kcr

కేసీఆర్ వలలో కాంగ్రెస్ చేపలు విలవిలా

  తెలంగాణ కాంగ్రెస్ నేతల హడావుడి తాటాకు మంటల్లాంటిదని మరోసారి ఋజువు చేసారు. తెరాస అధ్యక్షుడు కేసీఆర్ పలకరించగానే ఉబ్బితబ్బిబయిపోయిన వారందరూ ఒకరింటికి మరొకరు పేరంటాలకి వెళుతున్నట్లు ఓ రెండు మూడు రోజులు హుషారుగా తిరిగేసి చాలా హడావిడే చేశారు. కానీ, స్వపక్షం నుండి వస్తున్న విమర్శలను, మీడియాలో తమపై వస్తున్న విశ్లేషణలు చూసిన తరువాత గాలి తీసేసిన బెలూన్స్ లాగయిపోయారు వాళ్ళందరూ.   అసలు కేసీఆర్ కాంగ్రెస్ నేతల సహాయం కోరి వచ్చేడా? లేక వారితో రహస్య సమావేశాలు జరిపి తద్వారా కాంగ్రెస్ పార్టీలో చిచ్చు పెట్టడానికేవచ్చేడా అనే అనుమానం కూడా కలుగుతోంది. నిన్న ఆ పార్టీ నాయకుడు కే.తారకరామారావు మాట్లాడుతూ “తమ పార్టీని బలపరుచుకోవడం ఎంత ముఖ్యమో ఎదుటపార్టీని బలహీనపరచడం కూడా అంతే ముఖ్యం” అని చెప్పిన మాటలువింటే కేసీఆర్ వ్యూహాత్మకంగానే మీడియా వాళ్ళ కంట్లో పడేవిదంగానే వారితో సమావేశానికి తరలిరావడం చూస్తే, వారందరినీ కేసీఆర్ ఆడుకొని వదిలేసాడనుకోవలసి ఉంటుంది.అయినా కూడా కేసీఆర్ ఆడిన ఈ ఆటలో తమదేపై చెయ్యని భ్రమలో ఉన్న కాంగ్రెస్ నేతలు, ఇంకా తెరాస వైపే చూస్తున్నారు.   అయితే కేసీఆర్ రాజేసిన ఈ ఎన్నికల వేడిని భరించాలంటే మళ్ళీ కాంగ్రెస్ గొడుగు క్రిందే సేదతీరడం మంచిదని అర్ధం చేసుకొని, తాము తెరాసలో జేరడంపై వచ్చిన వార్తలన్నీ తిరిగి మీడియాకే అంకితం చేసిపడేశారు కాంగ్రెస్ నేతలు. కానీ, మరోపక్క కేసీఆర్ ఇస్తున్న బంపర్ ఆఫర్ మాత్రం మనసులో ఇంకా ఊరిస్తూనే ఉండడంతో మనసొక చోట మనువొకచోటా అన్నట్లుంది వారి పరిస్థితి. అందువల్లే మళ్ళీ, ఒక వివేకవంతమయిన యంపీ మాట్లాడుతూ, త్వరలో తమ అధిష్టానం తెలంగాణ విషయం కనుక తేల్చకపోతే మళ్ళీ (భవిష్యత్ కార్యాచరణ) తాటాకులు మంటేసుకొంటామని హెచ్చరిస్తున్నారు. అలాగని ఎవరూ కూడా తెరాసలోకి జంపింగ్ తీసుకొంటామని దైర్యంగా, ఖచ్చితంగా చెప్పలేకపోతున్నారు.   ఇప్పుడు వారు కాంగ్రెస్ పార్టీలో ఉన్నప్పటికీ తాము నిఖార్సయిన కాంగ్రెస్ వాదులమని చెప్పుకోలేని పరిస్థితి. తమ పార్టీ వారితో కంటే తెరాస వారితోనే భుజాలు రాసుకొని తిరగడం సౌకర్యంగా భావిస్తున్న వారిని ఇప్పుడు కాంగ్రెస్ పార్టీలో ఎవరూ నమ్మడం లేదు. అదే విధంగా వారు కూడా తమ పార్టీని నమ్మడం లేదిప్పుడు. ముఖ్యమంత్రి కిరణ్ కుమార్ రెడ్డే స్వయంగా ప్రభుత్వ విప్ జగ్గారెడ్డిచేత తమపై దాడి చేయిస్తున్నారని, ఆయనే కేంద్రానికి తప్పడు నివేదికలు పంపిస్తున్నారని పెద్దపల్లి ఎంపీ జి వివేక్ ఆరోపించడమే ఇందుకు ఒక ఉదాహరణ.   ఇటు స్వంత పార్టీలో ఇమడలేక, అటు తెరాస వైపు వెళ్ళే దైర్యం చేయలేక తెలంగాణ కాంగ్రెస్ యంపీలు చాలా ఇబ్బందికరమయిన పరిస్థితుల్లో ఉన్నారిప్పుడు. ఇది వారికి కేవలం ఇబ్బంది మాత్రమే అయితే ఎలాగో భరించేవారే, కానీ, అది తమ రాజకీయ భవిష్యత్ కూడా సవాలుగా మారడంతో ఇప్పుడు ఎవరిని నమ్ముకోవాలో అర్ధం కాక తలపట్టుకొన్నారు.   కానీ ఇప్పుడు వారు తెలుసుకోవలసిన ముఖ్యమయిన విషయం ఒకటుంది. ఎన్నికల హడావుడిలో పడిన కేసీఆర్ మరో ఏడాది వరకు తెలంగాణ ఊసెత్తడు గనుక, ఆయన వెనుకే లక్ష్మణుడిలా తిరిగే కోదండరాముడు కూడా గమ్మునే ఉంటాడు. కనుక తెలంగాణ కాంగ్రెస్ నాయకులు కూడా నిజాయితీగా తమ పార్టీనే అంటిపెట్టుకొని, మళ్ళీ సోనియమ్మను ప్రసన్నం చేసుకొని పార్టీ టికెట్స్ సంపాదించుకొని దైర్యంగా ఎన్నికలలో పోటీ చేయడమే ఉత్తమం.   ఉద్యమం అని ఊగిపోయిన కేసీఆర్, కోదండరాములే ఉద్యమానికి ఎన్నికల శెలవులు ప్రకటించేసినప్పుడు, కాంగ్రెస్ నేతలు వారిని, వారి ఉద్యమాన్ని చూసి భయపడటం అనవసరం. మాటనిలకడలేని కేసీఆర్ వంటి వారిని నమ్ముకొని తమ రాజకీయ జీవితాలు పాడు చేసుకోవడం కంటే కన్నతల్లి వంటి సోనియమ్మని, దేశాన్నిమార్చలేకపోయినా పార్టీని మాత్రం మార్చి పడేస్తానని గుర్రం ఎక్కివస్తున్న యువరాజు రాహుల్ గాంధీని నమ్ముకోవడం వారికి అన్ని విధాల మేలు.

