Top Stories

శరీరాన్నే కాదు.. బంధాన్ని డిటాక్స్ చేసుకోవడం చాలా ముఖ్యం..!

తెలంగాణలో ఒంటరి పోరే.. పోత్తులుండవు.. కుండబద్దలు కొట్టిన అమిత్ షా!

మల్కాజిగిరిలో కాల్పుల కలకలం.. భార్యపై భర్త ఫైరింగ్

బంగారంపై పెట్టుబడి: లాకర్ల భయం లేకుండా భారీ లాభాలు పొందే 3 స్మార్ట్ మార్గాలు ఇవే!

బిట్‌కాయిన్ షాక్: 50% పతనం తర్వాత మళ్లీ రూట్ మార్చిందా?

హైదరాబాద్‌లో భారీ వర్షాలు: ఐటీ ఉద్యోగులకు అలర్ట్, ఆ రూట్లలో ట్రాఫిక్ నరకం!

ఆస్ట్రేలియన్ ఓపెన్‌లో భారత జోడీ సంచలన విజయం.. అమెరికా చిత్తు!

సచిన్ కొడుకా మజాకా! అర్జున్ టెండూల్కర్ చేసిన ఈ పనికి నెటిజన్లు ఫిదా!

ట్రిపుల్ మర్డర్ కేసు.. క్షమాభిక్షకు సుప్రీం నో!

రేషన్ బియ్యం బస్తాలకు క్యూఆర్ కోడ్.. ఏపీ మోడల్ దేశానికే ఆదర్శం!

శరీరాన్నే కాదు.. బంధాన్ని డిటాక్స్ చేసుకోవడం చాలా ముఖ్యం..!

ఎలాంటి సంబంధం అయినా సరే.. ప్రతి సంబంధంలో ఏదో ఒక రకమైన గొడవ, సంఘర్షణ ఉంటుంది. ఇది ముఖ్యంగా ప్రేమ సంబంధాలలో చాలా సాధారణం. మరీ ముఖ్యంగా భార్యాభర్తల బంధంలో గొడవలు కూడా చాలా ఉంటాయి. కానీ భార్యాభర్తల మధ్య కేవలం గొడవలు మాత్రమే ఎక్కువ ఉండి, ఇద్దరి మధ్య సరైన అవగాహన, పరస్పర గౌరవం వంటివి లేకపోతే.. ఆ బంధం చాలా పెళుసుగా మారిపోయే అవకాశం ఉంటుంది. గొడవలు అలకలు ఇద్దరి మద్య బంధాన్ని ఎంత బలం చేస్తాయో.. అవి ఎక్కువైతే ఇద్దరిని అవే విడదీస్తాయి కూడా. నేటికాలంలో చాలామంది తమ బంధం గురించి ఆలోచించి బంధాన్ని నిలబెట్టుకోవడానికి ఏం చేయాలా అని ఆలోచిస్తున్నారు. అలాంటి వారికోసం ఒక మంచి మార్గం ఉంది. అదే రిలేషన్షిప్ డిటాక్స్.. శరీరాన్ని డిటాక్స్ చేసుకోవడం కోసం చాలా మంది డిటాక్స్ డ్రింకులు తాగుతూ ఉంటారు. దీనివల్ల శరీరంలో విషపదార్థాలు బయటకు వెళ్లిపోయి శరీరం శుభ్రం అవుతుంది. అదేవిధంగా.. రిలేషన్షిప్ ను డిటాక్స్ చేసుకుంటే.. బంధంలో ఉన్న అనవసర గొడవలు, ఇబ్బందులు, అపార్థాలు అన్నీ మంత్రమేసినట్టు మాయమవుతాయి. ఇందుకోసం ఏం చేయాలో తెలుసుకుంటే.. భాగస్వామిని బాధపెట్టకుండా బంధాన్ని డిటాక్స్ చేసుకోవాలంటే.. భాగస్వామితో మాట్లాడాలి.. రిలేషన్ షిప్ డిటాక్స్ చేయించుకోవాలనుకుంటే, ముందుగా భాగస్వామితో మాట్లాడాలి. ఎందుకు రిలేషన్షిప్ డిటాక్స్ చేయించుకోవాలని అనుకుంటున్నారో వివరించాలి.ఇద్దరి మధ్య ఉన్న అనుబంధాన్ని వివరించాలి. సమస్యలకు కారణమేమిటో తెలుసుకోవడానికి ప్రయత్నించాలి. భాగస్వామి పైవన్నీ అర్థం చేసుకుంటే.. రిలేషన్షిప్ డిటాక్స్ చేయించుకోవడం సులువు అవుతుంది. దృష్టి.. ప్రతి ఒక్కరు తమపై తాము దృష్టి పెట్టాలి. ఇది మానసిక, భావోద్వేగ ఆరోగ్యాన్ని మెరుగుపరచడంలో సహాయపడుతుంది. తమపై తాము దృష్టి పెట్టినప్పుడు, తమ బలాలు, బలహీనతలను బాగా అర్థం చేసుకోగలుగుతారు. ఇవి భవిష్యత్తులో సంబంధాలు మెరుగుపరుచుకోవడంలో సహాయపడతాయి. సమయం.. నేటికాలంలో ప్రతి ఒక్కరు నిరంతరం ఏదో ఒక పనిలో బిజీగా ఉంటారు. ముఖ్యంగా ఎప్పుడూ ఫోన్‌లో ఉండటం వల్ల తమకు తాము సమయం కేటాయించుకోలేకపోతారు. తమకు తాము సమయం కేటాయించుకోనప్పుడు అది చాలా ఇబ్బంది కలిగిస్తుంది. ముఖ్యంగా వైవాహిక జీవితంలో కూడా ఇబ్బందులు తెచ్చిపెడుతుంది. బంధాన్ని డిటాక్స్ చేసుకోవాలంటే.. సమయం కేటాయించాలి. ఫోన్ కు దూరంగా ఉండాలి. బందం గురించి ఆలోచించాలి. అలాంటప్పుడు అలోచనలు కూడా సరిగ్గా పనిచేస్తాయి. దూరం.. రిలేషన్షిప్ డిటాక్స్ అంటే.. బంధం నుండి విడిపోవడానికి ప్రయత్నించడం కాదు.. బంధాన్ని నిలబెట్టుకోవడానికి ప్రయత్నించడం. బంధంలో గొడవలు, అపార్థాలు ఎక్కువగా ఉన్నప్పుడు.. భాగస్వామికి కొన్నాళ్లు దూరంగా ఉండి అన్నీ ఆలోచించుకోవడం వల్ల అన్ని విషయాలు క్షుణ్ణంగా అర్థం అవుతాయి. అప్పుడు బంధాన్ని నిలబెట్టుకోవడానికి మార్గాలు కనిపిస్తాయి. బంధం ఎంత ముఖ్యమైనదో కూడా అర్థమవుతుంది. *రూపశ్రీ.

