Home  
Analytical
digvijay singh

వినాశకాలే విపరీత బుద్ధి

  ముఖ్యమంత్రి కిరణ్ కుమార్ రెడ్డి నిన్నశాసనసభలో టీ-బిల్లుకి వ్యతిరేఖంగా సుదీర్గమయిన వాదన చేసిన తరువాత లోపభూయిష్టమయిన ఆ బిల్లుని వెనక్కి త్రిప్పి పంపమని కోరుతూ స్పీకర్ కు నోటీసు ఇచ్చారు. అంతేగాక బిల్లుని వ్యతిరేఖిస్తూ తీర్మానం నోటీసు కూడా ఇచ్చారు. దీనిపై తెలంగాణావాదులందరూ మండిపడుతున్నారు. కానీ, పార్టీ రాష్ట్రవ్యవహారాల ఇన్-చార్జ్ దిగ్విజయ్ సింగ్ మాత్రం ముఖ్యమంత్రి కొత్తగా చెప్పిందేముందంటూ ఆయన వాదనలను చాలా తెలికగా కొట్టిపడేశారు.   శాసనసభ అభిప్రాయలు తెలుసుకోవడానికి మాత్రమే బిల్లును పంపాము, గనుక అందరూ తమ అభిప్రాయలు చెప్పవచ్చని, ఇంతవరకు 87మంది సభ్యులు తమ అభిప్రాయాలు చెప్పారని, వారందరికీ కృతజ్ఞతలని ఆయన అన్నారు. ముఖ్యమంత్రి చెపుతున్నట్లుగా బిల్లులో లోపాలు ఉన్నట్లయితే వాటికి పరిష్కారాలు కూడా రాజ్యాంగంలో ఉన్నాయని ఆయన అన్నారు.   ముఖ్యమంత్రి నిన్న సభలో మాట్లాడుతూ, జస్టిస్ జీవన్ రెడ్డి తీర్పుని పేర్కొంటూ రాష్ట్రానికి సంబంధించిన అంశంపై శాసనసభకు సర్వ హక్కులు ఉంటాయని, చేతిలో అధికారం ఉంది కదా అని కేంద్రం రాష్ట్ర శాసనసభ యొక్క హక్కులను కబళించలేదని గట్టిగా వాదించారు. ఆ హక్కులున్నందునే కేంద్రం బిల్లుని రాష్ట్ర శాసనసభకు పంపిందని, అందువల్ల బిల్లుని ఆమోదించే, వ్యతిరేఖించే హక్కు రాష్ట్ర శాసనసభకు ఉంటుందని ఆయన గట్టిగా వాదించారు. కానీ, దిగ్విజయ్ సింగ్ మాత్రంబిల్లుకి వ్యతిరేఖంగా రాష్ట్ర శాసనసభ ఎటువంటి అభిప్రాయలు వ్యక్తం చేసినా చివరికి తిరస్కరించినా దానిని పట్టించుకొనవసరం లేదనే విధంగా మాట్లాడుతున్నారు. అంతేగాక యావత్ రాష్ట్ర ప్రజలకు ప్రాతినిధ్యం వహిస్తున్న ముఖ్యమంత్రి, అధికార, ప్రతిపక్ష శాసనసభ్యుల అభిప్రాయానికి అసలు విలువేలేదనట్లు మాట్లాడటం చూస్తే ఆయనకు, ఆయన ప్రాతినిధ్యం వహిస్తున్న కాంగ్రెస్ అధిష్టానానికి రాజ్యాంగ విధానాల పట్ల, ప్రజాస్వామ్య వ్యవస్థపట్ల ఎంత చులకన భావం ఉందో అర్ధమవుతోంది. రాష్ట్ర శాసనసభకు, ముఖ్యమంత్రి మాటలకు విలువే లేదని కాంగ్రెస్ భావిస్తున్నపుడు వారిని అపహాస్యం చేయడానికే పంపినట్లవుతుంది.   బిల్లులో లోపాలు ఉంటే వాటికి రాజ్యాంగంలో పరిష్కారాలు కూడా ఉన్నాయని ఆయన ఏ ఉద్దేశ్యంతో అన్నారో కానీ, కాంగ్రెస్ అధిష్టానం తన స్వార్ధ రాజకీయ ప్రయోజనాల కోసం బిల్లుని ఎన్ని మెలికలు తిప్పినా, ఒకవేళ రాష్ట్రపతి బిల్లుపై వచ్చిన అభ్యంతరాలను, వ్యతిరేఖంగా వచ్చిన వాదనలను, ఇరుప్రాంతాలవారు కోరుతున్న సవరణలను పరిగణనలోకి తీసుకొన్నట్లయితే, అప్పుడు కాంగ్రెస్ అధిష్టానం ఆయనకు సంజాయిషీలు, వివరణలు చెప్పుకోవలసివస్తే తల దించుకోక తప్పదు.   ఒకవేళ ఆయన అభ్యంతరం చెప్పకపోయినా, రేపు బిల్లుకి వ్యతిరేఖంగా సుప్రీంకోర్టులో పిటిషన్లు దాఖలయినప్పుడు, బిల్లు రాజ్యాంగ సూత్రాలకు విరుద్దంగా రూపొందించబడిందని కోర్టు భావిస్తే, అప్పుడు దిగ్విజయ్ సింగ్ చెప్పినట్లుగానే వాటికి రాజ్యాంగ ప్రకారం పరిష్కారాలు చూపమని కేంద్రాన్ని ఆదేశిస్తే పోయేది కాంగ్రెస్ పరువే తప్ప రాష్ట్ర శాసనసభ పరువు కాదు.   బిల్లు తిరిగి వచ్చిన తరువాత దానిపై వచ్చిన అభ్యంతరాలను పరిశీలిస్తామని  ఒక్క ముక్కతో దిగ్విజయ సింగ్ సరిపెట్టి ఉందవచ్చును. కానీ, శాసనసభ బిల్లుపై ఎటువంటి అభిప్రాయం వ్యక్తం చేసినా మాకు నష్టం లేదనడం అహంకారమే. కాంగ్రెస్ పార్టీకి రెండు సార్లు కేంద్రంలో, రాష్ట్రంలో అధికారం కట్టబెట్టిన తెలుగు ప్రజల పట్ల దిగ్విజయ్ సింగ్ ఇంత చులకన భావం ఎందుకు ప్రదర్శిస్తున్నారో, ఇంత అవమానకరంగా ఎందుకు మాట్లాడుతున్నారో తెలియదు. ఆయన మాటల వలన సీమాంధ్రలో కాంగ్రెస్ పట్ల మరింత వ్యతిరేఖత పెరగడం తధ్యం.   కాంగ్రెస్ వ్యూహం ప్రకారం సీమాంధ్రలో కాంగ్రెస్ వ్యతిరేఖ ఓటుతో తన రహస్య మిత్రులకు రాజకీయ లబ్ది చేకూర్చి వారి నుండి మద్దతు పొందాలని భావిస్తోంది గనుకనే ఆయన ఈ విధంగా మాట్లాడుతూ ప్రజలలో కాంగ్రెస్ పట్ల మరింత వ్యతిరేఖతను పెంచే ప్రయత్నం చేస్తున్నారేమో అనే అనుమానం కలుగుతోంది. వినాశకాలే విపరీత బుద్ది అని దీనినే అంటారేమో!

tdp

తెదేపా ఎన్నికల సన్నాహాలు ఇంకా ఎప్పుడు మొదలవుతాయో

  రాష్ట్ర విభజన కారణంగా తెదేపా చాలా విచిత్రమయిన, ఇబ్బందికరమయిన పరిస్థితులను ఎదుర్కొంటోంది. రాష్ట్ర విభజన జరిగినా, జరుగకపోయినా రెండు ప్రాంతాలలో పోటీ చేయాలని భావిస్తున్నతెదేపా ఎన్నికలు దగ్గరపడుతున్నపటికీ, ఇంతవరకు తెలంగాణాపై దృష్టి కేంద్రీకరించలేకపోతోంది. ఎన్నికలలోగా రాష్ట్ర విభజన జరిగినట్లయితే, తెదేపా తెలంగాణా లో పోటీ చేయడానికి ఎన్నికల సంఘం వద్ద తమ పార్టీని జాతీయ పార్టీగా రిజిస్టర్ చేయించుకోవలసి ఉంటుంది. అంతే గాక తెలంగాణాకు ప్రత్యేకంగా ఒక అధ్యక్షుడిని, పార్టీ కార్యవర్గం, పాలక మండలి తదితర ఏర్పాట్లనీ చేసుకోవలసి ఉంటుంది. ఆ ఏర్పాట్లు చేసుకొని ఉంటే, వారు అక్కడ పార్టీని బలోపేతం చేసేందుకు గట్టిగా కృషి చేసేందుకు అవకాశం ఉండేది. అదేవిధంగా తెదేపా తెలంగాణాకు అనుకూలమనే సంకేతం ఇచ్చినట్లయి అక్కడి ప్రజలలో కూడా పార్టీ పట్ల నమ్మకం ఏర్పడేది.   కానీ, అదే కారణంగా పార్టీ సీమాంధ్రలో నష్టపోయే ప్రమాదం ఉంది. ఇప్పటికే తెదేపా ఇచ్చిన లేఖ కారణంగానే రాష్ట్ర విభజన జరుగుతోందని పనిగట్టుకొని ప్రచారం చేస్తున్న కాంగ్రెస్, వైకాపాలు, ఒకవేళ తెదేపా ఈ ఏర్పాట్లు మొదలుపెట్టినట్లయితే, తెదేపా రాష్ట్ర విభజనకు మొగ్గుచూపుతోంది కనుకనే తెలంగాణా కోసం ప్రత్యేక శాఖ ఏర్పాటు చేసుకొంటోoదని మరింత బలంగా ప్రచారం చేస్తే, సీమాంధ్రలో పార్టీకి తీరని నష్టం కలగవచ్చును. అంతే కాక తెలంగాణాకి ప్రత్యేక పార్టీ శాఖ ఏర్పాటు చేసినట్లయితే దాని కోసం ఆధిపత్యపోరు మొదలయితే, అది పార్టీని తెలంగాణాలో మరింత బలహీనపరుస్తుందనే భయం కూడా ఉండి ఉండ వచ్చును. అందుకే తెలంగాణాలో పార్టీకి తీరని నష్టం జరుగుతున్నా తెదేపా చూస్తూ వెనక్కి తగ్గవలసి వస్తోంది.   బహుశః వచ్చేనెల పార్లమెంటులో తెలంగాణా బిల్లు ఆమోదం పొందితే అప్పుడు వెంటనే రెండు రాష్ట్రాలలో తెదేపా శాఖల ఏర్పాట్లు చేసుకోవచ్చును. ఒకవేళ ఎన్నికలలోగా రాష్ట్ర విభజన జరగకుంటే యధాతధంగా కొనసాగవచ్చును. పార్లమెంటులో తెలంగాణా బిల్లు బహుశః ఫిబ్రవరి ఆఖరివారంలో ప్రవేశపెట్టబడవచ్చును. అందువల్ల తెదేపా మార్చి మొదటి వారం వరకు తెలంగాణా విషయంలో అడుగు ముందుకు వేయలేని పరిస్థితి ఉంటుంది. కానీ ఈ లోగా అభ్యర్ధుల ఎంపిక ఒక కొలిక్కి వస్తే సీమాంధ్రలో పేర్లను విడుదల చేసి, ఎన్నికల సన్నాహాలు మొదలుపెట్టుకోవచ్చును.

