సుధీర్-రష్మీ మళ్లీ పెళ్లి!
'సుడిగాలి' సుధీర్, యాంకర్ రష్మీ గౌతమ్ మధ్య సమ్థింగ్ సమ్థింగ్ ఉందని కామెంట్లు వినిపిస్తుంటాయి. ఏదో ఎఫైర్ వుందని అంటారంతా. కాని తమ మధ్య ఏమీ లేదని ఇద్దరూ ఎప్పుడూ ఖండించలేదు. మీమధ్య ప్రేమ వుందంట కదా అని అడిగితే ముసిముసి నవ్వులు నవ్వుతూ 'మంచి స్నేహితులం మాత్రమే' అంటూ ఆన్సర్ ఇస్తారు ఇద్దరూ.
ఆడియన్స్లో సుధీర్, రష్మీ జోడీకి వున్న క్రేజ్ క్యాష్ చేసుకోవడం కోసం ఈటీవీ కోసం మల్లెమాల వాళ్ళు 'అహ నా పెళ్ళంట' అని ఒక పండక్కి ప్రోగ్రామ్ చేశారు. వాళ్ల పెళ్లి చేశారు. రియల్ లైఫ్లో సుధీర్, రష్మీ గౌతమ్ ఎప్పుడు పెళ్లి చేసుకుంటారోనని వెయిట్ చేస్తున్న జనాలు వున్నారు. రీసెంట్గా 'రెచ్చిపోదాం బ్రదర్' షోలో సుధీర్ను, 'ఎక్సట్రా జబర్దస్త్'లో రష్మీను 'బుల్లెట్' భాస్కర్ ఫాదర్ 'మీ పెళ్లి ఎప్పుడు?' అని అడిగాడు. ఇద్దరూ సమాధానం దాటవేశారు. రియల్ లైఫ్లో ఎప్పుడు పెళ్లి చేసుకుంటారో, అసలు చేసుకోరో తెలియదు గానీ... రీల్ లైఫ్లో ఇంకోసారి సుధీర్, రష్మీ పెళ్లి చేసుకున్నారు.
ఇప్పుడు సుధీర్, రష్మీ పెళ్లికి 'హైపర్' ఆది పెద్ద. ఎందుకంటే... ఈసారి వాళ్ళిద్దరి పెళ్లి చేసింది అతడే. ప్రతి వారం తన స్కిట్లో సమ్థింగ్ వుండేలా చూసుకోవడం ఆది స్పెషాలిటీ. ఎవరో ఒకరిని అతిథులుగా తీసుకొస్తాడు. జూలై 15న టెలికాస్ట్ కానున్న జబర్దస్త్ ఎపిసోడ్ కోసం సుధీర్, రష్మీ, దీపికా పిల్లిని తీసుకొచ్చాడు. స్కిట్ను కూడా మ్యారేజ్ థీమ్లో డిజైన్ చేశాడు. అందులో సుధీర్ - రష్మీ, ఆది - దీపికా పెళ్లి చేసుకోబోతున్న జంటలుగా కనిపించారు.
'ఆ సూర్య రశ్మిలు వున్నంత కాలం ఈ సుధీర్, రష్మీలు అలాగే వుంటారు' అని సుధీర్ డైలాగ్ చెప్పడం గమనార్హం. దానికి 'రాత్రి ఎక్కడ వుంటాడు?' అని ఆది కౌంటర్ వేయడం, ఎప్పటిలా ప్లేబాయ్ ఇమేజ్ కంటిన్యూ చేస్తూ... 'పదిన్నర అయ్యింది. ఏంటిమరి?' అని రష్మీని సుధీర్ అడగటం ఇంట్రెస్ట్ క్రియేట్ చేశాయి.