Home  
Politics

గందరగోళ౦గా తెలంగాణ ఆమోదం సరికాదు: జైరాం

      తెలంగాణ బిల్లును గందరగోళ పరిస్థితుల మధ్య ఆమోదించడం సరికాదని, ముఖ్యమైన బిల్లులపై సభలో తప్పనిసరిగా చర్చ జరగాలని కేంద్ర మంత్రి, జీవోఎం సభ్యుడు జైరాం రమేశ్ అభిప్రాయపడ్డారు. తెలంగాణ బిల్లుపై ఏకపక్షంగా వెళ్లడం సాధ్యం కాదని, బీజేపీతో కలిసి విస్తృత ఏకాభిప్రాయాన్ని కూడగట్టాల్సి ఉందని తెలిపారు. ఇప్పుడు బిల్లును అమోదించుకోవడానికి నాలుగు రోజులే సమయం మిగిలివుందని, అయినా బిల్లు ఆమోదానికి కావలిసిన మద్దతును కూడగడతామన్న విశ్వాసం తనకు ఉందని జైరాం రమేశ్ తెలిపారు. ఇప్పటికే హోం మంత్రి షిండేతో మాట్లాడానని, బిల్లు ప్రవేశపెట్టామని ఆయన స్పష్టం చేశారని, కమల్‌నాథ్ కూడా ఇదే విషయం చెప్పారని జైరాం తెలిపారు. ముఖ్యమంత్రి కిరణ్ కుమార్ రెడ్డిపైన జైరాం రమేశ్ మండిపడ్డారు. నాకు తెలిసినంత వరకు పార్టీ క్రమశిక్షణకు సంబంధించిన లక్ష్మణ రేఖను ఆయన దాటేశాడని వ్యాఖ్యానించారు.

చిదంబరంకు రక్షణగా తమిళ ఎంపీలు

  లోక్ సభలో గందరగోళం మరింత ఎక్కువయ్యింది. సీమాంధ్ర మంత్రులు నిరసన తెలుపుతూ వెల్ లోకి వెళ్లి ఆందోళనలు చేస్తున్నారు. వెల్ లోకి మంత్రులు చిరంజీవి, పురందరేశ్వరి, కావూరి, కోట్ల వెళ్లారు. సీమాంద్ర మంత్రుల నిరసన సమయంలో కేంద్ర ఆర్థిక మంత్రి చిదంబరంకు రక్షణగా తమిళ ఎంపీలు ఉన్నారు.

త్వరలోనే ధరలు దిగివస్తాయి : చిదంబరం

  నేడు లోక్ సభ సమావేశాలు ప్రారంభమయ్యాయి. సమావేశాలు ప్రారంభం కాగానే సీమాంధ్ర ఎంపీలు సభలో నిరసనకు దిగారు. సమైక్యాంద్ర నినాదాలు చేస్తూ వెల్ లోకి వెళ్లి ఆందోళన చేపట్టారు. సీమాంధ్ర ఎంపీల నిరసనల మధ్యనే కేంద్ర ఆర్థిక మంత్రి చిదంబరం మధ్యంతర బడ్జెట్ ను ప్రవేశపెట్టారు. ప్రస్తుతం చిదంబరం బడ్జెట్ ప్రసంగం కొనసాగుతుంది. త్వరలోనే ధరలు దిగివస్తాయని, ఆహార ఉత్పత్తులు పెరిగాయి. కష్టపడి పనిచేయడం వల్లే వృద్ధిరేటు పెరిగింది. బ్యాంకింగ్ రంగంపై ఒత్తిడి తగ్గించేందుకు చర్యలు తీసుకుంటామని,ప్రభుత్వ రంగంలో 10లక్షల ఉద్యోగాలు. దేశంలో 50వేల మెగావాట్ల విద్యుత్ ప్రాజెక్టులు నిర్మాణంలో ఉన్నాయి. అలాగే కొత్తగా 7 విమానాశ్రయాలు నిర్మాణంలో ఉన్నాయని ఆయన అన్నారు.