ysrcp

వైకాపా మడికట్టుకోని ఎందుకు కూర్చోందో

  రాజ్యసభ ఎన్నికల ప్రకటన వెలువడగానే వైకాపాకు తగినంత బలం లేకపోయినా, కాంగ్రెస్, తెదేపాలను దెబ్బతీసేందుకయినా తన అభ్యర్ధులను రంగంలో దింపుతుందని అందరూ భావించారు. కనీసం ఒక్క అభ్యర్దినయినా నిలబెట్టి వైకాపాలో చేరేందుకు ఆసక్తి చూపుతున్నసీమాంధ్ర కాంగ్రెస్, తెదేపా నేతలకు వలేసి క్రాస్ ఓటింగ్ కి ప్రోత్సహిస్తుందని అందరూ భావించారు. కానీ తగినంత మంది శాసనసభ్యుల బలం లేనందున తమ అభ్యర్ధులను నిలబెట్టడం లేదంటూ వైకాపా మడి కట్టుకొని కూర్చోవాలనుకోవడం చాలా ఆశ్చర్యకలిగిస్తోంది.   ఎదుటవాడివి రెండు కళ్ళు పోతాయంటే తనది ఒక కన్ను పోగొట్టుకోవడానికి కూడా సిద్దపడే వైకాపా ఇంత నీతిగా మాట్లాడటం చాలా ఆశ్చర్యం కలిగిస్తుంది. అందుకు వైకాపా చెప్పిన మరోసాకు కూడా చాలా విడ్డూరంగా ఉంది. ఇతర పార్టీల బలంమీద ఆధారపడి అభ్యర్థిని నిలబెడితే అది కుమ్మక్కు రాజకీయాల్లో భాగమేనని, విభజనకు అనుకూలంగా మూడు పార్టీలు కుమ్మక్కు రాజకీయాలు చేస్తున్నాయని న్నది తమ అభిప్రాయమని మైసూరా రెడ్డి ఆరోపించారు.   నిరుడు జరిగిన పంచాయితీ, సహకార ఎన్నికలలో వైకాపా తన రాజకీయ ప్రత్యర్దులతోనే కలిసి ఏవిధంగా షేరింగ్ చేసుకొందో అందరికీ తెలుసు. మరిప్పుడు నీతులు ఎందుకు ప్రభోదిస్తుందంటే, బహుశః కాంగ్రెస్ హై కమాండ్ నుండి పోటీకి అనుమతి రాకపోవడం వలననే కావచ్చును. సీమాంధ్ర కాంగ్రెస్ నేతలు అధిష్టానానికి వ్యతిరేఖంగా తమ అభ్యర్ధులను నిలబెట్టే ఆలొచనలో ఉన్నారు గనుక, కాంగ్రెస్ తన అభ్యర్ధులను గెలిపించుకోవాలంటే గతేడాది కాంగ్రెస్ లోనుండి వైకాపాలోకి గంపగుత్తగా వెళ్ళిపోయిన కాంగ్రెస్ శాసనసభ్యులందరి మద్దతు అవసరం ఉంటుంది. వారిని కాంగ్రెస్ పార్టీ అనర్హులుగా ప్రకటించినప్పటికీ, నేటికీ వారందరూ కాంగ్రెస్ శాసనసభ్యులుగానే వైకాపాలో కొనసాగుతున్నారు. గనుక, ఇప్పుడు వారి మద్దతు కోరి ఉండవచ్చును.   ఒకవేళ వైకాపా తన అభ్యర్ధిని కూడా పోటీలో నిలబెడితే కాంగ్రెస్ పార్టీకి మద్దతు ఇచ్చే అవకాశం ఉండదు గనుకనే బహుశః పోటీ చేయడం లేదు జగన్మోహన్ రెడ్డి పైకి కాంగ్రెస్ పార్టీని, దాని అధిష్టానాన్నిఎంతగా విమర్శిస్తున్నపటికీ, తమ మధ్య జరిగిన రహస్య ఒప్పందం మేరకు దానికి అన్నివిధాల మద్దతు కొనసాగించవచ్చును. కాంగ్రెస్ అధిష్టానం నిలబెట్టిన అభ్యర్ధులకు తగినంత బలం లేనట్లయితే వైకాపా శాసనసభ్యులు వచ్చి వారిని ఆదుకోవచ్చును. ఒకవేళ వైకాపా మద్దతు అవసరం పడకపోతే, వైకాపా యధావిధిగా తన నీతి సూక్తులు వల్లించుకొంటూ, కాంగ్రెస్, తెదేపా, కిరణ్ వర్గాలను విమర్శిస్తూ కాలక్షేపం చేసుకోవచ్చును. మరో రెండు వారాల్లో ఏ సంగతీ తేలిపోతుంది.

new political party

కొత్త పార్టీ ప్రచారానికి ప్రమోటర్స్ ఎవరో?

  గత వారం పదిరోజులుగా సమైక్యాంధ్ర పోస్టర్లు, హోర్డింగ్స్, టీవీ చానళ్ళలలో జోరుగా ప్రకటనలు సీమాంధ్ర ప్రజలను ఉరుములేని వర్షంలా కమ్ముకొంటున్నాయి. ప్రచారం ఇంత జోరుగా సాగుతున్న ఇంతవరకు ఈ ప్రచారం వెనుక ఎవరున్నారనే సంగతి చాలా గోప్యంగా ఉంచబడటం విశేషం.   పార్టీ స్థాపించి, దాని కార్యవర్గ సభ్యుల పేర్లు ప్రకటించి ఇంత భారీ ప్రచారం చేసి ఉండి ఉంటే చేస్తున్న ఖర్చుకి ఒక అర్ధం, పరమార్ధం ఉండేవి. కానీ కనీసం పార్టీ పేరు, వ్యక్తుల ఫోటోలు కూడా లేకుండా కోట్లు ఖర్చు చేసి ఇంత భారీ ఎత్తున ప్రచారం చేయడం చూస్తే, కొత్త పార్టీ వెనుక మంచి ‘సౌండ్ పార్టీలే’ ఉన్నాయని అర్ధమవుతోంది.   ఈ ప్రచారంలో నినాదాలు ముఖ్యమంత్రి కిరణ్ కుమార్ రెడ్డి చెపుతున్నమాటలే గనుక ఆయనే ఈ ఖర్చు అంతా భరిస్తున్నారా? అనే అనుమానం కలుగుతుంది. ఒకే ఒక వ్యక్తి ఇంత భారీగా ఖర్చు పెట్టడం కష్టమే కాదు చాల రిస్క్ తో కూడుకొన్న వ్యవహారం. గనుక మొదటి నుండి ఆయనను వెనకేసుకు వస్తూ అండగా నిలబడిన విజయవాడ యంపీ లగడపాటి రాజగోపాల్, మంత్రులు టీజీ వెంకటేష్, శైలజానాథ్, గంటా శ్రీనివాసరావు తదితరులు బహుశః ఈ ఊరుపేరులేని కొత్త పార్టీకి పార్టనర్స్ మరియు ప్రమోటర్స్ అయ్యుండే అవకాశం ఉంది. వీరు కాక కొత్త పార్టీ పెడితే టికెట్స్ ఆశిస్తున్న లేదా ఖాయం చేసుకొన్నఅభ్యర్ధులు కూడా పెట్టుబడి పెడుతూ ఉండవచ్చును.   ఇక ఇందులో తెలుస్తున్నమరో విషయం ఏమిటంటే, ఎన్నికలలో పోటీచేసేందుకయితే ఎంతఖర్చుకయినా వెనుకాడని మన రాజకీయ నేతలు, రాష్ట్రాన్ని సమైక్యంగా ఉంచడం కోసం ఇంత చేతి చమురు వదిలించుకోరు. కానీ ఖర్చు చేస్తున్నారంటే అర్ధం కొత్తపార్టీ ఎన్నికలనే లక్ష్యంగా చేసుకొని ఏర్పాటవుతోందని తెలుస్తోంది.   ఈరోజు లగడపాటి రాజగోపాల్ మీడియాతో మాట్లాడుతూ “పిచ్చ్ సిద్దమయింది. మరి అది బ్యాటింగ్ కి అనుకూలమో లేక బౌలింగ్ కి అనుకూలమో త్వరలో తేలిపోతుంది,” అని వ్యాక్యానించారు. ఆయన మాటల ప్రకారం బ్యాటింగ్ అంటే కొత్త పార్టీ స్థాపించి ఎన్నికలలో పోటీ చేయడం అనుకొంటే, బౌలింగ్ అంటే రాష్ట్ర విభజన చేస్తున్నకాంగ్రెస్ పార్టీకి అనుకూలంగా కొత్తపార్టీ వెనక్కి తగ్గడంగా అనుకోవచ్చునేమో! అంటే ఈ ఒట్టొట్టి ప్రచారంతో కొత్త పార్టీ స్థాపించబోతున్నట్లు కాంగ్రెస్ అధిష్టానాన్నిభయపెట్టి లొంగదీసుకొని, రాష్ట్ర విభజన విషయంలో వెనక్కితగ్గేలా చేసి కొత్తపార్టీ కూడా వెనక్కి తగ్గుతుందని ఆయన చెపుతున్నారేమో! బహుశః అందుకే ఇంత భారీ ఎత్తున ప్రచారం చేస్తున్నఎవరి పేర్లు బయటపడకుండా జాగ్రత్తపడుతున్నారు.   కానీ, కొత్త పార్టీ కూడా కాంగ్రెస్ పార్టీకి మొలవబోయే మరో కొత్త కొమ్మేఅయినప్పుడు ఇంకా ఈ ముసుగులో గుద్దులాటలెందుకో? ఈ బ్యాటింగు, బౌలింగ్ దేనికో, ఈ పిచ్చిపిచ్చి పిచ్చులు దేనికో లగడపాటే చెప్పాలి మరి.

