Home  
Politics

హైదరాబాదులో బాంబు పేలుళ్లు: 15 మృతి

    ఈ రోజు (గురువారం) సాయంత్రం సుమారు 7గంటలకి హైదరాబాదులో అత్యంత రద్దీ ప్రాంతమయిన దిల్ షుక్ నగర్ వద్ద గల కోణార్క్ మరియు వేంకటాద్రి సినిమాహాళ్ళ వద్ద ఒకే నిమిషం వ్యవధిలో రెండు శక్తివంతమయిన వరుస బాంబు పేలుళ్లు జరిగాయి. ఈ ఘటనలో మొత్తం 22మంది చనిపోయినట్లు సమాచారం. మరో 50 మంది తీవ్ర గాయాలతో ఉస్మానియా, కమల, యశోద, ఒమ్నీఆసుపత్రులలో చికిత్స పొందుతున్నారు. ప్రత్యక్ష సాక్షుల కధనం ప్రకారం, రెండు సైకిళ్ళపై ఉంచిన టిఫిన్ బాక్సులలో బాంబులు ఒక దాని తరువాత మరొకటి కేవలం నిమిషం వ్యవధిలో ప్రేలడంతో వెంకటాద్రి సినిమా హాలు వద్ద 10 మంది, కోణార్క్ సినిమా హాలు వద్ద 12 మంది అక్కడిక్కడే చనిపోయారని తెలిపారు. బాంబు ప్రేలుళ్ళతో భయబ్రాంతులయిన జనం ఒక్కసారిగా చల్లాచదురయి నలువైపులా పరుగులు తీయడంతో ఆ తొక్కిసలాటలో అనేకమంది గాయపడ్డారు. విచారకరమయిన విషయం ఏమిటంటే, రెండు రోజుల క్రితమే ఇటువంటి సంఘటన ఏదో ఒకటి జరగబోతోందని కేంద్ర నిఘా వర్గాలు ఆంధ్రప్రదేశ్ తో సహా మరికొన్ని రాష్ట్రాలకు హెచ్చరికలు జారీ చేసాయి.మరి మన రాష్ట్రం ఆ హెచ్చరికలను పట్టించుకోలేదో లేక తగినంత అప్రమత్తత ప్రదర్శించలేకపోయిందో తెలియదు కానీ, మొత్తం మీద అమాయకులయిన ప్రజలు ప్రాణాలు కోల్పోయారు.   ప్రధాన మంత్రి మన్మోహన్ సింగ్ యధావిధిగా ‘ఇది పిరికి పందల చర్య’ అంటూ ఖండిచేసి, ఎక్స్ గ్రేషియా కూడా ప్రకటించడంతో తన కర్తవ్యం పూర్తిచేసుకొన్నారు. హోం శాఖా సహాయ మంత్రి ఆర్.కే.సింగ్ ప్రత్యెక విమానంలో హైదరాబాదు బయలు దేరారు. హోం మంత్రి షిండే ఇది ఇండియన్ ముజాహిద్ సంస్థ చేసి ఉండవచ్చునని అనుమానిస్తున్నారు.   డీ.జీ.పీ. దినేష్ రెడ్డి, బాంబ్ డిస్పోస్ స్క్వాడ్, పోలీసులు, ఇంటలిజెన్స్ అధికారులు ఘటన స్థలానికి చేరుకొని దర్యాప్తు మొదలు పెట్టారు. రాష్ట్ర ముఖ్య మంత్రి కిరణ్ కుమార్ రెడ్డి, కొందరు మంత్రులు, స్థానిక శాసన సభ్యులు, నగర మేయర్ తదితరులు హుటాహుటిన ఘటనా స్థలానికి జేరుకొని స్వయంగా సహాయ చర్యలను పర్యవేక్షిస్తున్నారు.   రాష్ట్రంలో, దేశంలో అంతటా హై-ఎలర్ట్ ప్రకటించి, రైల్వే స్టేషన్లు, బస్సు స్టేషన్లు, విమానాశ్రయాలు వంటి ప్రాంతాలలో భద్రత కట్టుదిట్టం చేసి తనికీలు నిర్వహిస్తున్నారు. ఘటన జరిగి ఇప్పటికి 3గంటలు గడిచినా, ఇంతవరకు ఏ సంస్థ కూడా ప్రేలుళ్ళకు బాధ్యతా వహిస్తూ ఇంతవరకు ఎటువంటి ప్రకటన చేయలేదు.

ధర్మాన కూడా కావూరి రూటే

  సాధారణ ఎన్నికలు ఎప్పుడొస్తాయో తెలియదు కానీ, వాటి ప్రభావం మాత్రం రాజకీయ నాయకుల మీద బాగానే ఉన్నట్లు కనిపిస్తోంది. ఇంత కాలం దిక్కార స్వరం వినిపిస్తూ, పార్టీని విమర్శిస్తున్న నేతల గొంతుల్లోంచి, ఇప్పుడు పార్టీకి అనుకూలమయిన మాటలు వినిపిస్తున్నాయి. తమకు పదవులు వెంట్రుక ముక్కతో సమానం అంటూ, రాజీనామాలు విసిరికొట్టిన వారే ఇప్పుడు వాటిని ఆమోదించవద్దని పార్టీ కాళ్ళు పట్టుకొని మరీ వేడుకొంటున్నారు. ఇంత కాలం రాజీనామాల పేరుతో, తమ బాధ్యతల నుండి తప్పించుకు తిరుగుతూ జీత భత్యాలు మాత్రం బహు చక్కగా స్వీకరించిన వారు మళ్ళీ సచివాలయాన్ని వెతుకొనివస్తున్నారు.   ఏలూరు పార్లమెంటు సభ్యుడు కావూరి సాంబశివరావు ఈ రోజు తన రాజీనామాను ఉపసంహరించుకొని, పార్లమెంటు సమావేశాలకు హాజరు కాగ, ఇక్కడ రాష్ట్రంలో రెవెన్యు మంత్రివర్యులు ధర్మాన ప్రసాదరావు కూడా ఈరోజే సచివాలయంలో తన విధులకు హాజరవడం కాకతాళీయంగా జరిగింది.   బహుశః రాహుల్ గాంధీ యువమంత్రమే వారిని భయపెట్టి విధులకు హాజరయ్యేలా చేసింది అని చెప్పవచ్చును. క్రిందటి నెలలో కాంగ్రెస్ పార్టీ అధిష్టానం తెలంగాణాపై తీవ్రంగా కసరత్తు చేస్తున్న తరుణంలో, రాజీనామాలు చేస్తామని బెదిరించిన కొందరు సీనియర్ కాంగ్రెస్ నేతలకి “పార్టీలో ఉంటే ఉండండి పోతే పొండి, మీరు పోతే కొత్తవారితో పార్టీని ముందుకు తీసుకుపోతాము,” అని గట్టిగా చెప్పడం కూడా అనేక మంది నేతలకు కనువిప్పు కలిగించిందని చెప్పవచ్చును. కాంగ్రెస్ సంస్కృతికి అలవాటుపడిన ప్రాణాలు వేరే చోట ఇమడలేవనే సంగతి, సదరు నేతలే కాక, పార్టీ అధిష్టానానికి కూడా అర్ధం అయినందువల్లే, కాంగ్రెస్ పార్టీ పరిస్థితుల్లో క్రమంగా మార్పులు కనబడుతున్నాయి.

