Home  
Politics
jagan mohan reddy

వైయస్సార్ కాంగ్రెస్ పార్టీ భవితవ్యం

  కొద్ది రోజుల క్రితం కాంగ్రెస్ రాజ్యసభ సభ్యుడు వీ.హెచ్.హనుమంతరావు, చంచల్ గూడా జైలుని తన పార్టీ కార్యాలయంలా మార్చేసుకొన్న జగన్ మోహన్ రెడ్డిని, ఇతర రాష్ట్రంలో జైలుకి తరలించాలని డిమాండ్ చేసినప్పుడు వైయస్సార్ కాంగ్రెస్ పార్టీ నేతలు చాలా తీవ్రంగా స్పందించారు. కాంగ్రెస్ పార్టీ తమ నేతను పార్టీకి దూరంచేసి ఎన్నికల ముందు తమ పార్టీని దెబ్బతీయాలనే ఈ విధమయిన కుట్రలు పన్నుతోందని వారు ఆరోపించారు. ఆ రెండు పార్టీ నేతల మద్య యుద్ధం సంగతి ఎలా ఉన్నపటికీ, కాంగ్రెస్ పార్టీలో అత్యంత సీనియర్ నాయకుడయిన ఆయన ఏదో కాకతాళీయంగా ఆవిదంగా డిమాండ్ చేయలేదని తెర వెనుక నడుస్తున్న కధ చూస్తే అర్ధం అవుతుంది.   జగన్ మోహన్ రెడ్డి అక్రమ ఆర్ధిక లావాదేవీలపై సీబీఐకి సమాంతరంగా దర్యాప్తు చేస్తున్న ఈ.డీ. అధికారులు జగన్ మోహన్ రెడ్డిని కొన్ని నెలల క్రితమే చంచల్ గూడా జైలులో విచారించారు. కానీ ఆయన వారికి సహకరించకపోవడంతో, ఆయనని విచారించేందుకు తమకి అనువుగా ఉండే తీహార్ జైలుకి బదిలీ చేయాలని కోరుతూ వారు తమపై అధికారులకు ఏప్రిల్ నెలలో ఒక లేఖ వ్రాశారు. దానికి వారి నుండి ఇంకా జవాబు రాలేదు. ఈనెలాకరులోగా కానీ లేదా వచ్చే నెల రెండవ వారంలోగా గానీ తమకి అనుమతి దొరకవచ్చునని వారు భావిస్తున్నారు.   అదే జరిగితే జగన్ మోహన్ రెడ్డిని వచ్చేనెలలో తీహార్ జైలుకి తరలించే అవకాశాలున్నాయి. ఈలోగా ఈ.డీ. అధికారులు విదేశాలలో వివిధ బ్యాంకులు, సంస్థల నుండి జగన్ మోహన్ రెడ్డి స్థాపించిన వివిధ కంపెనీలలోకి వచ్చిపడిన ‘నిధుల వరదల’ వివరాలు సేకరిస్తున్నారు. ఒకవేళ, జగన్ మోహన్ రెడ్డి సీబీఐ కేసుల్లోంచి బెయిలుపై బయటపడితే, ఆయనని విదేశాల నుండి చట్టవిరుద్ధంగా పెట్టుబడులు రప్పించుకొన్న కేసులలో బిగించేందుకు ఈ.డీ. అధికారులు రంగం సిద్దం చేసుకొంటున్నారు. ఇప్పటికే, వారు జగన్ మోహన్ రెడ్డి మరియు అతనికి సంబంధించిన వివిధ కంపెనీలకు చెందిన రూ.122కోట్ల విలువయిన ఆస్తులను జప్తు చేసారు.   ఇక, తమ నాయకుడు జగన్ మోహన్ రెడ్డికి ఈసారి తప్పకుండా బెయిలు మీద విడుదల అవుతాడని గంపెడు ఆశలు పెట్టుకొన్న ఆ పార్టీనేతలు సుప్రీంకోర్టు తీర్పుతో తీవ్ర నిరాశ నిస్పృహలకి లోనయ్యారు. పైగా సుప్రీంకోర్టు ఆయనకి బెయిలు నిరాకరిస్తూ దేశంలో పెరిగిపోతున్న ఆర్ధిక నేరాల గురించి వ్యక్తం చేసిన అభిప్రాయలు వారిని మరింత కలవరపరిచాయి. కానీ, మరో నాలుగు నెలల తరువాత అయినా బెయిలు దొరికే అవకాశం ఉందని భావిస్తున్న వారందరికీ, రేపు ఈ.డీ.అధికారులు జగన్ మోహన్ రెడ్డిని తీహార్ జైలుకి తరలించి కొత్త కేసులు మొదలుపెడితే ఇక వారి పరిస్థితి అగమ్యగోచరంగా మారుతుంది.   సీబీఐ నుండి సుప్రీంకోర్టు వరకు అన్ని స్థాయిలలో ఆయన న్యాయ వాదులు చేస్తున్న న్యాయ పోరాటం సత్ఫలితాలు ఇవ్వకపోగా, ఆయనపట్ల కోర్టులకున్న అభిప్రాయలు వివిద రూపాలలో నిత్యం ప్రకటితమవుతునే ఉన్నాయి. అయినప్పటికీ, కోర్టులను తప్పుపట్టలేని వైయస్సార్ కాంగ్రెస్ నేతలు, ఆయా తీర్పులలోంచి తమకు అనుకూలమయిన అంశాలున్నాయంటూ తమను తాము మభ్యపెట్టుకొంటూ, "త్వరలోనే జగన్ మోహన్ రెడ్డి బయటకి వస్తాడు! రాజన్న రాజ్యం తెస్తాడు! అంటూ ప్రజలను కూడా మభ్యపెడుతున్నారు.   తమ నాయకుడు జైలు నుండి విడుదల కావాలంటే ఏమిచేయాలో కొందరు కాంగ్రెస్ నేతలే స్పష్టంగా చెపుతున్నారు. వారి సూచనలు పాటించి ఆయన తప్పనిసరిగా కాంగ్రెస్ పార్టీకి లొంగిపోయి, తన పార్టీని కాంగ్రెస్ లో విలీనం చేయక తప్పదు.   అయితే, ఈ మద్యనే ఆయనను జైల్లో కలిసి వచ్చిన దాడి వీరభద్ర రావు మాటల ప్రకారం ఆయన ఎన్నటికీ కాంగ్రెస్ పార్టీకి లొంగబోడని అర్ధం అవుతోంది. “ఇంత కాలం జైల్లో పెట్టి తనను వేధించిన కాంగ్రెస్ పార్టీ ఇంత కంటే ఏమి చేయలేదు గనుక ఆ పార్టీతో చేతులు కలిపే ఆలోచన లేదని ఆయన స్పష్టం చేసినట్లు దాడి మాటల ద్వారా అర్ధం అవుతోంది.   దీనిని బట్టి అర్ధం అవుతున్నదేమిటంటే ఇటు జగన్ మోహన్ రెడ్డి కానీ, అటు కాంగ్రెస్ గానీ రెండూ వెనక్కి తగ్గే ఆలోచనలో లేవు గనుక, కాంగ్రెస్ పార్టీ తన చేతిలో ఉన్న ‘చిలకలకు’ జగన్ మోహన్ రెడ్డి కేసుల విషయంలో తగిన కార్యాచరణ నిర్దేశించవచ్చును. అప్పుడు ఆయన మరిన్నినెలలు లేదా ఏళ్ళు జైలుకే అంకిత మయిపోవలసి రావచ్చును. ఇది ఆయన పార్టీపై తీవ్ర ప్రభావం చూపడమే కాకుండా రాష్ట్రంలో రాజకీయ సమీకరణలు కూడా మార్చే అవకాశం ఉంది.   కానీ, ఇంతవరకు ఆయన ధృడంగానే మాట్లడుతున్నపటికీ తనను చంచల్ గూడా జైలు నుండి డిల్లీకి తరలించేందుకు నిశ్చయమయితే, అప్పుడు ఆయన విధిలేని పరిస్థితుల్లో కాంగ్రెస్ పార్టీతో రాజీచేసుకోవచ్చును. ఎందుకంటే కాంగ్రెస్ పార్టీతో పంతానికి పోయి తన వ్యక్తిగత, రాజకీయ జీవితాన్నిచేజేతులా నాశనం చేసుకొనే కంటే ఆ పార్టీతో రాజీపడి, ఈ కేసుల నుండి బయటపడి ప్రభుత్వంలో చేరగలిగితే, క్రమంగా కాంగ్రెస్ పార్టీనే ఆయన తన చెప్పుచేతలలోకి తెచ్చుకోవచ్చును. బహుశః త్వరలోనే ఈ చిక్కు ముడులన్నీ విడిపోయి, వైయస్సార్ కాంగ్రెస్ పార్టీ భవితవ్యం తేలిపోవచ్చును.

