Home  
Latest News

రాష్ట్రపతి ప్రసంగంలో పోలవరం

పార్లమెంటు బడ్జెట్ సమావేశాలు శుక్రవారం (జనవరి 31) ప్రారంభమయ్యాయి. ఆ సందర్భంగా రాష్ట్రపతి ద్రౌపది ముర్ము ఉభయ సభలను ఉద్దేశించి చేసిన ప్రసంగంలో ఆంధ్రప్రదేశ్ జీవనాడి పోలవరం ప్రాజెక్టు గురించి ప్రస్తావించారు. జాతీయ ప్రాజెక్టు అయిన పోలవరాన్ని నిర్దుష్ట సమయంలో పూర్తి చేయడానికి కేంద్ర ప్రభుత్వం కట్టుబడి ఉందని ఉద్ఘాటించారు.  ఈ ప్రాజెక్టుకు కేంద్రం  ఇప్పటికే రూ.12,000 కోట్లు కేటాయించింద తెలిపారు.  పోలవరంతో పాటు ఎన్డీయే ప్రభుత్వ లక్ష్యాలు, ఉద్దేశాలను ఆమె తన ప్రసంగంలో వివరించారు. దేశాన్ని గ్లోబల్ ఇన్నోవేషన్ పవర్‌హౌస్ గా మార్చాలన్నదే ప్రభుత్వ లక్ష్యమని చెప్పారు.  అందుకు దోహదం చేసే ఇండియా ఏఐ మిషన్ అన్నారు. ఇ  కృత్రిమ మేధస్సు రంగంలో భారతదేశం పాత్రను పెంచడం లక్ష్యంగా ఆ మిషన్ పని చేస్తున్నదని ముర్ము అన్నారు.  సైన్స్, స్టార్టప్‌ల నుంచి అంతరిక్ష పరిశోధన వరకు వివిధ రంగాలలో భారతీయ యువత అపార నైపుణ్యం చూపుతోందన్నారు.   అభివృద్ధి చెందిన భారతదేశ నిర్మించడంలో రైతులు, సైనికులు, సైన్స్‌తో పాటు పరిశోధనలు చాలా ముఖ్యమైన పాత్ర పోషిస్తాయన్నారు.  దేశంలోని విద్యా సంస్థల్లో పరిశోధనలను ప్రోత్సహించేందుకు 50 వేల కోట్ల రూపాయల వ్యయంతో నేషనల్ రీసెర్చ్ ఫౌండేషన్ స్థాపించినట్లు చెప్పారు. మధ్యతరగతి గృహాలు, గిరిజన సంక్షేమంపై ప్రభుత్వం దృష్టి సారించిందని, అలాగే చిన్న వ్యాపారులకు సైతం రుణాలను రెట్టింపు చెసినట్లు చెప్పారు. మహాకుంభమేళాలో మౌని అమావాస్య నాడు జరిగిన ప్రమాదం పట్ల ముర్ము సంతాపం వ్యక్తం చేశారు. అలాగే మాజీ ప్రధాని మన్మోహన్ సింగ్‌కు నివాళులర్పించారు. యువతకు విద్య, ఉపాధి కల్పన విషయంలో కేంద్ర ప్రభుత్వం ప్రత్యేక శ్రద్ధ చూపుతోందని,  మహిళా సాధికారతకు పెద్దపీట వేస్తోందని ముర్ము అన్నారు. 

బాబోయ్ అమెరికాలో ఉద్యోగం వద్దు ... ఇంటి బాట పడుతున్న తెలుగు విద్యార్థులు

ఉన్నత చదువుల కోసం ఎఫ్ 1 విసాపై అమెరికాలో పార్ట్ టైం ఉద్యోగులు చేస్తున్న  తెలుగు విద్యార్థులు, యువకులు భయాందోళనకు లోనవుతున్నారు. అమెరికా ఫస్ట్ అంటూ ట్రంప్ నినాదం ఇపుడు ఇండియన్స్  గుండెల్లో రైళ్లు పరుగెడుతున్నాయి. ముఖ్యంగా తెలుగువారిపై తీవ్ర ప్రభావం చూపింది. చదువు కోసం అమెరికా వెళ్లిన విద్యార్థులు దాదాపు 7 వేల మంది విద్యార్థులు ఉన్నారు. ఈ ఏడు వేల విద్యార్థులు బిక్కు బిక్కు మంటూ కాలం గడుపుతున్నారు. ట్రంప్ అధికారంలో వచ్చిన తర్వాత ఇమ్మిగ్రేషన్ చట్టాలను పునరుద్దరించారు. రానున్న రోజుల్లో వీసా చట్టాలను మరింత కఠినతరం చేస్తామని ట్రంప్ సర్కార్ చెబుతోంది. ఒక వేళ ట్రంప్ ఇలాంటి నిర్ణయం తీసుకుంటే తెలుగు విద్యార్థులు ఇంటి బాట పట్టాల్సిందే.  వీసాలు  సాధారణంగా మూడు రకాలు ఉంటాయి. ఒకటి ఎఫ్ 1, రెండోది జె 1, మూడోది ఎం 1   . ట్రంప్  అమెరికా అధ్యక్షుడుగా నియామకమైన తర్వాత ఎగ్జిక్యూటివ్ ఆదేశాలపై సంతకాలు పెట్టేస్తున్నారు. అక్రమ వలసదారులపై ఆయన ఉక్కు పాదం మోపారు. పార్ట్ టైం ఉద్యోగాలు చేస్తున్న విద్యార్థులు ఉద్యోగం దేవుడెరుగు కనీసం ఇక్కడ ఉండనిస్తే చాలు అనే స్టేజికి వచ్చేశారు. తమను ఎక్కడ దేశబహిష్కరణకు గురి చేస్తారోనని వణికిపోతున్నారు. ఇమ్మిగ్రేషన్ అధికారులు తనిఖీలు చేయడం ప్రారంభించారు. రిస్క్ తీసుకుని స్టూడెంట్ వీసాలు తీసుకున్న వారంతా ఇంటి బాట పట్టే పరిస్థితి నెలకొంది. వీరంతా ఎఫ్ 1 వీసాపై ఉన్నవారే. వారానికి 20 గంటలు మించి పార్ట్ టైం ఉద్యోగం చేయకూడదు.  నిర్దేశిత స్థలంలోనే ఈ ఉద్యోగం చేసుకోవచ్చు. ఈ నిబంధన ఉల్లంఘిస్తే దేశ బహిష్కారం తప్పదు. రెస్టారెంట్లు, పెట్రోల్ బంక్ లు, రిటైల్ స్టోర్ ల్లో అక్రమంగా పని చేస్తున్న వారు వేల సంఖ్యలో ఉన్నారు. వీరి పరిస్థితి దారుణంగా ఉంది. 

