భారతీయ స్టాక్ మార్కెట్లో గత మూడు రోజులుగా కొనసాగుతున్న ఐటీ షేర్ల పండుగకు ఒక్కసారిగా బ్రేక్ పడింది. బుధవారం నాటి ట్రేడింగ్‌లో దేశీయ ఐటీ దిగ్గజాల షేర్లు భారీగా కుప్పకూలాయి. గత మూడు రోజులుగా లాభాల బాటలో నడిచిన మార్కెట్లలో ఒక్కసారిగా ఇన్వెస్టర్లు లాభాల స్వీకరణకు (ప్రాఫిట్ బుకింగ్) మొగ్గు చూపడంతో ఐటీ రంగానికి చెందిన నిఫ్టీ ఐటీ ఇండెక్స్ దాదాపు 4.86 శాతం నష్టపోయి 29,604.25 పాయింట్ల వద్ద ముగిసింది. ఎన్‌ఎస్‌ఈలో అత్యంత ఘోరంగా నష్టపోయిన రంగాలుగా ఐటీ నిలిచింది. గడచిన మూడు రోజుల్లో 7 శాతం లాభపడిన ఇండెక్స్, ఈ ఒక్కరోజే భారీ పతనాన్ని చవిచూడటం మార్కెట్ వర్గాలను ఆందోళనలో పడేసింది. ఈ భారీ అమ్మకాల ఒత్తిడి కారణంగా నిఫ్టీ ఐటీ ఇండెక్స్‌లో ఉన్న మొత్తం 10 కంపెనీల షేర్లు భారీ నష్టాలతోనే ట్రేడ్ అయ్యాయి.

ఈ పతనంలో దేశంలోనే అతిపెద్ద ఐటీ సేవల సంస్థ అయిన టాటా కన్సల్టెన్సీ సర్వీసెస్ (TCS) ఇన్వెస్టర్లను తీవ్రంగా దెబ్బతీసింది. టీసీఎస్ షేరు ఏకంగా 8 శాతం వరకు క్షీణించి ₹2,255 వద్ద స్థిరపడింది. టీసీఎస్‌తో పాటు ఇతర ఐటీ దిగ్గజాలైన ఇన్ఫోసిస్, హెచ్‌సీఎల్ టెక్నాలజీస్, టెక్ మహీంద్రా షేర్లు కూడా 2 నుంచి 5 శాతం వరకు నష్టపోయాయి. అలాగే ఎల్‌టిఐ మైండ్‌ట్రీ షేరు 7 శాతం కంటే ఎక్కువ పడిపోగా, కోఫోర్జ్ మరియు పర్సిస్టెంట్ సిస్టమ్స్ సంస్థలు 5 శాతం చొప్పున నష్టాన్ని మూటగట్టుకున్నాయి. ఎంఫాసిస్ 4 శాతం, ఒరాకిల్ ఫైనాన్షియల్ సర్వీసెస్ సాఫ్ట్‌వేర్ (OFSS) 2 శాతం మేర నష్టపోయాయి. గ్లోబల్ మార్కెట్లలో సెమీకండక్టర్లు, చిప్ తయారీ సంస్థల షేర్లు విపరీతంగా దూసుకుపోతుంటే, భారతీయ ఐటీ కంపెనీలు మాత్రం తీవ్రమైన విక్రయాల ఒత్తిడిని ఎదుర్కొంటుండటం గమనార్హం.

ఈ భారీ పతనానికి ప్రధాన కారణం ఆర్టిఫిషియల్ ఇంటెలిజెన్స్ (AI) తెస్తున్న మార్పులేనని విశ్లేషకులు చెబుతున్నారు. గ్లోబల్ మార్కెట్లలో ఏఐ ట్రేడింగ్ సానుకూలంగా ఉంటే, భారత్‌లో మాత్రం అది 'యాంటీ-ఏఐ' ట్రేడ్‌గా మారుతోంది. ఏఐ వల్ల కొత్త అవకాశాలు వస్తున్నప్పటికీ, సాఫ్ట్‌వేర్ డెవలప్‌మెంట్‌ ప్రక్రియ చాలా వేగంగా, తక్కువ ఖర్చుతో ముగిసిపోతోంది. ఇది శ్రామిక శక్తిపై (Labour-Intensive) ఎక్కువగా ఆధారపడే భారతీయ ఐటీ సేవల రంగానికి గండంగా మారింది. రాబోయే కొన్నేళ్లలో ఏఐ ప్రాజెక్టుల ద్వారా వచ్చే లాభాల కంటే, సాంప్రదాయ సేవల ధరలు తగ్గడం వల్ల వచ్చే నష్టాలే ఎక్కువగా ఉంటాయని బ్రోకరేజ్ సంస్థలు అంచనా వేస్తున్నాయి. క్లౌడ్, సాఫ్ట్‌వేర్ వినియోగం పెరగడం వల్ల పెరిగే సాంకేతిక వ్యయాల నుంచి భారతీయ ఐటీ సంస్థలు పెద్దగా లబ్ధి పొందలేకపోతున్నాయి.

మరోవైపు విదేశీ పోర్ట్‌ఫోలియో ఇన్వెస్టర్లు (FIIs) భారతీయ ఐటీ రంగం నుండి తమ పెట్టుబడులను వేగంగా ఉపసంహరించుకుంటున్నారు. మోతీలాల్ ఓస్వాల్ ఫైనాన్షియల్ సర్వీసెస్ డేటా ప్రకారం, నిఫ్టీ-500 కంపెనీలలో విదేశీ ఇన్వెస్టర్ల ఐటీ రంగానికి సంబంధించిన కేటాయింపులు 2026 మార్చి త్రైమాసికానికి ఆల్-టైమ్ లో స్థాయి అయిన 7.3 శాతానికి పడిపోయాయి. అమెరికా, తైవాన్, కొరియా, జపాన్ దేశాలలో స్పష్టమైన ఏఐ ఆధారిత ఆదాయ వృద్ధి కనిపిస్తుండటంతో, ఎఫ్‌ఐఐలు భారతీయ ఐటీని వదిలి ఆయా దేశాల వైపు మొగ్గు చూపుతున్నారు. కేవలం మాటల్లో కాకుండా, ఏఐ ద్వారా ఆదాయం వస్తోందనే బలమైన ఆధారాలు చూపిస్తే తప్ప ఐటీ షేర్లలో మళ్లీ స్థిరమైన రికవరీ కష్టమని, అప్పటివరకు ప్రతి పెరగుదల కూడా అమ్మకాలకు అవకాశంగానే మారుతుందని నిపుణులు హెచ్చరిస్తున్నారు.