రాజకీయ లబ్ది కోసమే తాత్కాలిక రాజధాని... బొత్స....

  ఆంధ్రప్రదేశ్ తాత్కాలిక రాజధానిగా విజయవాడను ఏర్పాటు చేయడంపై పీసీసీ మాజీ చీఫ్ బొత్స సత్యనారాయణ అభ్యంతరం తెలిపారు. తెలుగుదేశం పార్టీలోని కొందరికి లాభం చేకూర్చడానికే తాత్కాలిక రాజధానిగా విజయవాడను ఎంపిక చేశారనిఆయన ఆరోపించారు. తాత్కాలిక రాజధానిగా హైదరాబాద్ ఉండగా మరో తాత్కాలిక రాజధాని ఎందుకు అని బొత్స ప్రశ్నించారు. అఖిలపక్ష సమావేశం నిర్వహించకుండా ప్రభుత్వం ఏకపక్ష నిర్ణయాలు తీసుకుంటోందని ఆయన అన్నారు. తాత్కాలిక రాజధాని ఏర్పాటును వ్యతిరేకిస్తూ ఏపీ ప్రభుత్వానికి లేఖ రాస్తామని బొత్స అన్నారు.

ప్రకాష్‌రాజ్‌ కారుకు ప్రమాదం...

  ప్రముఖ నటుడు ప్రకాష్‌రాజ్‌ కారుకు హైదరాబాద్‌లో ప్రమాదం జరిగింది. హైదరాబాద్‌లోని మాదాపూర్‌లో ప్రకాష్‌రాజ్ తన కారులో ప్రయాణిస్తూ వుండగా ఆయన కారును వెనుక నుంచి ఆర్టీసీ బస్సు ఢీకొట్టింది. ఈ ప్రమాదంలో ప్రకాష్ రాజ్ కారు ధ్వంసమైంది. అయితే అదృష్టవశాత్తూ ప్రకాష్ రాజ్‌కు ఎలాంటి గాయాలూ కాలేదు. ప్రకాష్ రాజ్ ప్రస్తుతం తెలుగులో ‘గోవిందుడు అందరివాడేలే’ సినిమాలో నటిస్తున్నారు. ఈ సినిమా షూటింగ్ నుంచి వస్తుండగా ఈ ప్రమాదం జరిగింది. ఈ ప్రమాదం గురించి ప్రకాష్ రాజ్ స్పందిస్తూ, ‘‘ఈ ప్రమాదం సందర్భంగా నేను షాక్‌కి గురయ్యాను. బస్సు నా కారును ఢీకొన్న సంఘటన కంటే, ఈ సందర్భంగా కొంతమంది జనం ప్రవర్తించిన తీరు నన్ను షాక్‌కి గురిచేసింది. ఆర్టీసీ బస్సు నా కారుతోపాటు ఒక ఆటోని కూడా ఢీకొంది. అక్కడ గుమికూడిన కొంతమంది యువకులు ఆటోలో వున్నవారిని కాపాడే విషయాన్ని పక్కన పెట్టేసి, సెల్ ఫోన్‌లతో నన్ను ఫొటోలు తీయడంలో నిమగ్నమయ్యారు. ఇలాంటి బాధ్యతారాహిత్యంతో వున్న యువతరాన్ని చూసి నేను నిజంగా షాక్‌కి గురయ్యాను’’ అన్నారు.

జయలలిత పథకం ‘అమ్మ బేబీ కేర్ కిట్’

