Top Stories

ఉగ్రవాదుల సోదరి కల్నల్ సోఫియా ఖురేషి.. బీజేపీ మంత్రి వాచాలత!

ఉగ్రవాదుల సోదరి కల్నల్ సోఫియా ఖురేషి.. బీజేపీ మంత్రి వాచాలత!

కల్నల్ సోఫియా ఖురేషి పై బీజేపీ మంత్రి ఒకరు వివాదాస్పద వ్యాఖ్యలు చేశారు. ఆమెను ఉగ్రవాదుల సోదరిగా పేర్కొంటూ మధ్యప్రదేశ్  మంత్రి విజయ్ షా అనుచిత వ్యాఖ్యలు చేశారు. ఆపరేషన్ సిందూర్ వివరాలను మీడియాకు వివరించిన కల్నల్ సోఫియా ఖురేషీ 1999లో ఇండియన్ ఆర్మీ కార్ప్స్ ఆఫ్ సిగ్నల్‌లో చేరారు.  2016లో మల్టీనేషనల్ మిలటరీ విన్యాసాలకు సారథ్యం వహించిన తొలి మహిళా అధికారిగా గుర్తింపు తెచ్చుకున్నారు. తాజాగా ఆమెపై మధ్యప్రదేశ్ మంత్రి, బీజేపీ నేత విజయ్ షా  టెర్రరిస్టుల సోదరి'గా పేర్కొంటూ ఆమెను కించపరచేలా మాట్లాడారు.  మహులోని  రాయ్‌కుంద గ్రామంలో జరిగిన జరిగిన ఒక కార్యక్రమంలో మాట్లాడిన విజయ్ షా ఆపరేషన్ సిందూర్ విజయం, మోడీ గొప్పదనం గురించి మాట్లాడుతూ.. మన ఆడబిడ్డల సిందూరాన్ని తుడిచేసి పారిపోయిన ముష్కరులకు వారి సొంత సోదరితోనే గట్టి సమాధానం చెప్పామన్నారు.  విజయ్ షా వ్యాఖ్యలపై సర్వత్రా విమర్శలు వెల్లువెత్తుతున్నాయ్. దీంతో వెనక్కు తగ్గిన మంత్రి విజయ్ షా తన వ్యాఖ్యలను ఉపసంహరించుకుంటూ క్షమాపణలు కోరారు. అదలా ఉంటే.. మంత్రి విజయ్ షాపై తక్షణమే పోలీసు కేసు నమోదు చేయాలని మధ్యప్రదేశ్ హైకోర్టు ఆదేశాలు జారీ చేసింది. మంత్రి వ్యాఖ్యలపై సుమోటోగా మధ్య ప్రదేశ్ హైకోర్టు ఆ రాష్ట్ర డీజీపీకి ఆదేశాలు జారీ చేసింది. మహిళా కమిషన్ సైతం సీరియస్ గా స్పందించింది. మంత్రి పేరు ప్రస్తావించకుండా ఆయన వ్యాఖ్యలను తీవ్రంగా ఖండించింది.  కాంగ్రెస్ పార్టీ అయితే విజయ్ షాను వెంటనే కేబినెట్ నుంచి బర్త్ రఫ్ చేయాలని డిమాండ్ చేసింది. 
ఉగ్రవాదుల సోదరి కల్నల్ సోఫియా ఖురేషి.. బీజేపీ మంత్రి వాచాలత! Publish Date: May 14, 2025 5:24PM
మసూద్ అజహర్ కు పాక్ భారీ నష్టపరిహారం.. పాక్ టెర్రర్ లింక్ కు ఇంతకంటే రుజువేంటి?

మసూద్ అజహర్ కు పాక్ భారీ నష్టపరిహారం.. పాక్ టెర్రర్ లింక్ కు ఇంతకంటే రుజువేంటి?

పాకిస్థాన్ ప్రభుత్వానికి, ఉగ్రవాదానికి ఉన్న నెక్సస్ ప్రతి సందర్బంలోనూ బయటపడుతూనే ఉందిద. భారత్ లో జరిగిన ప్రతి ఉగ్రదాడిలోనూ ఆ దేశ ప్రేరేపిత ఉగ్ర సంస్థల ప్రమేయం, వాటికి పాకిస్థాన్ ప్రభుత్వ, సైన్యం సహాయ సహకారాలు మద్దతు ఉన్నట్లు పదేపదే రుజువైంది. అయితే ప్రతి సందర్భంలోనూ పాకిస్థాన్ ఉగ్రదాడులతో సంబంధం లేదని బుకాయిస్తూనే వస్తోంది. తాజాగా పహల్గాం ఉగ్రదాడిలో కూడా పాక్ హస్తం ఉందన్న విషయం నిర్ధారణ అయ్యింది. పహల్గాం ఉగ్రదాడికి ప్రతిగా భారత్ చేపట్టిన ఆపరేషన్ సిందూర్ తో పాక్ భూభాగంలోని 9 ఉగ్ర స్థావరాలను  ధ్వంసం చేసింది. ఆ సందర్భంగా దాదాపు వంద మంది ఉగ్రవాదులు హతమయ్యారు. ఆ తరువాత ఇరు దేశాల మధ్యా కొన్ని రోజుల పాటు అప్రకటిత యుద్ధం కొనసాగింది. ఆ సందర్భంగా కూడా పాకిస్థాన్ కు భారీ నష్టం వాటిల్లింది. దాదాపు చేతులెత్తేసింది. కాల్పుల విరమణ ఒప్పందం కోసం బతిమలాడుకుంది. సరే ఇరు దేశాలూ కాల్పుల విరమణకు అంగీకారించాయి.  అయితే ఇక్కడే పాక్ తన కుత్సితబుద్ధిని మరో సారి బయటపడింది. ఉగ్రవాదులతో సంబంధం లేదనీ, ఉగ్రవాదాన్నితాము ప్రోత్సహించడం లేదనీ, తామూ ఉగ్రబాధితులమేననీ బుకాయిస్తూ వస్తున్న పాక్  తన నిజస్వరూపాన్ని బయటపెట్టుకుంది. పాక్ భూభాగంలోని 9 ఉగ్ర సంస్థలను భారత్ ధ్వంసం చేసిన సందర్భంగా మరణించిన ఉగ్రవాదుల కుటుంబాలకు పాకిస్థాన్ ప్రభుత్వం కోటి రూపాయల చొప్పున నష్టపరిహారం ప్రకటించింది. అలా పాక్ ప్రకటించిన నష్టపరిహారం అందుకునే వారిలో అంతర్జాతీయ ఉగ్రవాది, నిషేధిత  జైషే అహ్మద్ ఉగ్ర సంస్థ అధినేత మసూద్ అజహర్ కూడా ఉన్నాడు. బహావల్పూర్ ప్రాంతంలో భారత్ జరిపిన దాడుల్లో మసూద్ అజహర్ కుటుంబ సభ్యులు 14 మంది మరణించారు. వారందరికీ వారసుడు మసూద్ అజహారే. దీంతో పాక్ ప్రభుత్వం ఆయనకు 14 కోట్ల రూపాయల నష్టపరిహారం చెల్లించబోతున్నది. నిజంగా పాకిస్థాన్ కు ఉగ్ర సంస్థలతో బంధం లేకుంటే, నిజంగా ఆ దేశం కూడా ఉగ్రబాధిత దేశమే అయి ఉంటే.. తమ దేశంలోని ఉగ్ర స్థావరాలను ధ్వంసం చేసిన భారత్ కు కృతజ్ణతలు చెప్పుకోవాలి. కానీ పాకిస్థాన్ ఆ పని చేయడం లేదు. పాక్ సైనికాధికారులు మరణించిన ఉగ్రవాదుల అంత్యక్రియలకు హాజరై ఉగ్రవాదుల శవాలపై వారి దేశ జెండా కప్పి అధికార లాంఛ నాలతో అంత్యక్రియలు నిర్వహిస్తున్నారు. అంతేనా మరణించిన ఉగ్రవాదుల కుటుంబాలకు భారీగా నష్టపరిహారం ఇస్తున్నారు.  నిషేధిత ఉగ్రవాద సంస్థ అధినేత, ప్రకటిత ఉగ్రవాది   మసూద్ అజార్‌కు ఇలా ప్రభుత్వం నేరుగా నష్టం పరిహారం ఇవ్వనుండటం వివాదాస్పదంగా మారింది. ప్రపంచ దేశాలకు పాక్ సంజాయిషీ ఇచ్చుకోవలసి ఉంటుంది. 
మసూద్ అజహర్ కు పాక్ భారీ నష్టపరిహారం.. పాక్ టెర్రర్ లింక్ కు ఇంతకంటే రుజువేంటి? Publish Date: May 14, 2025 4:35PM
వంశీకి బెయిలొచ్చింది కానీ..!

వంశీకి బెయిలొచ్చింది కానీ..!

గన్నవరం మాజీ ఎమ్మెల్యే వల్లభనేని వంశీకి ఎట్టకేలకు దాదాపు 3 నెలల తరువాత బెయిలు మంజూరైంది. గన్నవరం తెలుగుదేశం కార్యాలయంపై దాడి కేసులో ఫిర్యాదు దారు సత్యవర్థన్ ను కిడ్నాప్ చేసి, బెదరించి ఆ కేసు ఉపసంహరించుకునేలా చేసిన కేసులో వల్లభనేని వంశీని ఈ ఏడాది ఫిబ్రవరి 13న పోలీసులు అరెస్టు చేసిన సంగతి తెలిసిందే. అప్పటి నుంచీ రిమాండ్ ఖైదీగా విజయవాడ జిల్లా జైలులో ఊచలు లెక్కిస్తున్న వంశీకి ఎస్సీఎస్టీ కోర్టు మంగళవారం బెయిలు మంజూరు చేసింది. ఇది వంశీకి ఒకింత ఊరటకలిగించే విషయమే అయినా.. ఈ కేసులో బెయిలు వచ్చినంత మాత్రాన ఆయన విడుదలయ్యే అవకాశాలు లేవు. అందుకే ఇంకా జైలులోనే ఉన్నారు. ఎందుకంటే వంశీపై మొత్తం నాలుగు కేసులు ఉణ్నాయి. సత్యవర్థన్ కిడ్నాప్ కేసు మాత్రమే కాకుండా గన్నవరం తెలుగుదేశం కార్యాలయంపై దాడి, భూకబ్జా, అక్రమ మైనింగ్ కేసులు ఉన్నాయి. వీటిలో సత్యవర్థన్ కిడ్నాప్, అక్రమ మైనింగ్ కేసులలో మాత్రమే వంశీకి బెయిలు లభించింది. ఇంకా గన్నవరం తెలుగుదేశం కార్యాలయంపై దాడి కేసులో సీఐడీ సీబీఐ దాఖలు చేసిన కేసులో ఆయనకు కోర్టు మే 21 వరకూ రిమాండ్ విధించింది.  ఆ కేసులో వంశీకి ఈ నెల 22న బెయిలు లభించే అవకాశాలు మెండుగా ఉన్నాయని వైసీపీ వర్గాలు, వంశీ అనుకూలురు అంటున్నారు. ఒక వేళ వారు ఆశిస్తున్నట్లు జరిగితే ఆయన బెయిలుపై బయటకు వచ్చే అవకాశాలు ఉంటాయి.   
వంశీకి బెయిలొచ్చింది కానీ..! Publish Date: May 14, 2025 3:42PM
పాక్ మిడిసిపాటుకి భారత్ చెక్.. అతలాకుతలమైన పాక్ ఎయిర్‌ఫోర్స్

పాక్ మిడిసిపాటుకి భారత్ చెక్.. అతలాకుతలమైన పాక్ ఎయిర్‌ఫోర్స్

అమెరికా, చైనా ఫైటర్‌ జెట్లను చూసుకుని తమ వాయుసేన బలంపై పాకిస్థాన్ మిడిసిపడింది. అయితే తాజాగా ఆపరేషన్‌ సిందూర్‌లో ఆ దళాన్ని కొన్ని గంటల వ్యవధిలోనే భారత్‌ చావు దెబ్బ తీసింది. అత్యంత కచ్చితత్వంతో దాదాపు డజను సైనిక స్థావరాలను భారత్‌ ధ్వంసం చేసింది. ఈ దాడిలో పాక్‌ వాయుసేనకు చెందిన దాదాపు ఐదోవంతు మౌలిక వసతులు, ఫైటర్‌ జెట్లు ధ్వంసమైనట్లు ప్రభుత్వ వర్గాలు పేర్కొంటున్నాయి. భారత సైనిక స్థావరాలు, పౌర నివాసాలను పాక్‌ సైన్యం లక్ష్యంగా చేసుకోవడంతో  మన దేశం జరిపిన ప్రతిదాడిలో ఇవి దెబ్బతిన్నాయి. ఇందుకోసం భారత్‌ ఆత్మాహుతి డ్రోన్లు, క్షిపణులను పాక్‌ ఆయుధాగారాలు, ఎఫ్‌-16, జేఎఫ్‌-17 వంటి విమానాలు దాచిన సర్గొదా, భోలారీ ఎయిర్‌ పోర్టులతోపాటు.. పాక్‌ ఆర్మీ హెడ్‌క్వార్టర్స్‌ ఉన్న చక్లాలలోని నూర్‌కాన్‌ ఎయిర్‌ బేస్‌ను కూడా ధ్వంసం చేసింది. ఈ దాడుల్లో మొత్తం 50 మంది చనిపోయి ఉంటారని అంచనా వేస్తున్నారు.  సింధి రాష్ట్రంలోని జమ్సోరో జిల్లాలోని బోలారీ ఎయిర్‌ బేస్‌లోనే స్క్వాడ్రన్‌ లీడర్‌ ఉస్మాన్‌ యూసఫ్‌, మరో నలుగరు ఎయిర్‌మెన్‌లు ప్రాణాలు కోల్పోయారు. ఇక్కడ నిలిపి ఉంచిన పలు ఫైటర్‌జెట్లు కూడా దెబ్బతిన్నట్లు సమాచారం. ప్రతిదాడిలో భారత్‌ నూర్‌ఖాన్‌, రఫీకీ, షోర్కోట్‌, మురిద్‌, సుక్కోర్‌, సియాల్కోట్‌, పసురూర్‌, చునియన్‌, సర్గోదా, భోలారీ, జకోబాబాద్‌లో దాడులు చేసింది. దాడికి ముందు.. తర్వాత ఇక్కడినుంచి సేకరించిన ఉపగ్రహ చిత్రాల్లో నష్టం తీవ్రత స్పష్టంగా కనిపిస్తోంది. ముఖ్యంగా జకోబాబాద్‌లోని షాబాజ్‌ బేస్‌ చాలావరకు ధ్వంసమై కనిపిస్తోంది. ఇక భారత పదాతి దళం జరిపిన దాడిలో నియంత్రణ రేఖ వద్ద పాక్‌ సైనిక స్థావరాలు, ఉగ్ర బంకర్లు నాశనమయ్యాయి.  తమ కాల్పుల్లో పాక్‌ ఆర్మీ  దాదాపు 40 మంది  సైనికులను కోల్పోయి ఉండొచ్చని భారత్‌ చెబుతోంది.  మంగళవారం భారత మిలిటరీ ఈ దాడులకు సంబంధించిన ఫొటోలు సహా ఇతర ఆధారాలను 70 దేశాల ప్రతినిధులకు చూపించాయి. వీటిల్లో పాక్‌ క్షిపణి, డ్రోన్‌ శకలాలు కూడా ఉన్నాయి.  డిఫెన్స్ ఇంటెలిజెన్స్‌ ఏజెన్సీ డీసీ డీఎస్‌ రానా ఈ ప్రెజెంటేషన్‌ నిర్వహించారు. తాము లక్ష్యాలను ఎలా ఎంచుకొంది.. ఎలా ధ్వంసం చేసిందీ కూడా తెలిపారు. ఈ విషయాన్ని ఆ సంస్థ ఎక్స్‌ఖాతాలో వెల్లడించింది.
పాక్ మిడిసిపాటుకి భారత్ చెక్.. అతలాకుతలమైన పాక్ ఎయిర్‌ఫోర్స్ Publish Date: May 14, 2025 2:31PM
జగన్‌కి బుగ్గన ఝలక్?

జగన్‌కి బుగ్గన ఝలక్?

వైసీపీ ప్రభుత్వంలో తిరుగులేని స్థాయిలో చక్రం తిప్పిన  ఆర్థికశాఖ మాజీ మంత్రి బుగ్గన రాజేంద్రనాథ్‌ రెడ్డి ఇప్పుడు ఎక్కడా కనిపించడం లేదు. వినిపించడం లేదు. 2024 ఎన్నికలలో బుగ్గన  పరాజయం పాలయ్యారు. కర్నూలు జిల్లా డోన్ లో తెలుగుదేశం అభ్యర్థి కోట్ల విజయం సాధించారు. డోన్ లో తెలుగుదేశం జెండా ఎగరడం పదేళ్ల తర్వాత  ఇదే తొలిసారి. చంద్రబాబు వ్యూహం ఫలించి కోట్ల విజయం సాధించారు. బుగ్గన పరాజయం పాలయ్యారు.  వైసీపీ హయాంలో ఐదేళ్ల పాటు ఆర్థిక మంత్రిగా చక్రం తిప్పి, ఐదేళ్లూ వరుసగా బడ్జెట్ ప్రవేశ పెట్టిన బుగ్గన ఆ ఓటమితో డోన్ లో అడ్రస్ లేకుండా పోయారు.  అపర మేధావిలా అసెంబ్లీ లో వ్యవహరించిన ఆయన ఇప్పుడు కూటమి అధికారంలోకి రావడంతో తన వ్యాపార వ్యవహారాల కోసం జగన్‌కి హ్యాండ్ ఇచ్చే ఆలోచన చేస్తున్నారంట. అయితే కూటమి పార్టీలు నో ఎంట్రీ బోర్డు పెట్టడంతో ఏం చేయాలో తోచక అండర్‌గ్రౌండ్‌లోకి వెళ్లిపోయారన్న టాక్ నడుస్తోంది. ఉమ్మడి కర్నూలు జిల్లాలోని డోన్ రాజకీయం ఎప్పుడూ ప్రత్యేకంగా ఉంటుంది. గతంలో ఈ సెగ్మెంట్ లో ప్రస్తుతం తెలుగుదేశంలో  ఉన్న కేఈ, కోట్ల కుటుంబాలే ప్రత్యర్ధులుగా కొనసాగాయి.  1978 నుంచి 2009 వరకు ఆ రెండు ఫ్యామిలీ మధ్యే ఎలక్షన్ వార్ నడుస్తూ వచ్చింది. 2014లో వైసీపీ నుంచి ఎంట్రీ ఇచ్చిన బుగ్గన రాజేంద్రనాథ్‌రెడ్డి అనూహ్యంగా కేఈ కృష్ణమూర్తిపై గెలుపొందారు. రెండోసారి కూడా గెలిచిన బుగ్గన ఆర్థిక మంత్రిగా అయిదేళ్లు చక్రం తిప్పారు  రాజకీయ ప్రత్యర్థులైన దిగ్గజ కుటుంబాలు కేఈ, కోట్ల కుటుంబాలు గత ఎన్నికల సమయానికి ఒకే గూటి కిందకు చేరడం, కోట్ల సూర్యప్రకాశ్‌రెడ్డి టీడీపీ అభ్యర్ధిగా బరిలోకి దిగడంతో బుగ్గనకు ఘోర పరాజయం తప్పలేదు. అదీ కాక నియోజకవర్గానికి అందుబాటులో ఉండకుండా అసెంబ్లీలో పిట్టకథలు చెప్తూ గడిపేసిన బుగ్గనపై డోన్‌లో తీవ్ర వ్యతిరేకత వ్యక్తమైంది. ఆ ఓటమి తర్వాత బుగ్గన డోన్ వాసులకు నల్లపూసై పోయారు. ఆర్థిక శాఖ మంత్రిగా ఆయన అక్రమాలపై కూటమి సర్కారు దృష్టి సారిస్తోందన్న ప్రచారంతో భయపడి అజ్ఞాతంలోకి వెళ్లిపోయారంటున్నారు. వైసీపీ అధికారంలో ఉన్నప్పుడు టీడీపీ నాయకులను, వారి వ్యాపారాలను టార్గెట్‌ చేస్తూ బుగ్గన వేధింపులకు గురి చేశారన్న ఆరోపణలున్నాయి. అదే విధంగా బుగ్గనను ప్రజలు నేరుగా కలిసి తమ సమస్యలు చెప్పుకునే అవకాశం ఎప్పుడూ రాలేదు, అమరావతి, ఢిల్లీలోనే ఎక్కువ సమయం గడుపుతూ నియోజకవర్గంలో ప్రజలకు దూరమయ్యారు. అంతేగాక సొంత పార్టీ కేడర్‌ను కూడా బుగ్గన పట్టించుకోలేదని టాక్‌. వాటికి తోడు  సొంత మండలం బేతంచెర్లలోనే బుగ్గన తీవ్రస్థాయిలో అరాచకాలకు పాల్పడ్డారంట.  ప్రస్తుతం కేసుల భయం వెంటాడుతుండటంతో బుగ్గన రాజేంద్రనాథ్ రెడ్డి వైసీపీని వీడి జగన్‌కు హ్యాండ్ ఇచ్చే ఆలోచనలో ఉన్నారంట. ఆర్థిక మంత్రిగా ఉన్నప్పుడు అప్పుల కోసం ఢిల్లీ చుట్టూ తిరిగి అక్కడి పెద్దలతో అంతో ఇంతో పరిచయాలు పెంచుకున్న ఆయన.. బీజేపీలో చేరడానికి వారితో మంతనాలు సాగిస్తున్నారంట. అందుకే ఆయన వైసీపీ కార్యక్రమాల్లో కూడా కనిపించడం లేదనీ, ఎక్కువ టైమ్ ఢిల్లీలోనే గడుపుతున్నారని బుగ్గన అనుచరులు చెప్పుకుంటున్నారంట. బీజేపీలో చేరడానికి ఆయన చేస్తున్న ప్రయత్నాల సంగతి తెలిసి డోన్ కూటమి నేతలు తమ అధిష్టానాలపై తీవ్ర ఒత్తిడి తెచ్చారంట. దాంతో బుగ్గనకు కూటమి పార్టీల్లో ఎంట్రీకి డోర్స్ క్లోజ్ అయిపోయారంటున్నారు. ఆ క్రమంలో బుగ్గన ఆచూకీ ఆయన సొంత అనుచరులకే అంతుపట్టకుండా తయారైందంట.
జగన్‌కి బుగ్గన ఝలక్? Publish Date: May 14, 2025 2:15PM
హాట్‌టాపిక్‌గా మారిన చెవిరెడ్డి కన్నీటి ఎపిసోడ్!