10 Maoists killed in encounter on Andhra

మావోలకి ఎదురుదెబ్బ: అగ్రనేత సహా 15మంది మృతి

        ఆంధ్రా, చత్తీస్‌గఢ్ సరిహద్దులో మావోయిస్టులకు గట్టి ఎదురుదెబ్బ తగిలింది. బీజాపూర్ జిల్లా బాసగూడ పీఎస్ పరిధిలో పోలీసులకు- మావోయిస్టులకు మధ్య జరిగిన ఎదురు కాల్పుల్లో 16 మంది మావోయిస్టులు మృతి చెందారు. పదుల సంఖ్యలో మావోలు గాయపడ్డారు. మృతుల్లో మావోయిస్టు అగ్రనేత రాజిరెడ్డి కూడా ఉన్నట్లు తెలుస్తోంది. అయితే రాజారెడ్డి మృతిపై పోలీసులు ఇంకా ధృవీకరించలేదు. ఎన్‌కౌంటర్‌లో ఓ మహిళా మావోయిస్టు కూడా మృతి చెందినట్లు తెలుస్తోంది. ఘటనా స్థలంలో భారీగా ఆయుధాలను పోలీసులు స్వాధీనం చేసుకున్నారు. ఖమ్మం జిల్లాకు 15 కిలోమీటర్ల దూరంలో 150 మంది మావోయిస్టుల బెటాలియన్ సమావేశం నిర్వహిస్తుందనే సమాచారంతో సీఆర్పీఎఫ్, ఖమ్మం జిల్లా పోలీసులు విస్తృతంగా కూంబింగ్ నిర్వహిస్తుండగా మావోయిస్టులు ఎదురుపడటంతో ఎదురు కాల్పులు చోటు చేసుకున్నట్లు తెలుస్తోంది.

sanjay dutt

సంజయ్ దత్త్ పిటిషను విచారించనున్న సుప్రీం కోర్ట్

  అక్రమాయుధాల కేసులో మూడున్నర సం.ల జైలు శిక్ష అనుభవించవలసిఉన్న బాలివుడ్ నటుడు సంజయ్ దత్త్ ఈ నెల 18వ తేదిలోగా కోర్టు ముందు లొంగిపోవలసి ఉంది.   అతను క్షమాభిక్ష కోసం దరఖాస్తు చేసుకొంటే పరిశీలించి సానుకూలంగా నిర్ణయం తీసుకోగలదని మహారాష్ట్ర ప్రభుత్వం సూచనప్రాయంగా చెప్పిన తరువాత, చెలరేగిన రాజకీయ దుమారం చూసి నొచ్చుకొన్నసంజయ్ దత్త్ తానూ క్షమాభిక్ష కోరనని, అది అవసరమయిన వారు చాలా మందేఉన్నారని, తానూ స్వచ్చందంగా జైలు శిక్ష అనుభవించడానికే నిశ్చయించుకొన్నానని మీడియాతో అన్నారు. కానీ, తీవ్రమానసిక క్షోభ అనుభవిస్తున్న ఆయన, లొంగివలసిన సమయం దగ్గిర పడిన తరువాత, ఆయన ఆలోచనలలో కూడా కొంచెం మార్పు వచ్చినట్లుంది.   తను లొంగిపోవడానికి మరో ఆరునెలలు గడువు ఇప్పించవలసిందిగా కోరుతూ ఆయన నిన్న సుప్రీంకోర్టులో ఒక పిటిషను వేశారు. క్షమాభిక్ష పెట్టవలసిందిగా కోరుతూ తానూ స్వయంగా మహారాష్ట్ర గవర్నర్ కు దరఖాస్తు చేసుకొనప్పటికీ, అయనకు క్షమాభిక్ష పెట్టవలసిందిగా కోరుతూ సినీనటి జయప్రద వంటివారు అనేక మంది లేఖలు వ్రాశారు. తన క్షమాభిక్ష అభ్యర్ధన ప్రస్తుతం గవర్నర్ పరిశీలనాలో ఉన్నందున కనీసం ఆయన తన నిర్ణయం ప్రకటించేవరకయినా తనకు సమయం ఇప్పించవలసిందిగా ప్రార్దిస్తూ సంజయ్ దత్త్ సుప్రీం కోర్టులో వేసిన పిటిషన్నుపరిశీలించేందుకు కోర్టు అంగీకరించింది. బహుశః రేపు ఆయన పిటిషన్ కోర్టు ముందుకు రావచ్చును.   కానీ, అదే కేసులో నిందితులయిన జబున్నిసా అన్వర్ ఖాజీ, ఇస్సాక్ మొహమ్మద్ హజ్వానే మరియు షర్రిఫ్ అబ్దుల్ గఫూర్ పార్కర్ అనే ముగ్గురు నిందితులు కూడా ఇదేవిధంగా కోరుతూ వేసిన పిటిషన్లను సుప్రీంకోర్టు ఈరోజే తిరస్కరించింది. వారిలో జబున్నిసా అన్వర్ ఖాజీకి 5సం.ల జైలు శిక్ష ఖరారు చేయగా, మరో ఖైదీ ఇస్సాక్ మొహమ్మద్ హజ్వానేకు గతంలో టాడా కోర్టు విదించిన 5సం.ల జైలు శిక్షను సుప్రీం కోర్టు యావజీవిత ఖారాగార శిక్షగా మార్చింది. ఇప్పటికే 14సం.ల జైలు శిక్ష అనుభవించిన షర్రిఫ్ అబ్దుల్ గఫూర్ పార్కర్ అనే మరో ఖైదీకి టాడా కోర్టు విదించిన యావజీవిత ఖారాగార శిక్షనే సుప్రీంకోర్టు కూడా ఖరారు చేసింది.   ఈ నేపద్యంలో సంజయ్ దత్త్ చేసుకొన్న దరఖాస్తును సుప్రీంకోర్టు పరిశీలించడానికి అంగీకరించినప్పటికీ ఆయనకు గడువు పెంచడానికి బహుశః అంగీకరించకపోవచ్చును. అప్పుడిక సంజయ్ దత్త్ ఈ నెల 18న జైలుకి తెరిగి వెళ్ళక తప్పకపోవచ్చును. అదేజరిగితే, అతని మీద దాదాపు రూ 250 కోట్ల పెట్టుబడితో తీయవలసిన సినిమాలన్నీ కూడా ఆగిపోవడం ఖాయం. తద్వారా ఆయా నిర్మాతలకి నష్టాలు తప్పవు.   మెగా పవర్ స్టార్ రామ్ చరణ్ తేజ్ మొట్టమొదటిసారిగా హిందీలో నటిస్తున్న జంజీర్ సినిమాలో సంజయ్ దత్త్ ముఖ్యపాత్ర పోషిస్తున్నాడు. ఆ సినిమా తెలుగులో తుఫాన్ గా విడుదల అవుతోంది. అదృష్టవశాత్తు ఈ సినిమా షూటింగ్ మొత్తం పూర్తయిపోవడమేకాకుండా, ఇటీవలే సంజయ్ దత్త్ తన పాత్రకు డబ్బింగ్ కూడా చెప్పడంతో ఈ సినిమా పెద్ద సమస్య నుండి త్రుటిలో తప్పించుకోగలిగింది.