కర్నూలులో హైకోర్టు బెంచ్ ఏర్పాటు.. స్థలం, సౌకర్యాలపై అధ్యయనం

ఆంధ్రప్రదేశ్ మాజీ ముఖ్యమంత్రి వైఎస్ జగన్మోహన్ రెడ్డి తరచూ మాట తప్పను, మడమ తిప్పను అని చెబుతుంటారు. విశ్వసనీయత కోల్పోను అని కూడా చెబుతుంటారు. కానీ ఐదేళ్ల తన పాలనలో జగన్ రెడ్డి ఎన్నిసార్లు మాట తప్పారో.. మరెన్ని సార్లు మడమ తిప్పారో లేక్కలేదు. ఆయన మాట ఇవ్వడం తప్పడానికే అన్నట్లుగా నెటిజన్లు పలు సందర్భాలలో సెటైర్లు కూడా వేశారు. ఇక ఆయన విశ్వసనీయత ఏంత అన్నది 2024 ఎన్నికలలో జనం ఇచ్చిన తీర్పే చెప్పేసింది. అందుకు భిన్నంగా తెలుగుదేశం అధినేత, ఆంధ్రప్రదేశ్ ముఖ్యమంత్రి చంద్రబాబు ఇచ్చిన మాట నిలబెట్టుకోవడంలో తన తరువాతే ఎవరైనా అని చాటుతున్నారు.  జగన్ మోహన్ రెడ్డి కర్నూలును న్యాయరాజధాని అని ప్రకటించి.. ఆ తరువాత ఆ విషయమే మర్చిపోతే.. చంద్రబాబు కర్నూలులో హైకోర్టు బెంచ్ అని హామీ ఇచ్చి ఇప్పుడా హామీని నెరవేర్చే దిశగా వేగంగా అడుగులు వేస్తున్నారు. ఇప్పటికే కర్నూలులో హైకోర్టు బెంచ్ కు అనుమతులు రాగా, అక్కడ హైకోర్టు బెంచ్ ఏర్పాటుకు అనువైన స్థలం వసతులపై అధ్యయనం ప్రారంభమైంది. తాజాగా కర్నూలు కలెక్టర్ రంజిత్ బాషా.. ఈ మేరకు అధికారులకు ఆదేశాలు జారీ ేశారు. హైకోర్టు బెంచ్ ఏర్పాటుకు అవసరమైన స్థలం, వసతులపై అధ్యయనం చేయాలని ఆయన అధికారులకు ఇచ్చిన ఆదేశాల సారాంశం.  కర్నూలులో ‘హైకోర్టు బెంచ్’ ఏర్పాటు చేస్తామని ‘ప్రజాగలం’ సభలో  హామీ ఇచ్చిన చంద్రబాబు తమ ప్రభుత్వం అధికారంలోకి వచ్చిన వెంటనే ఆ దిశగా కసరత్తు ప్రారంభించి కీలక పురోగతిని సాధించింది.  కర్నూలులో హైకోర్టు బెంచ్ ఏర్పాటుకు వెంటనే చర్యలు తీసుకోవాలని కోరుతూ హైకోర్టు రిజిస్ట్రార్ జనరల్‌కు ప్రభుత్వం లేఖ రాసింది. కర్నూలులో ఏపీ హైకోర్టు శాశ్వత ధర్మాసనాన్ని ఏర్పాటు చేయాలని కేంద్రానికి పంపాలన్న తీర్మానాన్ని ఏపీ అసెంబ్లీ ఆమోదించింది.   కర్నూలులో లోకాయుక్త, రాష్ట్ర మానవ హక్కుల కమిషన్ వంటి సంస్థలను ఏర్పాటు చేసేందుకు కూడా చంద్రబాబు ప్రభుత్వం కార్యాచరణను రెడీ చేసింది.  

ద్వారకా తిరుమలరావు పదవీ విరమణ.. నూతన డీజీపీగా హరీష్ కుమార్ గుప్తా బాధ్యతల స్వీకరణ

ఆంధ్రప్రదేశ్ డీజీపీ ద్వారకా తిరుమలరావు శుక్రవారం (జనవరి 31) పదవీ విరమణ చేశారు.  ఈ సందర్భంగా ఆయనకు ఘన వీడ్కోలు లభించింది. మంగళగిరిలోని ఆరోబెటాలియన్ మైదానంలో జరిగిన వీడ్కోలు పరేడ్ లో ఆయన పోలీసుల గౌరవవందనం స్వీకరించారు. ఈ కార్యక్రమానికి రాష్ట్రంలోని ఐపీఎస్ అధికారులంతా హాజరయ్యారు. ఈ సందర్భంగా మాట్లాడిన మాజీ డీజీపీ ద్వారకా తిరుమలరావు భావోద్వేగానికి గురయ్యారు. ఇకపై యూనిఫారంకు దూరమౌతున్నానన్న ఆలోచనే భరించలేకున్నానన్నారు. తన జీవితంలోనే ఇవి అంత్యంత ఉద్విగ్నభరిత క్షణాలు అన్న ద్వారకా తిరుమలరావు.. తన కెరీర్ లో ఎన్నో సవాళ్లను ఎదుర్కొన్నాన్నారు. సంప్రదాయ పోలీసింగ్ నుంచి సాంకేతిక పోలీసింగ్ వరకూ అన్నీ చూశానన్నారు.  కాగా పోలీసు శాఖపై ద్వారకాతిరుమలరావు చెరగని ముద్ర వేశారని నూతన డీజీపీ హరీష్ కుమార్ గుప్తా అన్నారు.  ప్రజా భద్రత కోసం పలు సంస్కరణలు చేపట్టారనీ, మాదక ద్రవ్యాల నియంత్రణ కోసం ఈగల్ టీమ్ ఏర్పాటు కూడా ద్వారకా తిరుమలరావు ఆలోచనేనని చెప్పిన ఆయన రాష్ట్రంలో శాంతి భద్రతల పరిరక్షణ కోసం శక్తివంచన లేకుండా పని చేస్తానన్న హరీష్ కుమార్ గుప్తా సోషల్ మీడియాలో అనుచిత పోస్టులు పెట్టే వారిపై ఉక్కుపాదం మోపుతామని హెచ్చరించారు. 

