ఘోషామహల్ ఎమ్మెల్యే రాజాసింగ్ తెలంగాణ సీఎం రేవంత్ రెడ్డికి రాసిన లేఖ   పెను సంచలనంగా మారింది. హైదరాబాద్ మాజీ సీపి సజ్జనార్ పదవీకాలంలో జరిగిన పలు వివాదాస్పద అంశాలపై సమగ్ర విచారణ జరపాలని కోరుతూ  రాజా సింగ్ ఈ లేఖ రాశారు

సజ్జనార్ హయాంలో అప్పట్లో నమోదైన కొన్ని కీలక కేసుల్లో దర్యాప్తు నత్తనడకన సాగుతోందని, దీనివల్ల పోలీసు వ్యవస్థ పనితీరుపై అనుమానాలు వ్యక్తమవుతున్నాయని పేర్కొన్నారు.   బంగారం చోరీ  కేసులో ఇప్పటివరకు ఎలాంటి పురోగతి లేకపోవడాన్ని ఎత్తి చూపారు. ఈ కేసులో అసలు నిందితుల గుర్తింపు, అరెస్టులు ఎందుకు జరగలేదని  నిలదీశారు. అలాగే  హామ్‌వే సంస్థకు సంబంధించిన కేసు దర్యాప్తు కూడా  మందకొడిగా సాగుతోందని పేర్కొన్నారు.  

 జనార్ధన్ అనే వ్యక్తికి సంబంధించి సోషల్ మీడియాలో వచ్చిన ఒక ట్వీట్ తర్వాత మాజీ సీపీ సజ్జనార్ వ్యవహారశైలిపై మరింత అనుమానాలు బలపడ్డాయని రాజా సింగ్ ఆ లేఖలో ఆరోపించారు. ఒక బాధ్యతాయుతమైన ఉన్నత పోలీసు అధికారి స్థానంలో ఉండి ఇలాంటి వివాదాలకు కేంద్రం కావడం వ్యవస్థ పట్ల ప్రజలకు నమ్మకాన్ని సడలిస్తుందని అభిప్రాయపడ్డారు. ఈ పరిణామాలన్నీ పోలీసు శాఖ ప్రతిష్టను దెబ్బతీసేలా ఉన్నాయని ఆయన ఆందోళన వ్యక్తం చేశారు. 

ఈ నేపథ్యంలోనే సజ్జనార్ హయాంలో జరిగిన వ్యవహారాలు, పెండింగ్ కేసుల దర్యాప్తు తీరుపై ఒక స్వతంత్ర సంస్థతో విచారణ జరిపించాలని రాజా సింగ్ డిమాండ్ చేశారు. కేవలం సాధారణ విచారణ కాకుండా, దీనిపై తక్షణమే   సీబీఐ విచారణ లేదా సిట్టింగ్ జడ్జితో జ్యుడీషియల్ విచారణ జరిపించాలని ఆయన ముఖ్యమంత్రిని  కోరారు. 

ఇది కూడా చదవండి: బిజెపి ఎమ్మెల్యే రాజాసింగ్ కి సీఎం రేవంత్ బర్త్ డే విషెస్

అలాగే మాజీ సీబీఐ డైరెక్టర్ ఎం. నాగేశ్వరరావు, సజ్జనార్‌పై  బహిరంగంగా పలు ఆరోపణలు, తీవ్ర వ్యాఖ్యలు చేశారనీ,   పోలీసు యూనిఫాం వెనుక దాక్కున్న నేరస్థుడిగా ఆయన సజ్జనార్ ను అభివర్ణించారనీ తన లేఖలో పేర్కొన్న రాజాసింగ్, అటువంటి ఆరోపణలను ఎదుర్కొంటున్న సజ్జనార్ పై చర్యలు తీసుకోకుండా కేవలం బదలీతో సరిపెట్టడమేంటని నిలదీశారు.  కేంద్ర దర్యాప్తు సంస్థ (సీబీఐ) మాజీ డైరెక్టర్ స్థాయి వ్యక్తి   ఒక సీనియర్ పోలీసు అధికారిపై ఇలాంటి తీవ్రమైన ఆరోపణలు చేసినప్పుడు ప్రభుత్వం వాటిని నిర్లక్ష్యం చేయడానికి వీల్లేదని  పేర్కొన్నారు.   

ప్రస్తుతం ఎమ్మెల్యే రాజా సింగ్ రాసిన ఈ లేఖ రాష్ట్ర రాజకీయ వర్గాల్లో తీవ్ర చర్చనీయాంశంగా మారింది. మాజీ పోలీసు ఉన్నతాధికారిపై అధికారికంగా వచ్చిన ఈ డిమాండ్ ఎలాంటి పరిణామాలకు దారితీస్తుందనే దానిపై సర్వత్రా ఉత్కంఠ నెలకొంది. రాబోయే రోజుల్లో ప్రభుత్వం ఈ లేఖపై స్పందించి ఎలాంటి నిర్ణయం తీసుకుంటుందనేది ఆసక్తికరంగా మారింది.  

మీకు నచ్చవచ్చు: ఔరంగజేబు సమాధిని కూల్చివేస్తాం: రాజాసింగ్ 

జనసేన గూటికి రాజాసింగ్? .. పవన్ వ్యూహమేంటి?

[Raja Singh,Ghoshamahalmla, CM Revanthreddy,  Sajjanar, CBI inquiry, TeluguOne]