Tension over EAMCET

యమ్ సెట్ ... యమ టెన్షన్

        May 10 శుక్రవారం హైదరాబాద్ లో ఎంసెట్ ఎగ్జామ్ రాయవలసిన విద్యార్థులు, వారి తల్లిదండ్రులు నరకాన్ని చవిచూశారు. కారణం, ఎలాంటి ట్రాఫిక్ నిబంధనలు, ట్రాఫిక్ పరంగా ఎలాంటి ముందు జాగ్రత్త చర్యలు పాటించకపోవటం ట్రాఫిక్ కమీషనర్ C.V. ఆనంద్ బాధ్యతారాహిత్యం తేటతెల్లమవుతుంది. నగరంలో ఎలాంటి మతసంబంధిత ఊరేగింపులు జరిగినా, ఎలాంటి రాజకీయ బహిరంగసభలు జరిగినా ట్రాఫిక్ డైవర్షన్ పెట్టి ప్రజలను తీవ్ర ఇబ్బందులకు గురిచేసే ఈ పోలీస్ యాజమాన్యం, పరీక్షకు హాజరయ్యే విద్యార్థులకు ట్రాఫిక్ నుండి వెసులుబాటు కల్పించక పోవటం కడు శోచనీయం. ఎంసెట్ ఎగ్జామ్ అంటే ఒక్క విద్యార్థికి రెండు సంవత్సరాలు లేదా మూడు సంవత్సరాల శ్రమ. పరీక్షహాలుకు ఒక్క నిమిషం లేటుగా వచ్చినా అనుమతించం అనే నిబంధన పెట్టిన ఈ అధికారులు అది వర్కింగ్ డే రోజు (శుక్రవారం) పెట్టకూడదు అనే ఇంగితజ్ఞానాన్ని మరిచారా? సెలవుదినాల్లో పెడితే కొంతవరకు ఈ ట్రాఫిక్ ఇబ్బందులు తప్పేవి. గతంకి ఎంసెట్ ఎలాంటి క్రేజ్ లేని రోజుల్లో పనిదినాల్లో ఈ ఎగ్జామ్ నిర్వహించేవారు కాని ఈనాటి పరిస్థితి అది కాదు. ఎంసెట్ ఎగ్జామ్ కి ఈనాడు attend అవుతున్నవారు  లక్షల్లో ఉన్నారు. మరి అలాంటప్పుడు ఈ ఎగ్జామ్ నిర్వహించ వలసినది సెలవు రోజున కదా! (ఆదివారం) హైదరాబాద్ లో ట్రాఫిక్ కంట్రోల్ అనేది రోజు రోజుకీ దిగజారి పోతోంది. దీనికి కారణం అధికారుల వైఫల్యం. ప్రజల యొక్క అలసత్వం. ఒక సెలబ్రిటి ఇంట్లో పెళ్ళి జరిగితే దానికి వందలమందితో పోలీస్ సెక్యూరిటీ. ఒక సినిమా ఆడియో ఫంక్షన్ జరిగితే దానికి విపరీతమైన పోలీస్ బందోబస్త్. కాని కష్టపడి చదివి పరీక్ష రాసే విద్యార్థికి మాత్రం ఎలాంటి సౌకర్యం పోలీస్ వ్యవస్థనుండి ఉండదు. నిన్న హైదరాబాద్ లో జరిగిన ఎంసెట్ ఉదంతాన్ని చూస్తే ఎంతో మంది విద్యార్థుల ఆశలు ఆవిర్లు అయిపోయాయి . ఇప్పటికే చాలామంది విద్యార్థులు ఇంటర్లో మార్కులు సరిగా రాలేదని ఆత్మహత్యలకు పాల్పడిన సందర్భాలు అనేకం. కాని ఎంసెట్ అంటే చాలామందికి రెండు, మూడేళ్ళ శ్రమ. ఇలా వారి భవితవ్యాన్ని మార్చేసే హక్కు ఎవరిచ్చారు. ఒక్క నిమిషం ఆలస్యంగా వచ్చినా, హాల్ టికెట్ పై ఫోటో లేకపోయినా నిర్థాక్షిణ్యంగా పరీక్షకు అనుమతించని నిబంధనలు విధిస్తూ విద్యార్థులను శాసిస్తున్న సదరు యాజమాన్యం, ఈ ట్రాఫిక్ పట్ల కూడా దృష్టి సారించాల్సిన అవసరం లేదా? అంటే వీరి ప్రతాపం అంతా అమాయకులైన ప్రజలు, విద్యార్థుల పైనేనా? ఒక హనుమాన్ జయంతి శోభాయాత్ర,, ఒక శ్రీరామనవమి శోభాయాత్ర,, ఒక మినాదున్నబి ఇలాంటి వాటికి కల్పించే ట్రాఫిక్ బదలాయింపులు లక్షలాది మంది విద్యార్థుల విషయంలో కల్పించక పోవటం ఎంతవరకు సమంజసం. కూకట్ పల్లిలో ఉండే విద్యార్థికి పాతబస్తీలో ఎగ్జామ్ సెంటర్ కేటాయించడం అంటే, అసలు విద్యాశాఖ ఏ విధంగా పనిచేస్తోంది? ట్రాఫిక్ పట్ల చర్యలు అంటే! C.V. ఆనంద్ దృష్టిలో ఏమిటి? తాగి కారునడిపే సెలబ్రిటీలను పట్టుకొని పేపర్లో ఫోటోలు వేయించుకోవటమా! నగరంలో ఎలాంటి సందర్భాన్ని ఎదుర్కోవలన్నా ముందుగా ట్రాఫిక్ పరంగా భయానక వాతావరణాన్ని చవిచూడాలా ప్రజలు? మనమేమీ రాతియుగంలో లేము, మాటకి ముందు హైదరాబాద్ ను మెట్రోపాలిటన్ సిటీగా పేర్కొంటూ, నగరజీవికి ట్రాఫిక్ పరంగా నిత్యం నరకాన్ని చూపిస్తుంటే, దీనికి బాధ్యులెవరు? బాధ్యులైన ట్రాఫిక్ సిబ్బంది ప్రభుత్వం రెండేళ్ళ శ్రమను బూడిదలో పోసిన చందంగా చేసేసి, నిస్సహాయంగా చూస్తున్న విద్యార్థులకు ఏం సమాధానం చెప్తారు? రాష్ట్ర రాజధాని నడిబొడ్డులో ట్రాఫిక్ పరంగా ప్రజలు ఇన్ని ఇక్కట్లు పడుతూ సదరు సిబ్బందిని ఎందుకు నిలదీయరు? ఈ పోలీస్ వ్యవస్థ, న్యాయవ్యవస్థ, ట్రాఫిక్ డిపార్ట్ మెంట్ ఇవన్నీ ఉన్నది కేవలం V.I.P.లకు రక్షణ కల్పించటానికేనా? ఇన్ని అవస్థలు పడతారే కానీ ప్రజలు ఎలాంటి వ్యతిరేకతను చూపించరా? ఎవరి ఇష్టం వచ్చినట్లు వారు ట్రాఫిక్ నిబంధన ఉల్లంఘనలు చేస్తూ పట్టుబడితే 100/- నుండి 1,000/- వరకు లంచం ఇచ్చి దర్జాగా వెళ్ళిపోవటం. మరి ఇక్కడ బాధ్యతారాహిత్యం ఎవరిది? ప్రజలది కాదా? ఇంతటి బాధత్యారాహిత్యంగా ఉండేవారు ప్రశ్నించే హక్కును ఎలా వినియోగించుకుంటారు? ఎన్నో ఆశలతో ఈ ఎంసెట్ ఎగ్జామ్ ద్వారా తమ భవిష్యత్తుకు బాటలు వేసుకుందాం అనుకున్న విద్యార్థులను నిండా ముంచేసిన ఈ ట్రాఫిక్ కమీషనర్ C.V. ఆనంద్ ప్రజలకు సమాధానం చెప్పాలి. ఈ వైఫల్యం కారణంగా విద్యార్థులు ఎంసెట్ సెంటర్ నుండి వెనుదిరిగిన వారు అనుచిత నిర్ణయం ఏదైనా తీసుకుంటే C.V. ఆనంద్ సమాధానం ఏమిటి? ఏ డిపార్ట్ మెంట్ వారైనా సరే విధి నిర్వహణలో వైఫల్యం చెందితే వారికి విధించాల్సిన సరైన శిక్ష ఏమిటి? నిన్న కేవలం ట్రాఫిక్ కమీషనర్ C.V. ఆనంద్ బాధ్యతారాహిత్యం మరియు విధి నిర్లక్ష్యం మరియు ట్రాఫిక్ పట్ల ఎంసెట్ కు వచ్చే విద్యార్థుల సంఖ్య పట్ల అవగాహనలేమి కారణం ఫలితంగా అనేకమంది విద్యార్థులు నిస్సహాయులైపోయారు. దీనికి ఎవరు సమాధానం చెప్తారు?   చివరిగా చెప్పేది ఒక్కటే ప్రభుత్వం యొక్క ప్రతి వైఫల్యంలోను ప్రభుత్వం బాధ్యత ఎంత ఉంటుందో ప్రజల వైఫల్యం కూడా అంతే ఉంటుంది. అందుకే నిరాసక్తత, నిస్తేజం నిండిన ప్రజలారా మేల్కొనండి! మేల్కొని మీ పిల్లల భవిష్యత్తుకై గళమెత్తండి! C.V.ఆనంద్ గారికి … విద్యార్థుల తల్లిదండ్రుల అందరి తరుపున మా ఈ ప్రశ్నల పరంపరని పంపుతున్నాం. ఆయన సమాధానం ఏంటో చూద్దాం. అసలు సమాధానం వస్తుందో లేదో కూడా చూద్దాం.

Senior TDP leader Kadiyam Srihari quits party

కడియం టీఆర్ఎస్ కోవర్టు

        కడియం శ్రీహరి ఓ కోవర్టు ఇన్ని రోజులు తెలుగుదేశం పార్టీలో ఉన్న ఆయన టీఆర్ఎస్ కు కోవర్టులా పని చేశాడు. ఆయన పార్టీని వీడడం మూలంగా పార్టీకి వచ్చిన నష్టం ఏమీలేదని టీడీపీ ఎమ్మెల్యే మోత్కుపల్లి నర్సింహులు తీవ్రంగా విమర్శించారు. రాజకీయ ప్రయోజనం కోసమే కడియం శ్రీహరి పార్టీని వీడుతున్నారని ఆయన అన్నారు. పక్కా తెలంగాణవాదిని అని చెప్పుకునే కడియం శ్రీహరి తెలుగుదేశం పార్టీ తెలంగాణపై అఖిలపక్షానికి ఇచ్చిన లేఖలో ఏమీ లేకపోతే అఖిలపక్ష సమావేశానికి ఎందుకు వెళ్లారని ప్రశ్నించారు. ఇదిలా ఉంటే మోత్కుపల్లి నర్సింహులుతో ఏర్పడిన వివాదం కారణంగానే కడియం శ్రీహరి తీవ్ర మనస్తాపానికి గురయ్యారు. అప్పటి నుంచే ఆయన తెలుగుదేశం పార్టీని వీడుతారనే ప్రచారం సాగుతోంది. ఇక శ్రీహరి రాజీనామా మీద పార్టీ నేత ఇనుగాల పెద్దిరెడ్డి మాట్లాడుతూ కేసీఆర్ తెలంగాణకు అడ్డు అని ఇన్నాళ్లు చెప్పిన శ్రీహరి ఇప్పుడు ఆయన వద్దనే చేరి ప్రజలకు ఏం సమాధానం చెబుతారని ప్రశ్నించారు. కేసీఆర్ ఉచ్చులో పడొద్దని, పార్టీకి రాజీనామా విషయంలో పునరాలోచించుకోవాలని కోరారు.