హాట్‌టాపిక్‌గా మారిన చెవిరెడ్డి కన్నీటి ఎపిసోడ్!

వైసీపీలో కీలక నేతగా వెలుగొందిన చంద్రగిరి మాజీ ఎమ్మెల్యే చెవిరెడ్డి భాస్కరరెడ్డి అధికారంలో ఉన్నంత కాలం తెగ దూకుడు ప్రదర్శించారు.  అలాంటి ఫైర్‌బ్రాండ్ కనీళ్లు పెట్టుకోవడం ఇప్పుడు హాట్‌టాపిక్‌గా మారింది. తన స్వగ్రామం తుమ్మలగుంట అత్మీయసభలో మీకు అన్ని చేశాను, కాని మీరు నా కొడుకును ఓడించారంటూ తన మనోవేదన  వెళ్లగక్కిన సందర్భంలో ఆయన కళ్లు చెమర్చాయి. గత 11 నెలలుగా గ్రామస్తులలో ఎలాంటి సమావేశాలు పెట్టని అయన తాజాగా ఉన్నట్లుండి మీటింగ్ పెట్టారు. అసలు చెవిరెడ్డి ఎందుకు అంత అత్యవసరంగా అత్మీయ సమావేశం ఏర్పాటు చేశారనేది చర్చనీయాంశంగా మారింది. ఉమ్మడి చిత్తూరు జిల్లాలోనే కాకుండా రెండు తెలుగు రాష్ట్రాలలో వైసిపి కీలక నాయకుడు చంద్రగిరి మాజీ ఎమ్మెల్యే చెవిరెడ్డి భాస్కర్‌రెడ్డి అంటే తెలియని వారుండరు. జగన్ ప్రభుత్వంలో తుడా చైర్మన్‌గా వ్యవహరించిన ఆయన మంత్రి పదవి దక్కించుకోలేక పోయినప్పటికీ.. చాలా మంది మంత్రుల కంటే ఎక్కువగానే చెలాయించారు.  జగన్‌కు అత్యంత సన్నిహితుడైన చెవిరెడ్డి ఏకంగా తాడేపల్లిలోని జగన్ ప్యాలెస్‌లో తిరుమల దేవాలయ సెట్ వేయించి తన నాయకుడితో ఉగాది వేడుకలు నిర్వహింప చేసి తన వీరవిధేయత చాటుకుని  విమర్శల పాలయ్యారు. 2014లో టీడీపీలోని అనైక్యతతో చంద్రగిరిలో సొంత సామాజికవర్గం గల్లా అరుణకూమారిని వ్యతిరేకించడంతో చెవిరెడ్డి మొదటిసారి ఎమ్మెల్యేగా విజయం సాధించారు. తర్వాత 2019లో జగన్ గాలిలో సునాయాస విజయం సాధించారు. అయితే మొదటి సారి ఎమ్మెల్యేగా గెలిచినప్పటి నుంచి నియోజకవర్గంలో పట్టు కోసం అనేక కార్యక్రమాలు చేపట్టారు. నియోజకవర్గం వ్యాప్తంగా పండుగలకు తాయిలాలు పంచడంతో పాటు ఇంటింటికి శుభాకాంక్షలు వెళ్ళేవి. దానికి తోడు వాలంటీర్ వ్యవస్థ రాక ముందే తానే నియోజకవర్గంలో అలాంటి వ్యవస్థను ఏర్పాటు చేసుకుని మంత్రాంగం సాగించారు. అలా అన్నీ కలిసి వచ్చి 2019లోఆయన భారీ మెజార్టీతో గెలవగలిగారు. ఎన్నికల తర్వాత శాసన సభ విప్‌తో పాటు తుడా చైర్మన్ పదవి కూడా అయనకే దక్కింది.  తుడా పదవిని అడ్డంపెట్టుకుని చెవిరెడ్డి పెద్ద తతంగమే నడిపారు. తన గ్రామ సమీపంలోని తుమ్మలగుంట చెరువును సగానికిపైగా పూడ్పించి.. తుడా నుంచి 60 కోట్లు పైగా ఖర్చు పెట్టి అత్యాధునిక వాకింగ్ ట్రాక్‌తో పాటు, అనేక విధాలుగా అభివృద్ది చేసారు. చెరువును పూడుస్తున్నా చెవిరెడ్డి హవా చూస్తూ ఇరిగేషన్ శాఖ వారు నోరెత్తలేకపోయారంటారు.  తుడా పరిధిలో ఇష్టా రాజ్యంగా బెంచీల పేరుతో కోట్లాది రూపాయలు ఖర్చు పెట్టి,  ఆ బల్లలపై తన పేరు వేయించుకుని చెవిరెడ్డి చేసిన ప్రచార అర్భాటం ఇప్పటికీ ప్రజల నోళ్లలో నానుతూనే ఉంది. దానికి తోడు రహాదారులకు సైతం వైఎస్‌తో పాటు తన పేరు పెట్టుకున్న ఘనత ఆయనది. తుడా అనేది కేవలం చంద్రగిరి నియోజకవర్గం వరకే అన్నట్లు పాలన సాగించారు. తుడా నిధులతో సొంత సర్వే టీములకు, వ్యక్తిగత సిబ్బందికి జీతాలు ఇప్పించుకున్నారన్న ఆరోపణలున్నాయి. వాటితో పాటు అనేక రకాలుగా తుడా నిధులు దుర్వినియోగం చేశారన్న అభియోగాలున్నాయి. తుడా నిధులతో  తుమ్మల గుంట చెరువులో ఏర్పాటు చేసిన పార్కుపై ఇప్పటికీ వివాదాలు నడు స్తున్నాయి.  పూర్వం చెరువు ఏలాగుందో అలా ఉంచాలని చాలామంది గ్రీన్ ట్రిబ్యునల్‌కు వెళ్ళారు. ఇప్పటికే గ్రీన్ ట్రిబ్యునల్ అదేశాలతో అవిలాల చెరువును యాధావిధిగా ఉంచడానికి టీటీడీ ఇరిగేషన్ శాఖ అందులో ఉన్న నిర్మాణాలు తొలగిస్తోంది. ఇదే పరిస్థితి తుమ్మల గుంట చెరువులో ఏర్పాటు చేసిన పార్క్‌కు కూడా పట్టే కాలం దగ్గరలో ఉందని అంటున్నారు. ఎన్నికలలో ఎంపీగా ఒంగోలు నుంచి పోటీ చేసి ఓటమి పాలయ్యారు చెవిరెడ్డి. మరో వైపు చంద్రగిరిలో తన కూమారుడు మోహిత్ రెడ్డిని అభ్యర్థిగా రంగంలో దించారు. మోహిత్ భారీ తేడాతో టీడీపీ అభ్యర్థి పులివర్తి నాని చేతిలో ఓటమి పాలయ్యారు. ఇప్పుడు పలు కేసులు, వివాదాలు చెవిరెడ్డిని చుట్టుముడుతున్నాయి. ఓటర్ల జాబితా తయారీలో అక్రమాలకు పాల్పడ్డారని ఎమ్మెల్యే పులివర్తి నాని ఫిర్యాదుతో సీఐడీ కేసులు పెట్టి విచారిస్తోంది. తుడా నిధల అక్రమాలపై విజిలెన్స్ విచారణ జరుగుతున్నది. దాంతో పాటు పోలింగ్ తర్వాత పులివర్తి నానిపై పద్మావతి మహిళా యూనివర్సిటిలో జరిగిన దాడికి సంబంధించి హత్యాయత్నం కేసుల విచారణ సాగుతోంది. వాటితో పాటు తుమ్మలగుంట చెరువులో ఉన్న పార్క్‌ను ఇప్పటి వరకు చెవిరెడ్డి తన సొంత ఆస్తిలా భావిస్తూ వచ్చారు.. ఇప్పుడు దాన్ని తుడా నిర్వహణలో తీసుకోవాలని పై స్థాయిలో నిర్ణయం తీసుకోవాలని ప్రయత్నిస్తున్నట్లు ప్రచారం జరుగుతుండటంతో పావులు కదపడం మొదలు పెట్టారంట. గ్రామంలోని వారందరితో అత్యవసర అత్మీయ సమావేశం ఏర్పాటు చేసి మరీ తాను అందర్నీ బిడ్డల కంటే ఎక్కువగా చూసుకున్నా, తన బిడ్డని ఓడించారంటూ సెంటిమెంట్ పండించే ప్రయత్నం చేశారంట. దాంతో పాటు పార్క్‌ను తుడా నిర్వహిస్తే దారుణంగా మారిపోతుందని దాని కోసం పోరాటం సాగిద్దామని పిలుపు నివ్వడం హాస్యాస్పదంగా మారింది.  పార్క్ కట్టిన చెరువు ఇరిగేషన్ శాఖది, అయితే నిధులు తుడావి అయినప్పుడు  నిర్వహణ అవి  చేయాలి కానీ తన పరిధిలో ఉంచుకోవాలని ప్రయత్నించడంపై విమర్శలు వస్తున్నాయి. మొత్తం మీద సొంత అస్తి కోల్పోతున్నట్లు చెవిరెడ్డి తెగ ఇదై పోతున్నారని అందరూ సెటైర్లు విసురుతున్నారు. పక్కనున్న హాథీరాంజీ మఠం భూములలో గ్రామస్తులు కొంతమంది ఇల్లు కట్టుకున్నప్పుడు వాటిని చెవిరెడ్డి కూల్చి వేయించారు. ఇప్పుడు తన దాకా వచ్చే సరికి నొప్పి తెలుస్తోందని గ్రామస్తులు దెప్పిపొడుస్తున్నారు. మొత్తం మీద చెవిరెడ్డి కన్నీటి ఎపిసోడ్ ఇప్పుడు పెద్ద చర్చనీయాంశంగా మారింది.
హాట్‌టాపిక్‌గా మారిన చెవిరెడ్డి కన్నీటి ఎపిసోడ్! Publish Date: May 14, 2025 1:48PM

News Videos

See More News Videos
పాకిస్థాన్ కి బిగ్ షాక్.. బలూచిస్థాన్ స్వతంత్ర దేశం

పాకిస్థాన్ కి బిగ్ షాక్.. బలూచిస్థాన్ స్వతంత్ర దేశం

75 ఏళ్ల  సుదీర్ఘ పోరాటం ఫ‌లించిన వేళ‌ అజిత్ దోవ‌ల్ అన్న మాట నిజ‌మైన సంద‌ర్భం!  ఎట్ట‌కేల‌కు బ‌లూచిస్థాన్ స్వ‌తంత్ర దేశంగా ప్ర‌క‌టించుకుంది.ప్ర‌భుత్వ ఏర్పాట్ల‌కు స‌న్నాహాలు చేసుకుంటోంది. క్వెట్టాలో కొత్త పార్ల‌మెంటు ఫోటోలు, జాతీయ చిహ్నం, జాతీయ గీతాన్ని సోష‌ల్ మీడియాలో పంచుకుంది. భార‌త్ స‌హా ప‌లు దేశాలు త‌మ దేశంలో యాంబ‌సీలు ఏర్పాటు చేసుకోవాల‌ని కోరింది. పాక్ నుంచి స్వాతంత్రం కోసం.. బ‌లూచిస్థాన్ లిబ‌రేష‌న్ ఆర్మీ స‌హా ప‌లు సంస్థ‌లు ద‌శ‌కాలుగా పోరాడుతున్నాయి. ఈ యుద్ధం సంద‌ర్బంగా వారి ఆశ‌లు ఆశ‌యాలు ఒక్క‌సారిగా  ఫ‌లించిన‌ట్ట‌య్యింది. బ‌లూచిస్థాన్ ది 75 ఏళ్ల స్వ‌తంత్ర పోరాటం. ఖాన్ ఆఫ్ క‌లాత్ పాల‌న‌లో స్వేచ్ఛ‌గా ఉన్న ఈ రాజ్యం.. 1948లో బ‌ల‌వంతాన పాక్ ప్ర‌భుత్వ సైనిక చర్య ద్వారా ఆ దేశంలో క‌లిసింది. పాకిస్థాన్ భూభాగంలో 44 శాతం బ‌లూచిస్తాన్ దే. పాక్ జ‌నాభాలో వీరి  వంతు 7 నుంచి 8 శాతంగా ఉంది. ఇప్పుడు బ‌లూచిస్తాన్ విడిపోవ‌డం వ‌ల్ల పాక్ కి వ‌చ్చే న‌ష్టాలేంట‌ని చూస్తే..  మొద‌టిది నైస‌ర్గికంగా పాక్ మ‌రింత బ‌ల‌హీన‌ప‌డుతుంది. మొత్తం పాకిస్థాన్ లోనే 44 శాతం వేరు ప‌డడం అంటే దాదాపు స‌గానికి స‌గం దాని నైస‌ర్గిక ముఖ‌చిత్రమే మారిపోతుంది. దీనికి తోడు సింధ్, గిల్గిట్ బ‌ల్టిస్థాన్ సైతం.. వేరు ప‌డే అవ‌కాశాలున్నాయి.  దీంతో ఇది మ‌రో దెబ్బ‌గా క‌నిపిస్తోంది. రెండో స‌మ‌స్య ఏంటంటే చైనా ఇన్నాళ్ల పాటు ఉచిత సాయాలు చేసిందే బ‌లూచిస్థాన్ని చూసి. ఇక్క‌డ డ్రాగన్ కంట్రీ ఇది వ‌ర‌కే హైబ్రిడ్ రోడ్లు వేసి, ట్రాకులు నిర్మించడం.. వాటిని బ‌లూచీలు ధ్వంసం చేస్తున్నార‌న్న ఆలోచ‌న కొద్దీ ఎయిర్ పోర్టు నిర్మించ‌డం వంటి ఎన్నో కార్య‌క‌లాపాల‌ను చేప‌ట్టింది.. అంతే కాకుండా గ్వ‌ద‌ర్ పోర్టు నిర్మించి చైనా ప‌డుతున్న పాట్లు మొత్తం బూడిద‌లో పోసిన  ప‌న్నీరే.  దీంతో ఇక‌పై పాక్ కి చైనా త‌న వ్యూహాత్మ‌క స‌హ‌కారం అందించే అవ‌కాశం లేక పోవ‌చ్చు. పాకిస్థాన్ విదేశాంగ మంత్రికి, చైనా విదేశాంగ మంత్రి.. మొన్న చెప్పిన మాట ఏంటంటే.. మీ దేశ సార్వ‌భౌమాధికారానికి ఇబ్బంది క‌లిగితే తాము అడ్డుకుంటామ‌ని.  అది పీఎల్ 15లు స‌ర‌ఫ‌రా చేసిందికూడా అందు కోస‌మే. అలాంటి స‌హాయ స‌హ‌కారాలు ఇక‌పై చైనా చేయ‌క పోవ‌చ్చు. కార‌ణ‌మేంటంటే.. చైనాకు కావ‌ల్సింది బ‌లూచిస్థాన్ అందులో ఉన్న అశేష విశేష ఖ‌నిజ సంప‌ద‌లు. అంతే కానీ, పాకిస్థాన్, దాని ప్రేరేపిత ఉగ్ర‌వాదం కోసం కాదు. ఇక‌పై చైనా ఏదైనా స‌హాయం చేయాల్సి వ‌స్తే నేరుగా బ‌లూచిస్తాన్ కే చేసే అవ‌కాశ‌ముంది. దీంతో పాక్ కి ఇటు గోడ దెబ్బ అటు చెంప దెబ్బ త‌గిలింద‌నే చెప్పాల్సి ఉంటుంది. ఒక్క బ‌లూచిస్తాన్ ని వేరు చేసుకోవ‌డం అంటే పాకిస్థాన్ దాదాపు స‌గం శ‌క్తిని కోల్పోయిన‌ట్టే. వారు మొన్నంటే మొన్న ఒక ట్రైన్ని హైజాక్ చేసి మ‌రీ త‌మ నిర‌స‌న తెలిపింది బలూచిస్థాన్ లిబరేషన్ ఆర్మీ. ఇటీవ‌ల భార‌త్ తో జ‌రిగిన యుద్ధంలోనూ క్వెట్టాలోని పాక్ ప్ర‌ధాన  సైనిక కార్యాల‌యాల‌పై దాడులు చేసి త‌రిమి త‌రిమి కొట్టింది బ‌లూచిస్తాన్ లిబ‌రేష‌న్ ఆర్మీ. ఎందుకంటే పాకిస్తానీయులు, బలూచి యువ‌త‌ను కిడ్నాప్ చేసి మ‌రీ.. త‌మ సైన్యంలో క‌లుపుకునేవారు. ఇలాంటి  ఎన్నో పాక్ అరాచ‌కాల నుంచి ప్రస్తుతం బ‌లూచిస్తాన్ బ‌య‌ట‌ప‌డిన‌ట్టు క‌నిపిస్తోంది. ఈ విష‌యం అజిత్ దోవ‌ల్ ఎప్పుడో చెప్పారు. ఈ సారిగానీ ముంబై త‌ర‌హా దాడులు రిపీట్ అయితే.. మీ  నుంచి బ‌లూచిస్తాన్ వేరుప‌డ్డం ఖాయ‌మ‌ని. బ‌లూచిస్తాన్ లిబ‌రేష‌న్ ఆర్మీకి సంబంధించిన కొంద‌రు వేర్పాటు వాదులు ఆఫ్గ‌నిస్తాన్ వెళ్లి అక్క‌డ సైనిక శిక్షణ  తీస్కుని మ‌రీ.. పాకిస్థాన్ తో పోరాడారు. బలూచిస్థాన్ ఇండిపెండెంట్ నేషన్ అయ్యిందంటే పాక్ రెక్క‌లు తెగిన‌ట్టే. ఇటు బ‌లూచిస్తాన్ పోయి అటు చైనా స‌పోర్టు కూడా క‌నుమ‌రుగు కావ‌డం ఖాయంగా క‌నిపిస్తోంది.  
పాకిస్థాన్ కి బిగ్ షాక్.. బలూచిస్థాన్ స్వతంత్ర దేశం Publish Date: May 14, 2025 1:26PM
అందాల పోటీలకు లేని ముప్పు ఐపీఎల్‌కి ఎందుకు?