కావూరి రాజీనామా కధ కంచికి

  తనను కాదని నిన్న మొన్న పార్టీలో చేరిన చిరంజీవికి మంత్రి పదవి ఇచ్చారని అలిగి రాజీనామా చేసిన ఏలూరు కాంగ్రెస్ పార్లమెంటు సభ్యుడు కావూరి సాంబశివరావుకి అకస్మాత్తుగా జ్ఞానోదయం అయినట్లుంది. ఆయనను కాంగ్రెస్ పార్టీ బొట్టు పెట్టి పిలవకపోయినా ఈ రోజు ఆయనంతట ఆయనే స్వయంగా పార్లమెంటు సమావేశాలకు హాజరవడమే కాకుండా, అమ్మ సోనియమ్మను కలుసుకొని తన రాజీనామాకు సంజాయిషీలు కూడా ఇచ్చుకొన్నారు.   తనకి మంత్రి పదవి ఈయకపోతే, కాంగ్రెస్ కొంప కొల్లేరు చేస్తాను (కొల్లేరు సరసు ఉద్యమం మళ్ళీ మొదలుపెడతానని బెదిరింపు), విజయవాడ-హైదరాబాద్ రహదారులను దిగ్బంధం చేసేస్తానని బెదిరించిన ఆయనకు ఇంత అకస్మాత్తుగా జ్ఞానోదయం ఎందుకయిందని ఆలోచిస్తే, బహుశః ఎన్నికలు దగ్గర పడుతున్న ఈ సమయంలో తానూ ఇంకా ఈ డ్రామా ఇలాగే కొనసాగిస్తే, కొత్తగా పార్టీ పగ్గాలు చెప్పటిన రాహుల్ గాంధీ తనకు బదులు మరో నాయకుడికి టికెట్ ఇచ్చేస్తే అప్పుడు తన కొంపే కోల్లెరవుతుందని గ్రహించినందునే ఆయన ఈ రోజు డిల్లీకి పరుగులు తీసి ఉంటారు.   యువకుడయిన రాహుల్ గాంధీ ఇటువంటి ముసలి నాయకులను వదిలించుకొని, యువతకే ప్రాధాన్యం ఇవ్వాలని ఆలోచిస్తునందున, తన రాజీనామాను కనుక ఆమోదించేస్తే నష్టపోయేది తనే తప్ప, కాంగ్రెస్ పార్టీ కాదని ఆయనకీ అర్ధమయి ఉంటుంది. అందువల్లే, తన అలకలు వీడి బుద్దిగా పార్లమెంటులో కూర్చొన్నారు మన కావురివారు. బహుశః తెలంగాణా కాంగ్రెస్ నేతలకు కూడా త్వరలోనే ఇటువంటి జ్ఞానోదయమే కలిగే అవకాశం ఉందని చెప్పవచ్చును.

తెలంగాణ వచ్చి తీరుతుంది

        ప్రత్యేక తెలంగాణ సాధనపై తాము వెనక్కు తగ్గలేదని, తెలంగాణ రాష్ట్రం వచ్చి తీరుతుందని రాష్ట్ర పంచాయతీ రాజ్ శాఖ మంత్రి కె. జానారెడ్డి వెల్లడించారు. కేంద్ర ప్రభుత్వం తెలంగాణ ఇస్తుందన్న నమ్మకం ఉందని, సంయమనం పాటిస్తున్నామని ఆయన అన్నారు. తెలంగాణ వచ్చి తీరుతుందని ఆయన ఆశాభావం వ్యక్తం చేశారు.   తెలంగాణ సాధన కోసం టీ. జెఎసి తలపెట్టిన సడక్ బంద్ ప్రజాస్వామ్య స్ఫూర్తికి నిదర్శనమని ఆయన అన్నారు. సడక్ బంద్ ద్వారా తెలంగాణ జెఎసి ప్రజాస్వామ్య హక్కును వినియోగించుకుంటోందని జానా రెడ్డి అన్నారు. స్థానిక సంస్థల ఎన్నికలను నిర్వహించి తీరుతామని జానారెడ్డి చెప్పారు. అయితే, ఎన్నికలు ఎప్పుడనేది ఇప్పుడే చెప్పలేమని అన్నారు. పాతపద్ధతిలోనే స్థానిక సంస్థల ఎన్నికలు జరుగుతాయని, ఈ విషయంలో అపోహలు వద్దని ఆయన అన్నారు. జానారెడ్డిముఖ్యమంత్రి కిరణ్ కుమార్ రెడ్డితో పంచాయతీరాజ్ ఎన్నికలపై చర్చించినట్లు సమాచారం.  

