దేశవ్యాప్తంగా గ్యాస్ సిలిండర్ల కొరత ప్రభావం రోజురోజుకు స్పష్టంగా కనిపిస్తోంది. వంటగ్యాస్ అందుబాటులో లేకపోవడం తో ప్రజలు ప్రత్యామ్నాయ మార్గాల కోసం వెతుకుతు న్నారు. ఈ నేపథ్యంలోనే విద్యుత్ ఆధారిత ఇండక్షన్ స్టవ్‌లకు భారీగా డిమాండ్ పెరిగింది. గ్యాస్ సిలిండర్లు సకాలంలో లభించకపోవ డం, కొన్నిచోట్ల బ్లాక్ మార్కెట్‌లో అధిక ధరలకు విక్రయాలు జరగడం వల్ల వినియోగదారులు ఇండక్షన్ స్టవ్‌ల వైపు మొగ్గు చూపుతున్నట్లు మార్కెట్ వర్గాలు చెబుతున్నాయి. సాధారణంగా దేశవ్యాప్తంగా నెలకు సుమారు 1.80 లక్షల ఇండక్షన్ స్టవ్‌లు అమ్ముడవుతుంటాయి. అయితే ఇటీవల గ్యాస్ కొరత నేపథ్యంలో ఈ సంఖ్య ఒక్కసారిగా పెరిగింది. ప్రముఖ ఈ-కామర్స్ వేదిక అయిన అమెజాన్‌లో  ఒక్క రోజులోనే 1.34 లక్షలకు పైగా ఇండక్షన్ స్టవ్‌లు అమ్ముడైనట్లు సమాచారం. 

ఇది సాధారణ అమ్మకాలతో పోలిస్తే అనూహ్యంగా పెరిగిన సంఖ్యగా మార్కెట్ విశ్లేషకులు పేర్కొంటున్నారు. ఇండక్షన్ స్టవ్‌లకు ఒక్కసారిగా పెరిగిన డిమాండ్ కారణంగా అనేక నగరాల్లో స్టాక్ కొరత ఏర్పడింది. ఆన్‌లైన్ ప్లాట్‌ఫారమ్‌లతో పాటు ఎలక్ట్రానిక్స్ దుకాణాల్లో కూడా ఇండక్షన్ స్టవ్‌లు వేగంగా అమ్ముడైపోతు న్నాయి. ఫలితంగా చాలాచోట్ల అవుట్ ఆఫ్ స్టాక్ బోర్డులు పెట్టాల్సిన పరిస్థితి వచ్చింది. డిమాండ్‌కు తగినంత సరఫరా లేకపోవడంతో కంపెనీలు కూడా కొత్త స్టాక్ పంపిణీపై దృష్టి సారిస్తున్నాయి.

గ్యాస్ కొరత ప్రభావం కేవలం గృహాలకే కాకుండా చిన్న హోటళ్లు, టీ స్టాళ్లు, టిఫిన్ సెంటర్లపై కూడా పడుతోంది. కొందరు వ్యాపారులు గ్యాస్‌కు బదులుగా ఇండక్షన్ స్టవ్‌లను ఉపయోగించి వంటలు చేయడం ప్రారంభించారు. అయితే విద్యుత్ వినియోగం ఎక్కువ కావడం వల్ల ఖర్చులు కూడా పెరుగుతు న్నాయని వారు చెబుతు న్నారు. గ్యాస్ సరఫరా పరిస్థితి త్వరగా సాధారణ స్థితికి రాకపోతే ఇండక్షన్ స్టవ్‌లకు డిమాండ్ మరింత పెరిగే అవకాశం ఉంది. ఇదే సమయంలో విద్యుత్ ఆధారిత వంట పరికరాల మార్కెట్ కూడా మరింత విస్తరించే అవకాశాలు ఉన్నాయని పరిశ్రమ వర్గాలు భావిస్తున్నాయి.