ఉద్యమ నేత కూతురు సక్సెస్ అవుతారా?

తెలంగాణ రాష్ట్ర ఏర్పాటుకు ముందు.. ఈ గడ్డ మీద ఎన్నో రాజకీయ పార్టీలు పురుడు పోసుకున్నాయి. తెలంగాణ తర్వాత కూడా ఓ పార్టీ ఇలా వచ్చి.. అలా వెళ్లిపోయింది. అవన్నీ.. కాలగర్భంలో కలిసిపోయాయి. కానీ, కల్వకుంట్ల కవిత పెట్టబోయే పార్టీ మాత్రం కొందరికి చరిత్ర సృష్టించబోయేదిగా కనిపిస్తోంది. మరి కొద్ది గంటల్లో అంటే శనివారం (ఏప్రిల్ 25)  ఉదయం పదిగంటలకు కవిత కొత్త పార్టీని ప్రకటించబోతున్నారు.  కవిత పార్టీ ఎజెండానే ఆమె ఫేట్ డిసైడ్ చేయబోతోంది. ఉద్యమ నేత  కుమార్తె అన్న ఇమేజ్‌కు తగ్గట్లుగానే.. తెలంగాణ పాలిటిక్స్‌లో ఆమె ఫైటర్‌లా తన పాత్ర పోషించేందుకు సిద్ధమయ్యారు. కవిత సంకల్పం గట్టిదే అయినా.. తెలంగాణలో మరో పార్టీ మనుగడకి అవకాశం ఉందా?  కేసీఆర్‌లాగే.. ఆయన బిడ్డని తెలంగాణ ఆదరిస్తుందా?  కల్వకుంట్ల కవిత కొత్త పార్టీ ముందున్న రాజకీయ సవాళ్లేంటి? అన్నవి ఇప్పుడు హాట్ టాపిక్‌గా మారాయి.

కల్వకుంట్ల కవిత కొత్త పార్టీ ప్రస్థానం ఎలా ఉండబోతోంది? ఇదే.. ఇప్పుడు తెలంగాణ పొలిటికల్ సర్కిల్స్‌లో బలంగా వినిపిస్తున్న ప్రశ్న. ఉద్యమ కాలం నుంచి ప్రత్యేక రాష్ట్ర ఆవిర్భావం వరకు, ఆపై పదేళ్ల పాలన దాకా.. గులాబీ జెండా నీడన ఎదిగిన కల్వకుంట్ల కవిత.. ఇప్పుడు అదే తెలంగాణ రాజకీయాల్లో తనదైన ముద్ర వేసేందుకు సిద్ధమవుతున్నారు. అయితే..  ఆమె అడుగులు పూల బాటలో సాగుతాయా? సవాళ్ల సుడిగుండాల్లో చిక్కుకుని తడబడతాయా? అనేది ఆసక్తికరంగా మారింది.

తెలంగాణ గడ్డ.. రాజకీయ చైతన్యానికి మారుపేరు. ప్రత్యేక తెలంగాణ రాష్ట్ర సాధన కోసం ఇక్కడెన్నో ప్రాంతీయ పార్టీలు భావోద్వేగాల మధ్య పుట్టాయి. చివరికి మనుగడ సాగించలేక కాలగల్భంలో కలిసిపోయాయి. ఇంకొన్ని.. జాతీయ పార్టీలో విలీనమయ్యాయి. ఈ క్రమంలో.. కవిత పెట్టబోయే పార్టీ ఈ విధిని, గత చరిత్రను ఎలా అధిగమిస్తుందనేదే.. అందరిలోనూ తలెత్తుతున్న ప్రశ్న.  కల్వకుంట్ల కవితకు.. కేవలం కేసీఆర్ కుమార్తెగానే కాకుండా..  తనకంటూ సెపరేట్ ఫైటర్ ఇమేజ్ ఉంది. బతుకమ్మని ప్రపంచ వేదికపై నిలబెట్టి, సాంస్కృతిక సారథిగా మహిళల మనసులు గెలిచారు.  ఢిల్లీ లిక్కర్ స్కామ్ లాంటి వివాదాలు చుట్టుముట్టినా, జైలుకెళ్లాల్సి వచ్చినా, వెనక్కి తగ్గకుండా పోరాట పటిమని ప్రదర్శించారు. ఇది..  ఆమెకు క్యాడర్‌లో ఓ ఫైటర్ ఇమేజ్‌ని తెచ్చిపెట్టింది. తండ్రి కేసీఆర్‌కు ఏమాత్రం తగ్గకుండా, ఎలాంటి సబ్జెక్ట్ అయినా అనర్గళంగా మాట్లాడటం, జనాన్ని ఆకట్టుకునేలా మాట్లాడటం.. కవితకు ఉన్న అదనపు బలాలు. 

