Home  
Analytical

సొంత ఎమ్మెల్యేలను పందులన్న జగన్..?

కాలు జారితే తీసుకోగలం.. కానీ నోరు జారితే కష్టం అంటారు మన పెద్దలు. ఏ మాట ఎక్కడ మాట్లాడినా.. అది మంచిదైనా, చెడ్డదైనా ఎన్నో చెవులకు రిజిస్టర్ అయిపోతుంది. రాజకీయ నాయకులు ఎప్పుడు.. ఎవరితో ఏం మాట్లాడినా ఒకటికి రెండు సార్లు ఆలోచించి మాట్లాడాలి. లేకపోతే ఆ తర్వాత వచ్చే కంపు భరించడం కాకలు తీరిన పొలిటిషియన్స్ వల్లే కాలేదు. నువ్వా నేనా అంటూ కాలు దువ్వే శత్రువు గురించైనా సరే రాజకీయాలకి వచ్చే సరికి రెస్సాక్ట్‌తో మాట్లాడాలి. లేదంటే ఆ మాట అధికారాన్ని అందివ్వగలదు.. కుర్చీలోంచి లాగి కిందకు పడేయనుగలదు. అశాంతి, అసహనం, అసంతృప్తి మనిషి మనసులో కలకలం రేపుతాయి. అలాంటి వ్యక్తికి మాట మీద అదుపు తప్పి ఏం మాట్లాడాలో.. ఏం మాట్లాడుతున్నాడో అర్థంకాదు. ఆ కోవలోకే వస్తారు వైసీపీ అధినేత, వైఎస్ జగన్మోహన్ రెడ్డి.   ఎంత కష్టపడ్డా కోరుకున్న లక్ష్యం దగ్గరకు రాకపోవడంతో వైసీపీ అధినేత జగన్మోహన్‌రెడ్డిలో అసహనం రోజురోజుకి పెరిగిపోతుంది. గోల్డెన్ స్పూన్‌తో పుట్టడమో.. చిన్నప్పటి నుంచి కష్టపడిన నేపథ్యం లేకపోవడమో.. నడిచి నడిచి కాళ్లు నొప్పి పుడుతున్నాయో తెలియదు కానీ ఆయన సంయమనం కోల్పోతున్నారు. దీనికి తోడు నాలుగు రోజుల వ్యవధిలో ఇద్దరు పార్టీ నేతలు తెలుగుదేశంలో చేరడంతో జగన్‌లో ఆవేశం కట్టలు తెంచుకొంది. నిన్నటి వరకు తనతో ఉన్నారన్న మాట కూడా మరచిపోయి వారిని నానా మాటలు అనేశారు. కాంట్రాక్టర్ల వద్ద తీసుకున్న అవినీతి డబ్బుతో ముఖ్యమంత్రి చంద్రబాబు వైసీపీ ఎమ్మెల్యేలను కొనుగోలు చేస్తున్నారని ఆరోపించారు. తమ పార్టీ నేతలను గొర్రెలు, పశువుల్లా కాదు.. "పందుల్లా" కొనుగోలు చేస్తున్నారని తీవ్రస్థాయిలో విమర్శించారు.   డబ్బు ఎరగా చూపారనో, మరేదో ఆశచూపి బుట్టలో వేసుకున్నారన్నా ఎవరు పట్టించుకునేవారు కాదు. కానీ మరీ పందులతో పొల్చడం రాజకీయ వర్గాల్లో చర్చకు దారితీసింది. ప్రతిపక్షం అన్నాకా అధికార పక్షంపై విమర్శలు చేయడం ఎక్కడైనా ఉంటుంది. అయితే జగన్ విషయానికి వచ్చేసరికి ఆయన హద్దులు ఏనాడో దాటేసినట్లు అనిపిస్తుంది. గతంలో ఇలా ఆవేశపడి నంద్యాలలో సీఎం చంద్రబాబును నడిరోడ్డుపైనా కాల్చేసినా ఫర్లేదని.. ఉరితీసినా తప్పులేదని కామెంట్ చేయడంతో జనం చీదరించుకున్న విషయాన్ని జగన్ మరచిపోయారా..? అంటూ సోషల్ మీడియాలో చురకలు వేస్తున్నారు నెటిజన్లు. గెలుపుపై నానాటీకి జగన్‌లో భయం పట్టుకుందని.. అందుకే నోటికి ఎంత మాటొస్తే అంత అనేస్తూ అడ్డంగా బుక్కవుతున్నారు అంటున్నారు రాజకీయ విశ్లేషకులు.

జీఈఎస్ సాక్షిగా కేటీఆర్ కు అవమానం...

  హైదరాబాద్ లో రెండు రోజుల పాటు జీఈఎస్ సమ్మిట్ జరిగిన సంగతి తెలిసిందే కదా. రెండు రోజుల పాటు జరిగిన ఈ సదస్సుకు అమెరికా అధ్యక్షుడు డొనాల్డ ట్రంప్ కూడా రావడంతో ప్రత్యేకత చోటుచేసుకుంది. ఇక ఇవాంక వస్తున్నందుకు గాను రాష్ట్ర ప్రభుత్వం చేసిన హడావుడి అంతా ఇంతాకాదు. ఆమె కోసం దాదాపు వంద కోట్లుపైనే ఖర్చు చేశారు. హైదరాబాద్ ను ముస్తాబు చేశారు. బెగ్గర్స్ ఫ్రీ చేశారు. ఎక్కడికక్కడ కట్టుదిట్టమైన భద్రతా ఏర్పాట్లు చేశారు. రకరకాల వంటకాలు తయారు చేయించారు. మొత్తానికి ఇవాంకాకు ఎలాంటి లోటు రాకుండా చేశారు. ఇక ఇవాంక కూడా వచ్చింది.. సమ్మిట్ లో పాల్గొంది.. ఆడవారి గురించి గొప్పగా మాట్లాడింది. ఇక మోడీ, కేసీఆర్, కేటీఆర్ కూడా ఆడవారి గురించి గొప్పగా చెప్పుకొచ్చారు.   ఇక్కడి వరకూ బాగానే ఉన్నా... ఈ సదస్సులో భాగంగా కేసీఆర్ ప్రభుత్వానికి మాత్రం... అవమానం జరిగినంత పనైంది. అదేంటంటే.. ఆడవారి సామర్థ్యాన్ని, మహిళా సాధికారత పై పెద్ద ఉపన్యాసం చేస్తున్న కేటీఆర్ ఒక్కసారిగా షాక్ తగిలింది. ఎందుకంటే... జీఈఎస్ లో  మీ ప్రభుత్వంలో మహిళా మంత్రి ఎందుకు లేరు అనే ప్రశ్న ఎదురైంది....ఈ ప్రశ్నకు కేటీఆర్ కంగుతిన్నారు. మా ప్రభుత్వంలో మహిళా ఎమ్మెల్యేలు లేరు.. దానిపైన ముఖ్యమంత్రి కేసీఆర్ నిర్ణయం తీసుకుంటారని ఏదో కవరింగ్ ఇచ్చారు. అయితే ఈ సమాధానం అంత సంతృప్తికరంగా లేదు అని కేటీఆర్ కు కూడా తెలుసు. దీంతో మరి ఇప్పుడైనా కేసీఆర్ దీనిపై ఆలోచిస్తే మంచిది అని అనుకుంటున్నారు. ఎలక్షన్స్ కేవలం ఏడాదిన్నర మాత్రమే ఉన్నాయి. ఇప్పటికే మరో కాబినెట్ విస్తరణ ఉండకపోవచ్చు అనే ఇండికేషన్ ఇచ్చారు ముఖ్యమంత్రి. ఎన్నికల దగ్గరలో క్యాబినెట్ విస్తరణ అంత తేలిక కాదు కూడా. అయితే ఈ విమర్శను కరెక్ట్ చేసుకుని ఎన్నికలకు వెళ్తే మంచిదే. చూద్దాం మరి కేసీఆర్ దీనిపై ఏం యాక్షన్ తీసుకుంటారో...

పోలవరానికి కేంద్రం అడ్డుపుల్ల... రాజు గారు ఇవి కనిపించవా...!