కొత్త డయాఫ్రమ్ వాల్ నిర్మాణం.. 990 కోట్ల వ్యయానికి వనరులశాఖ ఆమోదం

జగన్ ప్రభుత్వ నిర్వాకంతో  మూలన పడిన పోలవరం ప్రాజెక్టు పనులు ఇప్పుడు జోరందుకున్నాయి. ఆంధ్రప్రదేశ్ కు జీవనాడి పోలవరం ప్రాజెక్టు అని ప్రకటించిన చంద్రబాబు 2014లో అధికారంలోకి వచ్చిన క్షణం నుంచీ ఆ ప్రాజెక్టు పై ప్రత్యేక శ్రద్ధ పెట్టారు. ప్రతి సోమవారాన్ని పోలవారంగా మార్చుకుని అప్పట్లో ప్రాజెక్టును సందర్శించి పనులను పరుగులెత్తించేవారు.  దక్షణ భారతదేశంలో అత్యధిక నీళ్లు ఉండే ఏకైక నది గోదావరి. యేటా 3 వేల టీఎంసీల నీరు వృధాగా ఉప్పు సముద్రం పాలౌతోంది. ఆ నీటిని ఒడిసిపట్టి వినియోగించుకుంటే రాష్ట్రంలో కరవు అనేదే ఉండదు. అటువంటి పోలవరం కోసం చంద్రబాబు 2014 ఎన్నికలలో గెలిచిన తరువాత తన దృష్టినంతా కేంద్రీకరించారు. పోలవరం ముంపు మండలాలను ఏపీలో విలీనం చేసే వరకూ ముఖ్యమంత్రిగా ప్రమాణ స్వీకారం చేసేది లేదని పట్టుబట్టి మరీ సాధించుకున్నారు.  చంద్రబాబు హయాంలో ఒకే రోజున 32,315 క్యూబిక్‌ మీటర్ల కాంక్రీట్‌ పనులు పూర్తి చేసి గిన్నిస్‌ రికార్డ్‌ సృష్టించారు.   31 సార్లు క్షేత్రస్థాయిలో పోలవరంలో పర్యటించారు. ఈ ప్రాజెక్టు పూర్తి చేస్తే వ్యవసాయానికి ఊతం వస్తుందనే ఉద్దేశంతో ప్రత్యేక శ్రద్ధ పెట్టి ప్రాజెక్టుకు ఉన్న అడ్డంకులన్నీ క్లియర్‌ చేశారు. ఈ ప్రాజెక్టు కోసం 2014-19 మధ్య కాలంలో అప్పటి తెలుగుదేశం ప్రభుత్వం రూ.11, 762.47 కోట్లు ఖర్చు చేసింది. అయితే 2019లో అధికారంలోకి వచ్చిన జగన్  ప్రభుత్వం పోలవరం పనులను నిలిపివేసింది. రివర్స్ టెండరింగ్ అంటూ అప్పటి వరకూ జోరుగా సాగుతున్న నిర్మాణాలను పడుకోపెట్టేసింది.   జగన్‌ సీఎంగా ప్రమాణస్వీకారం చేసిన రోజే ప్రాజెక్టు పనులు నిలిపేసింది.   ప్రత్యామ్నాయ ఏర్పాట్లు చేయకుండానే పని చేసే ఏజెన్సీలను తొలగించింది. 2019 జూన్‌ నుండి నవంబర్‌ వరకు ప్రాజెక్టు నిర్మాణ పనులు చూసే ఏజెన్సీ కూడా లేదు. ఆ కారణంగానే   ఆ తరువాత వరదలతో డయాఫ్రం వాల్‌ దెబ్బతింది. ఈ విషయాన్ని హైదరాబాద్‌ ఐఐటీ నిపుణులు స్పష్టం చేశారు. ఐదేళ్ల పాటు పోలవరం అతీగతీ పట్టించుకోకుండా వదిలేయడంతో అప్పటికే  72శాతం పనులు పూర్తైన పోలవరం పరిస్థితి మొదటికి వచ్చినట్లుగా అయ్యింది. జగన్ నిర్వాకం కారణంగా సర్వనాశనమైన పోలవరం ప్రాజెక్టుకు మరమ్మతులు చేపట్టినా బాగుపడుతుందనే గ్యారంటీ లేని పరిస్థితి ఏర్పడింది. ఇప్పుడు మళ్లీ చంద్రబాబు ప్రభుత్వం పగ్గాలు చేపట్టడంతో పోలవరంకు మంచి రోజులు వచ్చాయి. పోలవరం ప్రాజెక్టుకు జగన్ శాపంగా మారితే.. చంద్రబాబు ఆశాకిరణంగా నిలిచారు.  ఇప్పుడు మళ్లీ పోలవరం పూర్తిపై ఆశలు చిగురించాయి.  దెబ్బతిన్న డయాఫ్రమ్ వాల్ స్థానంలో కొత్తగా 63,656మీటర్ల మేర సమాంతర డయాఫ్రమ్ వాల్ను నిర్మించేందుకు రూ.990 కోట్ల వ్యయం అవుతుందని ప్రాజెక్టు చీఫ్ ఇంజనీరు  సమర్పించిన అంచనాకు రాష్ట్ర జలవనరులశాఖ ఆమోదం తెలిపింది. కాగా కొత్త డయాఫ్రమ్ వాల్ పనులను పరిశీలించేందుకు అంతర్జాతీయ నిపుణుల బృందంలోని అమెరికాకు చెందిన డియాన్ ఫ్రాన్ కో డి కికో, డేవిడ్ బి పాల్ శనివారం(ఫిబ్రవరి 1) పోలవరానికి రానున్నారు.

సస్పెన్షన్ కుగురైన ఎస్సై సూసైడ్‌!

ఆంధ్రప్రదేశ్ లో ఒక సబ్ ఇన్ స్పెక్టర్ ఆత్మహత్య చేసుకున్నారు. పశ్చిమగోదావరి జిల్లా తణుకు రూరల్ పోలీసు స్టేషన్ లో ఇటీవలి కాలం వరకూ  ఎస్ఐగా విధులు నిర్వహించిన  ఏజీఎస్ మూర్తి   ఇటీవల సస్పెండ్ అయ్యారు. దీంతో గత కొద్ది రోజులుగా డిప్రషన్ కు గురైన ఆయన శుక్రవారం (జనవరి 31) ఉదయం తన  రివాల్వర్ తో కాల్చుకుని బలవన్మరణానికి పాల్పడ్డారు. అయితే ఆయన ఆత్మహత్యకు కారణాలేమిటన్నదానిపై పూర్తి క్లారిటీ రావాల్సి ఉంది. ఏజీఎస్ మూర్తి ఆత్మహత్య సమాచారం అందుకున్న పోలీసులు సంఘటనా స్థలానికి చేరుకుని దర్యాప్తు చేస్తున్నారు.  