ఇంత జబర్దస్త్ గా కత్తెరేస్తే ఎలా? నందిని రెడ్డి

  తన సినీప్రస్థానం ‘ఎంచక్కగా అలా మొదలయిందని’ సంతోషపడిన నందినీ రెడ్డమ్మ, తొందరపడి వచ్చిన ఆఫర్లన్నీ ఒప్పేసుకోకుండా, జాగ్రత్తగా ఆలోచించి ఒక ‘జబర్దస్త్’ సినిమా తీసి సెన్సార్ బోర్డు చేతిలో పెడితే, వారు ఆమె కష్టాన్ని గుర్తించక, తమ మొండి కత్తెరతో ఆమె ఏంతో అపురూపంగా తీసిన పాటలని, సన్నివేశాలను నిర్దాక్షిణ్యంగా ఎడాపెడా కత్తిరించి పడేసి ఆమె సినిమాను ‘U/A’ సర్టిఫికేట్ ప్రధానం చేసేసరికి ఆమెకు చాల కోపం వచ్చేసింది.   అన్ని కత్తెర్లు వేసినా ఇంకా తృప్తి కలగని సెన్సార్ బోర్డ్ వారికి ఆమె సినిమాలో ప్రధాన ఆకర్షణగా నిలిచే ‘అల్లా అల్లా’పాటలో ఆ ‘రెండు అల్లా పదాలను’ కూడా తీసి ‘హల్లా... గుల్లా...’ అనో మరొకటో వాడుకోమని ఒక ఉచిత సలహా కూడా ఇచ్చేసరికి నందిని శివమెత్తిపోయారు.   “అసలు సినిమా ఎలా తీయాలో, సినిమాలో ఏ ఏ పదాలు ఉండాలో, ఏవి ఉండకూడదో, పాటలు, డైలాగులు ఏవి ఉండచ్చో, ఏవి ఉండకూడదో వంటి వివరాలన్నీ వేసి ఒక పుస్తకం అచ్చేయించి మాకందరికీ పంచితే, దాని ప్రకారం సినిమాలు తీయగలిగిన వాళ్ళం తీస్తాము, అలా తీయలేని వాళ్ళం మూట ముల్లె సర్దుకొని పోతాము. అంటే తప్ప, ఇలా సెన్సార్ పేరిట అత్యుత్సాహం ప్రదర్శిస్తూ మా భావ ప్రకటన స్వేచ్చను హరించకండి. మీరు కత్తెర్లను ఇలాగే ఉపయోగిస్తే, ఏదో ఒకరోజు ఇక సినిమా పరిశ్రమ మూతపడక తప్పదు,” అంటూ ఆమె చిందులు వేసారు. సరే! ఇన్నికష్టాలుపడి తీసిన సినిమా ‘జబర్దస్త్’ గా ఆడితే ఈ బాధలన్ని ప్రసవ వేదనలా మరిచిపోవచ్చును. లేదంటే, సెన్సార్ బోర్డ్ చేతివాటం వల్లనే ఇలా అయిపొయింది అని ఆమె ఆవేదనపడక తప్పదు.   ఇటీవల ‘లవ్ పాయిజన్’ సినిమాకు కూడా సెన్సార్ బోర్డు సభ్యురాలు ఒకావిడ క్లియరెన్స్ ఈయకుండా అడ్డుపడిందంటూ ఆ సినిమా దర్శకుడు, సెన్సార్ బోర్డు కార్యాలయం ముందే పురుగుల మందు తాగి ఆత్మహత్య ప్రయత్నం చేసి ప్రస్తుతం ఆసుపత్రిలో ఉన్నాడు. పీత కష్టాలు పీతవన్నట్లు, ఎవరి కష్టాలు వారికున్నాయి.   సెన్సార్ బోర్డ్ వారు పోనీలే అని సినిమాలను చూసి చూడకుండా వదిలేస్తే, ఆనక కోర్టు కేసులు, ధర్నాలు, ఆందోళనలు మొదలవుతాయి. సరే, తమ కత్తెర్లు ఎంత మొండి బారిపోయినా కష్టపడి కత్తెర్లు వేస్తే, ఇదిగో ఇలా నందిని వంటివారు శివాలెత్తిపోతుంటారు. చూడబోతే సెన్సార్ బోర్డ్ పని కత్తెర మీద సాములాగానే ఉందిప్పుడు.  

కోహినూర్ వజ్రాన్ని తిరిగి ఇచ్చే ప్రసక్తే లేదు

        బ్రిటీష్ రాణి ఎలిజబెత్-2 కిరీటంలో ఉన్న కోహినూర్ వజ్రాన్ని తిరిగి ఇచ్చేదిలేదని తేల్చి చెప్పారు బ్రిటన్ ప్రధాని డేవిడ్ కామెరూన్. భారత్ పర్యటనలో ఉన్న ఆయన కోహినూర్ తమదేనని అన్నారు. 1850లో బ్రిటన్ రాణికి అప్పటి గవర్నర్ జనరల్ బహుమానంగా ఇచ్చారని ఆయన పేర్కొన్నారు.   1997లో రాణి ఎలిజబెత్ భారత పర్యటనకు వచ్చినప్పటి నుంచి ఈ వజ్రాన్ని భారత్‌కు తిరిగి ఇచ్చివేయాలనే వాదన వస్తోంది. 109 క్యారెట్ల కోహినూర్ వజ్రం ప్రపంచంలో ఉన్న అతి పెద్ద వజ్రాల్లో ఒకటి. ఈ వజ్రాన్ని తిరిగి ఇవ్వాలని బ్రిటన్ ను భారత్ కోరినా ఇప్పటికీ ఫలితం లేదు. తాజాగా బ్రిటన్ ప్రధాని డేవిడ్ కామెరాన్ కూడా ఇవ్వమని చెబుతున్నారు. 1919లో జరిగిన జలియన్‌వాలా బాగ్ ఊచకోత బ్రిటిష్ చరిత్రలోనే అత్యంత సిగ్గుచేటైన సంఘటన అని బ్రిటన్ ప్రధాని డేవిడ్ కామెరాన్ చెప్పిన విషయం తెలిసిందే. స్వాతంత్ర్య పోరాటం సందర్భంగా భారతదేశంలో బ్రిటిష్ పాలనలో ఈ ఊచకోత జరిగింది. జలియన్‌వాలా బాగ్‌ను సందర్శించిన తొలి బ్రిటన్ ప్రధాని డేవిడ్ కామెరాన్ మాత్రమే. సంఘటనకు క్షమాపణ చెప్పడానికి మాత్రం ఆయన ఇష్టపడలేదు.