  కేంద్రానికి ఏపీపై ఉన్న చిన్నచూపు మరోసారి బయటపడింది. ఇప్పటికి ఏపీకి ఇస్తానన్న ప్రత్యేక హోదా విషయంలో ఎలాంటి క్లారిటీ లేదు.. పోనీ స్పెషల్ ప్యాకేజీ విషయంలో అయినా సాయం చేస్తుందా అంటే.. ఏదో ముష్టి పడేసినట్టే అప్పుడు కొంచెం.. అప్పుడు కొంచెం నిధులు ఇస్తుంది. ఆ నిధులు అయిపోయిన తరువాత మళ్లీ బాబు గారు కేంద్రం దగ్గరకు వెళ్లి అడుక్కోవాల్సిన పరిస్థితి. ఇంతేనా ఇంకా ఎన్నో విషయాల్లో ఏపీపై కేంద్రం చిన్న చూపే చూస్తుంది. ఎన్నో వేల కోట్లు ప్రాజెక్టులు కేంద్రం వల్లే పెండింగుల్లో పడ్డాయి. ముందు మీరు డబ్బు పెట్టుకోండి.. ఆ తరువాత మమ్మల్ని అడగండి అని చెబుతున్నారు. అసలే రాష్ట్రం విడిపోయి కష్టాల్లో ఉంటే..ఆ మాత్రం కూడా ఆలోచించకుండా కేంద్రం మొండిచేయి చూపిస్తుంది. ఏదో ఒకలా పోలవరం ప్రాజెక్టు అయినా పూర్తి చేస్తుంది కదా అనుకునే లోపు ఇప్పుడు దానికి కూడా అడ్డు పుల్ల వేసింది. రాష్ట్ర ప్రభుత్వం కొన్ని పనులకు టెండర్లు పిలవగా కేంద్రం వాటిని నిలిపివేయాలని ఆదేశాలు ఇచ్చింది. రాష్ట్ర ప్రభుత్వం స్పిల్‌వే, స్పిల్‌ చానల్‌లో కొంత భాగానికి జారీ చేసిన టెండర్లను నిలిపివేయాలని స్పష్టం చేసింది.   జాతీయ హైడ్రో పవర్ కార్పొరేషన్ అద్యయనం చేసేవరకు పనులను నిలుపుదల చేయాలని కేంద్రం తెలిపిందని సమాచారం. ఎన్‌హెచ్‌పీసీ ఎగువ కాఫర్‌ డ్యామ్‌ పనులపై అధ్యయనం చేసేందుకు పోలవరం ప్రాజెక్టు వద్దకు రాలేదు. కేంద్రం పోలవరం ప్రాజెక్టుకు బ్రేకులు వెయ్యాలని చూడటంతో రాష్ట్ర ప్రజలలో తీవ్ర అసంతృప్తి నెలకొంది. రాష్ట్రంలో బీజేపీ వ్యతిరేక పవనాలు వీస్తున్నాయి.    మరి పోలవరం విషయంలో తాము చెబితేనే చంద్రబాబు ముందుకు కదిలారని చెప్పుకుంటున్న బీజేపీ నేత సోము వీర్రాజు ఇప్పుడు దీనిపై  మాట్లాడటానికి నోరు రావడం లేదేంటో...పోలవరం నిర్మాణం కోసం తెలంగాణ లోని ఏడు ముంపు మండలాలు ఏపీ లో కలపకపోతే ఇబ్బంది అవుతుందని సీఎం చంద్రబాబుకు ఎవరు చెప్పారో తెలుసా ? బీజేపీ ఎమ్మెల్సీ సోము వీర్రాజు అట. తాను చెప్పాకే ఆ విషయంలో సీరియస్ నెస్ గమనించిన చంద్రబాబు ఆ 7 మండలాలను ఏపీ లో కలపకపోతే సీఎం గా ప్రమాణస్వీకారం చేయనని చెప్పడంతో ఆ పని వెంటనే పూర్తి అయ్యిందని చెప్పుకున్నాడు. మరి ఇప్పుడు పోలవరానికి కేంద్రం కొర్రీ వేయడం గురించి మాత్రం ప్రస్తావించలేదు. కాపర్ డాం , స్పిల్ వే, స్పిల్ చానెల్ పనులు ఆపాలని కేంద్రం లేఖ రాసింది ఎందుకో చెప్పలేకపోతున్నారు.  2019 ఎన్నికల లోపు పోలవరం పనులను ఓ కొలిక్కి తేవాలని చూస్తున్న చంద్రబాబుకు కేంద్రం అడుగడుగునా అడ్డం పడడం అందరికీ కనిపిస్తున్నా ఇంకా కొందరు బీజేపీ నేతలు మోడీ క్రెడిట్ గురించి మాట్లాడడం చూసి ఏపీ ప్రజలు ఆగ్రహంతో రగిలిపోతున్నారు. మరి పోలవరం విషయంలో కూడా కేంద్రం ఇలాంటి పుల్లలు పెడితే.. తగిన మూల్యం చెల్లించుకోవాల్సి ఉంటుందన్న విషయం గుర్తుపెట్టుకుంటే మంచిది. అది కేంద్ర ప్రభుత్వమైనా సరే.. వీర్రాజు లాంటి వారైనా సరే....

రాహుల్ కు అప్పుడే మొదలైందిగా...

  రాహుల్ గాంధీకి త్వరలో పార్టీ పగ్గాలు అప్పచెప్పనున్నట్టు వార్తలు వస్తున్న సంగతి తెలిసిందే. ఇప్పటి నుండి ఏంటి.. ఎప్పటినుండో కాంగ్రెస్ పార్టీ పగ్గాలు రాహుల్ గాంధీ చేతిలో పెట్టాలని చూస్తున్నా.. ఎందుకో దానికి తగిన సమయం మాత్రం రాలేదు. సమయం సంగతేమో కానీ.. రాహుల్ గాంధీ చేతిలో పార్టీని పెడితే పార్టీకి భవిష్యత్తు ఉంటుందా అని సొంత పార్టీ నేతలే డౌట్ పడిన సందర్భాలు ఉన్నాయి. అందుకే సోనియా కూడా తొందరపడి రాహుల్ కు బాధ్యతలు అప్పగించడానికి ఆలోచిస్తున్నారు. మధ్యలో పలువురు కాంగ్రెస్ నేతలే రాహుల్ బదులు ప్రియాంక గాంధీ పేరు ప్రస్థావించిన వారూ ఉన్నారు. కానీ అవేం జరగలేదు. అయితే ఇటీవలే మళ్లీ రాహుల్ కు డిసెంబర్ లో పార్టీ పగ్గాలు అప్పగిస్తున్నామని కాంగ్రెస్ ప్రకటించింది.   ఇక ఇప్పుడు కూడా రాహుల్ కు సేమ్ సిచ్యూవేషన్. సొంత పార్టీ నేతనే రాహుల్ పై సంచలన వ్యాఖ్యలు చేసే పరిస్థితి. కాంగ్రెస్ పార్టీ సీనియర్ నేత... షెహజాద్ పొన్నావాలా.. కాంగ్రెస్ అధ్యక్షుడిగా రాహుల్ గాంధీని నిలిపేందుకు ఓ నాటకం జరుగుతోందని, అధ్యక్ష ఎన్నిక ప్రక్రియ యావత్తూ ముందస్తు ప్రణాళిక ప్రకారం జరుగుతోందని అన్నాడు. ఇదేమీ వాస్తవ ఎన్నిక కాదని, సిగ్గుపడాల్సిన ఎన్నికని.. ఒక కుటుంబంలోని ఒక వ్యక్తిని పైకి తెచ్చేందుకు జరుగుతున్న డ్రామా అని అన్నారు. జరుగుతున్న తప్పును తాను ఎత్తి చూపుతున్నానని, కాంగ్రెస్ లోని ఎంతో మందికి ఈ విషయమై పూర్తి అవగాహన ఉన్నప్పటికీ ఎవరూ నోరు మెదపడం లేదని విమర్శలు గుప్పించారు. రాహుల్ గాంధీ ముందుగా తన ఉపాధ్యక్ష పదవికి రాజీనామా చేసి, ఆపై అధ్యక్ష ఎన్నికలకు పోటీ పడాలని అన్నారు. ఈ ఎన్నిక పారదర్శకంగా జరిగేట్టయితే బాగుంటుందని, ఇదే విషయాన్ని రాహుల్ కు లేఖ ద్వారా తెలిపానని అన్నారు. పూర్తి రిగ్ అయిన ఎన్నికల్లో తాను పోటీ చేయలేనని, అసలు ఈ విధానమే తప్పుల తడకని పలు సంచలన వ్యాఖ్యలు చేశాడు.   మరి షెహజాద్ చేసిన వ్యాఖ్యలపై కాంగ్రెస్ నేతలు, రాహుల్ గాంధీ ఎలా స్పందిస్తారో చూడాలి. సొంత పార్టీ నేతనే ఇలాంటి వ్యాఖ్యలు చేశాడంటే రాహుల్ కెపాసిటీ ఏంటో అర్ధమవుతోంది. ఇంకా ఎంత మంది వ్యతిరేకంగా ఉన్నారో తెలియదు. మరి సొంత పార్టీ నేతలే ఇంత వ్యతిరేకతో ఉంటే ఇంకా పార్టీ బాధ్యతలు రాహుల్ ఎలా మోస్తాడూ.. పార్టీని ఎలా పైకి తీసుకొస్తాడు..

మెట్రో స్టేషన్ లో ఊరికే తిరుగుతున్నారా..? పైసల్ మాయం...!

