Home  
Politics

అమెరికాలో మోడీ హిందీ ప్రసంగం

  భారత ప్రధాని నరేంద్రమోడీ అమెరికా పర్యటన ఖరారు అయింది. ఒకప్పుడు మోడీకి వీసా ఇవ్వడానికే నిరాకరించిన అమెరికా ఇప్పుడు మోడీ ఎప్పుడు వస్తారా అని ఎదురుచూస్తోంది. మోడీకి ఘనస్వాగతం పలకడానికి ఏర్పాట్లు చేసింది. ఈ నేపథ్యంలో ఈనెల 26 నుంచి 30 వరకు మోడీ అమెరికా పర్యటన ఖరారు అయింది. ఈనెల 29 లేదా 30వ తేదీన మోడీ అమెరికా అధ్యక్షుడు బరాక్ ఒబామాతో భేటీ అవుతారు. 27న జరిగే ఐక్యరాజ్యసమితి సాధారణ సభలో నరేంద్ర మోడీ ప్రసంగిస్తారు. ఈ సభలో మోడీ హిందీలో ప్రసంగించనున్నారు. ఎప్పటి నుంచో భారత్ ఆశిస్తున్న భద్రతా మండలిలో శాశ్వత సభ్యత్వం గురించి మోడీ తన ప్రసంగంలో ప్రస్తావించనున్నారు. ట్విన్ టవర్స్‌ కూల్చివేతలో మరణించిన వారికి కూడా మోడీ ఈ పర్యటనలో శ్రద్ధాంజలి ఘటించనున్నారు. అమెరికాలోని ఆరు ప్రధాన కంపెనీల సీఇఓలతో కూడా నరేంద్రమోడీ సమావేశమవుతారు.

పోయిరా పొన్నాలా... శంకర్రావు...

  తెలంగాణ పీసీసీ అధ్యక్షుడు పొన్నాల లక్ష్మయ్య అర్జెంటుగా తన పదవికి రాజీనామా చేయాలన్న డిమాండ్లు ఎక్కువైపోయాయి. మొన్నటి వరకూ కోమటిరెడ్డి వెంకటరెడ్డి పొన్నాల మీద విరుచుకుపడ్డారు. పొన్నాల రాజీనామా చేయాల్సిందేనని పట్టుబట్టారు. ఇప్పుడు ఆయన కొంచెం చల్లబడినట్టున్నారు. ఆ బాధ్యతని ఇప్పుడు మాజీ మంత్రి శంకర్రావు తీసుకున్నట్టున్నారు. పొన్నాల అర్జెంటుగా రాజీనామా చేయాలని ఆయన డిమాండ్ చేస్తున్నారు. మెదక్ పార్లమెంట్ స్థానం ఉప ఎన్నికలో కాంగ్రెస్ పార్టీ ఓడిపోతే ఆ బాధ్యత తాను తీసుకుంటానని పొన్నాల అన్నారని, అంచేత పొన్నాల పీసీసీ అధ్యక్ష పదవికి రాజీనామా చేయాలని శంకర్రావు డిమాండ్ చేశారు. తెలంగాణ కాంగ్రెస్‌ సమన్వయ కమిటీ సభ్యుల మధ్యనే సమన్వయం లేదని, ఇక వీళ్ళు పార్టీలో సమన్వయం ఎలా తెస్తారని శంకర్రావు ప్రశ్నించారు. పొన్నాల పదవిని పీకేసి తెలంగాణ పీసీసీ అధ్యక్ష పీఠం మీద సమర్థుడిని కూర్చోబెట్టాలని సోనియాగాంధీకి లేఖ రాశానని శంకర్రావు వెల్లడించారు.

ఇది తెలంగాణ ప్రభుత్వానికి తలవంపులు...

