడా వెనక్కి తీసుకోవాల్సిందిగా కోరారు. అంతేకాదు ఈ విషయంపై అన్ని పార్టీల ఎమ్మెల్యేలకు లేఖ రాయనున్నట్టుగా ఆయన తెలిపారు. ఎమ్మెల్యేలు రాజీనామాలు చేయాల్సిన అవసరం లేదన్న అశోక్‌ బాబు ఎంపిలను మాత్రం రాజీనామ చేయమంటున్నారు. అసెంబ్లీలో రాష్ట్రవిభజన తీర్మానాన్ని వ్యతిరేకించటానికి ఇక్కడ ఎమ్మెల్యేలు అసెంబ్లీలో ఉండలాని, అలాగే కేంద్రంలో బిల్లు వీగిపోవాలంటే అక్క బలం ఉండకూడదని అందుకే రాష్ట్ర నాయకులు రాజీనామా చేయాల్సిన అవసరం లేదని అశోక్‌బాబు వివరించారు. ఇప్పటికే దాదాపు 60 రోజులుగా ఉద్యమం ఉదృతంగా జరగుతున్న కేంద్రంలో చలనం లేదని కాబట్టి నాయకులు పార్టీల మీద వత్తిడి తీసుకొచ్చి సమైక్యా రాష్ట్రం కోనసాగేలా నాయకులు కృషి చేయాలని కోరారు.

ముంబయిలో కూలిన భవనం

ఈ రోజు ఉదయం ముంబయిలో భారీ ప్రమాదం జరిగింది తెల్లవారుజామున 6.25గంటలకు డాక్‌యార్డ్‌ రోడ్‌ సమీపంలోని అయిదు అంతస్తుల భవనం కుప్పకూలింది. అయితే ప్రమాదంలో ఎంత మంది గాయపడ్డారు ఎంత మంది మరణించారు అన్నవిషయం ఇంక తెలియలేదు.. శిథిలాల కింద చాలా మంది ఉండవచ్చని అనుమానిస్తున్నారు. పది బృందాలతో శిథిలాల తొలగింపు చర్యలు చేపట్టారు. ఇప్పటికే పలువురిని కాపాడిన సిబ్బంది చికిత్స నిమిత్తం జేజే ఆసుపత్రికి తరలించారు. ఈ ఏడాదిలో ఇలాంటి ఘటనలు ముంబయిలో మూడు జరిగాయి. ఏప్రిల్‌ 4న ఏడంస్థుల భవనం కూలి 76 మంది చనిపోగా, జూన్‌ 10న జరిగిన మరో ప్రమాదంలో 10 మంది మరణించారు.

డిజిపిగా కొన‌సాగ‌నివ్వండి ప్లీజ్‌

ఈ నెల 30తో డిజిపి దినేష్ రెడ్డి ప‌ద‌వి కాలం ముగుస్తుండ‌టంతో, త‌న ప‌ద‌వీ కాలాన్ని పొడిగించాలంటూ డీజిపి క్యాట్‌ను ఆశ్రయించారు. అయితే దీనిపై గురువారం విచారించిన క్యాట్ డీజిపి అభ్యర్ధన‌ను తిర‌స్కరించింది. దినేష్ రెడ్డిని ఇక కొన‌సాగించ‌బోమ‌ని ప్రభుత్వం క్యాట్‌కు నివేదిక ఇవ్వటంతో క్యాట్ డిజిపి కొన‌సాగింపును తొసి పుచ్చింది. త‌న రిటైర్‌మెంట్ వ‌య‌సు కాకుండా బాధ్యత‌లు స్వీక‌రించిన ద‌గ్గర నుంచి 2 సంవ‌త్సరాల పాటు త‌న‌ను ప‌దవిలో కొన‌సాగ‌నివ్వాల‌ని డిజిపి క్యాట్‌కు తెలిపారు. సుప్రీం తీర్పు ఆధారంగానే తన నియామకం జరిగినట్లు ఆయన పేర్కొన్నారు. కాగా దినేష్ రెడ్డి పదవీకాలం ఈనెల 30తో ముగియనుంది.