పార్లమెంట్లో చిదంబరం బడ్జెట్...గందరగోళం

      స్పీకర్ మీరా కుమార్ అధ్యక్షతన పార్లమెంటు సమావేశాలు ప్రారంభమయ్యాయి. చిదంబరం స్పీకర్ కు సీరియల్ నెం. 1 ఒట్ ఆన్ అకౌంట్ బడ్జెట్ పై బిల్లు ప్రవేశపెడుతున్నట్టు స్పీకర్ కు తెలిపారు. అలాగే గులాం నబీ ఆజాద్ కూడా సీరియల్ నెం. 2 గా తెలంగాణా ప్రత్యేక రాష్ట్రం బిల్లును ప్రవేశపెడుతున్నట్టు తెలిపారు. చిదంబరం ఒట్ ఆన్ అకౌంట్ బడ్జెట్ ప్రవేశపెడుతున్నారు. పార్లమెంటు ప్రారంభమైన కొద్ది నిముషాలలోనే సమైక్య నినాదాలతో సీమాంధ్ర ఎంపిలు, మంత్రులు కావూరి, పురందేశ్వరి వెల్ లోకి దూసుకెళ్లారు. సమైక్యాంధ్ర ప్లే కార్డ్ లు పట్టుకుని నినాదాలు చేస్తున్నా పట్టించుకోకుండా చిదంబరం తన ఒట్ ఆన్ అకౌంట్ బడ్జెట్ ను సభలో ప్రవేశ పెడుతున్నారు. స్పీకర్ సభ్యులను పలుమార్లు సహకరించాలని కోరినా వుయ్ వాంట్ జస్టీస్ అంటూ సీమాంధ్ర మంత్రులు, ఎంపిలు నినాదాలతో సభలో గందరగోళం సృష్టిస్తున్నారు.

ఢిల్లీ లో ఏపీఎన్జీవో నేత గుండె పోటుతో మృతి

      ఢిల్లీలో రామ్ లీలా మైదానంలో జరుగుతున్న ఏపీఎన్జీవోల సమైక్యాంధ్ర ఉద్యమంలో ఒక విషాద సంఘటన జరిగింది. ఢిల్లీలో జరుగుతున్న పరిణామాలకు కలత చెందిన నెల్లూరు జిల్లాకు చెందిన ఎపిఎన్.జి.వో. ఉపాధ్యక్షుడు దామోదర్ జోషి గుండెపోటుకు గురయ్యారు. సహచరులు ఆయనను హాస్పిటల్ కు చేర్చేలోపే ఆయన మృతి చెందారు.

ఢిల్లీలో ఆంధ్రప్రదేశ్ ఉత్కంఠ

  ఢిల్లీలోని రాంలీల మైదానంలో రెండు రోజులపాటు జరిగే "సేవ్ ఆంధ్రప్రదేశ్" సభకు అన్ని ఏర్పాట్లు పూర్తయ్యాయి. ఈ సందర్భంగా సమైక్యాంధ్ర పరిరక్షణ సమితి అధ్యక్షుడు అశోక్ బాబు మాట్లాడుతూ.... కేంద్ర ప్రభుత్వం ఎంత దుర్మార్గంగా విభజన బిల్లు పెట్టిందో జాతీయ పార్టీలకు తెలపడానికే ఈ సభ నిర్వహించబోతున్నాం అని అన్నారు. రెండు రోజుల పాటు జరిగే ఈ సభకు సుమారు 15 నుంచి 20 వేల మంది హాజరవుతారని, ఇది పూర్తిగా శాంతియుత వాతావరణంలోనే తమ నిరసన తెలుపుతామని ప్రభుత్వానికి హామీ ఇస్తున్నామన్నారు. అయితే ఇప్పటికే ఈ సభ మొత్తం కూడా సమైక్యాంద్ర శ్రేణులతో నిండిపోయింది. ఢిల్లీలో ప్రస్తుత పరిస్థితి చాలా వేడిగా ఉండి. ఈ క్రమంలో ఎవరు ఎలాంటి నిర్ణయాలు తీసుకుంటారో, ఎవరు ఎలా స్పందిస్తారో అనే విషయాలపై సర్వత్రా ఉత్కంఠ నెలకొంది.

ఆ విషయంపై మీరా గరం గరం

      లోక్ సభలో తెలంగాణా కాంగ్రెస్ యంపీలను అడ్డుకొనేందుకు యంపీ లగడపాటి రాజగోపాల్ పెప్పర్ స్ప్రే వాడిన సంగతి అందరికి తెలిసిందే. అయితే ఈ విషయంపై స్పీకర్ మీరాకుమార్ స్పందించారు. దీనికి సంబంధించిన విషయాలను పరిశీలించి నివేదిక ఇవ్వాలని ఆమె సభాహక్కుల కమిటీకి నివేదించారు. సభా వ్యవహారాలు, ప్రవర్తనా నియమావళిలోని 227 నిబంధన కింద ఆమె ఈమేరకు నివేదించారని లోక్ సభ సెక్రటేరియట్ ఓ ప్రకటనలో తెలిపింది. ఇలాంటి పరిణామాలు మరోసారి జరగకుండా భద్రత కమీటి అత్యాధునిక సాంకేతిక పరికరాలను, మెటల్ డిటెక్టర్లను అమర్చారు. ప్రతిఒక్కదానినీ తనిఖీ చేశాకే లోపలికి అనుమతిస్తున్నారు.