  ఎప్పుడెప్పుడా అని ఎదురుచూసిన హైదరాబాద్ మెట్రో రానే వచ్చేసింది. నిన్ననే ప్రారంభమైన మెట్రోలో ఎప్పుడెప్పుడు ప్రయాణం చేయాలా అని ఆసక్తిగా ఎదురుచూశారు. అసలు ఎలా ఉందో చూడటానికే చాలా మంది నిన్న మెట్రోలో ప్రయాణించారని చెప్పొచ్చు. స్టేషన్‌కు చేరుకున్న వెంటనే మొత్తం కలియదిరుగుతూ మెట్రో అందాలను వీక్షిస్తున్నారు. అయితే ఇక్కడే ఓ ట్విస్ట్ ఉంది. అదేంటంటే...చేతిలో స్మార్ట్ కార్డ్ ఉంది కదా.. ఎంతసేపైనా స్టేషన్ లో ఉండొచ్చు అని అనుకుంటే పప్పులో కాలేసినట్టే... ఎందుకంటే.. దానివల్ల స్మార్ట్‌కార్డులోని సొమ్మంతా స్వాహా అయిపోతుంది. మాములుగా అయితే స్మార్ట్ కార్ట్ కోసం 200 రూపాయలు చెల్లిస్తే.. అందులో 100 రూపాయలు మనం వాడుకోవచ్చు. కానీ ఆ అవకాశం లేకుండా పోయింది.   ఓ ప్రయాణికుడికి ఇలాంటి అనుభవమే ఎదురైంది. ఉప్పల్‌కు చెందిన శ్రీనివాస్‌కు మెట్రో ఎక్కాలన్నా ఉత్సాహంతో ఎక్కాడు.. అక్కడ అంతా చూశాడు.. బయటకు వచ్చాడు. అయితే తిరిగి ఇలా బయటకు వచ్చే ముందు చూసుకుంటే కార్డులో మిగిలింది కేవలం పన్నెండు రూపాయలే. రూ.88 మాయమవడంతో శ్రీనివాస్ అవాక్కయ్యాడు. దీంతో అసలు విషయం అర్ధమైంది.. అంటే స్టేషన్ లో ఎక్కువసేపు గడిపితే స్మార్ట్ కార్ట్ లోని పైసలు మొత్తం గల్లంతు అవ్వడమే అని. సో స్టేషన్‌లో ఉన్నంత సేపు డబ్బులు చెల్లించాల్సి ఉంటుందన్న మాట. ఇదే కాకుండా మెట్రో ఛార్జీలు కూడా భారీగా ఉన్నాయన్న టాక్ కూడా వినిపిస్తోంది. అంతేకాదు దీనికి ఉదాహరణగా కొన్ని లెక్కలు కూడా వేసి చెబుతున్నారు. ఆ లెక్కలేంటో మీరు చూడండి...   హైదరాబాద్ నుంచి బెంగళూరుకు మధ్య దూరం 575 కిలోమీటర్లు. ముందుగా కానీ విమాన టికెట్ బుక్ చేసుకుంటే రూ.1400 నుంచి రూ.1800 మధ్యన ఉంటుంది. ఇప్పుడు ఈ లెక్కను.. మెట్రో ఛార్జీలతో చూస్తే... హైదరాబాద్ మెట్రోలో 30 కిలోమీటర్ల జర్నీకి వసూలు చేస్తున్న ఛార్జీ రూ.60. ఈ లెక్కన 575 కిలోమీటర్లకు.. 30 కిలోమీటర్ల చొప్పునచార్జీ లెక్కేస్తే వచ్చే మొత్తం రూ.1150. అంటే.. కాస్త ముందుగా బుక్ చేసుకునే ఫ్లైట్ టికెట్ కు దగ్గరగా అన్నమాట. ఆ లెక్కల మాట సంగతేమో కానీ.. ఓ రకంగా చూస్తే మెట్రో ఛార్జీలు కాస్త ఎక్కువగా ఉన్నాయని చెప్పొచ్చు. మరి ఇలానే ఉంటే... మెట్రో జర్నీ కూడా సామాన్యులకు కాకుండా పోయే ప్రమాదం ఉంది. మరి ప్రభుత్వ దీనిపై కాస్త ఆలోచిస్తే బెటర్..

చంద్రబాబు కోడలా మజాకా... రిపోర్టర్ కు సూపర్ కౌంటర్...

  నారా వారి కోడలు నారా బ్రహ్మణి సామర్యం ఏంటో మరోసారి చూపించింది. ఓ రిపోర్టర్ కు దిమ్మతిరిగి పోయే సమాధానం ఇచ్చి నోరు మూయించింది బ్రహ్మణి. హైదరాబాద్ లో గ్లోబల్ సమ్మిట్ జరుగుతున్నసంగతి తెలిసిందే కదా. అమెరికా అధ్యక్షుడు డొనాల్డ్ ట్రంప్ కూతురు.. ఇవాంక ట్రంప్ ఈ సదస్సులో పాల్గొనడానికి వచ్చారు. ఇక ఈ సదస్సులో నారా చంద్రబాబు కోడలు నారా బ్రహ్మణి కూడా పాల్గొన్నారు. ఇక మీటింగ్ అయిపోయిన అనంతరం బయటకు వచ్చిన ఆమెను.. ఓరిపోర్టర్ హైదరాబాద్ లో ఈ సదస్సు జరగడం అసూయ కలిగిస్తోందా అని ఓ తింగరి ప్రశ్న అడిగాడు. ఇక దీనికి బ్రహ్మణి ఆవేశంతో ఊగిపోకుండా... చాలా నీట్ గా.. రిపోర్టర్ నోరు మాయించేలా సమాధానం చెప్పింది. ఇంతకీ బ్రహ్మణి ఏం సమాధానం చెప్పిందనుకుంటున్నారా...“ సదస్సు ఎక్కడ జరుగుతుందన్నది ముఖ్యం కాదు . దాని నుంచి ఏమి నేర్చుకున్నాం , ఎంత స్ఫూర్తి పొందాం అన్నదే ముఖ్యం. అమరావతిలో కిందటేడాది అంతర్జాతీయ మహిళా పార్లమెంట్ జరిగింది. అలాగే ఇది. అయినా మీలాగా మేము ఆలోచించలేం” అంటూ బ్రాహ్మణి సమాధానం చెప్పిందట. ఇక బ్రహ్మణి ఇచ్చిన సమాధానంతో ఆ ప్రశ్న వేసిన రిపోర్టర్ కి దిమ్మ తిరిగిపోయిందట. దీంతో బ్రహ్మణి చెప్పిన డైలాగ్ ఇప్పుడు అందరికీ తెగ నచ్చేసి సోషల్ మీడియాలో ఆమెపై ప్రశంసలు కురిపిస్తున్నారు. రాజకీయాల్లో ఎంతో అనుభవం ఉన్న వాళ్లు ఇలాంటి ప్రశ్నలు అడిగినప్పుడు ఏం మాట్లాడితే.. ఏం తలనొప్పో అని కంగారు పడుతుంటారు. కానీ బ్రహ్మణి మాత్రం చాలా సింపుల్ గా ఆన్సర్ చేసి తన సామర్ద్యం ఏంటో చూపించింది. మరి ఎంతైనా చంద్రబాబు కోడలు కదా.. ఆ మాత్రం సమాధానం చేయకపోతే ఎలా...

హరీశ్ రావు ఎక్కడ...వెళ్లాడా.. పంపించారా...?

  హైదరాబాద్ కలల ప్రాజెక్టు ‘మెట్రో రైలు’ను ప్రధాని నరేంద్ర మోదీ ప్రారంభించిన సంగతి తెలిసిందే. పచ్చజెండా ఊపి ప్రారంభించిన ఆయన సీఎం కేసీఆర్‌, కేటీఆర్ ఇంకా పలువురు మంత్రులతో కలిసి.. మియాపూర్ నుంచి కూక‌ట్‌ప‌ల్లికి ప్రయాణించారు మోడీ. ఇక ఈ కార్యక్రమంలో మోడీ కేసీఆర్ కంటే కేటీఆర్ కే ఎక్కువ ప్రాధాన్యత ఇచ్చినట్టు కనిపిస్తోంది. కేటీఆర్ ఎక్కడని పిలిచిమరీ వచ్చేదాకా ఆగి ప్రారంభోత్సవం జరిపారు. అంతేకాదు.. రైల్లో కూడా కేటీఆర్ పక్కనే కూర్చున్నారు. కేటీఆర్ చెప్పే విషయాలను ఆసక్తికరంగా విన్నారు. ఇంకా మెట్రో కార్యక్రమానికి టీఆర్ఎస్ నేతలు చాలా మంది వచ్చారు.   అయితే ఇంత హడావుడి జరుగుతున్నా.. ఆ కార్యక్రమంలో ఓ మనిషి మాత్రం కనిపించడంలేదు. ఇప్పటికే బల్బు వెలిగిఉంటుంది.... అదేనండి కేసీఆర్ మేనల్లుడు..టీఆర్ఎస్ కీలక నేత హరీశ్ రావు. ఇప్పుడు తెలంగాణ రాజకీయాల్లో ఇదే పెద్ద హాట్ టాపిక్ అయింది. హరీశ్ రావు ఎక్కడున్నాడు.. ఎక్కడికి వెళ్లాడు..ఇవే ప్రశ్నలు... అయితే నిన్న మెట్రో ప్రారంభోత్సవం జరుగుతుంటే..  హరీష్ రావు ఢిల్లీ వెళ్లారట. కాళేశ్వరం ప్రాజెక్ట్ అటవీ,పర్యావరణ అనుమతుల కోసం కేంద్రాన్ని అభ్యర్ధించడానికి హరీష్ ఢిల్లీ వచ్చారట. జలవనరుల సంఘం అధికారులతో హరీష్ ఈ విషయం తో పాటు తెలంగాణకు సంబంధించిన మిగిలిన సమస్యలపై కూడా దృష్టి పెడతారట. ఆశ్చర్యకరమైన విషయం ఏంటంటే...ఆ అధికారులతో హరీశ్ రావు ఈరోజు భేటీ అవ్వనున్నారు. దానికి ఒక్కరోజు ముందే ఢిల్లీ వెళ్లాల్సిన పని లేదు. దీనివల్లే ఎక్కడాలేని డౌట్లు వస్తున్నాయి. ఆ ముందు జాగ్రత్త హరీష్ దేనా లేక కెసిఆర్ దా? అని కూడా అనుకుంటున్నారు.. ఈరోజు సమావేశం అయితే... దానికి ఒకరోజు ముందే వెళ్లాల్సిన అవసరం లేదే అని పలువురు గుసగుసలాడుకుంటున్నారు.   గతంలోనే కేసీఆర్ కుటుంబానికి... హరీశ్ రావుకు మద్య విబేధాలు తలెత్తినట్టు వార్తలు వచ్చాయి. అంతేకాదు... రాష్ట్రం విడిపోక ముందు.. విడిపోయిన తరువాత కొన్ని రోజులు కూడా కేసీఆర్ పక్కన హరీశ్ రావు కుడి భుజంగా ఉండేవాడు. కానీ మారుతున్న పరిస్థితుల నేపథ్యంలో.. హరీశ్ రావు స్థానం కూడా తగ్గుకుంటూ వస్తుందని చెప్పొచ్చు. ఒకప్పుడు కేసీఆర్ తరువాత రెండో స్థానం ఎవరిది అంటే టక్కున హరీశ్ రావు అన్న పేరు వచ్చేది. కానీ ఇప్పుడు కాస్త ఆలోచించాల్సిన పరిస్థితి ఏర్పడింది. గత కొద్ది రోజుల నుండి అయితే అసలు హరీశ్ రావు కనిపించడమే అరుదైపోయింది. ఇక ఇప్పుడు హైదరాబాద్ లో ఇంత పెద్ద కార్యక్రమం జరుగుతున్నా.. తాను పోయి ఢిల్లీలో కూర్చున్నాడు. మరి దీని వెనుక ఉన్నకారణాలు ఏంటీ... ఎంత తమ మధ్య విబేధాలు లేవు అని చెబుతున్నా.. ఇలాంటి ఘటనలు చూస్తుంటే.. విబేధాలు ఉన్నాయని నమ్మాల్సి వస్తుంది ..