  తెలంగాణ ప్రభుత్వం ప్రవేశపెట్టిన ‘ఫాస్ట్’ పథకాన్ని హైకోర్టు విమర్శించడం, ఇది జాతీయ సమగ్రతకు విఘాతం కలిగించే విషయమని అనడం తెలంగాణ ప్రభుత్వానికి తలవంపులను తెచ్చిందని భారతీయ జనతాపార్టీ ఎమ్మెల్యే డాక్టర్ లక్ష్మణ్ అభిప్రాయపడ్డారు. ‘ఫాస్ట్’ పథకాన్ని ప్రకటించడం తెలంగాణ ప్రభుత్వ అనాలోచిత వైఖరికి నిదర్శనమని ఆయన అన్నారు. కేసీఆర్ ప్రభుత్వ తీరును కోర్టులు ఇప్పటికి ఐదుసార్లు తప్పు పట్టాయని ఆయన గుర్తు చేశారు. కోర్టుల్లో ఎదురు దెబ్బలు ఎదురవుతున్నప్పటికీ తెలంగాణ ముఖ్యమంత్రి కేసీఆర్ తన ఒంటెత్తు పోకడలను, ఏకపక్ష వైఖరిని మానుకోవడం లేదని ఆయన విమర్శించారు. స్థానికత అంశంలో కేసీఆర్ భేషజాలు, పట్టింపులకు పోవడం, లేనిపోని రాద్ధాంతం చేయడం మంచిది కాదని లక్ష్మణ్ కేసీఆర్‌కి హితవు చెప్పారు. ఇప్పటికైనా తెలంగాణ ప్రభుత్వం ఈ అంశంలో ఏర్పడిన గందరగోళానికి తెరదించాలని ఆయన విజ్ఞప్తి చేశారు.

ఇండియా నుంచి ఆస్కార్‌కి ‘లయర్స్ డైస్’

  ఉత్తమ విదేశీ చిత్రం కేటగిరీలో ఆస్కార్ అవార్డు బరిలో హిందీ చిత్రం ‘లయర్స్ డైస్’ చిత్రం నిలిచింది. జాతీయ ఉత్తమ చిత్రం అవార్డు పొందిన ఈ సినిమా భారతదేశం తరఫున ఆస్కార్ అవార్డు పరిశీలకు పంపడానికి ఎంపికైంది. గీతాంజలి థాపా, నవాజుద్దీన్ సిద్ధిఖీ నటించిన ఈ సినిమా మలయాళ నటి గీతూ మోహన్‌దాస్ దర్శకత్వంలో రూపొందింది. ఫిలిం ఫెడరేషన్ ఆఫ్ ఇండియా ఏర్పాటు చేసిన 12 మంది జ్యూరీ సభ్యులు ఈ సినిమాను ఇండియా నుంచి ఆస్కార్ ఎంట్రీగా ఎంపిక చేశారు. ఒక గిరిజన మహిళ తన మూడేళ్ళ కూతురుతో కలసి తన భర్తను వెతుక్కుంటూ వెళ్ళే కథాంశంతో రూపొందిన సినిమా ఇది. 61వ జాతీయ చలనచిత్ర అవార్డులలో ‘లయర్స్ డైస్’ సినిమా ఉత్తమ చిత్రంగా ఎంపిక కావడంతోపాటు రాజీవ్ రవికి ఉత్తమ సినిమాటోగ్రఫీ, గీతాంజలికి ఉత్తమ నటి అవార్డు లభించాయి. ఇప్పుడు ఈ సినిమా 87వ ఆస్కార్ అవార్డుల పోటీలో నిలిచింది.