అందాల పోటీలకు లేని ముప్పు ఐపీఎల్‌కి ఎందుకు?

సరిహద్దుల్లో ఉద్రిక్తతలు, డ్రోన్ దాడులు, వార్ మాక్ డ్రిల్స్ నడుస్తున్న సమయంలో.. మిస్ వరల్డ్ పోటీల నిర్వహణ ఇండియాలో ఆందోళనకరమైన పరిస్థితులు లేవని స్పష్టం చేస్తోంది. ఉద్రక్తతల తీవ్రత అంతగా లేని దేశంగా భారత్ ఫోకస్ అవుతోంది. సరిహద్దులకు హైదరాబాద్ దూరంగా ఉండటం, ప్రశాంతంగా ఈవెంట్ కొనసాగుతుండటంతో.. దేశంలో భద్రతపై అందరికీ స్పష్టత వచ్చింది. అయితే.. మిస్ వరల్డ్ పోటీలకు లేని ముప్పు.. ఐపీఎల్‌కు ఎక్కడి నుంచి వచ్చిందనే ప్రశ్నలు కూడా తలెత్తుతున్నాయ్.  హైదరాబాద్‌లో మిస్ వరల్డ్ పోటీల నిర్వహణపై.. రెండు వైపులా బలమైన వాదనలు వినిపిస్తున్నాయ్. ఓ వైపు.. ఈ మెగా ఈవెంట్‌ని తెలంగాణని అంతర్జాతీయ వేదికపై ప్రమోట్ చేసే అధ్బుతమైన అవకాశంగా చెబుతున్నారు.  మరో వైపు జాతీయ భద్రతా సంక్షోభ సమయంలో అందాల పోటీల నిర్వహణ కరెక్ట్ కాదనే విమర్శలూ వినవస్తున్నాయి. అయితే సర్కార్ చేసిన కట్టుదిట్టమైన భద్రతా ఏర్పాట్లతో హైదరాబాద్ సురక్షితమైన గమ్యస్థానమనే సందేశాన్నిస్తోంది తెలంగాణ ప్రభుత్వం. ఎందుకంటే ప్రపంచం మొత్తం ఆసక్తిగూ చూసే ఇలాంటి మెగా ఈవెంట్లు సక్సెస్ కావాలంటే భద్రతా చర్యలు అత్యంత పకడ్బందీగా ఉండాలి. సరిహద్దుల్లో ఉన్న ఉద్రిక్తతల ప్రభావం ఈ పోటీలపై పడకుండా చూడాలి.  ఎలాంటి ఆటంకాలు, ఇబ్బందులు లేకుండా.. మిస్ వరల్డ్ పోటీలు విజయవంతమైతే.. హైదరాబాద్, తెలంగాణ సేఫ్ డెస్టినేషన్‌ అనే గుర్తింపు వస్తుంది. దాంతో భవిష్యత్తులో ఇలాంటి వరల్డ్ క్లాస్ ఈవెంట్లు మరిన్ని నిర్వహించేందుకు హైదరాబాదే ఫస్ట్ ఆప్షన్‌గా మారుతుంది.  గ్లోబల్ కాన్ఫరెన్స్‌లకు హైదరాబాద్ వేదిక అవుతుంది. పరోక్షంగా రాష్ట్రంలో పెట్టుబడులు కూడా పెరిగే అవకాశముంది. అందు కోసమేప్రభుత్వం ఈ ఈవెంట్‌ని సమర్థవంతంగా నిర్వహించి సిటీ ఇమేజ్‌ని గ్లోబల్ స్థాయికి తీసుకెళ్లాలని భావిస్తోంది.  అయితే ఇదే సమయంలో ఐపీఎల్ ఎందుకు వాయిదా వేశారనే చర్చ కూడా సాగుతోంది. మిస్ వరల్డ్ పోటీలకు లేని ముప్పు  ఐపీఎల్ మ్యాచ్‌లకు ఎందుకు ఉంది? అనే ప్రశ్నలు తలెత్తుతున్నాయ్.   ఐపీఎల్ , మిస్ వరల్డ్ అందాల పోటీలు రెండూ మెగా ఈవెంట్లే. కానీ మిస్ వరల్డ్ పోటీలు ఇండోర్ ఈవెంట్.  అందువల్ల  భద్రతాపరంగా రిస్క్ తక్కువనే వాదనలు వినిపిస్తున్నాయ్. ఇప్పటికే తెలంగాణ ప్రభుత్వం ఫుల్ సెక్యూరిటీ ఏర్పాట్లు చేసింది. జనం కూడా ఎక్కువగా గ్యాదర్ అయ్యే పరిస్థితి లేదు. అందుకోసమే మిస్ వరల్డ్ పోటీలను షెడ్యూల్ ప్రకారం నిర్వహిస్తున్నారు. కానీ ఐపీఎల్ అలా కాదు. ఒకే చోట పబ్లిక్ గ్యాదరింగ్ ఎక్కువగా ఉంటుంది. వేలాది మంది ఒకచోటుకి చేరతారు. పైగా సరిహద్దులకు దగ్గరలో ఉన్న స్టేడియాల్లో మ్యాచ్‌లు జరుగుతున్నాయ్.  ఇప్పటికే పాకిస్తాన్‌లోని రావల్పిండి స్టేడియంపై భారత ఆర్మీ డ్రోన్‌తో దాడి చేసింది. దాంతో బోర్డర్‌కు దగ్గరలో ఉన్న స్టేడియాలకు డ్రోన్ దాడుల ముప్పు పొంచి ఉంది. పాక్ ఏ క్షణమైనా డ్రోన్లతో దాడి చేయొచ్చనే సమాచారం ఉంది. ఒకవేళ అదే జరిగితే నష్టం కూడా అదే స్థాయిలో ఉంటుంది. స్టేడియంలో ఒక్క డ్రోన్ పేలినా భయంతో జనం పరుగులు పెడితే తొక్కిసలాట లాంటి దుర్ఘటనలు కూడా జరిగే అవకాశం ఉంది. అప్పుడు డ్రోన్ దాడితో జరిగే నష్టం కంటే ఇలా తొక్కిసలాట జరిగితే సంభవించే నష్టం ఎక్కువగా ఉంటుంది. అందుకోసమే ఐపీఎల్ మ్యాచ్‌లను తాత్కాలికంగా వాయిదా వేశారు. దేశంలో పరిస్థితులు మెరుగై సరిహద్దుల్లో ఉద్రిక్తతలు తగ్గడంతో మళ్లీ ఐపీఎల్ మొదలకానుంది. దేశ సరిహద్దుల్లో ఉద్రిక్త పరిస్థితులు నెలకొన్నా భారత్‌లోని మిగతా రాష్ట్రాల్లో పరిస్థితులు చక్కగానే ఉన్నాయ్, చాలా ప్రాంతాల్లో శాంతియుత వాతావరణమే కొనసాగుతుందనే సందేశం ఇవ్వడంలో హైదరాబాద్‌లో జరుగుతున్న మిస్ వరల్డ్ పోటీలు  సక్సెస్ అయ్యాయనే అభిప్రాయాలు వినిపిస్తున్నాయ్. ఇందుకు గచ్చిబౌలి ఇండోర్ స్టేడియంలో జరిగిన మిస్ వరల్డ్ ఈవెంట్ ఓపెనింగ్ సెర్మనీని విజయవంతంగా నిర్వహించడంలో తెలంగాణ ప్రభుత్వం సక్సెస్ అయింది. పైగా.. ఈ ఈవెంట్‌లో 110 దేశాల సుందరీమణులు తమ జాతీయ జెండాలతో.. ఫ్లాగ్ పరేడ్‌లో పాల్గొన్నారు. ఈ మెగా ఈవెంట్.. ప్రపంచం దృష్టిని తెలంగాణ వైపు మరల్చింది. పైగా.. ఈ ఈవెంట్ ద్వారా తెలంగాణ సంస్కృతి, చారిత్రక స్థలాలు, ఆధునిక, మౌలిక సదుపాయాలను.. అంతర్జాతీయ వేదికపై ప్రదర్శించడంలో ప్రభుత్వం విజయవంతమైంది. టూరిజం పరంగా.. ఈ ఈవెంట్ తెలంగాణని గ్లోబల్ టూరిజం డెస్టినేషన్‌గా ప్రమోట్ చేస్తోంది. పోటీల్లో పాల్గొనేందుకు వచ్చిన అందాల భామలు రాష్ట్రంలోని ప్రముఖ టూరిజం స్పాట్‌లను సందర్శిస్తున్నారు. ఇది.. స్టేట్ బ్రాండ్ ఇమేజ్‌ని మరింత పెంచింది. ఎన్ని విమర్శలు ఎదురైనా ముందుగా అనుకున్న షెడ్యూల్ ప్రకారం ఈవెంట్‌ని కొనసాగించడంతో.. తెలంగాణ ప్రభుత్వం కమిట్‌మెంట్ ఏమిటో కూడా అందరికీ తెలిసింది.
అందాల పోటీలకు లేని ముప్పు ఐపీఎల్‌కి ఎందుకు? Publish Date: May 14, 2025 1:06PM
నిమ్మరసం నీళ్లు తాగితే.. షుగర్ తగ్గుతుందా?

నిమ్మరసం నీళ్లు తాగితే.. షుగర్ తగ్గుతుందా?

నిమ్మకాయ చాలా పానీయాలలో ఉపయోగిస్తారు.  అటు వంటలలోనూ, ఇటు స్వీట్ల లోనూ, మరొక వైపు రిఫ్రెషింగ్ పానీయాలలోనూ నిమ్మకాయను ఉపయోగిస్తారు.  చాలామంది ఉదయాన్నే నీటిలో నిమ్మరసం కలిపి తాగుతూ ఉంటారు. ఇది ఆరోగ్యానికి చాలా మంచిదని చెబుతారు. అయితే నిమ్మరసం కలిపిన నీళ్లు తాగడం వల్ల శరీరంలో షుగర్ కూడా తగ్గుతుందని కొందరు అంటారు. ఈ కారణంగా చాలామంది షుగర్ పేషెంట్ లు నిమ్మరసం కలిపిన నీళ్లు తాగుతూ ఉంటారు.  అయితే నిమ్మరసం కలిపిన నీళ్లు తాగడం వల్ల నిజంగానే శరీరంలో షుగర్ శాతం తగ్గుతుందా?  నిమ్మరసం నీరు శరీరంలో షుగర్ తగ్గించడంలో సహాయపడుతుందా? తెలుసుకుంటే.. నిమ్మరసాన్ని నీటిలో కలిపి తాగితే రక్తంలో చక్కెర శాతం తగ్గుతుందని చాలామంది అనుకుంటారు. కానీ నిజానికి నిమ్మరసం కలిపిన నీరు రక్తంలో చక్కెరను తగ్గించదు, కానీ చక్కెరను నియంత్రించడంలో సహాయపడుతుంది.  ఈ రెండింటికి తేడా ఏంటని చాలా మంది అయోమయానికి గురవుతూ ఉంటారు. తీసుకునే ప్రతి ఆహారంలో ఉండే గ్లూకోజ్ పరిమాణాన్ని బట్టి దాని గ్లైసెమిక్ ఇండెక్స్ ను నిర్ణయిస్తారు.  అలాగే నిమ్మకాయ గ్లైసెమిక్ ఇండెక్స్ ను గమనిస్తే ఇది చాలా తక్కువగా ఉంటుంది.  తక్కువ గ్లైసెమిక్ ఇండెక్స్ కలిగిన ఆహారాలు రక్తంలో చక్కెర స్థాయిలను ఆకస్మికంగా పెరగకుండా చేస్తాయి. నిమ్మకాయలో కరికే ఫైబర్ ఉంటుంది.  ఈ కరిగే ఫైబర్ నెమ్మదిగా జీర్ణం అవుతూ రక్తంలో శోషించబడుతుంది.  తద్వారా  రక్తంలో చక్కెరను నెమ్మదిగా పెంచడంలో సహాయపడుతుంది. సహాయపడుతుంది. అలాగే కొన్ని అధ్యయనాలు ఏం చెబుతున్నాయంటే..  నిమ్మరసం కలిపిన నీరు ఇన్సులిన్ సెన్సిటివిటీని మెరుగుపరుస్తుందని చెబుతున్నాయి. నిమ్మకాయ నీరు హైడ్రేషన్ ను నిర్వహిస్తుంది. ఇది రక్తంలో చక్కెరను స్థిరంగా ఉంచుతుంది.  ఈ కారణంగా నిమ్మరసాన్ని వేసవిలో ఎక్కువగా ఉపయోగిస్తుంటారు. అయితే నిమ్మరసానికి చక్కెర,  చక్కెర సంబంధిత పదార్థాలు జోడించడం వల్ల షుగర్ ఉన్నవారికి నష్టమే తప్ప ఎలాంటి ప్రయోజనం ఉండదు. నిమ్మరసంలో విటమిన్-సి ఉంటుంది.  ఇది వాపును, ఇన్ఫెక్షన్లను తగ్గించడంలో సహాయపడుతుంది.  రోగనిరోధక శక్తిని పెంచుతుంది.  జీవక్రియను కూడా మెరుగుపరుస్తుంది. ఈ కారణంగానే కడుపు ఉబ్బరం, గ్యాస్,  అజీర్తి వంటివి చేసినప్పుడు నిమ్మరసం నీటిలో కాసింత జీలకర్ర పొడి కూడా కలిపి తాగమని చెబుతూ ఉంటారు. నిమ్మకాయ నీరు కాలేయాన్ని శుభ్రపరచడంలో సహాయపడుతుంది.  ఇది రక్తంలో చక్కెర స్థాయిలను బాగా నియంత్రించడంలో సహాయపడుతుంది.                                     *రూపశ్రీ.   గమనిక: ఇది సోషల్ సమాచారం మాత్రమే. కొన్ని అధ్యయనాలు, సంబంధిత నిపుణుల ప్రకారం ఈ వివరాలు అందించాం. వ్యక్తుల ఆరోగ్యాన్ని బట్టి ఫలితాలుంటాయి. వీటిని పాటించేముందు.. సంబంధిత నిపుణుడిని సంప్రదించడం శ్రేయస్కరం. అలాగే, హెల్తీ లైఫ్ స్టైల్, సరైన ఆహారం కూడా తీసుకోవడం మీ ఆరోగ్యానికి ఎంతో మేలు..
నిమ్మరసం నీళ్లు తాగితే.. షుగర్ తగ్గుతుందా? Publish Date: May 14, 2025 12:01PM
భార్యాభర్తల మధ్య సైలెంట్ డైవోర్స్ గురించి  తెలుసా..!

భార్యాభర్తల మధ్య సైలెంట్ డైవోర్స్ గురించి  తెలుసా..!

  నేటి కాలంలో విడాకుల కేసులు పెరిగినప్పటికీ, విడాకుల కొత్త పోకడలు కూడా ఉనికిలోకి వచ్చాయి. ఈ కొత్త విడాకుల నిబంధనలలో గ్రే విడాకులు, స్లీవ్ విడాకులు, సిల్వర్ విడాకులు మొదలైనవి ఉన్నాయి. అదే సమయంలో ఈ రోజుల్లో  నిశ్శబ్ద విడాకుల కేసులు కూడా పెరుగుతున్నాయి. సైలెంట్ డైవోర్స్ అంటే నిశ్శబ్ద విడాకులు. ఈ రకమైన విడాకులలో చాలా సార్లు దంపతులకు తమ సంబంధం నిశ్శబ్ద విడాకుల వైపు కదులుతోందని లేదా వారు ఇప్పటికే సైలెంట్ డైవర్స్   తీసుకున్నారని వారి కూడా  తెలియదు. తమ మధ్య సైలెంట్ గా విడాకులు  జరిగాయని ఆ జంట గ్రహించినప్పుడు వారు చట్టబద్ధంగా విడిపోతారు. ఇది విడాకుల చట్టపరమైన ప్రక్రియకు ముందు దశ కావచ్చని ఫ్యామిలీ కౌన్సిలర్లు అంటున్నారు. సైలెంట్ డైవర్స్ అంటే.. సైలెంట్ డైవర్స్  అంటే భార్యాభర్తలు చట్టబద్ధంగా కలిసి ఉండే వైవాహిక పరిస్థితి. అంటే విడాకులు తీసుకోలేదు కానీ భావోద్వేగ, మానసిక,  కమ్యూనికేషన్ స్థాయిలో ఒకరి నుండి ఒకరు పూర్తిగా విడిపోతారు. ఇద్దరూ ఒకే ఇంట్లో  నివసిస్తుంటారు కానీ వారి మధ్య ఎటువంటి భావోద్వేగ సంబంధం లేదా సంభాషణ ఉండదు. వారి మధ్య భౌతిక దూరం కూడా ఉండవచ్చు. ఇది బంధం నిశ్శబ్దంగా అదృశ్యమవడాన్ని సూచిస్తుంది. సైలెంట్ డైవోర్స్ లో ఇద్దరి మధ్య సంబంధం సజీవంగా ఉంటుంది.  కానీ బంధంలో ఆత్మ,  జంట మధ్య పరస్పర అనుబంధం చనిపోతుంది. సైలెంట్ డైవర్స్ సిగ్నల్స్ ఇవే.. భార్యాభర్తల మధ్య బంధం సైలెంట్ డైవోర్స్ వైపు వెళుతోందా లేదా అనే విషయం తెలుసుకోవడానికి కొన్ని సిగ్నల్స్ కనిపిస్తాయి.  వాటి ద్వారా దీన్ని గుర్తించి జాగ్రత్త వడవచ్చు. సంభాషణ ఉండదు.. భార్యాభర్తలు ఇద్దరూ ఒకరితో ఒకరు సాధారణ విషయాలే కాదు.. ఒకరితో ఒకరు ముఖ్యమైన విషయాల గురించి కూడా మాట్లాడుకోరు. వారి మధ్య దాదాపుగా కమ్యూనికేషన్ ఉండదు. రోజువారీ విషయాలు కేవలం లాంఛనాలుగా జరుగుతూ ఉంటాయి. ఎమోషనల్ డిస్టెన్స్.. భార్యాభర్తలు ఒకరి భావాలను ఒకరు పట్టించుకోరు. ఇద్దరి మధ్య ఎమోషన్ డిస్టెన్స్ ఏర్పడుతుంది. ఒకరి సుఖదుఃఖాలను ఒకరు పంచుకోరు.  ఒకరి సమస్యలను లేదా ఆలోచనలను ఒకరు పట్టించుకోరు. శారీరక దూరం.. సైలెంట్ డైవర్స్ దిశగా వేళ్లే భార్యాభర్తల బంధంలో  వారి శారీరక  సంబంధాన్ని కోల్పోతారు. కలిసి కూర్చోవడం, ఒకరి చేతులు ఒకరు పట్టుకోవడం, కౌగిలించుకోవడం,  కలిసి పడుకోవడం వంటివి దూరం అవుతాయి.   గదిని పంచుకోవచ్చు కానీ రూమ్‌మేట్ లాగా ఎవరికి వారు ఉంటారు. సమయం ఇవ్వకపోవడం.. భార్యాభర్తలు ఒకరికొకరు సమయం ఇవ్వనప్పుడు సమయాన్ని కలిసి  గడపాలని అనుకోరు . కలిసి తినాలనే కోరిక, బయటకు వెళ్లాలనే కోరిక లేదా సెలవు దినాల్లో కలిసి సమయం గడపాలనే కోరిక తగ్గినప్పుడు వారు సైలెంట్ డైవోర్స్ వైపు  ఉన్నారని అర్థం చేసుకోవాలి. ఆసక్తి.. సాధారణంగా భార్యాభర్తలు  ఒకరి జీవితం గురించి ఒకరు తెలుసుకోవాలనుకుంటారు. వారు గొడవ పడినా, తమ భాగస్వామి రోజు ఎలా గడిచిందో, ఏం చేశారో, తమ స్నేహితులు ఎలా ఉన్నారో తెలుసుకోవడంలో   ఆసక్తి కలిగి ఉంటారు. కానీ వారి మధ్య అలాంటి సాధారణ విషయాలు కూడా  అదృశ్యమైనప్పుడు, వారి మధ్య సైలెంట్ డైవర్స్ పరిస్థితి ఏర్పడుతుంది. గొడవలు.. కొన్నిసార్లు వాదనలు లేదా విభేదాలు లేకపోవడం మంచిదని అనిపించవచ్చు. కానీ వాటి మధ్య ఎటువంటి భావోద్వేగ సంబంధం లేదని కూడా ఇది సూచిస్తుంది. వారికి ఒకరి నుండి ఒకరు ఎటువంటి ఆశలు ఉండవు. కాబట్టి వారు ఒకరితో ఒకరు గొడవ పడటానికి కూడా ఇష్టపడరు. సైలెంట్ డైవోర్స్ గురించి కొన్ని నిజాలు.. భార్యాభర్తలు చాలా మంది తమ పిల్లలను పెంచడానికి మాత్రమే కలిసి ఉంటారు. వారు భార్యాభర్తలుగా తమ సంబంధంలో సంతోషంగా లేరు కానీ తమ పిల్లల కోసం చట్టబద్ధంగా విడాకులు తీసుకోకుండా ఉంటారు విడాకులు సమాజంలో అవమానానికి కారణమవుతున్నాయి. సామాజిక కళంకం, కుటుంబ ఒత్తిడి,  విమర్శల భయాన్ని నివారించడానికి, జంటలు విడాకులు తీసుకోరు,  అందుకే ఇద్దరి మధ్య సైలెంట్ వాతావరణం ఏర్పడుతుంది. దీన్నే సైలెంట్ డైవోర్స్ అంటారు. భర్తలు డైవోర్స్ వల్ల ఆర్థికంగా లాస్ అవుతారు. దీని వల్ల విడాకులు ఇవ్వకుండా  ఆర్థిక లక్ష్యాల  కోసం రాజీగా  సైలెంట్ డైవోర్స్ ఎంచుకుంటారు. బంధంలో ప్రేమ, గౌరవం,  అవగాహన కాలక్రమేణా ముగిసినప్పుడు ప్రజలు బాధ్యతల కోసం మాత్రమే కలిసి ఉంటారు.                                         *రూపశ్రీ.  
భార్యాభర్తల మధ్య సైలెంట్ డైవోర్స్ గురించి  తెలుసా..! Publish Date: May 14, 2025 11:55AM
చీలిక ముంగిట బీఆర్ఎస్? మూడు కుర్చీలాట సంకేతమదేనా?