chandrababu kiran kumar reddy

చంద్రబాబు వద్దంటే ఆపేస్తామా?

        టిడిపి పార్టీ అధ్యక్షుడు చంద్రబాబు నాయుడు పేద ప్రజలకు పేదలకు చౌకధరలకు వస్తువులు ఇవ్వద్దంటున్నారు. అమ్మహస్తం పథకాన్ని ఆయన వ్యతిరేకిస్తున్నారు అని ముఖ్యమంత్రి కిరణ్ కుమార్ రెడ్డి విమర్శించారు. అమ్మహస్తం పథకాన్ని శ్రీకాకుళం జిల్లాలో ఆయన లాంఛనంగా ప్రారంభించారు. చంద్రబాబు శ్రీకాకుళం వరకు రాడట..విశాఖపట్నంలోనే ఆగిపోతారట. అమ్మహస్తాన్ని ఆయన వ్యతిరేకిస్తున్నారు. మరి మీకు ఇవ్వాలా ? వద్దా ? చేతులు ఎత్తండి అంటూ ముఖ్యమంత్రి కిరణ్ కుమార్ రెడ్డి ప్రజలను కోరారు. చంద్రబాబు చెబితే పథకాలు పెడతామా ? ఆయన వద్దంటే ఆపేస్తామా ? ప్రజల గుండె చప్పుడు వింటామని కిరణ్ అన్నారు. అంతకుముందు ముఖ్యమంత్రి పర్యటనలో భాగంగా ఆయన వాహనాలతో పాటు ప్రయాణిస్తున్న మంత్రి ధర్మాన ప్రసాదరావు కాన్వాయ్లోని రెండు వాహనాలు ఢీకొన్నాయి. ఈ ఘటనలో స్థానిక కాంగ్రెస్ మహిళా నేత మోహినికి గాయాలయ్యాయి. అమెకు సమీపంలోని ఆసుపత్రితో ప్రాధమిక చికిత్స చేయించారు.

ambati rambabu

జగన్ రాజకీయాలకి జైలు అడ్డం కాదుట

  జగన్ మోహన్ రెడ్డి మీద చంచల్ గూడా జైలుని తన పార్టీ కార్యాలయంలా మార్చేసుకొని అక్కడి నుండే పార్టీ వ్యవహారాలన్నీ నడిపిస్తున్నాడని ఆరోపిస్తున్న తెలుగుదేశం పార్టీకి, ఇప్పుడు కాంగ్రెస్ పార్టీకూడా తోడవడంతో, అందరూ ఊహించినట్లు వైయస్సార్ కాంగ్రెస్ పార్టీ వారి ఆరోపణలను చూసి బయపడలేదు. బెదిరిపోలేదు. ఖండించలేదు పైగా జైల్లోంచి రాజకీయాలు చేయకూడదని ఏ చట్టం చెపుతోంది? అని ఎదురు ప్రశ్నించేసరికి కాంగ్రెస్ తెదేపా నేతల నోట మాటలేదు.   తెగించిన వాడికి తెడ్డే ఆయుధం అన్నట్లు, అతని తప్పులను కూడా తన మాటకారితనంతో ఆ పార్టీ అధికార ప్రతినిది అంబటి రాంబాబు వెనకేసుకొని వస్తూ వితండవాదన మొదలు పెట్టారు. జగన్ మోహన్ రెడ్డి నేరం ఋజువయ్యి శిక్ష పడిన ఖైదీ కాదని, అతను కేవలం విచారణలోఉన్న ఖైదీ మాత్రమే గనుక అతనికి జైలు నుండి రాజకీయాలలో పాల్గొనే సర్వ హక్కులు కూడా ఉంటాయని ఆయన అన్నారు. విచారణలో ఉన్న ఖైదీలు రాజకీయాలలో పాల్గొనకూడదని ఏ చట్టం చెపుతోందని ఆయన ప్రశ్నించారు. చట్టంలో ఈ చిన్నపాటి విషయం గురించి తెలియకుండా కొందరు నాయకులూ పిచ్చి కుక్కల్లా మొరుగుతున్నారని ఆయన ఎద్దేవా చేసారు. జగన్ మోహన్ రెడ్డిని ఎవరు కలవాలో, ఎప్పుడు కలవాలో నిర్ణయించుకోవలసినది ఆయనే తప్ప మొరుగుతున్న పిచ్చికుక్కలు కాదని ఆయన అన్నారు. ఆయనను కలుస్తున్న వారి గురించి అభ్యంతరాలు చెపుతున్న వాళ్ళు ఆయనకి ఆ హక్కులేదని నిరూపించామని అంబటి సవాలు కూడా విసిరారు.   దీనికి తెదేపా, కాంగ్రెస్ నేతలు ఏవిధంగా జవాబు ఇస్తారో చూడాలి. ఈ వ్యవహారం చూస్తుంటే  ముదిరి పాకాన్న పడి, చివరికి ఈ విషయంపై కూడా అతనిపై మరో కేసు నమోదు అయ్యేలా ఉంది.

