పాకిస్థాన్, ఆఫ్గనిస్థాన్ మధ్య ఘర్షణలు మరోసారి భగ్గు మంటున్నాయి.   ఆఫ్గాన్ చేసిన దాడులకు ప్రతిగా పాక్ గజబ్ లిక్ హక్   ఆపరేషన్‌ను ప్రారంభించింది.  కాబుల్, కాందహార్‌, పక్తియాల్లోని పలు నగరాలపై వైమానిక దాడులు చేపట్టింది. దాంతో రెండు దేశాల సరిహద్దుల్లో తీవ్ర ఉద్రిక్త వాతావరణం నెలకొంది. ఈ  నేపధ్యంలో సూసైడ్ స్క్వాడ్  అంటూ ఆఫ్గాన్ మీడియా విడుదల చేసిన చిత్రం ఆందోళన రేపుతోంది. ఆ చిత్రాన్ని షేర్ చేసిన బక్తర్ న్యూస్ ఏజెన్సీ వారంతా సూసైడ్ బాంబర్ల బెటాలియన్ అని భద్రతా వర్గాలను ఉటంకిస్తూ పేర్కొంది.

వారంతా పేలుడు పదార్ధాలు అమర్చిన దుస్తులు, కారు బాంబులతో పాకిస్థాన్‌లోని ప్రధాన ప్రాంతాలు టార్గెట్ చేసేందుకు సిద్దంగా ఉన్నారని వెల్లడించింది. గురువారం పాక్ సైనిక స్థావరాలపై ఆఫ్గాన్ దాడులు చేయడంతో తాజా ఘర్షణలు చెలరేగాయి. తాము చేసింది ప్రతీకారదాడులే అని తాలిబన్లు ప్రకటించుకున్నారు. ఆ వెంటనే పాక్ యుద్దాన్ని ప్రకటించింది. తమ దాడుల్లో  130 మంది ఆఫ్గాన్ ఫైటర్లు చనిపోయినట్లు పాక్ వెల్లడించింది. మరోవైపు 50 పాక్ సైనికులు మరణించారని ఆఫ్టాన్ ప్రకటించుకుంది. ఇక రెండు దేశాల మధ్య సయోధ్య కుదిర్చేందుకు తాము సిద్దంగా ఉన్నామని ఇరాన్ ముందుకొచ్చింది.