ఢిల్లీ జూలో దారుణం.. విద్యార్థిని చంపిన పులి

  ఢిల్లీలోని జంతు ప్రదర్శన శాలలో దారుణం జరిగింది. తెల్ల పులిని ఉంచిన ఎన్‌క్లోజర్‌లో పడిపోయిన విద్యార్థి మీద పులి దాడి చేసి చంపేసింది. హిమాంశు అనే ఇంటర్మీడియట్ విద్యార్థి ఈ దాడిలో చనిపోయాడు. తెల్లపులిని ఉంచిన ఎన్‌క్లోజర్ చాలా కిందకు వుండటంతో విద్యార్థి లోపలకు పడిపోయాడని, దాంతో అందరూ చూస్తుండగానే పులి ఆ విద్యార్థి మీద దాడిచేసి చంపేసిందని తెలుస్తోంది. ఈ సంఘటన హిమాంశుతోపాటు జూకి వెళ్ళిన విద్యార్థుల సమక్షంలోనే జరిగింది. ఈ సంఘటన జరిగిన సమయంలో పులి ఎన్‌క్లోజర్ సమీపంలో భద్రతా సిబ్బంది ఎవరూ లేకపోవడంతో పులి నుంచి విద్యార్థిని కాపాడలేకపోయారు. విద్యార్థి పులి వున్న కంచె మీదకి ఎక్కి లోపలకి తొంగి చూస్తూ వుండగా లోపలకి పడిపోయాడని ఒక కథనం వినిపిస్తూ వుండగా, లోపలకి తొంగి చూస్తున్న విద్యార్థి మీద పులి దాడి చేసి లోపలకి లాగేసిందన్న కథనాలు కూడా వినిపిస్తున్నాయి.

బాణాసంచా పేలుడు: 12 మంది మృతి

  చైనాలోని ఓ బాణాసంచా పరిశ్రమలో భారీ పేలుడు సంభవించింది. ఈ ప్రమాదంలో 12 మంది మరణించగా 33 మంది గాయపడ్డారు. ఇద్దరు వ్యక్తుల ఆచూకీ తెలియడం లేదు. లిల్లింగ్‌టన్ సిటీలోని బావోఫెంగ్ గ్రామంలో వున్న ఫ్యాక్టరీలో మంగళవారం తెల్లవారుఝామున ఈ ప్రమాదం జరిగింది. పేలుడు జరిగిన సమయంలో 47 మంది బాణాసంచా తయారీ విధుల్లో వున్నారు. ఆచూకీ తెలియకుండా పోయిన ఇద్దరు వ్యక్తుల శరీరాలు ముక్కలు ముక్కలు అయిపోయి వుండవచ్చని పోలీసులు భావిస్తున్నారు. ఆ ఇద్దరూ పేలుడుకు అతి సమీపంలో వున్నందవల్లనే వారీ శరీరాలు కూడా కనిపించకుండా పోయాయని భావిస్తున్నారు.

తెలుగుదేశం పార్టీని వీడను: ఎర్రబెల్లి

  తెలుగుదేశం పార్టీని ఎప్పటికీ విడిచిపెట్టనని, తెలుగుదేశం పార్టీని విడిచిపెట్టాల్సి వస్తే తన గ్రామానికి వెళ్ళి వ్యవసాయం చేసుకుంటానే తప్ప మరో పార్టీలో చేరనని తెలంగాణ తెలుగుదేశం పార్టీ నాయకుడు ఎర్రబెల్లి దయాకరరావు ఎప్పుడూ చెబుతూ వుంటారు. ఎర్రబెల్లి టీఆర్ఎస్‌లో చేరబోతున్నారని, ఆయనకు మంత్రిపదవి కూడా ఇవ్వబోతున్నారని పుకార్లు వస్తున్న నేపథ్యంలో ఆయన మరోసారి స్పందించారు. 32 సంవత్సరాలుగా తెలుగుదేశం పార్టీలోనే వున్నానని, టీడీపిని విడిచిపెట్టే ఉద్దేశం తనకు ఎంతమాత్రం లేదని చెప్పారు. తన పార్టీ మార్పు విషయంలో వస్తున్న పుకార్లను ఆయన ఖండించారు. తాను తెలంగాణ సీఎం కేసీఆర్‌ని కలవటం వాస్తవమే కానీ, అర్ధరాత్రి వేళ కలవలేదని, రాత్రం ఏడుగంటల ప్రాంతంలో కలిశానని చెప్పారు. కొందరు మిత్రులతో కలసి తాను వెళ్ళానని వివరించారు. పార్టీలో తనకు ఏవైనా సమస్యలు వుంటే పార్టీ అధినేతతో చర్చించి పరిష్కరించుకుంటానని ఆయన అన్నారు.

