పట్టపగలే ఇంటిగుమ్మంలోనే వాలిపోతున్న బతుకులు
పూటగడిస్తే చాలన్నట్లు
అలజడి లేని జీవనగమనం
కాలమేసే కాటునుండి కోలుకున్న గ్యారంటీ లేని జీవితం
లక్ష్మణరేఖలెన్ని గీసినా
కాలరాక్షసిలా తనరూపం మార్చుకుంటూ ముప్పేట వేట
మునుపెన్నడు చూడని ముప్పు
ధరణిపై తన ఆధిపత్యం చెలాయిస్తూ
దేహాలనన్నీ పీల్చిపిప్పిచేస్తోంది
ఆరనిజ్వాలను రగిలించింది
ప్రపంచాన్నంతా గజగజలాడిస్తూ 
తన పంజాదెబ్బ రుచిచూపిస్తోంది
తనువులన్నీ రాలుతున్న దృశ్యం
తరుముతున్నా అలుపెరుగని పోరాటం
కటువుతనం పుడమినిండుకున్నది
కోల్పోతున్న ఆప్తుల యాదిలో జారిపడుతున్న కన్నీరు
ఆశలన్నీ కాలిపోతున్న కాలం
కాలమాగిపోతున్నట్టు 
నవ్వులన్నీ మాయమౌతున్నయ్
మబ్బులునిండిన జీవితంలో
స్వప్నశిల్పాలన్నీ పగిలి పటాపంచలౌతున్నయ్
విశాలమైన విశ్వమంతా 
ఇంటిలో ఇమిడిపోయింది
ఎడతెరపిలేని దండయాత్రలో
ఊపిరిదొరకక ఉక్కిరిబిక్కిరి
గుండెనిండ భయం పరుచుకున్నది
రోజుకో గాయం!
గమనం ఓ సమరం!!
వర్తమానం మళ్ళీ గతంలా
భవిష్యత్తు చిత్రం చిగురిస్తుందా??

సి. శేఖర్(సియస్సార్)