c.ramachandrayya

ఏకుగా వచ్చి మేకయిన రామచంద్రయ్య

దేవాదాయశాఖ మంత్రి సి. రామచంద్రయ్య, ప్రజారాజ్యం పార్టీకి దగ్గరుండి తాళాలు వేయించిన తరువాత, ఆ పార్టీని కాంగ్రెస్ సముద్రంలో కలిపేసే వరకు చిరంజీవి వెనుక నిలబడి చక్రం తిప్పారు. ఆ తరువాత ఆయన చిరంజీవి చేయిపట్టుకొని కాంగ్రెస్ పార్టీలో అడుగుపెట్టి ఆయనకి కేంద్ర మంత్రి పదవి, తనకి దేవాదాయశాఖ మంత్రి పదవి కూడా ఇప్పించుకొని వారు కలలు కన్న సామాజిక న్యాయం సాకారం చేసుకోగలిగారు.   తనకు మంత్రి పదవి దక్కితే అదే పదివేలనుకొన్న రామచంద్రయ్య మొదట్లో నిజంగా రాముడు మంచి బాలుడు లాగే వ్యవహరించేవారు. కానీ, కాంగ్రెస్ పార్టీలో పైకి రావాలంటే సోనియా, రాహుల్, అంటూ భజన చేయడమో లేక కొంచెం నోరు పెట్టుకొని బ్రతకడమో తప్పనిసరి అనే విషయాన్ని కనిపెట్టిన ఆయన, వీ.హనుమంత రావు వంటి వారు సోనియా, రాహుల్, అంటూ భజన ఎంత కాలం భజన చేసినా వారి పరిస్థితి ఎక్కడవేసిన గొంగళి అక్కడే ఉన్నట్లుందని గ్రహించి, ఆయన రెండో మార్గం ఎన్నుకొన్నారు. ముఖ్యమంత్రి కిరణ్ కుమార్ రెడ్డిని ఆయన ప్రభుత్వాన్ని విమర్శించడమే ప్రధాన ఎజెండాగా ముందుకు సాగిపోతున్న రామచంద్రయ్య పనిలోపనిగా తమ అమాయకజీవిని కూడా తెగ పొగిడేస్తూ, అతని ముందు కిరణ్ కుమార్ ఎందుకు పనికిరాడని మీడియాని పిలిచి మరీ చాటింపు వేస్తుంటాడు. రాబోయే ఎన్నికలలో ఆ తరువాత కూడా చిరంజీవే ప్రధాన పాత్ర పోషించబోతున్నాడని ఇటీవలే జోస్యం కూడా చెప్పారు.   ఇక, నిన్న ముఖ్యమంత్రి కిరణ్ కుమార్ రెడ్డి శ్రీశైలంలో ఒక కార్యక్రమానికి హాజరవుతున్నారని తెలిసినప్పటికీ, ఆలయ అధికారులు ప్రోటోకాల్ పాటించకుండా దేవాదాయ శాఖా మంత్రి అయిన తనను ముందుగా ఆహ్వానించలేదంటూ ముఖ్యమంత్రి కార్యక్రమానికి వెళ్ళకుండా ఇంట్లో కూర్చొన్నారు. ఆయన ఈవిధంగా తనతో ఏదో వంకతో కయ్యానికి కాలు దువ్వుతుండటంతో ముఖ్యమంత్రి కూడా చాల అసహనం వ్యక్తం చేస్తున్నారు. చిరంజీవి తనతో మరీ సఖ్యతగా ఉండనప్పటికీ కనీస మర్యాదలు పాటిస్తాడు గనుక కిరణ్ కుమార్ రెడ్డికి ఆయనతో ఎటువంటి సమస్యలు లేవు. అయితే ఆయన అనుచరుడయిన రామచంద్రయ్య మాత్రం చిరంజీవి కంటే ఎక్కువగా రెచ్చిపోవడం చూసిన ముఖ్యమంత్రి కిరణ్ కుమార్ రెడ్డి, ఈసారి డిల్లీవెళ్ళినప్పుడు ఆయన పదవికి కత్తెర వేయాలని నిశ్చయించుకొన్నారు.   అయితే, రామచంద్రయ్యని కత్తిరించే ముందు తనకి పోటీగా తయారవుతున్న చిరంజీవిని కత్తిరించాలని భావించినందువల్లనేమో, కిరణ్ కుమార్ రెడ్డి కూడా పావులు కదిపారు. చిరంజీవికి చెందిన ఒక ఇంటి స్థలం పైలును, బ్లడ్ బ్లాంక్ స్థలం ఫైలును సిఐడి అదికారులు మొన్ననే స్వాదీనం చేసుకొన్నారు. గతంలో ఆయన తన ఇంటి పక్కన ఉన్న 900 గజాల స్థలాన్ని, అలాగే బ్లడ్ బ్యాంక్ స్థలం పక్కన గల రెండువందల గజాల స్థలాన్ని కూడా ఆక్రమించారని విజిలెన్స్ విభాగం వారు చాలా ఏళ్ల క్రితమే ప్రభుత్వానికి ఒక నివేదికను కూడా ఇచ్చారు. అయితే, ఇంత కాలం ఆ విషయం పట్టించుకోని కిరణ్ కుమార్ రెడ్డి ప్రభుత్వం, ఇప్పుడు హట్టాతుగా ఆ ఫైల్స్ అన్ని సిఐడి చేత వెలికిదీయించారు.   చిరంజీవి ఆక్రమించుకొన్న ఆ రెండు స్థలాలను తరువాత కాలంలో తన పేరిట రిజిస్టర్ కూడా చేయించుకొన్నట్లు సమాచారం. ఆయన అవినీతి భాగోతం ఈవిధంగా మీడియాకి లీక్ చేసి తన తడాఖా చూపించాలని ముఖ్యమంత్రి కిరణ్ కుమార్ రెడ్డి ప్రయత్నించినట్లున్నారు. ఒకవేళ రామచంద్రయ్య తనను ఇబ్బందిపెడితే ఇటువంటి అస్త్రాలు ప్రయోగించడానికి కూడా వెనుకాడనని కిరణ్ కుమార్ రెడ్డి స్పష్టంగా తెలియజేసారు.

kadiyam sri hari tdp

టీడీపీకి కడియం రాజీనామా

        టిడిపి సినీయర్ నేత కడియం శ్రీహరి చంద్రబాబు నాయుడుకి షాకిచ్చారు. తెలంగాణ గురించి పట్టుబట్టి..తెలంగాణ తెలుగుదేశం ఫోరం ఎలాంటి ఉద్యమం చేపట్టడం లేదని, కేవలం కేసీఆర్ తిట్టడానికే పరిమితమయిందని ఆగ్రహించిన కడియం శ్రీహరి ఈ రోజు టిడిపికి రాజీనామా చేశారు. పార్టీలో తనకు వ్యతిరేకంగా పావులు కదులుతున్నాయని అనుమానిస్తున్న కడియం శ్రీహరి విశాఖపట్నంలో జరిగిన చంద్రబాబు పాదయాత్ర ముగింపు సభకు దూరంగా ఉన్నారు. దీంతో ఆయన పార్టీ వీడుతున్నారని వార్తలు వచ్చాయి. ఆ తరువాత హైదరాబాద్ లో చంద్రబాబు ను కలిసి అవన్నీ వదంతులు అని తేల్చేశారు. కాని స్టేషన్ ఘన్ పూర్ నియోజకవర్గంలోని తన అనుచరులతో ఆయన మండలాలవారీగా సమావేశం అయిన తరువాత టీడీపీకి గుడ్ బాయ్ చెప్పారు. ఈ నేపధ్యంలో కడియం ఎ పార్టీలో చేరుతారన్న దానిపై ఆసక్తి నెలకొంది.

chiranjeevi kiran kumar reddy

చిరంజీవి పై సీఐడీ అస్త్రం!

      కేంద్ర పర్యాటక శాఖమంత్రి చిరంజీవికి సీఎం కిరణ్ ఝలక్ ఇచ్చారు. చిరంజీవే లక్ష్యంగా సీఐడీ అధికారులు జూబ్లీహిల్స్ హౌసింగ్ సొసైటీ కార్యాలయంపై దాడిచేసి పలు రికార్డులను స్వాధీనం చేసుకున్నారు. జూబ్లీహిల్స్ హౌసింగ్ సొసైటీ ప్లాట్ల కేటాయింపులో పలు అక్రమాలు జరిగాయని చాలా కాలం కిందటే ఆరోపణలొచ్చాయి. కొన్ని ప్లాట్లను అనర్హులకు కేటాయించారని, పార్కింగ్ స్థలాలను కూడా ప్లాట్లుగా మార్చేశారని అప్పట్లో అన్నారు.   ప్రస్తుత డీజీపీ దినేష్‌రెడ్డి విజిలెన్స్ ఎన్‌ఫోర్స్‌మెంట్ డైరెక్టర్ జనరల్‌గా ఉన్న కాలంలోనే ఈ వ్యవహారాలన్నింటిపై విచారణ జరిపి ప్రభుత్వానికి నివేదిక ఇచ్చారు. అప్పటి నుంచి అది ప్రభుత్వం వద్ద పెండింగ్‌లో ఉంది. ఉన్నట్లుండి సీఐడీ అధికారులు జూబ్లీహిల్స్ హౌసింగ్ సొసైటీ కార్యాలయంలో సోదాలు చేశారు. ఎప్పుడో ఏళ్ల క్రితంనాటి వ్యవహారాల్లో సీఐడీ ఇప్పుడు ఎందుకు హడావుడి చేసిందనే అనుమానాలు వ్యక్తమవుతున్నాయి. కేంద్ర పర్యాటకశాఖ మంత్రి చిరంజీవికి జూబ్లీహిల్స్ హౌసింగ్ సొసైటీ పరిధిలోనే సొంత ఇల్లు, బ్లడ్‌బ్యాంకు ఉన్నాయి. చిరంజీవి ఇంటివద్ద కొంత భూమిని ఆయన కబ్జా చేసి ఉపయోగించుకుంటున్నారన్న ఆరోపణలున్నాయి. సొసైటీ కార్యాలయంపై దాడిచేసిన అధికారులు ఆ ఫైలునే ప్రధానంగా టార్గెట్ చేసినట్టు సమాచారం. సీఎం కిరణ్ కు వ్యతిరేకంగా పనిచేస్తున్న చిరంజీవి వర్గాన్ని ఇబ్బంది పెట్టాలనే ఈ చర్యలకు పాల్పడి ఉంటారని పుకార్లు వినిపిస్తున్నాయి.  