telangana state

ఉత్తరా(మా)యణం

    .......కె. శివరామకృష్ణ     రాశాను ప్రేమలేఖలెన్నో... దశాను ఆశలెన్నో.. అంటూ ప్రణయ గీతం వినపడాలే కానీ కాలం యవనంలోకి తొంగి చూడని వారు ఉండరు! ఇప్పుడైతే.. చేశాను ఎస్ఎంఎస్ లెన్నో.. పంపాను ఊసులెన్నో' అంటూ ఈ తరం నాయకానాయికలు ' లవ్ ' చిందులేస్తారు. 'సెల్' కాలమొచ్చి నిద్రలేచావా' అంటూ మేల్కొలుపులు, సుప్రబాతం పలికి.. మంచిగా నిద్రపో' అంటూ పవళింపు సేవవరకు ఎప్పటికప్పుడు 'సొల్లు' తున్నారు కానీ.. ఇంతకుమునుపైతే.. అన్నింటికీ లేఖలతోనే రాయభారం నడిచేది చివరకు రాజకీయాల్లో నిర్ణయాలు, ప్రతిస్పందనలు కూడా లేఖల్లోనే బట్వాడా. అప్పట్లో.. రాజకీయ ప్రేమలేఖలు వెలుగు చూడడానికి నాలుగైదు రోజులు పట్టేది. ఎవరో ఒక లీకువీరుడు ఉప్పదించేదాక తాజా కబురు బయకి పొక్కెది కాదు. రాజకీయం స్పీడ్ పెరిగాక. అక్కడ లేఖ రాయడం ఇక్కడ లీకు చేయడం అంతా అరగంటకో వార్త బులిటెన్ సాక్షిగా బహిరంగ రహస్యమవుతుంది ! రాజకీయం ముదురు పాకాన పడే కొద్ది లేఖల్లో అక్షరాలు ఆయుధాలుగా మారతాయి ! ఈ అక్షరాలే శిలాఘాతాలై రాస్తాల్ని విభజించే పాశుపతాస్త్రాల అవుతాయనేందుకు ఆంధ్రప్రదేశ్ ప్రత్యక్ష ఉదాహరణ. యూపీఎ నిర్ణయానికి ఆధారమైన కాంగ్రెస్ వర్కింగ్ పార్టీలన్నీ లేఖలు ఇచ్చాకనే మేం నిర్ణయం తీసుకున్నాం. అని ! భాషాప్రయుక్త రాష్ట్రాన్ని విడగొట్టే సత్తా అక్షరానికి ఉందా.. అనుమానం ఉంటె ఏ కాంగ్రెస్ కామందుడినడిగినా ఎదే చెబుతాడు.   విభజన లేఖలు, సమన్యాయం లేఖలు, రాజ్యాంగాన్ని కాపాడాలని ఆక్రోశించే లేఖలు. అఫిడవిట్లతో  లేఖలు, బహిరంగ లేఖలు అన్నీఇన్నని కాదులే! ఎప్పటికెయ్యది ప్రస్తుతమో అన్నట్టుగా బోలెడు లేఖలు, కానీ ప్రేమలేఖల మతలబే  వేరు! ప్రేయసికైనా శ్రీమతికైనా లేదా శ్రీవరికైనా రాసే లేఖలో ప్రియాఅన్న పిలుపు నుంచి ఇట్లు నీ ప్రియసఖి /సఖుడు' అనేంతవరకు ప్రతి అక్షరం ప్రేమపాశమే. వరసమారితే ఈ ప్రేమదాసులే దేవదాసులన్నది వైన్షాపులకెరుక! ఆరోపణలు, రాజీనామాలతో లేఖలు రాసే రాజకీయ గోవిందయ్యలు కూడా ఈ  మధ్య ప్రేమలేఖలని పలవరిస్తున్నారు! షోకాజ్ల్ని, రాజీనామాల్ని ప్రేమిస్తున్నారు! విభజన నిర్ణయానికి సీమాంధ్రలో కాంగ్రెస్ చచ్చిపోయిందోచ్' అంటూ ఎదురైనా వారినల్లా గిల్లి మరీ చేబుతున్న జేసి దివాకర్ రెడ్డికి అధిష్టానం షోకాజ్ ఇచింది. పార్టీ పరువు బాగున్నడితే ,ఏమిటప్పా సంగతి ' అంటే అదేదో మా కుటుంబ వ్యవహారం లే అన్నట్టుగా నేతా శ్రీ బదులిచ్చే వారు. 'వేటుకు వేళయరా'  అని కోడై కూసే శికాజ్ కూడా ప్రేమలేఖ గా కనిపించింది. ఈ లెటర్, లో విరసమే ఉంటుందని తెలిసినా లేఖను ప్రేమించడం నేతాగణానికే చెల్లుతుంది. తన శాఖా మార్చాలని అలిగిన శ్రీధర్బాబు ఎడం చేత్తో పమపిన రాజీనామా గురించి సీఎం ను అడిగితె ' ఆ లేఖే కాదు.. చాలా ప్రేమలేఖలు అందుతున్నాయి అంటారు! ఈ లెక్కన ప్రేమలేఖల్ని రాజకీయనాయకులు తెగ ప్రేమించేస్తే ప్రేమికులేమైపోవాలి! వారి ప్రేమాయణం ఏం కావాలి! మనసుకింత హాయినిచ్చే కబుర్లు మోసుకొచ్చే ఉత్తరం ఇచ్చే పోస్ట్ మ్యానే కరువయ్యాడు! ఎక్కడన్నా.. అడపా దడపా పోస్ట్లు వినిపిస్తున్నాయే కానీ ఇవి తంతి తపాలా కార్యాలయం పోస్ట్లు కావండోయ్! అవన్నీ ట్విట్టర్,పేస్ బుక్, గూగుల్ ప్లస్,ఆర్కూట్ పోస్ట్లు. పోస్ట్లు రెండు కూడా ఊసుల మోపులే కానీ రెండింటికి కొంచం ధర్మబేధముంద. తపాలా లేఖను చిరునామాదారులే చదువుకుంటారు. ఇంటర్నెట్లో చేసే పోస్ట్ల్ల్ని విశ్వదర్శనం చేయిస్తారు. ఎవరు పోస్ట్ చేసినా మిగిలిన నెట్జీవుల్ని చూస్తాయి. వ్యాఖ్యలు, ప్రతివ్యాఖ్యలతో  పోస్ట్ని కాస్తా కామెంట్ భారతం' చేస్తాయి.  ఎన్నికల ప్రచారంలో నాయకులకు మైలేజీ ఇవ్వడంలోనూ' ఈ పోస్ట్'ల తీరే వేరు. కాంగ్రెస్, బీజెపి నాయకులైన దిగ్విజయ్, మోదీల మధ్య పోట్లా(స్ట్) ట నెటిజన్లను కూడా విభజన చేయడం షరా మామూలే! లక్ష కోట్లపై పేటెంట్ ఉన్న నాయకుడు ' సోనియమ్మను నేను నేను అడుగుతున్నా' అని ప్రశ్నించాగానే నెటిజన్లు కూడా ' నేను అడుగుతున్నా' అంటూ పేరడీ ప్రశ్నలతో పోస్టెత్తించారు. ల్యాండ్ ఫోన్ల పై మొబైల్ లా దాడి పెరిగాక తట్టి తపాలాశాఖ కాస్తా తంతే 'టపాలా శాఖగా' మారింది.  ఆ శాఖ ఉండేదంనట్టుగా  గోడకు వేలాడదీసిన తీగకు  గుది గుచ్చిన ఉత్తరాలే సాక్షి. హైటెక్ కాలంలోనూ ఉత్తరాలేంటి ? అని నొసలు చిట్లించబోయి మౌస్ క్లిక్ చేస్తాం కానీ..! అక్షరానిది అక్షయశక్తి. అక్షరాలను వెతుకుతూ ముందుకు పరిగెత్తే చూపుల వెనుక మనసు ఉరుకెత్తుతుంది. తోచినప్పుడల్లా లేఖాగుచ్చంలోని ఊసుల్ని నెమరవేసుకోవచ్చు. ఈ ముద్రణాలవల్లే 24 గంటల పాటు వార్తా ప్రత్యక్ష ప్రసారాలు చేసే టీవీ చేనెళ్ళు ఎన్ని వచ్చినా పత్రికలు' నెట్' కొస్తున్నాయి. ఏతావాతా ఉత్తరాలు బట్వాడా చేసే తపాలాశాఖ ఇటివలే కలం చేసిన ' టెలిగ్రామ్ ' లాగా టపా కట్టేయకుండా బతికి బట్టకట్టాలని ఉత్తర ప్రియుల ఆరాటం! ఇదంతా ఎందుకంటారా ' 'ఉత్తరామాయణ' కలం గుర్తుకొచ్చి ఉత్తి పుణ్యానికి చెప్పా!

aam admi

రాజకీయాలలో ఐటెం గర్ల్!

  సినిమాలలో ఐటెం గర్ల్స్ ను చూసాము. చివరికి క్రికెట్ వంటి ఆటలలో చీర్ గర్ల్స్ ని కూడా చూసాము కానీ, రాజకీయాలలో ఐటెం గర్ల్స్ ని ఎన్నడూ చూసి ఉండము. రాజకీయాలలో ఆమాద్మీ పార్టీ ఒక ఐటెం గర్ల్ వంటిదని ప్రముఖ రచయిత, ఆమాద్మీ పార్టీ మద్దతుదారుడయిన చేతన్ భగత్ వ్యాఖ్యానించడం విశేషం.   ఆయన మీడియాతో మాట్లాడుతూ, “సినిమా ఆఫర్లు దొరకని హీరోయిన్లు ఏవిధంగా ఐటెం గర్ల్స్ గా మారిపోతారో అదేవిధంగా ప్రభుత్వం నడపడం చేతకాని ఆమాద్మీ పార్టీ కూడా రాజకీయాలలో ఒక ఐటెం గర్ల్ గా మారిపోయిందిప్పుడు. సాక్షాత డిల్లీ ముఖ్యమంత్రి అరవింద్ కేజ్రీవాల్ నేతృత్వం వహించి నడిరోడ్డు మీద రెండు రోజులు ధర్నా చేయడాన్ని చూసి నేను చాలా సిగ్గుపడుతున్నాను. రానున్నఎన్నికలలో ఆమాద్మీ పార్టీ దేశవ్యాప్తంగా పోటీచేయబోతున్నందున దేశప్రజల దృష్టిని ఆకర్షించాలనే ప్రయత్నంలో ధర్నాకు కూర్చోవడం సిగ్గుచేటు,” అని అన్నారు.   దేశంలో తక్కువ ధర ప్లేన్ టికెట్స్ పరిచయం చేసిన గోపీనాథ్ ఆమాద్మీ పార్టీలో సభ్యుడు కూడా. ఆయన మీడియాతో మాట్లాడుతూ, ఒక ముఖ్యమంత్రి స్థాయి వ్యక్తి ఈవిధంగా నడిరోడ్డు మీద ధర్నాలు చేయడం ఏవిదమయిన సంకేతాలు పంపిస్తుంది? సమస్యలుంటే వాటిని తన కార్యాలయంలో కూర్చొని పరిష్కరించాలి తప్ప ఇలా నడిరోడ్డు మీద కూర్చొని ధర్నాలు చేయడం, ప్రజలకి ఇబ్బందులు కలిగించడం సరయిన పద్ధతి కాదు,” అని అన్నారు.   ఒకప్పుడు ఆయనతో కలిసి పనిచేసిన మాజీ పోలీసు అధికారిణి కిరణ్ బేడీ మరో అడుగు ముందుకు వేసి, “పరిపాలించలేని ఆమాద్మీ ప్రభుత్వాన్ని వెంటనే డిస్మిస్ చేయాలని కేంద్రాన్ని కోరారు.”   అపూర్వమయిన ప్రజాధారణతో ప్రభుత్వ పగ్గాలు చెప్పటిన ఆమాద్మీ పార్టీపై దేశ వ్యాప్తంగా ప్రజలు చాలా ఆశలు పెట్టుకొన్నారు. అదేవిధంగా ఆమాద్మీ పార్టీ కూడా ప్రజలకు అనేక ఆశలు రేపింది. బహుశః ఈ మూడు వారాల పాలనలోనే అవన్నీఆచరణ సాధ్యం కావని గ్రహించిందో లేక తన పరిమితులు గ్రహించడంతో ఏమీ చేయలేని నిస్సహాయ స్థితిలో ఈవిధమయిన చవకబారు ఎత్తుగడలతో కాలక్షేపం చేస్తోందో కానీ మొత్తం మీద, కేవలం మూడు వారాలలోనే ఆమాద్మీ తన పరువు పోగొట్టుకొంది.   వచ్చే ఎన్నికలలో దేశంలో అన్ని రాష్ట్రాలలో వీలయినన్ని ఎక్కువ యంపీ స్థానాలకు పోటీ చేస్తానని ప్రకటించిన ఆమాద్మీ ఈ ధర్నాతో ఇతర రాష్ట్ర ప్రజలను ఆకట్టుకొనే ప్రయత్నం చేయబోతే అది కాస్తా బెడిసికొట్టి పార్టీ ప్రతిష్టను మంటగలపడం వలన తన అవకాశాలను తానే స్వయంగా పాడుచేసుకొన్నట్లయింది. ప్రజల సమస్యలు తీర్చుతుందని ఆమాద్మీని ఎన్నుకొంటే ఇప్పుడు అదే ప్రజలకు సమస్యగా మారడం విచిత్రం.   ఆమాద్మీ వైఫల్యం కాంగ్రెస్. బీజేపీలకు వచ్చేఎన్నికలలో వరంగా మారవచ్చును. అటువంటి పార్టీలకు ఓట్లు వేస్తే ఏవిధంగా వృధా అవుతాయో అవి కధలుకధలుగా చెప్పి, ప్రజలను తమ వైపుకి త్రిప్పుకోవచ్చును. అందువల్ల ఆమాద్మీ ఇప్పటికయినా మేల్కొని మిగిలిన కొద్దిపాటి సమయాన్ని సద్వినియోగం చేసుకొని, తన హామీలను అమలుచేయలేకపోయినా, కనీసం డిల్లీలో చక్కని పాలన అందించే ప్రయత్నం చేసినా ఉన్నఆ పరువయినా మిగులుతుంది. లేకుంటే, వచ్చే ఎన్నికల తరువాత ఆమాద్మీ నామరూపాలు లేకుండా మయమయిపోవడం తధ్యం.