30న గవర్నర్ తో జగన్ భేటి

వైఎస్ఆర్.కాంగ్రెస్ పార్టీ అధ్యక్షుడు జగన్ మోహన్ రెడ్డి బెయిల్ పై బయటకు వచ్చిన తరువాత మొదటిసారిగా గవర్నర్ నరసింహన్ కలవబోతున్నారు. సమైక్యాంధ్ర తీర్మానం అసేంబ్లీలో చేయాలని, తెలంగాణ తీర్మానాన్ని ఓడించాలని కోరుతూ గవర్నర్ అపాయింట్ మెంట్ కోరారు. గవర్నర్ సెప్టెంబర్ 30 తేదిన సాయంత్రం నాలుగు గంటలకు వైఎస్ జగన్మోహన్ రెడ్డికి అపాయింట్ మెంట్ కేటాయించారు. ప్రత్యేకంగా అసేంబ్లీని సమావేశ పరిచి సమైక్య తీర్మానం చేయాలని జగన్ కోరనున్నారని పార్టీ ఎమ్మెల్యే శోభా నాగిరెడ్డి తెలిపారు. అసేంబ్లీ తీర్మానం తరువాత వైఎస్ఆర్ కాంగ్రెస్ ఎమ్మెల్యేలు తమ రాజీనామాలను ఆమోదించుకోనున్నారు. ఇక వచ్చే నెల 1,2 తేదీలలో కడప జిల్లాలోని ఇడుపుల పాయకు వెళ్లేందుకు, నాలుగో తేదీన గుంటూరుకు వెళ్లేందుకు అనుమతి ఇవ్వాలని కోరుతూ వైఎస్ జగన్ నాంపల్లి సీబీఐ కోర్టులో ఈ రోజు పిటీషన్ దాఖలు చేశారు.

జగన్ వైపు విశ్వరూప్..!

రాష్ట్ర మంత్రి విశ్వరూప్ రాజీనామాతో కాంగ్రెస్‌లో కలకలం చెలరేగింది. గత కొంత కాలంగా విశ్వరూప్ వైఎస్ఆర్.కాంగ్రెస్ అధ్యక్షుడు జగన్మోహన్‌రెడ్డికి సన్నిహితంగా ఉంటున్నారు. ఈ రోజు గవర్నర్ నరసింహన్‌కు తన రాజీనామా లేఖను సమర్పించిన విశ్వరూప్ త్వరలో వైకాపాలో చేరే ఆలోచనలో ఉన్నట్లు సమాచారం. రేపో, ఎల్లుండో జగన్‌ను కలిసే అవకాశం ఉన్నట్లు వార్తలు వస్తున్నాయి. గవర్నర్ నరసింహన్‌కు రాజీనామా లేఖ సమర్పించిన తరువాత మీడియా తో మాట్లాడుతూ...ఏపీ ఎన్జీవోల సమ్మెకు మద్దతుగా తాను రాజీనామా చేశానని అన్నారు. ఇంతవరకు ముఖ్యమంత్రి కిరణ్‌కుమార్‌రెడ్డి ఆగమని చెప్పినందువల్లే రాజీనామా చేయకుండా ఆగానని చెప్పారు. 60 రోజులుగా సీమాంధ్ర ప్రజలు ఉద్యమాలు చేస్తుంటే కేంద్రం పట్టించుకోవడం లేదని అన్నారు. తన రాజీనామా గవర్నర్ ఆమోదించారనే భావిస్తున్నట్లు చెప్పారు.