అక్బరుద్దీన్‌ ను వెంటాడుతున్న కేసులు

      వివాదాస్పద వ్యాఖ్యల కేసులు అక్బరుద్దీన్‌ ను వెంటాడుతున్నాయి. నిర్మల్ లో నమోదైన కేసులో ఆదిలాబాద్ జైలులో 40 రోజులు ఉండి ఇటీవల బెయిల్ మీద విడుదలైన అక్బరుద్దీన్ కు తాజాగా బెంగుళూరు కోర్టు సమన్లు జారీ చేసింది. ఈనెల 23న వ్యక్తిగతంగా తమ ఎదుట హాజరు కావాలని న్యాయస్థానం ఆదేశించింది. ఈ మేరకు కోర్టు సమన్లను బంజారాహిల్స్ పోలీసులు గురువారం అక్బరుద్దీన్కు అందజేశారు. అక్బర్ వ్యాఖ్యలపై దిలీప్‌కుమార్, ధరంపాల్‌ అనే న్యాయవాదులు ఇటీవల బెంగళూరు అదనపు ఛీఫ్ మెట్రోపాలిటన్ మెజిస్ట్రేట్ కోర్టులో పిటిషన్లు దాఖలు చేశారు. పిటిషన్పై విచారణ జరిపిన న్యాయవాది అక్బరుద్దీన్‌కు నోటీసులు జారీ చేశారు. తన మీద దేశవ్యాప్తంగా నమోదైన కేసులను ఒకే చోటుకు తీసుకురావాలని కూడా కోర్టును కోరారు. కానీ కోర్టు దానిని తిరస్కరించింది.

మంత్రి పొన్నాల ఎన్నిక కేసు 27కు వాయిదా

    ఐటి శాఖ మంత్రి పొన్నాల లక్ష్మయ్య ఎన్నిక కేసు విచారణను రాష్ట్ర అత్యున్నత న్యాయస్థానం హైకోర్టు ఈ నెల 27వ తేదికి వాయిదా వేసింది. ఈ రోజు(గురువారం) పొన్నాల లక్ష్మయ్య కోర్టుకు హాజరయ్యారు. ఆయన 2009 నాటి ఎన్నికపై వివరణ ఇచ్చారు. అనంతరం కోర్టు కేసును వాయిదా వేసింది. 2009 సాధారణ ఎన్నికల్లో పొన్నాల లక్ష్మయ్య వరంగల్ జిల్లా జనగామ నియోజకవర్గం నుండి గెలుపొందారు. ఆయన ఎన్నికను సవాల్ చేస్తూ ప్రత్యర్థి, నాటి తెలంగాణ రాష్ట్ర సమితి అభ్యర్థి కొమ్మూరు ప్రతాప్ రెడ్డి కోర్టును ఆశ్రయించారు. ఈ కేసులో పొన్నాల ఇప్పటికి మూడుసార్లు హైకోర్టుకు హాజరయ్యారు.

తెలంగాణ ఎంపీలు ధర్నా ఎందుకో?

  తెలంగాణా అంశంపై కాంగ్రెస్ వెనకడుగు వేసిన తరువాత, ఆ పార్టీకి చెందిన తెలంగాణ కాంగ్రెస్ యం.పీ.లు రాజీనామాలు చేసేస్తామని కొన్ని రోజులు హడావుడి చేసారు. అయితే, ఆఖరి నిమిషంలో రాజీనామాల విషయంలో తమ మద్య అభిప్రాయబేధాలు ఏర్పడాయనే సాకుతో ఆ తరువాత ఎవరూ కూడా తమ రాజీనామాలు ఆమోదించాలని అధిష్టానాన్ని గట్టిగా పట్టుబట్టలేదు. ఆ తరువాత, వారందరూ పార్లమెంటు బడ్జెట్ సమావేశాలలో తాము పాల్గొనాలా వద్దా, లేక పాల్గొని సభను అడ్డుకోవాలా వంటి రకరకాలయిన ఆలోచనల చేస్తూ ఇంత కాలకాలక్షేపం చేసారూ.   తమ రాజీనామాల ఆమోదం కోసం పట్టుబట్టడం వల్ల లాభం కన్నా నష్టమే ఎక్కువని గ్రహించిన వారందరూ, మధ్యే మార్గంగా పార్లమెంటు ముందు ఈ రోజు ధర్నాలు మొదలుపెట్టారు. తద్వారా, తమను తెలంగాణా ద్రోహులుగా చిత్రీకరిస్తున్న తెరాస మరియు తెలంగాణా జేయేసీల దాడి నుండి తమను తాము కాపాడుకోవడమే కాకుండా, తాము కూడా తెలంగాణా కోసం పోరాడుతున్నామనే సందేశం ప్రజలలోకి పంపే ప్రయత్నం చేస్తున్నారు. అంతే కాకుండా, ఒకవైపు తమ పదవులను కాపాడుకొంటూ తెలంగాణా అంశంపై పోరాడుతూనే, పార్టీ అధిష్టానానికి ఆగ్రహం తెప్పించకుండా తమ గోడు వినిపించే ప్రయత్నం చేయగలుగుతున్నారు.   నిజామాబాద్ యంపీ మధు యాష్కి తప్ప మిగిలిన యంపీలయిన మందా జగన్నాధం,గుత్తా సుఖేందర్ రెడ్డి, వివేక్, రాజయ్య,పొన్నం ప్రభాకర్, కోమటిరెడ్డి రాజగోపాలరెడ్డి మరియు పాల్వాయి గోవర్ధనరెడ్డి ఈ రోజు పార్లమెంటు ఆవరణలో దర్నా చేశారు. వారి సమస్యను అర్ధం చేసుకొన్నకాంగ్రెస్ అధిష్టానం, ప్రస్తుతం వారిని ఉపేక్షించినప్పటికీ, వోటింగ్ ప్రక్రియ ఉన్నపుడు వారిని సభలోకి రప్పించగలదని గతంలో యఫ్.డీ.ఐ. వోటింగు సమయంలో నిరూపించింది. తమ అధిష్టానం ఇప్పుడు తెలంగాణా ఇవ్వదని స్పష్టం అయిన తరవాత కూడా, తెలంగాణ కాంగ్రెస్ యం.పీ.లు ఈ విధంగా ధర్నా చేయడం చూస్తుంటే, వారు తమ ప్రాంతాలలో తమ ఉనికిని కాపాడుకొనే ప్రయత్నంలో భాగంగానే చేస్తున్నారని భావించవలసి ఉంటుంది.