law minister

న్యాయశాఖా మంత్రి అశ్వినీ కుమార్ రాజీనామా

  రైల్వే శాఖ మంత్రి పవన్ కుమార్ బన్సాల్ రాజీనామా సమర్పించిన కొన్ని గంటలలోనే న్యాయ శాఖా మంత్రి అశ్వినీ కుమార్ కూడా రాజీనామా చేయడంతో ఈ సారి ప్రజలలే కాకుండా మీడియా కూడా ఆశ్చర్య పోకతప్పలేదు. రేపు ఆదివారం నాడు కాంగ్రెస్ పెద్దలు మరో మారు సమావేశం అయిన తరువాత ఆయన చేత కూడా రాజీనామా చేయించవచ్చునని అందరు భావిస్తున్న సమయంలో హత్తాతుగా ఆయన కూడా తన రాజీనామా పత్రాన్ని ప్రధానికి అందజేయడంతో అందరూ ఆశ్చర్యపోయారు.   కర్ణాటక ఎన్నికలలో బీజేపీ అవినీతిని కడిగి పారేసిన తరువాత, ఇప్పుడు తన పెరట్లోనే అవినీతి మర్రి చెట్టులా శాఖోపశాఖలుగా విస్తరించి తన ఉనికికే ప్రమాదం తెచ్చిపెట్టడంతో కాంగ్రెస్ పార్టీ తప్పనిసరి పరిస్థితుల్లో న్యాయశాఖా మంత్రికి కూడా ఉద్వాసన పలకాలని నిశ్చయించుకొన్నాకనే ఆయన రాజీనామా చేసారు.   ఇప్పుడు కాంగ్రెస్ పార్టీకి తాము అవినీతిని సహించమని డప్పుకొట్టుకొనే అవకాశం పొందడమే కాకుండా ఎన్నాళ్ళుగానో చేప్పట్టాలనుకొంటున్న మంత్రివర్గ విస్తరణ లేదా మార్పులు చేర్పులు కూడా జరుపవచ్చునని ఆలోచన. దీనివల్ల మరో ప్రయోజనం ఏమిటంటే, పార్టీలో అసంతృప్తి నేతలకు కూడా ఏవో ఒక పదవులు కల్పించగలిగితే ఎన్నికల ముందు పార్టీలో ఐకమత్యం సాదించవచ్చును.   అయితే కాంగ్రెస్ పార్టీ ఒత్తిళ్ళకి లొంగి ఇద్దరు మంత్రులను తప్పించినంత మాత్రాన్నఅదేమి నిష్కళంక పార్టీ అయిపోదని అందరికీ తెలుసు. ఇద్దరు మంత్రులు రాజీనామా చేయవలసి వచ్చిందంటే దానర్ధం వారిద్దరూ తమ అవినీతిని సమర్ధంగా దాచుకోలేకపోయారని అర్ధం. అంతే తప్ప మిగిలిన మంత్రులందరూ పరిశుద్దాత్మలని చెప్పలేము. దొరికితే దొంగలు లేకుంటే ఎర్రబుగ్గ కార్లలో తిరిగే దొరలు.

railway minister

రైల్వే మంత్రి బన్సాల్ రాజీనామా

  రైల్వే మంత్రి పవన్ కుమార్ బన్సాల్, తన మేనల్లుడు విజయ్ సింగ్లీ రూ.90లక్షలు లంచం తీసుకొంటూ పట్టుబడటంతో, తప్పని పరిస్థితుల్లో ఈ రోజు తన పదవికి రాజీనామా చేసారు. నిన్న కాంగ్రెస్ అధ్యక్షురాలు సోనియా గాంధీ మరియు ప్రధాని మన్మోహన్ సింగ్ సమావేశం అయిన తరువాత ఆయనను పదవి నుండి తొలగించాలని నిర్ణయం జరగడంతో ఈ రోజు ఆయన తన రాజీనామా పత్రాన్ని ప్రదానికి సమర్పించారు.   ఇక, ఒకవైపు మంత్రుల రాజినామాలకై ప్రతిపక్షాల ఒత్తిడి, మరో వైపు సుప్రీంకోర్టులో చివాట్లు, ఇంకోపక్క తరుముకొస్తున్న ఎన్నికలు అన్ని కలిసి మొత్తం మీద కాంగ్రెస్ పార్టీపై ఒత్తిడి పెంచి చివరికి  రైల్వే మంత్రి రాజీనామాకు దారితీసింది. ఇక మరో బలమయిన కారణం ఏమిటంటే, సుప్రీంకోర్టు చేత చివాట్లు తిన్న తరువాత, అటు సీబీఐలోను, ఇటు ప్రభుత్వంలోను కూడా కొంచెం చలనం వచ్చిందని చెప్పవచ్చును. ఆ కారణంచేతనే సీబీఐ నేరుగా రైల్వేశాఖా మంత్రి కార్యాలయ అధికారులను ప్రశ్నించడానికి దైర్యంగా తన వద్దకు రప్పించుకోంగలిగింది. బహుశః ఆ కారణంగానే ప్రభుత్వం కూడా సీబీఐకి అడ్డు చెప్పలేకపోయింది.   సీబీఐ ఎప్పుడయితే తన అధికారులను ప్రశ్నించడానికి పిలిపించుకొందో, అప్పుడే బన్సాల్ మంత్రిగారికి కూడా జ్ఞానోదయం అయింది. సీబీఐ తీగలాగడం మొదలు పెట్టింది కనక డొంకంతా కదలక తప్పదని ఆయన ముందుగానే అందులోంచి బయటపడాలని రాజీనామా చేసారు. అయితే ఆ డొంకలో తీగలు ఈ రోజు కాకపోతే రేపయినా ఆయన కాళ్ళకు చుట్టుకోకమానావు. రైల్వే బోర్డులో సభ్యుడిగా నియమానికి రూ.10కోట్లు లంచం ఇవ్వబడుతోందంటే, దానిని బట్టి రైల్వే శాఖలో అవినీతి ఏస్థాయిలో వేళ్ళూనుకొని ఉందో అర్ధం అవుతోంది.  

siddaramaiah

కర్ణాటక ముఖ్యమంత్రిగా సిద్దరామయ్య పేరు ఖరారు

  కర్ణాటక ముఖ్యమంత్రిగా సిద్దరామయ్య పేరు ఖరారయింది. కొత్తగా ఎన్నికయిన 121 కాంగ్రెస్ శాసన సభ్యులలో 102మంది ఆయనకు మద్దతు పలకడంతో ఆయన పేరు ఖరారు అయింది. బెంగళూరులో కంటీరవ స్టేడియంలో సోమవారం ఉదయం 11.15 గంటలకి ఆయనతో బాటు 15మంది మంత్రులు కూడా పదవీ ప్రమాణం చేస్తారు. సిద్దరామయ్య ఆగస్ట్ 12, 1948వ సం.లో మైసూరులో గల సిద్దరామ హుండీ అనే గ్రామంలో జన్మించారు. 1978లో రాజకీయాలలోకి ప్రవేశించిన ఆయన మొట్ట మొదటిసారిగా 1983లో బీయల్.డీ. అనే పార్టీ తరపున పోటీ చేసి శాసనసభ్యుడిగా ఎన్నికయ్యారు. ఆ తరువాత జనత పార్టీలో చేరి మళ్ళీ జనతాదళ్(యస్) లో చేరి కొద్ది కాలం దేవగౌడ మంత్రివర్గంలో మంత్రిగా కూడా పని చేసారు.2006లో కాంగ్రెస్ పార్టీలో చేరి అప్పటి నుండి పార్టీలో అంచెలంచెలుగా ఎదుగుతూ నేడు రాష్ట్రానికి ముఖ్యమంత్రి పదవి చేపడుతున్నారు.