చీలిక ముంగిట బీఆర్ఎస్? మూడు కుర్చీలాట సంకేతమదేనా?

భారత రాష్ట్ర సమితి బీఆర్ఎస్ చీలిక ముంగిట నిలిచిందా? ఆ పార్టీ అధినేత, మాజీ ముఖ్యమంత్రి కల్వకుంట్ల చంద్రశేఖరరావు.. తన వారసుడి ప్రకటనకు ముహూర్తం పెట్టేసి రాజకీయ విరమణ లేదా రాజకీయ సన్యాసానికి రంగం సిద్ధం చేసేసుకున్నారా? అంటే బీఆర్ఎస్ లో గత కొన్ని రోజులుగా వరుసగా చోటు చేసుకుంటున్న పరిణామాలను గమనిస్తే ఔనన్న సమాధానమే వస్తున్నది. గత కొంత కాలంగా ఒక పద్ధతి ప్రకారం పార్టీలో హరీష్ రావు ప్రాధాన్యత తగ్గుతూ లేదా తగ్గిస్తూ వస్తున్న తీరు, అలాగే ఇటీవలి కాలంలో బీఆర్ఎస్ ఎమ్మెల్సీ, పార్టీ అధినేత కుమార్తె కల్వకుంట్ల కవిత పార్టీ లైన్ కు భిన్నంగా చేస్తున్న వ్యాఖ్యలు గమనిస్తే.. పార్టీ పగ్గాల విషయంలో బీఆర్ఎస్ లో మూడు కుర్చీలాట జోరుగా సాగుతున్నదని పరిశీలకులు అంటున్నారు. 2023 ఎన్నికలలో బిఆర్ఎస్ పరాజయం తరువాత నుంచీ ఆ పార్టీ అధినేత కేసీఆర్ పొలిటికల్ గా ఏమంత యాక్టివ్ గా లేరు. ఇంత కాలం ఆయన రాజకీయాల నుంచి తాత్కాలిక విరామం మాత్రమే తీసుకున్నారని అంతా భావిస్తూ వచ్చారు. అయితే  ఇప్పుడిప్పుడే పార్టీ వర్గాలలో కూడా ఆయన తీసుకున్నది తాత్కాలిక విరామం కాదనీ, రాజకీయ విరమణేనన్న అభిప్రాయం వ్యక్తం అవుతున్నది. పార్టీ కార్యనిర్వాహక అధ్యక్షుడు కేటీఆర్ కు పూర్తిగా పగ్గాలు అప్పగించేయడమే తరువాయి అన్న వార్తలు కూడా గట్టిగా వినిపిస్తున్నాయి. ఈ నేపథ్యంలోనే అందుకు అనుగుణంగా కేసీఆర్ నెమ్మదిగా పావులు కదుపుతున్నారని అంటున్నారు. అందులో భాగంగానే ఇటీవల వరంగల్ వేదికగా జరిగిన పార్టీ పాతికేళ్ల సభలో హరీష్ రావు ప్రస్తావన, ప్రాముఖ్యత ఇసుమంతైనా లేకుండా అంతా కేటీఆరే అన్నట్లుగా నిర్వహించారంటున్నారు. అదే సమయంలో విషయాన్ని గుర్తించిన హరీష్ రావు తన దారి తాను చూసుకునేందుకు నిర్ణయించుకున్నారన్న వార్తలూ జోరుగా వినిపించాయి. అదే సమయంలో కేసీఆర్ కుమార్తె, ఎమ్మెల్సీ కవిత కూడా తన సంగతేంటంటూ గొంతెత్తుతున్న పరిస్థితి కనిపిస్తోంది.  తాజాగా ఆమె  రామానుజపురంలో నాంచారమ్మ జాతరలో పాల్గొన్నారు. ఈ సందర్భంగా సోది చెప్పే నాంచారమ్మలు కవిత భవిష్యత్ లో తెలంగాణకు ముఖ్యమంత్రి అవుతారని  జోస్యం చెప్పారు. వారి మాటలను చిరునగవుతో విన్న కవిత జై తెలంగాణ అంటూ నినదించారు. ఈ సంఘటన యథాలాపంగా జరిగింది కాదని పరిశీలకులు విశ్లేషిస్తున్నారు. కొద్ది రోజుల కిందట ఆమె సామాజిక తెలంగాణ సాధన ఇంకా మిగిలే ఉందంటూ చేసిన వ్యాఖ్యకు దీనిని జోడించి సొంత సోదరుడు కేటీఆర్ కు పార్టీ పగ్గాలు అప్పగించడాన్ని వ్యతిరేకిస్తున్నారంటున్నారు. అది పక్కన పెడితే.. సందర్భంతో సంబంధం లేకుండా తాను కేసీఆర్ ఎవరికి పగ్గాలు అప్పగించినా స్వాగతిస్తానంటూ హరీష్ రావు చేసిన వ్యాఖ్యలను కూడా ఆయనలోని అసంతృప్తికి, అసహనానికీ తార్కానంగా చెబుతున్నారు. అదే సమయంలో హరీష్ పార్టీ తదుపరి అధ్యక్షుడి విషయం లేవనెత్తడాన్ని కేసీఆర్ పోలిటికల్ రిటైర్మెంట్ కు రెడీ అయిపోయారన్న సంకేతాన్ని ఇవ్వడమేనని చెబుతున్నారు.  పార్టీ శాసనసభా పక్ష నేతగా కేటీఆర్ అంగీకరించని పార్టీ ఎమ్మెల్యేలు, నేతలు.. ఇప్పుడు ఏకంగా పార్టీ అధ్యక్ష పగ్గాలనే అప్పగిస్తానని కేసీఆర్ అంటే అంగీక రిస్తారా అన్న అనుమానాలూ సర్వత్రా వ్యక్తం అవుతున్నాయి. పార్టీ అధినేతగా కేసీఆర్ ఉన్నంత వరకూ ఆయన అభిప్రాయాన్ని కాదని ఎవరూ అనరు కానీ, ఒక సారి ఆయన ఆ స్థానం నుంచి తప్పుకుంటే మాత్రం కేసీఆర్ మాట ఇక పార్టీలో ఎంత మాత్రం శిలాశాసనం అన్న పరిస్థితి ఉండదని అంటున్నారు. ఈ నేపథ్యంలోనే పరిశీలకులు బీఆర్ఎస్ చీలిక అంచున ఉందన్న అభిప్రాయాన్ని వ్యక్తం చేస్తున్నారు. 
చీలిక ముంగిట బీఆర్ఎస్? మూడు కుర్చీలాట సంకేతమదేనా? Publish Date: May 14, 2025 11:01AM
ప్రతికూలతల మధ్య కూడా అమెరికాను ధిక్కరించిన ధీర వనిత ఇందిర.. మరి మోడీ?

ప్రతికూలతల మధ్య కూడా అమెరికాను ధిక్కరించిన ధీర వనిత ఇందిర.. మరి మోడీ?

భారత్, పాక్ మధ్య కాల్పుల విరమణ ఒప్పందానికి మోడీ సర్కార్ అంగీకరించడంపై దేశం రగిలిపోతోంది. అమెరికా అధ్యక్షుడు ట్రంప్ ఒత్తిడికి ప్రధాని మోడీ తలొగ్గారన్న భావన సర్వత్రా వ్యక్తం అవుతోంది. దీంతో 1971 యుద్ధ సమయంలో అప్పటి ప్రధాని ఇందిరాగాంధీ తెగువ.. సాహసం గుర్తు చేసుకుంటూ.. మోడీపై విమర్శలు గుప్పిస్తున్నారు.  అమోరికా ఒత్తిడిని లెక్క చేయకపోవడమే కాకుండా, ఆ దేశ హెచ్చరికలను, ఆంక్షల బెదరింపులను లెక్క చేయకుండా అప్పటి ప్రధాని ఇందిరాగాంధీ అద్భుత దౌత్యం నెరపడమే కాకుండా పాకిస్థాన్ పీచమణిచిన తీరును ప్రస్తుతిస్తున్నారు.      పాకిస్తాన్‌పై అన్ని విధాలుగా పై చేయి సాధించి కూడా అమెరికా ఒత్తిడికి తలొగ్గి కాల్పుల విరమణ ఒప్పందానికి అంగీకరించిన మోడీ  తీరును గర్హిస్తూ..  నాడు అంటే 1971 యుద్ధ సమయంలో ఇందిరాగాంధీ సాహసోపేత నిర్ణయాలను ప్రశంసిస్తూ సోషల్ మీడియాలో పోస్టులు వెల్లువెత్తుతున్నాయి.  అప్పటి అమెరికా అధ్యక్షుడు పాక్ తో యుద్ధం ఆపాలని ఎంతగా ఒత్తిడి తెచ్చినా ఇందిరా గాంధీ పట్టించుకోలేదని గుర్తు చేస్తున్నారు. అప్పట్లో భారత్ , పాకిస్థాన్ మధ్య ఆర్థికంగా, అభివృద్ధి పరంగా ఇంత తేడా లేదు. దాదాపు ఇరు దేశాలూ సమాన స్థాయిలో ఉన్నాయి. అప్పట్లో అయితే అమెరికా ఎలాంటి దాపరికం లేకుండా పాకిస్థాన్ కు మద్దతుగా నిలిచింది. అయినా సరే ఇందిరా గాంధీ అగ్రరాజ్యం అభ్యంతరాలను, ఒత్తిడినీ తోసిరాజని గట్టిగా నిలబడింది. అదే ఇప్పుడు.. పాకిస్థాన్ ఒక చితికిపోయిన దేశం. ఏ రకంగానూ భారత్ తో సరితూగలేదు. ఉగ్రవాదాన్ని అడ్డంపెట్టుకుని భారత్ లో అశాంతి, అల్లర్లు రేపాలన్న ప్రయత్నంలో ఉంది. ఇన్ని సానుకూలతల మధ్య కూడా మోడీ అమెరికా ఒత్తిడికి తలొగ్గి.. ట్రంప్ చెప్పినదే తడవుగా బేషరతు కాల్పుల విరమణకు ఓకే చెప్పేశారు. కనీసం భారత్ లో దాడులకు సూత్రధారులైన మసూద్ అజర్ వంటి ఉగ్రవాదుల అప్పగింతకు కూడా డిమాండ్ చేయలేదు.  అందుకే దేశమంతా ఇప్పుడు ఇందిరాగాంధీని గుర్తు చేసుకుంటోంది. గట్టిగా నిలబడి భారత్ సత్తాను చాటడంలో మోడీ వైఫల్యాన్ని ఎండగడుతోంది. భారత్ పాక్ మధ్య కాల్పుల విరమణ ఒప్పందాన్ని తొలుత అమెరికా అధ్యక్షుడు డొనాల్డ్ ట్రంప్ ప్రకటించడాన్ని ఎత్తి చూపుతోంది.  
ప్రతికూలతల మధ్య కూడా అమెరికాను ధిక్కరించిన ధీర వనిత ఇందిర.. మరి మోడీ? Publish Date: May 14, 2025 10:03AM
ముగిసిన తిరుపతి గంగమ్మ‌ జాతర

ముగిసిన తిరుపతి గంగమ్మ‌ జాతర

తిరుపతి గంగమ్మ జాతర వేడుకగా ముగిసాయి.  బుధవారం ( మే 14) ఉదయం అమ్మవారి విశ్వరూపానికి చెంప తొలగింపు కార్యక్రమంతో ఎనిమిది రోజుల పాటు వైభవంగా సాగిన జాతర పరిసమాప్తం అయ్యింది. అమ్మవారి విశ్వరూప దర్శనాన్ని చూసేందుకు రాయలసీమ ప్రాంతం, రాష్ట్రం నలుమూలల నుంచే  కాకుండా పలు రాష్ట్రాల నుంచి కూడా జనం పోటెత్తారు.  ఆలయంలోని విశ్వరూప స్తూపానికి గంగమ్మ విశ్వరూపాన్ని తయారు చేశారు.  ఆలయం ముందు బాగంగలో గంగమ్మ బొమ్మ తయారీలో దళితులు, కుమ్మరి, కంసాలి, చాకలి, మంగళి, గొల్ల వంటి మిరాశిదార్లు పాల్గొంటారు. గంగమ్మ బొమ్మకు కావలసినంత బంకమట్టిని పక్కనే ఉన్న కుమ్మరి వాళ్ళు   ఆచ్చారులకు అందించడం ఆనవాయితీ. అచ్చారులు నీలిమందునూనెను రంగరించి గంగమ్మ ముఖానికి నీలిరంగును అద్దారు. బంగారు పూతపూసిన చేప ఆకారంలో చెక్కిన  ముక్కెరను అలంకరించారు. బంగారం రంగురేకుల చెవులను గంగమ్మ బొమ్మకు జోడించారు. చెవులకు బంగారంలా మెరిసే సింగపూరు రేకుతో చేసిన కమ్మలు, జుంకీలను అలంకరిస్తారు. మంగళి వాళ్ళు గంగమ్మ బొమ్మ తలమీద తలవెనుక తెల్ల వెంట్రుకలను దారాల్లాగా పేర్చి, పొడవుగా వేలాడదీశారు. బంగారంలా ధగధగ మెరిసే సింగపూరు రేకుతోనే చేసిన నగిషీలు చెక్కిన కిరీటాన్ని అమ్మవారికి అలంకరించారు. కిరీటం క్రింద మల్లెపూలతోను., కనకంబరాలతోను అలంకరించారు. గంగమ్మ నుదురు భాగమంతా ఎర్రని కుంకుమను పట్టీలా పెట్టారు.  నుదురు భాగం మధ్యలో వెండితో చేసిన అడ్డనామాలను అమర్చారు. కనుబొమ్మల మధ్య గంధంతో పెద్ద బొట్టును పెట్టారు. గంగమ్మ బొమ్మ నోరు తెరుచుకొని ఉన్నట్లుగా రూపాని పెట్టారు. నోటినిండా ఎర్రకుంకుమను నింపారు. వెదురు రెబ్బలతో చేసిన పళ్ళను పెట్టారు. చాకలి వాళ్ళు తెచ్చిన చీరను గంగమ్మ బొమ్మకు కట్టారు. గొల్లవాళ్లే తెచ్చిన మంగళసూత్రాలను గంగమ్మ మెళ్ళో వేశారు. గంగమ్మ చీరకు ఒడిబాలును గొల్లవాళ్లే తెచ్చి పెట్టారు. కొద్దిసేపు బంగారు తాళిబొట్లును గంగమ్మ బొమ్మకు కట్టి తీశారు. కింద వెండితో చేసిన కన్నులను అమర్చుతారు. వెండి కన్నుల మధ్యలో నల్లని కనుగుడ్లు పెట్టడానికి ఖాళీ ప్రదేశం ఉంటుంది. కనుగుడ్లను మాత్రం చివరలో పెడ్తారు. నల్లగుడ్లను పెడితే గంగమ్మ బొమ్మకు ప్రాణం వచ్చినట్లు భావిస్తారు. తెల్లవారు జామున పేరంటాలు తాతయ్య గుంట గంగమ్మ గుడికి పేరంటాలు చేరుకున్నాయి. గుడి ముందున్న గంగమ్మ బొమ్మను చూస్తూనే పేరంటాలు వేషానికి పూనకం వచ్చి చిందులేసి చేతితో హారతి సమర్పించింది. గంగమ్మ బొమ్మ దగ్గరుండే వారు పేరంటాలు వేషానికి హారతిచ్చి గంగమ్మ పూలహారాన్ని తీసి పేరంటాలు వేషానికి వేశారు. తర్వాత చుట్టూ ఉన్న జనం, అరుపులు, కేకలు, కిలారింపులు అధికమయ్యాయి. పంబలవారు పంబను వాయిస్తూంటే పేరంటాలు వేషధారి పంబలకు అనుగుణంగా అడుగులేస్తూ, ఆవేశంతో, ఉద్రేకంతో గంగమ్మ బొమ్మ చెంప దగ్గరుండే మట్టిని చేత్తో లాగేయడాన్నే  "గంగమ్మ చెంప నరకడం" అంటారు. పేరంటాలు వేషం వెనక్కు వెళ్ళిపోతూ ఎదురుపడ్డ వారికి ఒడిబాలులోని అక్షింతల్ని ఇస్తారు. మొదటి తాతయ్యగుంట గంగమ్మ చెంప నరికి.. అక్కడి నుంచి బస్టాండ్ సమీపంలోని తాళ్లపాక పెద్ద గంగమ్మ చెంప నరకడంతో జాతర పూర్తి అయ్యింది. తిరుపతి గంగ జాతర చాటింపుతో ప్రారంభమై వివిధ వేషాలతో, మ్రొక్కులతో, వినోదాలతో, వ్యాపారాలతో, వివిధ పూజలతో సాగి చిట్ట చివర గంగమ్మ చెంప నరకడంతో పరిసమాప్తం అయింది.
ముగిసిన తిరుపతి గంగమ్మ‌ జాతర Publish Date: May 14, 2025 9:39AM
మూడ్ ఆఫ్ ది నేషన్ మారుతోందా?

మూడ్ ఆఫ్ ది నేషన్ మారుతోందా?