చెకప్ తర్వాతే లోపలికి ...

      నేడు పార్లమెంటులో ఆర్థికశాఖ మంత్రి చిదంబరం ఒట్ ఆన్ అకౌంట్ ను ఉదయం 11గంటలకు ప్రవేశ పెట్టబోతున్నారు. చిదంబరం 9వసారి బడ్జెట్ ను ప్రవేశపెట్టబోతున్నారు. పార్లమెంటులో జరిగిన "పెప్పర్ స్ప్రే'' లాంటి ఘటనలు తిరిగి జరగకుండా పార్లమెంటు సెక్యూరిటీ ఎం.పి.లను తనిఖీ చేసిన తరువాతే లోపలికి అనుమతిస్తున్నారు. సీమాంధ్ర ఎంపిల సస్పెన్షన్ వేటు ఆపివేయాలని సీమాంధ్ర ఎంపిలు బిజెపి అగ్రనాయకుడు అద్వానీతో ప్రేత్యేకంగా సమావేశం అయ్యారు.

నేడు కెసిఆర్ జన్మదినం ...

      రామ్ లీలా మైదాన్ లో నేడు ఎ.పి.ఎన్.జీ.వో.ల సమైక్యాంద్ర సభ తలపెట్టింది. దీనికి ఆంధ్రప్రదేశ్ నలుమూలలనుండి ఎపిఎన్.జి.వో. లు విద్యార్థి జెఎసి నాయకులు విద్యార్థులు భారీగా తరలి వచ్చారు. అలాగే నేడు కెసిఆర్ జన్మదినం సందర్భంగా ఇటు తెలంగాణా నుండి కూడా కార్యకర్తలు జెఎసి నాయకులు తుగ్లక్ రోడ్డులోని కెసిఆర్ ఇంటికి వెళ్ళి ఆయనకు శుభాకాంక్షలు అందజేయనున్నారు. దీంతో ఏ సమయంలో ఎలాంటి గొడవలు తలెత్తుతాయోనని ఢిల్లీ పోలీసులు అప్రమత్తమయ్యారు. ఇప్పటికే రామ్ లీలా మైదాన్ సమైక్యాంధ్ర కార్యకర్తలు, ఎపిఎన్.జి.వో.లతో నిండిపోయింది.

సోనియా 'ఇటాలియన్ గాడ్సే'

      తెలుగుజాతి మధ్య విభజన చిచ్చు పెట్టి, కుట్ర రాజకీయాలకు పాల్పడుతున్న సోనియాని గాంధీ అనాలా? గాడ్సే అనాలా? అని టిడిపి అధ్యక్షుడు చంద్రబాబు నాయుడు ప్రశించారు. తాడేపల్లిగూడెంలో జరిగిన 'ప్రజాగర్జన' సభలో పాల్గొన్న బాబు సోనియా గాంధీ, కాంగ్రెస్ పై నిప్పులు కురిపించారు. తెలుగుజాతి మధ్య చిచ్చు పెట్టి, కుట్రలు పన్ని రాజకీయాలు చేస్తున్నారని మండిపడ్డారు. విభజన సమస్యను సామరస్యంగా పరిష్కరించాల్సింది పోయి...ఇష్టానుసారంగా వ్యవహరిస్తూ రాజ్యాంగ ఉల్లంఘనకు పాల్పడుతున్నారని మండిపడ్డారు. మన్మోహన్ అసమర్థ ప్రధాని అని, సోనియా చేతిలో రోబోలాంటివాడని,ఆమె ఏమి చెబితే అది చేస్తాడని దుయ్యబట్టారు. రిపబ్లిక్ డే నాడు రాష్ట్రపతి మాట్లాడుతూ... చిన్న రాష్ట్రాలు కావాలంటున్నారు, కానీ, బలవంతం చేయడానికి వీలులేదన్నారు. మరి ఇప్పుడు సోనియా ఏమి చేశారు? రాష్ట్రపతి ఎందుకు ఏమీ చేయలేకపోయారు? అని ప్రశ్నించారు. కొత్తగా వచ్చాడో సైకో, తెలంగాణలో పార్టీని మూసేసి ఇప్పుడు సోనియావాదాన్ని పట్టుకు తిరుగుతున్నారు అని జగన్‌ను ఎద్దేవా చేశారు. కాంగ్రెస్, వైఎస్సార్ కాంగ్రెస్, టీఆర్ఎస్‌లు ఒక కుట్రలో భాగంగా చేరాయని ఆరోపించారు. వచ్చె ఎన్నికల్లో వైకాపా, టీఆర్ఎస్ పార్టీలకు ప్రజలు బుద్ది చెబుతారని జోస్యం చెప్పారు.  ప్రజాగర్జనకు జిల్లా నలుమూలల నుంచి వేలాది మంది తరలివచ్చారు. చంద్రబాబు ప్రసంగాన్ని ఆసాంతం విన్నారు. పదునైన విమర్శలు చేస్తున్నప్పుడు హర్షధ్వానాలు చేశారు.