congress

తెలంగాణాపై కాంగ్రెస్, బీజేపీల డబుల్ గేమ్స్-1

                                                                                కాంగ్రెస్ వ్యూహం: కాంగ్రెస్, బీజేపీలు తెలంగాణా అంశంతో చాలా కాలంగా దాగుడు మూతలు ఆడుతున్నాయి. ఎన్నికలలోగా రాష్ట్ర విభజన చేసి, తెలంగాణా ఏర్పాటు చేస్తానని కాంగ్రెస్ పార్టీ చెపుతున్నపటికీ, సకాలంలో పార్లమెంటులో బిల్లు ప్రవేశపెట్టి దానిని ఆమోదింపజేస్తుందో లేదో అనుమానమే. ఇక, బీజేపీ బిల్లుకి బేషరతుగా మద్దతు ఇస్తామని చెపుతున్నపటికీ, దాని మాటలకి చేతలకి ఎక్కడా పొంతన కనబడటం లేదు. రాష్ట్ర విభజన ద్వారా రాష్ట్రంలో తన రాజకీయ ప్రత్యర్ధులను చావుదెబ్బతీసి, అధికారం చేజిక్కించుకోవాలని కలలుగంటున్నకాంగ్రెస్ పార్టీ, ప్రస్తుత పరిస్థితుల్లో తప్పకుండా రాష్ట్ర విభజన చేస్తుందనే నమ్మకం లేదు. ఎందుకంటే, విభజన చేసినా, చేయకపోయినా తెలంగాణాలో కాంగ్రెస్ గెలిచే అవకాశం లేదు. ఇంతవరకు వెలువడిన సర్వేలలో తెరాసకే విజయావకాశాలు ఎక్కువని తేలడంతో, కేసీఆర్ విలీనానికి ఇష్టపడటం లేదు. తెరాస కాంగ్రెస్ పార్టీలో విలీనం కాకపోయినట్లయితే తెరాసను తట్టుకొని కాంగ్రెస్ గెలవలేదు. రాష్ట్ర విభజన నిర్ణయంతో కాంగ్రెస్ సీమాంధ్రలో చాలా వ్యతిరేఖత మూటకట్టుకొంది. అందుకే ఆ వ్యతిరేఖతను కూడా తెలివిగా సొమ్ము చేసుకొని రానున్నఎన్నికలలో గెలిచేందుకు కిరణ్ కుమార్ రెడ్డితో మరో ‘కాపీ కాంగ్రెస్ పార్టీ’ స్థాపనకు కూడా రంగం సిద్దమవుతోంది. ప్రస్తుతం కాంగ్రెస్ అమలు చేస్తున్నవ్యూహం ప్రకారం సీమాంధ్రలో సమైక్యవాదంతో కిరణ్, జగన్ ఇద్దరు గెలవాల్సి ఉంటుంది. అయితే అందుకు రాష్ట్ర విభజన చేయడం కంటే, అంతవరకు తీసుకువెళ్ళగలిగితేనే వారిరువురూ ఎన్నికలలో పూర్తి ప్రయోజనం పొందే అవకాశం ఉంటుంది. ఒకసారి రాష్ట్ర విభజన జరిగి ఎన్నికలలోగా తెలంగాణా కూడా ఏర్పాటయిపోయినట్లయితే, ఇక వారు చేసే సమైక్యవాదానికి అర్ధం ఉండదు గనుక కాంగ్రెస్ పార్టీ విభజన ప్రక్రియను కడదాకా తీసుకు వెళ్లి బీజేపీ మీద నెపం నెట్టి బయటపడవచ్చును. లేదా బిల్లుని రాష్ట్రపతి వద్ద త్రొక్కిపెట్టించయినా తప్పుకోవచ్చును. ఒకవేళ కాంగ్రెస్ పార్టీ వచ్చేఎన్నికలలో గెలిస్తే మళ్ళీ అధికారంలోకి వచ్చిన తరువాత తెలంగాణా సమస్యను తాపీగా పరిష్కరించుకొనే అవకాశం ఉంటుంది. ఓడిపోయేట్లు ఉంటే, తెలంగాణా సమస్యను మరింత జటిలం చేసి వదిలిపెట్టవచ్చును.

congress

తెలంగాణాపై కాంగ్రెస్, బీజేపీల డబుల్ గేమ్స్-2

                                           బీజేపీ  వ్యూహం ఇక, బీజేపీ విషయానికి వస్తే, తెలంగాణా బిల్లుకి మద్దతు ఈయడమంటే కాంగ్రెస్ గెలుపుకి తోడ్పడటమే అవుతుంది. గనుకనే, మొదటి నుండి సమన్యాయం రాగం ఆలపిస్తూ తన జాగ్రత్తఃలో తాను ఉంది. ఆ ప్రయత్నంలోనే మొన్న డిల్లీలో తన సీమాంధ్ర నేతలతో ర్యాలీ చేయించి దానికి వెంకయ్యనాయుడిని పంపించి తన మనసులో మాట బయటపెట్టింది. తాము తెలంగాణా ఏర్పాటు కోరుకోతున్నామని చెపుతూనే, సీమాంధ్రకు అన్యాయం జరగకుండా బిల్లులో కొన్ని సవరణలు పెడతామని వెంకయ్యనాయుడు ద్వారా సూచింది.   రాష్ట్ర విభజన చేసి సీమాంధ్ర ప్రజల ఆగ్రహానికి గురయిన కాంగ్రెస్ పార్టీ, ఇప్పుడు బీజేపీ సీమాంధ్ర ప్రాంతానికి అనుకూలంగా చేసే ప్రతిపాదనలను తిరస్కరించలేదు. అలాగని వాటిని ఆమోదించి తెలంగాణా ప్రజలకు ఆగ్రహం కలిగించలేదు. గనుక, ముందుగానే ఈవిధంగా హెచ్చరించి కాంగ్రెస్ పార్టీని వెనక్కి తగ్గేలా చేయగలిగితే దానిపై నెపం వేసి తప్పుకోవాలని బీజేపీ ప్రయత్నిస్తోంది. అందుకే వచ్చే ఎన్నికలలో తమ పార్టీ గెలిస్తే ఇరుప్రాంత ప్రజలకి పూర్తి ఆమోదయోగ్యంగా రాష్ట్ర విభజన చేస్తామని బీజేపీ అధ్యక్షుడు రాజ నాథ్ సింగ్ తో సహా బీజేపీ అగ్రనేతలందరూ కొత్త పల్లవి అందుకొన్నారు. అచ్చ తెలంగాణావాది, బీజేపీ రాష్ట్ర అధ్యక్షుడు కిషన్ రెడ్డి ఇప్పుడు గతంలో మాదిరిగా తమ పార్టీ తెలంగాణా బిల్లుకి బేషరతుగా మద్దతు ఇస్తుందని గట్టిగా చెప్పలేకపోవడానికి కారణం కూడా అదే.   వచ్చే ఎన్నికలలో తెలంగాణాలో బీజేపీ మరిన్ని ఎక్కువ సీట్లు సంపాదించుకోవాలంటే, మరింత బలంగా తెలంగాణా వాదం వినిపించాల్సి ఉంటుంది. అలా జరగాలంటే వచ్చే ఎన్నికలలోగా రాష్ట్ర విభజన జరగకూడదు గనుక బిల్లుకి బీజేపీ బిల్లుకి మద్దతు ఈయకుండా తప్పుకోవచ్చును. అదేవిధంగా, సీమాంధ్రలో తెదేపాతో జత కట్టాలని భావిస్తున్న బీజేపీ అక్కడ కూడా లాభాపడాలంటే, కాంగ్రెస్ పార్లమెంటులో తెలంగాణా బిల్లుని ప్రవేశపెట్టినా, పెట్టకపోయినా వెంకయ్య నాయుడు వంటి వారు గట్టిగా సీమాంధ్ర హక్కుల గురించి మాట్లాడవలసి ఉంటుంది. ఇప్పుడు ఆయన అదే చేస్తున్నారు. ఒకవేళ కాంగ్రెస్ లెక్కలు సరిచూసుకొని పార్లమెంటులో బిల్లు ప్రవేశపెట్టినట్లయితే, ముందే చెప్పినట్లుగా బీజేపీ బిల్లులో సీమాంధ్రకు అనుకూలంగా కొన్ని సవరణలు సూచించి కాంగ్రెస్ పార్టీని ఇరకాటంలో పెట్టి తను క్షేమంగా బయటపడే ప్రయత్నం చేస్తుంది. ఒకవేళ కాంగ్రెస్ ఏ కారణంగానయినా బిల్లుని ప్రవేశపెట్టకపోయినా అంతకంటే ఎక్కువ రాద్ధాంతం చేసి, తెలంగాణా ప్రజలను ఆకట్టుకొనే ప్రయత్నం చేయడం ఖాయం. అందువల్ల, ఈ రెండు ప్రత్యర్ధ పార్టీలు ప్రజలకిచ్చిన మాట కోసం ఒకదానికొకటి సహకరించుకొని వచ్చే ఎన్నికలలోగా తెలంగాణా ఏర్పాటు చేస్తాయని నమ్మడం కష్టం.

shashi tharoor

నేరారోపణలు ఎదుర్కొంటున్న శశీధరూర్ కి కాంగ్రెస్ సానుభూతి !