Publish Date: Jun 8, 2027 11:12AM

తెలంగాణలో ఒంటరి పోరే.. పోత్తులుండవు.. కుండబద్దలు కొట్టిన అమిత్ షా!

వచ్చే ఎన్నికలలో తెలంగాణలో బీజేపీ ఒంటరిగానే బరిలోకి దిగుతుందని కేంద్ర హోంమంత్రి అమిత్ షా అన్నారు. ఢిల్లీలోని భారత మండపంలో మంగళవారం (జూన్ 9)న మీడియా చిట్ చాట్ లో మాట్లాడిన అమిత్ షా.. తెలంగాణలో ఎటువంటి పొత్తులూ ఉండవన్నారు. ఒక్క తెలంగాణ అని కాదు, ఏ రాష్ట్రంలోనైనా ఒంటరిగానే బరిలోకి దిగుతామని చెప్పారు. ఆ దిశగా ముందు.. తెలంగాణ, పంజాబ్ రాష్ట్రాల్లో వచ్చే ఎన్నికలలో ఒంటరి పోరుకు సిద్ధమౌతున్నట్లు చెప్పారు. బీజేపీని దక్షిణ భారతదేశంలో బలోపేతం చేయడంపై పక్కా వ్యూహంతో ఉన్నట్లు అమిత్ షా చెప్పారు. ప్రస్తుతం తాము దక్షిణాది రాష్ట్రాలపై ఎక్కువగా ఫోకస్ పెట్టినట్లు చెప్పిన ఆయన కొంత మంది ఇది అసాధ్యంగా భావిస్తున్నారనీ, అయితే.. గతంలో కూడా ఇలాంటి ఎన్నో అసాధ్యాలను సుసాధ్యం చేసిన చరిత్ర బీజేపీదని చెప్పుకొచ్చారు. పశ్చిమ బెంగాల్ లో కఠినమైన పరిస్థితుల మధ్య తాము మంచి ఫలితాలను రాబట్టామని చెప్పారు. బీజేపీ అధికారంలో ఉన్న రాష్ట్రాలలో యూనిఫాం సివిల్ కోడ్ అమలు చేస్తామని ఆయన చెప్పారు.