ఏపీ నిరుద్యోగులకు శుభవార్త

  ఆంధ్రప్రదేశ్ ప్రభుత్వం ప్రశంసనీయమైన పరిపాలన నిర్వహిస్తోంది. ఆంధ్రప్రదేశ్ ప్రభుత్వం తీసుకుంటున్న నిర్ణయాలకు ప్రజల నుంచి కూడా ఆమోదం, హర్షం లభిస్తోంది. ఆంధ్రప్రదేశ్ నిర్ణయాలను కోర్టులు కూడా ఆమోదిస్తున్నాయి. ఈ నేపథ్యంలో ఆంధ్రప్రదేశ్ ప్రభుత్వం ఒక మంచి నిర్ణయం తీసుకుంది. నిరుద్యోగులకు మంచి శుభవార్తని వినిపించింది. ఆంధ్రప్రదేశ్ రాష్ట్రంలోని ఉద్యోగ నియామకం వయో పరిమితిని 34 ఏళ్ళ నుంచి 40 ఏళ్ళకు పెంచుతూ ఉత్తర్వులు జారీ చేసింది. ఇది నిరుద్యోగులకు ఎంతో మేలు చేసే అంశం. ఏజ్ బార్ అయిపోవడం వల్ల ప్రభుత్వ ఉద్యోగ ప్రయత్నాలు మానుకున్న ఎంతోమంది నిరుద్యోగులకు ప్రభుత్వ నిర్ణయం వల్ల ఎంతో మేలు జరుగుతోంది. అలాగే భవిష్యత్తులో కూడా నిరుద్యోగులకు ఈ నిర్ణయం వల్ల మేలు జరుగుతుంది.

పాలక మండళ్ళ రద్దుపై పిటిషన్ తిరస్కృతి

  ఆంధ్రప్రదేశ్‌లోని ఆలయాల పాలక మండళ్ళను రద్దు చేస్తూ ఆంధ్రప్రదేశ్ ప్రభుత్వం జీవో విడుదల చేసిన విషయం తెలిసిందే. ఈ నిర్ణయాన్ని సవాలు చేస్తూ దాఖలైన పిటిషన్‌ని హైకోర్టు మంగళవారం తిరస్కరించింది. ఆలయ ట్రస్టు భూములను కాపాడేందుకే ఆర్డినెన్స్ను చట్టరూపంలోకి తెచ్చామన్న ఆంధ్రప్రదేశ్ ప్రభుత్వ వాదనతో హైకోర్టు ఏకీభవించింది. దేవాలయ పాలక మండళ్లను రద్దు చేసే అదికారం ప్రభుత్వానికి ఉందని ఉన్నత న్యాయస్థానం స్పష్టం చేసింది. న్యాయస్థానం తీర్పుతో కొత్త పాలక మండళ్లు ఏర్పాటు కావడానికి మార్గం సుగమం అయింది.

అప్పు ఇవ్వలేదని చంపబోయాడు

  అప్పు అప్పుడే విరోధం అన్నారు. అంటే అప్పు ఇచ్చినా, ఇవ్వకపోయినా విరోధం మొదలైపోతుందన్నమాట. దీనికి ఉదాహరణగా నిలిచే సంఘటన ఆదిలాబాద్ జిల్లా కాగజ్‌నగర్‌లో జరిగింది. స్థానికంగా నివాసం ఉండే మొండెయ్య అనే వ్యక్తి ఇంటికి దత్తు అనే బంధువు వచ్చాడు. తనకు అప్పుగా డబ్బు కావాలని దత్తు మొండెయ్యని అడిగాడు. అయితే మొండెయ్య అప్పు ఇవ్వడానికి నిరాకరించాడు. దాంతో దత్తు ఈరోజుకు మీ ఇంట్లోనే వుండి, మర్నాటి ఉదయం వెళ్ళిపోతానని చెప్పాడు. దానికి మొండెయ్య అంగీకరించాడు. అయితే అర్ధరాత్రి అందరూ నిద్రిస్తున్న సమయంలో దత్తు కత్తి, సుత్తి తీసుకుని మొండెయ్య మీద అతని భార్య, కుమారుడి మీద దాడి చేసి వారిని చంపడానికి ప్రయత్నించాడు. అయితే మొండెయ్య కుటుంబం అతని నుంచి తప్పించుకుని కేకలు వేయడంతో ఇరుగుపొరుగు వారు వచ్చి దత్తుని పట్టుకోవడానికి ప్రయత్నించారు. అయితే దత్తు పారిపోయాడు. దత్తు దాడిలో తీవ్రంగా గాయపడిన మొండెయ్య కుటుంబం ఆస్పత్రిలో చికిత్స పొందుతోంది.