  తమిళనాడు ముఖ్యమంత్రి జయలలిత మరో కొత్త పథకాన్ని ప్రారంభించారు. అమ్మ బేబీ కేర్ కిట్ పేరుతో ఈ పథకాన్ని అమలు చేస్తారు. ఇప్పటికే అమ్మ క్యాంటీన్లు, అమ్మ చౌక వస్తు సరఫరా, అమ్మ నూనె, అమ్మ మంచినీరు, అమ్మ మందుల షాపు, అమ్మ ఉప్పు, అమ్మ విత్తనాలు తదితరాలు ఉన్నాయి. కొత్తగా పుట్టిన పిల్లల కోసం ఈ ‘అమ్మ బేబీ కేర్ కిట్’ పథకాన్ని ప్రారంభించారు. శిశువులకు అవసరమయ్యే వెయ్యి రూపాయల విలువ చేసే 16 వస్తువులను ఈ పథకం ద్వారా ఇస్తారు. ఈ పథకం కారణంగా తమిళనాడు రాష్ట్రంలో ఏడు లక్షల కుటుంబాలు లబ్ది పొందనున్నాయి. ఈ పథకం కోసం 67 కోట్లను కేటాయించారు. బేబీ కేర్ కిట్‌లో టవల్, బేబీ డ్రెస్, బేబీ బెడ్, ప్రొటెక్షన్ నెట్, న్యాప్ కిన్, బేబీ ఆయిల్, షాంపూ సాచెట్, సోప్ బాక్స్, నెయిల్ క్లిప్పర్, టాయ్, ఓ గిలక్కాయ్‌తో పాటు తల్లికి లిక్విడ్ హ్యాండ్ వాష్ సోప్ వుంటాయి.

గోడకూలి ఏడుగురి మృతి

  రాజస్థాన్‌లో ఘోరం జరిగింది. గోడ కూలిన దుర్ఘటనలో ఒకే కుటుంబానికి చెందిన ఏడుగురు మరణించారు. మరో ముగ్గురు తీవ్రంగా గాయపడ్డారు. మరణించినవారిలో ముగ్గురు మహిళలు, నలుగురు బాలికలు వున్నారు. రాజస్థాన్‌లోని కల్మాంద గ్రామంలో కురిసిన భారీ వర్షాలకు ఒక భారీ గోడ కూలడంతో, ఆ గోడ పక్కనే నివాసం ఏర్పాటు చేసుకున్న కుటుంబంలో ఏడుగురు మరణించారు. గోడ పక్కన తడికలు, ప్లాస్టిక్ కాగితాలతో ఏర్పాటు చేసుకున్న తాత్కాలిక నివాసం కావడంతో ఎక్కువ సంఖ్యలో ప్రాణనష్టం జరిగింది.

ఏపీ తాత్కాలిక రాజధాని విజయవాడ...

  ఆంధ్రప్రదేశ్ రాష్ట్రానికి తాత్కాలిక రాజధానిగా విజయవాడని ఎంపిక చేశారు. మంగళవారం నాడు ఆంధ్రప్రదేశ్ రాజధాని సలహా మండలితో సమావేశమైన ముఖ్యమంత్రి చంద్రబాబు నాయుడు ఆంధ్రప్రదేశ్‌ నూతన రాజధాని నిర్మాణం జరిగేలోపు ఒక తాత్కాలిక రాజధాని వుండాల్సిన అవసరం వుందని అభిప్రాయపడ్డారు. సకల హంగులతో అంతర్జాతీయ స్థాయి నగరం నిర్మాణం జరిగేలోపు ఒక తాత్కాలిక రాజధాని అవసరమని ఆయన భావించారు. ఈ నేపథ్యంలో ఆంధ్రప్రదేశ్ తాత్కాలకి రాజధానిగా విజయవాడను ఎంపిక చేశారు. విజయవాడకు ఆంధ్రప్రదేశ్ ప్రభుత్వ శాఖాధిపతుల కార్యాలయాలను విజయవాడకు తరలించే ప్రయత్నాలు ప్రారంభమయ్యాయి. ప్రభుత్వ కార్యాలయాల ఏర్పాటుకు విజయవాడలోని గన్నవరం సమీపంలోని ఐటీపార్క్ భవన సముదాయాన్ని పరిశీలించాలని ముఖ్యమంత్రి చంద్రబాబు సూచించినట్టు తెలుస్తోంది. అలాగే విజయవాడలో అందుబాటులో వున్న భవనాలను కూడా పరిశీలించాలని ప్రభుత్వం ఆదేశాలు జారీ చేసింది.

గుంటూరు బస్సులో 70 లక్షలు చోరీ...