ఎమ్మెల్సీ ఎన్నికలకు ప్రాంతీయవాదం

  సహకార ఎన్నికలు జరిగిన కొద్దిరోజులకే మళ్ళీ ఈరోజు శాసనమండలి ఎన్నికలు జరుగుతున్నాయి. ఆంధ్రా ప్రాంతంలో ఈ ఎన్నికలు కేవలం మండలి ఎన్నికలుగానే పరిగణిస్తున్నపటికీ, సహకార ఎన్నికలలో వెనుకబడిన తెరాస, ఈఎన్నికలలో కూడా ఓటమి చవి చూసినట్లయితే, కాంగ్రెస్ ప్రభుత్వం ప్రచారం చేస్తున్నట్లు తెలంగాణా సెంటిమెంటు క్రమంగా బలహీనపడిపోతోందనే వాదనను ప్రజలు కూడా విస్వశిస్తే, అది తమ ఉనికికే ప్రమాదం అవుతుందని గ్రహించి, ఈఎన్నికలను ప్రతిష్టాత్మకంగా తీసుకోవడమే కాకుండా, దానికి ప్రాంతీయవాదం కూడా అద్ది గెలవాలని ప్రయత్నిస్తోంది.   ఈ ఎన్నికలలో తెరాస అభ్యర్దులను గెలిపించడం ద్వారానే, ప్రజలలో తెలంగాణా సెంటిమెంట్ బలంగా ఉందని నిరూపించగలమని, ఇది సమైక్యవాదులకు తెలంగాణా వాదులకు జరుగుతున్నయుద్ధంగా భావించాలని చెపుతూ తెలంగాణా ప్రజలలో భావోద్వేగాలు రెచ్చగొట్టి ఎన్నికలలో లబ్ది పొందే ప్రయత్నం చేస్తోంది. అయితే, తెరాస ఈ ఎన్నికలను ఎంత ప్రతిష్టాత్మకంగా తీసుకొన్నపటికీ, ఈ సారి వోటు వేస్తున్నవారు విద్యావంతులు మరియు ఉపాద్యాయులు అని మరిచి, వారిని భావోద్వేగాలతో లొంగ దీసుకోవాలని ప్రయత్నిస్తోంది.   ఉచితానుచితాలు తెలిసిన వారికి ఈ ఎన్నికలు ఎందుకు జరుగుతున్నాయో, ఎవరిని ఎన్నుకొంటే తమకు మేలు జరుగుతుందో ప్రత్యేకంగా చెప్పనవసరం లేదు. వారందరూ మనస్పూర్తిగా తెలంగాణా కోరుకొంటున్నపటికీ, తెరాసకి ఓటేయడం వలన మాత్రమే తెలంగాణా సెంటిమెంటు బలంగా ఉంటుందని తెరాస చెపుతున్న మాటలు నమ్మేఅవకాశం లేదు. ఒకవేళ తెరాస అభ్యర్దులలో తమకి ఉపయోగపడే అభ్యర్ధి ఉన్నట్లయితే వారు అతనికే ఓటువేయవచ్చునేమో కానీ, కేవలం సెంటిమెంటును అడ్డం పెట్టుకొని ఓటేయమని అడిగితే, తెరాస అభ్యర్ధికి ఓటేసే అవకాశం లేదు.

ఎమ్మెల్సీ ఎన్నికల పోలింగ్ ప్రారంభం

        ఎమ్మెల్సీ ఎన్నికల పోలింగ్ కొనసాగుతోంది. 14 జిల్లాలో ఆరు స్థానాలకు జరిగే ఈ ఎన్నికల్లో 6.32 లక్షల మంది తమ ఓటు హక్కును వినియోగించకోనున్నారు. ఎన్నికల కోసం 1437 పోలింగ్ కేంద్రాలను ఏర్పాటు చేశారు. పట్టభద్రుల స్థానాలకు 64 మంది, ఉపాధ్యాయ స్థానాలకు 19 మంది పోటీపడుతున్నారు. సాయంత్రం 4 గంటల వరకు పోలింగ్ జరుగనుంది. ప్రతి పోలింగ్ కేంద్రంలోనూ లైవ్ వెబ్‌కాస్టను అధికారులు ఏర్పాటు చేశారు. ఓటరు గుర్తింపు కార్డులు లేని వారు ఫోటోతో ఉన్న 15 రకాల గుర్తింపు కార్డులను చూపి ఓటు వేయవచ్చు. ఎన్నికల పర్యవేక్షణకు ప్రత్యేకంగా ఆరుగురు ఐఎఎస్ అధికారులను ఈసీ నియమించింది. ప్రత్యేక పోలీసు బలగాలు, మొబైల్ టీమ్‌లను ఏర్పాటు చేసినట్లు రాష్ట్ర ఎన్నికల ప్రధానాధికారి భన్వర్‌లాల్ చెప్పారు. 25న ఉదయం 8 గంటలకు ఆరు కేంద్రాల్లో ఓట్ల లెక్కింపు జరుగనుంది.

చంద్రబాబు ను కలిసిన బాలకృష్ణ

      ఎమ్మెల్సీ ఎన్నికల నేపథ్యంలో గుంటూరు జిల్లాలో చంద్రబాబు పాదయాత్ర వాయిదా పడింది. ఈ నెల 21న ఎమ్మెల్సీ ఎన్నికలు ముగిశాక తిరిగి పాదయాత్రలు ప్రారంభమవుతాయి. దీంతో గుంటూరు జిల్లా వేమూరులో చంద్రబాబు పాదయాత్ర నిలిపివేసి బసచేస్తున్నారు. ప్రముఖ సినీ నటుడు, చంద్రబాబు బావమరిది నందమూరి బాలకృష్ణ ఆయనను కలిశారు. ఆరోగ్యం జాగ్రత్తగా చూసుకోవాలని సూచించారు. రెండు గంటల పాటు ఆయనతో మాట్లాడిన అనంతరం బయటకు వచ్చి కొందరు ప్రముఖులతో మాట్లాడారు. మళ్లీ బాబు ఉన్న వాహనంలోకి వెళ్లి మధ్యాహ్నం ఒంటిగంటకు వేమూరు నుంచి బయలుదేరి వెళ్లారు. ఐదురోజుల క్రితం మెట్లు కూలిపోయి చంద్రబాబు కిందపడే సమయంలో అంగరక్షకులు రక్షించారు. ఇక పాదయాత్ర లో చంద్రబాబు కాళ్లనొప్పులు, షుగర్, బీపీలతో ఇబ్బంది పడుతున్నారు.