ysrcp

కష్టకాలంలో వైయస్సార్ కాంగ్రెస్

  జగన్ మోహన్ రెడ్డి ఈసారి ఎలాగయినా బెయిలు మీద బయటకి వస్తాడని చాలా ఆశగా ఎదురుచూసిన అతని కుటుంబం మరియు పార్టీ నేతలు తీవ్ర నిరాశకు లోనయ్యారు. వారు పైకి ఎంత మేకపోతు గాంభీర్యం ప్రదర్శిస్తున్నపటికీ, ప్రస్తుతం పార్టీలో ఉన్న అల్లకల్లోల పరిస్థితులను చూసి వారు చాల కలవరపడుతున్నారు. రాబోయే ఎన్నికలను ఎదుర్కొనేందుకు జిల్లాల వారిగా నియోజక వర్గ ఇన్-చార్జ్ లను నియమించి సిద్దమవుదామని ఆలోచిస్తే అదే ఆ పార్టీ పాలిట శాపంగా మారింది. నెల్లూరు, వరంగల్ జిల్లాలలో పార్టీలో కుమ్ములాటలు తారస్థాయికి చేరుకొని ఏకంగా పెద్ద తలకాయలే పార్టీ వీడేట్లు చేస్తున్నాయి.   జగన్ మోహన్ రెడ్డి జైలు నుండి విడుదల కాకపోవడం వలన పార్టీ పై ఎటువంటి ప్రభావం లేదని, పార్టీలో అసమ్మతిని సమర్ధంగా అదుపు చేయగలమని నిరూపించే ప్రయత్నంలో నిన్నకొండ సురేఖ అనుచరులను పార్టీ నుండి బహిష్కరించారు. త్వరలో కొండా దంపతులు కూడా పార్టీ వీడే అవకాశం ఉంది.   అనకాపల్లిలో దాడి వీరభద్ర రావుని పార్టీలోకి ఆహ్వానించి ఆ పార్టీ కొరివితో తల గోక్కోన్నట్లయింది. ఆయన రాకను నిరసిస్తూ కొణతాల రామకృష్ణ సోదరులు పార్టీకి తాము కావాలో లేక దాడి కావాలో తేల్చుకోమని అల్టిమేటం జారిచేసారు కూడా. ఇక, పార్టీలోకి కొత్తగా వచ్చిన దాడి కోసం, పార్టీ కొణతాలను వదులుకోవడానికి సిద్దపడుతున్నట్లు సమాచారం. దానితో, ఆయనను తమ పార్టీ వైపు ఆకర్షించడానికి కాంగ్రెస్ పార్టీ ప్రయత్నిస్తోంది. “ఆయన ఎప్పటికయినా మా కాంగ్రెస్ పార్టీ వాడే” అని కేంద్ర మంత్రి పురందేశ్వరి పలికితే, “ఆయన మా పార్టీలోకి వస్తామంటే సాదరంగా ఆహ్వానిస్తామని” మంత్రి గంట శ్రీనివాసరావు అన్నారు.   ఇక కృష్ణా, పశ్చిమ గోదావరి జిల్లాలలో కూడా ఇంచుమించి ఇటువంటి పరిస్థితులే ఉన్నాయి. ముందు నుండి ఆ పార్టీలో ఉంటూ రాబోయే ఎన్నికలలో పార్టీ టికెట్ ఆశిస్తున్న నేతలు, ఇటీవల కాంగ్రెస్, తెలుగుదేశం పార్టీలలో నుండి వైకాపాలోకి వచ్చిన నేతలతో పట్లు పడుతున్నారు. వారు అకస్మాత్తుగా వచ్చి తమ నోటి కాడ కూడు లాకొంటున్నారని ఆవేదన చెందుతున్నారు. ఇప్పుడు జగన్ మోహన్ రెడ్డి మరో 4-6నెలల వరకు జైలు నుండి బయటకు వచ్చే పరిస్థితులు లేకపోవడంతో పార్టీలో తమ మొర వినే నాధుడు లేదని వారందరూ ఇప్పుడు ఇతర పార్టీల వైపు చూస్తున్నారు.   ఇక, చంద్రబాబు పాదయత్ర సాగుతున్నంత కాలం, పోటీగా సాగుతున్న షర్మిల పాదయాత్ర గురించి మీడియాలో ఎక్కడో అక్కడ నిత్యం ప్రస్తావన ఉండేది. కానీ, చంద్రబాబు పాదయాత్ర పూర్తయిన తరువాత ఆమె పాదయాత్రను పట్టించుకొనే నాధుడే లేడు. ఆమె పాదయాత్రను మీడియా ఎలాగూ పట్టించుకోవడం లేదు, చివరికి వైకాపా శ్రేణులు, నేతలు కూడా మొహం చాటేయడం ఆశ్చర్యకరం. ప్రస్తుతం ఖమ్మంలో సాగుతున్న ఆమె పాదయాత్ర ఇంకా ఎప్పుడు పూర్తవుతుందో, దాని వల్ల పార్టీకి ఏమయినా ఫలితం ఉంటుందో లేదో కూడా అర్ధం కాని పరిస్థితి. చివరికి ఆమె పాదయాత్ర గురించి పార్టీలో నేతలు కూడా మీడియాతో మాట్లాడెందుకు ఆసక్తి చూపకపోవడం ఆశ్చర్యకరం.   ఒకవైపు జైల్లో జగన్ మోహన్ రెడ్డి, మరో వైపు షర్మిల, విజయమ్మలు పార్టీని ఎలాగయినా కాపాడుకోవాలని ఈ మండు వేసవి ఎండలను సైతం లక్ష్యం చేయకుండా కష్టపడుతుంటే, ఆ పార్టీ నేతలు మాత్రం చల్లగా తమ ఏసి గదులకే పరిమితమయిపోయి, మీడియాకి ఖండన ప్రకటనలు జారీ చేస్తూ హాయిగా కాలక్షేపం చేయడం ఆ పార్టీ పరిస్థితికి అద్దం పడుతోంది. జగన్ మోహన్ రెడ్డి, మరియు అతని తండ్రి స్వర్గీయ డా.రాజశేఖర్ రెడ్డిల పై ప్రజలలో ఉన్న ఆదరణ, సానుభూతి అనే రెండు అంశాలే తమను కష్టపడకుండా గెలిపిస్తాయని వారు భావిస్తునందునే వారు తమ ఏసి గదులకి పరిమితమయిపోయినట్లుంది. ఇటువంటి పరిస్థితుల్లో త్వరలో జరుగనున్న మునిసిపల్ ఎన్నికలకు విజయమ్మే సారద్యం వహించక తప్పని పరిస్థితి ఏర్పడింది.

konda surekha

కొండా దంపతులకు పొగబెడుతున్న వైకాపా

  గత కొంత కాలంగా వైయస్సార్ కాంగ్రెస్ పార్టీలో కొండా సురేఖ దంపతుల ప్రాదాన్యత క్రమంగా తగ్గుతుండటంతో వారు కూడా పార్టీ వ్యవహారాలకి దూరంగా ఉంటున్నారు. ఇటీవల వారి ప్రమేయమ లేకుండా నియోజక వర్గ ఇన్-చార్జుల నియామకం జరిగిన తరువాత, వారు తమకిక పార్టీలో స్థానం లేదని గ్రహించి, తిరిగి కాంగ్రెస్ పార్టీలోకి వెళ్లాలని ఆలోచిస్తున్నారు. ఈ వార్తలు మీడియాలో రావడం దానిపై మీడియాలో చర్చలు జరగడంతో ఇక, వైయస్సార్ కాంగ్రెస్ పార్టీ వారితో పూర్తిగా తెగతెంపులకి సిద్దం అవుతోంది. ఆ ప్రయత్నంలో భాగంగా వారి అనుచరులయిన పార్టీ జిల్లా మహిళా అధ్యక్షురాలు నూనావత్ రాధ, ఎస్సీ సెల్ జిల్లా అధ్యక్షుడు సిలివేరు శ్రీనివాస్, మైనారిటీ సెల్ జిల్లా అధ్యక్షుడు మసూద్, ట్రేడ్ యూనియన్ జిల్లా అధ్యక్షుడు తక్కళ్లపల్లి మోహన్‌రావులను సస్పెండ్‌చేసింది. దీనికి ఆగ్రహించిన కొండా అనుచరుడు మరియు జిల్లా నియోజకవర్గ ఇన్-చార్జ్ శ్రీనివాస రెడ్డి మరి కొందరు పార్టీ కార్యకర్తలు పార్టీకి రాజీనామా చేసేందుకు సిద్దంగా ఉన్నారు. అంతిమంగా కొండ దంపతుల నిర్ణయాన్ని బట్టి వారందరూ ఏ పార్టీలో చేరలో నిస్చయించుకోవడానికి ఈ రోజు వరంగల్ లో సమావేశం అవుతున్నారు. బహుశః ఈ వారంలోనే కొండ దంపతులతో బాటు వారి అనుచరులు కూడా పార్టీని వీడే అవకాశం ఉంది.     ఇప్పటికే, పిల్లి సుబాష్ వంటి సీనియర్ నేతలు బయట నుండి కొత్తగా వచ్చిచేరుతున్న ఇతర పార్టీల నేతలతో ఇమడలేక క్రమంగా పార్టీకి దూరమయిపోయారు. ఇంతకాలం సేవలందించి పార్టీని తెలంగాణాలో బలోపేతం చేసిన కొండ దంపతులు కూడా ఇప్పుడు వారి త్రోవలోనే బయటకి వెళ్ళాక తప్పడంలేదు. గమ్మతయిన విషయం ఏమిటంటే, కొండా సురేఖ దంపతులు పార్టీ క్రమశిక్షణ ఉల్లంఘించారంటూ వారి నుండి జవాబు కోరిన కొణతాల రామకృష్ణ కూడా ఇప్పుడు దాడి వీరభద్ర రావు రాకతో అసమ్మతి స్వరాలూ వినిపిస్తున్నారు. వైకాపా అనవసర భేషజాలకు పోయి పార్టీకోసం త్యాగాలు చేసిన సురేఖ, కొణతాల వంటి వారిని పక్కన బెట్టి కొత్తవారికి పీట వేయడంతో సహజంగానే పార్టీలో అసమ్మతి మరింత పెరిగింది. అయినప్పటికీ, పార్టీ తన శ్రేణుల మీద పట్టు కోల్పోలేదని నిరూపించేందుకు క్రమశిక్షణా చర్యలుకు దిగితే అది మరింత మందిని బయటకి పంపే అవకాశం ఉంది.

Ram Charan Security Beats Software Engineers

నటుడు రామ్ చరణ్ ఫోటోలు మార్ఫింగ్ చేశారా!

        బంజారాహిల్స్‌లో రామ్ చరణ్ సెక్యూరిటీ సిబ్బంది ఇద్దరు సాఫ్ట్‌వేర్ ఇంజనీర్లను కొట్టిన సంగతి తెలిసిందే. సంఘటన పై లోకల్ మీడియాతో మాట్లాడిన చెర్రీ బాబు ఈ ఉదంతంలో తనది ఎలాంటి తప్పూ లేదని వ్యాఖ్యానించారు. సాఫ్ట్‌వేర్ ఉద్యోగులే తనతో దురుసుగా ప్రవర్తించారని విలేకరుల సమావేశంలో తెలిపారు. ఈ ఘటన జరిగినప్పుడు తాను కారు దిగలేదని, తన ఫోటోలు మార్ఫింగ్ చేశారని ఆయన ఆరోపించారు. ఓ ఫోటో గ్రాఫర్ తనను బ్లాక్ మెయిల్ చేయబోయాడని చెప్పారు. కారులో తనతో సహా తన భార్య ఉపాసన ఉందన్నారు. తనతో గొడవ పెట్టుకున్న వారు ఐటీ ఉద్యోగుల్లా లేరన్నారు. వారు మద్యపానం సేవించి ఉన్నారన్న అనుమానాన్ని చరణ్ వ్యక్తం చేశారు. ఇక ఉద్యోగులు ఒక వార్త సంస్థలో మాట్లాడుతూ తమది ఎటువంటి పొరపాటూ లేదని వాపోయినప్పటికీ, వారు ఆ రోజు కేసు పెట్టకపోవడంతో…. ఇప్పుడు ఇంకేం మాట్లాడటానికి లేకుండాపోయే అవకాశం కనిపిస్తోంది!

