ఐ.పి.ఎల్.-6 లో క్రిస్ గేల్ మరోసారి విజృంభించడంతో కోల్ కత్తా నైట్ రైడర్స్ బౌలర్లకు చుక్కలు కనిపించాయి. క్రిస్ గేల్ వీరవిహారంతో బెంగళూరు రాయల్ ఛాలెంజర్స్ 155 పరుగుల లక్ష్యాన్ని కేవలం 17.3 ఓవర్లలో 2 వికెట్లు కోల్పోయి 156 పరుగులు ఛేదించింది. మొదట టాస్ గెలిచి బెంగళూరు రాయల్ ఛాలెంజర్స్ ఫీల్డింగ్ ఎంచుకుంది. కోల్ కత్తా ఓపెనర్ బిస్లా (1) తొలి ఓవర్లోనే పెవిలియన్ చేరుకున్నాడు. మరో ఓపెనర్ కోల్ కత్తా నైట్ రైడర్స్ కెప్టెన్ గౌతమ్ గంభీర్ కు జాక్విస్ కల్లీస్ జత కలిశాడు. వీరిద్దరూ ఇన్నింగ్స్ ను సరిదిద్దే క్రమంలో జట్టుస్కోరు 54 వద్ద ఉండగా వినయ్ కుమార్ బౌలింగ్ లో కల్లీస్ 16 పరుగులు చేసి వెనుదిరిగాడు. గౌతమ్ గంభీర్ 46 బంతుల్లో 59 పరుగులు చేశాడు. యూసుఫ్ పఠాన్ 27, డివిలియర్స్ 23, మనోజ్ తివారీ 23 ఇన్నింగ్స్ రన్ రేట్ పెంచేక్రమంలో ధాటిగా ఆడి పెవిలియన్ చేరుకున్నారు. కోల్ కత్తా నైట్ రైడర్స్ మిగతా బ్యాట్స్ మెన్ స్కోర్లు మోర్గాన్ 2, భాటియా 13, మెక్ లారెన్ 2, సంగ్వాన్ 4 నాటౌట్, నరైన్ 1 నాటౌట్. నిర్ణీత ఇరవై ఓవర్లలో 8 వికెట్లకు 154 పరుగుల వద్ద తెరపడింది. తరువాత ఇన్నింగ్స్ ప్రారంభించిన బెంగళూరు రాయల్ ఛాలెంజర్స్ ఓపెనర్ అగర్వాల్ (6) వికెట్ ను జారవిడుచుకున్నా మరొక ఓపెనర్ క్రిస్ గేల్ కు కెప్టెన్ విరాట్ కోహ్లీ తోడవడంతో ఛాలెంజర్స్ ఇన్నింగ్స్ జెట్ స్పీడ్ లో పరుగులు రాబట్టింది. క్రిస్ గేల్ ఆకాశమే సరిహద్దుగా చెలరేగిపోయాడు. క్రిస్ గేల్ రికార్డ్ స్థాయిలో తొమ్మిది సిక్సర్లు బాదాడు. క్రిస్ గేల్ 50 బంతుల్లో 85 నాటౌట్, ఇందులో 4 బౌండరీలు కాగా 9 సిక్సర్లు ఉన్నాయి. కోహ్లీ 35 పరుగులు, డీవిలియర్స్ 22 నాటౌట్ గా నిలిచారు. కోల్ కత్తా నైట్ రైడర్స్ బౌలర్లకు చుక్కలు చూపించిన క్రిస్ గేల్ కు మ్యాన్ ఆఫ్ ది మ్యాచ్ అవార్డు దక్కింది.