కాంగ్రెస్ రాష్ట్ర విభజన సమస్యను కొత్త ప్రభుత్వం పైకి నెట్టేస్తుందా

కాంగ్రెస్ పార్టీ రాష్ట్ర విభజన ప్రకటన చేసి ఇప్పటికి దాదాపు రెండు నెలలు పూర్తి కావస్తున్నా, సమైక్యాంధ్ర ఉద్యమాలు, సీమాంధ్ర నేతల ఒత్తిళ్ళ కారణంగా ఇంతవరకు విభజన ప్రక్రియను మొదలుపెట్టలేకపోతోంది. కానీ, తన నిర్ణయంపై ఎట్టి పరిస్థితుల్లో వెనకడువేసే ప్రసక్తే లేదని మాత్రం చాలా గట్టిగా పదేపదే చెపుతోంది. అంటే జాప్యం చేస్తూ సీమాంద్రులని, విభజన ఆపేది లేదని తెలంగాణా ప్రజలని ఇరువురినీ మభ్యపెడుతూ రోజులు నెట్టుకొస్తోందన్నమాట. ఎన్నికలలోగా తెలంగాణా ఏర్పాటు చేస్తానని చెపుతున్నపటికీ అది చేసే వరకు ఎవరికీ నమ్మకం లేదు. నరేంద్ర మోడీ ప్రధాని పదవి చెప్పట్టేందుకు ఉన్నఅన్నిఅడ్డంకులను ఒకటొకటిగా తొలగించుకొని వస్తూ ఎలాగయినా ఈ సారి పార్టీని ఎన్నికలలో గెలిపించుకొని ప్రధాని పదవి చెప్పట్టాలని ఉత్సాహం చూపిస్తుంటే, ప్రధాని పదవి చెప్పటేందుకు యావత్ కాంగ్రెస్ పార్టీ రాహుల్ గాంధీకి ఎర్రతివాచీ పరిచి మరీ స్వాగతం చెపుతున్నా ఆయన ఆ పదవి చెప్పట్టేందుకు ఆసక్తి చూపక పోగా “ప్రజల కలలను నెరవేర్చేందుకు తన కలలను చంపుకొంటానని” పలికి కాంగ్రెస్ పార్టీని తీవ్ర నిరాశపరిచారు. ఇటువంటి పరిస్థితుల్లో కాంగ్రెస్ పార్టీ చరిత్రలోనే సువర్ణాక్షరాలతో లిఖించదగ్గ ఒక అత్యంత సాహసోపేత నిర్ణయం-‘తెలంగాణా ఏర్పాటు’ ప్రకటన చేసింది. కానీ తీరా చేసి దానిని ఇప్పుడు అమలు చేయడానికి మీన మేషాలు లెక్కపెడుతోంది. ఒకవేళ ఏర్పాటు చేసినా వచ్చే సాధారణ ఎన్నికలలో కాంగ్రెస్ పార్టీ మళ్ళీ రెండు రాష్ట్రాలలో, కేంద్రంలో అధికారంలోకి వస్తుందనే నమ్మకం కూడా లేదు. గనుక, ఈ సమస్యను వీలయినంత వరకు సాగదీసే అవకాశాలే ఎక్కువున్నాయి. ఒకవేళ రానున్న ఎన్నికలలో గెలిస్తే ఈ సమస్యను పరిష్కరించడం, ఓడిపోయే సూచనలు కనిపిస్తే ఈ సమస్య మరింత ముదిరి పాకాన పడే విధంగా ఆఖరి నిమిషంలో మరికొన్నివివాదస్పదమయిన నిర్ణయాలు ప్రకటించవచ్చును. తద్వారా రాబోయే ప్రభుత్వానికి కూడా రాష్ట్ర విభజన సమస్య ఒక గుదిబండలా తయారు చేసి చేతులు దులుపుకొని బయటపడవచ్చును. అప్పుడు కొత్త ప్రభుత్వం ఈ సమస్యతో కుస్తీలు పడుతుంటే కాంగ్రెస్ పార్టీ వినోదిస్తూ, కాంగ్రెస్ పార్టీని ఎన్నుకొని ఉంటే ఈ సమస్యను అవలీలగా తెల్చిపారేసేవారమని ఉత్తర కుమార ప్రగల్భాలు పలకవచ్చును.

డీజీపీ దినేష్ రెడ్డి క్యాట్ లో భంగపాటు

ఈ నెలాఖరున పదవీ విరమణ చేయనున్న డీజీపీ దినేష్ రెడ్డి తన పదవీకాలం పొడిగించాలని పెట్టుకొన్న వినతి పత్రాన్నిప్రభుత్వాం తిరస్కరించడంతో ఆయన క్యాట్ ను ఆశ్రయించారు. అశోక్ సింగ్ వెర్సస్ కేంద్ర ప్రభుత్వం మధ్య జరిగిన కేసులో సుప్రీంకోర్టు ఇచ్చిన తీర్పు ప్రకారం తన పదవీ కాలం మరో రెండేళ్ళు పొడిగించాలని ఆయన కోరారు. అయితే క్యాట్ కూడా ఆయన అభ్యర్ధనను తిరస్కరించింది. మరి డీజీపీ కూడా సుప్రీంకోర్టును ఆశ్రయిస్తారా లేక ఇంతటితో ఈ వివాదాన్ని ముగించి సగౌరవంగా పదవీవిరమణ చేస్తారా అనేది త్వరలోనే తెలియవచ్చును.