Teluguone 13 Anniversary Celebrations

ఘనంగా తెలుగువన్ 13వ వార్షికోత్సవ వేడుకలు

       CLICK HERE FOR MORE Teluguone   13 Anniversary Celebrations Photos     తెలుగువన్ డాట్ కామ్ 13 వార్షికోత్సవ వేడుకలు ఘనంగా జరిగాయి. వివిధ రంగాలకి చెందిన అతిరధ మహారధులంతా విచ్చేసి ఆ సంబరాలకి మరింత శోభను కలిగించారు.   రాత్రి 7గంటలకు సాంస్కృతిక కార్యక్రమాలతో సభ ప్రార౦భమైంది. చి|| ప్రవస్తి, చి|| ప్రవీణ్, చి|| హనీ తమ పాటలతో ఆహుతులను అలరించారు. అలాగే  సూర్య తేజ అండ్ టీం హాస్యభరిత లఘు నాటికలతో ఆహుతులను నవ్వుల్లో ముంచారు. ఇక సభా కార్యక్రమాలు తెలుగువన్.కాం పరిచయంతో మొదలై,  తెలుగువన్.కాం క్రియేటివ్ హెడ్ మల్లిక్ గారి వందన సమర్పణతో ముగిశాయి.           ముఖ్య అతిథిగా పాల్గొన్న దర్శకరత్న డా.దాసరి నారాయణరావుగారు ప్రముఖ రచయిత, జ్ఞానపీఠ్ అవార్డు గ్రహీత శ్రీ రావూరి భరద్వాజగారితో పాటు ప్రముఖ కవి శ్రీ కె. శివారెడ్డిగారును, ప్రముఖ గజల్ గాయకులు గజల్ శ్రీనివాస్ గారును, లిటిల్ మ్యూజిషియాన్ అకాడమి వ్యవస్థాపకుడు రామాచారిగారులను సత్కరించారు. ప్రముఖ జర్నలిస్ట్ ఈనాడు జర్నలిజం స్కూల్ ప్రిన్సిపాల్ శ్రీ. ఎం.నాగేశ్వర రావు గారు ఆత్మీయ అతిధిగా విచ్చేసి ఇంటర్ నెట్ మీడియా అలాగే తెలుగువన్ ప్రస్థానాన్ని అభినందించారు. ప్రముఖ రచయిత, జ్ఞానపీఠ్ అవార్డు గ్రహీత శ్రీ రావూరి భరద్వాజగారు మాట్లాడుతూ..''సాహిత్యం, కథలు రాస్తానని ఏనాడూ అనుకోలేదు. నా బాధలు, కన్నీళ్లు నాతోనే అంతం కాకూడదన్న ఆలోచనతోనే రాశాను'' అని అన్నారు. దర్శకరత్న డా.దాసరి నారాయణరావుగారు మాట్లాడుతూ..తాను ఓ తెలుగు సభలో ఉన్న ఆనందాన్ని పొందుతున్నానని అన్నారు. ఇతర భాషల వారికి తమ మాతృభాషపై ఉన్న అభిమానం మన బాషపై మనకు ఉండకపోవడం బాధాకరమని అన్నారు. దేశంలో హిందీ తరువాత ఎక్కువమంది మాట్లాడే భాష తెలుగునీ, మనలో చిత్తశుద్ధి లేకపోవటమే మన భాష దుస్థితికి కారణమని ఆవేదన వ్యక్తం చేశారు. ''జ్ఞానపీట్ అవార్డు గ్రహీత రావూరి భరద్వాజ జీవితానికి, నా జీవితానికి చాలా సారూప్యత ఉంది. ఇద్దరం కష్టాల కన్నీళ్ళను దాటుకొని పైకొచ్చిన వాళ్ళమే. గాడ్ ఫాదర్లు లేకపోయినా కృషి, పట్టుదలతో మేం ఈ స్థాయికి చేరాం. మా జీవితాలు చాలా మంది పేదవాళ్ళకి ఆదర్శం కావాలని కోరుకుంటున్నాను..'' అని అన్నారు. తెలుగువన్ ఇంతగా విస్తరించినందుకు అభినందనలు తెలియజేస్తూ, మరింత ముందుకు దూసుకుపోవాలన్నారు.      

Konda Surekha BJP

కొండా దంపతులకు బీజేపీ గాలం

        వైకాపా విషయంలో అలక వహించిన కొండా మురళి దంపతులకు బీజేపీ గాలం వేస్తోంది! వారిని తమవైపుకు తిప్పుకోవాలని చూస్తోంది! అటు వైఎస్ఆర్.సీపీలో కొనసాగలేక ,ఇటు కాంగ్రెస్ వైపు వెళ్లలేక , కేసీఆర్ కింద పొదగలేక పోతున్న వారికి అన్ని విధాలా ప్రాధాన్యం ఇస్తామని బీజేపీ అభయం ఇస్తోంది! ఈ మేరకు బీజేపీ రాష్ట్ర అధ్యక్షుడు కిషన్ రెడ్డి కొండా దంపతులకు ఫోన్ చేసి హామీ ఇచ్చాడని తెలుస్తోంది. ఈ విషయాన్ని ఆయనే ధ్రువీకరించారు. ఇప్పటికే ఏ పార్టీకీ చెందకుండా ఉండిపోయిన నాగం జనార్ధన్ రెడ్డిని బుట్టలోకి వేసుకున్న బీజేపీ ఇలాంటి సందిగ్ధవస్థలో ఉన్న నేతలను తమవైపు తిప్పుకోవడానికి అవిశ్రాంతంగా ప్రయత్నిస్తోంది. అందులో భాగంగానే సురేఖ, మురళిలపై గాలం వేసింది. మరి వీరి గాలానికి వారు పడతారో లేదో?

Pooja Gandhi looses election

నటి పూజాగాంధీ కి షాక్

        ప్రముఖ కన్నడ నటి పూజాగాంధీ రాయచూర్‌ నియోజకవర్గం నుంచి పోటీ చేసి ఘోరంగా ఓటమి పాలయ్యారు. గాలి జనార్ధన్ రెడ్డి సన్నిహితుడు శ్రీరాములు బీఎస్‌ఆర్‌ పార్టీ నుంచి పోటీ చేసిన ఆమెకు అతి తక్కువగా 1, 815 ఓట్లు మాత్రమే దక్కించుకుంది. ముంగారు మలే చిత్రంతో కన్నడ పరిశ్రమకు పరిచయమై అనతికాలంలోనే హీరోయిన్‌గా పలు విజయవంతమైన చిత్రాల్లో నటించిన పూజాగాంధీ మొదట మాజీ ప్రధాని హెచ్‌.డి. దేవెగౌడ్‌ స్థాపించిన జేడీ(ఎస్‌) పార్టీ తీర్ధం పుచ్చుకున్నారు. అనంతరం ఆమె మాజీ ముఖ్యమంత్రి యడ్యూరప్ప ఆధ్వర్యంలోని కర్నాటక జనతా పార్టీలో చేరారు. ఆ తర్వాత ఆమె బీజేపీ మాజీ మంత్రి బి. శ్రీరాములు నేతృత్వంలోని బీఎస్‌ఆర్‌ కాంగ్రెస్‌ పార్టీలో చేరి అసెంబ్లీకి పోటీ చేసి ఘోర పరాజయం పొందారు.

జగన్ బెయిలు పై సుప్రీం కోర్టు తీర్పు నేడే

  జగన్ మోహన్ రెడ్డి కుటుంబ సభ్యులు, వైయస్సార్ కాంగ్రెస్ పార్టీ నేతలు, కార్యకర్తలు అందరు ఈ రోజు కోసం చాలా ఆత్రంగా ఎదురు చూస్తున్నారు. ఎందుకంటే, మొన్న 6వ తేదీన సుప్రీంకోర్టులో ఆయన బెయిలుపై ఇరువైపుల వాదనలు ముగిసిన అనంతరం తన తీర్పును రిజర్వులోఉంచిన సుప్రీంకోర్టు, నేడు ఆయనకు బెయిల్ మంజూరు చేసేది లేనిదీ ఈరోజు  ప్రకటించబోతోంది. ఆయనకు తప్పక బెయిలు దొరుకుతుందని వారు ధృడంగా నమ్ముతున్నారు.   ఒకవేళ ఆయనకు కోర్టు బెయిలు మంజూరు చేసినట్లయితే, రాష్ట్ర రాజకీయ సమీకరణలు మారే అవకాశం ఉంది. ఇంతవరకు వైయస్సార్ కాంగ్రెస్ పార్టీలో చేరాలా వద్దా? అని ఊగిసలాడుతున్నవారు, ఇక ముందు ఆయన కార్యాలయం ముందు బారులు తీరవచ్చును. అదేవిధంగా ముఖ్యమంత్రి కిరణ్ కుమార్ రెడ్డి త్వరలో జరుపాలనుకొంటున్న కార్పోరేషన్, మునిసిపాలిటీ, పంచాయితీ ఎన్నికలపై ఆయన ప్రభావం ఖచ్చితంగా ఉంటుంది. అందువల్ల ప్రభుత్వం ఇప్పుడు ఎన్నికల ఆలోచన విరమించుకొన్నా ఆశ్చర్య పడనవసరం లేదు.   ఒకవేళ జగన్ మోహన్ రెడ్డి బెయిలు రాని పక్షంలో ఆ పార్టీ పరిస్థితి మరింత క్షీణించే అవకాశం ఉంటుంది గనుక, ఆయన తన స్థానంలో షర్మిలను నియమించి పార్టీ యొక్క పూర్తి బాధ్యతలు ఆమెకు అప్పగించవచ్చును.

కర్ణాటకలో ప్రతిపక్షం ఎవరికి?