నిజమే. కాల్పుల విరమణ  విషయంలో ప్రధానమంత్రి నరేంద్ర మోదీ తీసుకున్న నిర్ణయాన్ని, కాంగ్రెస్ పార్టీ మాత్రమే కాదు, ఇతర ప్రతిపక్ష పార్టీలు, చివరకు బీజేపీ అభిమానులు, సామాన్యులు  కూడా తప్పు పట్టారు. ఒక విధంగా చూస్తే.. అంతవరకు సానుకూలంగా ఉన్న  ‘మూడ్ ఆఫ్ ది నేషన్’, ప్రతికూలంగా  మారిపోయింది. అంతవరకు  ప్రభుత్వం తీసుకున్న ప్రతి నిర్ణయాన్ని సమర్ధించిన రాజకీయ పార్టీలు విమర్శలకు తెర తీశాయి. కాల్పుల విరమణకు కారణాలు చెప్పాలని డిమాండ్ చేశాయి. అలాగే  అమెరికా అధ్యక్షుడు ట్రంప్  చేసిన ట్వీట్లకు సంబంధించి విపక్షాలు చేసిన విమర్శలు, విశ్లేషణలi దేశం మూడ్  ను మరింతగా మార్చివేశాయి. ఫలితంగా దేశ వ్యాప్తంగా ప్రభుత్వ వ్యతిరేక వాతావరణం వ్యాపించింది. ప్రభుత్వం ఇరకాటంలో పడింది.   అయితే అదే సమయంలో ఇటు ప్రభుత్వం, అటు బీజేపీ దిద్దుబాటు చర్యలకు శ్రీకారం చుట్టాయి. గడచిన 24 గంటల్లో చోటు చేసుకున్న పరిణామాలను గమనిస్తే..  ఇటు ప్రభుత్వం, అటు బీజేపీ నష్ట నివారణ  చర్యల వేగం పెంచినట్లు స్పష్టంవుతోందని విశ్లేషకులు పేర్కొంటున్నారు. నిజానికి.. బీజేపీ ముందుగానే  మూడ్ అఫ్ ది నేషన్ ను పసిగట్టింది. కాల్పుల విరమణ నిర్ణయం సామాన్యుల నుంచి మేథావుల వరకు అందరినీ అసంతృప్తికి గురిచేసిందనే సత్యాన్ని కమల దళం ముందుగానే గుర్తించింది. అందుకే..  ఏ మాత్రం జాప్యం చేయకుండా దిద్దుబాటు చర్యలకు శ్రీకారం చుట్టింది. ముఖ్యంగా సొంత పార్టీలో వినిపించిన అపశ్రుతులను సరి చేసేందుకు  చర్యలు తీసుకుంది.  అందులో భాగంగానే  తిరంగ యాత్ర  పేరిట పార్టీ క్యాడర్ ముందు ఒక కార్యక్రమాన్ని ఉంచిందని పార్టీ వర్గాలు  పేర్కొంటున్నాయి. మరోవంక ప్రధానమంత్రి నరేంద్ర మోదీ దేశ ప్రజలను ఉద్దేశించి చేసిన ప్రసంగం కూడా  నష్ట నివారణ చర్యల్లో భాగంగా తీసుకున్న నిర్ణయమే అంటున్నారు. మోదీ ప్రసంగం పార్టీని మళ్ళీ ఏక తాటిపైకి తీసుకు వచ్చిందని బీజేపీ వర్గాలు పేర్కొంటున్నాయి. అలాగే  కాల్పుల విరమణ నిర్ణయం పట్ల మరీ ముఖ్యంగా అమెరికా ఆదేశాలతో మోదీ కాల్పుల విరమణ నిర్ణయం తీసుకున్నారని జరిగిన ప్రచార ప్రభావాన్ని మోదీ ప్రసంగం కొంతవరకు తగ్గించగలిగిందని అంటున్నారు. అలాగే..  మోదీ ప్రసంగానికి కొనసాగింపుగా  భారత విదేశాంగ శాఖ  మంగళవారం(మే 13) ఆపరేషన్ సిందూర్, కాల్పుల విరమణ, జమ్మూ కశ్మీర్ వ్యవహారం, అమెరికా జోక్యంకు సంబంధించి మరింత స్పష్టత ఇచ్చిందిని అంటున్నారు.  అందులో ప్రధానంగా జమ్మూ కాశ్మీర్ విషయంలో భారత్ విధానంలో ఎటువంటి మార్పు లేదని విదేశాంగ శాఖ మరో మారు స్పష్టం చేసింది. కాల్పుల విరమణ ప్రతిపాదత పాకిస్థాన్ నుంచే వచ్చిందని దానిపై డీజీఎంవోల సమావేశంలో చర్చించి  నిర్ణయంతీసుకున్నామని విదేశీ వ్యవహారాల శాఖ అధికార ప్రతినిధి రణధీర్ జైస్వాల్ స్పష్టం చేశారు. అలాగే.. పరోక్షంగానే అయినా  అమెరికా అధ్యక్షుడు ట్రంప్  చేసిన చప్పుళ్ళకు జైస్వాల్ సమాధానం ఇచ్చారు. ఆపరేషన్ సిందూర్ జరుగుతున్న సమయంలో భారత్, అమెరికా నాయకులు మాట్లాడారని గుర్తు చేశారు. అయితే ఇందులో వాణిజ్యపరమైన అంశాలపై చర్చ జరగలేదని చెప్పారు. ఇక సింధూ   జలాల ఒప్పందంపై సస్పెన్షన్ కొనసాగుతుందన్నారు. కాశ్మీర్‌పై తమ విధానం మారలేదని తెలిపారు. కశ్మీర్‌ విషయంలో మధ్యవర్తిత్వం అవసరం లేదని స్పష్టం చేశారు. ఈ విషయంలో మూడో దేశం జోక్యాన్ని ఎంత మాత్రమూఆమోదించబోమని పేర్కొన్నారు. కశ్మీర్ సమస్య పరిష్కారానికి మధ్యవర్తిత్వం వహిస్తానంటూ అమెరికా అధ్యక్షుడు డొనాల్డ్ ట్రంప్ మరోసారి పేర్కొన్న నేపథ్యంలో విదేశాంగ శాఖ ప్రతినిధి..  నో ..థాంక్స్ అని చెప్పకనే చెప్పారు. అదలా ఉంటే  ప్రధానమంత్రి నరేంద్ర మోదీ మంగళవారం (మే 13)  ఉదయం పంజాబ్‌లోని అదంపూర్ ఎయిర్‌ బేస్‌ను సందర్శించి, జవాన్లతో మమేకమై సైనిక ఆపరేషన్ వివరాలను అడిగి తెలుసుకుని వారి ధైర్యసాహసాలను అభినందించారు. ఈ సందర్భంగా పాక్ నడ్డివిరిచిన ఎస్-400 (S-400) మిసైల్ బ్రాక్‌ డ్రాప్‌లో వీర జవాన్లకు ప్రధాని సెల్యూట్ చేస్తున్న ఫొటో సామాజిక మాధ్యమాల్లో ఇప్పుడు అందరినీ ఆకట్టుకుంటోంది. అదొకటి అయితే ప్రధాని అదంపూర్ విమానాశ్రయం పర్యటించడం ద్వారా, అదంపూర్ ఎయిర్‌బేస్‌ను తుత్తినియలు చేసినట్టు పాక్ చేస్తున్న అసత్య ప్రచానికి మోదీ ప్రత్యక్షంగా సమాధానం ఇచ్చారు. అదంపూర్ ఎయిర్ బేస్‌లోని రన్‌వేను తమ క్షిపణులతో దాడి చేశామని, అక్కడే ఉన్న రష్యా తయారు చేసిన ఎస్-400 మిసైల్ డిఫెన్స్ సిస్టంను ధ్వంసం చేశామని పాక్  సాగించిన అసత్య ప్రచారాన్ని మోదీ పర్యటన తుత్తునియలు చేసింది.   ఈ పరిణామాలను గమనిస్తే, కేంద్ర ప్రభుత్వం, బీజేపీ ఆపరేషన్ సిందూర్ ఫలాలు చేజారకుండా   కాపాడుకునేందుకు వ్యూహాత్మకంగా పావులు కదుపుతున్నాయని  అంటున్నారు. మరో వంక ప్రధాన ప్రతిపక్షం కాంగ్రెస్ పార్టీలో ఎలా స్పందించాలనే విషయంలో స్పష్టత లోపించడం కూడా బీజేపీకి రాజకీయంగా కలిసి వచ్చిందని అంటున్నారు. ముఖ్యంగా శశి థరూర్, చిదంబరం, మనీష్ తివారీ వంటి సీనియర్ నాయకులు  పార్టీ లైన్ కు విభిన్నంగా స్పందించిన తీరు హస్తం పార్టీని ఇరకాటంలో పడేస్తే, కమల దళానికి కలిసొచ్చిందని అంటున్నారు.
మూడ్ ఆఫ్ ది నేషన్ మారుతోందా? Publish Date: May 14, 2025 8:59AM
తిరుమలలో తగ్గిన భక్తుల రద్దీ

తిరుమలలో తగ్గిన భక్తుల రద్దీ

తిరుమలలో భక్తుల రద్దీ ఒకింత తక్కువగా ఉంది. బుధవారం (మే 14) ఉదయం శ్రీవారి దర్శనం కోసం వేచి ఉన్న భక్తులతో తొమ్మిది కంపార్ట్ మెంట్లు నిండి ఉన్నాయి. టోకెన్లు లేని భక్తులకు  శ్రీవారి సర్వదర్శనానికి మూడు గంటల సమయం పడుతోంది. ఇక మంగళవారం శ్రీవారిని మొత్తం74 వేల 477 మంది దర్శించుకున్నారు. వారిలో 28 వేల294 మంది తలనీలాలు సమర్పించుకున్నారు. శ్రీవారి హుండీ కానుకల ఆదాయం 2 కోట్ల 98 లక్షల రూపాయలు వచ్చింది. 
తిరుమలలో తగ్గిన భక్తుల రద్దీ Publish Date: May 14, 2025 8:40AM
ఏపీ లిక్కర్ స్కామ్‌లో కీలక పరిణామం..హైదరాబాద్‌లో సిట్‌ సోదాలు

ఏపీ లిక్కర్ స్కామ్‌లో కీలక పరిణామం..హైదరాబాద్‌లో సిట్‌ సోదాలు

  ఆంధ్రప్రదేశ్‌ మద్యం కుంభకోణం కీలక పరిణామం చేటుచేసుకుంది. సిట్ అధికారులు హైదరాబాద్‌లో సోదాలు నిర్వహించారు. మెహిదీపట్నం, రాజేంద్రనగర్, గుడిమల్కాపూర్, షేక్‌పేట, యాకుత్‌పూరా తదితర ప్రాంతాల్లోని ఐదు కంపెనీల డైరెక్టర్ల ఇళ్లలో సోదాలు నిర్వహించారు. ఈ కేసులో ప్రధాన నిందితుడిగా ఉన్న భారతీ సిమెంట్స్ డైరెక్టర్ బాలాజీ గోవిందప్పను  స్పెషల్ ఇన్వెస్టిగేషన్ టీమ్  మైసూరులో అదుపులోకి తీసుకుంది. అతన్ని విజయవాడకు తరలించారు. మరోవైపు, ఈ కేసులో మరో ఇద్దరు నిందితులైన మాజీ ఐఏఎస్ అధికారి కె.ధనుంజయ రెడ్డి, జగన్‌ మాజీ ఓఎస్‌డీ కృష్ణమోహన్ రెడ్డికి  సుప్రీంకోర్టు తాత్కాలిక ఊరటను అందించింది.  అదే సమయంలో హైదరాబాద్‌లో నిందితుల కార్యాలయాల్లో సిట్ సోదాలు నిర్వహిస్తోంది. వైసీపీ ప్రభుత్వ హయాంలో మద్యం సరఫరా ఆర్డర్లు పొందిన కంపెనీలు, డిస్టిలరీల నుంచి నెలవారీగా రూ.50-60 కోట్ల ముడుపులు వసూలు చేసినట్లు ఆరోపణలు ఉన్నాయి. ఈ ఆర్థిక లావాదేవీలను నిర్వహించడంలో బాలాజీ గోవిందప్ప కీలకంగా వ్యవహరించినట్లు సిట్ రిమాండ్ రిపోర్టులో పేర్కొంది. ఈ కేసులో ఇప్పటికే ప్రధాన నిందితుడు కెసిరెడ్డి రాజశేఖర్ రెడ్డి, అతని వ్యక్తిగత సహాయకుడు దిలీప్ కుమార్, మరో నిందితుడు సిట్ అధికారులను అరెస్ట్ చేసింది.
ఏపీ లిక్కర్ స్కామ్‌లో కీలక పరిణామం..హైదరాబాద్‌లో సిట్‌ సోదాలు Publish Date: May 13, 2025 9:39PM
ఆదాయం పెంచేందుకు మార్గాలను అన్వేషించండి..అధికారులకు సీఎం చంద్రబాబు ఆదేశం

ఆదాయం పెంచేందుకు మార్గాలను అన్వేషించండి..అధికారులకు సీఎం చంద్రబాబు ఆదేశం

  ఆంధ్రప్రదేశ్‌లో ఆదాయం పెంచేందుకు మార్గాలను అన్వేషించాలని అధికారాలను ముఖ్యమంత్రి చంద్రబాబు ఆదేశించారు. గడిచిన 30 ఏళ్ల ఆదాయ ఫలితాలను పరిశీలించి భవిష్యత్ ప్రణాళికలు సిద్ధం చేయాలని సీఎం చెప్పారు. రాష్ట్ర ప్రభుత్వ సొంత ఆదాయం పెంచుకునేందుకు ఎలక్ట్రానిక్స్, ఐటీ, సేవల రంగాలు ఎక్కువగా దోహదం చేస్తాయని ముఖ్యమంత్రి అన్నారు. ఇవాళ సచివాలయంలో ఆదాయార్జన శాఖలపై సీఎం చంద్రబాబు సమీక్ష నిర్వహించారు. సమీక్షలో శాఖలవారి పురోగతిపై చర్చించారు. మరోవైపు గోల్డ్ అత్యధికంగా కొనుగోలు చేస్తున్న రాష్ట్రాల్లో ఆంధ్రప్రదేశ్ దేశంలోనే ముందున్నప్పటికీ.. పన్ను ఆదాయం ఆ స్థాయిలో ఎందుకు లేదో అధికారులు దృష్టి పెట్టాలని.. పన్ను ఎగవేతలు లేకుండా చర్యలు తీసుకోవాలన్నారు. అన్ని శాఖల సమాచారంతో డేటా లేక్ ఏర్పాటు చేయాలని... ప్రతిశాఖకు ఏఐ బృందం ఉండాలని ముఖ్యమంత్రి చెప్పారు. పన్ను చెల్లింపుదారులకు ఏఐ టూల్ ద్వారా సేవలు అందించేలా వచ్చే రెండు, మూడు నెలల్లో ఏఐ ఆధారిత పన్నుల వ్యవస్థను ఏర్పాటు చేయాలని స్పష్టం చేశారు.  ప్రక్క రాష్ట్రాల నుంచి లిక్కర్ అక్రమంగా రాష్ట్రంలో విక్రయించకుండా కఠిన చర్యలు తీసుకోవాలని సీఎం అధికారులను ఆదేశించారు. రాష్ట్రంలో మద్యం విక్రయాలు పారదర్శకంగా జరిగేలా సరఫరా దగ్గర నుంచి అమ్మకం వరకు.. ప్రతీది రియల్ టైమ్‌లో ట్రాక్ చేయాలని చెప్పారు. కర్ణాటక, తమిళనాడు రాష్ట్రాల్లో రవాణా శాఖ ఆదాయం పెరుగుతుంటే.. ఆంధ్రప్రదేశ్‌లో ఎందుకు తక్కువుగా ఆదాయం వస్తోందని ముఖ్యమంత్రి అధికారులను ప్రశ్నించారు. దీనికి కారణాలు అన్వేషించి వెంటనే, సరైన విధానాలను అవలంభించి ఆదాయం పెరిగేలా చూడాలని చెప్పారు. నెలవారీ లక్ష్యాలను అధిగమించేలా ఆదాయార్జన శాఖలు ప్రయత్నించాలని అన్నారు. తెలంగాణలో హైదరబాద్ నుంచే 75% ఆదాయం వస్తోందని ముఖ్యమంత్రి తెలిపారు.  ఏపీకి అలాంటి అవకాశం లేనందున ఆదాయం పెంచేందుకు లోతైన అధ్యయం చేయాలని అధికారులను సీఎం సూచించారు.
ఆదాయం పెంచేందుకు మార్గాలను అన్వేషించండి..అధికారులకు సీఎం చంద్రబాబు ఆదేశం Publish Date: May 13, 2025 9:07PM
ఏపీకి వచ్చేందుకు 91 పెద్ద కంపెనీలు సిద్ధంగా ఉన్నాయి : మంత్రి నారా లోకేశ్

ఏపీకి వచ్చేందుకు 91 పెద్ద కంపెనీలు సిద్ధంగా ఉన్నాయి : మంత్రి నారా లోకేశ్

  ఆంధ్రప్రదేశ్‌లో పెట్టుబడులు పెట్టేందుకు  91 పెద్ద కంపెనీలు సిద్ధంగా ఉన్నాయని మంత్రి నారా లోకేశ్‌ తెలిపారు. .ఉండవల్లిలోని తన నివాసంలో ఐటీ, ఎలక్ట్రానిక్స్, ఆర్టీజీఎస్ శాఖల ఉన్నతాధికారులతో మంత్రి సమీక్షా సమావేశం నిర్వహించారు. నూతన పరిశ్రమల స్థాపనకు ముందుకొస్తున్న సంస్థలకు సత్వర అనుమతులు, పూర్తిస్థాయి సహకారం అందించాలని అధికారలను మంత్రి ఆదేశించారు. ఏపీలో రూ.91,839 కోట్ల పెట్టుబడితో, 1,41,407 ఉద్యోగాలను కల్పించేందుకు సుమారు 91 దిగ్గజ సంస్థలు సిద్ధంగా ఉన్నాయని వెల్లడించారు.  రాబోయే ఐదేళ్లలో ఐటీ, ఎలక్ట్రానిక్స్ రంగాల్లో 5 లక్షల ఉద్యోగాలు కల్పించడమే కూటమి ప్రభుత్వ లక్ష్యమని పేర్కొన్నారు. విశాఖపట్నం నగరాన్ని అత్యాధునిక ఐటీ హబ్‌గా తీర్చిదిద్దేందుకు సమగ్ర ప్రణాళికలు సిద్ధం చేయాలని, ఐటీ కంపెనీలకు చెల్లించాల్సిన ప్రోత్సాహకాల బకాయిలను తక్షణమే విడుదల చేయాలని, రతన్ టాటా ఇన్నోవేషన్ హబ్ పనులను వేగవంతం చేయాలని అధికారులను ఆయన ఆదేశించారు.పెద్ద కంపెనీలకు అవసరమైన అనుమతులను త్వరితగతిన మంజూరు చేసేందుకు ప్రతి కంపెనీకి ఒక నోడల్‌ ఆఫీసర్‌ను నియమించాలని అధికారులను ఆదేశించారు.  
ఏపీకి వచ్చేందుకు 91 పెద్ద కంపెనీలు సిద్ధంగా ఉన్నాయి : మంత్రి నారా లోకేశ్ Publish Date: May 13, 2025 7:10PM
తిరుమల శ్రీవారి భక్తులకు శుభవార్త...వీఐపీ బ్రేక్ దర్శనంపై టీటీడీ కీలక నిర్ణయం

తిరుమల శ్రీవారి భక్తులకు శుభవార్త...వీఐపీ బ్రేక్ దర్శనంపై టీటీడీ కీలక నిర్ణయం

  తిరుమల శ్రీవారి భక్తులకు టీటీడీ శుభవార్త చెప్పింది. తిరుమలలో భక్తుల రద్దీ తగ్గిన నేపథ్యంలో తెలుగు రాష్ట్రాల ప్రజాప్రతినిధుల సిఫారసు లేఖలపై బ్రేక్ దర్శనాలు ఉంటాయని ఏపీ దేవాదయశాఖ మంత్రి ఆనం రామనారయణ రెడ్డి తెలిపారు. ఈ క్రమంలో శ్రీవారి బ్రేక్ దర్శనాల కోసం భక్తులు ఇచ్చే సిఫార్సు లేఖలను తిరిగి స్వీకరించేందుకు తిరుమల దేవస్థానం సిద్ధమైంది. ఈ క్రమంలో మే 15 నుంచి సిఫార్సు లేఖలపై బ్రేక్ దర్శనాలు కేటాయింపు ప్రారంభం కానునట్లు  మంత్రి ఆనం పేర్కొన్నారు.  ఏపీ, తెలంగాణ ప్రజాప్రతినిధుల సిఫార్సు లేఖల పై బ్రేక్ దర్శనాలు కేటాయిస్తారని పేర్కొన్నారు. ఈ మేరకు ఇవాళ టీటీడీ అధికారికంగా ప్రకటన విడుదల చేశారు. శ్రీవారి దర్మనం కోసం నిత్యం వేలాది మంది భక్తులు దర్శించుకుంటారు. ఈ క్రమంలో ప్రపంచ నలుమూలల నుంచి భక్తులు తిరుమల కొండకు చేరుకుని శ్రీవారికి మొక్కులు చెల్లించుకుంటారు. ఈ తరుణంలో టీటీడీలో కొన్ని సార్లు భక్తుల రద్దీ అధికంగా, మరికొన్ని సార్లు స్వల్పంగా ఉంటుంది. వేసవి సెలవుల నేపథ్యంలో భక్తుల రద్దీని దృష్టిలో ఉంచుకుని సిఫార్సు లేఖలపై వీఐపీ బ్రేక్ దర్శనాలను టీటీడీ రద్దు చేసిన విషయం తెలిసిందే.   
తిరుమల శ్రీవారి భక్తులకు శుభవార్త...వీఐపీ బ్రేక్ దర్శనంపై టీటీడీ కీలక నిర్ణయం Publish Date: May 13, 2025 6:35PM
బీఆర్‌ఎస్ పార్టీలో విభేదాలపై హరీష్ రావు క్లారిటీ.. కేటీఆర్‌‌ బాధ్యతలుపై కీలక వ్యాఖ్యలు

