టర్కీలోని అంతాల్య నగరంలో జరిగిన ప్రతిష్టాత్మక ఆర్చేరీ వరల్డ్ కప్ స్టేజ్ 3 టోర్నమెంట్‌లో సరికొత్త చరిత్ర సృష్టించబడింది. రికర్వ్ మిక్స్‌డ్ టీమ్ విభాగంలో భారత యువ విలుకాడు, ఒలింపియన్ బొమ్మదేవర ధీరజ్, 17 ఏళ్ల నూతన సంచలనం కుంకుమ్ మొహోద్ అద్భుత ప్రదర్శనతో బంగారు పతకాన్ని కైవసం చేసుకున్నారు. ప్రపంచ ఆర్చేరీ రంగంలో తిరుగులేని శక్తులుగా పేరొందిన ఒలింపిక్ ఛాంపియన్స్ దక్షిణ కొరియా జట్టును మట్టికరిపించి భారత ద్వయం అసాధారణ విజయాన్ని నమోదు చేసింది. ఫైనల్ పోరులో కొరియాకు చెందిన స్టార్ ఆర్చర్లు కిమ్ జె-డియోక్, ఓ యే-జిన్ జంటపై 5-1 (37-36, 37-36, 39-39) తేడాతో భారత షూటర్లు ఘనవిజయం సాధించారు.

ఈ అద్భుతమైన విజయం భారత విలువిద్యలో ఒక సరికొత్త శకానికి నాంది పలికింది. కేవలం 17 సంవత్సరాల వయస్సులోనే అత్యంత పరిణతి చెందిన ఆట తీరును ప్రదర్శించిన కుంకుమ్, ప్రత్యర్థి ఎంతటి బలమైనదైనా ఒత్తిడికి లోనుకాకుండా తన లక్ష్యంపై మాత్రమే దృష్టి పెట్టానని చెప్పడం విశేషం. వరల్డ్ కప్ సిరీస్‌లో రికర్వ్ మిక్స్‌డ్ టీమ్ ఈవెంట్‌లో ధీరజ్, కుంకుమ్ ఇద్దరికీ ఇదే మొట్టమొదటి బంగారు పతకం కావడం విశేషం. గతంలో 2024, 2025 లలో కాంస్య పతకాలతో సరిపెట్టుకున్న 24 ఏళ్ల ధీరజ్, ఎట్టకేలకు ఈ స్వర్ణంతో తన కలని నెరవేర్చుకున్నాడు.

ఈ హై-వోల్టేజ్ ఫైనల్ మ్యాచ్ ఉత్కంఠభరితంగా సాగింది. మొదటి సెట్‌లో కొరియా ఆటగాడు కిమ్ ఊహించని విధంగా 7 పాయింట్లతో ప్రారంభించగా, కుంకుమ్ 9 పాయింట్లతో దీటుగా స్పందించింది. ఆపై ధీరజ్ తన అమోఘమైన బాణంతో పర్ఫెక్ట్ 10 స్కోర్ సాధించడంతో భారత్ తొలి సెట్‌ను 37-36తో కైవసం చేసుకుని 2-0 ఆధిక్యంలోకి దూసుకెళ్లింది. రెండో సెట్‌లో కూడా అదే జోరును కొనసాగిస్తూ భారత జంట మరోసారి 37-36తో గెలిచి 4-0తో కొరియాను పూర్తిగా ఒత్తిడిలోకి నెట్టేసింది. ఆఖరి సెట్‌లో కొరియా పుంజుకోవడానికి ప్రయత్నించినప్పటికీ, నిర్ణయాత్మక క్షణాల్లో ధీరజ్ సంధించిన పర్ఫెక్ట్ 10 పాయింట్ల బాణం మ్యాచ్‌ను 39-39తో డ్రాగా ముగించి, ఓవరాల్‌గా 5-1తో స్వర్ణాన్ని భారత్ ఖాతాలో వేసింది.

ఈ చారిత్రాత్మక విజయంతో ధీరజ్, కుంకుమ్ జోడి.. వరల్డ్ కప్ స్టేజ్‌లో మిక్స్‌డ్ రికర్వ్ విభాగంలో స్వర్ణం సాధించిన మూడో భారతీయ జంటగా రికార్డు పుటల్లోకి ఎక్కారు. గతంలో 2021లో దీపికా కుమారి - అతాను దాస్, 2022లో తరుణ్‌దీప్ రాయ్ - రిధి మాత్రమే ఈ ఘనత సాధించారు. కేవలం మిక్స్‌డ్ టీమ్‌లోనే కాకుండా, ధీరజ్ పురుషుల వ్యక్తిగత రికర్వ్ విభాగంలో కూడా కొరియాకు చెందిన ఒలింపిక్ బ్రాంజ్ మెడలిస్ట్ లీ వూ-సిక్‌ను 7-3 తేడాతో ఓడించి మరో స్వర్ణ పతకాన్ని గెలుచుకుని అరుదైన డబుల్ గోల్డ్ రికార్డును నెలకొల్పాడు. రాబోయే ఆసియా క్రీడలకు కేవలం 3 నెలల సమయం మాత్రమే ఉన్న తరుణంలో, కొరియా లాంటి దిగ్గజాలపై సాధించిన ఈ విజయం భారత రికర్వ్ ఆర్చర్స్ ఆత్మవిశ్వాసాన్ని రెట్టింపు చేసింది.