  V. Hanumantha Rao

జగన్ ను వేరే రాష్ట్రానికి తరలించండి

        అక్రమాస్తుల కేసులో చంచల్ గూడ జైలులో ఉన్న వైఎస్సార్ కాంగ్రెస్ పార్టీ అధినేత వైఎస్ జగన్మోహన్ రెడ్డి వెంటనే ఇతర రాష్ట్రాలలోని జైలుకు మార్చాలని కాంగ్రెస్ రాజ్యసభ సభ్యుడు వి.హనుమంతరావు డిమాండ్ చేశారు. జగన్ జైలును తన కార్యాలయంగా ఉపయోగించుకుంటుంటే అధికారులు ఎం చేస్తున్నారని ప్రశ్నించారు. మాజీ మంత్రి మోపిదేవికి ఒక న్యాయం, మంత్రులు సబితా ఇంద్రారెడ్డి, ధర్మాన ప్రసాదరావులకు ఒక న్యాయం మంచిది కాదని అన్నారు. జగన్ అక్రమాస్తుల కేసులో ప్రమేయమున్న మంత్రులను తొలగించాలని అన్నారు. తెలంగాణ అంశంపై త్వరగా అధిష్ఠానం నిర్ణయం తీసుకోవాలని, లేదంటే తాము ప్రజల్లోకి వెళ్లలేమని, పైగా పార్టీపై వ్యతిరేకత పెరుగుతుందని చెప్పారు.

Cricketer Umesh Yadav Secrete Marriage

రహస్యంగా క్రికెటర్ ఉమేశ్ యాదవ్ పెళ్ళి

  ఢిల్లీకి చెందిన ఫ్యాషన్ డిజైనర్ తానియా వాద్వాను క్రికెటర్ ఉమేశ్ యాదవ్ నాగ్ పూర్ లోని తన ఇంట్లో కొద్దిమంది సన్నిహితుల మధ్య వివాహం చేసుకున్నాడు. ఏడాది కాలంగా వీరిద్దరూ ప్రేమించుకుంటున్నారు. నెల రోజుల క్రితం రిజిస్టర్ మ్యారేజ్ కోసం దరఖాస్తు కూడా పెట్టుకున్నారు. ఈ విషయమై ఉమేశ్ యాదవ్ ను ప్రశ్నించగా మా ఇద్దరికీ ఏడాది క్రితం పరిచయం అయ్యింది, అది ప్రేమగా మారడంతో మా పెద్దలు, తానియా పెద్దలు పెళ్ళికి అంగీకరించారు. దీంతో ఈ రోజు నిశ్చితార్థం జరుపుకున్నాం, ఐపిఎల్ తరువాత పెళ్ళి చేసుకుంటాం అని అబద్ధం చెప్పాడు. సోమవారం జరిగిన కార్యక్రమానికి తానియా పెద్దలు ఎవరూ హాజరు కాకపోవడం విశేషం. అయితే సోమవారం వీరిద్దరూ రిజిస్టర్ లో సంతకాలు చేస్తున్న వీడియోను నాగ్ పూర్ పత్రిక వెల్లడిచేసింది.

Chandra Babu Naidu Open Challenge To Kiran Kumar Reddy

కిరణ్ కు చంద్రబాబు బహిరంగ సవాల్

  విశాఖజిల్లాలో పాదయాత్ర చేస్తున్న చంద్రబాబు నాయుడు రాష్ట్ర ముఖ్యమంత్రి కిరణ్ కుమార్ రెడ్డికి బహిరంగ సవాల్ విసిరారు. గాంధీనగర్ లో జరిగిన బహిరంగ సమావేశంలో చంద్రబాబు నాయుడు మాట్లాడుతూ ... తొమ్మిది సంవతసరాలుగా నిద్రపోతున్న కాంగ్రెస్ ప్రభుత్వానికి ఎన్నికల ముందు ఎస్సీ, ఎస్టీ లు గుర్తుకువచ్చారా? ఎస్సీ. ఎస్టీలకు కేటాయించిన భూములను, నిధులను, ఇతర సౌకర్యాలను దిగమింగి ఇప్పుడు సబ్ ప్లాన్ అంటూ నాటకం ఆడుతున్నారని, ఎస్సీ, ఎస్టీ సబ్ ప్లాన్ ను ప్రతిపక్షాలు అడ్డుకున్నాయంటూ కిరణ్ కుమార్ అబద్ధాలు చెబుతున్నారని, తొమ్మిది సంవత్సరాల కాంగ్రెస్ పాలనలో జరిగిన అవినీతిపై బహిరంగ చర్చకు సిద్ధం కావాలని కిరణ్ కుమార్ రెడ్డికి సవాల్ విసిరారు. ముఖ్యమంత్రి క్యాబినెట్ లో తొంభై శాతం మంత్రులు అవినీతిపరులుగా ముద్రపద్దారని, నిత్యావసర ధరలు పెరిగిపోయాయని, తమ హయాంలో డీఎస్సీల ద్వారా వేలాది ఉపాధ్యాయ పోస్టులు భర్తీ చేశామని కానీ ప్రస్తుత ప్రభుత్వం రిక్రూట్ మెంట్ ల పేరుతొ ఉద్యోగాలను అమ్ముకుంటున్నదని కిరణ్ కుమార్ పై విరుచుకుపడ్డారు.

