ఇంత జబర్దస్త్ గా కత్తెరేస్తే ఎలా? నందిని రెడ్డి
తన సినీప్రస్థానం ‘ఎంచక్కగా అలా మొదలయిందని’ సంతోషపడిన నందినీ రెడ్డమ్మ, తొందరపడి వచ్చిన ఆఫర్లన్నీ ఒప్పేసుకోకుండా, జాగ్రత్తగా ఆలోచించి ఒక ‘జబర్దస్త్’ సినిమా తీసి సెన్సార్ బోర్డు చేతిలో పెడితే, వారు ఆమె కష్టాన్ని గుర్తించక, తమ మొండి కత్తెరతో ఆమె ఏంతో అపురూపంగా తీసిన పాటలని, సన్నివేశాలను నిర్దాక్షిణ్యంగా ఎడాపెడా కత్తిరించి పడేసి ఆమె సినిమాను ‘U/A’ సర్టిఫికేట్ ప్రధానం చేసేసరికి ఆమెకు చాల కోపం వచ్చేసింది.
అన్ని కత్తెర్లు వేసినా ఇంకా తృప్తి కలగని సెన్సార్ బోర్డ్ వారికి ఆమె సినిమాలో ప్రధాన ఆకర్షణగా నిలిచే ‘అల్లా అల్లా’పాటలో ఆ ‘రెండు అల్లా పదాలను’ కూడా తీసి ‘హల్లా... గుల్లా...’ అనో మరొకటో వాడుకోమని ఒక ఉచిత సలహా కూడా ఇచ్చేసరికి నందిని శివమెత్తిపోయారు.
“అసలు సినిమా ఎలా తీయాలో, సినిమాలో ఏ ఏ పదాలు ఉండాలో, ఏవి ఉండకూడదో, పాటలు, డైలాగులు ఏవి ఉండచ్చో, ఏవి ఉండకూడదో వంటి వివరాలన్నీ వేసి ఒక పుస్తకం అచ్చేయించి మాకందరికీ పంచితే, దాని ప్రకారం సినిమాలు తీయగలిగిన వాళ్ళం తీస్తాము, అలా తీయలేని వాళ్ళం మూట ముల్లె సర్దుకొని పోతాము. అంటే తప్ప, ఇలా సెన్సార్ పేరిట అత్యుత్సాహం ప్రదర్శిస్తూ మా భావ ప్రకటన స్వేచ్చను హరించకండి. మీరు కత్తెర్లను ఇలాగే ఉపయోగిస్తే, ఏదో ఒకరోజు ఇక సినిమా పరిశ్రమ మూతపడక తప్పదు,” అంటూ ఆమె చిందులు వేసారు. సరే! ఇన్నికష్టాలుపడి తీసిన సినిమా ‘జబర్దస్త్’ గా ఆడితే ఈ బాధలన్ని ప్రసవ వేదనలా మరిచిపోవచ్చును. లేదంటే, సెన్సార్ బోర్డ్ చేతివాటం వల్లనే ఇలా అయిపొయింది అని ఆమె ఆవేదనపడక తప్పదు.
ఇటీవల ‘లవ్ పాయిజన్’ సినిమాకు కూడా సెన్సార్ బోర్డు సభ్యురాలు ఒకావిడ క్లియరెన్స్ ఈయకుండా అడ్డుపడిందంటూ ఆ సినిమా దర్శకుడు, సెన్సార్ బోర్డు కార్యాలయం ముందే పురుగుల మందు తాగి ఆత్మహత్య ప్రయత్నం చేసి ప్రస్తుతం ఆసుపత్రిలో ఉన్నాడు. పీత కష్టాలు పీతవన్నట్లు, ఎవరి కష్టాలు వారికున్నాయి.
సెన్సార్ బోర్డ్ వారు పోనీలే అని సినిమాలను చూసి చూడకుండా వదిలేస్తే, ఆనక కోర్టు కేసులు, ధర్నాలు, ఆందోళనలు మొదలవుతాయి. సరే, తమ కత్తెర్లు ఎంత మొండి బారిపోయినా కష్టపడి కత్తెర్లు వేస్తే, ఇదిగో ఇలా నందిని వంటివారు శివాలెత్తిపోతుంటారు. చూడబోతే సెన్సార్ బోర్డ్ పని కత్తెర మీద సాములాగానే ఉందిప్పుడు.