నా మీద పడతారేంటి సామి....

  ఉరుము ఉరిమి మంగలం మీద పడినట్టు అన్న సామెత అందరికీ తెలిసే ఉంటుంది కదా.. ఇప్పుడు అలాగే ఉంది చంద్రబాబు పరిస్థితి చూస్తుంటే. ఎందుకంటారా.. గ్లోబల్ సమ్మిట్ లో భాగంగా అమెరికా అధ్యక్షుడు కూతురు ఇవాంక ట్రంప్ హైదరాబాద్ వచ్చిన సంగతి తెలిసిందే కదా. ఇక ఇవాంక వస్తున్నందుకు ప్రభుత్వం మామూలు ఏర్పాట్లు చేయలేదు. హైదరాబాద్ ను అందంగా ముస్తాబు చేశారు. ఎక్కడికక్కడ కట్టుదిట్టమైన భద్రతా ఏర్పాట్లు... దోమ కూడా వాలకుండా చూస్తున్నారు. ఇక నిన్ననే హైదరాబాద్ మెట్రోను కూడా ప్రధాని మోడీ లాంఛనంగా ప్రారంభించారు. మెట్రోను ప్రారంభించారు.. కేసీఆర్, కేటీఆర్ పలువురు మంత్రులతో కలిసి మెట్రోలో ప్రయాణించారు.. ఆతరువాత ఇవాంకతో కలిసి గ్లోబల్ సమ్మిట్ లో పాల్గొన్నారు. ఇక్కడి వరకూ బాగానే ఉంది. అందరూ కలుసుకున్నారు.. బాగానే మాట్లాడుకున్నారు.. విందులు ఇచ్చుకున్నారు..   ఇప్పుడు ఈ విషయంలో చంద్రబాబుపై విమర్శలు గుప్పిస్తున్నారు. ప్రధాని నరేంద్ర మోడీ, ఇవంకా ట్రంప్ సమక్షంలో హైదరాబాద్ లో జరిగిన ప్రపంచ పారిశ్రామికవేత్తల సదస్సు లో ఆంధ్రప్రదేశ్ ముఖ్యమంత్రి చంద్రబాబు లేకపోవడం మీద సోషల్ మీడియాలో పెద్ద రచ్చ జరుగుతోంది. హైదరాబాద్ కు ఇవంకా వచ్చినందుకు, అమరావతి రానందుకు బాబు ఏదో తప్పు చేసినట్టు బిల్డ్ అప్ ఇస్తున్నారు. అమరావతి శంకుస్థాపన అప్పుడు చంద్రబాబు కేసీఆర్ ను పిలిచారు. చంద్రబాబు ఆహ్వానాన్ని మన్నించి.. కేసీఆర్ వచ్చారు. కానీ ఇప్పుడు కెసిఆర్ ఆ పద్ధతి పాటించలేదు. కేసీఆర్ ప్రధానిని పిలిచారు కానీ...చంద్రబాబును పిలవలేదు. ఇక గ్లోబల్ సమ్మిట్ కు చంద్రబాబుకు పిలుపురాలేదు. ఆ విషయంలో కూడా చంద్రబాబుకు సంబంధం లేదు. ఏదైనా అనాలంటే కేంద్రప్రభుత్వాన్ని అనాలి. అవన్నీ మానేసి.. చంద్రబాబు రాలేదు.. చంద్రబాబుకు జెలసీ ఎక్కువ అంటూ కొంతమంది మహానుభావులు మినిమమ్ కామన్ సెన్స్ కూడా లేకుండా పోస్ట్ పెట్టడానికి తయారైపోతుంటారు. పిలవని పేరంటానికి వెళ్లినట్టు.. ఆహ్వానించకపోయినా వెళ్లమంటారో.. ఏమో..? చంద్రబాబును పిలవనందుకు... మోడీ , కెసిఆర్ ని వదిలేసి చంద్రబాబు మీద పడితే ఏమోస్తుంది.  ఏ మాత్రం కామన్ సెన్స్ వున్న వారికి అయినా ఈ విషయం అర్ధం అవుతుంది.

పెద్ద తలకాయ కోసం వెయిటింగ్.. ఇంతకీ ఎవరబ్బా..

  వైసీపీ పార్టీ నుండి ఇప్పటికే ఎంతోమంది కీలక నేతలు అధికార పార్టీ అయిన టీడీపీలోకి జంప్ అయి షాకిచ్చారు. తాజాగా టీడీపీపై ఎన్నో విమర్శలు గుప్పించి.. ఒకప్పుడు సీఎం తల నరుకుతా అని బహిరంగంగా ప్రకటించిన గిడ్డి ఈశ్వరి కూడా టీడీపీ కండువా కప్పుకుంది. ఇక గిడ్డి ఈశ్వరి చేరికతో ఈ సంఖ్య 23 కు చేరింది. ఇక పలువురు టీడీపీలో చేరడానికి రంగం సిద్దం చేసుకుంటున్నట్టు వార్తలు కూడా వినిపిస్తున్నాయి. అయితే ఇక్కడి వరకూ బాగానే ఉన్నా... ఇప్పుడు ఓ వార్త మాత్రం అటు వైసీపీలోనూ..ఇటు టీడీపీలోనూ హాట్ టాపిక్ గా మారింది.   అదేంటంటే.. మంత్రి అచ్చెన్నాయుడు చేసిన ప్రకటనపై. “వైకాపాకు చెందిన ఒక పెద్ద తలకాయ కోసం ప్రయత్నిస్తున్నాం. అనేకరకాలుగా చర్చలు జరుపుతున్నాం. ‘అన్నిరకాలు’గా వారికోసం ప్రయత్నాలు చేస్తున్నాం. అది వర్కవుట్‌ అయితే దాదాపు మా లక్ష్యం వందశాతం పూర్తయినట్లే. ఇక అక్కడ మిగిలేది ఒకరో ఇద్దరో మాత్రమే,” అని ఆయన అన్నాడు. అంతేకాదు జ‌గ‌న్ పాద‌యాత్ర ముగిసే టైంకు వైసీపీలో ఆయ‌న‌తో పాటు ఆయ‌న తల్లి, చెల్లి, కొద్దిమంది బంధువులు మాత్రమే వైసీపీలో ఉంటారని ఆయన అన్నారుఅంతే ఇప్పుడు వైసీపీలో ఉన్న ఆ పెద్ద తలకాయ ఎవరబ్బా అని అందరూ చర్చించుకుంటున్నారు. కొంతమంది అయితే జ‌గ‌న్‌కు రైట్ హ్యాండ్‌, ఆయ‌న చిన్న‌నాటి స్నేమితుడు అయిన రాయ‌చోటి ఎమ్మెల్యే శ్రీకాంత్‌రెడ్డి అని అనుకుంటుండగా.. కొంతమంది మాత్రం... ఎంపీ మేకపాటి రాజమోహనరెడ్డి, పుంగనూరు ఎమ్మెల్యే పెద్దిరెడ్డి రామచంద్ర రెడ్డి అని అనుకుంటున్నారు. పెద్దిరెడ్డి తరలిపోతే చిత్తూర్ జిల్లాలో వైకాపా ఖాళీ అవ్వడం ఖాయం. ఆయనతో పాటు ఆయన కుమారుడు రాజంపేట ఎంపీ మిథున్ రెడ్డి కూడా తరలిపోతారు. దీంతో వైసీపీలో ఒకటే టెన్షన్ పట్టుకుంది.   ఒకపక్క జగన్ మాత్రం పాదయాత్ర అంటూ పోతుంటే... మరోపక్క నేతలు ఒక్కోక్కరుగా పార్టీని వదిలి వెళుతున్నారు. పోనీ నేతలు పార్టీ మారే ప్రయత్నాలు చేస్తున్నారని వార్తలు వస్తున్నా.. జగన్ వారిని బుజ్జగిస్తున్నారా అంటే అదీ లేదు... పోతే పోండి అన్నట్టు ఉంది ఆయన వ్యవహారం. జగన్ ఈ తీరువల్లే పార్టీ నేతలు అయోమయ స్థితిలో పడ్డారు. మరోపక్క అచ్చన్నాయుడు చేసిన వ్యాఖ్యలు. దీంతో వైకాపా పార్టీ నేతల గుండెల్లో గుబులు మొదలైంది. ఏంచెయ్యాలో పాలుపోని పరిస్థితిలో పడ్డారు. మరి చూద్దాం.. ఆ పెద్ద తలకాయ ఎవరో.. జగన్ కు ఎప్పుడు షాక్ తగులుతుందో...

గాలి కూడా కంట్రోల్లో... వాళ్లే మనుషులా..