 Boston Bomb Blasts

బోస్టన్ లో వరుస బాంబు పేలుళ్లు,100 గాయాలు

        అమెరికాలోని బోస్టన్‌లో సోమవారం రాత్రి వరుస బాంబు పేలుళ్లు సంభవించాయి. ఈ ఘటనలో ఇద్దరు మృతి చెందగా, 100 మందికి పైగా క్షతగాత్రులయ్యారు.ముందుగా మారథాన్ ప్రాంతంలో రెండు భారీ పేలుళ్లు సంభవించాయి. ఈ పేలుళ్లతో అప్రమత్తమైన పోలీసులు తనిఖీలు నిర్వహించారు. ఈ తనిఖీలలో మరో రెండు బాంబులను గుర్తించిన పోలీసులు వాటిని నిర్వీర్యం చేశారు. ఆ తరువాత జేఎఫ్‌కే లైబ్రెరీ వద్ద మరో పేలుడు సంభవించింది. ఈ పేలుళ్లలో క్షతగాత్రులైన వారిని సమీప ఆస్పత్రుల్లో చేర్పించి చికిత్స చేయిస్తున్నారు. ఈ పేలుళ్లకు బాధ్యులైన వారిని ఉపేక్షించబోమని అమెరికా అధ్యక్షుడు బరాక్ ఒబామా వెల్లడించారు. ఈ ఘటనతో అమెరికాలోని ప్రధాన నగరాల్లో హైఅలర్ట్ ప్రకటించారు.

rashid alvi

తెలంగాణ యంపీలకు కాంగ్రెస్ షాక్

  తెలంగాణ కాంగ్రెస్ యంపీలు కోరుకోన్నట్లే, వారు తెరాస అధినేత కేసీఆర్ తో జరుపుతున్న రహస్య సమవేశాల గురించి కాంగ్రెస్ అధిష్టానం చెవుల్లో పడింది. అయితే వారు ఆశిస్తున్నట్లు డిల్లీ నుండి వారిని బుజ్జగించేందుకు ఎవరూ బయలు దేరబోవడం లేదు, కానీ “మన ప్రజాస్వామ్య వ్యవస్థలో ఎవరయినా ఎప్పుడయినా పార్టీలు మారొచ్చు. అందులో అభ్యంతరం పెట్టేందుకు ఏమీ లేదు” అని ఒక పిడుగులాంటి సందేశం కాంగ్రెస్ అధికార ప్రతినిధి రషిద్ అల్వీ నోటి ద్వారా తాజాగా వెలువడింది. మరో విధంగా చెప్పాలంటే, ‘ఉంటే ఉండండి పోతే పొండని’ ఆయన మాటలకి అర్ధం.   ఇంతవరకు వచ్చిన తరువాత వారు ఇప్పుడు పార్టీలోనే ఉన్నా వారికి వచ్చే ఎన్నికలలో పోటీ చేసేందుకు పార్టీ టికెట్స్ ఇస్తుందని నమ్మకం లేదు. కాంగ్రెస్ అధిష్టానానికి అనుకూలంగా మారిన నిజామాబాద్ యంపీ మధు యాష్కీ సహచర యంపీలతో సమావేశం అయినప్పటికీ, తానూ పార్టీని వీడేదిలేదని స్పష్టం చేసారు. ఇక రాజయ్య, మంద జగన్నాథ రావు, కే.కేశవ్ రావు ముగ్గురూ కూడా తాము కాంగ్రెస్ పార్టీని వీడేoదుకే నిశ్చయించుకొన్నట్లు సంకేతాలు ఇస్తున్నారు. ఇక మిగిలిన యంపీలు పొన్నాల ప్రభాకర్, గుత్తా సుఖేందర్ రెడ్డి, వివేక్ తదితరులు మరియు శాసనసభ్యులు కోమటి రెడ్డి సోదరులు ఇంకా అయోమయ స్థితిలో ఉన్నారు. ఆ పరిస్థితి నుండి వారు ఎంత త్వరగా బయటపడి నిర్ణయం తీసుకొంటె అంత మంచిది. ఒకసారి కాంగ్రెస్ పార్టీలో వారికి గౌరవం తగ్గితే, అప్పుడు కేసీఆర్ దృష్టిలో కూడా వారు పలుచన అవడం ఖాయం. అప్పుడు వారి పరిస్థితి రెంటికీ చెడిన రేవడిగా మారుతుంది.

Congress Leaders Fires on KCR

టి.ఆర్.ఎస్.పై కాంగ్రెస్ విసుర్లు

  కెసిఆర్ టి. కాంగ్రెస్ నేతలను మభ్యపెట్టి, తన మాయమాటలతో టి.ఆర్.ఎస్. లోకి ఆహ్వానిస్తున్నారని ఎఐసిసి కార్యదర్శి పొంగులేటి సుధాకర్ కెసిఆర్ పై మండిపడుతున్నారు. టి. కాంగ్రెస్ నేతలకు టి.ఆర్.ఎస్.లోకి చేరడానికి డెడ్ లైన్ విధించడం ఏమిటని? తెలంగాణా ప్రత్యేక రాష్ట్రం కోసం తానొక్కడే పాతుపడుతున్నాడని ఫోజులు పెట్టడం, తెలంగాణాపై మాట్లాడేందుకు తమకు మాత్రమే పేటెంట్ హక్కులు ఉన్నాయని కెసిఆర్ భావిస్తున్నారని, తెలంగాణా సీనియర్ నేత కె. కేశవరావు వంటివారు కెసిఆర్ మాయమాటలు ఎలా నమ్ముతున్నారని కెసిఆర్ పై ధ్వజమెత్తారు.  కాంగ్రెస్ ప్రభుత్వ విప్, సంగారెడ్డి ఎమ్మెల్యే  తూర్పు జయప్రకాష్ రెడ్డి మాట్లాడుతూ టి.కాంగ్రెస్ నేతలు పార్టీని వీడినంత మాత్రాన పార్టీకి నష్టం వాటిల్లదని, పెద్దపల్లి ఎంపి వివేక్ కాంగ్రెస్ ను వీడుతారనే వార్తలలో సత్యం లేదని తాను భావిస్తున్నట్లు, కెసిఆర్ టి.కాంగ్రెస్ మంత్రులను తన మాయాజాలంలో ఇరికించుకుంటున్నారని టి.కాంగ్రెస్ నేతలు కెసిఆర్ ను నమ్మవద్దని హితవు పలికారు.