  గుంటూరు ఆర్టీసీ బస్టాండులో భారీ చోరీ జరిగింది. సూట్‌కేసులో 70 లక్షల రూపాయలు తీసుకెళ్తున్న ఓ ప్రయాణికుడి దృష్టి మరల్చిన దొంగలు సూట్‌కేస్‌ని మాయం చేసేశారు. గుంటూరు నుంచి నిర్మల్‌ వెళ్ళే బస్సులో ఈ సంఘటన జరిగింది. 70 లక్షల రూపాయలున్న తన సూట్‌కేస్ పోయిందని సదరు ప్రయాణికుడు గుంటూరు పోలీసులకు ఫిర్యాదు చేశారు.

తృణమూల్ ఎంపీల తుంటరితనం.. గది కోసం రగడ..

  పార్లమెంట్ ఆవరణలో తృణమూల్ కాంగ్రెస్ ఎంపీలు తమ తుంటరితనం ప్రదర్శించారు. తెలుగుదేశం పార్టీ కోసం పార్లమెంట్‌లో కేటాయించిన కార్యాలయాన్ని బలవంతంగా స్వాధీనం చేసుకున్నారు. తెలుగుదేశం పార్టీకి స్పీకర్ కేటాయించిన కార్యాలయాన్ని స్వాధీనం చేసుకోవడంతోపాటు కార్యాలయం బయట వున్న తెలుగుదేశం పార్టీకి చెందిన బోర్డులను కూడా పీకేశారు. ఈ సందర్భంగా తెలుగుదేశం పార్టీ ఎంపీలకు, తృణమూల్ కాంగ్రెస్ ఎంపీలకు మధ్య వాగ్వాదం జరిగింది. తమకు కార్యాలయం కావాలంటే స్పీకర్ని సంప్రదించాలిగానీ, ఇలా ఇతర పార్టీలకు చెందిన కార్యాలయాల మీద దాడి చేసి బలవంతంగా స్వాధీనం చేసుకోవడం ఎంతవరకు న్యాయమని తెలుగుదేశం ఎంపీలు ప్రశ్నిస్తున్నారు.

లేడీస్ ట్రైల్ రూమ్‌లో కెమెరాలు.. గుట్టు రట్టు...

  బట్టల షోరూంలోని ట్రయల్ రూంలో రహస్య కెమెరాలు అమర్చి మహిళలు దుస్తులు మార్చుకుంటున్న దృశ్యాలు రికార్డ్ చేసిన ముగ్గురు వ్యక్తులను కర్నాటకలోని బసవనగుడి పోలీసులు అరెస్టు చేశారు. బసవగుడిలో బట్టల షోరూమ్ నిర్వహిస్తున్న సందీప్, సురేష్, సునీల్‌ అనే సోదరుు సోదరులు తమ షోరూమ్‌లోని లేడీస్ ట్రైల్ రూమ్‌లో సీసీ కెమెరా ఏర్పాటు చేశారు. చాలాకాలంగా ఈ ట్రైల్ రూమ్‌లోని దృశ్యాలను రికార్డు చేస్తున్నారు. ట్రైల్ రూమ్‌లో సీసీ కెమెరాని గమనించిన ఓ మహిళ పోలీసులకు ఫిర్యాదు చేయడంతో వీరి గుట్టు రట్టయింది. పోలీసులు సందీప్, సురేష్‌లను అరెస్టు చేశారు. బట్టల షో రూమ్‌లో పని చేస్తున్న భాషాను కూడా అరెస్టు చేశారు. సునీల్ పరారీలో ఉన్నాడు.

‘భారతరత్న’కు హాకీ మాంత్రికుడు ధ్యాన్‌చంద్‌ పేరు సిఫారసు...