  అమెరికా అధ్యక్షుడు డొనాల్డ్ ట్రంప్ కూతురు ఇవాంక ట్రంప్ హైదరాబాద్ వచ్చేసింది. గత వారం రోజులు నుండి చేస్తున్న హడావుడికి కాస్త తెర దిగింది. ఇక ఇవాంక ట్రంప్ వస్తున్నందుకు గాను హైదరాబాద్ ను అందంగా ముస్తాబు చేశారు. బెగ్గర్స్ ఫ్రీ చేశారు.. ఎక్కడా దోమలు లేకుండా ముందస్తు చర్యలు తీసుకున్నారు. ఎక్కడిక్కడ రోడ్లని శుభ్రంగా.. చిన్న కాగితం ముక్క కూడా లేకుండా చేశారు. ఇది కూడా ఇవాంక ట్రంప్ ఎక్కడ పర్యటిస్తుందో అక్కడ మాత్రమే లెండి. ఇక భారీ ఎత్తున ఎక్కడికక్కడ కట్టుదిట్టమైన భద్రతా ఏర్పాట్లు.. ఎన్నో జాగ్రత్తలు చేశారు. ఇక ఇవాంకాకు డిన్నర్ ఫలక్ నామా ప్యాలెస్ లో ఏర్పాటు చేశారు. ఇక ఆమెకు ఇవ్వాల్సిన బహుమతులు కూడా కేసీఆర్ దగ్గరుండి మరి సెలెక్ట్ చేశారు. అయితే ఇక్కడి వరకూ బాగానే ఉన్నా ఇప్పుడు ఇవాంకాకు స్వచ్ఛమైన గాలిని ఇవ్వడానికి కూడా ప్రయత్నిస్తున్నారు. దీనికి  చుట్టుపక్కల ఉన్న పరిశ్రమలకు వార్నింగ్ కూడా ఇచ్చారట. వారం రోజుల పాటు పరిశ్రమలపై ఆంక్షలు విధించారు. హద్దూపద్దు లేకుండా పొగ వదిలితే కఠినమైన చర్యలు తీసుకుంటామని సంబంధిత అధికారులు పరిశ్రమల యాజమాన్యాలకు హెచ్చరికలు జారీ చేసినట్లు తెలుస్తోంది. కాలుష్య నియంత్రణ మండలి పరిశ్రమలపై ప్రత్యేకంగా నిఘా పెట్టినట్లు సమాచారం. ఐడిఎ బొల్లారం పారిశ్రామికవాడ నుంచి పొగ వెలువడకుండా చూసే బాధ్యతను కాలుష్య నియంత్రణ మండలి భుజాన వేసుకుంది.   అంటే ఇక్కడ ఆలోచించాల్సిన విషయం ఏంటంటే... ఇవాంక వచ్చిందని మన ప్రభుత్వ పెద్దలు అంత జాగ్రత్తగా.. గాలి కూడా స్వచ్చంగా ఇవ్వాలని చూస్తున్నారు. మరి ఎన్నో ఏళ్ల నుండి ఆ పొగలోనే బ్రతుకుతున్న సామాన్య ప్రజలు ఎంత ఇబ్బంది పడుతున్నారో.. కనీసం ఒక్కసారైనా ఆలోచించలేకపోయారు. ఏనాడు వారి సమస్యను పట్టించుకొని.. తగిన చర్యలు తీసుకోవడానికి చేతులు రాలేదు కానీ.. ఇప్పుడు ఇవాంక వస్తున్నందుకు గాను... ఏకంగా వారం రోజుల నుండి పొగ అనేది రాకుండా పరిశ్రమలకు వార్నింగులు ఇచ్చారు. ఆమె అమెరికా అధ్యక్షుడు కూతురు కనుక.. మనకు అమెరికాతో చాలా అవసరం ఉంది కనుక.. ఇవ్వడంలో తప్పులేదు. కానీ వాళ్లు మాత్రమే మనుషులు.. ఇక్కడ ఉన్నవాళ్లు మనుషులు కాదా వారి దృష్టిలో.  అంటే నగరం శుభ్రంగా ఉండాలంటే బయట దేశాల నుండి ఎవరైనా రావాలా..వాళ్లు వచ్చినప్పుడే ఓట్లు కావాలంటే మాత్రం ప్రజలు కావాలి... కానీ.. ఇలాంటి విషయాల్లో మాత్రం ప్రజలు పనికిరారు. ఈ ప్రభుత్వ విధానాలు ఎప్పుడు మారతాయో మరి..

మెట్రోలో టిక్కెట్లు ఎలా కొనాలి..? ఎలా ఎక్కాలి

  ప్రతిష్టాత్మక హైదరాబాద్ మెట్రో రైలు మరికొద్ది గంటల్లో కూత పెట్టనుంది. మెట్రో ఎప్పుడు పూర్తవుతుందా..? ఎప్పుడెప్పుడు ఎక్కుదామా..? అని సగటు హైదరాబాదీ ఆతృతగా ఎదురుచూస్తున్నాడు. అయతే సాధారణ రైల్వే స్టేషన్లలో లాగా మెట్రో స్టేషన్‌లో ఎలా పడితే అలా ప్రవర్తిస్తే కుదరదు.. ఇక్కడ కొన్ని నియమాలు పాటించాల్సి ఉంటుంది. ఇందుకు సంబంధించి ఎల్ అండ్ టీ సంస్థ ప్రయాణీకుల అవగాహన కోసం యూజర్ గైడ్‌ను రిలీజ్ చేసింది. ప్యాసెంజర్స్ వీటిని ఫాలో అవుతూ సురక్షితంగా తమ గమ్య స్థానాలకు చేరుకోవచ్చని ఎల్‌అండ్‌టీ అధికారులు తెలిపారు. * ప్రతి మెట్రో స్టేషన్‌కు రోడ్డు లెవల్‌లో ఎలివేటర్లు, లిఫ్టులు, మెట్లు, ఎస్కలేటర్లుంటాయి. * ఎస్కలేటర్ ఎక్కిన తర్వాత దానికి ఎడమవైపే నిలబడాలి. * రెండవ అంతస్థు మధ్య భాగంలో టికెట్లు/టోకెన్లను కొనుగోలు చేయాలి * టికెట్ ఆఫీస్ మెషిన్ ద్వారా కూడా టికెట్లు/టోకెన్లను కొనుగోలు చేయవచ్చు * టికెట్లు, టోకెన్లు గోల లేకుండా స్మార్ట్‌కార్డ్ కొనుగోలు చేయడం బెస్ట్ ఛాయిస్ * ఫ్లాట్ ఫాం మీదకు వెళ్లే సమయంలోనూ.. ఎగ్జిట్ గేట్ గుండా బయటికి వెళ్లే సమయంలోనూ మీ వద్దనున్న స్మార్ట్‌కార్డ్, టికెట్,   టోకెన్‌ అక్కడి గేట్‌కి టచ్ చేస్తేనే డోర్స్ ఓపెన్ అవుతాయి. * మెట్రోలో పది కేజీల లగేజీని మాత్రమే అనుమతిస్తారు. * ప్రతి స్టేషన్‌లో ఎక్స్‌రే బ్యాగేజ్ స్కానర్, డీఎఫ్ఎండీ డోర్ ఫ్రేమ్ మెటల్ డిటెక్టర్‌ల వద్ద చెకింగ్ చేయించాలి. * ఆ బ్యాగులు కూడా 60 సెం.మీ పొడవు, 45 సెం.మీ వెడల్పు, 25 సెం.మీ ఎత్తున్న బ్యాగులనే వినియోగించాలి. * ఫ్లాట్‌ఫామ్‌పై పసుపు రంగు గీతకు వెనకాలే నిలబడి రైలు కోసం వేచి చూడాలి. * టికెట్ కొనుగోలు చేసిన 29 నిమిషాల్లోగా ఫ్లాట్‌ఫామ్ పైకి చేరుకోవాలి. అరగంట దాటితే మరో టికెట్‌ను కొనుగోలు చేయాలి.

నేను కొట్టలేదండి బాబోయ్...

చేతులు కాలిన తరువాత ఆకులు పట్టుకొని ఏం లాభం.. ఇప్పుడు కమల్ హాసన్ పరిస్థితి అలానే ఉంది మరీ. వివాదాలకు కాస్త దూరంగా ఉండే కమల్.. తాను ఎప్పుడైతే రాజకీయాల్లోకి వస్తున్నా అని ప్రకటించాడో కానీ... అప్పటినుండి కావాలని వివాదాల్లో తల దూరుస్తున్నట్టు కనిపిస్తోంది. బీజేపీ కి వ్యతిరేకంగా విమర్శలు చేయడం.. పార్టీ పైన చేస్తే చేయోచ్చు.. ఏకంగా హిందుత్వంపై కామెంట్లు చేసి పెద్ద రచ్చ చేశాడు. ఆ తరువాత ఏదో ఒక అంశంపై స్పందిస్తూ విమర్శిస్తూనే ఉన్నాడు. ఇప్పుడు తాజాగా మరో వివాదంలో చిక్కుకున్నాడు.   అదేంటంటే.. ఇటీవల కమల్ ఓ పబ్లిక్ ఈవెంట్ కు వెళ్లాడు. అయితే సాధారణంగా తమ అభిమాన హీరో వస్తే అభిమానులు అత్యుత్సాహం చూపిస్తారన్న సంగతి తెలిసిందే. ఈ నేపథ్యంలోనే.. ఓ అభిమాని కమల్ వద్దకు వెళ్లేందుకు ప్రయత్నించాడు. సెక్యూరిటీ అతన్ని అడ్డుకున్నా... ఆ అభిమాని మాత్రం కమల్‌ వద్దకు వెళ్లేందుకు ప్రయత్నించడంతో.. ఆగ్రహంతో కమల్ ఒక్కసారిగా అభిమాని చేయి తీసి  కొట్టినంత పని చేశాడు. అంతే ఇక ఈ వీడియో కాస్త సోషల్ మీడియాలో వైరల్ అయింది. కమల్ ను బద్నాం చేసేస్తున్నారు కొంతమంది. అభిమానులను కమల్‌ కొట్టడంపై కొందరు తీవ్ర స్థాయిలో ఆగ్రహంను వ్యక్తం చేస్తున్నారు. అభిమానంతో దగ్గరకు వచ్చిన వ్యక్తిని అలాగేనా కొట్టేది అంటూ సోషల్‌ మీడియాలో జనాలు కమల్‌ను ప్రశ్నిస్తున్నారు. ఇక దీనిపై స్పందించిన కమల్ తాను అతడిని కొట్టలేదు అంటూ చెప్పుకొస్తున్నాడు. అతడు తన కాళ్లపై పడేందుకు ప్రయత్నించాడు అని, అందుకే అతడిని వద్దని వారించాను తప్ప, అతడిపై చేయి చేసుకోలేదు అంటూ ఏదో కవరింగ్ ఇస్తున్నాడు కానీ... వీడియోలో ఉన్న ఎక్స్ ప్రెషన్స్ చూస్తుంటే మాత్రం అలా లేదని అందరికీ అర్ధమవుతుంది. మొత్తానికి కమల్ రాజకీయాల్లోకి రాకముందే ఇలా ఉంటే వచ్చిన తరువాత ఇంకెలా ఉంటుందో...