telangana congress mps

తెలంగాణ కాంగ్రెస్ యంపీలలో మళ్ళీ భేదాభిప్రాయలు

గతంలో తెలంగాణ కాంగ్రెస్ యంపీలు ‘తెలంగాణ కోసం త్యాగాలు-పార్టీకి రాజీనామాలు’ అంటూ చేసిన హడావుడి అంతా ఇంతా కాదు. కానీ, తరువాత ఒకరితో ఒకరు విభేదాలంటూ అందరూ తమ పదవుల్లో ఇప్పటికీ కొనసాగుతున్నారు. ఈ విషయంలో చెప్పుకోవాలంటే మధు యాష్కీ మరియు పొన్నం ప్రభాకర్ కొంత నిజాయితీగా ప్రవర్తించారని చెప్పవచ్చును. తమ అధిష్టానం ఈ రోజు కాకపోయినా రేపయినా తెలంగాణ తప్పకుండా ఇస్తుందని నమ్ముతున్నందునే రాజీనామాలు చేయబోమని వారు స్పష్టం చేసారు.    మిగిలిన యంపీలు మాత్రం మౌనంగా ఉండిపోయారు. కానీ వారే ఒకప్పుడు తమని సన్నాసులని, తెలంగాణ ద్రోహులని నోటికొచ్చినట్లు తిట్టిపోసిన కేసీఆర్ పార్టీ టికెట్స్ ఇస్తామని పార్టీలోకి ఆహ్వానించగానే నిర్లజ్జగా ఆయన వెనక వెళ్లేందుకు సిద్ధపడుతున్నారు. కానీ, అలాగా వెళ్లేందుకు కారణం మాత్రం తాము తెలంగాణ కోసం త్యాగం చేస్తున్నట్లు చెప్పుకోవడం విశేషం. తమ పార్టీ తెలంగాణ ఇవ్వనందుకే పార్టీని విడిచి పెడుతున్నాము తప్ప, ఆ పార్టీ ఎన్నికలలో పోటీ చేసేందుకు టికెట్స్ఆఫర్ చేస్తున్నదుకు మాత్రం కాదని ప్రజలని నమ్మమంటున్నారు. తెరాసతో చేతులు కలిపితే తెలంగాణ ఉద్యమం బలోపేతం అవుతుందని చెప్పుకొస్తున్నారు. రేపు ఆ పార్టీలో చేరిన తరువాత, తాము ఇంత కాలం భజన చేసుకొస్తున్న ఇందిరా గాంధీ, రాజీవ్ గాంధీ, సోనియా గాంధీలను కేసీఆర్ తిడితే మరి వారు భరించగలరో లేదో వారికే తెలియాలి.   ఇక ఈ రోజు తెలంగాణ యంపీలు జి.వివేక్ ఇంట్లో సమావేశం అయ్యారు. ఈసారి మందా జగన్నాథం, కే.కేశవ్ రావు మాత్రం పార్టీని వీడి తెరాస తీర్ధం పుచ్చుకోవాలని సంకల్పం చెప్పుకొని సిద్దం అవగా, వివేక్, రాజయ్య మాత్రమే ఎటూ తేల్చుకోలేని పరిస్థితిలోమరికొంత కాలం వేచిచూద్దామనే నిర్ణయానికి వచ్చినట్లు సమాచారం. ఇక, పొన్నం ప్రభాకర్, మధు యాష్కీ,లిద్దరూ కాంగ్రెస్ పార్టీనే అంటి పెట్టుకొని ఉండాలని నిర్ణయించుకొన్నట్లు సమాచారం. మందా మరియు కేశవ్ రావులు ఈ నెల 27న ఆర్మూరులో జరగనున్న తెరాస 12వ ఆవిర్భావ సభలో కేసీఆర్ సమక్షంలో తెరాసలో చేరే అవకాశాలున్నట్లు సమాచారం.

Kiran Kumar Cabinet divided on Sabita Indra Reddy Fate

చీలిపోయిన కిరణ్ కుమార్ రెడ్డి క్యాబినెట్

  సిబీఐ దాఖలు చేసిన ఛార్జిషీటులో నాలుగవ ముద్దాయిగా రాష్ట్ర హోంమంత్రి సబితా ఇంద్రా రెడ్డి పేరును జతచేయడంతో కిరణ్ కుమార్ రెడ్డి క్యాబినెట్ రెండుగా చీలిపోయింది. సబితా ఇంద్రారెడ్డిని దాల్మియా సిమెంట్స్ కు సానుకూలంగా ఫైళ్ళపై సంతకాలు చేశారని సిబీఐ ఆరోపించింది. ఈ విషయంలో సబితా ఇంద్రా రెడ్డికి వెన్నుదన్నుగా కిరణ్ కుమార్ రెడ్డి, బొత్సా సత్యనారాయణ, ఆనం రామ్ నారాయణ రెడ్డి, జె.గీతారెడ్డి, పొన్నాల లక్ష్మయ్య, దానం నాగేందర్ బాసటగా నిలిచారు. సబితా ఇంద్రారెడ్డి నిర్దోషి అని, వై.ఎస్. రాజశేఖర రెడ్డి ఆదేశాల మేరకే ఆమె ఆ ఫైళ్ళపై సంతకాలు చేశారని వీరు అంటుండగా, జె.సి. దివాకర్ రెడ్డి మాత్రం ఛార్జిషీట్లలో ఉన్న మంత్రుల వలన పార్టీకి చెడ్డపేరు వస్తుందని, వై.ఎస్. రాజశేఖరా రెడ్డి చెప్పినంత మాత్రాన మంత్రులు ఫైళ్ళపై సంతకాలు చేయడం తప్పుపడుతున్నారు. తాను వై.ఎస్. క్యాబినెట్ లో మంత్రిగా ఉన్నప్పుడు తాను కూడా ఇలాంటి ఫైళ్ళపై సంతకాలు చేయడానికి నిరాకరించి ఫైళును వెనక్కు పంపినట్లు తెలిపారు. అలాగే సర్వే సత్యనారాయణ మాట్లాడుతూ సబితా ఇంద్రారెడ్డి రాజీనామా చేయాలని, రాజీనామా చేయాలో వద్దో హోమమంత్రి సబితా ఇంద్రారెడ్డి నిర్ణయించుకోవాలని అంటున్నారు.