బీజేపీని క్షమాపణ కోరిన షిండే

  హోం మంత్రి సుషీల్ కుమార్ షిండే తమను హిందూ ఉగ్రవాదులుగా వర్ణించడంతో తీవ్ర ఆగ్రహంతో ఉన్న ఆ పార్టీ నేతలు, ఆయన బేషరతుగా క్షమాపణలు చెప్పకపోయినట్లయితే, కీలకమయిన పార్లమెంటు బడ్జెట్ సమావేశాలను స్తంభింపజేస్తామని హెచ్చరించిన నేపద్యంలో తొలుత కాంగ్రెస్ అధికార ప్రతినిధి సందీప్ దీక్షిత్ మీడియాతో మాట్లాడుతూ, హోం మంత్రి సుషీల్ కుమార్ షిండే చెప్పినట్లు బీజేపీ సంఘవిద్రోహ పనులకు పాల్పడుతున్నట్లు కాంగ్రెస్ పార్టీ భావించట్లేదని, ఈ విషయంపై షిండే కూడా ఇప్పటికే చాలాసార్లు తన వివరణ ఇచ్చారని, త్వరలోనే ఆయన బీజేపీ నాయకురాలు సుష్మ స్వరాజ్ తో స్వయంగా మాట్లాడతారని అన్నారు.   ఈ విషయంలో పార్టీ తనను సమర్దించట్లేదని షిండేకు అర్ధమయిన తరువాత ఆయన కూడా బీజేపీను క్షమాపణలు కోరారు. అఖిల పక్షం తరువాత అత్యుత్సాహం ప్రదర్శించి ‘నెల రోజుల్లో తెలంగాణా సంగతి తేల్చి పారేస్తా’ అని ప్రకటించి షిండే మొదటిసారి స్వయంగా చిక్కులో పడి పార్టీని కూడా చాలా చిక్కుల్లో పెట్టారు. బీజేపీని హిందూ ఉగ్రవాదులంటూ మళ్ళీ మరోమారు నోరుజారి షిండే తనకీ, పార్టీకి ఇబ్బందులు కోరి తెచ్చుకొన్నారు. బహుశః మరో మారు ఇటువంటి తప్పు చేస్తే, పార్టీ ఆయనను ఉపేక్షించకకపోవచ్చును. ఈ వివాదానికి ఇంతటితో తెరపడినా, కాంగ్రెస్ పార్టీని అగస్టా హెలికాఫ్టర్ కుంభకోణంతో పార్లమెంటులో నిలదీసేందుకు బీజేపీ ఆయుధాలు సిద్దం చేసుకొంటోంది.

ఆత్మహత్య చేసుకొంటానంటూ కడపలో వివేకా హడావుడి

  ఇంతకాలం కాంగ్రెస్ పార్టీలో ఉంటూ, వ్యవసాయశాఖ మంత్రిగా పదవిని కూడా పొందిన వైయస్. వివేకానందరెడ్డి తన వ్యవసాయ శాఖకి, అది ఇచ్చిన కాంగ్రెస్ ప్రభుత్వానికి ఏమి మేలు చేసారో తెలియదు కానీ, ప్రస్తుతం మాత్రం కడప డిసిసిబి కార్యాలయం వద్ద నిలబడి, వెంటనే ప్రభుత్వం ఎన్నికలు నిర్వహించకపోతే ఆత్మహత్య చేసుకొంటానని బెదిరిస్తున్నారు.   పోలింగ్ అధికారిని కొందరు దుండగులు కిడ్నాప్ చేయడంతో, ఈ రోజు ఉదయం జరుగవలసిన డిసిసిబి ఎన్నికను ప్రభుత్వం వాయిదావేసింది. కడప సహకార ఎన్నికలలో పూర్తిగా పైచేయి సాదించిన జగన్ మోహన్ రెడ్డి అనుచరులు, కాంగ్రెస్ నేతలే పోలింగు అధికారిని ఎత్తుకుపోయి ఎన్నికలు జరగకుండా అడ్డుకొంటున్నారని ఆరోపిస్తున్నారు.   దానికి తోడూ కమలాపురం కాంగ్రెస్ యం.యల్.ఏ. వీర శివారెడ్డి కుమారుడు కూడా పోటీలో ఉండటంతో, ఆయన ఉదయం డిసిసిబి కార్యాలయానికి వచ్చినప్పుడు వైయస్సార్ కాంగ్రెస్ పార్టీ కార్యకర్తలు ఆయన పైకి చెప్పులు విసరడం, ఆయన వారిపై, తోటి కాంగ్రెస్ మంత్రులపై నది రోడ్డు మీద చిందులు వేయడం వంటి సంఘటనలతో, ఉదయం నుండి అక్కడ తీవ్ర ఉద్రిక్త వాతావరణం నెలకొంది.   ఇప్పుడు, మంత్రి వైయస్. వివేకానంద రెడ్డి కూడా వారికి తోడయి వెంటనే ఎన్నికలు నిర్వహించకపోతే ఆత్మహత్య చేసుకొంటానని కిరణ్ కుమార్ రెడ్డికి హెచ్చరిక జారీ చేయడంతో పరిస్థితులు మరింత ఉద్రిక్తంగా మారాయి. డిసిసిబి ఎన్నికలలో తనకనుకూలంగా తీర్పు రానందున ఎన్నికల అధికారి లేరనే సాకుతో ఎన్నికలను వాయిదా వేసేందుకు కిరణ్ కుమార్ రెడ్డి ప్రభుత్వం ప్రయత్నిస్తోందని, వేరే ప్రత్యామ్నాయ ఏర్పాటు చేసయిన సరే వెంటనే ఎన్నికలు నిర్వహించాలని, లేదంటే ప్రజాస్వామ్య పరిరక్షణ కొరకు తను ఆత్మహత్యకు కూడా సిద్దమేనని మంత్రి వివేకానంద రెడ్డి ప్రకటించారు.   అయితే, ఇంతవరకు ప్రభుత్వం నుండి ఎటువంటి స్పందన రాలేదు. బహుశః ఆయన ఒత్తిడికి తలొగ్గి అర్ధరాత్రయినా సరే, ఈ రోజే డిసిసిబి అధ్యక్ష పదవికి ఎన్నిక జరిపించే అవకాశం ఉంది.   ఈ సంఘటనతో, ఇంతవరకు ఆయనకూ, జగన్ మోహన్ రెడ్డికి అసలుపడదంటూ, వివేకానంద రెడ్డి అనుచరులు చేస్తున్న ప్రచారానికి ఆయనే స్వయంగా తెరదించి, ఇక నేదో రేపో జగన్ మోహన్ రెడ్డి వైపు ఫిరాయించేందుకు సిద్దం అయ్యారని భావించవలసి ఉంటుంది.