  భారత అత్యున్నత పౌరపురస్కారం భారతరత్న అవార్డుకు హాకీ దిగ్గజం ధ్యాన్చంద్ పేరును కేంద్ర హోం శాఖ సిఫారసు చేసింది. కేంద్ర హోం శాఖ సహాయ మంత్రి కీరెన్ రిజ్జు ఈ విషయాన్ని లోక్సభలో తెలిపారు. వివిధ వర్గాల నుంచి వచ్చిన విజ్ఞప్తులనుపరిశీలించిన అనంతరం భారతరత్న అవార్డుకు ధ్యాన్చంద్ పేరును సిఫారసు చేస్తూ ప్రధాని కార్యాలయానికి ప్రతిపాదన పంపినట్టు చెప్పారు. అయితే ఈ విషయంపై చర్చకు కేంద్ర హోం శాఖ మంత్రి రాజ్నాథ్ సింగ్, పార్లమెంటరీ వ్యవహారాల మంత్రి వెంకయ్య నాయుడు, ప్రధాని కార్యాలయం సహాయం మంత్రి జితేందర్ సింగ్ తిరస్కరిచారు. ధ్యాన్చంద్ 1905లో జన్మించారు. ధ్యాన్చంద్ ప్రాతినిధ్యం వహించిన కాలంలో 1928-1936 మధ్య భారత హాకీ జట్టు ఒలింపిక్స్లో స్వర్ణ పతకాలు సాధించింది. 1948లో రిటైరయిన ధ్యాన్చంద్ పద్మభూషణ్ సహా పలు అవార్డులు స్వీకరించారు. ధ్యాన్చంద్ 1979లో కన్నుమూశారు. గతంలో ధ్యాన్‌చంద్‌కి దక్కాల్సిన భారతరత్న అవార్డును సచిన్ టెండూల్కర్‌కి మళ్ళించారన్న విమర్శలు వినిపించాయి.

కాబోయే భర్తని చంపేసిన కేసు... బెయిల్ దొరికింది...

  తల్లిదండ్రులు తనకు తనను ప్రేమించినవాడితో కాకుండా మరో వ్యక్తితో పెళ్ళి చేయాలని సంకల్పించడంతో కర్నాటకకు చెందిన శుభ అనే యువతి భరించలేకపోయింది. అయితే తనకు ఆ పెళ్ళి ఇష్టం లేదని తల్లిదండ్రులతో పోరాడి గెలిస్తే బాగుండేది. కానీ తన పెళ్ళిని ఆపడానికి మరో మార్గాన్ని అనుసరించింది. అది... తన కాబోయే భర్తని హత్య చేయించడం. వివరాల్లోకి వెళ్తే... కర్నాటకలోని బసవశంకరికి చెందిన శుభకు ఆమె తల్లిదండ్రులు తమ ఇంటి సమీపంలోనే నివసించే గిరీష్ అనే యువకుడితో పెళ్ళి ఖాయం చేశారు. అయితే శుభకు ఆ పెళ్ళి ఇష్టం లేదు. ఆమె అరుణ్ అనే వ్యక్తిని ప్రేమించింది. దాంతో తమ ప్రేమకు అడ్డుపడుతోన్న గిరీష్‌ని శుభ అడ్డు తొలగించుకోవాలని అనుకుంది. దాంతో విందుకు వెళ్దామంటూ గిరీష్‌ని ఓ హోటల్‌కి తీసుకెళ్ళింది. తిరిగొచ్చే దారిలో నిర్మానుష్య ప్రదేశంలో కారు ఆపింది. అప్పటికే అక్కడే వున్న శుభ ప్రియుడు అరుణ్, అతని స్నేహితులు గిరీష్‌ని చంపేశారు. ఎవరో గుర్తు తెలియని వ్యక్తులు వచ్చి హత్య చేసి వెళ్ళారని శుభ కట్టుకథలు చెప్పినా పోలీసులు నమ్మలేదు. పోలీసులు జరిపిన విచారణలో శుభ నేరస్థురాలని తేలింది. కేసు విచారణ చేసిన ఫాస్ట్ ట్రాక్ న్యాయస్థానం నిందితులకు యావజ్జీవ కారాగార శిక్ష విధించింది. ఈ సంఘటన పదేళ్ళ క్రితం జరిగింది. ఈ కేసు విషయంలో శుభ తదితరులు సుప్రీంకోర్టును ఆశ్రయించడంతో సుప్రీం కోర్టు శుభ తదితరులకు తాజాగా బెయిల్ మంజూరు చేసింది.