ప్రభుత్వాలను ప్రభావితం చేస్తున్న పార్టీల విభేదాలు

  రాష్ట్ర విభజన జరిగి ఆంధ్రా, తెలంగాణా రాష్ట్రాలు ఏర్పడినప్పటి నుండి కూడా తెరాస ప్రభుత్వం ఆంద్రప్రదేశ్ ముఖ్యమంత్రి చంద్రబాబు నాయుడుని, ప్రభుత్వాన్ని తీవ్రంగా విమర్శిస్తూనే ఉంది. కానీ చంద్రబాబు మాత్రం సంయమనం కోల్పోకుండా రాజకీయ పరిణతి కనబరుస్తూ తెలంగాణా ప్రభుత్వంతో సయోధ్యకే ప్రయత్నిస్తూ వచ్చారు. కానీ గవర్నర్ నరసింహన్ మధ్యవర్తిత్వం వహించే వరకు తెలంగాణా ప్రభుత్వం ఘర్షణ వైఖరినే అవలంబించింది. ఆ తరువాత నుండే రెండు రాష్ట్రాల మధ్య కొంచెం సర్దుబాటు, ఇచ్చిపుచ్చుకొనే ధోరణి కనబడుతోంది. అది రెండు రాష్ట్రాల అభివృద్ధికి చాలా అవసరం కూడా.  హైదరాబాద్ మెట్రో రైల్ ప్రాజెక్టు వ్యవహారంలో తెలంగాణా ప్రభుత్వంపై తెదేపా నేత రేవంత్ రెడ్డి చేస్తున్న ఆరోపణలతో పరిస్థితి మళ్ళీ మొదటికి వస్తున్నట్లు కనబడుతోంది. ఈ వ్యవహారంలో తెదేపా వైఖరిని తెరాస తీవ్రంగా తప్పు పడుతోంది. వచ్చే ఎన్నికల నాటికి తెలంగాణా నుండి తెదేపాను ఖాళీ చేసేస్తామని కుండ బ్రద్దలు కొడుతున్నట్లు చెపుతున్న తెరాస, అందుకు అనుగుణంగానే పావులు కదుపుతోంది. తెదేపా సీనియర్ నేత ఎర్రబెల్లి దయాకర్ రావు తెరాసలో చేరబోతున్నారంటూ వస్తున్న వార్తలు అందుకు ఉదాహరణగా చెప్పుకోవచ్చును. ఒకవేళ ఆ వార్తలు నిజమయితే ఇప్పటికే సీనియర్ నేత నామా నాగేశ్వరరావును తెరాసకు వదులుకొన్న తెదేపాకు ఇది మరో పెద్ద ఎదురు దెబ్బ అవుతుంది కనుక సహజంగానే ఇది తెదేపాకి ఆగ్రహం కలిగించే విషయం అవుతుంది.   ఈవిధంగా రెండు రాజకీయ పార్టీల నడుమ తలెత్తుతున్న విభేదాలు రెండు రాష్ట్ర ప్రభుత్వాల మధ్య సంబంధాలను కూడా ప్రభావితం చేస్తున్నాయి. రెండు ప్రభుత్వాలు రాష్ట్రాభివృద్ధిపై దృష్టి కేంద్రీకరించవలసిన ఈ సమయంలో ఈవిధంగా వ్యవహరించడం ఎవరికీ మేలు చేయదని గ్రహించి సమస్యలను సామరస్యంగా పరిష్కరించుకొనే ప్రయత్నం చేస్తే మంచిదని రాజకీయ విశ్లేషకులు అభిప్రాయపడుతున్నారు.

