ఊహించినట్లే ఉస్మానియా విద్యార్ధులు పంతానికి పోయి హైకోర్టు మరియు విశ్వవిద్యాలయ రిజిస్ట్రార్ ఆదేశాలను ధిక్కరిస్తూ బీఫ్ ఫెస్టివల్ నిర్వహించారు. ఆ కార్యక్రమంలో పాల్గొన్న 12 మంది విద్యార్ధులను పోలీసులు అరెస్ట్ చేసారు. బీఫ్ ఫెస్టివల్ నిర్వహించినందున వారు వేరే వర్గం మీద విజయం సాధించిన అనుభూతి పొందుతుండవచ్చును. కానీ ఆ అనుభూతికి చాలా బారీ మూల్యం చెల్లించవలసి వస్తుంది. కోర్టు ధిక్కారానికి పాల్పడినందుకు వారికి శిక్ష తప్పకపోవచ్చును. అలాగే తమ విశ్వవిద్యాలయ ఆదేశాలను ధిక్కరించినందుకు వారి అడ్మిషన్లు రద్దయ్యే అవకాశం ఉంది. ఈ రెండు జరిగినట్లయితే వారి చదువులు, భవిష్యత్ దెబ్బ తినే ప్రమాదం ఉంది. కనుక హైకోర్టు మరియు విశ్వవిద్యాలయం ఈ విషయాన్ని పరిగణనలోకి తీసుకొని ఆ విద్యార్ధులను క్షమించి వదిలిపెడితే బాగుంటుంది. లేకుంటే వారి భవిష్యత్ అగమ్యగోచరంగా మారే ప్రమాదం ఉంది. దేశంలో ప్రధాన మంత్రి అంత వ్యక్తే చట్టానికి కట్టుబడి ఉంటునప్పుడు విద్యార్ధులు తాము చట్టానికి అతీతులమని భావిస్తూ ఇటువంటి పనులకు పూనుకొంటే చివరికి నష్టపోయేది వాళ్ళే. కనుక ఇంతటితో ఈ అనవసరమయిన రాద్ధాంతానికి స్వస్తి పలికి చదువులపై దృష్టి పెడితే మంచిది.