యాక్సిడెంట్: గవాస్కర్‌కి తప్పిన ప్రాణాపాయం

  భారత క్రికెట్ వీరుడు సునీల్ గవాస్కర్ ప్రయాణిస్తున్న కారుకు లండన్‌ నగరంలో భారీ యాక్సిడెంట్ జరిగింది. అదృష్టవశాత్తూ గవాస్కర్ ప్రాణాపాయం నుంచి బయటపడ్డారు. ఇండియా-ఇంగ్లండ్ మధ్య జరిగిన నాలుగో టెస్ట్ మ్యాచ్ అనంతరం ఆ మ్యాచ్‌కి కామెంటేటర్‌గా వ్యవహరించిన సునీల్ గవాస్కర్ మరో కామెంటేటర్ మార్క్ నికోలస్‌తో కలసి మాంచెస్టర్ నుంచి లండన్‌కి కారులో ప్రయాణిస్తుండగా ఈ ప్రమాదం జరిగింది. వీరి కారుకు ఎదురుగా ఓ కారు దూసుకొచ్చి ఢీకొంది. ప్రమాద సమయంలో భారీగా వర్షం కురుస్తోంది. ఈ ప్రమాదంలో గవాస్కర్ ప్రయాణిస్తున్న కారు తీవ్రంగా ధ్వంసమైంది. గవాస్కర్‌కి, మార్క్ నికోలస్‌కి ఒక్క గాయం కూడా కాకపోవడం విశేషం. ఈ సందర్భంగా ‘దేవుడే మమ్మల్ని రక్షించాడు' అని గవాస్కర్ వ్యాఖ్యానించారు.

కార్గిల్ దేశానికి గర్వకారణం: ప్రధాని నరేంద్రమోడీ

  భారత ప్రధాని నరేంద్రమోడీ కార్గి‌ల్‌ని మంగళవారం నాడు సందర్శించారు. పాకిస్థాన్ దురాక్రమణకు ప్రయత్నించినప్పుడు కార్గిల్ ప్రజలు ఎంతో దేశభక్తిని ప్రదర్శించి పాకిస్థాన్ సైనికులు, తీవ్రవాదులను తిప్పికొట్టారని మోడీ అన్నారు. కార్గిల్ ప్రజల దేశభక్తిని చూసి దేశం గర్విస్తోందని మోడీ చెప్పారు. జమ్ము కాశ్మీర్ పర్యటనలో భాగంగా ఆయన కార్గిల్‌లో ఏర్పాటు చేసిన 44 మెగావాట్ల జల విద్యుత్ ప్రాజెక్టును ప్రధాని జాతికి అంకితం చేశారు. లెహ్‌లో పర్యటించారు. ఈ సందర్భంగా మోడీ మాట్లాడుతూ, భారత్‌ని ముఖాముఖి ఎదుర్కొనే శక్తి లేకనే సరిహద్దుల్లో కవ్వింపు చర్యలకు పాల్పడుతోందని అన్నారు. కార్గిల్‌తో ఇతర ప్రాంతాల సంబంధాలు మెరుగుపరుస్తామని, కార్గిల్‌లో పారిశ్రామిక ప్రగతి సాధిస్తామని, రక్షణ బలగాలను సాంకేతికంగా బలోపేతం చేస్తామని మోడీ హామీ ఇచ్చారు. తాను బీజేపీ కార్యకర్తగా వున్న సమయంలో కూడా తాను కార్గిల్‌ని సందర్శించానని మోడీ ఈ సందర్భంగా గుర్తుచేసుకున్నారు.