  కేంద్ర మంత్రి శశీధరూర్ భార్య సునంద పుష్కర్ రెండు రోజుల క్రితం డిల్లీలో ఒక ప్రముఖ హోటల్ లో అనుమానాస్పద స్థితిలో మరణించారు. తన భర్తకు మెహర్ తరార్ ఒక పాకిస్తానీ పాత్రికేయురాలితో వైవాహికేతర సంబంధం ఉందని, ఆమె తమ కాపురంలో చిచ్చుపెట్టినట్లు సునంద ఆరోపించింది. అంతేగాక, మెహర్ తరార్ పాకిస్తానీ గూడచారి సంస్థ ఐ.యస్.ఐ. ఏజెంట్ కూడా అని ఆమె ఆరోపించారు. ఈ నేపధ్యంలో సునంద పుష్కర్ హోటల్ రూములో అనుమానాస్పద పరిస్థితిలోమరణించడంతో, ఆమె భర్త శశీధరూర్ తన నిర్దోషిత్వం నిరూపించుకోవలసి ఉంది.   సునంద ఆరోపిస్తునట్లు శశీధరూర్ వైవాహికేతర సంబంధం కలిగి ఉండటం నిజమయితే అదొక నేరము. ఇక కేంద్రమంత్రి వంటి ఒక బాధ్యాతాయుతమయిన పదవిలో ఉంటూ, ఒక పాకిస్తానీ మహిళతో అందునా ఒక పాత్రికేయురాలు, పాకిస్తానీ గూడచారి సంస్థ ఐ.యస్.ఐ. ఏజెంట్ అని ఆరోపింపబడుతున్నవ్యక్తితో సంబంధాలు కలిగి ఉండటం మరో తీవ్రమయిన నేరం. సునంద పుష్కర్ వంటి ఒక మహిళ తన భర్తపై ఊసుపోక ఆరోపణలు చేసి ఆత్మహత్య చేసుకొంటుందని భావించలేము. కానీ, ఆమె ఆరోపణలలో నిజానిజాలు ఎలా ఉన్నపటికీ, వారిరువురి మధ్య పాకిస్తానీ మహిళా కారణంగానే చాలా గొడవలు జరిగాయని, చివరికి అదే ఆమె మరణానికి దారి తీసినట్లు స్పష్టమవుతోంది.   ఈ వ్యవహారంలో శశీధరూర్ దోషా, నిర్దోషా? అనే సంగతిని తేల్చవలసింది పోలీసులు. కానీ, సునంద పుష్కర్ మరణం తరువాత కాంగ్రెస్ అధ్యక్షురాలు సోనియా గాంధీతో సహా మొత్తం కాంగ్రెస్ నేతలందరూ కూడా ఆయనకు సంతాపం తెలిపేందుకు బారులు తీరడంతో అతను నిర్దోషని వారు ముందే దృవీకరిస్తునట్లుంది. ఒక పాకిస్తానీ మహిళతో వైవాహికేతర సంబంధం, భార్య అనుమానస్పద మరణం వంటి రెండు తీవ్ర అభియోగాలను ఎదుర్కొంటున్న శశీధరూర్ ని, ముందుగా మంత్రి పదవిలోనుండి తప్పించి, ఆయనపై విచారణకు ఆదేశించవలసిన కాంగ్రెస్ అధిష్టానం, అతనికి సానుభూతి చూపడం ఒక తప్పయితే, అతనికి తమ మద్దతు ఉన్నట్లుగా వ్యవహరించడం ద్వారా పోలీసు విచారణను, కేసును కూడా పరోక్షంగా ప్రభావితం చేయడం మరో పెద్ద తప్పు. స్వయంగా ఒక మహిళా అయిన సోనియా గాంధీ, సాటి మహిళకు అన్యాయం చేసిన (చేసినట్లు ఆరోపణలు ఎదుర్కొంటున్న) వ్యక్తిని స్వయంగా పరామర్శించడం చాలా తప్పని చెప్పవచ్చును. అదే ఒక సాధారణ వ్యక్తి ఇటువంటి నేరారోపణలు ఎదుర్కొంటునట్లయితే సమాజం అతనిని ఇంచుమించుగా వెలివేసినంత పనిచేసేది. మహిళా సంఘాలు కూడా ఉద్యమించి ఉండేవి. కానీ, శశీ ధరూర్ కేంద్రమంత్రి కావడంతో అతనికి మినహాయింపు దక్కిందేమో! అని భావించాల్సి ఉంటుంది.                 

new political party

సమైక్య పార్టీ రిలీజ్ ఎప్పుడు?

సీమాంధ్రలో కొత్త రాజకీయ పార్టీ స్థాపనకి తెర వెనుక సన్నాహాలు చాలా జోరుగానే సాగుతున్నట్లున్నాయి. ముఖ్యమంత్రి కిరణ్ కుమార్ రెడ్డి ఇటీవల తరచూ పలుకుతున్న“సమైక్యం మా విధానం, సమైక్యాంధ్ర మా నినాదమంటూ” వ్రాసి ఉన్నపోస్టర్లు, భారీ ఫ్లెక్సీ బ్యానర్లు రైల్వే స్టేషన్లు, బస్టాండ్లలో, ప్రధాన కూడళ్ళలో ఇప్పుడు విరివిగా కనిపిస్తున్నాయి. కానీ పోస్టర్లలో ఏ రాజకీయ నేత ఫోటో లేకపోవడంతో, కొత్త పార్టీపై ప్రజలలో, మీడియాలో కూడా చర్చ సాగుతోంది. దానికి ముఖ్యమంత్రి కిరణ్ కుమార్ రెడ్డి సారధ్యం వహిస్తారని అందరూ భావిస్తున్నపటికీ ఇంతవరకు ఆయన మాత్రం బయటపడలేదు.   పార్టీ పెట్టకమునుపే, పార్టీ ఊరు పేరు కూడా లేకుండా ఇంత భారీ ఖర్చుతో భారీ ఎత్తున ప్రచారం చేయడం చూస్తే కనీసం రెండు మూడు పెద్ద తలకాయలు దీనివెనుక ఉండవచ్చుననిపిస్తోంది. ఒకవేళ ఇది కూడా కాంగ్రెస్ అధిష్టానం వ్యూహంలో భాగమే అయినట్లయితే, కొత్త పార్టీ స్థాపనకు తెరవెనుక నుండి కాంగ్రెస్ కూడా సహాయపడుతున్నా ఆశ్చర్యం లేదు. కానీ, ఇందులో ప్రస్తుతానికి ప్రధాన పాత్రధారులుగా ముఖ్యమంత్రి, ఆయన సహచర మంత్రులయిన శైలజానాథ్, టీజీ వెంకటేష్, గంటా శ్రీనివాసరావు, లగడపాటి తదితరులు కనిపిస్తున్నారు. వీరికి ఏపీయన్జీవోల అధ్యక్షుడు అశోక్ బాబును కూడా జోడించుకోవచ్చును. ఆయన ఈ కొత్తపార్టీలో చేరడమో లేక దానికి తమ ఉద్యోగుల పూర్తి మద్దతు అందించడమో చేయవచ్చును. బహుశః జనవరి 23ముహూర్తం ఖరారు చేసుకొని ప్రచారం మొదలుపెట్టినట్లున్నారు గనుక, ఆరోజుకి ఈ కొత్త సమైక్య పార్టీపై పూర్తి స్పష్టత రావచ్చును.

jagan mohan reddy

జగన్ ప్రతిష్ట మసకబారడానికి కారణాలెన్నో

  ఇటీవల బెంగళూరుకు చెందిన ఒక సర్వేసంస్థ సీమాంధ్రలో నిర్వహించిన సర్వేలో జగన్మోహన్ రెడ్డి ప్రజాధారణ (పాపులారిటీ) రాజశేఖర్ రెడ్డి మరణించినప్పుడున్న70 శాతం నుండి ఒకేసారి 22శాతానికి పడిపోయినట్లు బయటపెట్టింది. ఆయన కాంగ్రెస్ పార్టీ నుండి బయటకు వచ్చి ఓదార్పుయాత్ర మొదలుపెట్టిన తరువాత ప్రజాధారణ కొంత నిలకడగా ఉన్నట్లు కనబడినప్పటికీ, ఆయన అరెస్టుతో పరిస్థితి ఒక్కసారిగా మారిపోయింది. ఒకవైపు సీబీఐ జేడీ లక్ష్మి నారాయణ జగన్మోహన్ రెడ్డి కేసుల పరిశోధనతో రాష్ట్ర వ్యాప్తంగా ప్రజలలో మంచి పేరు సంపాదించుకొనగా, క్రింద కోర్టు నుండి సుప్రీం కోర్టు వరకు అన్ని కోర్టులు బెయిలు తిరస్కరిస్తున్నపుడు జగన్మోహన్ రెడ్డి మాత్రం పరువు పోగోట్టుకొన్నారు.   కేంద్రం రాష్ట్ర విభజనకు పూనుకోగానే, వైకాపా వెంటనే తట్టాబుట్టా సర్దుకొని తెలంగాణాలో బయటపడి సమన్యాయం అనడం, ఆ తరువాత సమైక్యాంధ్ర నినాదం అందుకోవడంతో, మొట్టమొదటిసారిగా ప్రజలకి ఆయన విస్వసనీయతపై అనుమానాలు మొదలయ్యాయి. నాటి నుండే ఆయనను తెలంగాణా ప్రజలు ద్వేషించడం కూడా మొదలుపెట్టారు. తెలంగాణాను వదులుకొని సమైక్య శంఖం పట్టుకొని సీమాంధ్రకు వచ్చిపడినప్పటికీ, సమైక్య ముసుగులో విభజనవాదనే ప్రచారం, కాంగ్రెస్ అధిష్టానంతో ఆయనకున్న రహస్య సంభందాల గురించి సీనియర్ కాంగ్రెస్ నేతలే చెపుతుండటంతో అయన చేస్తున్న ఉద్యామలపట్ల ప్రజలలో నమ్మకం కలగలేదు. నానాటికీ దిగజారుతున్న పార్టీ పరిస్థితి గురించి వైకాపా సమావేశాలలో విజయమ్మ పదే పదే ప్రస్తావిస్తూ, అందరూ కలిసి పార్టీని బలోపేతం చేయాలని హెచ్చరిస్తునప్పటికీ పరిస్థితిలో ఎటువంటి మార్పు రాలేదు. కానీ, జగన్మోహన్ రెడ్డి జైలు నుండి వెలువడటంతో మళ్ళీ ఆయన పాపులారిటీ గ్రాఫ్ అమాంతం పెరిగిపోయింది.   ఆయన బయటకు వచ్చేసాడు గనుక ఇక పార్టీ దూసుకుపోతుందని అందరూ భావించారు. కానీ, ఆయన ఏపీయన్జీవోలతో వ్యవహరించిన తీరు, తన ఇంటి ముందు టెంట్ వేసుకొని ఆయన చేసిన ఐదు రోజుల ఆమరణ నిరాహార దీక్ష వంటివన్నీ ఆయన ప్రతిష్టను మరింత మసకబార్చాయి. ఆ తరువాత ఆయన హైదరాబాదులో సమైక్య శంఖారావం పూరించినా, దానివలన ఆయన కానీ, వైకాపాకు గానీ ఎటువంటి మైలేజీ పొందలేకపోయారు. ఆ తరువాత, రాష్ట్ర విభజన ప్రక్రియ జోరుగా సాగుతున్న సమయంలో ఆయన ఉద్యమాలు పక్కనబెట్టి దేశాటన చేసి ప్రతిపక్ష నేతలను కలవడం వలన ప్రజలలో మరిన్ని అనుమానాలు పెరిగాయే తప్ప ఆయన ఆశించినట్లు సమైక్య ఛాంపియన్ గా ఎదగలేకపోయారు.   శాసనసభకు తెలంగాణా బిల్లు వచ్చిన నాటి నుండి సమైక్య తీర్మానం కోరుతూ వైకాపా సభ్యులు బిల్లుపై చర్చలో పాల్గొనకుండా తప్పించుకోవడం, అదేసమయంలో ఆయన మళ్ళీ ఏపీయన్జీవో సంఘాల ఎన్నికలలో వేలుపెట్టి భంగ పడటంవంటివి ఆయన ప్రతిష్టను మరింత దిగజార్చాయి. వీటికి తోడు పార్టీలో టికెట్స్ కోసం లుకలుకలు, లక్షలు ఖర్చు బెట్టేసి టికెట్స్ దొరకక బయటకి పోయేవారు జగన్మోహన్ రెడ్డి గురించి చెపుతున్నమాటలు అన్నీకూడా ఆయన ప్రతిష్టను దిగజార్చుతూనే ఉన్నాయి. వెంటనే ఏదోకటి చేయకపోయినట్లయితే పార్టీ పరిస్థితి మరింత దిగజారుతుందనే ఆలోచనతోనే ఆయన చంద్రబాబు నియోజక వర్గం కుప్పం నుండి సమైక్యశంఖారవం చెప్పట్టారు. కానీ దానివలన అతని దుందుడుకు స్వభావమే బయటపడింది తప్ప ఆయనకు, పార్టీకి ఎటువంటి ప్రయోజనమూ కలగలేదు.   ఇప్పుడు తాజాగా మారెప్పపార్టీని వీడుతూ జగన్ గురించి అన్నమాటలు, ఆ వెనువెంటనే పొట్లూరి వరప్రసాద్ పార్టీలో చేరే ఆలోచన విరమించుకోవడం వగైరాలు పార్టీ ప్రతిష్టను మరింత మసకబార్చాయి. అందువలన త్వరలోనే జగన్మోహన్ రెడ్డి ఏదో ఒక భారీ సభో, లేక మరో కార్యక్రమమో ప్రకటించవచ్చును.