Publish Date: Jun 10, 2026 10:18AM

మల్కాజిగిరిలో కాల్పుల కలకలం.. భార్యపై భర్త ఫైరింగ్

హైదరాబాద్‌ మల్కాజిగిరి పరిధిలో మంగళవారం(జూన్ 9) అర్ధరాత్రి కాల్పులు కలకలం రేపాయి. కుటుంబ కలహాల కారణంగా భర్త భార్యపై కాల్పులు జరిపి హత్యాయత్నం చేశాడు. వివరాలిలా ఉన్నాయి. నిషా రాణి, అరుణ్ దంపతులు మల్కాజిగిరి మారుతీనగర్‌లో నివాసం ఉంటున్నారు. అరుణ్ రియల్ ఎస్టేట్ వ్యాపారం చేస్తున్నాడు. అయితే భార్య భర్తల మధ్య గత కొంతకాలంగా విభే దాలు ఉన్నాయి. ఈ నేపథ్యంలోనే భార్యను మాట్లాడుకుందాం రా అంటూ ఇంటి బయటకు పిలిచిన భర్త అరుణ్.. ఒక్కసారిగా ఆమెపై తుపాకీతో కాల్పులు జరిపాడు. కాల్పుల శబ్దం వినిపించడం తో స్థానికులు ఇళ్ల నుంచి బయటకు వచ్చి చూడగా అక్కడ నిషారాణి రక్తపు మడుగులో పడి ఉంది. స్థానికులు వెంటనే పోలీసులకు సమాచారం అందించారు. ఘటనా స్థలానికి చేరుకున్న పోలీసులు తీవ్ర గాయాలతో ఉన్న నిషారాణిని సమీప ఆస్పత్రికి తరలించారు. కాల్పుల అనంతరం అరుణ్‌ అక్కడి నుంచి పరారయ్యారు. ఈ ఘటనలో మరో వ్యక్తి ప్రమేయం ఉన్నట్లు పోలీసులు అనుమానిస్తున్నారు. నిందితుల కోసం ప్రత్యేక బృందాలు గాలింపు చర్యలు చేపట్టాయి. అరుణ్ పాతబస్తీ ప్రాంతానికి చెందిన కొందరు స్నేహితుల ద్వారా తుపాకీని కొనుగోలు చేసినట్లుగా పోలీసులు భావిస్తున్నారు. భార్యాభర్తల మధ్య కొనసాగుతున్న విభేదాలే ఈ ఘటనకు కారణమని ప్రాథమికంగా భావిస్తున్న పోలీసులు, కేసు నమోదు చేసి దర్యాప్తు చేస్తున్నారు.

Publish Date: Jun 10, 2026 10:05AM

బంగారంపై పెట్టుబడి: లాకర్ల భయం లేకుండా భారీ లాభాలు పొందే 3 స్మార్ట్ మార్గాలు ఇవే!