మధురలో రోడ్డు ప్రమాదం... 11 మంది మృతి

  ఉత్తరప్రదేశ్‌లోని మధురలో మంగళవారం తెల్లవారుఝామున జరిగిన ఘోర రోడ్డు ప్రమాదంలో 11 మంది మృతిచెందారు. దాదాపు 10 మంది తీవ్రంగా గాయపడ్డారు. రెండు వాహనాలు ఢీకొనడం వల్ల ఈ ప్రమాదం జరిగినట్టు తెలుస్తోంది. ప్రమాదంలో గాయపడిన వారిని ఆస్పత్రికి తరలించి చికిత్స జరిపిస్తున్నారు. ఈ ప్రమాదానికి సంబంధించిన పూర్తి వివరాలు తెలియాల్సి వుంది.

కృష్ణ, గోదావరిపై కుట్ర జరిగిందట...

  కృష్ణ, గోదావరి జలాల విషయంలో తెలంగాణ మీద కుట్ర జరిగిందని తెలంగాణ ముఖ్యమంత్రి కేసీఆర్ ఆరోపించారు. కృష్ణానది యాజమాన్య బోర్డు చైర్మన్ ఎస్‌కె పండిట్, గోదావరి నది యాజమాన్య బోర్డు చైర్మన్ ఎమ్మెస్ అగర్వాల్‌తో కేసీఆర్ సోమవారం భేటీ అయ్యారు. కృష్ణా, గోదావరి నదులపై నిర్మించిన ప్రాజెక్టులకు నిబంధనలు రూపొందించి అమలు చేయాలని ముఖ్యమంత్రి సూచించారు. రెండు నదులపై నిర్మించిన ప్రాజెక్టుల గేట్లు, నీటి విడుదల తదితర కార్యక్రమాల నిర్వహణ బాధ్యతను ఇరు రాష్ట్రాలకు అప్పగించకుండా బోర్డులే నిర్వహించాలని ముఖ్యమంత్రి సూచించారు. అన్ని ప్రాజెక్టుల వద్ద సిఐఎస్‌ఎఫ్ సాయుధ బలగాలతో భద్రత ఏర్పాటు చేయాలని ముఖ్యమంత్రి కోరారు. హైదరాబాద్ సహా అన్ని నగరాలు, పట్టణాలు, ప్రాంతాల తాగునీటి అవసరాల కోసం నీటిని కేటాయించిన తర్వాతనే ఇతర అవసరాలకు కేటాయించే విధంగా చర్యలు తీసుకోవాలని ముఖ్యమంత్రి సూచించారు. నీటి విషయంలో తెలంగాణకు అన్యాయం జరిగే విధంగా సీమాంధ్ర పాలకులు వ్యవహరించారని కేసీఆర్ అన్నారు.

దుర్గమ్మ పాదాల చెంత దేవాదాయ శాఖ

  త్వరలో హైదరాబాద్ నుండి విజయవాడకు ప్రభుత్వ ప్రధాన కార్యాలయాలన్నీ తరలిరానున్నాయి. అన్నిటికంటే ముందుగా దేవాదాయ కమీషన్ తరలి వచ్చేందుకు సన్నధం అవుతోంది. కృష్ణానది ఒడ్డున సీతానగరంలో భక్తుల వసతి కోసం ఇటీవల కొత్తగా నిర్మించిన రెండంతస్తుల భవనం అన్ని విధాల అనువుగా ఉంటుందని అధికారులు భావిస్తున్నారు. దాదాపు 2500 మంది ఉండేందుకు వీలుగా నిర్మించబడిన ఈ భవనం కమీషన్ కార్యాలయానికి అన్ని విధాల సరిపోతుందని, చిన్నచిన్న మార్పులతో దానిని కమీషన్ కార్యాలయానికి అనువుగా మార్చుకోవచ్చని సంబంధిత అధికారులు తెలిపారు. త్వరలో దేవాదాయ శాఖ ప్రధాన కార్యదర్శి భవనాన్ని పరిశీలించిన తరువాత అంతిమ నిర్ణయం తీసుకొంటామని అధికారులు తెలిపారు.