సమైక్యాంధ్రపై తీర్మానం పెట్టాలి: శోభా నాగిరెడ్డి

అసెంబ్లీలో తెలంగాణ తీర్మానం నెగ్గేందుకే వైఎస్సార్ సీపీ రాజీనామాల ఆమోదం కోసం పట్టుబడుతోందన్న విమర్శలు తీవ్రమవడంతో వైఎస్సార్ సీపీ ఎమ్మెల్యేలు విలేకరుల సమావేశం నిర్వహించి రాజీనామాలపై స్పందించారు. ఈ సందర్భంగా ఆ పార్టీ ఎమ్మెల్యే శోభా నాగిరెడ్డి మూడు డిమాండ్లు చేశారు. విభజన నిర్ణయం నేపథ్యంలో అసెంబ్లీని వెంటనే సమావేశ పర్చాలి, సమైక్యాంధ్రపై అసెంబ్లీలో తీర్మానం చేయాలి, పాస్ చేయించిన తీర్మానాన్ని ఢిల్లీకి పంపించి ఆ తర్వాత రాజీనామాలు ఆమోదించాలని డిమాండ్ చేశారు. తాము దీనిపై గురువారం సాయంత్రం స్పీకర్‌ను కలుస్తామని, అపాయింట్మెంట్ దొరికితే గవర్నర్‌ను కూడా కలుస్తామని చెప్పారు. సమైక్యాంధ్ర పైన తమ పార్టీని ప్రశ్నించే హక్కు ఏ రాజకీయ పార్టీకి లేదని శోభా నాగి రెడ్డి అన్నారు. సమైక్యాంధ్ర కోసం తాము అందరికంటే ముందుగానే రాజీనామాలు చేశామని, అలాంటప్పుడు తమను ప్రశ్నించే హక్కు ఎవరికి లేదన్నారు.

ధర్మ విజేత అంటే ....... ?

....సాయి లక్ష్మీ మద్దాల అక్రమ ఆస్తుల కేసు విషయమై ఎట్టకేలకు 16 నెలల అనంతరం సి.బి.ఐ కోర్ట్ మంజూరు చేసిన షరతులతో కూడిన బెయిల్ పై జగన్ జైలునుండి బయటకు వచ్చాడు. ప్రస్తుత చట్టాల ఆధారంగా న్యాయమూర్తి బెయిల్ మంజూరు చేశారు. సాక్ష్యాలను విచారించి జగన్ అక్రమ ఆస్తుల కేసులో నిర్దోషా కాదా అనేది న్యాయస్థానం నిర్ణయించ వలసి ఉంది. కేవలం బెయిల్ లభించి నంత మాత్రాన ఈ పరిస్థితులలో జగన్ ధర్మవిజేత అనటం ఎంతవరకు సమంజసం? ఇక జగన్ బయటకు వస్తే రాజకీయాలలో చాలా మార్పులు వస్తాయి అనటం కూడా సరికాదు. ఒకసారి పార్లమెంట్ లో సమైఖ్యాంద్ర ప్లకార్డు పట్టుకొని,మరొకసారి అఖిలపక్ష సమావేశంలో విభజనకు అనుకూలంగా లెటర్ ఇచ్చి,మళ్ళి ఇప్పుడు సమైఖ్యాంద్ర కోసం సీమాన్ద్రలో ఉవ్వెత్తున ఉద్యమం జరుగుతున్న నేపధ్యంలో మళ్ళి సమ న్యాయం అంటూ పరిపరి విధాలుగా తమ నిర్ణయాన్ని మార్చుకుంటూ తమకంటూ ఒక నిర్ణీత అభిప్రాయం లేని,వై. ఎస్.ఆర్. సి.పి ని ఏరకంగా సమైఖ్యాంద్ర కోసం చిత్తశుద్దితో ప్రయత్నిస్తుందని నమ్మాలి?నేటి ఆంధ్రప్రదేశ్ అనిశ్చిత స్థితికి కారణం జగన్ రాజకీయ పార్టీనే అని చాలామంది విశ్లేషకుల అభిప్రాయం. కేవలం జగన్ను ఎదుర్కోవటానికి మాత్రమే కాంగ్రెస్ పార్టీ ఈ విభజన అంశాన్ని2009 లో తీసుకువచ్చింది అనే అభిప్రాయం చాలామంది ప్రజల మదిలో ఉంది. ఇక రాజకీయ స్వార్ధం కోసం రాజశేఖరరెడ్డి టి.డి.పి హయాం లో 41 మంది శాసనసభ్యుల సంతకాలతో విభజన అంశాన్ని కాంగ్రెస్ అధిష్టానం ముందుకు పంపారు అనే అభిప్రాయాన్ని వై.ఎస్.ఆర్.సి.పి నే ఖండించలేని పరిస్థితి ఉంది. ఇక రాజకీయ నాయకులను ప్రజలు నమ్మని ఈ పరిస్థితులలో సమైఖ్యాంద్రను తాను సాధించ గలనని జగన్ ప్రజలను ఎలా నమ్మించ గలడు? ఇక జగన్ సోదరి షర్మిల విభజన జరిగితే సమైఖ్యాంద్ర కు కట్టుబడి ఉన్నందున సీమాన్ద్రలో వై.ఎస్.ఆర్.సి.పి నే ప్రజలు గెలిపిస్తారని,తెలంగాణలో తమ తండ్రి రాజశేఖర రెడ్డి ఏవిధంగా అభివృద్ధి నిమిత్తం ఎక్కువనిధులు సీమాంద్ర ప్రాంతం కంటే వెచ్చించారో తమ వద్ద గల ఆధారాలను చూపించి తెలంగాణలో కూడా ఎక్కువ సీట్లు గెలుస్తామని చెప్ప్తోంది. ఈరోజున ప్రజలకు కావల్సింది విభజన అంశం ఏరకంగా వై.ఎస్.ఆర్.సి.పి కి ఉపయోగపడుతుంది అని కాదు, విభజన జరిగితే 2014 ఎన్నికల తరువాత కేంద్రంలో వై.ఎస్.ఆర్.సి.పి తన వైఖరి ఎటు అని. ఈ విషయంలో జగన్ తన వైఖరి చెప్పని పక్షంలో విభజన విషయంలో కాంగ్రెస్ అధిష్టానం తో కుమ్మక్కు ఐన కారణంగానే జగన్ కు బెయిల్ దొరికి,జైలు నుండి బయటకు వచ్చాడని ప్రజలు భావించే ప్రమాదముంది. 2014 ఎన్నికల తరువాత కేంద్రంలో యు.పి.ఎ ని బలపరిచే అవకాశం ఉందని స్వయంగా వై.ఎస్.ఆర్.సి.పి వారే అంగీకరిస్తున్నారు. విభజన విషయం లో సీమాంద్ర ప్రజలు కాంగ్రెస్ పార్టీని భూస్థాపితం చేయాలని భావిస్తున్నారు. వారి ఆగ్రహావేశాలను వై.ఎస్.ఆర్.సి.పి సమైఖ్యాంద్ర నినాదంతో ఓట్లు కింద మార్చుకుని 2014 లో యు.పి.ఎ ని బలపరిస్తే అంతకు మించిన ప్రజాద్రోహం మరొకటి ఉండదు.