హైదరాబాదులో క్రీ.శ. 7వ శతాబ్ది చాళుక్య ఆనవాళ్లు

మంచిరేవులలో బాదామీ చాళుక్య ఆనవాళ్లు!  కాపాడుకోవాలంటున్నప్లీచ్ ఇండియా సీఈవో డాక్టర్ఈమని శివనాగిరెడ్డి  హైదరాబాద్ నగర శివారు గ్రామమైన మంచిరేవులలో చాళుక్య అనవాళ్లను గుర్తించినట్లు పురావస్తు పరిశోధకుడు, ప్లీచ్ ఇండియా ఫౌండేషన్, సీఈఓ, డా. ఈమని శివనాగిరెడ్డి అన్నారు. మూసీ పరివాహక గ్రామాల్లో చారిత్రక అనవాళ్లను గుర్తించే కార్యక్రమంలో భాగంగా ఆయన గురువారం నాడు మంచిరేవుల గ్రామంలో పర్యటించి ఆంజనేయస్వామి దేవాలయంలో రావి చెట్టు కింద ఉన్న క్రీ.శ. 7వ శతాబ్దికి చెందిన దేవాలయ మండపం గోడలకు బిగించే రాతి కిటికి, ఆలయంలోపల గోడ పక్కనే వినాయక విగ్రహం ఉన్నాయని చెప్పారు. వినాయకుడు రెండు చేతులు మాత్రమే కలిగి తలపై కిరీటం లేకుండా లలితాసనంలో కూర్చొని ఉన్నాడనీ, అలాగే ఎర్ర ఇసుకరాతితో చెక్కిన కిటికీ చుట్టూ సాదా చట్రం, మధ్యలో గాలి, వెలుతురు ప్రసరించడానికి మూడు వరుసలలో ప్లస్ ఆకారంలో 18 కంతలు, వాటి మధ్య చక్కటి పద్మం డిజైన్లు ఉన్నాయనీ, వినాయకుని ప్రతిమా లక్షణం, కిటికీ వాస్తు విన్యాసం, బాదామీ చాళుక్యుల కాలంనాటివని, చారిత్రక ప్రాధాన్యత గల ఈ రెండు కళాఖండాల పైన రంగులు తొలగించి, పీఠాలపై నిలబెట్టి కాపాడుకోవాలని శివనాగిరెడ్డి ఆలయ ధర్మకర్తలకు, స్థానికులకు విజ్ఞప్తి చేశారు. ఈ రెండు కళాఖండాలు హైదరాబాద్ నగర చరిత్రను క్రీ.శ. 7వ శతాబ్దికి, అంటే ఇప్పటికీ 1300 సం||ల క్రితానికి తీసుకెళ్తున్నాయని , గతంలో బేగంబజారులో క్రీ.శ. 612 నాటి బాదామి చాళుక్య చక్రవర్తి రెండో పులకేశి రాగిరేకు శాసనం దొరికిన నేపథ్యంలో, ఈ రెండు  ఆధారాలు నగర చరిత్రకు అద్దంపడుతున్నాయని శివనాగిరెడ్డి అన్నారు.

యుక్త వ‌య‌స్సులో అవినీతి.. వృద్ధ వ‌య‌స్సులో జైలు.. జ‌గ‌న్ రెడ్డిదీ అదేదారా?