ఢిల్లీలో రాష్ట్రపతి పాలన

      ఢిల్లీలో రాష్ట్రపతి పాలనకు కేంద్ర మంత్రివర్గం ఆమోదం తెలిపింది. ఢిల్లీ అసెంబ్లీని సుప్తచేతనావస్థలో ఉంచాలని పేర్కొంది. ముఖ్యమంత్రి పదవికి కేజ్రీవాల్ రాజీనామా చేసిన తరువాత ఏ పార్టీ ప్రభుత్వం ఏర్పాటు చేసే స్థితిలో లేదని గవర్నర్ నజీబ్ జంగ్ కేంద్రానికి తెలియజేశారు. కేజ్రీవాల్ రాజీనామా అనంతరం అసెంబ్లీని రద్దు చేసి మళ్ళీ ఎన్నికలలు నిర్వహించాలని విజ్ఞప్తి చేసిన గవర్నర్ పట్టించుకోలేదు. అసెంబ్లీని రద్దు కాకుండా..రాష్ట్రపతి పాలన విధించాలని కేంద్రానికి సిపారసు చేశారు. గవర్నర్ నజీబ్ జంగ్ సిపారసు కేజ్రీవాల్ తప్పుబట్టారు. మెజారిటీ ఉన్న ప్రభుత్వ నిర్ణయానికి గవర్నర్ కట్టుబడి ఉండాలన్న రాజ్యాంగ నిబంధనను ఉల్లంఘించారని మండిపడ్డారు. ఢిల్లీలో ఎన్నికలు జరగాలని కాంగ్రెస్ పార్టీ కోరుకోవడంలేదని, అందుకే రాష్ట్రపతి పాలనకు కేంద్రమంత్రివర్గం  ఆమోదం తెలిపిందని ఆరోపించారు. 

లోక్ సభ ఎన్నికలకు 'ఆమ్ ఆద్మీ' సిద్ధం

      లోక్ పాల్ బిల్లు కోసం ఢిల్లీలో అధికారాన్ని వదులుకున్న ఆమ్ ఆద్మీ పార్టీ లోక్ సభ ఎన్నికలపై దృష్టి పెట్టింది. దేశవ్యాప్తంగా లోక్ సభ ఎన్నికల్లో పోటీ చేసి కాంగ్రెస్, బీజేపీలకు గుణపాఠ౦ చెప్పాలని భావిస్తోంది. కేజ్రీవాల్ నేతృత్వంలో లోక్ సభ ఎన్నికల బరిలోకి దిగబోతున్నామని ఆ పార్టీ నేత యోగేంద్ర యాదవ్ తెలిపారు. 'ఝాడూ చలావ్‌యాత్ర' పేరుతో ఈ నెల 23 నుంచి దేశంలోని లోక్ సభ నియోజకవర్గాల ప్రచార హోరుకు ఆప్‌వర్గాలు సిద్దమవుతున్నాయి. అవినీతిపై కాంగ్రెస్, బీజేపీల తీరును ఎండగట్టేందుకు ఆప్ సిద్ధమవుతోంది. కాంగ్రెస్, బీజేపీల వల్లే తమ ప్రభుత్వం కుప్పకూలిందని ఆప్ నేత ప్రశాంత్ భూషణ్ మండిపడ్డారు. జన్‌లోక్‌పాల్‌ను అమలు చేయడమే తమ ప్రాధాన్యాంశమని, ఆ బిల్లునే అడ్డుకున్న తర్వాత అధికారంలో ఉండి ప్రయోజనం లేదని ఆయన అన్నారు.

వీరు త్యాగమూర్తులేనా?