వైకాపా రాజీనామాలు..జగన్ కుట్ర

ఎమ్మెల్యే పదవులకు రాజీనామాలు ఆమోదింపజేసుకోవాలని వైఎస్సార్ కాంగ్రెస్ నాయకులు పట్టుబడుతుండటంలో కుట్ర దాగి ఉందని మంత్రి శైలజానాథ్ అనుమానం వ్యక్తం చేశారు. తెలంగాణ తీర్మానం శాసనసభలో ఆమోదం పొందేందుకే ఆ పార్టీ అధ్యక్షుడు వైయస్ జగన్ కుట్ర చేశారని ఆయన ఆరోపించారు. సమైక్యాంధ్రకు మద్దతుగా శాసనసభ్యులు రాజీనామాలు చేయాలనే వాదనను ఆయన తీవ్రంగా వ్యతిరేకించారు. రాజీనామాలు చేసి, వాటిని ఆమోదింపజేసుకుంటే తెలంగాణ రాష్ట్ర ఏర్పాటుకు మద్దతు ఇచ్చినట్లవుతుందని ఆయన అభిప్రాయపడ్డారు. రాజీనామాలు చేయవద్దని ఆయన సీమాంధ్ర శాసనసభ్యులకు విజ్జప్తి చేశారు. రాష్ట్రాన్ని సమైక్యంగా ఉంచాలనుకుంటే రాజీనామాలు చేయకుండా తెలంగాణ తీర్మానం శాసనసభకు వచ్చినప్పుడు మాట్లాడాలని, తెలంగాణ తీర్మానానికి వ్యతిరేకంగా ఓటు వేయాలని ఆయన అన్నారు. వైఎస్సార్ కాంగ్రెస్ పార్టీతో కాంగ్రెసు అధిష్టానం మ్యాచ్ ఫిక్సింగ్ ఆరోపణలు నిజం కాకూడదని కోరుకుంటున్నట్లు ఆయన తెలిపారు.

News

Movie News

Movies

Photos

Grandalayam

Shortfilms

Bhakthi

Videos

Recipes

Comedy

Vanitha