మెట్రో రైలు ఎక్కబోతున్నారా..? ఈ జాగ్రత్తలు పాటించండి..!!

  హైదరాబాద్ ప్రజలు ఎప్పుడెప్పుడా అని ఎదురుచూస్తోన్న మెట్రో ప్రారంభానికి కొద్ది గంటలే మిగిలి ఉంది.. ఈ నేపథ్యంలో మెట్రో ఎక్కి నగర అందాలను తిలకించాలని చిన్నా పెద్దా అందరు ప్లాన్ చేసుకుంటున్నారు. అయితే మామూలు రైల్వే స్టేషన్‌లో వలే మెట్రోలో ప్రయాణించాలంటే కుదరదు.. ఇక్కడ ఒళ్లు దగ్గర పెట్టుకొని నడుచుకోకపోతే తాట తీస్తారు. ప్రయాణ సమయంలో తీసుకోవాల్సిన జాగ్రత్తలు, నియమ నిబంధనలను హైదరాబాద్ మెట్రో కార్పోరేషన్ విడుదల చేసింది. వీటిని ఉల్లంఘిస్తే శిక్షలు కఠినంగా ఉంటాయి.. ప్రయాణికుల అవగాహన కోసం ఈ నియమ నిబంధనల జాబితాను ప్రతి మెట్రో స్టేషన్‌లోనూ తెలుగు, ఇంగ్లీష్, ఉర్దూ, హిందీ భాషల్లో నోటీసు బోర్డులో ఏర్పాటు చేశారు. మెట్రో రైళ్లు, స్టేషన్‌లలో ఎటువంటి అతిక్రమణలకు పాల్పడిన వారిపై మెట్రో రైలు చట్టం - 2002 ప్రకారం జరిమానాతో పాటు గరిష్టంగా పదేళ్ల వరకు జైలు శిక్ష విధిస్తారు. ఒక్కో మెట్రో రైలులోని మూడు కార్లలో ఒకేసారి 974 మంది ప్రయాణించే వీలుంది. ఇందులో 126 మంది కూర్చొని, 848 నిలబడి ప్రయాణించడానికి వీలుగా రూపొందించారు. మెట్రో స్టేషన్‌, బోగీల్లో తీసుకోవాల్సిన జాగ్రత్తలు: * స్టేషన్ లోకి వెళ్లే సమయంలో తనిఖీ సిబ్బందికి, భద్రతా సిబ్బందికి సహకరించాలి * టికెట్ లేకుండా ప్రయాణిస్తే కఠిన చర్యలు ఉంటాయి * టికెట్ కౌంటర్, ఆటోమెటిక్ ఫెయిర్ కలెక్షన్ గేట్ల వద్ద మీ వంతు వచ్చే వరకు క్యూలైన్ లో నిలబడాలి * మెట్లు, ఎస్కలేటర్లపై జాగ్రత్తగా వెళ్లాలి * రైలు ప్లాట్ ఫామ్ పై నిలిచిన తర్వాతే బోగీలోకి ప్రవేశించాలి * ఏదైనా సహాయం కావాలనుకుంటే కస్టమర్ సర్వీస్ లేదా స్టేషన్ సిబ్బందిని సంప్రదించాలి * మెట్రో సిబ్బంది, స్టేషన్ స్టాఫ్, తోటి ప్రయాణికులతో మర్యాదపూర్వకంగా వ్యవహరించాలి * బోగీలో హ్యాండ్ రైల్ ను పట్టుకుని నిలబడాలి * చిన్నారులు, వికలాంగులు, సీనియర్ సిటిజెన్స్, మహిళలు సీట్లలో కూర్చునేందుకు సహకరించాలి * నిషిద్ధ వస్తువులు, పేలుడు పదార్థాలను గుర్తిస్తే… వెంటనే మెట్రో సిబ్బందికి తెలియజేయాలి * ప్రయాణిస్తున్న సమయంలో టోకెన్లు, స్మార్ట్ కార్డులు చూపించాలని మెట్రో సిబ్బంది అడిగితే వారికి సహకరించాలి * రైల్లోకి ప్రవేశించిన తర్వాత ఫొటోలు తీయరాదు * రైళ్లలో ఆహారం, తినుబండారాలు తీసుకోకూడదు * పెంపుడు జంతువులను తీసుకెళ్లకూడదు * రైలు కోసం ప్లాట్ ఫామ్ పై పరుగెత్తరాదు * స్టేషన్ పరిసరాలు, బోగీల్లో ఉమ్మి వేయడం, ధూమపానం చేయడం, పాన్ నమలడం చేయరాదు. ఆల్కహాల్ సేవించరాదు. * చిన్నారులను స్టేషన్ పరిసరాల్లో, ప్లాట్ ఫామ్ పై వద‌ల‌డం లాంటివి చేయ‌రాదు. * మెట్రో స్టేషన్ పరిసరాల్లో వీధి వ్యాపారాలు నిషేధం * బోగీలకు నోటీసులు అంటించరాదు * తమ స్మార్ట్ కార్డును లేదా టోకెన్ ను ఇతర ప్రయాణికులతో పంచుకోరాదు * బోగీ డోర్లు తెరుచుకునే లేదా మూసుకునే సమయంలో వాటి మధ్య నిల్చోరాదు

రోజక్కా ఈ పాదయాత్రలు అవసరమా...!

  వైసీపీ అధినేత జగన్మోహన్ రెడ్డి ప్రజా సంకల్పం పేరుతో పాదయాత్ర చేస్తున్న సంగతి తెలిసిందే కదా. ఏదో పాపం కోర్టు వ్యక్తిగత మినహాయింపు ఇవ్వకపోయినా.. వారంలో ఒకరోజు హైదరాబాద్ వచ్చి కోర్టుకు హాజరై.. మళ్లీ పాదయాత్ర ఎక్కడ ఆపామో.. అక్కడికి వెళ్లి.. మళ్లీ పాదయాత్ర మొదలు పెడుతూ నానా కష్టాలు పడుతున్నాడు. ఇక పాదయాత్ర కోసం ఏకంగా అసెంబ్లీ సమావేశాలకు వెళ్లకూడదని నిర్ణయించుకున్న మహానుభావుడు. మళ్లీ దానికి పార్టీ ఫిరాయించిన ఎమ్మెల్యేలపై నిరసన అని పేరు ఒకటి. ఇక పాదయాత్ర మొదలు పెట్టిన రోజే ప్యారడైజ్ పేపర్ల గొడవ.. రెండు రోజే నడుముకి బెల్ట్..ఇక ఇప్పుడు తాజాగా ఈడీ షాక్.. ఇవన్నీ కావనట్టు పార్టీ నేతల జంపింగ్లు. ఇన్ని తలకాయనొప్పులు ఉన్నా.. ఏదో నవ్వుకుంటూ పాదయాత్ర చేసుకుంటూ పోతున్నాడు. దీనివల్ల జగన్ కు ఒరిగేది ఏముందో తెలియదు కానీ..పాదయాత్ర చేసుకుంటూ పోతున్నాడు.   ఇక్కడి వరకూ బాగానే అసలు జగన్ పాదయాత్రే చాలా కష్టంగా జరుగుతుంది. ఇప్పుడు వైసీపీ ఫైర్ బ్రాండ్ గా పేరుతెచ్చుకున్న రోజా కూడా పాదయాత్ర చేస్తా అని ముందుకు వస్తుంది. ఈ నెల 28వ తేదీ నుంచి రోజా పాదయాత్ర ప్రారంభం కానుంది. గాలేరు-నగరి ప్రాజెక్టుపై ప్రభుత్వ నిర్లక్ష్యానికి నిరసనకు గాను ఆమె  ఈ పాదయాత్ర చేస్తున్నట్టు పార్టీ నేతలు చెబుతున్నారు. నగరి నుండి తిరుమల కొండ వరకు 88 కిలోమీటర్లు.. రోజా పాదయాత్ర నిర్వహించనున్నారుట. ఈ పాదయాత్ర నాలుగు రోజుల పాటు జరుగుతుందట. మరి ఇప్పటికే తన నోటి దూల వల్ల జగన్ కు సమస్యలు తెచ్చిపెట్టిన రోజా.. పాదయాత్ర అంటూ బయలుదేరింది. ఇప్పుడు ఈ పాదయాత్ర వల్ల ఏం సమస్యలు తెచ్చిపెడుతుంటే. మరి ఎన్ని పాదయాత్రలు చేస్తే ఏం లాభం.. నోరు కంట్రోల్ లో లేకపోతే.. ఈ  విషయం అటు జగన్.. ఆయన చెల్లిగా చెప్పుకునే రోజా ఎప్పుడు తెలుసుకుంటారో ఏమో..

జయలలిత మా అమ్మ... డీఎన్ఏ టెస్ట్ కు రెడీ...