బీఆర్‌ఎస్ పార్టీలో విభేదాలపై హరీష్ రావు క్లారిటీ.. కేటీఆర్‌‌ బాధ్యతలుపై కీలక వ్యాఖ్యలు

  బీఆర్‌ఎస్ పార్టీలో వర్గ విభేదాలపై మాజీ మంత్రి హరీష్ రావు కీలక వ్యాఖ్యలు చేశారు బీఆర్ఎస్ పార్టీలో ఎలాంటి వర్గ విభేదాలు లేవని హరీష్ రావు క్లారిటీ ఇచ్చారు. అధినేత కేసీఆర్, బీఆర్‌ఎస్ వర్కింగ్ ప్రెసిడెంట్ కేటీఆర్‌కు పార్టీ బాధ్యతలు అప్పగిస్తే తప్పకుండా స్వాగతిస్తాని ఆయన పేర్కొన్నారు. గులాబీ బాస్  తీసుకునే ప్రతీ నిర్ణయాన్ని తాను గౌరవిస్తాను, ఆయన ఆదేశాలను పాటిస్తానని అన్నారు. రాముడికి హనుమంతుడిలాగా కేసీఆర్‌కు క్రమశిక్షణ కలిగిన కార్యకర్తను నేను.. కేసీఆర్ మాటే.. హరీష్ బాట అని పార్టీలో విభేదాలను పుల్ స్టాప్ పెట్టారు. కాంగ్రెస్ ప్రభుత్వం ఇచ్చిన హామీలు అమలు చేయలేక  చేతులు ఎత్తేసిందని అన్నారు. సీఎం రేవంత్ చేతిలో మోసపోయామని గ్రహించిన ప్రజలంతా.. కేసీఆర్ కోసం ఎదురుచూస్తున్నారని అన్నారు.  రాష్ట్రంలో ఎప్పుడు ఎన్నికలు వస్తే అప్పుడు బీఆర్ఎస్ ప్రభుత్వం రావడం ఖాయమని ధీమా వ్యక్తం చేశారు. రైతులు, మహిళలు, విద్యార్థులు, నిరుద్యోగులు అనే తేడా లేకుండా అన్ని వర్గాల ప్రజలను ప్రస్తుత ప్రభుత్వం ఇబ్బందులకు గురిచేస్తోందని మండిపడ్డారు. రాష్ట్రంలో సీఎం రేవంత్ పరిస్థితి పాకిస్థాన్‌ కంటే దారుణంగా ఉందని ఆయన అన్నారు. పాక్‌ను నమ్మి అప్పు ఇస్తున్నారు. కానీ రేవంత్‌ను నమ్మి అప్పు ఇవ్వడం లేదని హారీశ్‌రావు అన్నారు. ముఖ్యమంత్రికి రాష్ట్రాన్ని పాలించడం చేతకావడం లేదని విమర్శించారు
బీఆర్‌ఎస్ పార్టీలో విభేదాలపై హరీష్ రావు క్లారిటీ.. కేటీఆర్‌‌ బాధ్యతలుపై కీలక వ్యాఖ్యలు Publish Date: May 13, 2025 6:24PM
భారత మహిళల సిందూరం తుడిచిన ఉగ్రవాదులను అంతం చేశాం : ప్రధాని మోదీ

భారత మహిళల సిందూరం తుడిచిన ఉగ్రవాదులను అంతం చేశాం : ప్రధాని మోదీ

  పాకిస్థాన్ అణ్వాయుధాలను చూపించి భయపెట్టాలనుకుందని అవేమీ భారత్ ముందు చెల్లవని ప్రధాని మోదీ తెలిపారు. పంజాబ్‌లోని అదంపూర్ ఎయిర్‌బేస్‌‌లో  ప్ర‌ధాని పర్యటించారు. ఉగ్రవాదం అంతం చేస్తామని భారత ఆర్మీ చేస్తామని శపథం చేసిందని మన సైనికులు యుద్దక్షేత్రంలోనూ భారత్ మాతకీ జై నినాదాలు చేశారు. భారత సైనికుల శక్తిసామార్థ్యాలు చూసి నా జన్మ ధన్యమైందని ప్రధాని తెలిపారు. మన అక్కాచెల్లెళ్లు, కూతుళ్ల సిందూరం తుడిచిన ఉగ్రవాదుల నట్టింట్లోకి వెళ్లి చంపేశారని మోదీ పేర్కొన్నారు. ఫైటర్ జెట్ పైలట్స్ ను మోదీ కలిసారు.  ఆపరేషన్ సిందూర్ లో పాల్గొన్న జవాన్లతో ప్రధాని ముచ్చటించారు. ఈ సందర్బంగా మోడీ మాట్లాడారు. పాక్ న్యూక్లియర్ బాంబులతో భయపెట్టినా వెనక్కి తగ్గేది లేదని ఆయన స్పష్టం చేశారు. యుద్ధంలో పోరాడిన సైనికులైన మీ దర్శనం కోసమే వచ్చాను… మీ ధైర్య సాహసాలను చూస్తే గర్వంగా ఉందని తెలిపారు. పాక్ డ్రోన్లు మన గగనతలాన్ని దాటలేకపోయాయని పేర్కొన్నారు. పాకిస్థాన్‌, ఇండియా మ‌ధ్య కాల్పుల విర‌మ‌ణ ఒప్పందం కుదిరిన నేప‌థ్యంలో.. ఇవాళ మోదీ ఆ ఎయిర్‌బేస్‌కు వెళ్లి ఐఏఎఫ్ సిబ్బందిని ప‌లుక‌రించారు. అదంపూర్ ఎయిర్ ఫోర్స్ స్టేష‌న్‌పై పాకిస్థాన్ అటాక్ చేయాల‌ని ప్ర‌య‌త్నించింది. మే 9 రాత్రి, 10వ తేదీల్లో శ‌త్రు దేశం ఆ ప్ర‌య‌త్నం చేసింది. మోదీ త‌న ఆకస్మిక ప‌ర్య‌ట‌న‌తో సైనికుల్లో మ‌నోధైర్యాన్ని నింపారు. వైమానిక సిబ్బందితో పాటు జ‌వాన్ల‌ను కూడా ఆయ‌న క‌లుసుకున్నారు.
భారత మహిళల సిందూరం తుడిచిన ఉగ్రవాదులను అంతం చేశాం : ప్రధాని మోదీ Publish Date: May 13, 2025 4:45PM
అమెజాన్ ప్రైమ్ యూజర్లకు షాకింగ్ న్యూస్..ఎందుకంటే?

అమెజాన్ ప్రైమ్ యూజర్లకు షాకింగ్ న్యూస్..ఎందుకంటే?

  ప్రముఖ  ఓటీటీ ప్లాట్‌ఫామ్‌ అమెజాన్ ప్రైమ్ తన వినియోగదారులకు షాకింగ్ న్యూస్ చెప్పింది. జూన్ 17నుంచి అమెజాన్‌ ప్రైమ్‌లో ప్రసార‌మ‌య్యే సినిమాలు, టీవీ షోల మధ్యలో యాడ్స్‌ను ప్రసారం చేయనున్నట్లు అమెజాన్ వెల్ల‌డించింది. ఒకవేళ ఎలాంటి యాడ్స్ వద్దు అనుకుంటే వారు అదనంగా ఏడాదికి రూ. 699 లేదా నెలకు రూ.129 చెల్లించాలని పేర్కొంది.  కాగా  ప్రైమ్ మెంబర్షిప్ కోసం ఇప్పటికే ఏడాదికి రూ.1499 చెల్లిస్తున్నారు. ప్రకటనల ద్వారా వచ్చే ఆదాయంతో కంటెంట్‌పై మరింత పెట్టుబడి పెట్టాలనే ఉద్దేశంతో ఈ నిర్ణయం తీసుకున్నట్లు కంపెనీ వెల్లడించింది. ఈ మేర‌కు అమెజాన్ త‌న వినియోగదారులకు ఈ-మెయిల్ ద్వారా సమాచారం ఇవ్వడం ప్రారంభించింది. "ఇది మేము ఆకర్షణీయమైన కంటెంట్‌లో పెట్టుబడి పెట్టడం కొనసాగించడానికి, ఆ పెట్టుబడిని ఎక్కువ కాలం పాటు పెంచుకోవడానికి అనుమతిస్తుంది. టీవీ ఛానెళ్లు, ఇతర స్ట్రీమింగ్ సేవల కంటే అర్థవంతంగా తక్కువ ప్రకటనలను కలిగి ఉండాలని మేము లక్ష్యంగా పెట్టుకున్నాం" అని సందేశాలు పంపుతోంది. 
అమెజాన్ ప్రైమ్ యూజర్లకు షాకింగ్ న్యూస్..ఎందుకంటే? Publish Date: May 13, 2025 3:50PM
అగ్ర రాజ్యంకు షాక్.. అమెరికా వస్తువులపై భారత్ సుంకాలు

అగ్ర రాజ్యంకు షాక్.. అమెరికా వస్తువులపై భారత్ సుంకాలు

  భారత వస్తువులపై అమెరికా విధించిన సుంకాలకు ప్రతీకారంగా అమెరికా వస్తువులపై భారత్ కస్టమ్స్ పన్ను  విధించాలని నిర్ణయించింది.  విషయాన్ని ప్రపంచ వాణిజ్య సంస్థకు తెలియజేసింది. యూఎస్ దిగుమతులపై ఇచ్చిన రాయితీలను వెనక్కి తీసుకోవడమే కాకుండా కొన్ని వస్తువులపై టారిఫ్‌లు పెంచున్నట్లు  డబ్ల్యూటీఓకి భారత్ తెలియజేసింది. భారత  వస్తువులు స్టీల్‌, అల్యూమినియంపై అమెరికా విధించిన సుంకాలకు ప్రతిగా భారత్‌ ఈ నిర్ణయం తీసుకొన్నట్లు తెలుస్తోంది. కొన్ని ప్రత్యేకమైన యూఎస్ వస్తువులకు ఇస్తున్న రాయితీలను నిలిపివేసి, దిగుమతి సుంకాలను పెంచనున్నట్లు వెల్లడించింది. అమెరికా ఇటీవల విధించిన టారిఫ్‌ల కారణంగా 7.6 బిలియన్‌ డాలర్ల విలువైన భారత ఎగుమతులపై ప్రతికూల ప్రభావం పడనుంది. అందుకే అగ్రరాజ్యం రక్షణాత్మక వైఖరిని అవలంభిస్తోందని భారత్‌ తప్పుపట్టింది. అమెరికాలో డోనాల్డ్ ట్రంప్‌ రెండోసారి అధికారంలోకి వచ్చాక ప్రపంచవ్యాప్తంగా పలు దేశాలపై భారీఎత్తున టారిఫ్‌లు విధించారు. క్రూడ్‌ స్టీల్‌ తయారీలో ప్రపంచంలోనే భారత్‌ రెండో స్థానంలో ఉంది.  ఇప్పుడు దీనిపై ట్రంప్‌ టారిఫ్‌ల ప్రభావం పడనుంది. ఇప్పుడు అమెరికా వస్తువులపై ప్రతీకార టారిఫ్‌లు విధిస్తామని ప్రపంచ వాణిజ్య సంస్థకు భారత్‌ తెలియజేయడం ఇరుదేశాల మధ్య వాణిజ్య ఘర్షణ పెరుగుతోందనడానికి సంకేతంగా చెప్పవచ్చు. సరికొత్త వాణిజ్య ఒప్పందానికి న్యూఢిల్లీ-వాషింగ్టన్‌ అత్యంత సమీపానికి వచ్చినట్లు వార్తలొస్తున్న వేళ ఈ పరిణామాలు చోటుచేసుకోవడం గమనార్హం. అమెరికాకు వాణిజ్యలోటును తగ్గించడం కోసం ఈ డీల్‌ ద్వారా భారత్‌ చాలా రాయితీలను ఆఫర్‌ చేసినట్లు సమాచారం. ప్రపంచవ్యాప్తంగా అన్ని దేశాలపై డొనాల్డ్ ట్రంప్.. టారిఫ్ వార్ ప్రకటించిన సంగతి తెలిసిందే. వివిధ దేశాల నుంచి అమెరికాలోకి దిగుమతి అయ్యే వస్తువులపై భారీగా ప్రతీకార సుంకాలను ట్రంప్ విధించారు. ఇక అమెరికా-చైనా మధ్య జరిగిన సుంకాలు, ప్రతీకార సుంకాలు తారస్థాయికి చేరుకోవడం ప్రపంచ దేశాలను తీవ్ర ఆందోళనకు గురి చేసింది.   
అగ్ర రాజ్యంకు షాక్.. అమెరికా వస్తువులపై భారత్ సుంకాలు Publish Date: May 13, 2025 3:17PM
నైరుతి వచ్చేసింది.. ఇక వానలే వానలు.. చల్లటి కబురు చెప్పిన వాతావరణ శాఖ

నైరుతి వచ్చేసింది.. ఇక వానలే వానలు.. చల్లటి కబురు చెప్పిన వాతావరణ శాఖ

మండే ఎండల్లో చల్లటి కబురు వినిపించింది వాతావరణ శాఖ. వేసవి తాపం నుంచి త్వరలోనే జనాలకు ఉపశమనం కలగబోతోందని చెప్పింది.    దేశ వ్యవసాయానికి, ఆర్థిక వ్యవస్థకు జీవనాడి వంటి  నైరుతి రుతుపవనాలు ఈ ఏడాది చాలా చురకుగా కదులుతున్నాయన్న తొలకరి లాంటి కబురు చెప్పింది రైతులలో ఆశల మెలకలెత్తించింది. ఐఎండీ. అంచనాలకు మించి నైరుతి రుతుపవనాల కదలిక వేగం ఉందని పేర్కొంది.  నైరుతి రుతుపవనాలు మంగళవారం (మే 13) అండమాన్, నికోబార్ ఐలెండ్స్ ను తాకాయన్న చిరుజల్లు లాంటి కబురు చెప్పింది. నైరుతి రుతుపవనాల ప్రభావంతో నికోబార్ దీవులలో విస్తారంగా వర్షాలు కురుస్తున్నాయి. వచ్చే మూడు నాలుగు రోజులలో అవి మరింత విస్తరించి అండమాన్ నికోబార్ అంతటా వ్యాపిస్తాయనీ, అలాగే మధ్య బంగాళాఖాతంలోని కొన్ని ప్రాంతాలకు చేరుకుంటాయనీ పేర్కొంది. రుతుపవనాల కదలికకు వాతావరణం అనుకూలంగా ఉందనీ, ఇదే వేగంతో రుతుపవనాల విస్తరణ ఉంటే.. ముందుగా అంచనా వేసినట్లు మే 27 వరకూ అగాల్సిన అవసరం లేకుండా అంత కంటే రెండు మూడు రోజుల ముందుగానే  కేరళ తీరాన్ని తాకే అవకాశం ఉందని పేర్కొంది. ఇక ఈ ఏడాది వర్షపాతం సాధారణం కంటే ఎక్కువగానే నమోదౌతుందని వాతావరణ శాఖ అంచనా వేసింది.  
నైరుతి వచ్చేసింది.. ఇక వానలే వానలు.. చల్లటి కబురు చెప్పిన వాతావరణ శాఖ Publish Date: May 13, 2025 3:11PM
ఆప‌రేష‌న్ సిందూర్.. మ‌న ఆయుధ మార్కెట్ అ‘ధర’ హో!

ఆప‌రేష‌న్ సిందూర్.. మ‌న ఆయుధ మార్కెట్ అ‘ధర’ హో!