భారతదేశంలో సాంప్రదాయకంగా బంగారం కొనడం అంటే కేవలం ఆభరణాల రూపంలోనే అనుకునే రోజులు మెల్లగా మారిపోతున్నాయి. నేటి ఆధునిక కాలంలో పెట్టుబడిదారులు పాతకాలపు లాకర్ల భయం, దొంగతనాల ఆందోళనల నుండి బయటపడి సరికొత్త డిజిటల్ బంగారం వైపు అడుగులు వేస్తున్నారు. శతాబ్దాలుగా సంపదకు చిహ్నంగా నిలిచిన పసిడిని ఇప్పుడు ఎంతో సులభంగా, సురక్షితంగా పేపర్‌లెస్ రూపంలో దాచుకునే అద్భుతమైన అవకాశాలు అందుబాటులోకి వచ్చాయి. భౌతిక బంగారం కొనేటప్పుడు జేబుకు చిల్లు పెట్టే మేకింగ్ ఛార్జీలు, తరుగు వంటి అదనపు వృథా ఖర్చులు ఏవీ లేకుండా, వంద శాతం స్వచ్ఛతతో కూడిన పసిడిని డిజిటల్ రూపంలో సొంతం చేసుకోవడం ఇప్పుడు చాలా సులభం అయింది. మార్కెట్ ఒడిదుడుకుల నుండి మీ సంపదను రక్షించుకోవడానికి ఈ ఆధునిక మార్గాలు ఒక రక్షణ కవచంలా పనిచేస్తాయి. బంగారం ధర పెరగడంతో పాటు ప్రతి ఏటా అదనపు ఆదాయం కూడా సంపాదించాలి అనుకునే వారికి సావరిన్ గోల్డ్ బాండ్స్ లేదా ఎస్‌జీబీ (SGB) ఒక అత్యుత్తమమైన వరం. కేంద్ర ప్రభుత్వం తరఫున రిజర్వ్ బ్యాంక్ ఆఫ్ ఇండియా (RBI) ఈ బాండ్లను ఎప్పటికప్పుడు జారీ చేస్తూ ఉంటుంది. ఈ సావరిన్ గోల్డ్ బాండ్ల ప్రత్యేకత ఏంటంటే, ఇందులో మనం పెట్టే పెట్టుబడిపై మార్కెట్ ధరల పెరుగుదల లాభాలతో పాటు అదనంగా ఏడాదికి 2.5 శాతం స్థిర వడ్డీ (Fixed Interest) లభిస్తుంది. ఈ వడ్డీ నేరుగా మీ బ్యాంక్ ఖాతాలో జమ అవుతుంది. అన్నిటికంటే ముఖ్యమైన మరియు లాభదాయకమైన విషయం ఏమిటంటే, ఎనిమిదేళ్ల మెచ్యూరిటీ కాలం తర్వాత ఈ బాండ్ల ద్వారా వచ్చే క్యాపిటల్ గెయిన్స్ లేదా లాభాలపై ఎలాంటి పన్ను (Tax) చెల్లించాల్సిన అవసరం లేదు. దీర్ఘకాలిక పెట్టుబడిదారులకు పన్ను ఆదా చేసుకుంటూ భారీ రాబడులు సాధించడానికి ఇది ఒక సురక్షితమైన మార్గం. మరోవైపు, స్టాక్ మార్కెట్లో చురుగ్గా ట్రేడింగ్ చేసే వారికి మరియు తక్షణ లిక్విడిటీని ఆశించే వారికి గోల్డ్ ఎక్స్ఛేంజ్ ట్రేడెడ్ ఫండ్స్ లేదా గోల్డ్ ఈటీఎఫ్ (Gold ETF) లు ఎంతగానో ఉపయోగపడతాయి. షేర్ల లాగానే వీటిని కూడా స్టాక్ ఎక్స్ఛేంజీల ద్వారా ఎప్పుడైనా సులభంగా కొనవచ్చు మరియు మార్కెట్ అవసరాలను బట్టి వెంటనే విక్రయించవచ్చు. ఇవి పూర్తిగా డిజిటల్ రూపంలో మీ డీమ్యాట్ ఖాతాలో చాలా భద్రంగా నిల్వ ఉంటాయి. ఒకవేళ మీ వద్ద డీమ్యాట్ ఖాతా లేకపోయినా చింతించాల్సిన అవసరం లేదు, గోల్డ్ మ్యూచువల్ ఫండ్స్ ద్వారా సిస్టమాటిక్ ఇన్వెస్ట్‌మెంట్ ప్లాన్ లేదా ఎస్ఐపీ (SIP) పద్ధతిని ఎంచుకుని ప్రతి నెలా చిన్న మొత్తాల్లో పసిడిపై క్రమశిక్షణతో కూడిన పొదుపును ప్రారంభించవచ్చు. అయితే, ఈ ఈటీఎఫ్ మరియు మ్యూచువల్ ఫండ్స్ ద్వారా వచ్చే లాభాలపై మీ వ్యక్తిగత ఆదాయపు పన్ను స్లాబ్ (Income Tax Slab) ప్రకారం పన్ను వర్తిస్తుందని గమనించాలి. చివరగా, పెద్ద మొత్తంలో కాకుండా కేవలం ఒక్క రూపాయి వంటి అతి చిన్న మొత్తంతో కూడా బంగారం కొనాలనుకునే సామాన్యుల కోసం డిజిటల్ గోల్డ్ (Digital Gold) అందుబాటులో ఉంది. గూగుల్ పే, ఫోన్ పే, పేటీఎం వంటి ప్రముఖ మొబైల్ పేమెంట్ యాప్స్ ద్వారా దీన్ని ఎంతో సులభంగా యాక్సెస్ చేయవచ్చు. అయితే, డిజిటల్ గోల్డ్ కొనుగోలు చేసేటప్పుడు ప్రతి లావాదేవీపై 3 శాతం జీఎస్టీ (GST) అదనంగా వర్తిస్తుందని గుర్తుంచుకోవాలి. అంతేకాకుండా, ఈ విభాగంలో ప్రభుత్వ నియంత్రణ సంస్థల పర్యవేక్షణ కాస్త తక్కువగా ఉంటుంది. కాబట్టి ఎల్లప్పుడూ నమ్మకమైన, గుర్తింపు పొందిన ప్లాట్‌ఫామ్స్‌ను మాత్రమే ఎంచుకోవడం మంచిది. మీరు కొనే డిజిటల్ గోల్డ్‌కు సమానమైన భౌతిక బంగారం నిల్వలను సదరు సంస్థలు సురక్షితమైన వాల్ట్ లలో భద్రపరుస్తున్నాయో లేదో ఒకసారి సరిచూసుకోవడం ఎంతో ముఖ్యం. మీ ఆర్థిక లక్ష్యాలను బట్టి లిక్విడిటీ, పన్ను ప్రయోజనాల కోసం మీ పెట్టుబడులను ఈ మూడు మార్గాలలో విభజించుకోవడం (Diversification) ఎంతో తెలివైన ఆర్థిక నిర్ణయం అవుతుంది.