న్యాయవ్యవస్థను మోసం చేయడం దేశద్రోహాన్ని మించిన నేరం. ఇందులో ఎటువంటి సందేహాలకూ తావు లేదు.  దేశంలో సామాన్యులు చట్టాలని, న్యాయ తీర్పులను గౌరవిస్తూ శిక్షలు  అనుభవిస్తున్నారు. అయితే రాజకీయంగా ఉన్నత స్థాయిల్లో ఉన్న నాయకులు మాత్రం  వేల కోట్ల ప్రజా ధనం స్వాహా చేసి, న్యాయవ్యవస్థను తప్పుతోవ పట్టిస్తూ, చట్టాలను అడ్డు పెట్టుకొని  శిక్ష పడకుండా ఏళ్ల తరబడి బయట స్వేచ్ఛగా తిరుగుతున్నారు. రాజకీయంగా ప‌లుకుబ‌డి క‌లిగిన నేత‌లు.. వారు దోచేస్తున్న ప్రజాధనం, వారు గ‌డుపుతున్న విలాసవంతమైన జీవితాల గురించి అనేక దేశాల న్యాయవిద్యలో పలు అంశాలు ప్రముఖ ఉదాహరణలుగా బోధిస్తుండ‌టం గ‌మ‌నార్హం. భార‌త‌దేశంలో పాల‌క వ్య‌వ‌స్థ‌లో కీల‌కంగా వ్య‌వ‌హ‌రిస్తూ అధికారాన్ని దుర్వినియోగం చేసి వేల కోట్ల రూపాయలు ఆర్జిస్తూ ఆస్తులు కూడబెట్టిన వారు ఎందరో ఉన్నారు.  వారిలో చాలామంది జైలు శిక్షలు అనుభవించారు. అయితే, అటువంటి వారిపై కేసులు  13 నుంచి 20ఏళ్ల వరకూ సుదీర్ఘంగా విచారణ సాగడంతో అటువంటి వారు జీవిత చ‌ర‌మాంకంలో జైలు కెళ్తున్నారు. కోట్లాది రూపాయ‌ల అవినీతికి పాల్ప‌డిన వ్య‌క్తి  66 నుంచి 78 ఏళ్ల మధ్య వయస్సులో కోర్టులు శిక్ష విధిస్తే లాభమేమిటి..?  అలాంట‌ప్పుడు అది శిక్ష కాదు.. ఒక విధంగా చూస్తే అది వారికి వరం అనే చెప్పాలి.  ఎందుకంటే.. వారికి జైలు శిక్ష ప‌డే స‌మ‌యానికి ఆలనాపాలనా చూసుకునేందుకు ఎవరూ ఉండని పరిస్థితి.  ఆ దశలో కోర్టు వీరిని జైల్లో కూర్చోబెట్టి వారికి సౌకర్యాలు కల్పించి వారి ఆరోగ్యపరమైన అలనాపాలనా చూసేందుకు సిబ్బందిని నియమించడంతో రాజభోగాలు అనుభవిస్తారు. దేశంలో అధికారాన్ని అడ్డుపెట్టుకొని ఆర్థికపరమైన నేరాలకు పాల్పడిన ముఖ్య‌మంత్రులు ఉన్నారు. వారిలో కొంద‌రికి శిక్ష‌లు ప‌డ్డాయి. అయితే, వారిపై కేసుల విచార‌ణ సుదీర్ఘ‌ కాలం కొన‌సాగ‌డంతో వారికి శిక్ష‌లు ప‌డే స‌మ‌యానికి వారు వృద్ధాప్యానికి చేరుకుంటున్నారు. ఇలాంటి వారిలో కొంద‌రిని ఉదాహ‌ర‌ణ‌గా తీసుకుంటే.. ఓం ప్రకాష్ చౌతాలా, లాలూ ప్రసాద్ యాదవ్,   జయలలిత వంటి వారి గురించి చెప్పుకోవాలి. ముందుగా హర్యానా మాజీ ముఖ్యమంత్రి ఓం ప్రకాశ్ చౌతాల గురించి  చెప్పుకుంటే.. ఈయన పాతికేళ్ల  కిందట హరియాణా రాష్ట్ర ముఖ్యమంత్రిగా ఉన్నారు. 1999-2000లో జూనియర్ బేసిక్ ట్రెయిన్డ్  టీచర్ల నియామక కుంభకోణంలో  భారీ ఎత్తున అవినీతికి పాల్ప‌డ్డారు. ఈ కేసు విచార‌ణ న్యాయ‌వ్య‌వ‌స్థ‌లో సుదీర్ఘ‌ కాలం సాగింది. ఎట్టకేలకు 2013 జనవరి 22న ఆయనకు 10ఏళ్లు జైలుశిక్ష ప‌డింది. శిక్ష పడిన సమయానికి  ఆయన వయస్సు 78 సంవత్సరాలు. ఎనిమిదేళ్లు శిక్ష అనుభవించి 2021లో విడుదలయ్యారు. ఇక తమిళనాడు మాజీ ముఖ్యమంత్రి జయలలిత విష‌యానికి వ‌స్తే.. ఆమె 1991-1996 మధ్య కాలంలో 66.65 కోట్లకు పైగా ఆదాయానికి మించిన ఆస్తులను క‌లిగి ఉన్నార‌నే ఆరోపణలు ఎదుర్కొన్నారు. ఈకేసు 1996 నుండి 2014 వరకు కోర్టులో విచార‌ణ జ‌రిగింది. చివ‌రికి సుదీర్ఘ‌కాలం త‌రువాత 2014 సెప్టెంబర్ 27న నాలుగేళ్లు జైలు శిక్ష ప‌డింది. అయితే, 2015లో ఆమెను కర్ణాటక హైకోర్టు నిర్దోషిగా విడుదల చేసింది. ఆమెకు శిక్షప‌డిన స‌మ‌యంలో ఆమె వయస్సు 66 సంవత్సరాలు. కేవ‌లం 21 రోజులు మాత్రమే ఆమె జైలుజీవితం గ‌డిపారు.  ఆ తరువాత దేశ వ్యాప్తంగా పెను సంచలనం సృష్టించిన గడ్డి కుంభకోణం కేసులో బీహార్ మాజీ ముఖ్యమంత్రి లాలూ ప్రసాద్ యాదవ్ పై కేసు 1996 నుండి 2018 వరకు వివిధ కోర్టుల్లో విచార‌ణ జ‌రిగింది. సుదీర్ఘ‌కాలం విచార‌ణ త‌రువాత 2013లో ఐదేళ్ల పాటు కోర్టు ఆయ‌న‌కు జైలు శిక్ష విధించింది. అప్పుడు ఆయ‌న వ‌య‌స్సు 65ఏళ్ళు. మూడున్న‌రేళ్లు జైలు జీవితం గ‌డిపాడు.  ఇలా.. అధికారాన్ని అడ్డుపెట్టుకొని భారీ ఎత్తున అవినీతికి పాల్ప‌డిన వారంతా 10 నుంచి 20యేళ్ల సుదీర్ఘ విచార‌ణ త‌రువాత వృద్ధాప్యంలో జైలుకెళ్లిన ప‌రిస్థితి. ఇదే త‌ర‌హాలో తెలుగు రాష్ట్రాల నుంచి ఆంధ్ర‌ప్ర‌దేశ్ మాజీ ముఖ్య‌మంత్రి, వైసీపీ అధినేత  జ‌గ‌న్ మోహ‌న్ రెడ్డి కేసును చెప్పుకోవ‌చ్చు. జ‌గ‌న్ రెడ్డిపై అనేక అక్ర‌మాస్తుల కేసులు ఉన్నాయి. ఆయ‌న‌పై ఎన్ని కేసులున్నా ఇప్ప‌టికీ బెయిల్ పై సుదీర్ఘ‌కాలం బ‌య‌ట‌నే ఉంటున్నారు. ఇటీవ‌లి కాలంలో ఆయన కోర్టులో వాయిదాల‌కు కూడా హాజ‌రు కాలేదు. న్యాయస్థానానికి వెళ్లకుండా ఎలా మైంటైన్ చేస్తున్నారు. అ చట్టాలకు ఆయనేమైనా అతీతుడా.. సామాన్య ప్ర‌జ‌ల‌కు లేని న్యాయ‌ప‌ర‌మైన సౌల‌భ్యం ఆయ‌న‌కు ఎందుకు కోర్టులు క‌ల్పిస్తున్నాయ‌నేది ప్ర‌శ్న‌గా మారింది.  ఏపీ మాజీ ముఖ్య‌మంత్రి జగన్ రెడ్డి 2004-2009 కాలంలో 43వేల కోట్లకుపైగా ఆదాయానికి మించిన అక్ర‌మాస్తులు క‌లిగి ఉన్నార‌నే ఆరోపణల‌తో ఆయనపై అనేక కేసులు నమోదయ్యాయి. ఆయన తండ్రి వైఎస్ రాజశేఖర రెడ్డి ముఖ్య‌మంత్రిగా ఉన్న స‌మ‌యంలో ఆయన క్విడ్ ప్రోకో పద్ధతిలో ప్రభుత్వం నుంచి లబ్ధిపొందిన వారి నుంచి  త‌న‌ కంపెనీల్లో పెట్టుబడులు పెట్టించార‌ని ఆరోపణలపై న్యాయస్థానంలో కేసులు నమోదయ్యాయి. 14ఏళ్లుగా ఈ కేసులు కోర్టుల్లో విచార‌ణ జ‌రుగుతున్నాయి. ఈ కేసుల నేప‌థ్యంలో 2012లో ఆయ‌న అరెస్ట్ అయ్యారు. ఆ స‌మ‌యంలో ప‌ద‌హారు నెల‌లు జైలులో శిక్ష అనుభ‌వించి బెయిల్‌పై బ‌య‌ట‌కు వ‌చ్చాడు. అప్ప‌టి నుంచి ఆయన బెయిల్ పైనే ఉన్నారు. జ‌గ‌న్ రెడ్డికి ప్ర‌స్తుతం 52ఏళ్లు. ఇప్ప‌టికే ఈ కేసుల విచార‌ణ‌లో 14ఏళ్లుగా సాగుతోంది. ఆ కేసుల విచారణ వేగం చూస్తుంటే మరో దశాబ్దం పట్టినా ఆశ్చర్యపోవాల్సిన అవసరం లేదు.   అప్ప‌టికీ ఆయ‌న వ‌య‌స్సు అర‌వైయేళ్లు దాటుతుంది. ముఖ్య‌మైన కేసుల విచారణ కూడా నత్తనడకతో పోటీ పడుతుండటం వల్ల  స‌రైన స‌మ‌యంలో నిందితుల‌కు శిక్ష‌లు ప‌డ‌టం లేదు. జస్టిస్ డిలేయిడ్ ఈజ్ జస్టిస్ డినైడ్ అన్న సూక్తి రాజకీయనాయకులకు వర్తించదా అన్న అనుమానాలు కలుగుతున్నాయి. కానీ కేసుల విచారణ పూర్తి కావడానికి ఏళ్లూ పూళ్లు పడుతుండటంలో నేతలలో శిక్ష పడుతుందన్న భయం కనిపించడం లేదు. దీని వల్ల   మిగిలిన వారిలోనూ న్యాయ‌వ్య‌వ‌స్థ‌ల పట్ల భయం, గౌరవం లేకుండా పోతోందన్న వాదన బలంగా వినిపిస్తోంది.  రాజకీయ నేతలు అధికారంలోకి వచ్చిన తర్వాత అక్ర‌మ‌ సంపాదనకు పాల్పడాలంటే భయపడేలా న్యాయ‌స్థానం వేగంగా తీర్పులు ఇవ్వాల్సిన అవసరం ఉందని మెజారిటీ ప్రజలకు డిమాండ్ చేస్తున్నారు.   -భూమిరెడ్డి సాయి శ్రీనివాస్ రెడ్డి  న్యాయవాదవిద్యార్థి. అమెరికా.