  శాసనసభ తిరస్కరించిన తెలంగాణా బిల్లుని యధాతధంగా పార్లమెంటులో ప్రవేశపెడితే రాజకీయ సన్యాసం చేస్తానని భీకర ప్రతిజ్ఞ చేసిన ముఖ్యమంత్రి కిరణ్ కుమార్ రెడ్డి ఇంకా ‘లాస్ట్ బాల్స్’ మిగిలే ఉన్నాయని చెప్పడంతో ఆయన మరికొంత కాలం పదవిలో కొనసాగుతారని స్పష్టమయింది. కానీ మహాయితే మరో రెండు మూడు రోజులు మాత్రమే కొనసాగుతారని ఆయన సన్నిహితుడు మరియు క్యాబినేట్ మంత్రి గంటా శ్రీనివాసరావు ఈ రోజు మీడియాకు తెలిపారు. ఆయన కొత్త పార్టీ పెడతారా లేక రాజకీయ సన్యాసం తీసుకొంటారా లేకపోతే మంత్రి కొండ్రు మురళి చెప్పినట్లుగా కాంగ్రెస్ పార్టీలోనే కొనసాగుతారా? అనే విషయంపై రేపు సీమాంధ్ర నేతలతో జరుగబోయే సమావేశంలో ఒక నిర్ణయం తీసుకోవచ్చును.   ఆయన మిగిలిన సీమాంధ్ర కాంగ్రెస్ నేతలందరూ కలిసి రాష్ట్రాన్ని సమైక్యంగా ఉంచేందుకు చాలా గట్టిగా ప్రయత్నించి విఫలమయినట్లు ప్రజలందరికీ నమ్మకం కలిగించాగాలిగారు. కానీ, విభజన జరుగుతోందని చాలా ముందే వీరందరికీ తెలిసి ఉన్నపటికీ ఎవరూ ఆపే ప్రయత్నం చేయకుండా, అందరూ సమైక్యంగా విభజన బిల్లుని జాగ్రత్తగా పార్లమెంటుకు చేర్చి ఇప్పుడు సమైక్యహీరోలుగా, తమ పదవీ కాలం పూర్తయ్యేవరకు కూడా పదవులలో కొనసాగి, ఇప్పుడు ఎన్నికల ముందు పదవులను, పార్టీని కూడా వదులుకొన్న త్యాగమూర్తులుగా ప్రజల ముందుకు వచ్చి ఓట్లు అడగబోతున్నారు. మరి వీరందరూ త్యాగ మూర్తులే అయితే మళ్ళీ ఎన్నికలలో పోటీ చేయడం ఎందుకు? ప్రజలని ఓట్లు కోసం అర్ధించడం ఎందుకు? అని ఆలోచిస్తే వీరి త్యాగాలు దేనికో అర్ధమవుతాయి. పార్లమెంటులో బిల్లు ఆమోదం పొందేవరకు ఓపికగా వేచిచూచిన తరువాత, కొత్తపార్టీలు పెట్టుకోనో లేకపోతే వేరే పార్టీ కండువా కప్పుకోనో ప్రజల ముందుకు వచ్చి రాష్ట్ర విభజన చేసిన కాంగ్రెస్ పార్టీని తిడుతూ ప్రజలలో ఉన్న కాంగ్రెస్ వ్యతిరేఖతను, రాష్ట్రం విడిపోయిందనే వారి ఆవేదనను తమకు అనుకూలంగా మార్చుకొని మళ్ళీ అధికారంలోకి రావడానికే ఈ తిప్పలన్నీ. పోనీ వీరిని నమ్మి ఓటేస్తే మళ్ళీ వీళ్ళు అదే కాంగ్రెస్ పార్టీలో చేరరని నమ్మకమేమిటి? ప్రజలే ఆలోచించుకొని ఓటేయాలి.       