Publish Date: Jun 10, 2026 10:04AM

బిట్‌కాయిన్ షాక్: 50% పతనం తర్వాత మళ్లీ రూట్ మార్చిందా?

క్రిప్టోకరెన్సీ ప్రపంచంలో తీవ్ర ప్రకంపనలు రేపుతూ, ప్రపంచంలోనే అతిపెద్ద డిజిటల్ కరెన్సీ అయిన బిట్‌కాయిన్ ఊహించని ఒడిదుడుకులను ఎదుర్కొంటోంది. ఇటీవలే తీవ్రమైన అమ్మకాల ఒత్తిడితో అల్లాడిపోయిన బిట్‌కాయిన్, మళ్లీ నెమ్మదిగా కోలుకుంటూ 60,000 డాలర్ల కీలకమైన మానసిక స్థాయిని అధిగమించింది. గత వారం శుక్రవారం రోజున, అక్టోబర్ 2024 తర్వాత మొదటిసారిగా ఈ డిజిటల్ అసెట్ విలువ 60,000 డాలర్ల కంటే కిందికి పడిపోవడంతో మదుపరులలో తీవ్ర ఆందోళన వ్యక్తమైంది. ప్రస్తుత ట్రేడింగ్‌లో ఇది 2 శాతానికి పైగా క్షీణించి 61,366.90 డాలర్ల వద్ద కొనసాగుతున్నప్పటికీ, కీలక మార్కును తిరిగి దక్కించుకోవడం క్రిప్టో మార్కెట్‌లో పెద్ద చర్చనీయాంశంగా మారింది. అయితే, ఈ తాజా రికవరీ వెనుక ఒక పెద్ద నల్లటి నీడ దాగి ఉంది. సామ్ బ్యాంక్‌మన్-ఫ్రైడ్‌కు చెందిన ఎఫ్‌టీఎక్స్ (FTX) ఎక్స్ఛేంజ్ 2022లో కుప్పకూలిన తర్వాత, బిట్‌కాయిన్ చవిచూసిన అత్యంత ఘోరమైన వారంతపు పతనం ఇదే కావడం గమనార్హం. ఆదివారంతో ముగిసిన గత ఏడు రోజుల్లో బిట్‌కాయిన్ విలువ ఏకంగా 16 శాతం మేర పడిపోయింది. గతంలో నవంబర్ 2022లో ఎఫ్‌టీఎక్స్ దివాళా తీసినప్పుడు బిట్‌కాయిన్ ఒకే వారంలో 23 శాతం కుప్పకూలింది. దాదాపు 32 బిలియన్ డాలర్ల విలువైన ఆనాటి ఎఫ్‌టీఎక్స్ సంక్షోభం తర్వాత, మళ్లీ అంతటి తీవ్రమైన పతనాన్ని మార్కెట్ ఇప్పుడే చూసింది. బిట్‌కాయిన్ గత కొన్ని నెలలుగా తీవ్ర బలహీనతను ప్రదర్శిస్తోంది. మే నెల ప్రారంభంలో దాదాపు 82,000 డాలర్ల వద్ద ట్రేడ్ అయిన ఈ కరెన్సీ, ఆ తర్వాత 20 శాతానికి పైగా నష్టపోయి 63,000 డాలర్లకు పడిపోయింది. ప్రస్తుతం ఈ డిజిటల్ కరెన్సీ తన జీవితకాల గరిష్ట స్థాయి నుండి ఏకంగా 50 శాతం నష్టంలో నడుస్తోంది. అక్టోబర్ 2025లో బిట్‌కాయిన్ రికార్డు స్థాయిలో 126,000 డాలర్ల మార్కును తాకింది. కానీ 2026 సంవత్సరంలోనే ఇది ఇప్పటివరకు 27 శాతం విలువను కోల్పోవడం మార్కెట్ విశ్లేషకులను సైతం ఆశ్చర్యపరుస్తోంది. ప్రస్తుత రికవరీ తాత్కాలికమేనని, ఈ మార్కెట్ కరెక్షన్ ఇంకా ముగియలేదని నిపుణులు హెచ్చరిస్తున్నారు. ఈ భారీ పతనానికి అనేక అంతర్జాతీయ కారణాలు బలాన్ని ఇస్తున్నాయి. ప్రధానంగా బిట్‌కాయిన్ ఈటీఎఫ్‌ల (ETFs) నుండి పెట్టుబడులు నిరంతరాయంగా వెలుపలికి పోవడం పెద్ద దెబ్బగా మారింది. మరోవైపు, ప్రపంచవ్యాప్తంగా ఇన్వెస్టర్లు క్రిప్టోలను వదిలి ఆర్టిఫిషియల్ ఇంటెలిజెన్స్ (AI) ఆధారిత స్టాక్స్ వైపు పరుగులు పెడుతున్నారు. దీనికి తోడు, అమెరికాలో బలమైన ఉపాధి గణాంకాలు రావడం మరియు అమెరికా-ఇరాన్ మధ్య కొనసాగుతున్న భౌగోళిక రాజకీయ ఉద్రిక్తతల వల్ల వడ్డీ రేట్లు మరింత పెరిగే అవకాశం ఉందన్న భయాలు మార్కెట్‌ను కమ్మేసాయి. మిడిల్ ఈస్ట్‌లో నెలకొన్న యుద్ధ వాతావరణం చమురు ధరలను పెంచడమే కాకుండా ద్రవ్యోల్బణాన్ని పెంచుతోంది. వీటన్నింటి మధ్య వ్యూహాత్మకంగా మైక్రోస్ట్రాటజీ సంస్థకు చెందిన మైఖేల్ సేలర్ తన బిట్‌కాయిన్ నిల్వలలో కొంత భాగాన్ని విక్రయించడం ఇన్వెస్టర్ల సెంటిమెంట్‌ను మరింత దెబ్బతీసింది. రాబోయే రోజుల్లో క్రిప్టో మార్కెట్ ఏ మలుపు తిరుగుతుందో చూడాలి.

Publish Date: Jun 10, 2026 10:02AM

హైదరాబాద్‌లో భారీ వర్షాలు: ఐటీ ఉద్యోగులకు అలర్ట్, ఆ రూట్లలో ట్రాఫిక్ నరకం!