నివాళులు అర్పించడంలో కూడా రాజకీయం

  ఆదివారం 14 ఏప్రిల్ అంబేద్కర్ జయంతి వేడుకల్లో భాగంగా ట్యాంక్ బండ్ వద్ద ఉన్న అంబేద్కర్ విగ్రహానికి నివాళులు అర్పించడానికి వచ్చిన టిడిపి నేత మోత్కుపల్లి నరశింహ, ఎర్రబెల్లి దయాకర్ లకు చేదు అనుభవం ఎదురైంది. ఈ విషయమై తెలుగుదేశం పార్టీ కార్యాలయంలో అంబేద్కర్ కు నివాళులు అర్పించిన తరువాత మోత్కుపల్లి నరసింహ మీడియాతో మాట్లాడుతూ అంబేద్కర్ జయంతి సందర్భంగా తాము ట్యాంక్ బండ్ వద్ద ఉన్న అంబేద్కర్ విగ్రహానికి నివాళులు అర్పించేందుకు వెళ్తే తమను కోదండరాం అవమానించారని, తెలంగాణా జెఎసి చైర్మన్ కోదండరాం ఉద్యమం పేరిట కోట్లాది రూపాయలు దండుకున్నారని, ప్రొఫెసర్ గా ఉండి ఒక్క విద్యార్థికీ పాఠం చెప్పని కోదండరాం ఉద్యమం చాటున కొన్ని పార్టీలను బలోపేతం చేసేందుకే పనిచేస్తున్నారని, దళితులను ఉద్యమానికి దూరం చేస్తున్న కోదండరాం కు వ్యతిరేకంగా ఎస్సీలంతా ఏకం కావాలని, గతంలో దళితమంత్రిని కూడా కించపరిచేలా కోదండరాం మాట్లాడిన విషయం గమనించాలని, అంబేద్కర్ విగ్రహానికి దండ వేసే అర్హత కోదండరాం కు లేదని, అంబేద్కర్ జయంతి సందర్భంగా నివాళులు అర్పించే సందర్భంగా రాజకీయాలకు పాల్పడిన ఘనత కోదండరాంకే దక్కుతుందని మోత్కుపల్లి కోదండరాంపై విరుచుకుపడ్డారు.

అనం మాటల యుద్ధం అందుకే మొదలు పెట్టారా

  ఆర్ధిక మంత్రి రామనారాయణరెడ్డి మాజీ ముఖ్యమంత్రి స్వర్గీయ డా.రాజశేఖర్ రెడ్డిపై అతని కుటుంబ సభ్యులపై చేసిన తీవ్రవిమర్శలు ఊహించినట్లే కాంగ్రెస్, వైయస్సార్ కాంగ్రెస్ పార్టీల మద్య మంటలు రేపాయి. దానికి కాంగ్రెస్ నేతలు ఒకరొకరిగా తమవంతు వ్యాక్యానాలు, విమర్శలు జోడిస్తూ ఆ మంటలు చల్లారకుండా చూస్తున్నారు. అయితే ఇది యాదృచ్చికంగా మొదలుపెట్టిన యుద్ధం మాత్రం కాదని చెప్పవచ్చును. తీవ్ర సమస్యలలో చిక్కుకొని ప్రతిపక్షాల దాడికి విలవిలలాడుతున్న కాంగ్రెస్ ప్రభుత్వం తనకి బాగా అబ్బిన విద్యనే మళ్ళీ మరో మారు లాఘవంగా ప్రదర్శించి ఊహించిన ఫలితాలు రాబట్టిందని చెప్పవచ్చును.   పెరిగిన కరెంటు చార్జీలపై ప్రతిపక్షాలన్నీ ఐకమత్యంగా ప్రభుత్వంపై చేస్తున్నపోరాటాన్నిఅలాగే దీర్ఘకాలం కొనసాగిస్తే ప్రజలలో అది మరింత ప్రభుత్వ వ్యతిరేఖత పెంచుతుందని గ్రహించిన కాంగ్రెస్ ప్రభుత్వం ప్రజల, మీడియా, మరియు ప్రతిపక్షాల దృష్టిని మళ్ళించగల అంశం కోసం ఎదురు చూస్తుంటే, సీబీఐ చార్జ్ షీటు నెత్తి మీద పిడుగులా పడింది. దానితో కాంగ్రెస్ పరిస్థితి పెనం మీద నుండి పొయ్యిలోకి దూకినట్లయింది. కిరణ్ కుమార్ ముఖ్యమంత్రిగా అధికారం చేప్పట్టిన నాటి నుండి ఒక సమస్య నుండి మరో సమస్యలోకి పయనిస్తున్నకాంగ్రెస్ ప్రభుత్వం, నెత్తిన పిడుగులా పడిన ఊహించని ఈ సమస్యకు మొదట దిగ్భ్రాంతి చెందినా, తరువాత మెల్లగా కోలుకొని తన కాంగ్రెస్ మార్క్ తెలివి తేటలు ప్రదర్శించింది.   ఈ ఆంశంలోనే డా.రాజశేఖర్ రెడ్డి, అతని కొడుకు జగన్ మోహన్ రెడ్డి అవినీతి భాగోతాలు కూడా ఇమిడి ఉండటంతో ఒక దెబ్బకు రెండు పిట్టలన్నట్లు వారిని విమర్శించడం ద్వారా ప్రతిపక్షాలన్నిటికీ పని కల్పించడమే కాకుండా, అందరి దృష్టిని మళ్లించగలిగింది. ఇప్పుడు అందరి దృష్టీ మంత్రి ఆనం రామి నారాయణ రెడ్డి చేసిన తీవ్రవిమర్శల మీద, దానికి వస్తున్న ప్రతిస్పందన మీద ఉంది తప్ప, దీనికి ప్రధాన కారణమయిన ‘సీబీఐ చార్జ్ షీటు-హోంమంత్రి సబితా ఇంద్రా రెడ్డిని పదవి నుండి తొలగించాలనే డిమాండ్’ మీద లేదిప్పుడు.   ఇదే విధంగా ఆమె విషయం మరికొంత కాలం నాన్చగలిగితే ఆ తరువాత ఆమెను కూడా ధర్మాన ప్రసాదరావులాగే వెనకేసుకు రావడం పెద్ద కష్టమేమి కాదని కాంగ్రెస్ ఆలోచన కావచ్చును. దీనిని బట్టి అర్ధం అవుతున్నది ఏమిటంటే కాంగ్రెస్ ప్రభుత్వం ప్రజల సమస్యలను సమర్ధవంతంగా పరిష్కరించలేదేమో కానీ, తన సమస్యలను మాత్రం ఈ విధంగా చాలా తెలివిగా చాకచక్యంగా పరిష్కరించుకోగలదని అర్ధం అవుతుంది.