  తమిళనాడులో ఇప్పుడు మరో ఆసక్తికరమైన అవసరం మీద చర్చ జరుగుతుంది. అదేంటంటే..తాను జయలలిత కూతురునని అమృత అనే యువతి సుప్రీంకోర్టులో దాఖలు చేసిన పిటిషన్ విచారణకు రావడమే. దివంగత ముఖ్యమంత్రి జయలలిత మరణించిన అనంతరం.. పలువురు తాము జయలలిత సంతానం అని తెరపైకి వచ్చి హడావుడి చేసిన సంగతి తెలిసిందే కదా. కృష్ణమూర్తి అనే వ్యక్తి తాను జయలలిత కుమారుడినని.. జయలలిత, నటుడు శోభన్ బాబులకు జన్మించానని, ఆమె ఆస్తులకు తానే వారసుడినని.. కోర్టును ఆశ్రయించాడు. ఏమైంది... ఆ వ్యక్తి తప్పుడు పత్రాలు సృష్టించాడని... జడ్జి ఆగ్రహం వ్యక్తం చేస్తూ..  జైలుకు పంపించారు.   అయితే ఇప్పుడు అమృత అనే యువతి మాత్రం ఏకంగా సుప్రీంకోర్టునే ఆశ్రయించడంతో అందరూ షాకవుతున్నారు. ఎన్నోఅనుమానాలు..మరెన్నో సందేహాలకు తెరలేపారు. ఎందుకంటే.. ఆమె సుప్రీంకోర్టును ఆశ్రయించడమే కాదు.. దీనిపై రాష్ట్రపతి, ప్రధాన మంత్రులకు సైతం లేఖలు కూడా రాసింది. అక్కడితో ఆగకుండా... ఏకంగా తనకు డీఎన్ఏ టెస్ట్ కూడా చేసుకోమని ఆఫర్ ఇచ్చింది. ఆస్తి పాస్తుల కోసం నేనమి పోరాడటం లేదు.. నేను జయలలిత బిడ్డను అని తెలిసిన తరువాతే ఆమెపై ప్రేమ కలిగింది అని చెబుతుంది. దీంతో ఇప్పుడు డీఎన్ఏకు టెస్ట్ కు కూడా రెడీ అని అమృత చెబుతుండటంతో అన్నాడీఎంకే డైలమాలో పడింది. ఈమె చెబుతున్నది నిజమేనా అన్న అనుమానాలు మొదలయ్యాయి వారిలో. అసలు దీనిపై ఎలా స్పందించాలో కూడా తెలియడం లేదని పలువురు అభిప్రాయపడుతున్నారు. అంతేకాదు... దీనివల్ల జయలలితకు ఎక్కడ చెడ్డ పేరు వస్తుందా అని కూడా భయపడుతున్నారు. అంత ధైర్యంగా ఆమె డీఎన్ఏ టెస్ట్ కు రెడీ అయ్యిందంటే.. ఆమెకు అంత కాన్ఫిడెన్స్.. అంత ధైర్యం ఎక్కడి నుండి వచ్చింది అని అనుకుంటున్నారు.   అసలు అమృత అనే యువతి పేరు గతంలో కూడా ఒకసారి బయటకు వచ్చింది. 1996 లో తాను జయను మొదటిసారిగా కలిసినట్టు చెప్పారు. దానిని పోయెస్ గార్డెన్ వర్గాలు కూడా ధ్రువీకరించాయి. ఆ తరువాత కూడా రెండు మూడుసార్లు ఆమె పోయెస్ గార్డెన్ కు వెళ్లారని.. ఇక జయపై కేసులు నమోదైన సమయంలో అమృత కొన్ని రోజుల పాటు అక్కడే ఉన్నారని... అన్నాడీఎంకే సీనియర్ నేత ఒకరు తెలిపారు. అంతేకాదు ఇక జయలలిత మరణానంతరం ఆమె... కుటుంబం గురించి బయటి ప్రపంచానికి తెలియడం జయలలితకు ఇష్టం ఉండదు... ఆమెతో ఎంత దగ్గరి బంధుత్వమున్నా బయటకు చెప్పుకోలేని దీనస్థితి మాది అని వాపోయారు. అయితే జయలలిత తనకు పెద్దమ్మ అని మాత్రమే అప్పట్లో చెప్పారు. ఇప్పుడు మాత్రం ఏకంగా తాను జయలలిత కూతురినని ముందుకొచ్చింది. సుప్రీంకోర్టులో ఈరోజు ఆమె పిటిషన్ విచారణకు రానుంది. మరి చూద్దాం... కోర్టు ఏం తీర్పునిస్తుందో.. డీఎన్ఏ టెస్ట్ కు ఓకే చెబుతుందో.. లేదో...?  

మరో అడుగు ముందుకేసిన బాబు... ఆసియాలోనే అతిపెద్దది..

  టెక్నాలజీని వాడుకోవడంలో చంద్రబాబు తోపు అన్న సంగతి అందరికీ తెలిసిందే కదా. కొత్త కొత్త టెక్నాలజీని ప్రవేశపెడుతుంటారు. తాజాగా మరోసారి అలాంటి ప్రయోగం చేశారు చంద్రబాబు. అదేంటంటే.... ఆసియాలోనే అతిపెద్ద వీడియో కాన్ఫరెన్స్ రూమ్ ఏర్పాటు చేశారు.  RTGS ఏర్పాటు చేసిన ఈ కమాండ్ కంట్రోల్ వ్యవస్థను చంద్రబాబు లాంఛనంగా ప్రారంభించారు. చంద్రబాబు నాయుడు అధికారులతో వీడియో కాన్ఫరెన్స్ లు నిర్వహిస్తారన్న సంగతి విదితమే కదా. అయితే వీడియో కాన్ఫెరెన్స్ లకు అధికారులు ఎక్కడ ఉన్నా సరే పాల్గొనాల్సి వస్తుంది. కానీ చంద్రబాబు తీసుకొచ్చిన అత్యాధునిక వ్యవస్థ ద్వారా...  సీఎం వీడియో కాన్ఫరెన్స్ కోసం ప్రత్యేకంగా ఒక చోటు నుంచి ఇంకో చోటుకు వచ్చే అవసరం ఉండదు. తాము వున్న ప్రాంతం నుంచే వీడియో కాన్ఫరెన్స్ లో పాల్గొనవచ్చు. ఒక్క సెల్ ఫోన్ ఉంటే …దానికి సిగ్నల్ ఉంటే చాలు …ఎక్కడ నుంచి అయినా సీఎం వీడియో కాన్ఫరెన్స్ లో పార్టిసిపేట్ చేయొచ్చు.   అంతేకాదు ఈ వ్యవస్థలో ఇంకో గొప్ప విషయం కూడా ఉంది.. అదేంటంటే... సీఎం ఈ కేంద్రం నుంచి సర్వే లెన్స్ కెమెరాల ద్వారా రాష్ట్రం మొత్తాన్ని నేరుగా చూడొచ్చు. ఇందుకోసం ఇప్పటికే 5 వేల కెమెరాలు ఏర్పాటు చేశారు. త్వరలో మరో 15 వేల కెమెరాలు ఏర్పాటు చేయబోతున్నారు. ఏదైనా అత్యవసర పరిస్థితి ఎదురు అయినప్పుడు సీఎం సహా సంబంధిత అధికార వర్గం ఏ ప్రాంతంలో పని చేస్తున్న అధికారులతో అయినా నేరుగా చూస్తూ ఆదేశాలు ఇచ్చే అవకాశం ఉంటుంది. మొత్తానికి చంద్రబాబు ఈ వ్యవస్ధను తీసుకొచ్చి అందరికంటే మరో ముందుడుగు వేశారు. ఒకే ఒక్కడు సినిమాలో మాదిరిగా.... ఆన్ ది స్పాట్ పని చేయించడానికి రెడీ ఆయ్యారు.

ఇలా అయితే చాలా కష్టం జగన్...

ఒకపక్క జగన్  పాదయాత్రలు చేసుకుంటూ పోతుంటే.. మరోపక్క వైసీపీ నేతలు ఒక్కోక్కరుగా పార్టీని వదిలిపెడుతూ జగన్ కు షాకిస్తున్నారు. నేను మోనర్క్ ను... నేను ఎవ్వరి మాట వినను.. నామాటే అందరూ వినాలి అన్న పంథాతో ఉండే జగన్ వైఖరిపై విసుగుచెందిన నేతలు మొత్తం ఇప్పుడు పక్కపార్టీపై చూపులు చూస్తున్నారు. ఇప్పటికే ఎంతో మంది వైసీపీ నేతలు అధికార పార్టీలోకి వెళ్లారు. ఇప్పుడు తాజాగా మరో కీలక నేత టీడీపీ తీర్దం పుచ్చుకున్నారు. అది ఎవరో కాదు విశాఖ జిల్లా పాడేరు నియోజ‌క‌వర్గం నుంచి ఎమ్మెల్యేగా ఉన్న గిడ్డి ఈశ్వ‌రి.  జ‌గ‌న్ పాద‌యాత్ర ప్రారంభానికి కొద్ది రోజుల ముందు క‌ర్నూలు ఎంపీ బుట్టా రేణుక వైసీపీకి గుడ్ బై చెప్పేశారు. ఇప్పుడు గిడ్డి ఈశ్వరి. గిడ్డి ఈశ్వరితో పార్టీ మారిన వారి సంఖ్య 23 కు చేరింది. అయితే ఇప్పుడు మరికొంతమంది నేతలు కూడా టీడీపీ తీర్థం పుచ్చుకోవడానికి రెడీగా ఉన్నట్టు తెలుస్తోంది. 24, 25, 26 వికెట్లు కూడా త్వ‌ర‌లోనే ప‌డ‌నున్నాయ‌ని తెలుస్తోంది. వారిలో కృష్ణా జిల్లా తిరువూరు ఎమ్మెల్యే కొక్కిలిగ‌డ్డ ర‌క్ష‌ణ‌నిధి, క‌ర్నూలు జిల్లా ఆదోని ఎమ్మెల్యే వై.సాయ‌ప్ర‌సాద‌రెడ్డి,  నెల్లూరు జిల్లా కావ‌లి ఎమ్మెల్యే రామిరెడ్డి ప్ర‌తాప్‌కుమార్‌రెడ్డి పేర్లు వినిపిస్తున్నాయి. అనంతపురం మాజీ ఎమ్మెల్యే బోడిమల్లు గుర్నాథరెడ్డి కూడా టీడీపీ తీర్థం పుచ్చుకునేందుకు రంగం సిద్ధం చేసుకున్నట్లు తెలిసింది. వీరు మాత్రమే కాదు.. ఇంకా కొంత మంది పార్టీ మారాలని చూస్తున్నట్టు వార్తలు వస్తున్నాయి. మరి ఇంత మంది నేతలు పార్టీ మారుతున్నా.. నిమ్మకు నిరెత్తన్నట్టు జగన్ మాత్రం పాదయాత్ర చేసుకుంటూ పోతున్నాడు. కనీసం వాళ్లు పార్టీ మారుతున్నారు అని వాళ్లను బుజ్జగించడం కూడా చేయకుండా... అసలు పార్టీ ఎందుకు మారుతున్నారు అని కూడా అడగకుండా.. మారితే మారారులే అని పొగరుతో వ్యవహిస్తున్నాడు. మరి జగన్ తన వైఖరిని మార్చుకోకపోతే.. పార్టీ ఖాళీ అయ్యే పరిస్థితి వచ్చినా ఆశ్చర్యపోనక్కర్లేదు. పార్టీలో నేతలనే పట్టించుకోని.. జగన్ ఎన్ని పాదయాత్రలు చేస్తే లాభం ఏంటి..? ప్రజల సమస్యలను మాత్రం పట్టించుకుంటారని గ్యారెంటీ ఏంటీ..