కేసీఆర్ సంస్కార హీనుడు: కిషన్‌రెడ్డి

  బీజేపీ తెలంగాణ రాష్ట్ర అధ్యక్షుడు కిషన్ రెడ్డి టీఆర్ఎస్ నాయకుడు, తెలంగాణ రాష్ట్ర ముఖ్యమంత్రి కేసీఆర్‌ మీద విరుచుకుపడ్డారు. కేసీఆర్ కేసీఆర్ సంస్కారహీనంగా ప్రవర్తిస్తున్నారని ధ్వజమెత్తారు. కేసీఆర్ ఉద్దేశపూర్వకంగానే కేంద్రంతో కయ్యానికి కాలుదువ్వుతున్నారని మండిపడ్డారు. బీజేపీ, మోడీని కేసీఆర్ టార్గెట్ చేయడం మంచిదికాదని హితవు పలికారు. భారత ప్రధాని నరేంద్ర మోడీని కేసీఆర్ ఫాసిస్టు అనడాన్ని ఆయన ఖండించారు. బీజేపీ వల్లే తెలంగాణ బిల్లు పార్లమెంట్ లో ఆమోదం పొందిందని గుర్తు చేశారు. తెలంగాణ ఆవిర్భావ దినోత్సవానికి కేంద్రాన్ని పిలవకపోవడం సరికాదని అన్నారు. కేసీఆర్ వ్యవహారాన్ని ప్రతిఘటించేందుకు తాము సమాయత్తమవుతున్నామని కిషన్‌రెడ్డి చెప్పారు.

లెహ్ - లడఖ్ అభివృద్ధికి మోడీ ‘3-పి’ ఫార్ములా

  ప్రస్తుతం జమ్ము కాశ్మీర్ రాష్ట్ర పర్యటనలో ఉన్న దేశ ప్రధాని నరేంద్ర మోడీ లడఖ్ ప్రాంత అభివృద్ధికి 3-పి ఫార్ములాను ప్రకటించారు. ప్రకాశ్, పర్యావరణ్, పర్యటన్ పేరుతో 3 పీ ఫార్ములాను ప్రకటించి, కాశ్మీర్ అభివృద్ధికి బాటలు వేస్తామని మోడీ ప్రకటించారు. ఈ మూడు రంగాల్లో కాశ్మీర్‌ను అభివృద్ధి చేయడం ద్వారా దేశానికి గర్వంగా నిలిచేలా తయారుచేస్తామని మోడీ కాశ్మీర్ ప్రజలకు హామీ ఇచ్చారు. పర్యటనలో భాగంగా ప్రధాని మోడీ లేహ్‌లో ఆర్మీ అధికారులు, జవాన్ల గౌరవవందనం స్వీకరించారు. అనంతరం ఆయన జవాన్లను ఉద్దేశించి ప్రసంగించారు. ప్రజల ప్రేమే తనను ఇక్కడదాకా రప్పించిందన్నారు. ప్రజల అభిమానాన్ని వడ్డీతో సహా చెల్లిస్తానని చెప్పారు. ఈ ప్రాంత బలమేంటో తనకు తెలుసని... అదేసమయంలో ఇక్కడున్న సమస్యలు కూడా తనకు తెలుసని వెల్లడించారు. కాశ్మీర్ అభివృద్ధికి తన వంతు కృషి చేస్తానని స్పష్టం చేశారు. ఈ సందర్భంగా నిమో బాగ్జో హైడ్రోఎలక్ట్రిక్ ప్రాజెక్టును ప్రధాని జాతికి అంకితం చేసి, లెహ్ - కార్గిల్ - శ్రీనగర్ ట్రాన్స్మిషన్ వ్యవస్థ ఏర్పాటుకు శంకుస్థాపన చేశారు.