poturi varaprasad

వైకాపాకు పొట్లూరి బైబై.. మీడియా సృష్టేనా

  ఎన్నికల ముందు రాజకీయ నేతలు ఒక పార్టీలో నుండి మరొక దానిలోకి కప్పగంతులు వేస్తూ, అందుకు యదోచితంగా వివరణ ఇచ్చుకొంటుంటారు. వారి సంజాయిషీలకు మీడియా కూడా ఉడతా భక్తిగా నాలుగు ముక్కలు జోడించి బాష్యం చెపుతుంటుంది. ఇక వైకాపా విషయానికి వస్తే, ఆ పార్టీకి ఒక స్వంత బాకా మీడియా కూడా ఉంది గనుక దానికి మరికొంత రంగులద్ది అందంగా ప్రదర్శిస్తుంది. కానీ పార్టీ నుండి బయటకి పోయేవారి గురించి, వెళ్తూవెళ్తూ వారు పార్టీ అధినేత జగన్మోహన్ రెడ్డి గురించి చెప్పే నాలుగు ముక్కలు గురించీ ఎన్నడూ ప్రస్తావించదు.   ఇక విషయంలోకి వస్తే, నాలుగైదు రోజుల క్రితమే వైకాపాకు గుడ్ బై చెప్పేసిన మారప్ప “జగన్మోహన్ రెడ్డికి చాలా అహంకారమని, అతనికి చిన్నపెద్దా లెక్క లేదని, పార్టీలో ఎవరికీ గౌరవం ఉండదని” ఇచ్చిన కితాబు వైకాపాలో చేరాలనుకొనే వారికి ఒక హెచ్చరికగా కనబడుతుంటే, తాజాగా పొట్లూరి వరప్రసాద్ కూడా అవే కారణాలతో వైకాపాలో చేరే ఆలోచన విరమించుకోన్నట్లు మీడియాలో వార్తలు గుప్పుమనడంతో వైకాపాలో కలవరం మొదలయింది. గత నెల రోజులుగా పొట్లూరి వరప్రసాద్ వరప్రసాద్ వైకాపాలో చేరబోతున్నట్లు మీడియాలో బాగానే టాంటాం అయింది. అప్పుడు వైకాపా ఆ వార్తలను ఖండించలేదు కూడా. కానీ, నెల తిరక్కుండానే ఆయన ఇంకా పార్టీలో చేరకముందే, జగన్మోహన్ రెడ్డిని తట్టుకోలేక వైకాపాలో చేరే ఆలోచనను విరమించుకొంటున్నట్లు మీడియాలో వస్తున్నవార్తలు చూసి వైకాపా వెంటనే దిద్దుబాటు చర్యలు చెప్పటింది.   వైకాపా నరసాపురం లోక్ సభ అభ్యర్ది మరియు ఆ నియోజకవర్గ కన్వీనర్ అయిన రఘురామకృష్ణం రాజు మీడియాతో మాట్లాడుతూ, “అసలు పొట్లూరి వైకాపాలో చేరుతున్నట్లు ప్రచారం చేసింది మీడియానే. మళ్ళీ ఇప్పుడు చేరడం లేదని ప్రచారం చేస్తున్నదీ ఆ మీడియానే. అసలు పొట్లూరి వైకాపాలో చేరబోతున్నట్లు పార్టీలో ఎవరూ ఎన్నడూ నిర్దారించలేదు. వైకాపాను, మా అధినేత జగన్మోహన్ రెడ్డి ప్రతిష్టను దెబ్బతీయడానికే చంద్రబాబు ఈ మైండ్ గేమ్ వెనుకుండి నడిపించారు. పొట్లూరికి మా పార్టీకి ఎటువంటి సంబంధమూ లేదు,” అని అన్నారు.   గతంలో కాంగ్రెస్ యంపీ సబ్బం హరి కూడా వైకాపా తరపునే మాట్లాడేవారు. కానీ, ఆయన మరి కొద్ది రోజులలో వైకాపాలో చేరబోతున్నసమయంలో “వచ్చే ఎన్నికల తరువాత తమ పార్టీ (వైకాపా) కాంగ్రెస్ పార్టీకి మద్దతు ఇస్తుందని వైకాపా తరపున హామీ ఈయడంతో జగన్మోహన్ రెడ్డి కంగుతిన్నారు. వెంటనే ఆ పార్టీ నేతలు “సబ్బం హరితో కానీ, ఆయన చేసిన ప్రకటనతో గానీ తమ పార్టీకి ఎటువంటి సంబంధమూలేదని, అసలు ఆయన మా పార్టీ సభ్యుడే కాదని” ఆయన మొహం మీదనే తలుపులేసారు. ఇప్పుడు పొట్లూరి విషయంలో కూడా వైకాపా ఇంచుమించు అదేవిధంగా మాట్లాతోంది. కాకపోతే, ఈసారి తమ సమస్యని (అతి)తెలివిగా చంద్రబాబు మెడకి చుట్టే ప్రయత్నం చేస్తున్నారు. కానయితే పొట్లూరి వరప్రసాద్ కి వైకాపా టికెట్ గురించి మీడియాలో జోరుగా చర్చ జరుగుతున్నప్పుడు ఖండించని వైకాపా, ఇప్పుడు ఖండించడం, దానిని చంద్రబాబుపైకి నెట్టే ప్రయత్నం చేయడం చూస్తే వైకాపా అతితెలివి ప్రదర్శిస్తోందని అర్ధమవుతోంది.

balakrishna

బాలకృష్ణ రాజ్యసభకు పోటీ చేస్తారా?

  గతంలో నందమూరి బాలకృష్ణ చాలాసార్లు తను వచ్చే ఎన్నికలలో కృష్ణా జిల్లానుండి శాసనసభకు పోటీ చేస్తానని చెప్పేవారు. కానీ, గత కొంత కాలంగా ఆయన ఆ ఊసు ఎత్తడం లేదు. ఆయన సోదరుడు హరికృష్ణ తన రాజ్యసభ సభ్యత్వానికి రాజీనామా చేయడంతో, ఆయన ఇప్పుడు రాజ్యసభకు వెళ్లేందుకు ఆసక్తి చూపుతున్నట్లు సమాచారం. ప్రస్తుతం రాజ్యసభ ఎన్నికలకు ముహూర్తం (ఏప్రిల్ 4) కూడా ఖాయమయింది గనుక, బాలకృష్ణ రాజ్యసభకు పోటీచేయాలని భావిస్తున్నట్లు సమాచారం. హరికృష్ణ స్థానంలో బాలకృష్ణకు రాజ్యసభ టికెట్ కేటాయిస్తే పార్టీలో ఎవరికీ అభ్యంతరమూ ఉండదు గనుక, చంద్రబాబు కూడా ఆయనను రాజ్యసభకు పంపేందుకు మొగ్గు చూపుతున్నట్లు తెలుస్తోంది. అదీగాక వచ్చే ఎన్నికలలో శాసనసభ టికెట్స్ కోసం, ముఖ్యంగా కృష్ణా జిల్లాలో తీవ్రమయిన ఒత్తిడి ఉంటుంది గనుక, బాలకృష్ణను రాజ్యసభకు పంపడమే శ్రేయస్కరమని చంద్రబాబు భావిస్తునట్లు తెలుస్తోంది. కానీ, ఎన్నికలకు ఇంకా చాలా సమయం ఉన్నందున, ఈలోగా లోక్ సభ, శాసనసభకు అభ్యర్ధుల ఎంపిక ఒక కొలిక్కి వస్తే, దానిని బట్టి బాలకృష్ణను రాజ్యసభకు పంపడమా లేక లోక్ సభ లేదా శాసనసభకు పోటీ చేయించడమా? అనేది తేలవచ్చును. ఏమయినప్పటికీ, బాలకృష్ణ వంటి బలమయిన అభ్యర్ధి లోక్ సభ లేదా శాసనసభకు పోటీ చేయడం వలన పార్టీకి లాభం కలుగుతుందని చెప్పవచ్చును.

Chiranjeevi Praja Rajyam

థాంక్యూ వెరీమచ్ చిరూ!