వైసీపీకి ఆ కామన్ సెన్స్ కూడా లేకుండా పోయింది....

  వెనుకటికి ఓ సామెత ఉండేది.. మనం చేస్తే సంసారం.. ఇంకెకొడు చేస్తే.. ఇంకేదో అట..అలా ఉంది ప్రస్తుతం వైసీపీ పరిస్థితి చూస్తుంటే. ఏదో ఒక విషయంపై అనవసరపు యాగి చేయడం.. ఆతరువాత వేలెత్తి చూపించుకోవడం అలవాటైపోయింది. ఇప్పుడు ఇందంతా ఎందుకంటే... తాజాగా అలాంటి తప్పే చేసి ఇరుకున పడింది వైసీపీ. అది కూడా జనసేన పార్టీ విషయంలో. 2019 వ సంవత్సరంలో జనసేన పార్టీ ప్రత్యక్షంగా రాజకీయాల్లోకి దిగాలనుకుంటున్న సంగతి తెలిసిందే. దీనికి ఇప్పటినుండే.. పార్టీ గ్రౌండ్ వర్క్ చేస్తుంది. ఇందులోభాగంగానే అక్కడక్కడ పార్టీ కార్యాలయాలు కూడా ఏర్పాటు చేస్తుంది. ఈ క్రమంలో మంగళగిరి సమీపంలోని చినకాకాని వద్ద జనసేన ప్రధాన కార్యాలయం ఏర్పాటు చేయలనుకుంది. అయితే కొన్ని ఆర్ధిక పరిస్థితుల కారణంగా భూమిని కొనుగోలు చేయలేక లీజు పద్ధతిలో భూమిని తీసుకుని కార్యాలయ ఏర్పాటుకు జనసేన సన్నాహాలు చేస్తోంది. ఇప్పుడు ఇది వైసీపీకి ప్రాబ్లమైనట్టు ఉంది. అందుకే ఈ విషయంలో కూడా వేలు పడింది. వైసీపీ అనుకూల సోషల్ మీడియాలో.. అక్కడ భూమి కొనలేదు కాబట్టి జనసేన తాత్కాలిక టెంట్ వేస్తున్నట్టు ప్రొజెక్ట్ చేస్తోంది.   కానీ ఇక్కడే వైసీపీ ఓ విషయం మర్చిపోయినట్టు ఉంది. అదేంటంటే..నిజానికి ఓ రెండు నెలల ముందు వైసీపీ కూడా విజయవాడలో పార్టీ నేతకు చెందిన భూమిలో తాత్కాలిక కార్యాలయం నిర్మించింది. సొంత పార్టీ వాళ్ళు ఏ సమాధానం చెప్పలేని పరిస్థితుల్లో వైసీపీ విజయవాడలో ఆఫీస్ పెట్టింది. అయితే ఇప్పటికీ ఆ ఆఫీస్ నుంచి జగన్ పెద్దగా కార్యకలాపాలు సాగించింది లేదు. మొత్తం హైదరాబాద్ లోటస్ పాండ్ నుంచే నేటికీ వ్యవహారాలు నడుస్తున్నాయి. ఇక ఈ వ్యవహారాన్ని మొత్తం గాలికి వదిలేసి జనసేన మీద పడింది. ముందు వైసీపీ చేసే పనులు చూసుకోకుండా.. పక్కననోళ్లకు నీతులు చెబుతుందని అంటున్నారు. అందుకే మనం ఒకరివైపు వేలెత్తి చూపితే నాలుగు వేళ్ళు మన వైపు తిరిగి చూస్తాయి అని వైసీపీ ఎప్పుడు తెలుసుకుంటుందో మరి...

ఈయన పప్పులు చంద్రబాబు దగ్గర ఉడకడంలేదట....

టీడీపీ చిత్తూరు ఎంపీ శివ ప్రసాద్ స్టైల్ గురించి అందరికీ తెలిసిందే. ఈయన ఏదైనా సమస్య గురించి చెప్పాలంటే దానికి తగినట్టుగా వేషదారణ వేసుకుంటూ... బుర్ర కథలు చెబుతూ మరీ.. ప్రజా సమస్యలను చూపిస్తుంటారు. ఇప్పటికే ఎన్నో వేషధారణలు.. బుర్ర కథలు వేసిన శివప్రసాద్ గారి.. బుర్రగాథలు మాత్రం చంద్రబాబుగారు వినిపించుకునే పరిస్థితిలో లేరట. దీనికి కారణం గతంలో ఎంపీగారు రెచ్చిపోవడమే. నిజానికి శివప్రసాద్ చంద్రబాబుకి బాగా సన్నిహితుడు. దీంతో చంద్రబాబే ఆయన్ని రాజకీయంగా చాలా ప్రోత్సహించారు. ముందు ఎమ్మెల్యే టికెట్ ఇచ్చారు. ఆ తరువాత ఏకంగా...  ఎంపీ గా గెలిపించి చేయి అందించారు. అంతే ఎంపీ గారికి కొమ్ములొచ్చినట్టు ఉన్నాయి. అందుకే సొంత పార్టీపైనే విమర్శలు చేసే స్థాయికి ఎదిగారు. 2014 ఎన్నికల్లో గెలిచిన కొద్ది కాలానికే.. వ్యక్తిగత డిమాండ్స్ తీరలేదన్న కోపంతో పార్టీ ని ఇబ్బంది పెట్టే చర్యలకు దిగారు. కొన్ని సభలు , వేదికల మీదే పార్టీ కి నష్టం చేసే తీవ్ర వ్యాఖ్యలు చేశారు. ఆయన్ను బుజ్జగించడానికి ప్రయత్నించిన నేతల మీద కూడా ఫైర్ అయ్యారు. ఈ విషయం బాబు చెవిన పడడంతో ఆయన కూడా శివ ప్రసాద్ తో మాట్లాడినా ఎంపీ గారి ధోరణి మారలేదు సరికదా వైసీపీ కి వెళుతున్నట్టు పార్టీని బెదిరించే సంకేతాలు ఇచ్చారు.   ఇప్పుడు ఏమైంది.. ఎంపీగారికి బాగా తెలిసొచ్చినట్టు ఉంది. ఒక్క నంద్యాల ఉపఎన్నికతో అటు చాలా మంది నేతలకు, బీజేపీకి, టీడీపీని ఎదురిస్తున్న వారికి బాబు సమాధానం చెప్పారు. అంతే అందరూ తోక ముడుచుకోవాల్సి వచ్చింది. ప్రస్తుతం వైసీపీ పరిస్థితి ఏంటో అందరికీ అర్దమయింది. సొంత పార్టీ నేతలే పార్టీని వీడుతున్నారు. ఇప్పుడు ఎంపీ గారికి కూడా బాగా తెలిసొచ్చి బాబు గారిని కాక పట్టే పనిలో పడ్డారట. అందుకే టీడీపీ హైకమాండ్ తో అంటే చంద్రబాబు గుడ్ లుక్స్ లో పడేందుకు ఆయన నానా పాట్లు పడుతున్నారంట. కానీ బాబు గారు ఒక్కసారి పక్కన పెడితే వాళ్ల వైపు చూడటం కష్టమైన పనే. అందుకే శివప్రసాద్ చేసిన హంగామాతో.. ఎప్పటికప్పుడు దూరంగా వుంటూ వస్తున్నారట. అయ్యగారు చెప్పే హరికథలు, బుర్ర కధలు వినడానికి ఆసక్తి చూపడం లేదట. దీంతో సీన్ అర్ధం చేసుకున్న శివప్రసాద్ బాబు సన్నిహితులతో సారీ లు చెబుతూ ఆయన కోపం తగ్గేలా చూడమని ప్రాధేయపడుతున్నారంట. మరి ఆవేశంతో ఎగరడం ఎందుకు.. మళ్లీ కాళ్లు పట్టుకోవడం ఎందుకు..