ఉపఎన్నికలు లేనట్టే ..

ఢిల్లీలోని ఎపిభవన్ లో ఎస్సీ, ఎస్టీ ఉద్యోగుల సంఘం ఆధ్వర్యంలో ఆదివారం జరిగిన అంబేద్కర్ జయంతి కార్యక్రమంలో కేంద్ర ఎన్నికల సంఘం కమీషనర్ హెచ్.ఎస్.బ్రహ్మ, కేంద్రమంత్రి పసబాక లక్ష్మి పాల్గొన్నారు. ఈ సందర్భంగా బ్రహ్మ మాట్లాడుతూ ఆంధ్రప్రదేశ్ ప్రభుత్వంపై అవిశ్వాస తీర్మానంపై ఓటింగ్ సందర్భంగా పార్టీ విప్ ధిక్కరించిన ఎమ్మెల్యేల అనర్హతపై స్పీకర్ నిర్ణయం తీసుకోవాలని, స్పీకర్ నిర్ణయాధికారాలపై ఎన్నికల సంఘం జోక్యం చేసుకోలేదని, సాధారణంగా ఎమ్మెల్యేలపై అనర్హత వేటు వేసిన తరువాత ఆ సమాచారాన్ని ఎన్నికల సంఘానికి పంపుతారని, సార్వత్రిక ఎన్నికలకు ఏడాది గడువుండగా శాసనసభ స్థానాలకు ఖాళీ ఏర్పడితే ఉప ఎన్నికలు నిర్వహించేది లేదని స్పష్టం చేశారు. ఆంధ్రప్రదేశ్ రాష్ట్రంలో  2006 - 2011 మధ్యకాలంలో 76 ఉపఎన్నికలు వచ్చాయని, మొత్తం 294 స్థానాల్లో మూడోవంతు స్థానాలకు ఉపఎన్నికలు జరిగాయని, పదేపదే ఉపఎన్నికలు రాకుండా అడ్డుకునే అధికారాలు ఎన్నికల సంఘానికి లేవనీ, దీనికి సంబంధించి ఏదైనా చట్టం కేంద్రం రూపొందించాలని తెలిపారు.

100 మంది అభ్యర్థుల ఎంపికలో లోక్ సత్తా సమాలోచనలు

  2014 ఎన్నికలకు లోక్ సత్తా పార్టీ నుండి కనీసం 100 మంది అభ్యర్థులను నిలపాలని పార్టీ అధ్యక్షుడు డాక్టర్ జయప్రకాష్ నారాయణ్ కసరత్తు మొదలుపెట్టారు. ఈ కార్యక్రమంలో భాగంగా ఆదివారం హైదరాబాద్ లో రాష్ట్ర కౌన్సిల్ సమావేశం నిర్వహించింది. ఈ సమావేశంలో పార్టీ అధ్యక్షులు జయప్రకాష్ నారాయణ్, కటారి శ్రీనివాసరావు లు పాల్గొన్నారు. వీలైనంత త్వరలో 40,50 స్థానాలకు అభ్యర్థులకు గుర్తించాలని, ఈసారి కనీసం  వంద స్థానాల్లో పోటీ చేయాలని, ఎంపికైనవారు ఎన్నికలనాటికి పార్టీ అంచనాలను అందుకోలేకపోతే మార్పుచేర్పులు చేద్దామని, మహాత్మాగాంధీ, బాబా సాహెబ్ అంబేద్కర్ వంటి త్యాగానిరతులైన నేతలు ఇప్పుడూ ఉన్నారని నిరూపిద్దామని, పార్టీ లక్ష్యసాధనకు, దేశ నిర్మాణానికి ఈ ఏడాది విజయనామ సంవత్సరం కావాలని జయప్రకాష్ నారాయణ్ పిలుపునిచ్చారు. కటారి శ్రీనివాసరావు మాట్లాడుతూ అధ్యక్షుడు సూచించిన మేరకు లక్షమంది క్రియాశీల, పదిలక్షల సాధారణ సభ్యత్వాల లక్ష్యాన్ని రెట్టింపు చేయగాలామనే ఆశాభావాన్ని, చట్టసభల ఎన్నికల్లో భారీ ఫలితాల సాధనకు కృషి చేస్తామని, ప్రజాసమస్యల పరిష్కారం, పార్టీ బలోపేతం కోసం కృషి చేయాలని అన్నారు.