        కర్ణాటక అసెంబ్లీ ఎన్నికల్లో కాంగ్రెస్ విజయం దాదాపు ధ్రువపడినట్లే! దాదాపుగా 120 సీట్లతో ఇక్కడ ఆ పార్టీ ప్రభుత్వాన్ని ఏర్పాటు చేసే అవకాశం ఉంది. అయితే రెండోస్థానంలో నిలిచే పార్టీ ఏది అనే విషయం ఇప్పుడు ఆసక్తికరంగా మారింది. ఎనిమిదేళ్ల తర్వాత కర్ణాటకలో అధికారం సాధించిన ఉత్సాహంలో కాంగ్రెస్ ఉండగా, రెండోస్థానం కోసం బీజేపీ, జేడీఎస్ లు పోరాడుతున్నాయి. ప్రస్తుత ఆధిక్యాల దృష్ట్యా రెండు పార్టీలూ చెరో 40 సీట్లనూ సాధించే అవకాశం కనిపిస్తున్నాయి. 120 కాంగ్రెస్ ఖాతాలో అనుకున్నా, చెరో 40 సీట్లతో మిగతా రెండు పార్టీలూ బ్యాలెన్స్ చేస్తున్నాయి. ఈ నేపథ్యంలో… ఒకటీ రెండు సీట్లతో బీజేపీ, జేడీఎస్ లలో ఎవరో ఒకరు ఆధిక్యంలో నిలిచే అవకాశాలున్నాయి. ఫలితాల గురించి కర్ణాటక మాజీ ముఖ్యమంత్రి, జెడి(ఎస్) (జనతా దళ్ సెక్యులర్) పార్టీ అధ్యక్షుడు హెచ్‌డి కుమారస్వామి మాట్లాడుతూ…తాను కింగ్ ను కాను… కింగ్ మేకర్ ను కాదు అని అన్నారు. తాము ఎటువంటి రేసులో లేమని ఆయన స్పష్టం చేశారు. తమకు ఎన్నికల ఫలితాలు నిరాశ కలిగించలేదని కుమారస్వామి అన్నారు. ప్రతిపక్షంలో కూర్చుని.. ప్రజా సమస్యలపై పోరాటం సాగిస్తామని ఆయన స్పష్టం చేశారు. జేడీఎస్ నాలుగు స్థానాల్లో గెలుపొంది, మరో 37 స్థానాల్లో ముందంజలో ఉంది. బీజేపీ పరిస్థితి కూడా దాదాపు ఇలానే ఉంది.

2014 ఎన్నికల్లో టిడిపి వర్సెస్ వై.ఎస్.ఆర్. పార్టీ?

        ఆంధ్రప్రదేశ్ లో ఇప్పటికి వీస్తున్న గాలిని బట్టి 2014 సార్వత్రిక ఎన్నికల్లో అనేక రకాలుగా అభాసుపాలైన అధికార కాంగెస్ పక్షం రాష్ట్రంలో మూడవ స్థానంలోకి జారిపోయి, మొదటి రెండు స్థానాల్లో "తెలుగుదేశం''పార్టీ, జగన్ మోహన్ రెడ్డి నాయకత్వంలో ఉన్న "వై.ఎస్.ఆర్. కాంగ్రెస్'' పక్షమూ ప్రధాన రాజకీయ పక్షాలుగా అవతరించవచ్చునని ఢిల్లీలోని విశ్వసనీయ రాజకీయ పరిశీలకులనుంచి తెలియవస్తున్న సమాచారం. అయితే ఈ నూతన రాజకీయ సమీకరణను అసంభవం చేసే బాధ్యతను కేంద్ర కాంగ్రెస్ నాయకత్వం ప్రస్తుతం తెలంగాణాకు మాత్రమే పరిమితమై తెలుగుజాతిని విషప్రచారం ద్వారా చీల్చడానికి సొంత ఎజెండాతో టి.ఆర్.ఎస్. పార్టీని నెలకొల్పిన ఆంధ్రప్రాంత వలసవాదీ, వేర్పాటువాదీ అయిన కె.సి.ఆర్.పైన రానున్న ఎన్నికలకోసం ఒక బాధ్యత పెట్టింది. "గతంలో డిసెంబర్ 9''న చిదంబరం - తెలంగాణా ఏర్పాటు విషయమై కేంద్రంలో చింతన ప్రారంభమైంది, చర్చలలో ఉందన్న ఆకుకు అందని పోకకు పొందని ఒక ప్రకటన చేశాడు కాబట్టి దానికి కేంద్రం కట్టుబడి ఉంటే, తాను కాంగ్రెస్ లో చేరతానని కెసిఆర్ మాట ఇచ్చాడని, అందుకు ముదరాగా తెలంగాణలో కాంగ్రెస్ ప్రతిష్ఠకు విఘాతం కలగకుండా వ్యూహరచన చేయడం 'నీ వంతని' కెసిఆర్ ను అధిష్ఠాన వర్గ ముఖ్యులు కోరారనీ, అందుకు కెసిఆర్ ఒప్పుదల అయ్యాడనీ ఆ పరిశీలకులు వెల్లడిస్తున్నారు. ఈ ఏర్పాటువల్ల కెసిఆర్ కు వొనగూడే "ప్రతిఫలమేమిట''ని ప్రశ్నించగా ఆ 'ప్రశ్న'లోనే "నిగూఢమైన సమాధానం'' ఉందని వారు చెబుతున్నారు. కాంగ్రెస్ లో టి.ఆర్.ఎస్.ను విలీనం చేసే పక్షంలో "ప్రత్యేక తెలంగాణా" రాష్ట్రానికి"నిన్నే "ముఖ్యమంత్రి"ని చేస్తామని అధిష్ఠాన వర్గ ముఖ్యులు హామీ ఇచ్చినట్టు ఈ పరిశీలకులు తెలిపారు. అయితే తెలంగాణాలో టి.ఆర్.ఎస్. పార్టీ "ఎనిమిది పార్లమెంటు స్థానాల''ను గెలుచుకోడానికి అవకాశం వస్తే ఆ సీట్లు అడ్డం పెట్టుకుని కేంద్రంలో కాంగ్రెస్ వచ్చినా, మరొక పార్టీ గెలిచి అధికారంలోకి వచ్చినా "తెలంగాణా పేరిట'' బేరసారాలు ఆడవచ్చుననీ, ఎన్నికలకు ముందస్తుగా కాంగ్రెస్, బిజెపి లాంటి జాతీయ పార్టీలతో సీట్ల సర్దుబాట్లు కుదుర్చుకునేకన్నా, ఎన్నికల అనంతరం మాత్రమే కేంద్రంలో ప్రభుత్వం ఏర్పాటుకు తగినట్టుగా సర్దుబాట్లు చేసుకుంటే టి.ఆర్.ఎస్. కీలకపాత్ర వహించగల్గుతుందని కెసిఆర్ వ్యూహమని పరిశీలకుల భావన. అయితే తెలంగాణాలో టి.ఆర్.ఎస్. ఎన్నికల్లో మరొక రాజకీయ పక్షం దేనితోనూ పొత్తులు పెట్టుకోకుండా "ఒంటరి''గా మాత్రమే పోటీ చేయాలని నిర్ణయించిందని కెసిఆర్ ప్రకటించడంతో తెలంగాణలో ఆయని ప్రవర్తనను బట్టి అతణ్ణి, అతని మాటలనూ విశ్వసించడం "ఆత్మహత్యా సదృశ్యమ''న్న ఆలోచన కూడా కాంగ్రెస్ అధిష్ఠానవర్గ ముఖ్యులకు లేకపోలేదు!   ఎప్పుడయితే అమలుకురాని షరతుల మీద ఆధారపడి కెసిఆర్ తన పార్టీని కాంగ్రెస్ లో కలిపెస్తానని అధిష్ఠాన ముఖ్యులకు హామీ యిచ్చాడన్న వార్త వెల్లడి కావటంతో తెలంగాణా ఉద్యమంలోనూ, ముఖ్యంగా ఉద్యమ నిర్వహణకని ఏర్పడిన "సంయుక్త కార్యాచరణ సంఘం''లోనూ విభేదాలు, చీలికలూ తలెత్తాయి. ఈ పరిణామానికి ఒక చారిత్రిక పునాది ఉంది - తెలంగాణా పేదలను, సాధారణ గ్రామీణ రైతాంగాన్ని, దళిత, బహుజన వర్గాలనూ [వీళ్ళే జనాభాలో అసంఖ్యాకులు] పీల్చి పిప్పిచేస్తూ రెండు అగ్రవర్ణాలకు ప్రాతినిధ్యం వహిస్తూ వచ్చిన ఫ్యూడల్ భూస్వామ్య శక్తులు - వెలమ, రెడ్డిదొరలు. నిన్నటిదాకా "ఏలిననాటి శని''గా నేడు "ఏలేనాటి శని''గా మారిన ఈ 'అగ్రవర్ణ వైరుధ్యం' తెలంగాణలో ఈ వర్గాల నాయకత్వంలో తలెత్తే ఏ ఉద్యమంలోనైనా స్పష్టంగా కొట్టొచ్చినట్టు కనబడుతూనే ఉంది, ఉంటుంది! ఈ కారణంతోనే 'ఉద్యమం' పేరిట జరిపే ధర్నాలు, రాస్తారోకోలు, వంటా-వార్పూ, తాత్కాలిక వూరేగింపుల నిర్వహణలోనూ, "సడక్'' బంద్ లు ఏకోన్ముఖంగా కాకుండా రెండు వేర్వేరు "కుంపట్లు''గా సాగుతున్నాయి. అటు కెసిఆర్, ఇటు కోదండరామ రెడ్డి నేను ముఖముఖాలు చూసుకునే పరిస్థితిలో లేరని ప్రజలకూ తెలిసిపోయింది! ఉద్యోగ, విద్యార్థి, వృత్తిసంఘాలన్నిటా రెండేసి "కుంపట్లు'' నడుస్తున్నాయి. చివరికి ఢిల్లీ "సంసద్'' ధర్నాలో పాల్గొన్నప్పుడు కూడా కెసిఆర్ వర్గం తరపున 'మనిషి'ఒకరు లేకపోతే జనం వేరేగా భావిస్తారేమోనన్న 'కపటం'తో పాల్గొనడమేగాని మనఃపూర్వకంగా పాల్గొనలేదు. దానికి కారణం - కాంగ్రెస్ లో టి.ఆర్.ఎస్.ను కలిపేయడానికి కెసిఆర్ అధిష్ఠానంతో పడివచ్చిన లాలూచీ తప్ప మరొకటి కాదు.   ఈ భాగోతం యిలా ఉండగా అటు చంద్రబాబు "తెలుగుదేశం'' పార్టీ, ఇటు జగన్ వై.ఎస్.ఆర్. కాంగ్రెస్'' పార్టీ తెలంగాణా సమస్యపట్ల ప్రధానంగా తటస్థవైఖరిని అవలంభిస్తున్నప్పటికీ రాష్ట్ర వ్యాపిత పర్యటనలోనేగాక, ప్రధానంగా తెలంగాణా జిల్లాల్లో సహితం వారు నిర్వహించే సభలకు ప్రజలనుంచి వస్తున్న స్పందనను తక్కువ అంచనా వేయడం ప్రమాదకరమని కూడా కాంగ్రెస్ అధిష్ఠానవర్గం ముఖ్యులు హెచ్చరిస్తున్నట్టు ఢిల్లీ పరిశీలకులు సంకేతాలు యిస్తున్నారు! తెలంగాణలో బొత్తిగా "తాడూ-బొంగరం''లేని [ఒకటి రెండు అసెంబ్లీస్థానాలు తప్ప] పార్టీలుగా నమోదైన కమ్యూనిస్టుపార్టీ, బిజెపిలు సహితం టి.ఆర్.ఎస్. 'ఒంటరిపోరు' వ్యూహాలతో, ఎత్తుగడలతో ఏకీభవించడం లేదు సరికదా జనాభిప్రాయాన్ని ప్రభావితం చేయగల స్థాయిలో కూడా లేవు. ఆంధ్రప్రదేశ్ రాష్ట్రాన్ని విచ్చిన్నం చేసే ఎత్తుగడలను నిరసించే మార్కిస్టుపార్టీ 'గొంతు'కూడా ఇప్పుడు 'జీర'బోయిందని భావిస్తున్నారట. కాబట్టి అధికార కాంగ్రెస్ ముఖ్యులు కూడా కేంద్రస్థాయినుంచి తెలంగాణా ప్రాంతీయస్థాయి వరకూ చీలిపోయి ఉన్నారు కాబట్టి, "గిరీశం'' పంతులు "అటునుంచి నరుక్కురమ్మన్న''ట్టుగా కెసిఆర్ ను 'దువ్వడం' కోసం టి.ఆర్.ఎస్. ప్రతిపత్తికి కేంద్రనాయకులు ఎసరుపెట్టి కొంతవరకు జయం పొందడానికి నిదర్శనంగా - కాంగ్రెస్ లో టి.ఆర్.ఎస్.ను కలపడానికి కెసిఆర్ నిర్ణయించడమేనని ఢిల్లీ పరిశీలకులు భావిస్తున్నారు.   దీనికి తగ్గట్టుగానే 'ఒంటరి'గా పోటీ చేయడం ద్వారా అసెంబ్లీలో 100 స్థానాలు, పార్లమెంటులో "పది''స్థానాలు పొందగలమన్న కెసిఆర్ ధీమా వెనక అసలు రహస్యాన్ని కూడా కేంద్రనాయకత్వం ఉపఎన్నికలలో పాత అనుభవం దృష్ట్యా పసికట్టిందట! ఆ బ్రహ్మ 'రహస్యం' - తెలంగాణా ప్రజల్లో అనుమానం రాకుండా తలెత్తుకు తిరగడానికి పన్నిన ఎత్తుగడలో భాగంగా కాంగ్రెస్ కు యిచ్చిన హామీ ప్రకారం 2012 ఎన్నికల్లో "ప్రతిఫలాపేక్ష'' (క్విడ్ ప్రోకో) సూత్రం ప్రకారం టి.ఆర్.ఎస్. తరపున బలహీనమైన అభ్యర్థులను పోటీకి నిలబెట్టడం ద్వారా, తెలంగాణాలో కోల్పోయిన ప్రతిష్ఠను కాంగ్రెస్ అభ్యర్థుల విజయాన్ని ఎక్కువ స్థానాల్లో సుకరం చేయడం కెసిఆర్ బాధ్యత అవుతుందని, కాని ఈ ఎత్తుగడద్వారా అటు అధికార కాంగ్రెస్, ఇటు టి.ఆర్.ఎస్. జనంముందు అభాసుపాలు కావటం ఖాయమని ఢిల్లీ పరిశీలకులు భావిస్తున్నారు.   ప్రత్యేక తెలంగాణా రాష్ట్ర ఏర్పాటుకు ఎన్నో వత్తిళ్ళమధ్య, దుష్ప్రచారం మధ్య "తెలుగుదేశం'' అధ్యక్షుడు అఖిలపక్ష సమావేశంలో "తెలంగాణా ఏర్పాటుకు మేం అడ్డు నిలబడబో''మని లిఖిత పూర్వకంగా హామీ పడివచ్చినా, తర్వాత తెలంగాణాలోనూ, రాష్ట్రంలో ఇతర చోట్ల జరిగిన సభల్లోనూ "ప్రత్యేక రాష్ట్రం ఏర్పాటుకు నిర్ణయం కేంద్రం పరిథిలోనిదేగాని, మా పరిదిలోది కాద''ని చంద్రబాబు, ఇతర "దేశం'' నాయకులూ చెబుతూనే వస్తున్నారు. ఇక జగన్ "వై.ఎస్.ఆర్. కాంగ్రెస్'' ఆ వూసోతో నిమిత్తం లేకుండానే ఇటు తెలంగాణాలోనూ, అటు కోస్తాంధ్రలో జరిగిన కొన్ని ఉపఎన్నికలలో ఘనవిజయం సాధించి పాలకుల్ని పార్టీలనూ ఆశ్చర్యచికితుల్ని చేసింది! ఈ తరుణంలో 2014లో జరిగే ఎన్నికలలో ప్రజలముందుకు రాష్ట్ర విచ్చిత్తి సమస్యపైన ధైర్యంగా ముందుకెళ్ళగలిగిన రాజకీయపక్షాలు రెండే రెండనీ, రాష్ట్ర రాజకీయాల్లో ప్రధాన పక్షాలుగా జనం మధ్య నిలబడగల స్థితి అటు "తెలుగుదేశం'' పార్టీకి, ఇటు జగన్ పార్టీకి మాత్రమే ఉందనీ, ఆ ఎన్నికలలో మొదటి రెండు స్థానాలలో "తెలుగుదేశం'', జగన్ పార్టీలు మాత్రమే ఉండగలవనీ, మూడవశక్తిగా మాత్రమే అధికార కాంగ్రెస్ మిగిలిపోవలసి వస్తుందనీ ప్రస్తుత పరిణామాలను ఢిల్లీ పరిశీలకులు అంచనా వేస్తున్నారు.   ఇదే సమయంలో కాంగ్రెస్ అధ్యక్షురాలు సోనియాగాంధి తెలంగాణా సమస్యపై ఒక్కమాట కూడా ఉచ్చరించక పోవటానికి ప్రధాన కారణాలలో ఒకటి - ఆంధ్రప్రదేశ్ కాంగ్రెస్ ఎం.పి.లలో ఎకవాక్యత లేకపోవటం కాగా, రెండవ కారణం దేశ సమైక్యతకు వేర్పాటువాదం వల్ల ప్రమాదమని భావించడమేనని ఆ పరిశీలకులు అంటున్నారు. జనాభాలో అల్పసంఖ్యాకులైన రెండు అగ్రవర్ణ సామాజికవర్గాలు తిరిగి తెలంగాణలో అధికారంలోకి రావడానికి 'ఉద్యమం' పేరిట చేస్తున్న ప్రయత్నాలను ప్రాంతంలోని అసంఖ్యాకులైన బడుగు, బలహీనవర్గాల ప్రజలు తిప్పికొట్టే ఆలోచనలో ఉండటం మరొక కొత్త కోణమని కూడా ఢిల్లీ పరిశీలకులు భావించడం విశేషం! వీరికి తోడుగా రాష్ట్రంలోని గిరిజన ప్రాంతాలన్నింటిని కలిపి "మన రాష్ట్రం'' ప్రకటించాలని గిరిజనప్రాంతాల సంయుక్త కార్యాచరణ సమితి కూడా డిమాండ్ చేస్తుండడాన్ని కాంగ్రెస్ అధిష్ఠానం పరిగణలోకి తీసుకోవడం వల్ల తెలంగాణా వనరులు కుంచించుకు పోతాయి!