వారు పాపులు కారు: విజయమ్మ

  ఈ రోజు హైదరాబాదులోజరిగిన వైయస్సార్ కాంగ్రెస్ పార్టీ సమావేశంలో ఆ పార్టీ గౌరవ అధ్యక్షురాలు వైఎస్‌ విజయమ్మ మాట్లాడుతూ, గత కొద్ది రోజులుగా చంద్రబాబు ఆయన అనుచరులు తమ పరిధిని దాటి మాట్లాడుతున్నారని అన్నారు. తన కూతురు షర్మిల, అల్లుడు బ్రదర్ అనిల్ కుమార్ లపై లేనిపోని అభాండాలు వేస్తూ వారి పరువు బజారు కీడుస్తున్నారని ఆవేదన వ్యక్తం చేసారు. తన కూతురు, అల్లుడు ఈ పాపమూ చేయలేదని ఆమె అన్నారు. తెలంగాణాలో ఎక్కడా కూడా తన అల్లుడు చర్చిలు నిర్మించేందుకు ఎటువంటి భూములు కొనుగోలు చేయలేదని, రక్షణ స్టీల్స్, రక్షణ టీవీ చానల్ కు తన అల్లుడు అనిల్ కుమార్ కు ఎటువంటి సంబందం లేకపోయినా, వాటితో తమను ముడిపెట్టి తమపై చంద్రబాబు బురద జల్లుతున్నారని ఆమె ఆరోపించారు.   అయితే, తమ సహనానికి ఒక హద్దు ఉంటుందని, ఈ విధంగా నిరంతరం బురద జల్లుతుంటే త్వరలోనే చంద్రబాబుపై పరువు నష్టం దావా వేయక తప్పదని ఆమె హెచ్చరించారు. కానీ, ఇప్పటికే అనేక కేసులతో సతమతమవుతున్న ఆమె కుటుంబ సభ్యులు మళ్ళీ మరో కొత్తకేసు మొదలు పెట్టే దైర్యం చేయరనే ధీమాతోనే తెలుగుదేశం పార్టీ నేతలు ఆరోపణలు చేస్తున్నట్లయితే, ఒకవేళ ఆమె నిజంగా పరువు నష్టం దావా వేసినట్లయితే అప్పుడు వారు కూడా ఇబ్బందుల్లో పడకతప్పదు. గనుక, చంద్రబాబుతో సహా ఆ పార్టీలో అందరూ కూడా వారు చేస్తున్న ఆరోపణలలో నిజానిజాలు తెలుసుకొన్న తరువాతనే చేయడం మేలు. లేకుంటే ‘ఉభయ కుశులోపరి’ అన్నట్లు అటు వైయస్సార్ కాంగ్రెస్ ఇటు తెదేపా అందరూ కూడా తమ పాదయాత్రలు పక్కన పెట్టి కోర్టు యాత్రలు మొదలు పెట్టవలసి వస్తుంది.

శివమెత్తిన వీర శివారెడ్డి

  కమలాపురం కాంగ్రెస్ ఎమ్మెల్యే వీరశివారెడ్డి కడప జిల్లా సహకార బ్యాంక్ ఎన్నికలలో తన కుమారుడిని గెలిపించుకోవాలని ఎంతగా ప్రయత్నించినప్పటికీ, ఆయన ప్రయత్నాలకు వై.ఎస్.ఆర్.కాంగ్రెస్ గండి కొట్టడంతో ఆయన తీవ్రనిరాశకు గురయ్యారు. ఈ రోజు సహకార బ్యాంక్ అధ్యక్షపదవికి ఎన్నికలు జరుగుతునందున స్వయంగా అక్కడి పరిస్థితులను ‘పర్యవేక్షించడానికి’ వచ్చినప్పుడు కొందరు వై.ఎస్.ఆర్.కాంగ్రెస్ కార్యకర్తలు ఆయన కారుపై చెప్పులు విసరడంతో వీర శివారెడ్డి కారుదిగి నడిరోడ్డు మీద వీరంగం వేసారు. దాదాపు అరగంట వరకు సాగిన ఆయన ప్రదర్శనలో వైయస్.వివేకానంద రెడ్డికి కాంగ్రెస్ పార్టీలో పెద్ద పీట వేసి మంత్రిపదవి అప్పగించినందునే, జగన్ పార్టీ పెట్టేంతవరకు వెళ్ళగలిగాడని, అతనికి వెనక నుండి వివేకానంద రెడ్డి మద్దతుగా నిలుస్తునందునే ఈరోజు కాంగ్రెస్ పార్టీ జిల్లా సహకార ఎన్నికలలో ఘోరంగా ఓడిపోయిందని ఆయన ఆరోపించారు. వీరేగాక, కడపకు చెందిన మంత్రులు డీయల్.రవీంద్ర రెడ్డి, రామచంద్రయ్యలు ఇద్దరూ కూడా పార్టీకి వ్యతిరేఖంగా పనిచేసి కడపలో పార్టీ ఓటమికి (తన కొడుకు ఓటమికి) కారకులయ్యారని ఆయన ఆరోపించారు. అందుకు కారకులయిన ఆ ముగ్గురు మంత్రుల గురించి తానూ త్వరలో కాంగ్రెస్ అధిష్టానంకు పిర్యాదు చేస్తానని హెచ్చరించారు.

