బిర్యానీలో లెగ్‌పీస్‌ లేదు.. ప‌ద్ద‌తి ఇదేనా కేటీఆర్‌?

అన్నీ తిని చూడు.. బిర్యానీ తినిచూడు. తేడా ఏంటో.. ఆ టేస్ట్ ఏంటో మీకే తెలుస్తుంది. అందుకే, ప‌ప్పు నుంచి పిజ్జా వ‌ర‌కూ ఎన్నిర‌కాల ఆహార ప‌దార్థాలు ఉన్నా.. వాట‌న్నింటిలోకి రారాజు బిర్యానీ. అందులోనూ చికెన్ బిర్యానీ టేస్టే సెప‌రేటు. ఆ చికెన్ బిర్యానీలోనూ లెగ్‌పీస్ వ‌స్తే ఆ మాజానే వేరు. అందుకే, లెగ్‌పీస్ బిర్యానీ కోసం ఫుల్ డిమాండ్‌. హోట‌ల్‌కి వెళితే లెగ్‌పీస్ బిర్యానీనే కావాలంటారు అంతా. ఇక‌, ఆన్‌లైన్లో చికెన్ బిర్యానీ ఆర్డ‌ర్ పెడితే.. లెగ్‌పీస్ కోసం స్పెష‌ల్‌గా రిక్వెస్ట్ చేస్తుంటారు చాలామంది. ఇక, డ‌బుల్ మాసాలా అడిగేవారూ ఎక్కువే. లేటెస్ట్‌గా, లాక్‌డౌన్ టైమ్‌లో ఓ యువకుడు జొమాటోలో చికెన్ లెగ్‌పీస్ బిర్యానీ విత్ ఎక్స్‌ట్రా మ‌సాలా.. ఆర్డ‌ర్ చేశాడు. కానీ, అత‌నికి లెగ్‌పీస్ రాలేదు, డ‌బుల్ మాసాలా కూడా ఇవ్వ‌లేదు. దీంతో.. అత‌గాడికి చిర్రెత్తుకొచ్చింది.. త‌న‌కు జ‌రిగిన అన్యాయాన్ని మంత్రి కేటీఆర్‌కు ట్విటర్‌లో కంప్లైంట్ చేశాడు, ఆ ట్వీట్‌కు కేటీఆర్ సైతం రిప్లై ఇచ్చాడు. ఆ రెండు ట్వీట్లు ఇప్పుడు సోష‌ల్ మీడియాలో వైర‌ల్ అయ్యాయి.

సోషల్ మీడియాలో తెలంగాణ మంత్రి కేటీఆర్ ఎంత యాక్టివ్ గా ఉంటారో ప్రత్యేకంగా చెప్పనక్కర్లేదు. సాయం కోరుతూ తనను ట్యాగ్ చేసిన ప్రతి ఒక్కరికీ వ్యక్తిగతంగా బదులిచ్చేందుకు ప్రయత్నిస్తుంటారు. ఏదైనా కష్టం వచ్చి కేటీఆర్ ను సంప్రదిస్తే ఫర్వాలేదు కానీ, బిర్యానీలో మసాలా తక్కువైందంటూ ఓ నెటిజన్ తనను ట్యాగ్ చేయడంతో ఆయన అవాక్క‌య్యారు. 

తోటకూరి రఘుపతి అనే వ్యక్తి  తాను జొమాటో ద్వారా చికెన్ బిర్యానీ ఆర్డర్ చేశానని తెలిపాడు. ఎక్స్ ట్రా మసాలా, లెగ్ పీస్ తో బిర్యానీ కావాలని తాను ఆర్డర్ చేస్తే, అవేవీ లేకుండానే తనకు చికెన్ బిర్యానీ డెలివరీ ఇచ్చారని ఆ వ్యక్తి వాపోయాడు. జొమాటో వాళ్లు ప్రజలకు ఇలాగేనా సేవ చేసేది? అంటూ ఆ వ్యక్తి మంత్రి కేటీఆర్ ను ట్విట్టర్ లో ట్యాగ్ చేశారు.

దీనిపై కేటీఆర్ వెంటనే స్పందించారు. దీనికి నన్నెందుకు ట్యాగ్ చేయడం బ్రదర్? ఈ విషయంలో నా నుంచి మీరు ఏం ఆశిస్తున్నారు? అని ప్రశ్నించారు. నెట్టింట ఈ వ్యాఖ్యలు వైరల్ గా మారాయి. వేల సంఖ్యలో లైకులు, వందల సంఖ్యలో రీట్వీట్లు వస్తున్నాయి.

అన్నింటికీ మించి, ఎంఐఎం అధినేత అసదుద్దీన్ ఒవైసీ కూడా ఈ ట్వీట్‌పై కామెంట్ చేశాడు. తన కార్యాలయం వెంటనే ఈ విషయంలో చర్యలు తీసుకుంటుందని కేటీఆర్ స్పందించాల్సిందేనని.. స్మైలీ ఎమోజీ జతచేశారు ఓవైసీ. కాసేపటి తర్వాత ఆ యువకుడు తన ట్వీట్‌ను తొలగించాడు.