ప్రముఖ హాలీవుడ్ నటుడు రాబిన్ విలియమ్స్ ఆత్మహత్య

  ప్రముఖ హాలీవుడ్ నటుడు, ఆస్కార్ అవార్డు గ్రహీత రాబిన్ విలియమ్స్ (63) ఆత్మహత్య చేసుకున్నారు. కాలిఫోర్నియాలోని టిబ్రోన్ ప్రాంతంలో వున్న తన నివాసంలో ఆయన ముఖానికి ప్లాస్లిక్ కవర్ చుట్టుకోని ఊపిరి ఆడకుండా చేసుకోవడం ద్వారా ఆత్మహత్యకు పాల్పడినట్టు తెలుస్తోంది. మంచి హాస్య నటుడిగా పేరు ప్రఖ్యాతులు, అవార్డులు, డబ్బు సంపాదించిన రాబిన్ విలియమ్స్ ఇంత అర్ధంతరంగా ఆత్మహత్యకు పాల్పడటం వెనుక కారణాలు ఇంకా వెల్లడి కాలేదు. ఆయన నటించిన ‘మిసెస్ డౌట్‌ఫైర్’ చిత్రం ఆయనకు ఎంతో గుర్తింపు తెచ్చిపెట్టింది. ఈ సినిమాని కమల్‌హాసన్ ‘అవ్వై షణ్ముగై’, ‘చాచీ 420’ పేర్లతో తమిళ, హిందీ భాషల్లో రీమేక్ చేశారు. అలాగే రాబిన్ విలియమ్స్ నటించిన ‘జుమాన్జీ’ సినిమా ప్రేక్షకుల నుంచి విశేష ఆదరణ పొందింది. 1978లో హాలీవుడ్ నటుడిగా ప్రయాణం ప్రారంభించిన ఆయన ‘మార్క్ అండ్ మిండీ’, ‘మిసెస్ డౌట్ ఫైర్’, ‘ది బర్డ్ కేజ్’, ‘అవేకెనింగ్’, ‘ఇన్‌స్నోమ్నియా’, ‘జుమాన్జీ’ లాంటి అనేక హిట్ సినిమాలలో నటించారు.

కాశ్మీర్ కామెంట్లపై సారీ చెప్పిన కవిత

  జమ్ము - కాశ్మీర్, హైదరాబాద్‌ల మీద భారతదేశం దురాక్రమణ చేసిందని టీఆర్ఎస్ ఎంపీ కవిత చేసిన వ్యాఖ్యలు వివాదాస్పదం అయిన విషయం తెలిసిందే. ఈ అంశం మీద కవితపై కేసు కూడా నమోదైంది. ఈ నేపథ్యంలో కవిత తన వ్యాఖ్యలను పాక్షికంగా సవరించారు. జమ్మూకాశ్మీర్ భారత దేశంలో అంతర్గత భాగమని లోక్‌సభలో ప్రకటించారు. సోమవారం లోక్‌‌‌సభలో కాశ్మీర్ పండితుల పునరావాసంపై ఇచ్చిన వాయిదా తీర్మానంపై కవిత మాట్లాడారు. ఈ సందర్భంగా ఆమె తాను చేసిన వ్యాఖ్యలపై వివరణ ఇచ్చారు. దీంతో బీజేపీ సభ్యులు బల్లలు చరుస్తూ హర్షం వ్యక్తం చేశారు. లోక్‌సభలో కాశ్మీర్ పండితుల పునరావాసంపై కవిత వ్యక్తం చేసిన అభిప్రాయాలను అధికారపక్షం సభ్యులతో పాటు ప్రతిపక్ష సభ్యుల సైతం ప్రశంసించారు. సొంత దేశంలో కాందిశీకులుగా బతుకు వెళ్లదీస్తున్న కాశ్మీర్ పండితుల గురించి ఎవ్వరూ పట్టించుకోవటం లేదని కవిత ఆవేదన వ్యక్తం చేశారు. దీంతో బిజెపి సభ్యులతోపాటు పలువురు ప్రతిపక్ష సభ్యులూ బల్లలు చరుస్తూ కవితకు మద్దతు ప్రకటించారు.