అయితే..  కొత్త పార్టీ పెట్టాలి, ఓ కొత్త చరిత్ర సృష్టించాలనే సంకల్పం ఎంత గట్టిదైనా.. గ్రౌండ్‌ లెవెల్‌లో సౌండ్ మరోలా ఉంటుంది. ఈ క్రమంలో.. కవిత ఎదుర్కోబోయే సవాళ్లు కూడా కళ్లముందు కనిపిస్తూనే ఉన్నాయి. ప్రస్తుతం.. బీఆర్ఎస్ పార్టీకి కేసీఆరే సర్వస్వం. కవిత కొత్త పార్టీని ప్రకటించాక.. అది బీఆర్ఎస్ ఓట్ బ్యాంకుని చీలుస్తుందా? మరో పార్టీ ఉనికిని దెబ్బకొడుతుందా? అనేదే సస్పెన్స్‌గా మారింది. మరోవైపు గులాబీ క్యాడర్ కూడా ఎవరి వైపు ఉండాలనేది తేల్చుకోవాల్సిన తరుణం ఇది. ప్రస్తుతం రాష్ట్రంలో కాంగ్రెస్ అధికారంలో ఉంది. అటు బీఆర్ఎస్ మరోసారి అధికారం దక్కించుకు నేందుకు తీవ్రంగా ప్రయత్నిస్తోంది. బీజేపీ కూడా ఒక్కసారైనా తెలంగాణలో పాగా వేయాలనే పట్టుదలతో కనిపిస్తోంది. ఈ  జాతీయ పార్టీల మధ్య.. ఓ ప్రాంతీయ శక్తిగా కవిత తన ఉనికిని, బలాన్ని చాటుతారా? లేదా? అన్నదే.. ఇప్పుడు చర్చకు వస్తోంది. ఇలాంటి డౌట్స్ పొలిటికల్ సర్కిల్స్‌లో ఎన్ని ఉన్నా.. కవిత మాత్రం తన పొలిటికల్ ఎంట్రీపై ఫుల్ కాన్ఫిడెంట్‌గా కనిపిస్తున్నారు. ఎందుకంటే, తెలంగాణ ఆడబిడ్డగా, ఈ ప్రాంతపు మహిళా నేతగా తను పెట్టబోయే పార్టీకి.. జనం నుంచి మంచి ఆదరణ దక్కుతుందని నమ్ముతున్నారు. ముఖ్యంగా.. తెలంగాణలో మహిళా ఓటర్లే డిసైడింగ్ ఫ్యాక్టర్. కవిత.. మహిళా సమస్యలు, తెలంగాణ సంస్కృతిని ప్రధాన ఎజెండాగా తీసుకునే అవకాశం ఉంది. అయితే, అనేక సంక్షేమ పథకాల ద్వారా మహిళలని ఆకట్టుకుంటున్న ప్రధాన పార్టీలను కవిత ఎలా ఢీకొంటారనేదే ఉత్కంఠ రేపుతోంది. 

తెలంగాణ తెచ్చిన నేతగా కేసీఆర్‌కు  ఓ ఇమేజ్ ఉంది. ఆ ట్యాగే.. ఆయన్ని కాపాడుతోంది. కవితకు ఆ స్థాయి గుర్తింపు రావాలంటే, తెలంగాణ భవిష్యత్ కోసం ఆమె దగ్గరున్న విజన్ ఏంటనేది ముఖ్యం. ఇప్పటికే, ప్రజల్లో తనపై ఉన్న ఆరోపణలను పటాపంచలు చేసి, క్లీన్ చిట్ ద్వారా   జనం నమ్మకాన్ని గెలుచుకున్నారు. మళ్లీ పక్కా తెలంగాణ సెంటిమెంట్‌ని రగిలిస్తారా? మరేదైనా మంత్రం వేస్తారా? అన్నది ఆసక్తిగా మారింది. తెలంగాణ సమాజం కూడా భావోద్వేగాలకు ప్రాధాన్యతనిస్తుంది. కవిత ఎజెండా గనక ప్రజల్లోకి బలంగా వెళితే, ఆమె ఓ కొత్త పొలిటికల్ ఆల్టర్నేట్‌గా ఎదిగే  అవకాశం ఉంది. ముఖ్యంగా.. ఉత్తర తెలంగాణలోని కొన్ని ప్రాంతాల్లో ఆమెకు పట్టు ఉండటం కొంతవరకు కలిసొస్తుందనే వాదన వినిపిస్తోంది. కవిత వేస్తున్న ఈ కొత్త అడుగు.. తెలంగాణ రాజకీయాల్లో ప్రత్యామ్నాయం అవుతుందా? బీఆర్ఎస్ ఓటు బ్యాంకుని చీల్చడానికే పరిమితమవుతుందా? అన్నది.. పార్టీ ఆవిర్భావ సభలో ప్రకటించే ఎజెండాను బట్టి డిసైడ్ అవుతుంది. కల్వకుంట్ల కవిత వేస్తున్న అడుగులు.. సర్వోదయ తెలంగాణ నినాదంతో ఆమె వస్తున్నా.. తెలంగాణ ప్రజలు ఆమెని కేసీఆర్ కూతురిగానే చూస్తారా? స్వతంత్ర నాయకురాలిగా ఆదరిస్తారా? అన్నది.. అతి త్వరలోనే తేలిపోతుంది.