కర్ణాటకలో ముఖ్యమంత్రి రేసులో పోటీ మొదలు

  కర్ణాటకలో కాంగ్రెస్ పార్టీ అధికారం కైవసం చేసుకోబోతోందని స్పష్టమవుతున్న తరుణంలో మళ్ళీ చాలా ఏళ్ళ తరువాత రాష్ట్రంలో కాంగ్రెస్ మార్క్ రాజకీయాలు జోరందుకొన్నాయి. ముఖ్యమంత్రి పదవికి పోటీలోనలుగురు బలమయిన అభ్యర్ధులు-మాజీ ముఖ్యమంత్రులు సిద్ధరామయ్య, మల్లికార్జున ఖార్గే, కేంద్ర మంత్రి ఎస్.ఎం.కృష్ణ,, మరియు కర్నాటక పిసిసి అధ్యక్షుడు పరమేశ్ అప్పుడే తమ ప్రయత్నాలు ఉదృతం చేసారు. పార్టీలో వీలయినంత ఎక్కువమందిని తమ వైపుకు తిప్పుకొనే ప్రయత్నంలో వ్యక్తిగతంగా, ముఠాలవారిగా సమావేశాలవుతు తమకే మద్దతు ఇవ్వాలని అందరినీ బ్రతిమాలుకొంటున్నారు. అందుకు ప్రతిఫలంగా అధికారంలోకి రాగానే వారికి యధోచిత పదవులు, ఇతర వ్యవహారాలలో సహకారం అందిస్తామని హామీలు ఇస్తున్నారు. ఈ రోజు సాయంత్రంకల్లా ఎన్నికల ఫలితాలు పూర్తిగా వెలువడుతాయి గనుక, ఒకటి రెండు రోజుల్లోనే ఎన్నికయిన శాసన సభ్యులను సమావేశ పరచి ముఖ్యమంత్రి పేరు ప్రకటిస్తారు. గనుక, ముందుగానే నలుగురు ప్రధాన అభ్యర్ధులు బలం కూడగట్టుకొంటున్నారు. ఇక ఈ తంతు ముగియగానే ఇక మంత్రి వర్గంలో పదవుల కోసం కొత్త పోటీ మొదలవుతుంది. దాని తరువాత షరా మామూలుగానే పదవులు దక్కని వారి అలకలు, అసమ్మతి ఎపిసోడ్ ఒకటి ఉంటుంది. ఆ తరువాత నుండి కర్ణాటకలో కూడా కాంగ్రెస్ మార్క్ పరిపాలన మొదలవుతుంది.