ఎర్రబెల్లి, ధర్మానలకు సెక్యూరిటీ తగ్గింపు

  తెలంగాణ ముఖ్యమంత్రి కేసీఆర్ పరిపాలనను తుగ్లక్, బఫూన్ ల పరిపాలనళా ఉందని తెదేపా నేత ఎర్రబెల్లి దయాకరరావు చేసిన తీవ్ర విమర్శలకు సహజంగానే తెరాస మండిపడుతోంది. బహుశః ఆ కారణంగానేమో ఎర్రబెల్లికి కల్పిస్తున్న సెక్యురిటీని ప్రభుత్వం తగ్గించింది. దానితో తీవ్ర ఆగ్రహం చెందిన ఎర్రబెల్లి తన మిగిలిన సెక్యూరిటీ సిబ్బందిని కూడా ప్రభుత్వానికి నిన్న అప్పజెప్పేసారు. ప్రభుత్వాన్ని విమర్శించినందుకు తనపై కక్షసాధింపుగానే తనకు సెక్యూరిటీ తగ్గించిందని ఆయన ఆరోపించారు. ఇకపై తనకు ఏమయినా జరిగితే అందుకు తెలంగాణా ప్రభుత్వమే బాధ్యత వహించాల్సి ఉంటుందని హెచ్చరించారు.   ఇక ఆంద్రప్రదేశ్ ప్రభుత్వం కూడా మాజీ మంత్రి ధర్మాన ప్రసాదరావుకి సెక్యూరిటీ సిబ్బందిని తగ్గించడంతో ఆయన కూడా ప్రభుత్వంపై మండిపడుతున్నారు. తన ఇంటి వద్ద రెండు రోజుల క్రితం రాత్రివేళ గుర్తు తెలియని వ్యక్తులు రెక్కీ నిర్వహించారని ఆయన పోలీసులకు సమాచారం ఇవ్వడంతో ఆయన తన భద్రతను పునరుద్దరించుకోవడానికే ఆవిధంగా చెపుతున్నారా లేక నిజంగా ఎవరయినా రెక్కీ నిర్వహించారా? అని పోలీసులు ఆరా తీస్తున్నారు.   సామాన్య ప్రజలు, స్కూళ్ళకు వెళ్ళే చిన్నారులకు సరయిన రక్షణ లేక (గెయిల్) గ్యాస్ లీక్ అగ్ని ప్రమాదాలలో, ఉగ్రవాదుల దాడులలో, రైళ్ళ క్రింద నలిగి చనిపోతుంటే, ఆ సామాన్య ప్రజలు చెమటోడ్చి సంపాదించికడుతున్న పన్నులతో అధికారంలో ఉన్న, లేని కోటీశ్వరులైన రాజకీయ నాయకులందరికీ ప్రభుత్వం సెక్యూరిటీ కల్పించాల్సిన అవసరం ఉందా? అనే అంశంపై చర్చ జరగాల్సిన అవసరం ఉంది.

కస్టడీకి సుబేదార్ పతన్ కుమార్

  భారత సైన్యం రహస్యాలను పాకిస్థాన్ లేడీ గూఢచారికి వెల్లడించిన మిలటరీ ఉద్యోగి సుబేదార్ పతన్‌కుమార్‌కు నాంపల్లి క్రిమినల్ కోర్టు సెంట్రల్ క్రైమ్ స్టేషన్ కస్టడీకి ఇచ్చింది. పతన్‌ను వారంపాటు సీసీఎస్ పోలీసుల కస్టడీకి ఇస్తూ ఆదేశాలు జారీ చేసింది. తిరిగి ఈనెల 19న వైద్య పరీక్షలు నిర్వహించి పతన్‌ను కోర్టుకు అప్పగించాలని పేర్కొంది. తన తరపు న్యాయవాది సమక్షంలోనే పోలీసులు పతన్‌ను విచారించాలని న్యాయస్థానం స్పష్టం చేసింది. ఆర్మీ సుబేదార్ పతన్‌ను కస్టడీకి అప్పగించేందుకు ఆర్మీ అధికారుల అనుమతి తీసుకున్నారా? అని న్యాయమూర్తి సిసిఎస్ పోలీసుల తరపు న్యాయవాదిని ప్రశ్నించారు. ఆర్మీ అనుమతితో రావాలని న్యాయమూర్తి చెప్పారు. దాంతో ఆ తర్వాత ఆర్మీ అధికారుల నుంచి అనుమతి తీసుకున్నట్టు సిసిఎస్ పోలీసులు మెమో దాఖలు చేయడంతో కోర్టు పతన్‌ను కస్టడీకి అనుమతి ఇచ్చింది. పతన్‌ను సిసిఎస్ కస్టడీకి ఇచ్చిన సందర్భంగా ఈ కేసుకు సంబంధించి మరింత కీలక సమాచారం వెలుగులోకి వచ్చే అవకాశం ఉంది.

జగన్ ఆవేదన చూతము రారండీ..