బడ్జెట్ సమావేశాలపై అఖిలపక్ష సమావేశం

కేంద్ర విత్తమంత్రి నిర్మలా సీతారామన్ శనివారం (ఫిబ్రవరి 1) లోక్ సభలో 1925-26  వార్షిక బడ్జెట్ ప్రవేశపెట్టనున్న సంగతి విదితమే. కాగా లోక్ సభ బడ్జెట్ సమావేశాలు శుక్రవారం (జనవరి 31) నుంచి ప్రారంభం కానున్నాయి. రెండు విడతలుగా జరిగే ఈ బడ్జెట్ సమావేశాలలో   మొదటి విడత సమావేశాలు శుక్రవారం (జనవరి 31)న ప్రారంభమై ఫిబ్రవరి 13 వరకూ జరుగుతాయి. ఇక రెండో  విడత బడ్జెట్ సమావేశాలు మార్చి 10న ప్రారంభమై ఏప్రిల్ 4 వరకూ సాగుతాయి. ఇలా ఉండగా రాష్ట్రపతి ద్రౌపది ముర్ము శుక్రవారం (జనవరి 31) పార్లమెంటు ఉభయ సభలను ఉద్దేశించి ప్రసంగించారు.    రాష్ట్రపతి ప్రసంగం తరువాత ఆ రోజు కు సభ వాయిదా పడుతుంది. ఆ మరుసటి రోజు అంటే శనివారం (ఫిబ్రవరి 1)న కేంద్ర విత్తమంత్రి నిర్మలా సీతారామన్ వార్షిక బడ్జెట్ ను సభలో ప్రవేశ పెడతారు.  ఈ నేపథ్యంలో గురువారం (జనవరి 30) అఖిలపక్ష సమావేశం జరిగింది. కేంద్ర రక్షణ మంత్రి రాజ్ నాథ్ సింగ్ అధ్యక్షతన జరిగిన ఈ సమావేశానికి బీజేపీ జాతీయ అధ్యక్షుడు జేపీ పడ్డా, కిరణ్ రిజిజు, అర్జున్ రామ్ మేఘ్వాల్ తదితరులు హాజరు కాగా కాంగ్రెస్ నుంచి  జైరామ్ రమేశ్, గౌరవ్ గొగోయ్ హాజరయ్యారు. ఎన్డీయే, ఇండియా కూటమిలోని పార్టీల నుంచి పలువురు ఎంపీలు సమావేశంలో పాల్గొన్నారు. ఈ సమావేశంలో బడ్జెట్ సమావేశాలు సజావుగా సాగేందుకు అవసరమైన చర్యలపై చర్చించారు.  సభా కార్యక్రమాలు సజావుగా సాగేందుకు సహకరించాల్సిందిగా రాజ్ నాథ్ సింగ్ సభ్యులను కోరారు. 

తిరుమలలో భక్తుల రద్దీ సాధారణం

తిరుమలలో భక్తుల రద్దీ తగ్గింది. శుక్రవారం (జనవరి 31) ఉదయం శ్రీవారి దర్శనం కోసం వేచి ఉన్న భక్తులతో 3 కంపార్ట్ మెంట్లు నిండిపోయాయి. టైమ్ స్లాట్ భక్తులకు శ్రీవారి సర్వదర్శనానికి నాలుగు గంటల సమయం పడుతుండగా, 300 రూపాయల ప్రత్యేక ప్రవేశ దర్శనానికి మూడు గంటల సమయం పడుతోంది. ఇక టోకెన్లు లేని భక్తులకు శ్రీవారి సర్వదర్శనానికి ఎనిమిది గంటలు పడుతోంది. ఇక గురువారం (జనవరి 30) శ్రీవారిని మొత్తం5 1,349 మంది దర్శించుకోగా, వారిలో 14 వేల 82 మంది తలనీలాలు సమర్పించుకున్నారు. శ్రీవారి హుండీ ఆదాయం 3.65 కోట్ల రూపాయలు వచ్చింది. 

సీఐడీ మాజీ చీఫ్ సంజయ్‌కు ముందస్తు బెయిల్

సీఐడీ మాజీ చీఫ్ సంజయ్ కు ఆంధ్రప్రదేశ్ హైకోర్టు యాంటిసిపేటరీ  బెయిలు మంజూరు చేసింది. జగన్ హయాంలో  ఆయన పెద్ద ఎత్తున ప్రజాధనాన్ని తన ఖాతాలో వేసుకున్నాన్న అభియోగాలపై కూటమి ప్రభుత్వం ఆయనను సస్పెండ్ చేసి విచారణకు ఆదేశించిన సంగతి తెలిసిందే.   ఈ క్రమంలో ఆయన అరెస్టు భయంతో  ముందస్తు బెయిలు కోసం హైకోర్టును ఆశ్రయించారు. ఆయన యాంటిసిపేటరీ బెయిలు పిటిషన్ ను విచారించిన హైకోర్టు షరతులతో కూడిన బెయిలు మంజూరు చేసింది.   మార్గదర్శి, చంద్రబాబుపై కేసుల్లో ఆయన చేసిన ఓవరాక్షన్ అంతా ఇంతా కాదు. సర్వీస్ రూల్స్ కు వ్యతిరేకంగా ఢిల్లీ సహా పలు చోట్ల మీడియా సమావేశాలలో మాట్లాడారు.   అయితే వాటిపై కాకుండా ఆయన అధికారంలో ఉండగా అవినీతికి పాల్పడి పెద్ద ఎత్తున సొమ్ము దండుకున్నారన్న అభియోగాలపై కేసులు నమోదు అయ్యాయి. ఆ కేసుల్లోనే సంజయ్ కు ఇప్పుడు యాంటిసిపేటరీ బెయిలు లభించింది. 