      మెగాస్టార్ చిరంజీవి రాజకీయాల్లోకి వచ్చాక ప్రజలకు ఉపయోగపడే పని ఒక్కటైనా చేసిన దాఖలాలు లేవు. ఏదైనా వుందేమో మీరు కూడా ఒక్కసారి ఆలోచించండి. ఎంత ఆలోచించినా ఒక్కటి కూడా ఎంత షార్ప్ మైండ్‌కైనా దొరకదు. పార్టీ పెట్టడం, తుక్కుగా ఓడటం, పార్టీని కాంగ్రెస్‌లో విలీనం చేసి పదవులు సంపాదించుకోవడం మినహా ఆయన సాధించిందేమీ లేదు. ఈ విషయాన్ని చెప్పడానికి రాజకీయ పరిశీలకులు, విశ్లేషకుల అవసరమేమీ లేదు.   రాష్ట్రంలో చిన్నపిల్లాడిని కదిలించినా  పాయింట్ మీద చాలా క్లారిటీగా మాట్లాడతాడు. రాష్ట్రంలో రాజకీయంగా ఇంత ‘మంచి’ ఇమేజ్ వున్న చిరంజీవి రాష్ట్ర ప్రజల్ని ఇంకా బాధపెట్టడం దేనికని అనుకున్నాడో, అంతర్లీనంగా మరో కారణం ఏదైనా వుందేమోగానీ రాష్ట్ర ప్రజల నెత్తిన పాలు పోసే నిర్ణయం తీసుకున్నారు.  ఆయన తీసుకున్న సదరు నిర్ణయం ఆషామాషీ నిర్ణయం కాదు. తెలుగోళ్ళంతా ముక్తకంఠంతో ఆయనకి థాంక్స్ చెప్పి తీరాల్సిన నిర్ణయం. ఇంతకీ ఆ నిర్ణయమేంటంటే, చిరంజీవి గారికి తన మానస పుత్రిక అయిన ‘ప్రజారాజ్యం పార్టీ’ని పునరుద్ధరించే ఆలోచన ఎంతమాత్రం లేదట. హమ్మయ్య థాంక్ గాడ్ అనిపిస్తోంది కదూ?! ఈమధ్య కాలంలో చిరంజీవి గారు కాలం చేసిన తన పార్టీని సమాధిలోంచి బయటకి తీసే అవకాశం వుందన్న రూమర్లు వినిపించాయి. ఈ రూమర్లని బయటివారు క్రియేట్ చేశారో లేక జనాల రెస్పాన్స్ ఎలా వుంటుందో చూద్దామని చిరంజీవి వర్గీయులే క్రియేట్ చేశారో తెలియదుగానీ మొత్తానికి రూమరైతే బాగా వ్యాపించింది. చిరంజీవిగానీ పొరపాటుగా ప్రజారాజ్యం పార్టీని పునరుద్ధరిస్తారేమోనని తెలుగు ప్రజలంతా తల్లడిల్లిపోయారు. ఆ పొరపాటు మళ్ళీ జరిగితే అది తెలుగువారి పాలిట మరోసారి గ్రహపాటుగా మారే ప్రమాదం వుందని విలవిలలాడిపోయారు.  ఎందుకంటే, ఆరోజుల్లో చిరంజీవి పార్టీ పెట్టి ఓట్లు చీల్చడం వల్లే కాంగ్రెస్ పార్టీ అధికారంలోకి రాగలిగిందని, అప్పుడు అయ్యగారు పార్టీ పెట్టకుండా వుంటే తెలుగు జనాలు కాంగ్రెస్ పార్టీ బారిన పడి వుండేవారు కాదని తెలుగు ప్రజలు భావిస్తున్నారు. ఇలాంటి పరిస్థితుల్లో ప్రజారాజ్యం పార్టీని బతికిస్తే వచ్చే ఎన్నికలలో ఇంకెన్ని దుష్పరిణామాలు జరుగుతాయోనని భయపడ్డారు. అయితే చిరంజీవి తన పార్టీకి మళ్ళీ అంత సీన్ లేదని అర్థం చేసుకున్నాడో లేక తెలుగు వారి మీద దయదలిచాడో గానీ తన పార్టీని పునరుద్ధరించే ఆలోచన లేదని స్పష్టం చేశాడు. అందుకే ప్రతి తెలుగువాడూ చిరంజీవికి రుణపడి వుండాలి. ఆయనకి మనస్పూర్తిగా థాంక్యూ వెరీమచ్ అని చెప్పాలి.  

AAP eyes 2014 Lok Sabha polls

కేజ్రీవాల్ క్రేజీ ఆలోచన!

      అరవింద్ కేజ్రీవాల్ విషయంలో ఢిల్లీ ప్రజలు పెంచుకున్న భ్రమలు మంచు పొరల్లా కరిగిపోతున్నాయి. ఆమ్ ఆద్మీ పార్టీ మిగతా రాజకీయ పార్టీలన్నిటి కంటే డిఫరెంట్ అని అపోహ పడిన ఢిల్లీ ప్రజలు ఇప్పుడు తమ తప్పుకు తామే లెంపలు వేసుకుంటున్నారు. ఏ కాంగ్రెస్ పార్టీని అయితే కేజ్రీవాల్ తిట్టిన తిట్టు తిట్టకుండా తిట్టాడో ఆ కాంగ్రెస్ పార్టీతోనే చెట్టపట్టాల్ వేసుకుని ఢిల్లీ ముఖ్యమంత్రి పీఠం మీదకి ఎక్కి కూర్చున్న కేజ్రీవాల్‌ని చూసి ఢిల్లీ ప్రజలకు నోట మాట రావడం లేదు.   అధికారంలోకి  రాకముందు ఏ ప్రగల్భాలు అయితే పలికారో  అధికారంలోకి వచ్చాక వాటికి వ్యతిరేకమైన పనులు చేయడం ఢిల్లీ ప్రజలు జీర్ణించుకోలేకపోతున్నారు. అధికార నివాసం వద్దనడం, అధికార కార్లు వద్దనడం దగ్గర్నుంచి అనేక విషయాలలో కేజ్రీవాల్ రివర్స్ గేర్ వేసేశారు. దొంగ చేతికి తాళాలు ఇచ్చినట్టుగా అవినీతిని ఊడ్చడానికి ఉపయోగించాల్సిన చీపుర్ని అవినీతి మురికి పట్టిపోయిన హస్తానికి అందించిన కేజ్రీవాల్ ఢిల్లీ ప్రజల నమ్మకాన్ని కోల్పోతున్నారు. ఢిల్లీ ప్రజలకు మంచినీళ్ళు ఇచ్చి మంచి చేసుకోవాలని కేజ్రీవాల్ ప్రయత్నించినప్పటికీ, ఆయన పరిపాలన మీద ఢిల్లీ ప్రజల్లో ఇప్పడికే అసంతృప్తి ప్రారంభమైంది. మిగతా రాజకీయ పార్టీలకంటే ఆమ్ ఆద్మీ పార్టీ ఎంతమాత్రం భిన్నం కాదన్న అభిప్రాయం ఢిల్లీ ప్రజల్లో వ్యక్తమవుతోంది. ఇప్పటికిప్పుడు మళ్ళీ ఎన్నికలు జరిగితే ఢిల్లీలో బీజేపీకి సంపూర్ణ అధికారం రావడంతోపాటు కాంగ్రెస్, ఆమ్ ఆద్మీ పార్టీలు తుడిచిపెట్టుకుపోయే అవకాశం వుందని రాజకీయ పరిశీలకులు భావిస్తున్నారు. అయితే ప్రస్తుతం కళ్ళ ముందు అధికార తెరలు కప్పుకుపోయిన కేజ్రీవాల్ ఆలోచనలు మాత్రం మరోలా వున్నాయి. రాబోయే లోక్‌సభ ఎన్నికలలో దేశవ్యాప్తంగా పోటీ చేసే ఆలోచనలో ఆయన వున్నారు. స్థానికంగా వుండే ప్రాంతీయ పార్టీలతో పొత్తులు పెట్టుకోవడం ద్వారా భారీ స్థాయిలో లోక్‌సభ స్థానాలు పొందవచ్చన్న ఆలోచనలో ఆయన ఉన్నట్టు సమాచారం. అప్పనంగా దక్కిన ఢిల్లీ ముఖ్యమంత్రి పీఠంతో సంతృప్తి పడకుండా ఏకంగా దేశ ప్రధాని పదవి మీదే కేజ్రీవాల్ కన్ను వేసినట్టు తెలుస్తోంది. వివిధ రాష్ట్రాల్లో రాజకీయంగా తనకు ఉపయోగపడే ప్రాంతీయ పార్టీలతో కేజ్రీవాల్ ఇప్పటికే సంప్రదింపులు ప్రారంభించినట్టు తెలుస్తోంది. అయితే ప్రస్తుతం జనాల్లో తనకు క్రేజ్ తగ్గిపోయిందన్న విషయం కేజ్రీవాల్ తెలుసుకుంటే మంచిది.  

ఉన్న పరువు కూడా పోయింది!

      మొన్నీమధ్య భారత ప్రధాని మన్మోహన్ సింగ్ ప్రెస్ మీట్ ఏర్పాటు చేసి మాట్లాడిన మాటలు రాజకీయ వర్గాల్లో ఆలోచని పెంచాయి. రెండోసారి ప్రధాని అయ్యాక దేశ ప్రజలకు ఆయన మీద గౌరవం బాగా తగ్గిపోయింది. ఇలాంటి పరిస్థితుల్లో ఆయన ప్రెస్ మీట్ ఏర్పాటు చేసి మాట్లాడిన మాటలు ఆయన మీద ఉన్న కాస్తంత గౌరవాన్ని కూడా పోగొట్టేలా వున్నాయని రాజకీయ పరిశీలకులు విశ్లేషిస్తున్నారు.   ప్రధానిగా తన పదేళ్ళ పదవివీకాలంలో చేసిన పొరపాట్లు, సాధించిన ఫలితాల గురించి చెప్పుకోవడానికి అన్నట్టు కాకుండా నరేంద్రమోడీని తిట్టిపోయడానికి, రాహుల్ గాంధీని మునగచెట్టు ఎక్కించడానిన్నట్టుగా మాట్లాడ్డం క్షమార్హంగా లేదన్న అభిప్రాయాలు వ్యక్తమవుతున్నాయి. దేశాన్ని నిట్టనిలువుగా ముంచేసిన కాంగ్రెస్ పార్టీకి మళ్ళీ అధికారం ఇవ్వండి... ఈసారి నా ప్లేసులో రాహుల్ గాంధీని ప్రధానమంత్రిని చేసేయండని చెప్పిన ఆయన తీరు విమర్శలను ఎదుర్కొంటోంది. ప్రధానమంత్రి దేశ ప్రజలకు సందేశాన్ని ఇస్తున్నట్టు కాకుండా, ఒక ఎన్నికల సభలో మాట్లాడే రాజకీయ నాయకుడిలా ప్రధాని అప్పుడు కనిపించారన్న అభిప్రాయాలు వ్యక్తమవుతున్నాయి. గుజరాత్ అల్లర్లు, హింసాకాండ విషయంలో కోర్టు మోడీకి క్లీన్ చిట్ ఇచ్చినా ఆ అల్లర్లకు మోడీయే కారణమంటూ ప్రధాని మాట్లాడ్డం ఆయన బాధ్యతారాహిత్యానికి నిదర్శనంగా భావించవచ్చని అంటున్నారు. సోనియాగాంధీ ఎలా ఆడిస్తే అలా ఆడే కీలుబొమ్మలా పేరు సంపాదించుకున్న మన్మోహన్ సింగ్ ఈ అధికార సంధ్యలో అయినా తనమీద గౌరవం పెరిగేలా మాట్లాడి వుంటే  బావుండేదన్న అభిప్రాయాలు వినిపిస్తున్నాయి. మోడీని  చూసి భయపడుతున్న కాంగ్రెస్ పార్టీ మన్మోహన్ సింగ్‌ని ఈ రకంగా కూడా వాడుకోవడం దారుణమని అంటున్నారు. ఇప్పటికే తనకున్న మిస్టర్ క్లీన్ ఇమేజ్‌ను పూర్తిగా పోగొట్టుకుని అసమర్థ ప్రధాని అని గొప్ప గుర్తింపు సంపాదించుకున్న మన్మోహన్ సింగ్ తనను మీడియా అర్థం చేసుకోలేకపోయిందని, చరిత్రకారులైనా తనను అర్థం చేసుకోవాలని వ్యాఖ్యానించడం ఆయన బేలతనానికి నిదర్శమని విమర్శకులు అంటున్నారు. అనవసరపు ప్రెస్ మీట్లు పెట్టి జనాల్లో చులకన అయ్యే రాహుల్ గాంధీ బాటలోనే ప్రధాని మన్మోహన్ సింగ్ పయనిస్తున్నారని భావిస్తున్నారు.

జగన్‌కి అశోక్‌బాబు షాక్!