తెరాసకు దూరం జరుగుతున్న బీజేపీ

  తెలంగాణా జేయేసీలోభాగస్వామిగా కొనసాగుతున్న భారతీయ జనతా పార్టీ, ఇంతవరకు తెరాసతో అయిష్టంగానే కాపురం చేస్తున్నపటికీ, జాతీయపార్టీ అయిన తన మీద కూడా కేసీఆర్ కర్ర పెత్తనం చేయడం సహించలేకపోతోంది. కానీ, ఉద్యమాలలో పాల్గొనడం ద్వారా తెలంగాణాలో తన ప్రాభల్యం పెంచుకొనే ఆలోచనతో తెరాసను, దాని అధినేత కేసీఆర్ ను భరించక తప్పట్లేదు.   పేరుకి అది తెలంగాణా జేయేసీ అయినా, అది కేవలం తెరాస చెట్టుకు మొలిచిన మరో కొమ్మగానే కేసీఆర్ భావిస్తునందున, భాగస్వామ్య పార్టీలను ఆయన ఎన్నడూ ఖాతరు చేయలేదు. ఇంతవరకు ఆయన కర్ర పెత్తనం సహించిన భారతీయ జనతా పార్టీ, ఆయన ఏకపక్షంగా తమ పార్టీకే చెందిన మహమూద్ ఆలీని యం.యల్సీ.అభ్యర్దిగా ప్రకటించడంతో తీవ్ర ఆగ్రహంతో ఆయనకు ఎదురు తిరిగింది.   అసలు కేసీఆర్ కు తెలంగాణా సాదించాలనే కోరిక, తాపత్రయం ఉన్నట్లు లేదని, అందువల్లే ఆలీని తమ పార్టీ అభ్యర్దిగా ప్రకటించి, తెలంగాణాను వ్యతిరేకిస్తున్న మజ్లిస్ పార్టీ మద్దతు కోరుతున్నాడని బీజేపీ విమర్శించింది. తెలంగాణా సాధనకు అవసరమయితే తమ పార్టీ అద్వర్యంలోనడిచే యన్.డీ.యే. కూటమిలో చేరుతామని ప్రకటిస్తున్న కేసీఆర్, మరో వైపు తెలంగాణాను వ్యతిరేకించే మజ్లిస్ పార్టీతో కలిసి ఏవిదంగా పని చేస్తారని బీజేపీ ప్రశ్నిస్తోంది. రాష్ట్రంలో ఒక మాట, కేంద్రంలో మరొకమాట మాట్లాడుతూ కేసీఆర్ తమతో ‘డబల్ గేం’ ఆడుతున్నాడని బీజేపీ తీవ్ర విమర్శలు చేసింది. కేసీఆర్ తమను సంప్రదించకుండానే అభ్యర్ధిని ప్రకటించి, మళ్ళీ అతనిని గెలిపించుకోవడానికి తిరిగి తమ మద్దతే కోరడాన్నిబీజేపీ తప్పు పట్టింది.   కేసీఆర్ అవకాశవాద, ద్వంద వైఖరిని, అతని కర్ర పెత్తనాన్ని తీవ్రంగా వ్యతిరేఖిస్తున్నభారతీయ జనతా పార్టీ, అతని వంటి రాజకీయ నాయకుడితో స్నేహం, ఎన్నికల పొత్తులు తమ పార్టీకి మేలు చేయకపోగా మరింత నష్టం తెచ్చే అవకాశం ఉందని భావిస్తోంది.   ఇక, కేసీఆర్ కూడా రాబోయే ఎన్నికలలోబీజేపీతో ఎన్నికల పొత్తులు గురించి ఎక్కడా ప్రస్తావించకుండా జాగ్రత్త పడుతూ, మొత్తం అన్నిస్థానాలకు తమ పార్టీ అభ్యర్డులనే ఖరారుచేసే ఆలోచనలో ఉన్నందున, త్వరలోనే బీజేపీకూడా తన దారి తానూ చూసుకోక మానదు. ఉద్యమాల వల్ల తెలంగాణాలో కొంచెం బలం పుంజుకొన్నభారతీయ జనతా పార్టీ బహుశః రాబోయే ఎన్నికలలో ఒంటరిపోరుకే సిద్దపడవచ్చును.

గ్యాస్ పై కిరణ్‌ కు సింధియా షాక్

        ఆంధ్రప్రదేశ్‌కు అదనపు గ్యాస్ ఇవ్వలేమని కేంద్ర విద్యుత్‌శాఖ మంత్రి సింధియా స్పష్టం చేశారు. ముఖ్యమంత్రి కిరణ్‌కుమార్‌రెడ్డి తనను కలిసారని, రాష్ట్రానికి అదనపు గ్యాస్ ఇవ్వాలని కోరినట్లు ఆయన వెల్లడించారు. అయితే గ్యాస్ సమస్య దేశవ్యాప్తంగా ఉందని, అందుచేత ప్రత్యేకంగా ఆంధ్రప్రదేశ్‌కు అదనపు గ్యాస్ ఇవ్వలేమని ఆయన వివరించారు. ఎవరికి వారు ప్రత్యామ్నాయ మార్గాలు చూసుకోవాల్సిందిగా సింధియా సూచించారు. గుజరాత్..ఆంధ్రప్రదేశ్ గ్యాస్ ఒప్పందం విషయంలో కేంద్రం జోక్యం చేసుకోదని ఒక ప్రశ్నకు సమాధానంగా సింధియా చెప్పారు. గుజరాత్ ప్రభుత్వం ఒప్పుకుంటే ఆంధ్రప్రదేశ్‌కు అదనపు గ్యాస్ ఇవ్వగలమని సింథియా వివరించారు.

బ్రదర్ అనిల్ న్యాయ పోరాటం

        వైఎస్ఆర్ కాంగ్రెస్ అధ్యక్షుడు జగన్ మోహన్ రెడ్డి సోదరి షర్మిల భర్త బ్రదర్ అనిల్ కుమార్ పై ఆరోపణలు చేస్తున్న వారిపై న్యాయపరమైన పోరాటం చేస్తామని జగన్ సలహాదారు సోమయాజలు చెప్పారు. ప్రతి కుంభకోణంతో అనిల్ కి లింక్ పెట్టి మాట్లాడుతున్నారని, అలా ఆరోపణలు చేసిన వారిపై ఆయన న్యాయ పోరాటం చేసే ఆలోచనలో వున్నట్లు తెలిపారు. పరువునష్ట దావా కూడ వేస్తారన్నారు. చంద్రబాబు నాయుడు సహనం కోల్పోయి బ్రదర్ అనిల్ పై ఇష్టం వచ్చినట్లు మాట్లాడుతున్నారని ఆయన వ్యాఖ్యానించారు. అయితే బ్రదర్ అనిల్ తనపై వచ్చిన విమర్శలపై వివరణ ఇవ్వకపోవడం, ఆయన తరపున వేరేవారు మాట్లాడడం సహజంగానే అనుమానాలకు తావిస్తుంది. నిజంగానే అనిల్ న్యాయపోరాటం చేస్తారా లేక పత్రిక ప్రకటనల వరకే పరిమితమౌతారో చూడాలి.