ఫోన్ ట్యాపింగ్ కేసు.. ఇక అంతే సంగతులా?

తెలంగణలో సంచలనం సృష్టించిన ఫోన్ ట్యాపింగ్ కేసులో నిందితులు ఒకరి తరువాత ఒకరు బెయిలుపై బయటకు వచ్చేస్తున్నారు. ఈ కేసులో ప్రధాన నిందితుడిగా ఆరోపణలు ఎదుర్కొంటున్న వ్యక్తిని అమెరికా నుంచి వెనక్కు రప్పించేందుకు కాంగ్రెస్ సర్కార్ చేస్తున్న ప్రయత్నాలు ఒక్కటంటే ఒక్క అడుగు కూడా ముందుకు పడటం లేదు. ఈ నేపథ్యంలో ఇంక ఈ కేసు నీరుగారిపోయినట్లేనా అన్నఅనుమానాలు వ్యక్తం అవుతున్నాయి. ఒక విషయం మాత్రం రూఢీ అయ్యింది. రాష్ట్ర వ్యాప్తంగానే కాదు, దేశ వ్యాప్తంగా కూడా సంచలనం సృష్టించిన ఈ ఫోన్ ట్యాపింగ్ కేసులో పెద్ద పెద్ద తలకాయల ప్రమేయం ఉంది. ఫోన్ ట్యాపింగ్ జరిగింది. ఎంత మంది ఫోన్లు ట్యాప్ చేశారన్నది తేలియరాలేదు కానీ, అప్పటి బీఆర్ఎస్ ప్రభుత్వ హయాంలో ప్రభుత్వాన్ని వ్యతిరేకించేవారే కాదు, న్యాయమూర్తులు, సినీ తారలు ఇలా ఒకరనేమిటి  చాలా చాలా మంది ఫోన్లు ట్యాప్ అయ్యాయని తేలింది. ఇతర రాష్ట్రాలలో గవర్నర్లుగా ఉన్న వారి ఫోన్లు కూడా ట్యాప్ అయ్యాయన్న ఆరోపణలు ఉన్నారు.  ఈ కేసు దర్యాప్తు ఆరంభంలో చాలా చాలా వేగంగా సాగింది. పలువురు పోలీసు అధికారులను అరెస్టు చేసి రిమాండ్ కు పంపడం కూడా జరిగింది. అయితే ఆ తరువాత కేసు దర్యాప్తులో పురోగతి మందగించింది. అందుకు ప్రధాన కారణం ఈ కేసులో అత్యంత కీలకమైన తెలంగాణ స్పెషల్ ఇంటెలిజెన్స్ బ్రాంచ్ మాజీ చీఫ్  ప్రభాకర్ రావు. ఆయన చల్లగా అమెరికా జారుకున్నారు. ఆయనను అక్కడ నుంచి వెనక్కు రప్పించడానికి చేస్తున్న ప్రయత్నాలు ముందుకు సాగడం లేదు. అలాగే ఇదే కేసులో కీలకమైన మరో నిందితుడు ప్రవీణ్ రావు కూడా పరారీలో ఉన్నారు. ఆయన ఆచూకీ కనిపెట్టడంలోనూ పోలీసులు విఫలమయ్యారు. ఈ నేపథ్యంలోనే ఈ కేసులో చార్జిషీట్ అయితే దాఖలైంది కానీ దర్యాప్తు పురోగతి లేకుండా పోయింది. దీంతో అరెస్టైన నిందితులు ఒక్కరొక్కరుగా బయటకు వచ్చేస్తున్నారు.   తిరపతన్నకు కండీషన్ బెయిలు లభించిన తరువాత   ఈ కేసులో మరో ఇద్దరు అధికారులకు కూడా తెలంగాణ హైకోర్టు బెయిలు ఇచ్చింది.  మాజీ అదనపు ఎస్పీ భుజంగరావు, మాజీ డీసీపీ రాధాకిషన్‌రావులకు  ఒక్కొక్కరికి రూ.లక్ష పూచికత్తుతో పాటు పాస్‌పోర్ట్‌లు అధికారులకు హ్యాండోవర్ చేయాలని,  సు దర్యాప్తుకు పూర్తి సహకారం అందించాలని,  సాక్షులను ప్రభావితం చేయకూడదని షరతులు విధిస్తూ తెలంగాణ హైకోర్టు బెయిలు మంజూరు చేసింది.  

మహా కుంభమేళాలో ఫైర్ యాక్సిడెంట్

మహాకుంభమేళాను వరుస ప్రమాదాలు వెంటాడుతున్నట్లుగా కనిపిస్తోంది. ఇప్పటికే ఒకసారి భారీ అగ్నిప్రమాదం సంభవించి పెద్ద సంఖ్యలో గుడారాలు కాలిపోయాయి. ఆ తరువాత బుధవారం (జనవరి 29)తెల్లవారు జామున తొక్కిసలాట జరిగి 30 మంది మృత్యువాత పడ్డారు. మరో 60 మందికి పైగా గాయపడ్డారు. ఆ విషాదం నుంచి తేరుకోకముందే తాజాగా గురువారం (జనవరి 30) ప్రయాగ్ రాజ్ సెక్టార్ 22లో ఛట్నాగ్ ఘాట్ వద్ద అగ్రిప్రమాదం సంభవించింది. ఈ అగ్నిప్రమాదంలో 15 గుడారాలు కాలి బూడిదయ్యాయి. గ్యాస్ సిలెండర్లు పేలడంతో అగ్ని ప్రమాదం జరిగినట్లు చెబుతున్నారు. ఈ ఘటనలో ప్రాణాపాయం సంభవించలేదని అధికారులు తెలిపారు. మహాకుంభమేళాలో వరుస ప్రమాదాల పట్ల ఆందోళన వ్యక్తం అవుతోంది. రానున్న రోజులలో మహాకుంభమేళాకు వచ్చే భక్తుల సంఖ్య మరింత పెరగనుందన్న అంచనాలు ఉన్నాయి. దీంతో భక్తుల భద్రతపై ఆందోళన వ్యక్తం అవుతోంది. యూపీ సర్కార్ కుంభమేళా సందర్భంగా మరింత కట్టుదిట్టమైన భ్రదతా ఏర్పాట్లు చేయాలని భక్తులు కోరుతున్నారు. 