భార‌త్ ఆయుధాలు పరీక్షకు నిలబడ్డాయా?  భార‌త్ ఆయుధాలు కూడా   మార్కెట్లోకి ప్ర‌వేశించిన‌ట్టేగా? ఆప‌రేష‌న్ సిందూర్ ద్వారా  మ‌రో ఆయుధ లాభ‌మేంటి?  ఇన్నాళ్ల పాటు మ‌న ఆయుధాలు.. ఎక్క‌డో గోదాముల్లో మాత్ర‌మే ఉండేవి. అప్పుడ‌ప్పుడూ వాటి ప‌రీక్షల స‌మ‌యంలో  మాత్రం సినిమాలలో ఐటెం సాంగ్ లా మన ఆయుధాలు కూడా ఐటెం కింద వార్తల్లో నిలిచేవి. ఎంత పెద్ద బ్ర‌హ్మోస్ క్షిప‌ణి వార్త గురించైనా స‌రే స్పీడ్ న్యూస్ లో ఇలా వ‌చ్చి అలా వెళ్లిపోయేవి. ఇప్పుడ‌లా కాదు.. మ‌న బ్ర‌హ్మోస్ ఒక ఇంట‌ర్నేష‌న‌ల్ హెడ్ లైన్.  మ‌న ఆకాష్ ఒక పవర్ ఫుల్ క‌వ‌ర్ ప్యాకేజ్.  ఇక మ‌న స్కై  స్ట్రైక‌ర్, నాగాస్త్ర‌- 1 వంట‌టివి నాన్ స్టాప్ న్యూస్ క‌వ‌రేజ్.  వీటికి ర‌ష్య‌న్ మేడ్ ఎస్ ఫోర్ హండ్రెడ్స్ కి ఫుల్ ఫాలోయింగ్. రాఫెల్ కి కూడా కావాల్సినంత ఇమేజ్.. స‌రే ర‌ష్య‌న్ ఎస్ 400 హండ్రెడ్స్, ఫ్రెంచ్ రాఫెల్స్ అంటే అది మన స్వ‌దేశీ ప‌రిజ్ఞానం  కాదు. అదే బ్ర‌హ్మోస్ అలాక్కాదే. అది పాకిస్థాన్ గుండెల్లో మోగించిన అణుబాంబులు అంత మామూలు విష‌యం కాదు. భార‌త అమ్ముల పొదిలో దాగిన బ్ర‌హ్మాస్త్రం. స్వ‌యానా మ‌నం త‌యారు చేసిన అద్భుత‌మైన ఆయుధం. ఇదెంత వ‌ర‌కూ పేలిందో పేల్లేదో తెలియాలంటే ఈ విష‌యం గురించి మ‌నం భార‌తీయుల‌ను కాదు అడ‌గాల్సింది పాకిస్తానీ నేష‌న‌ల్ క‌మాండ్ మీటింగ్ కి హాజ‌రైన వారిని అడ‌గాలి. ఎందుకంటే వారేగా ఇది నూర్ ఖాన్ వైమానిక స్థావ‌రం ద‌గ్గ‌ర ప‌డ్డంతో ఒక్క‌సారిగా ఉలిక్కి ప‌డింది. ఎందుకంటే ఇక్క‌డికి ద‌గ్గ‌ర్లోనే  క‌ర్ణీ కొండ‌లుంటాయి. వాటి ప‌క్క‌నే 170 పాక్ మేడ్ అణ్వాయుధాల నిల్వ‌లుంటాయి. మ‌న బ్ర‌హ్మోస్ వారి అణు నిల్వ‌ల ప‌క్క‌న ప‌డ్డందుకే పాకిస్థాన్ అంత‌గా ఉలిక్కి ప‌డి వెంట‌నే యూఎస్ కి సంకేతాలిచ్చింద‌ని చెబుతారు. ఆ త‌ర్వాత అమెరికా  జాతీయ భ‌ద్ర‌తా స‌ల‌హా దారు మార్క్ ఆంటోనీ రూబెన్స్, ఇక మ‌న ఇంటి అల్లుడు జేడీ వాన్స్ రంగంలోకి దిగ‌డం ఆ న‌ల‌భై ఎనిమిది గంట‌ల పాటు భార‌త్ పాక్ మిల‌ట‌రీ ఇత‌ర విదేశాంగ అధికారుల‌తో మాట్లాడ్డం చ‌క‌చ‌క జ‌రిగాయ్. ఆల్ క్రెడిట్స్ గోస్ టూ బ్ర‌హ్మోస్. మ‌న బ్ర‌హ్సోస్ ఆపిన యుద్ధ‌మిది. అప్ప‌టి వ‌ర‌కూ ఇంట‌ర్నేష‌నల్ మీడియాను విశేషంగా ఆక‌ట్టుకుంటోంది చైనా మార్క్ పీఎల్ 15. ఇది శాటిలైట్ క‌మ్ ఏఐ ఆప‌రేటెడ్ సైలెన్స్ వెప‌న్ అనీ.. దీన్నుంచి మ‌న రాఫెల్స్ ఎంత మాత్రం త‌ప్పించుకోలేవ‌ని ఓ ఊద‌ర‌గొట్టేవారు. దీంతో చైనా పీఎల్ 15 కి విశేష మైన ఆధ‌ర‌ణ ల‌భిస్తోన్న వేళ‌.. మ‌న వాళ్లు తెలివిగా మే 10 వ తేదీన మ‌న బ్ర‌హ్మోస్ ని క‌ర్ణీ  కొండ‌లకు ద‌గ్గ‌ర‌గా  ప్ర‌యోగించ‌డంతో.. గేమ్ ఛేంజ‌ర్ గా నిలిచింది. అందుకే ఈ బ్ర‌హ్మోస్ కి ఆప‌రేష‌న్ సిందూర్ లో కాల్పుల విర‌మ‌ణ‌ను ఆపిన గొప్ప పేరొచ్చింది. బ్ర‌హ్మోస్ ఎంత హిట్ అంటే ఆర్మేనియా 6 వేల కోట్ల‌కు మ‌నకు ఆర్డ‌రిచ్చింది. ఇండోనేసియా వంటి దేశాలు సైతం ఇంట్ర‌స్ట్ చూపిస్తున్నాయ్. ఇక మ‌న ఆకాశ్ అయితే ఈ స‌రికే.. 23 వేల కోట్ల విలువైన ఆర్డ‌ర్ ప‌ట్టేసింది. ఇది గ‌తంతో పోలిస్లే 12 శాతంక‌న్నా   ఎక్కువ‌. దీని ఫ్యాన్ ఫాలోయింగ్ అంత మామూలుగా లేదు. పాక్ వాడిన ట‌ర్కిష్ డ్రోన్ దాడుల‌ను ఎదుర్కోవడంలో మ‌న ఆకాశ్ ప‌నితీరుకు విశేషమైన ప్ర‌శంస‌లు ల‌భించాయి. 1980లో భార‌త ప్ర‌భుత్వం ప్రారంభించిన ఇంటిగ్రేటెడ్ గైడెడ్ మిస్సైల్ డెవ‌లప్మెంట్ ప్రోగ్రాం ద్వారా రూపుదిద్దుకుంటూ వ‌చ్చినది ఆకాశ్. ఇది శ‌తృ విమానాలు, డ్రోన్లు, చాప‌ర్ల‌ను ఇట్టే ఢీ కొట్ట‌గ‌ల‌దు. దీన్ని మ‌న డీఆర్డీవో, బీఈఎల్, బీడీఎల్ సంయుక్త నిర్వ‌హ‌ణ‌లో త‌యారు చేశారు. వీటితో పాటు.. మ‌న యాంటీ డ్రోన్ ఫోర్ డీ సిస్ట‌మ్ కూడా సూప‌ర్ డూప‌ర్ హిట్ట‌య్యింది. ఆత్మ‌నిర్భ‌ర్ భార‌త్ కింద భార‌త్ త‌యారీ చేసిన స్వ‌దేశీ ప‌రిజ్ఞాన‌పు మ‌చ్చు తున‌క‌ల్లో ఇది కూడా ఒక‌టి.  పాక్ వాడిన ట‌ర్కిష్ డ్రోన్ల‌ను  గ‌ట్టిగా దెబ్బ తీసిన ఆయుధాల్లో ఇదే అత్యంత వేగంగా ఖ‌చ్చితంగా ప‌ని చేసింది. ఇది డీఆర్డీవో ద్వారా డెవ‌ల‌ప్ చేయ‌బ‌డి బీడీఎల్ త‌యారీ. దీని కెపాసిటీ మొత్తం ఈ ఆప‌రేష‌న్ సిందూర్ లో వెలుగులోకి వ‌చ్చింది. ఇక నాగాస్త్ర 1 సంగ‌తి స‌రే స‌రి. ఇది ఎలాంటిదంటే ఆత్మాహుతి డ్రోన్ సంత‌త‌కి చెందిన‌ది. టార్గెట్ దొరికే వ‌ర‌కూ ఆ ప్రాంతంలో అలాగే నిలిచి.. త‌ర్వాత.. దూసుకుపోగ‌ల‌దు. ఇది ఏక‌కాలంలో టార్గెట్ ఛేజింగ్ దాని ధ్వంసం రెండూ చేయ‌ల నాగాస్త్రం. ఇలా దీని ప్ర‌త్యేక‌త‌లు చాలానే. ఈ ఆప‌రేష‌న్  సిందూర్ లో ఇలాంటి ఆయుధాలు ఉంటాయ‌ని కూడా తెలియ‌ని వారికి వీటి విలువ ఏమిటో తెలియ వ‌చ్చింది. స్కై స్ట్రైక‌ర్స్. ఇది మ‌న బెంగ‌ళూరులో త‌యారైనది. ఇందులో ఇజ్రాయెల్ టెక్నాల‌జీ వాడాం.  ఇది భార‌త్ ఇజ్రాయెలీ జాయింట్ వెంచ‌ర్. అలాంటి ఇది కూడా ఆప‌రేష‌న్ సిందూర్ లో త‌న ప‌ని త‌నం చూపించి భార‌త్ ఆయుధ మార్కెట్ విలువ అమాతం పెంచేసింది. ఇప్పుడు ప‌లు దేశాలు భార‌త్ కి సంబంధించిన ఆయుధాల‌ను మేం కొంటామంటే మేం కొంటామంటూ ఎగ‌బ‌డుతున్నారు. కార‌ణం ఏంటంటే ఒక ర‌ష్యా, యూఎస్, ఫ్రెంచ్ వంటి దేశాల నుంచి ఆయుధాల కొనుగోలు అంటే అదేమంత మాములు విష‌యం కాదు. అదే భార‌త్ ఇటు సినిమాలు, అటు శాటిలైట్ల‌తో పాటు.. ఆయుధాల త‌యారీలోనూ స్వ‌దేశీ ప‌రిజ్ఞానం వాడి.. అత్యంత త‌క్కువ ధ‌ర‌ల‌కే అమ్మే కెపాసిటీ  సొంతం చేసుకుంది.. దీంతో మ‌న ఆయుధ మార్కెట్ అ..ధ‌ర‌హో! అంటోంది..
ఆప‌రేష‌న్ సిందూర్.. మ‌న ఆయుధ మార్కెట్ అ‘ధర’ హో! Publish Date: May 13, 2025 2:52PM
చార్మినార్ వద్ద మిస్ వ‌ర‌ల్డ్ కంటెస్టెంట్‌లు హెరిటేజ్ వాక్.. పోలీసుల‌ భారీ బందోబ‌స్తు

చార్మినార్ వద్ద మిస్ వ‌ర‌ల్డ్ కంటెస్టెంట్‌లు హెరిటేజ్ వాక్.. పోలీసుల‌ భారీ బందోబ‌స్తు

  నిత్యం ర‌ద్దీగా ఉండే హైదరాబాద్, చార్మినార్ ప్రాంతం ఇవాళ నిర్మానుష్యంగా కనిపించింది. మ‌ధ్యాహ్నం నుంచి రాత్రి వ‌ర‌కు పాత‌బ‌స్తీలో మిస్ వ‌ర‌ల్డ్ కంటెస్టెంట్‌లు ప‌ర్య‌టించ‌నున్నారు. ఈ నేపధ్యంలో ఇవాళ మధ్యాహ్నం 2 గంటల నుంచి రాత్రి 11 గంటల వరకు హైదరాబాద్‌లో ట్రాఫిక్ ఆంక్షలు కొనసాగుతాయి. మదీనా, చార్మినార్, శాలిబండ, వొల్గా జంక్షన్, ఖిల్వత్ రహదారులు పూర్తిగా క్లోజ్ కానున్నాయి. ప్రయాణికులు ప్రత్యామ్నాయ మార్గాలను చూసుకోవాలని ట్రాఫిక్ పోలీసులు సూచనలు చేశారు. చార్మినార్ వద్ద మూడు కిలోమీటర్ల లోపు ఎలాంటి డ్రోన్లు ఎగరవేయొద్దని ఆంక్షలు విధించారు.  చార్మినార్ వద్ద భారీ భద్రత ఏర్పాటు పోలీసులు చేశారు. హెరిటేజ్ వాక్ కోసం పోలీసులు భారీ బందోబ‌స్తు ఏర్పాటు చేశారు. ఈ ఒక్క‌రోజు చిరు వ్యాపారుల‌ దుకాణాలు కూడా మూసివేయించారు. చార్మినార్ వ‌ద్ద సుంద‌రీమ‌ణులకు గ్రాండ్ వెల్‌క‌మ్ కార్య‌క్ర‌మంలో భాగంగా అక్క‌డి ప‌రిస‌రాల‌ను పూల‌తో అందంగా అలంక‌రించారు. చార్మినార్ వద్ద భద్రతను స్వయంగా పోలీస్ కమిషనర్ సీవీ. ఆనంద్ పరిశీలించారు. ఇవాళ చార్మినార్ వద్ద పోటీదారుల హెరిటేజ్ వాక్, చౌమొహల్లా ప్యాలెస్‌లో ఏర్పాటు చేసిన విందులో పాల్గోన్నారు.ప్రపంచ సుందరీమణులు లాడ్ బజార్‌లో ఎంపిక చేసిన దుకాణాల్లో గాజులు, అలంకరణ వస్తువుల కొనుగోలుకు ఏర్పాట్లు చేశారు. ఈ మేరకు  తెలంగాణ పర్యాటక శాఖ అన్ని ఏర్పాట్లతో చార్మినార్ పరిసర ప్రాంతాలు ముస్తాబు చేసింది.      
చార్మినార్ వద్ద మిస్ వ‌ర‌ల్డ్ కంటెస్టెంట్‌లు హెరిటేజ్ వాక్.. పోలీసుల‌ భారీ బందోబ‌స్తు Publish Date: May 13, 2025 2:47PM
ఉద్రిక్తతల వేళ భాగ్యనగరం బ్రాండ్ ఇమేజ్ పెంచుతున్న అందాల పోటీలు

ఉద్రిక్తతల వేళ భాగ్యనగరం బ్రాండ్ ఇమేజ్ పెంచుతున్న అందాల పోటీలు

ఆపరేషన్ సిందూర్ మొదలైన తర్వాత భారత సరిహద్దుల్లో ఉద్రిక్తతలు నెలకొన్నాయి. దాయాది దేశం పాకిస్తాన్‌తో టెన్షన్ వాతావరణం కొనసాగుతున్న టైమ్‌లో హైదరాబాద్‌లో మిస్ వరల్డ్ పోటీల నిర్వహణపై తీవ్ర చర్చ జరుగుతోంది. ఇలాంటి సమయంలో అందాల పోటీలేంటనే విమర్శలు వెల్లువెత్తాయి.  కానీ.. ఇప్పుడున్న పరిస్థితుల్లోనే.. మిస్ వరల్డ్ పోటీలు నిర్వహించడం వల్ల మన దేశంపై ఉన్న అభిప్రాయమే మారిపోతుందనే విశ్లేషణలు కూడా వినిపిస్తున్నాయి.  ముఖ్యంగా.. తెలంగాణ బ్రాండ్ ఇమేజ్ డబుల్ అవుతుందనే వాదన కూడా  బలంగా వినిపిస్తోంది. దేశంలో ఇప్పుడున్న పరిస్థితుల్లో.. అందాల పోటీలు అవసరమా? అనే చర్చ కొన్నాళ్లుగా సాగుతోంది. వాయిదా వేయాలనే డిమాండ్లు కూడా వినిపించాయి. మిస్ వరల్డ్ పోటీలను పోస్ట్ పోన్ చేయడం పెద్ద పనేం కాదు. దానికి పెద్దగా టైమ్ ఏమీ పట్టదు.  మరెందుకు తెలంగాణ ప్రభుత్వం ఈ సమయంలోనూ అందాల పోటీలను ఇంత ప్రతిష్ఠాత్మకంగా తీసుకుంది? ముందుగా అనుకున్న షెడ్యూల్ డిస్టర్బ్ అవకుండా.. ఎందుకు నిర్వహించాలనుకుంటోంది? అనే కోణంలోనూ చర్చలు మొదలయ్యాయి. పాకిస్తాన్‌తో ఉద్రిక్తతలు నెలకొన్న సమయంలో..  దేశం మొత్తం ఓ ఉద్విగ్న వాతావరణం కొనసాగుతున్న వేళ,  హైదరాబాద్‌లో అందాల పోటీలు జరుగుతున్నాయి. అది కూడా ఎలాంటి ఆటంకాలు లేకుండా. ఇంతటి ఉద్రిక్త పరిస్థితుల మధ్య కూడా, మిస్ వరల్డ్ లాంటి ఓ మెగా ఈవెంట్ జరుగుతోందంటే,  ఇండియా ప్రశాంతంగానే ఉంది, అంతకుమించి సేఫ్‌గానే ఉందనే మెసేజ్ చాలా బలంగా వెళుతుంది. భారత్‌లో అంతా సేఫ్ అన్న సందేశంమిగతా ప్రపంచ దేశాలకు తెలుస్తుంది. అందుకే మిస్ వరల్డ్ పోటీలను తెలంగాణ ప్రభుత్వం కొనసాగిస్తోందంట. సరిహద్దుల్లో పాక్ ఎన్ని రెచ్చగొట్టే చర్యలకు పాల్పడినా, ఎన్ని రకాలుగా కవ్వింపు చర్యలకు దిగినా, కాల్పుల విరమణకు ఒప్పుకొని,మళ్లీ దానిని ఉల్లంఘించినా, ఈ టెన్షన్స్ అన్నీ బోర్డర్ వరకే పరిమితమయ్యాయన్న విషయం మిస్ వరల్డ్ పోటీలతో మిగతా వరల్డ్‌కు అర్థమవుతుంది. భారత్-పాక్ మధ్య నెలకొన్న టెన్షన్స్ కశ్మీర్ బోర్డర్ వరకే ఉన్నాయి, మిగతా దేశమంతా ప్రశాంతంగానే ఉందనే సందేశం భారత్‌కు ఎంతో ప్లస్ అవుతుందనే చర్చ బలంగా వినిపిస్తోంది. ఇంతటి ఉద్రిక్త పరిస్థితుల మధ్య కూడా, మిస్ వరల్డ్ పోటీలను సక్సెస్‌ఫుల్‌గా నిర్వహిస్తే.. తెలంగాణతో పాటు దేశం బ్రాండ్ ఇమేజ్ కూడా పెరుగుతుంది. ఇండియా ఎంత సేఫ్‌గా ఉందనే విషయం.. గ్లోబల్ వైడ్‌గా అందరికీ బాగా అర్థమవుతుంది. ఏ అంతర్జాతీయ మీడియాలో భారత్-పాక్ సరిహద్దు ఉద్రిక్తతలకు సంబంధించిన వార్తలు ప్రసారమవుతున్నాయో.. అదే ఇంటర్నేషనల్ మీడియాలో ఈ మిస్ వరల్డ్ పోటీల కవరేజ్ కూడా వస్తున్నది. దాంతో  ఇండియా అంతా కూల్‌గానే ఉందనే మెసేజ్ చాలా బలంగా వెళుతుంది.  తెలంగాణ ప్రభుత్వం అత్యంత ప్రతిష్ఠాత్మకంగా భావిస్తున్న ఈ మిస్ వరల్డ్ పోటీల ఈవెంట్‌కి.. ఎలాంటి ఆటంకం లేకుండా నిర్వహించేందుకు కట్టుదిట్టమైన భద్రతా ఏర్పాట్లు చేశారు. చీమ చిటుక్కుమన్నా తెలిసేలా.. పోలీసులు నిఘా వ్యవస్థను ఏర్పాటు చేశారు. భద్రత విషయంలో ఏమాత్రం రాజీపడకుండా వ్యవహరిస్తున్నారు. హైదరాబాద్‌లోని 10 ప్రాంతాల్లో డ్రోన్‌లపై నిషేధం విధించింది.  పోటీల్లో పాల్గొనేందుకు ప్రపంచ దేశాల నుంచి వచ్చిన అందాల భామలు ఉండే హోటళ్ల దగ్గర.. నాలుగు అంచెల భద్రత ఏర్పాటు చేశారు. 5 వేల మందికి పైగా పోలీసులను.. భద్రత కోసం రంగంలోకి దించారు. గచ్చిబౌలి స్టేడియంతో పాటు సుందరీమణులు బస చేసే హోటళ్ల దగ్గర షార్ప్ షూటర్లను, స్పైపర్లను మోహరించారు. సీసీ కెమెరాల ద్వారా ఎప్పటికప్పుడు పరిస్థితులను పర్యవేక్షిస్తున్నారు. గ్రేహౌండ్స్, ఆక్టోపస్, క్విక్ రియాక్షన్ టీమ్స్‌ని మోహరించారు. ఇంతటి భద్రత మధ్య మిస్ వరల్డ్ పోటీలను విజయవంతంగా నిర్వహించడం ద్వారా.. హైదరాబాద్‌లో.. ఇంటర్నేషనల్ ఈవెంట్స్‌ని ఎంతో సేఫ్‌గా నిర్వహించగలరనే సందేశం వెళుతుంది. గతేడాది తెలంగాణని లక్షన్నర మందికి పైగా.. అంతర్జాతీయ టూరిస్టులు సందర్శించారు. ఈ అందాల పోటీల ద్వారా ఆ సంఖ్య మరింత పెరిగే అవకాశం ఉందంటున్నారు. 
ఉద్రిక్తతల వేళ భాగ్యనగరం బ్రాండ్ ఇమేజ్ పెంచుతున్న అందాల పోటీలు Publish Date: May 13, 2025 2:34PM
మిథున్ రెడ్డి నాలుగు వారాల ఊరట.. కోర్టు నుంచి కాదు ఏపీ ప్రభుత్వం నుంచి!

మిథున్ రెడ్డి నాలుగు వారాల ఊరట.. కోర్టు నుంచి కాదు ఏపీ ప్రభుత్వం నుంచి!