భాగ్యనగరాన్ని వరుణుడు అస్సలు వదలడం లేదు. హైదరాబాద్‌లోని ప్రధాన ఐటీ కారిడార్లు, ప్రముఖ బిజినెస్ సెంటర్లలో భారీ వర్షం దంచికొడుతోంది. కుండపోత వాన కారణంగా నగరంలోని రోడ్లన్నీ క్షణాల వ్యవధిలోనే జలమయంగా మారిపోయాయి. రాబోయే 48 గంటల పాటు నగరంలో వర్షాలు ఇలాగే ముంచెత్తుతాయని భారత వాతావరణ శాఖ (IMD) తీవ్ర హెచ్చరికలు జారీ చేసింది. ఈ నేపథ్యంలో ఆఫీసులకు వెళ్లే ఉద్యోగులు, సాధారణ ప్రజలు ప్రయాణాల విషయంలో చాలా అప్రమత్తంగా ఉండాలి. రోడ్లపై విజిబిలిటీ అంటే ముందర ఉండే దారులు కనిపించే సామర్థ్యం చాలా తక్కువగా ఉండటంతో వాహనదారులు తీవ్ర ఇబ్బందులు పడుతున్నారు. ముఖ్యంగా ట్యాంక్ బండ్, బేగంపేట, ఖైరతాబాద్ వంటి నగర గుండెకాయ లాంటి ప్రాంతాల్లో ట్రాఫిక్ నరకం స్పష్టంగా కనిపిస్తోంది. అటు సెక్రటేరియట్ బెల్ట్, ఇటు గచ్చిబౌలి, హైటెక్ సిటీ రూట్లలో భారీగా నీరు నిలిచిపోయింది. దీనివల్ల వందలాది వాహనాలు రోడ్లపైనే నిలిచిపోయి నత్తనడకన సాగుతున్నాయి. అత్యవసరమైతే తప్ప ఇళ్ల నుంచి బయటకు రావొద్దని హైదరాబాద్ ట్రాఫిక్ పోలీస్ (HTP) ప్రజలకు అధికారికంగా విజ్ఞప్తి చేస్తోంది. ఈ అకాల వర్షాల వల్ల నిత్యం ప్రయాణించే ఐటీ ఉద్యోగులు, కూలీలు, సామాన్య ప్రజలు నరకయాతన అనుభవిస్తున్నారు. అందుకే ఎప్పటికప్పుడు రోడ్ల పరిస్థితిని గమనిస్తూ ముందుకు సాగడం ఎంతో ముఖ్యం. ఈ ట్రాఫిక్ కష్టాల నుంచి సురక్షితంగా బయటపడటానికి నిపుణులు కొన్ని కీలక సూచనలు చేస్తున్నారు. ఐటీ రంగంలో పనిచేసే ఉద్యోగులు వీలైతే వర్క్ ఫ్రమ్ హోమ్ (WFH) ఆప్షన్ ఎంచుకోవడం లేదా ఫ్లెక్సిబుల్ టైమింగ్స్ ద్వారా ఆఫీసులకు వెళ్లడం ఉత్తమమైన మార్గం. ఒకవేళ విధిలేక బయటకు వెళ్లాల్సి వస్తే, వర్షం పూర్తిగా తగ్గిన తర్వాత కనీసం గంట సమయం ఆగి మీ ప్రయాణం మొదలుపెట్టండి. రోడ్లపై ఉండే ట్రాఫిక్ జామ్స్, మోకాళ్ల లోతు నీటి నిల్వలను తప్పించుకోవడానికి సొంత వాహనాలను పక్కన పెట్టి హైదరాబాద్ మెట్రో రైలును ఆశ్రయించడం చాలా మేలు. దీనివల్ల అమూల్యమైన సమయం ఆదా అవ్వడమే కాకుండా మానసిక ఒత్తిడి కూడా తగ్గుతుంది. బయలుదేరే ముందు మొబైల్ యాప్స్‌లో లైవ్ ట్రాఫిక్ అప్‌డేట్స్, గూగుల్ మ్యాప్స్‌లో రోడ్ బ్లాకేజీల గురించి ఒకసారి నిశితంగా పరిశీలించండి. నగరంలో ఏ ప్రాంతంలో ఎలాంటి ప్రభావం ఉందో గమనిస్తే, బేగంపేట ఏరియాలో భారీగా ట్రాఫిక్ జామ్ అవుతోంది, కాబట్టి అక్కడ పబ్లిక్ ట్రాన్స్‌పోర్ట్ వాడటం మంచిది. మాదాపూర్ ఐటీ జోన్‌లో రోడ్లపై మోకాళ్ల లోతు నీరు నిలిచింది, కాబట్టి అక్కడి ఉద్యోగులకు వర్క్ ఫ్రమ్ హోమ్ మేలు చేస్తుంది. ఇక సెక్రటేరియట్ రోడ్డులో రాకపోకలపై ఆంక్షలు విధించారు, కాబట్టి ప్రత్యామ్నాయ దారుల కోసం లైవ్ మ్యాప్స్ చూడటం తప్పనిసరి.

Publish Date: Jun 10, 2026 10:00AM