కేసీఆర్‌కి వ్యతిరేకంగా చెన్నైలో జర్నలిస్టుల నిరసన

  తెలంగాణ రాష్ట్ర సీఎం కేసీఆర్‌కి వ్యతిరేకంగా వివిధ మీడియా సంస్థల ప్రతినిధులు చెన్నైలోని ప్రెస్ క్లబ్ వద్ద ధర్నా తదితర నిరసన కార్యక్రమాలు నిర్వహించారు. కేసీఆర్ జర్నలిస్టుల మనోభావాలు దెబ్బతినేలా వ్యవహరిస్తున్నారని, దారుణమైన వ్యాఖ్యలు చేస్తున్నారని చెన్నై జర్నలిస్టులు ఆగ్రహం వ్యక్తం చేశారు. ఈ నిరసన కార్యక్రమాలలో తమిళ, తెలుగు, మలయాళ మీడియా సంస్థలకు చెందిన ప్రతినిధులు, జర్నలిస్టు అసోసియేషన్ ఆఫ్ చెన్నై సభ్యులు పాల్గొన్నారు. కేసీఆర్ ప్రతికా స్వేచ్పను కాలరాసే విధంగా వ్యాఖ్యలు చేశారని చెన్నై ప్రెస్ క్లబ్ ప్రధాన కార్యదర్శి భారతీ తమిజాన్ అన్నారు. తెలంగాణలో ప్రైవేట్ ఛానెల్స్ ప్రసారాలపై ఆంక్షలు విధించడాన్ని భారతీ తమిజాన్ ఖండించారు.

ఈతకు వెళ్ళి ముగ్గురు బాలికల మృతి

  మహబూబ్ నగర్ జిల్లాలో ఘోరం జరిగింది. ఈతకు వెళ్ళిన ముగ్గురు బాలికలు నీట మునిగి మరణించారు. మహబూబ్ నగర్ జిల్లాలోని కొత్తూరు మండలం కొడిచర్ల గ్రామంలో ఈ విషాద సంఘటన జరిగింది. కొడిచెర్లలోని చెరువులో ఈత కొట్టడానికి మమత (14), నమ్రత (10), నిఖిత (8) అనే ముగ్గురు చిన్నారులు వెళ్ళారు. అయితే చెరువు బాగా లోతుగా వుండటం, ముగ్గురు బాలికలకూ ఈత రాకపోవడంతో నీట మునిగి మరణించారు.

తెలంగాణ ‘ఫాస్ట్’ జీవోపై హైకోర్టు తీవ్ర ఆగ్రహం..

  సోమవారం నాడు తెలంగాణ ప్రభుత్వానికి హైకోర్టు నుంచి అక్షింతలు వేయించుకోవడంతోనే సరిపోయింది. సోమవారం ఉదయం వాహనాల నంబర్ ప్లేట్ల మీద తెలంగాణ ప్రభుత్వానికి హైకోర్టు ధర్మాసనం అక్షింతలు వేసింది. ఇష్టమొచ్చినట్టు నంబర్ ప్లేట్లు మార్చుకోవాలని, రీ రిజిస్ట్రేషన్ చేసుకోవాలని తెలంగాణ ప్రభుత్వం ఆదేశించడం మీద హైకోర్ట ధర్మాసనం ఆగ్రహం వ్యక్తం చేసింది. అలాగే సోమవారం మధ్యాహ్నం మరో అంశం మీద హైకోర్టు తెలంగాణ ప్రభుత్వం మీద సీరియస్ అయింది. తెలంగాణ ప్రభుత్వం విద్యార్థులకు సంబంధించి జారీ చేసిన ‘ఫాస్ట్’ పథకం జీవోను హైకోర్టు తప్పు పట్టింది. తెలంగాణ ప్రభుత్వం ఈ జీవోను జారీ చేయడం రాజ్యాంగపరంగా ఆమోదయోగ్యం కాదని స్పష్టం చేసింది. జాతీయ సమగ్రతను దెబ్బ తీసేలా ఈ జీవో వుందని హైకోర్టు ఆగ్రహించింది. ఈ జీవో విషయంలో ప్రభుత్వం పునరాలోచించుకోవాలని సూచించింది. తెలంగాణ ఎక్కడో ప్రత్యేకంగా లేదని, తెలంగాణ కూడా భారతదేశంలో అంతర్భాగమేనని హైకోర్టు వ్యాఖ్యానించింది. తెలంగాణ ప్రభుత్వ ‘ఫాస్ట్’ జీవోను వ్యతిరేకిస్తూ ఆంధ్రప్రదేశ్‌ మాజీ మంత్రులు పితాని, డొక్కా కోర్టును ఆశ్రయించిన విషయం తెలిసిందే. ఈ విషయం మీద కౌంటర్ అఫిడవిట్‌ని దాఖలు చేయాలని హైకోర్టు తెలంగాణ ప్రభుత్వాన్ని ఆదేశించింది. ఈ కేసు విచారణను ఆరు వారాల తర్వాతకి వాయిదా వేసింది.