ఏపీ లిక్కర్ కుంభకోణంలో వైసీపీ ఎంపీ మథున్ రెడ్డి నిండా ఇరుక్కున్నట్లు కనిపిస్తోంది. ఆయన ముందస్తు బెయిలు పిటిషన్ ను సుప్రీం కోర్టు ఏపీ హైకోర్టుకు రిఫర్ చేసింది. అయితే అరెస్టు నుంచి మాత్రం రక్షణ కల్పించలేదు. అయితే ఆంధ్రప్రదేశ్ ప్రభుత్వం మాత్రం హైకోర్టు మిథున్ రెడ్డి యాంటిసిపేటరీ బెయిలుపై నిర్ణయం తీసుకునే వరకూ అరెస్టు చేయబోమని కోర్టులకు తెలిపి మిథన్ రెడ్డికి ఊరట కలిగించింది. విషయం ఏమిటంటే..  మద్యం కుంభకోణం కేసులో గతంలో హైకోర్టు మిథున్ రెడ్డికి ముందస్తు బెయిలు నిరాకరించింది. దాంతో ఆయన సుప్రీం కోర్టును ఆశ్రయించారు. అయితే అప్పటికి మద్యం కుంభకోణం కేసులో మిథున్ రెడ్డిని నిందితుడిగా చేర్చకపోవడం.. ఆయనను అరెస్టు చేసే ఉద్దేశం లేదని ప్రభుత్వం కోర్టుకు చెప్పడంతో హైకోర్టు ఆయన ముందస్తు బెయిల్ పిటిషన్ ను కొట్టివేసింది. అయితే ఇప్పుడు మిథున్ రెడ్డిని నిందితుడిగా చేర్చారు. దీంతో మెరిట్స్ ఆధారంగా మరోసారి మిథున్ రెడ్డి యాంటిసిపేటరీ బెయిలుపై నిర్ణయం తీసుకోవాలంటూ సర్వోన్నత న్యాయస్థానం హైకోర్టుకు సూచించింది. అదే సమయంలో గతంలో మిథున్ రెడ్డికి అరెస్టు నుంచి ఇచ్చిన షీల్డ్ ను తొలగించింది. కానీ  బెయిల్ పై హైకోర్టు తీర్పు ఇచ్చేంతవరకూ మిధున్ రెడ్డిని అరెస్ట్ చేయబోమని సుప్రీంకోర్టుకు ఏపీ ప్రభుత్వం హామీ ఇచ్చింది. దీంతో సుప్రీం కోర్టు హైకోర్టుకు మిథున్ రెడ్డి బెయిల్ పిటిషన్ పై నాలుగు వారాలలోగా విచారణ చేపట్టాలని గడువు విధించింది. అంటే ఏపీ ప్రభుత్వం మిధున్ రెడ్డిని మరో నాలుగు వారాల వరకూ అరెస్టు చేయకుండా భారీ ఊరట కల్పించిందని చెప్పాలి. ఇక ఇప్పుడు మిథున్ రెడ్డి యాంటిసిపేటరీ బెయిలుపై ఏపీ హైకోర్టు నిర్ణయంపై సర్వత్రా ఉత్కంఠ నెలకొంది. ఆంధ్రప్రదేశ్ మద్యం కుంభకోణంలో మిథున్ రెడ్డి కీలక పాత్ర పోషించారనీ, మనీ ల్యాండరింగ్ కు పాల్పడ్డారనీ దర్యాప్తు సంస్థ చెబుతోంది. ఈ కేసులో దర్యాప్తు సంస్థ వరుసగా అరెస్టులు చేస్తుండటంతో మిథున్ రెడ్డి కూడా అరెస్టయ్యే అవకాశాలు ఉన్నాయన్న అభిప్రాయం వ్యక్తం అవుతోంది. ఇలా ఉండగా ఇదే కేసులో నిందితులుగా ఉన్న సీఎంవో మాజీ కార్యదర్శి ధనుంజయరెడ్డి, మాజీ సీఎం జగన్‌ ఓఎస్డీ కృష్ణమోహన్‌రెడ్డికి  సుప్రీంలో స్వల్ప ఊరట లభించింది. వారి ముందస్తు బెయిలు పిటిషన్ విచారణను శుక్రవారానికి వాయిదా వేసిన సర్వోన్నత న్యాయస్థానం శుక్రవారం వరకూ వారిరువురినీ అరెస్టు చేయవద్దంటూ ఆదేశాలు జారీ చేసింది.  
మిథున్ రెడ్డి నాలుగు వారాల ఊరట.. కోర్టు నుంచి కాదు ఏపీ ప్రభుత్వం నుంచి! Publish Date: May 13, 2025 2:22PM
ఏపీ మద్యం కుంభకోణం.. భారతీ సిమెంట్స్ డైరెక్టర్ అరెస్ట్

ఏపీ మద్యం కుంభకోణం.. భారతీ సిమెంట్స్ డైరెక్టర్ అరెస్ట్

అరెస్ట్.. రాజ్ కేసిరెడ్డి అప్రూవర్? వాట్ నెక్స్ట్!   ఆంధ్రప్రదేశ్ మద్యం కుంభకోణం కేసులో కీలక పరిణామం చోటు చేసుకుంది.   ఈ కేసులో నిందితుడిగా ఉన్న భారతీ సిమెంట్స్ డైరెక్టర్ బాలాజీ గోవిందప్పను సిట్‌ అధికారులు అరెస్ట్‌ చేశారు. పక్కా సమాచారంతో మైసూరులో ఆయన్ను అరెస్ట్‌ చేసి విజయవాడకు తరలించారు. గోవిందప్ప భారతీ సిమెంట్స్‌ పూర్తికాలపు డైరెక్టర్‌గా ఉన్నారు. భారతీ సిమెంట్స్‌లో వైఎస్ భారతి ఆర్థిక వ్యవహారాలన్ని ఆయనే చక్కబెడతారని అంటారు.  మద్యం కుంభకోణం కేసులో విచారణకు హాజరుకావాలంటూ గోవిందప్పతో పాటు సీఎంవో మాజీ కార్యదర్శి ధనుంజయరెడ్డి, మాజీ సీఎం జగన్‌ ఓఎస్డీ కృష్ణమోహన్‌రెడ్డికి   సిట్‌ అధికారులు నోటీసులు ఇచ్చారు. ఈ ముగ్గురినీ విజయవాడ కమిషనరేట్‌లోని సిట్‌ కార్యాలయంలో ఆదివారం ఉదయం 10 గంటలకు విచారణకు హాజరు కావాలని ఆదేశించారు. అయితే ఈ ముగ్గురూ కూడా నోటీసులను బేఖాతరు చేస్తూ విచారణకు గైర్హాజరయ్యారు. ఇప్పటికే వీరి ముందస్తు బెయిల్‌ పిటిషన్‌ను హైకోర్టు కొట్టేసింది. సుప్రీంకోర్టు సైతం వీరికి అరెస్టు నుంచి  మధ్యంతర రక్షణ ఇవ్వడానికి నిరాకరించింది. జగన్‌కు బాలాజీ గోవిందప్ప, ధనుంజయరెడ్డి, కృష్ణమోహన్‌రెడ్డి అత్యంత సన్నిహితులు. మద్యం సరఫరా కంపెనీలు, డిస్టిలరీల నుంచి ముడుపులు వసూలు చేయడం, ఆ సొమ్మును డొల్ల కంపెనీలకు మళ్లించడంలో కృష్ణమోహన్‌రెడ్డి,  గోవిందప్పలతో పాటు ధనుంజయరెడ్డి పాత్ర ఉంది. ముడుపులుగా ఎంత మొత్తం చెల్లించాలనేదానిపై ఈ ముగ్గురూ తరచూ హైదరాబాద్, తాడేపల్లిలో మద్యం సరఫరా కంపెనీలు, డిస్టిలరీల యజమానులతో సమావేశమయ్యేవారని సిట్‌ ఇప్పటికే తేల్చింది. మద్యం ముడుపుల సొమ్మును రాజ్‌ కేసిరెడ్డి వీరికి చేరవేస్తే.. వీరు దాన్ని జగన్‌కు అందజేసేవారని ఇప్పటివరకూ అరెస్టైన నిందితులకు సంబంధించిన రిమాండ్‌ రిపోర్టుల్లో సిట్ ప్రస్తావించింది. ఈ నేపథ్యంలో మైసూరులో బాలాజీ గోవిందప్పను సిట్‌ అరెస్ట్‌ చేసింది. ఆంధ్రప్రదేశ్ మద్యం కుంభకోణం కేసులో సిట్ ఇప్పటికే కీలక నిందితులు రాజ్ కేసిరెడ్డి, ఆయన సహాయకుడు దిలీప్ లను అరెస్టు చేసింది. ఇరువురిరీ కూడా కస్టడీలోకి తీసుకుని విచారించింది. ప్రస్తుతం ఇద్దరూ రిమాండ్ ఖైదీలుగా ఉన్నారు. ఇక ఇప్పుడు ఈ కేసులో అత్యంత కీలకమైన ముగ్గురి కోసం వేట మొదలెట్టింది. అందులో భాగంగా జగన్ సతీమణి భారతి ఆర్థిక వ్యవహారాలను చక్కబెట్టే భారతీ సిమెంట్స్ పూర్తి కాలపు డైరెక్టర్ గోవిందప్పను అరెస్టు చేసింది. గోవిందప్ప, కృష్ణమోహన్ రెడ్డి, ధనుంజయ్ రెడ్డిలు జగన్ కు అత్యంత సన్నిహితులు. ఈ ముగ్గురినీ అరెస్టు చేస్తే ఏపీ మద్యం కుంభకోణం గుట్టు విడిపోతుందని పరిశీలకులు విశ్లేషిస్తున్నారు. ఆ ముగ్గురిలో గోవిందప్ప అరెస్టయ్యారు. ఇక నేడో రేపో మిగిలిన ఇద్దరూ అంటే కృష్ణమోహన్ రెడ్డి, ధనుంజయ్ రెడ్డిల అరెస్టు కూడా ఖాయమని అంటున్నారు. ఇప్పటికే ఈ కేసులో అరెస్టై జైల్లో ఉన్న రాజ్ కేసిరెడ్డి అప్రూవర్ గా మారడానికి సిద్ధమైనట్లు వార్తలు వినవస్తున్నాయి. అదే జరిగితే మొత్తం జగన్ దోపిడీ వ్యవహారాలన్నీ వెలుగులోకి వస్తాయని అంటున్నారు. ఇక రాజ్ కేసిరెడ్డి అప్రూవర్ గా మారతారనడానికి ఆయన న్యాయవాది కోర్టులో చేసిన వాదనలే నిదర్శనమని పరిశీలకులు విశ్లేషిస్తున్నారు. ఏపీ మద్యం కుంభకోణం కేసులో పెద్దలంతా తప్పించుకుని తన క్లయింట్ రాజ్ కేసిరెడ్డిని బలిపశువుగా చేసేందుకు ప్రయత్నిస్తున్నారంటూ ఆయన ఈ ప్రయత్నాలను సహించబోమనీ, అన్నీ బయటపెడతామనీ సంకేతాలు ఇచ్చారని అంటున్నారు.  ఏపీ లిక్కర్ కుంభకోణంలో ఏ1గా ఉన్న రాజ్ కేసిరెడ్డి లాయర్ ఏకంగా కోర్టులోనే తన క్లయింట్ ను బలిపశువును చేశారంటే చేసిన ఆరోపణలు సంచలనం సృష్టించాయి. ఇవే ఆరోపణలు రాజ్ కేసిరెడ్డి అప్రూవర్ గా మారనున్నట్లు దర్యాప్తు అధికారులకు పంపిన సందేశంగా కూడా పరిశీలకులు అభివర్ణిస్తున్నారు.  
ఏపీ మద్యం కుంభకోణం.. భారతీ సిమెంట్స్ డైరెక్టర్ అరెస్ట్ Publish Date: May 13, 2025 1:15PM
ఉజ్వల ఇన్నింగ్స్‌కి తెర.. టెస్టులకు కోహ్లీ గుడ్‌బై

ఉజ్వల ఇన్నింగ్స్‌కి తెర.. టెస్టులకు కోహ్లీ గుడ్‌బై

స్టార్ బ్యాటర్, స్ఫూర్తిదాయక కెప్టెన్, ఉరిమే ఉత్సాహంతో మైదానమంతా చైతన్యాన్ని నింపే పోరాట యోధుడు విరాట్‌ కోహ్లిని ఇక మనం తెల్లజెర్సీలో చూడలేం. టీ 20 లీగ్‌లకు విపరీతంగా ఆదరణ పెరుగుతున్న కాలంలో అభిమానులను టెస్టు క్రికెట్‌ వైపు ఆకర్షించి, వారిని ఆటకు అతుక్కుపోయేలా చేసి.. ఉత్తేజపరిచి, ఉర్రూతలూగించిన కింగ్‌ సుదీర్ఘ ఫార్మాట్‌కు గుడ్‌బై చెప్పేశాడు. దాదాపు దశా బ్దంన్నర పాటు టీమిండియాకు వెన్నెముకలా నిలిచిన విరాటుడు.. దీర్ఘఫార్మాట్‌ నుంచి రిటైరవుతున్నట్లు ప్రకటించాడు. నిరుడు టీ 20ల నుంచి రిటైరైన కోహ్లి.. ఇక వన్డేల్లో మాత్రమే భారత్‌కు ప్రాతినిధ్యం వహిస్తాడు. సీని యర్లకు ‘చీకూ’గా, జూనియర్లకు భయ్యాగా, అభిమానులకు కింగ్‌గా భారత క్రికెట్లో అంతర్భాగమైన కోహ్లిని ఇక టెస్టుల్లో చూడలేకపోవడం పెద్ద వెలితే. అది పూడ్చలేనిది. అతడు బ్యాటుతో పరుగుల వరద పారించడమే కాదు.. సారథిగా భారత జట్టు టెస్టులు ఆడే తీరునే మార్చేశాడు.  విదేశాల్లో తడబడే అలవాటున్న టీమ్‌ఇండియా.. కోహ్లి నాయకత్వంలో దూకుడును అలవర్చుకుంది. బోర్డర్‌-గావస్కర్‌ సిరీస్‌లో భాగంగా జనవరిలో సిడ్నీలో ఆడిన ఐదో టెస్టే కోహ్లి కెరీర్‌లో ఆఖరి టెస్టు. అది 2014 డిసెంబర్.. భారత టెస్ట్ క్రికెట్‌ పాతాళానికి పడిపోతున్న క్షణం. ఐసీసీ పాయింట్స్‌ టేబుల్‌లో 7వ స్థానం. మేటి ఆటగాళ్లంతా రిటైర్మెంట్ ప్రకటించారు. రెండు ప్రపంచకప్‌లు అందించిన ధోనీ కూడా.. కెప్టెన్సీ వదిలి జట్టుకు దూరం అయ్యాడు. టీం భవిష్యుత్  ఏంటనేది అందరిలో ప్రశ్నార్థకం. భారత టెస్ట్ క్రికెట్ ఇక కనుమరుగయిపోతుంది అనుకున్న క్షణం.. అప్పుడొచ్చాడు విరాట్ కోహ్లీ. టెస్ట్‌ క్రికెట్‌లో తాను కింగ్ అని నిరూపించుకోవడానికి ఎక్కువ సమయం పట్టలేదు. టీమిండియా అభిమానుల్లో ఆశలు పెంచి.. సంప్రదాయ విధానాలను సవాల్ చేస్తూ.. కొత్త తరహా టీమిండియాను తయారు చేయడంలో సఫలం అయ్యాడు. టెస్టులు ఎవరు చూస్తారులే అనుకున్న వాళ్లను స్టేడియాలకు రప్పించాడు కోహ్లీ. క్రికెట్‌ అభిమానులను టీవీలకు అతుక్కుపోయేలా చేశాడు. టీ 20లే కాదు.. టెస్టులు కూడా ఇంట్రెస్టింగ్‌గా ఉంటాయి అనిపించేలా చేశాడు. భారత టెస్ట్ క్రికెట్ రాత మార్చాడు. విదేశీ గడ్డపై టీమిండియా అంటే చెమటలు పట్టేలా చేశాడు. అప్పటివరకు సౌతాఫ్రికా, ఆస్ట్రేలియా, ఇంగ్లాండ్ గడ్డపై భారత్ చెప్పుకోదగ్గ ప్రదర్శన చేసిందే లేదు. ముఖ్యంగా ఆసీస్ ఆటగాళ్ల స్లెడ్జింగ్‌కు మనవాళ్లు ముందే చిత్తయ్యేవాళ్లు. కానీ కెప్టెన్‌గా కోహ్లీ వారి సొంతగడ్డ పైనే వారికి దీటుగా జవాబిచ్చేవాడు. టీమిండియా ప్లేయర్ల జోలికి ఎవరైనా రావాలంటే ముందు తనను దాటాలని ప్రతి టీంకు చాటి చెప్పాడు.  మరో రెండు దశాబ్దాలు పైబడినా.. బెస్ట్ టెస్ట్ కెప్టెన్‌ అంటే కోహ్లీ పేరు చెప్పేలా చేశాడు. భారత టెస్ట్ క్రికెట్ కెరీర్ కోహ్లీకి ముందు.. కోహ్లీకి తర్వాత అని చెప్తారు ఎవరైనా.  ఎందుకంటే ఒకటి కాదు.. రెండు కాదు.. విరాట్ టెస్ట్ కెప్టెన్‌గా పగ్గాలు అందుకున్న తర్వాత.. ప్రపంచ క్రికెట్‌లో భారత్ చక్రం తిప్పింది. 2017 నుంచి 2021 వరకు ఐదేళ్లు టీమిండియాను నెంబర్‌ వన్‌గా నిలబెట్టాడు. ప్రపంచ టెస్ట్ క్రికెట్‌లో ఈ ఘనత  సాధించిన కెప్టెన్ ఎవరూ లేకపోవడం గమనార్హం. అంతే కాకుండా భారత్ ను వరుసగా వరల్డ్ టెస్ట్ చాంపియన్‌షిప్‌ ఫైనల్‌కు తీసుకెళ్లాడు. కోహ్లీ సారథ్యంలో భారత్ 68 మ్యాచ్‌లు ఆడి.. 40 విజయాలు సాధించింది. మరో 11 మ్యాచ్‌లను డ్రా చేసుకుంది. కోహ్లీ సారథ్యంలో సొంతగడ్డపై 11 టెస్ట్ సిరీస్‌లు గెలిచింది. విదేశాల్లో అత్యధిక విజయాలు సాధించిన భారత కెప్టెన్‌గానూ  రికార్డు విరాట్ కోహ్లీ పేరుమీదే ఉంది.   కోహ్లీ సారథ్యంలో విదేశాల్లో భారత్.. 15 విజయాలు నమోదు చేసింది. కెప్టెన్‌గా వరుసగా అత్యధికంగా 9 టెస్ట్ సిరీస్ గెలిచింది కూడా కోహ్లీనే. ఆడిలైడ్, పెర్త్ గడ్డపై కొన్నేళ్లుగా ఆస్ట్రేలియాదే ఆధిపత్యం. అలాంటిది వాళ్ల సొంతగడ్డపైనే  వారిని మట్టి కరిపించి.. వరుసగా బోర్డర్ గవాస్కర్ ట్రోఫీలను గెలిచాడు. ఆస్ట్రేలియా గడ్డపై టెస్ట్ సిరీస్ గెలిచిన మొదటి భారత కెప్టెన్‌గా నిలిచాడు. అటు ఇంగ్లాండ్‌ గడ్డపై భారత్ విశ్వరూపం కొనసాగడానికి కారణం కోహ్లీనే. ఆటగాడిగా.. కెప్టెన్‌గా తోటి ప్లేయర్లలో ఆత్మవిశ్వాసాన్ని నింపాడు. అదే టీమిండియా రాత మార్చింది.  విరాట్ కోహ్లీ లేకుండా టీమిండియా టెస్ట్ జట్టును ఊహించుకోవడం చాలా కష్టం. కెప్టెన్‌గా తాను 2022లో రిటైర్ అయినా.. లీడర్‌గా రోహిత్ శర్మకు విలువైన సలహాలు అందించాడు. రోహిత్‌ టీంను నడిపించలేని టైంలో.. తాను ముందుకు వచ్చి భారత్‌ను రక్షించిన సందర్భాలు ఎన్నో ఉన్నాయి. ఇప్పుడు అలాంటి మరో ప్లేయర్, మరో కెప్టెన్‌, మరో లీడర్‌ను భారత క్రికెట్‌ చూడటం కష్టమే.
ఉజ్వల ఇన్నింగ్స్‌కి తెర.. టెస్టులకు కోహ్లీ గుడ్‌బై Publish Date: May 13, 2025 12:39PM

Movie News

Get all the updates about andhra pradesh news, political news, articles, sr journalists books, regional news, telugu cinema news etc. Find information about Telugu film news, regional news, current affairs, gallery, wallpapers, etc. See Telugu news, news videos along with latest news only at TeluguOne.com.
TeluguOne Services
TeluguOne For Your Business
About TeluguOne
Keywords: Telugu News

Copyright © 2025 TeluguOne NEWS - All Rights Reserved

Disclaimer:
All content included on this TeluguOne.com Portal including text, graphics, images, videos and audio clips, is the property of ObjectOne Information Systems Ltd. or our associates, and protected by copyright laws. The collection, arrangement and assembly of all content on this portal/ related channels is the exclusive property of ObjectOne Information Systems Ltd. or our associates and protected copyright laws.
You may not copy, reproduce, distribute, publish, display, perform, modify, create derivative works, transmit, or in any other way exploit any part of copyrighted material without permission from ObjectOne Information Systems Ltd or our associates.