      ఏపీఎన్జీవోల ఎన్నికలలో అశోక్‌బాబు సాధించిన ఘన విజయాన్ని కేవలం ఉద్యోగులకు సంబంధించిన విషయంగానే రాజకీయ పరిశీలకులు భావించడం లేదు. రాజకీయ ఎత్తులు, పై ఎత్తులను అధిగమిస్తూ సాధించిన విజయంగా భావిస్తున్నారు. ఉద్యోగులు సమైక్య ఉద్యమం జరిపిన సమయంలో వైఎస్సార్సీపీ అధినేత జగన్ అశోక్‌బాబును తనకు అనుకూలంగా మాట్లాడే విధంగా ప్రేరేపించారు. అయితే దానికి అశోక్‌బాబు అంగీకరించకపోవడంతో ఆయన మీద అప్పటి నుంచే రాజకీయాలు ప్రారంభమయ్యాయని, ఇప్పుడు ఏపీ ఎన్జీవోల ఎన్నికల సందర్భంగా ఆ రాజకీయాలు మరింత ముదిరి అశోక్‌బాబుకు పోటీగా ఒక అభ్యర్థి నిలబడేంత వరకూ పరిస్థితి వెళ్ళిందని రాజకీయ విశ్లేషకులు అంటున్నారు.   సమైక్య ఉద్యమాన్ని ఎంతో అభినందనీయంగా నడిపిన ఏపీ ఎన్జీవోలలో ఐక్యత దెబ్బతినేలా చేసిన ఘనత జగన్‌కే దక్కుతుందని అంటున్నారు. అయితే అశోక్‌బాబుకు ఘన విజయం అందించడం ద్వారా ఏపీ ఎన్జీవోలు తమలో ఐక్యత అలాగే వుందని చెప్పారని అంటున్నారు. మొత్తమ్మీద అశోక్‌బాబు సాధించిన విజయం జగన్‌కు ఒక షాక్‌లా భావించవచ్చని పరిశీలకులు భావిస్తున్నారు. ఎపీ ఎన్జీవోల ఎన్నికలకు నామినేషన్లు ప్రారంభమైనప్పటి నుంచి ప్రతి దశలోనూ జగన్ వర్గం అశోక్‌బాబుకు వ్యతిరేకంగా పనిచేసింది. లోక్‌సభ, శాసనసభ ఎన్నికల  సందర్భంలో ఎన్ని వ్యూహాలు రచిస్తారో అన్ని వ్యూహాలు రచించారు. అశోక్‌బాబుకు వ్యతిరేకంగా బాహాటంగానే అన్ని పనులూ చేశారు. చివరకు ఈ ఎన్నికలు అశోక్‌బాబు వెర్సెస్ జగన్ అన్నట్టుగా తయారయ్యాయి. అయితే జగన్ ఎన్ని ప్లానులు వేసినా అశోక్‌బాబు ఎంతమాత్రం నిబ్బరాన్ని కోల్పోకుండా వ్యవహరించడం అభినందనీయమైన అంశమని రాజకీయ పరిశీలకులు అంటున్నారు. అశోక్‌బాబు సాధించిన విజయం వైఎస్సార్సీపీ అధినేత జగన్‌కున్న డబ్బు, పలుకుబడిని దెబ్బతీశాయని భావిస్తున్నారు. సమైక్య ఉద్యమాన్ని భుజానికి ఎత్తుకున్న అశోక్‌బాబుకు వ్యతిరేకంగా పనిచేయడం ద్వారా జగన్ సీమాంధ్ర ప్రాంతంలోని ప్రభుత్వ ఉద్యోగులకు వ్యతిరేకిగా మారారు. ఈ ప్రభావం రాబోయే ఎన్నికల మీద వుండే  అవకాశం వుందని పరిశీలకులు భావిస్తున్నారు. అశోక్‌బాబును వ్యతిరేకించి జగన్ తేనెతుట్టెను కదిపారని విశ్లేషిస్తున్నారు.

సర్వేల స్పెషలిస్టు లేటెస్ట్ సర్వే!

  సర్వేల స్పెషలిస్టు లేటెస్ట్ సర్వే! టీడీపీ-బీజేపీ కూటమికి ఆధిక్యం   ఎన్నికల సర్వేలు చేయించడంలో స్పెషలిస్టు అయిన కృష్ణా జిల్లాకు చెందిన ఓ కాంగ్రెస్ నాయకుడు తాజాగా మరో రహస్య సర్వే జరిపించారు. 2014 ఎన్నికలలో రాష్ట్రంలో ఏ పార్టీకి ఎన్ని సీట్లు వస్తాయన్న పాయింట్ మీద జరిపించిన ఈ సర్వే రాష్ట్ర రాజకీయ వర్గాలలో హల్‌చల్ సృష్టిస్తోంది. ఏ నలుగురు రాజకీయ నాయకులు ఒక్కచోట చేరినా ఈ సర్వే ఫలితాల గురించే చర్చించుకుంటున్నారు.   సదరు నాయకుడు జరిపించిన సర్వే ఫలితాల ప్రకారం సీమాంధ్ర ప్రాంతంలో టీడీపీ-బీజేపీ కూటమి 93 ఎమ్మెల్యే స్థానాలు, 14 ఎంపీ స్థానాలు గెలుచుకునే అవకాశం వుందని తెలుస్తోంది. అలాగే వైఎస్సార్సీపీ 71  ఎమ్మెల్యే స్థానాలు, 10 ఎంపీ స్థానాలు గెలుచుకుంటుంది. రాష్ట్ర విభజన విషయంలో అత్యుత్సాహం చూపించిన కాంగ్రెస్ పార్టీ 9 ఎమ్మెల్యే స్థానాలు, ఒక్క ఎంపీ స్థానంతో సరిపెట్టుకోక తప్పదని సదరు సర్వే స్పష్టం చేసింది. ఇక తెలంగాణ ప్రాంతంలో టీఆర్ఎస్, కాంగ్రెస్, ఎం.ఐ.ఎం. ఈ మూడు పార్టీలకు కలిపి 71 ఎమ్మెల్యే స్థానాలు, 10 ఎంపీ స్థానాలు వచ్చే అవకాశం వుందని సర్వే చెబుతోంది. టీడీపీ-బీజేపీ కూటమికి 46 ఎమ్మెల్యే స్థానాలు, 7 ఎంపీ స్థానాలు వస్తాయని సర్వే ఫలితాలు పేర్కొంటున్నాయి. వైఎస్సార్సీపీకి తెలంగాణలో అకౌంట్ ఓపెన్ అయ్యే అవకాశం లేదని ఆ సర్వే స్పష్టం చేసింది.

కాంగ్రెస్ మార్క్ రాజకీయాలు

  రాష్ట్ర విభజనతో కాంగ్రెస్ అధిష్టానం రాష్ట్రంలో రెండు ప్రాంతాలలో ఒక వికృత రాజకీయ క్రీడ మొదలుపెట్టింది. అందులో కాంగ్రెస్ నేతలందరూ తమతమ పాత్రలను చక్కగా పోషిస్తూ ప్రజలను మభ్యపెడుతూ 2014 ఎన్నికలలో తమ రాజకీయ భవిష్యత్తును దానితో బాటే పార్టీకి విజయాన్నిసాధించి పెట్టేందుకు రకరకాలుగా యధాశక్తిగా కృషి చేస్తున్నారు. వారిలో అధిష్టానానికి వ్యతిరేఖంగా వ్యవహరించే ముఖ్యమంత్రి, సీమాంధ్ర కేంద్ర మంత్రులు, యంపీలు, యం.యల్.యే.లు. ఉన్నారు. అధిష్టానాన్ని వ్యతిరేఖించడం ద్వారా పార్టీ పట్ల ప్రజలలో ఉన్నవ్యతిరేఖతను ఓట్లరూపంలో క్యాష్ చేసుకోవాలని ప్రయత్నిస్తుంటుంది ఈ గ్రూపు. బహుశః కిరణ్ కుమార్ రెడ్డి సారధ్యంలో ఏర్పడే కొత్తపార్టీని నెంబర్:1 గ్రూపుగా భావించవచ్చును. ఈ గ్రూపుకి అనుబంధంగా వేరే పార్టీలు కూడా పనిచేస్తుంటాయి. అవి ఎన్నికల తరువాత కాంగ్రెస్ పార్టీలో విలీనం అవడమో లేక కలిసి పనిచేయడమో లేక మద్దతు ఈయడమో చేయవచ్చును.   ఇక పార్టీలోనే విధేయవర్గం కూడా ఒకటుంది. దీనిని గ్రూప్ నెంబర్:2గా పిలుచుకోవచ్చును. రాష్ట్ర విభజన ప్రభావం తట్టుకొని ఎట్టి పరిస్థితుల్లో కూడా తమంతట తాము గెలవగలవారు మాత్రమే ఈ గ్రూపు నెంబర్:2లో సభ్యులుగా ఉండేందుకు అర్హులు. ఇక పార్టీలో గ్రూప్ నెంబర్:3 కూడా ఉంది. వీరు పార్టీకి అనుకూలంగా కానీ, వ్యతిరేఖంగా గానీ మాట్లాడరు. కానీ, తెర వెనుక ఉండి పార్టీ వ్యవహారాలు చక్కబెడుతుంటారు. వీరు ఎన్నికలలో చేయకపోవచ్చును. వీరు అందిస్తున్నరహస్య సేవలకి గాను, శాసనమండలి, రాజ్యసభ టికెట్స్ లతో సత్కరించబడతారు.   కాంగ్రెస్ పార్టీ తెలంగాణాలో ఎలాగు పూర్తిగా గెలవలేదు గనుక తెలంగాణా కోసం కాంగ్రెస్ అధిష్టానం ప్రత్యేకంగా 50:50 ప్లాన్ సిద్ధం చేసింది. అందులో తెలంగాణా సాధించిన కాంగ్రెస్ ఘనులు, తెరాస నేతలు ఉంటారు. అదృష్టం బాగుండి కాంగ్రెస్ పార్టీ కేంద్రంలో మళ్ళీ అధికారంలోకి రాగలిగే అవకాశాలు ఉంటే తెరాస మద్దతు ఉంటుంది. లేకుంటే లేదు.   కానీ ఎంత ఫిఫ్టీ ఫిఫ్టీ అనుకొన్నాతెరాస ప్రభావానికి తట్టుకొని నిలబడాలంటే వారికి కొంత బూస్టింగ్ అవసరం ఉంటుంది. అది అందించే భాద్యత మాత్రం పూర్తిగా ముఖ్యమంత్రి కిరణ్ కుమార్ రెడ్డిదే. ఆయన అప్పుడప్పుడు ఏవో చిలిపి మాటలు మాట్లాడుతూ, చిలిపి చేష్టలు చేస్తుంటే వారందరూ మూకుమ్మడిగా ఆయనపై విరుచుకుపడుతూ తమ తెలంగాణాను ఆయన బారి నుండి కాపాడుకొంటూ, పనిలోపనిగా తమ రేటింగ్ కూడా పెంచుకొంటుంటారు.   ఈవిధంగా కాంగ్రెస్ నేతలందరూ ఒకరినొకరు తిట్టుకొంటూ, అధిష్టానాన్నికూడా తిడుతూ, భజన చేస్తూ, కాంగ్రెస్ తోనే పోటీచేస్తూ కాంగ్రెస్ పార్టీని గెలిపించడానికి చాలా కృషి చేస్తున్నారు. వీరి ఐఖ్యత ఎంత గొప్పదో, ఇంత అనైక్యంగా ఏమి సాధించబోతున్నారో తెలుసుకోవాలంటే ఎన్నికలు పూర్తయ్యేవరకు వేచి చూడక తప్పదు మరి.