గూడెంలో చంద్రబాబు ప్రజాఘర్జన

  తెదేపా అధ్యక్షుడు చంద్రబాబునాయుడు మళ్ళీ ‘ప్రజాగర్జన’ సభలు నిర్వహించనున్నారు. మొదటగా ఈరోజు పశ్చిమ గోదావరి జిల్లాలో తాడేపల్లిగూడెంలో సభ నిర్వహించనున్నారు. రాష్ట్ర విభజన బిల్లుపై మరొక రెండు మూడు రోజుల్లో పార్లమెంటు కీలకమయిన నిర్ణయం తీసుకోనున్నఈ తరుణంలో ఆయన ఈ సభ నిర్వహించడం ఆయన రాజకీయ చతురతకి అద్దం పడుతోంది. విభజన బిల్లుపై కాంగ్రెస్ అధిష్టానం వ్యవహరిస్తున్న తీరుతో తీవ్ర ఆగ్రహంగా ఉన్న సీమాంధ్ర ప్రజల మనోభావాలు ప్రతిబింబిస్తూ ఆయన ప్రసంగం సాగవచ్చును గనుక, వారి నుండి మంచి స్పందనే ఉంటుంది. పైగా అదే జిల్లాకు చెందిన కొత్తపేట కాంగ్రెస్ శాసనసభ్యుడు బండారు సత్యానంద రావు రాష్ట్ర విభజన నిర్ణయాన్ని నిరసిస్తూ కాంగ్రెస్ ను వీడి ఈ సభలోనే చంద్రబాబు సమక్షంలో తెదేపాలో చేరనున్నారు కనుక, చంద్రబాబు చేసే ఆరోపణలు కేవలం ఆరోపణలు కాక వాస్తవాలని ద్రువీకరించినట్లవుతుంది. రాష్ట్ర విభజన విషయంలో కాంగ్రెస్ అధిష్టానం ఎవరెవరితో కలిసి ఏవిధంగా కుట్రలు పన్నుతోందో ఈ సభలో సత్యానందరావు చేతనే చెప్పించిన తరువాత తెలుగుదేశం పార్టీకి కాక మరే ఇతర పార్టీకి ఓటేసినా అది తిరిగి కాంగ్రెస్ ఖాతాలోనే జమా అవుతుందని చంద్రబాబు ప్రజలకు నచ్చజెప్పే ప్రయత్నం చేయవచ్చును.

19న తెలంగాణ బిల్లు ఆమోదం..!!

      లోక్ సభలో గందరగోళ పరిస్థితుల మధ్య నాటకీయంగా బిల్లును ప్రవేశపెట్టిన కాంగ్రెస్ అధిష్టానం, దానిని ఆమోదింపజేసుకోనేందుకు కొత్త వ్యూహాలను రచిస్తున్నట్లు సమాచారం. మూడు రోజులు సెలవుల అనంతరం సోమవారం ప్రారంభంకానున్న పార్లమెంట్ సమావేశాలలో ఓటాన్‌ అకౌంట్‌ బడ్జెట్‌ను కేంద్రం ప్రవేశపట్టనుంది. బడ్జెట్‌ సమావేశానికి సీమాంధ్ర ఎంపీలు అడ్డుతగిలినా..చెప్పాల్సిన నాలుగు ముక్కలు చెప్పేసి తన ప్రసంగాన్ని ఆర్ధిక మంత్రి ముగించేయాలని చూస్తున్నారు. ముఖ్యమైన బిల్లుల ఆమోదం అనంతరం 19న లోక్ సభలో తెలంగాణ బిల్లుపై చర్చించి వెంటనే ఆమోదింపజేసుకోనేందుకు కేంద్రం కొత్త ప్రణాళికను రూపొందిస్తున్నట్లు తెలుస్తోంది. ఓటాన్‌ అకౌంట్‌ సమావేశాలు ముగిసేలోపే ఉభయసభల్లో బిల్లును పాస్ చేసేందుకు ప్లాన్ చేస్తుంది. టీఆర్ఎస్ అధినేత కెసిఆర్ కూడా తమ నేతలకు ఈ మేరకు సూచనలు కూడా ఇచ్చారు. ఈ నెల 19 లోగా పార్లమెంట్‌లో టీ బిల్లు ఆమోదం పొందుతుందని, దానికి అవసరమైన సహకారాన్ని అందరూ అందించాలని అన్నారు. సోనియా గాంధీ తెలంగాణ పై సిన్సియర్ గా వున్నారని, మజువాణి ఓటుతో బిల్లు ఆమోదం పొందే అవకాశాలు కనిపిస్తున్నాయని అన్నారు. బిల్లు ఆమోదానికి తీవ్రంగా కృషి చేద్దాం. తెలంగాణ రాష్ట్రంలోనే అడుగుపెడతానని చెప్పినట్లు సమాచారం. 