లేడీ సీఎంలకు బతుకమ్మ ఆహ్వానాలు...

  బతుకమ్మ ఉత్సవాలకు మా నాయకురాలు సోనియాగాంధీని ఆహ్వానించండి మహాప్రభో అని కాంగ్రెస్ వాళ్ళు ఎంత మొత్తుకున్నా తెలంగాణ ముఖ్యమంత్రి ఎంతమాత్రం కరగలేదు. అయితే నాలుగు రాష్ట్రాల మహిళా ముఖ్యమంత్రులను మాత్రం సాదరంగా ఆహ్వానించారు. తమిళనాడు ముఖ్యమంత్రి జయలలిత, రాజస్థాన్ ముఖ్యమంత్రి వసుంధర రాజె సింధియా, గుజరాత్ ముఖ్యమంత్రి ఆనంది బెన్ పటేల్, పశ్చిమ బెంగాల్ ముఖ్యమంత్రి మమతా బెనర్జీలను కేసీఆర్ బతుకమ్మ ఉత్సవాలకు ఆహ్వానించారు. ఈ విషయాన్ని కేసీఆర్ స్వయంగా తెలిపారు. అలాగే ప్రజా సమస్యల పరిష్కారం విషయంలో తెలంగాణ ప్రజా ప్రతినిధులకు శిక్షణా కార్యక్రమాలను నిర్వహించబోతున్నామని, ఈ కార్యక్రమాలలో తాను కూడా పాల్గొంటానని కేసీఆర్ చెప్పారు. దళిత, గిరిజన వధువులకు పెళ్ళి సందర్భంగా 51 వేల రూపాయల ఆర్థికసాయం అందించే ‘కళ్యాణలక్ష్మి’ పథకాన్ని దసరా నుంచి ప్రారంభించనున్నట్టు తెలంగాణ సీఎం కేసీఆర్ వెల్లడించారు.

వచ్చేఎన్నికల్లో పోటీకి పరిటాల శ్రీరామ్ రెడీ

  మరో రాజకీయ వారసుడు రంగంలోకి దిగబోతున్నారు. పరిటాల రవి, పరిటాల సునీత కుమారుడు పరిటాల శ్రీరామ్ ఎన్నికల బరిలోకి దూకడానికి సిద్ధంగా వున్నారు. తన కుమారుడు వచ్చే ఎన్నికలలో పోటీ చేస్తాడని, తాను పోటీకి దూరంగా వుంటానని ఆంధ్రప్రదేశ్ రాష్ట్ర పౌరసరఫరాల శాఖామంత్రి పరిటాల సునీత వెల్లడించారు. పరిటాల కుటుంబం పేరుతో బెదిరింపులు, అక్రమ వసూళ్లకు పాల్పడితే చట్టపరమైన చర్యలు తీసుకుంటామని హెచ్చరించారు. రాజకీయాల్లో చురుగ్గా వ్యవహరిస్తున్న శ్రీరామ్ అనంతపురం రాజకీయాల్లో తనదైన ముద్ర వేస్తున్నట్టు పరిటాల సునీత చెప్పారు.