ఆంధ్రప్రదేశ్ విద్యా రంగాన్ని అంతర్జాతీయ ప్రమాణాలకు అనుగుణంగా తీర్చిదిద్దే లక్ష్యంతో విద్యాశాఖ మంత్రి నారా లోకేష్ మరో కీలక అడుగు వేశారు. ఇటీవల ప్రభుత్వ పాఠశాల విద్యార్థులను విజ్ఞాన యాత్ర కోసం  పంపిన ప్రభుత్వం.. ఇప్పుడు బోధనా పద్ధతుల్లో నాణ్యతను పెంచేందుకు ఉపాధ్యాయులపై దృష్టి సారించింది. రాష్ట్రవ్యాప్తంగా ప్రతిభ కనబరిచిన 37 మంది ప్రభుత్వ ఉపాధ్యాయులను వారం రోజుల పాటు సింగపూర్‌లో శిక్షణ ఇప్పించేందుకు ప్రభుత్వం గ్రీన్ సిగ్నల్ ఇచ్చింది. విద్యార్థుల భవిష్యత్తును తీర్చిదిద్దే ఉపాధ్యాయులకు ప్రపంచస్థాయి బోధనా పద్ధతులపై అవగాహన కల్పించడమే ఈ పర్యటన ప్రధాన ఉద్దేశ్యం. ఈ పర్యటనలో భాగంగా ఎంపికైన ఉపాధ్యాయులు సింగపూర్‌లోని అత్యాధునిక విద్యాసంస్థలను సందర్శించనున్నారు. అక్కడ అమలులో ఉన్న డిజిటల్ లెర్నింగ్ మెథడ్స్, స్మార్ట్ క్లాస్‌రూమ్ మేనేజ్‌మెంట్, ప్రాజెక్ట్ బేస్డ్ టీచింగ్ వంటి అంశాలను క్షేత్రస్థాయిలో పరిశీలిస్తారు. అభివృద్ధి చెందిన దేశాల్లో విద్యార్థుల నైపుణ్యాలను ఎలా అంచనా వేస్తారు , వారిని తరగతి గదిలో ఎలా భాగస్వామ్యం చేస్తారు అనే విషయాలపై ఈ శిక్షణ శిబిరం సాగనుంది. తద్వారా మన రాష్ట్రంలోని ప్రభుత్వ పాఠశాలల్లో కూడా అదే తరహా బోధనా వాతావరణాన్ని తీసుకురావాలని ప్రభుత్వం భావిస్తోంది.

గత కొద్ది కాలంగా మంత్రి లోకేష్ నేతృత్వంలో విద్యాశాఖ పలు విప్లవాత్మక మార్పులకు శ్రీకారం చుట్టింది. కొద్దిరోజుల క్రితమే ఏపీ ప్రభుత్వ పాఠశాలలకు చెందిన విద్యార్థుల బృందం ఢిల్లీ పర్యటనకు వెళ్లి..  అక్కడి సైన్స్ సెంటర్లు, ప్రముఖ విద్యా సంస్థలను సందర్శించి వచ్చిన సంగతి తెలిసిందే. పుస్తకాల్లోని జ్ఞానానికి తోడుగా విద్యార్థులకు వాస్తవిక ప్రపంచంపై అవగాహన కల్పించేందుకు  ఆ యాత్ర ఎంతో దోహదపడింది. ఇప్పుడు ఉపాధ్యాయులను కూడా విదేశాలకు పంపడం ద్వారా అటు విద్యార్థులకు, ఇటు ఉపాధ్యాయులకు ఇద్దరికీ సమానమైన ప్రాధాన్యత ఇస్తున్నట్లు స్పష్టమవుతోంది.

సింగపూర్ పర్యటన ముగించుకుని తిరిగి వచ్చిన తర్వాత, ఈ 37 మంది ఉపాధ్యాయులు తాము నేర్చుకున్న అంతర్జాతీయ పద్ధతులను రాష్ట్రంలోని ఇతర ఉపాధ్యాయులతో పంచుకోనున్నారు. ఒక రకంగా వీరు మాస్టర్ ట్రైనర్స్ గా వ్యవహరిస్తూ, జిల్లాల వారీగా వర్క్‌షాప్‌లు నిర్వహించే అవకాశం ఉంది. దీనివల్ల రాష్ట్రవ్యాప్తంగా ఉన్న వేలాది మంది టీచర్లకు ఆధునిక బోధనా మెలకువలు తెలిసే అవకాశం ఉంటుంది. మౌలిక సదుపాయాల కల్పనతో పాటు విద్యా ప్రమాణాలను పెంచడంపైనే ప్రభుత్వం ప్రస్తుత దృష్టి సారిస్తోంది.

గత ప్రభుత్వ హయాంలో ఉపాధ్యాయులు బోధనేతర పనులకు, ముఖ్యంగా మరుగుదొడ్ల ఫోటోలు తీయడం వంటి విధులకు పరిమితమయ్యారనే విమర్శలున్నాయి. ఆ పరిస్థితుల నుంచి ఉపాధ్యాయులను విముక్తి చేస్తూ, వారి గౌరవాన్ని  పెంచే దిశగా  ప్రస్తుత ప్రభుత్వం ముందుకు సాగుతోంది.  కేవలం భౌతిక వనరులు మాత్రమే కాకుండా, మేధోపరమైన వనరులను పెంపొందించడం ద్వారానే విద్యా వ్యవస్థ ప్రక్షాళన సాధ్యమని ప్రభుత్వం బలంగా నమ్ముతోంది.

రానున్న రోజుల్లో మరిన్ని బృందాలను విదేశీ పర్యటనలకు పంపే యోచనలో విద్యాశాఖ ఉన్నట్లు తెలుస్తోంది. ప్రభుత్వ పాఠశాలల ఫలితాల్లో ప్రైవేట్ సంస్థలకు దీటుగా రాణించేలా విద్యార్థులను తీర్చిదిద్దడమే లక్ష్యంగా ఈ ప్రయత్నాలు సాగుతున్నాయి. ఈ అంతర్జాతీయ శిక్షణతో ఏపీలోని ప్రభుత్వ పాఠశాలల రూపురేఖలు మారి, విద్యార్థులు గ్లోబల్ కాంపిటీషన్‌కు సిద్ధమవుతారని విద్యా రంగ నిపుణులు ఆశాభావం వ్యక్తం చేస్తున్నారు. మంత్రి లోకేష్ తీసుకుంటున్న ఈ నిర్ణయాలు ఏపీ విద్యా రంగంలో దీర్ఘకాలిక మార్పులకు నాంది పలుకుతాయని భావిస్తున్నారు.