సీఎం పదవికి కేజ్రీవాల్ రాజీనామా

      ఢిల్లీ ముఖ్యమంత్రి అరవింద్ కేజ్రీవాల్ తన పదవికి రాజీనామా చేశారు. అసెంబ్లీలో జన్‌లోక్‌పాల్ బిల్లును ప్రవేశపెట్టేందుకు ప్రయత్నించిన కేజ్రీవాల్‌కు ఎదురుదెబ్బ తగలడంతో సీఎం పదవికి రాజీనామా చేశారు. జన్‌లోక్‌పాల్ బిల్లును అసెంబ్లీలో ప్రవేశపెట్టాలంటే ముందుగా కేంద్రం అనుమతి తీసుకోవాలని కేంద్ర న్యాయ శాఖ చెప్పింది. అయితే ఈ విషయంలో వెనక్కి తగ్గేది లేదని తేల్చి చెప్పిన ఆమ్ ఆద్మీ పార్టీ సర్కారు అసెంబ్లీలో బిల్లు పెడుతున్నట్లు ప్రకటించింది. దీంతో కాంగ్రెస్, బీజేపీలు సభలో గందరగోళం సృష్టించాయి. గవర్నర్ సూచనపై ఓటింగ్ నిర్వహించాలని కూడా డిమాండ్ చేశాయి. బిల్లును ప్రవేశపెట్టే తీర్మానానంపై స్పీకర్ ఓటింగ్ నిర్వహించారు. దీనికి 42 మంది వ్యతిరేకంగా, 27 మంది అనుకూలంగా ఓటు వేశారు.  దీంతో మెజారిటీ సభ్యులు వ్యతిరేకిస్తున్నందున బిల్లును అనుమతించడం లేదని స్పీకర్ ప్రకటించారు. అసెంబ్లీలో ప్రవేశపెట్టలేకపోవడంతో ఆయన మనస్తాపం చెందారు. తమ ప్రధాన లక్ష్యాన్నే చేరుకోలేనప్పుడు ఇక అధికారంలో ఉండటం అర్థ రహితమని భావించిన కేజ్రీవాల్ తన పదవికి రాజీనామా చేశారు.

విజయానికి చేరువలో బీజేపీ: టైమ్స్ సర్వే రిపోర్ట్

  కాంగ్రెస్ మళ్ళీ అధికారం చేజికించుకొంటే రాహుల్ గాంధీ, బీజేపీ గెలిస్తే నరేంద్ర మోడీ ప్రధానమంత్రి అవుతారనే విషయం నిర్ధారణ అవడంతో ప్రజలకు, మీడియాకు కూడా ఎన్నికల పట్ల, ఆయా పార్టీల విజయావకాశాల పట్ల ఆసక్తి పెరిగింది. కాంగ్రెస్, బీజేపీలు మీడియాలో పెద్ద ఎత్తున ప్రచార యుద్ధం కూడా పెద్ద ఎత్తున మొదలుపెట్టడంతో ఆ ఆసక్తి మరింత పెరిగింది. అందుకే నిత్యం ఏదో ఒక మీడియా సంస్థ ఎన్నికలు సర్వేలు నిర్వహిస్తూ నివేదికలు ప్రకటిస్తున్నాయి. అయితే ఇంతవరకు వెలువడిన దాదాపు డజనుపైగా సర్వే నివేదికలలో ఏ ఒక్కటి కూడా కాంగ్రెస్ గెలుస్తుందని కానీ, కనీసం గెలిచే అవకాశముందని కానీ ద్రువీకరించకపోవడం విశేషం. తాజాగా టైమ్స్-సి ఓటర్ సంస్థ నిర్వహించిన సర్వేలో కూడా బీజేపీ నేతృత్వంలో ఎన్డీయే కూటమి ఎన్నికలలో గెలిచే అవకాశం ఉందని మరోమారు ద్రువీకరించింది.   ఆ నివేదిక ప్రకారం త్వరలో జరుగనున్నఎన్నికలలో కాంగ్రెస్ పార్టీ కేవలం 89 సీట్లు, బీజేపీ 202 సాధించుకొనే అవకాశమున్నట్లు ప్రకటించింది. అంటే కాంగ్రెస్ పార్టీకి ప్రస్తుతం ఉన్న206 సీట్లలో సగానికి పైగా కోల్పోబోతుంటే, 112 సీట్లుగల బీజేపీ దాదాపు రెట్టింపు సీట్లు స్వంతంగా గెలుచుకోబోతోంది. ఇక ప్రస్తుతం 259 సీట్లున్న కాంగ్రెస్ నేతృత్వంలో యూపీఏ కూటమి కేవలం 101 సీట్లతో సరి పెట్టుకోవలసి వస్తే, 159సీట్లుగల బీజేపీ నేతృత్వంలో ఎన్డీయే కూటమికి 227 సీట్లు వరకు రావచ్చని సర్వే నివేదిక స్పష్టం చేసింది.   కానీ, 543 సీట్ల లోక్ సభలో కనీసం 272 సీట్లు సాధించగలిగినప్పుడే బీజేపీ కేంద్రంలో ప్రభుత్వం ఏర్పాటు చేయగలదు. అంటే ఎన్డీయే కూటమికి ఇంకా మరో 45 సీట్లు అవసరముంటుంది. అయితే, ఎన్నికల సమయం దగ్గరపడేలోగా నరేంద్ర మోడీ ఈలోటుని కూడా క్రమంగా పూడ్చుకొనే విధంగా వ్యూహాలు అమలు చేస్తూ ప్రచారం చేయకపోరు. అదీగాక, ఇంతవరకు ఎన్డీయే కూటమిలో లేని తెదేపా, వైకాపా, తెరాస వంటి అనేక ఇతర పార్టీలు బీజేపీకి మద్దతు ఇచ్చేందుకు సిద్దంగా ఉన్నాయి గనుక బీజేపీ అవలీలగా మెజార్టీ సాధించగలదని భావించవచ్చును.   ఈ ఎన్నికలలో బీజేపీ ప్రధానంగా ఉత్తరప్రదేశ్, రాజస్థాన్, బీహార్, గుజరాత్, డిల్లీ, హర్యాన, ఛత్తీస్ ఘర్, మధ్యప్రదేశ్, మహారాష్ట్రలలో ఎక్కువ సీట్లు సాధించే అవకాశం ఉందని సర్వే నివేదిక తెలియజేస్తోంది. ఇక మన రాష్ట్రానికి సంబందించిన వరకు చూసుకొంటే, గత ఎన్నికలలో 33 సీట్లు గెలుచుకొన్న కాంగ్రెస్ పార్టీకి ఈసారి కేవలం 6సీట్లు మాత్రమే వస్తాయని అంచనా వేసింది. అందుకు కారణాలు అందరికీ తెలిసినవే.

తెలంగాణ బిల్లు పెట్టలేదు: లగడపాటి

      లోక్ సభలో హోంమంత్రి షిండే తెలంగాణ బిల్లును ప్రవేశపెట్టేటప్పుడు సభ నియమాలను పాటించలేదని ఎంపీ లగడపాటి రాజగోపాల్ మండిపడ్డారు. ఇదే విషయంపై తాము పూర్తిగా అధ్యయనం చేస్తున్నామని, త్వరలో విపక్ష పార్టీల నేతలందరికీ ఈ విషయంపై లేఖలు రాస్తామని లగడపాటి తెలిపారు. లోక్ సభలో నిన్న జరిగిన పరిణామాలు చాలా దురదృష్టకరమని అన్నారు. తన సహచర ఎంపీపై దాడి జరుగుతుంటే, తాను అడ్డుకోవడానికి వెళ్లానని, అప్పుడు వందమంది ఎంపీలు తనపై దాడికి ప్రయత్నించారని వారితో పోరాడలేక, విధిలేని పరిస్థితుల్లోనే పెప్పర్ స్ప్రేను ఉపయోగించానన్నారు. ఇలాంటి ఘటన జరిగి ఉండాల్సింది కాదన్నారు. ఘటనకు దారితీసిన పరిస్థితులను అందరూ తెలుసుకోవాల్సిన అవసరం ఉందన్నారు.

ఎంపీ కొనకళ్ల కు బైపాస్ సర్జరీ!

      లోక్ సభలో గుండెపోటుకు గురైన కృష్ణా జిల్లా మచిలీపట్నం తెలుగుదేశం పార్లమెంటు సభ్యుడు కొనకళ్ల నారాయణ ప్రమాదం నుంచి బయటపడ్డారు. ఢిల్లీలోని రామ్‌మనోహర్ లోహియా ఆస్పత్రి నుంచి శుక్రవారం ముంబైలోని అపోలో ఆస్పత్రికి తరలించారు. వైద్యులు కొనకళ్లకు బైపాస్ సర్జరీ చేయాలని చెప్పారు. అయితే సర్జరీ ఎప్పుడు చేయాలనేది ఇవాళ నిర్ణయిస్తారు. ఆర్ఎంఎల్ ఆస్పత్రిలో ఉన్న కొనకళ్లను తెలుగుదేశం పార్టీ అధినేత చంద్రబాబు నాయుడు, పార్లమెంటు సభ్యులు కెవిపి రామచందర్ రావు, ఉండవల్లి అరుణ్ కుమార్, సబ్బం హరిలతో పాటు పలువురు ఎన్జీవో నేతలు పరామర్శించారు. కొనకళ్ల ఆరగ్యో పరిస్థిపై ఆయన కుటుంబసభ్యులు ఆందోళన వ్యక్తం చేస్తున్నారు.