అత్యాచారం కేసులో కాంగ్రెస్ ఎంపీ అరెస్టు

రాజస్థాన్ లో కాంగ్రెస్ కు గట్టి ఎదురుదెబ్బ తగిలింది. అత్యాచారం కేసులో సీతాపూర్ ఎంపీ రాకేష్ రాథోడ్ ను పోలీసులు అరెస్టు చేశారు. వివాహం చేసుకుంటానని నమ్మించి ఓ యువతిపై నాలుగేళ్లుగా అత్యాచారం చేస్తున్నారంటూ అందిన ఫిర్యాదుపై ఈ అరెస్టు జరిగింది. వివాహం చేసుకుంటానని చెబుతా ఎంపీ రాకేష్ రాథోడ్ గత నాలుగేళ్లుగా తనపై అత్యాచారం చేస్తున్నారంటూ ఓ మహిళ ఈ నెల 15న ఫిర్యాదు చేసింది. ఆ ఫిర్యాదుతో పాటు రాకేష్ రాథోడ్ తనతో జరిపిన ఫోన్ కాల్స్ జాబితా, వాయిస్ రికార్డ్ లను కూడా అందజేయడంతో పోలీసులు ఆయనపై ఈనెల 17న పోలీసులు కేసు నమోదు చేశారు. కాగా   ఎంపీ యాంటిసిపేటరీ బెయిల్ పిటిషన్‌ను అలహాబాద్‌ హైకోర్టు లక్నో బెంచ్‌ డిస్మిస్ చేసింది. దీంతో పోలీసులు ఎంపీ రాకేష్‌ రాథోడ్‌ను గురువారం (జనవరి 30) అరెస్ట్‌ చేశారు. మీడియాతో మాట్లాడుతున్న సమయంలోనే పోలీసులు పోలీసులు ఆయనను  అరెస్ట్‌ చేశారు. ఆ సమయంలో కార్యకర్తలు అడ్డుకు న్నారు. దీంతో, అక్కడ ఉద్రిక్తత చోటుచేసుకుంది. ఇక, భారీ భద్రత మధ్య రాకేష్‌ను పోలీసులు కోర్టులో హాజరు పరిచారు.

ప్రభుత్వం కూటమిది.. రాజకీయం వైసీపీది!?

ఆంధ్రప్రదేశ్ లో ఐదేళ్ల జగన్ పాలనకు చరమగీతం పాడుతూ రాష్ట్ర ప్రజలు తీర్పు ఇచ్చారు. వారి తీర్పు మేరకు అఖండ మెజారిటీతో విజయం సాధించిన తెలుగుదేశం కూటమి ప్రభుత్వం కొలువుదీరింది. అలా చంద్రబాబు నాయకత్వంలో తెలుగుదేశం కూటమి కొలువుదీరి కూడా ఏడు నెలలు గడిచిపోయింది. పాలన సజావుగా సాగుతోంది. అభివృద్ధి పరుగులు పెడుతోంది. జగన్ ఐదేళ్ల హయాంలో క్షణంక్షణం భయపడుతూ బితుకు బితుకు మంటూ గడిపిన జనం ఇప్పుడు స్వేచ్ఛగా ఆనందంగా ఉన్నారు. తమ ఆస్తులకు భ్రదత లేదన్న భయం నుంచి బయటపడ్డారు. రాష్ట్రం ప్రశాంతంగా ఉంది. శాంతి భద్రతల సమస్య లేదు. అయితే ఇది మాత్రం సరిపోతుందా? అంటే ఏ మాత్రం సరిపోదంటున్నారు జనం. మరి వారేం కోరుకుంటున్నారు? జగన్ హయాంలో అడ్డగోలు దోపిడీలకు, కబ్జాలకు పాల్పడిన వారిని చట్టం ముందుకు తీసుకు వచ్చి శిక్ష పడేలా చేయాలని కోరుకుంటున్నారు. అయితే తెలుగుదేశం కూటమి ప్రభుత్వం ఆ దిశగా అడుగులు వేస్తున్నట్లు కనిపించడం లేదు. జగమెరిగిన కబ్జాదారులపై కూడా ఇప్పటి వరకూ కేసులు నమోదు కావడం లేదు. అలాంటి కబ్జాదారుల గురించిన సమాచారం ప్రభుత్వానికి తెలియదా? అన్న అనుమానాలు వ్యక్తం అవుతున్నాయి. ఒక వేళ తెలిసినా ప్రభుత్వ యంత్రాంగం వారిపై కేసులు నమోదు చేయడానికి ఇసుమంతైనా సుముఖంగా లేదా? యంత్రాంగంపై ప్రభుత్వానికి పట్టు లేదా అన్న అనుమానాలు బలంగా వ్యక్తం అవుతున్నాయి.  ఇందుకు తాజాగా వెలుగులోకి వచ్చిన మాజీ మంత్రి, పుంగనూరు ఎమ్మెల్యే పెద్దిరెడ్డి రామచంద్రారెడ్డి అటవీ భూముల కబ్జా ఉదంతమే నిదర్శనం. ఒక ప్రముఖ దిన పత్రికలో పెద్ది రెడ్డి భూ కబ్జాలపై, అటవీ భూముల ఆక్రమణలపై వార్తా కథనం వచ్చింది. ఆ కథనంలో  పెద్దరెడ్డి రామచంద్రారెడ్డి విలాసవంతమైన ఫామ్ హౌస్ నిర్మాణం కోసం అటవీ భూములను ఎలా దోచుకున్నారో?, ఆ ఫామ్ హౌస్ కోసం అటవీ భూములలో రోడ్డు వేయడానికి మార్కెట్ కమిటీ నిధులను ఎలా మళ్లించారో విపులంగా వివరణ ఉంది. దీంతో అలర్ట్ అయిన చంద్రబాబు ప్రభుత్వం పెద్దిరెడ్డి అటవీ భూముల ఆక్రమణ, మార్కెట్ కమిటీ నిధుల మళ్లింపుపై దర్యాప్తునకు ఓ జాయింట్ కమిటీని ఏర్పాటు చేసిందిన. చిత్తూరు జిల్లా కలెక్టర్, ఎస్పీ, అనంతపురం ఫారెస్ట్ కన్సరేటర్ లు ఈ కమిటీలో ఉన్నారు. ఇక్కడ వరకూ బానే ఉంది, కానీ అధికార పగ్గాలు చేపట్టిన ఏడు నెలల తరువాత, అదీ ఒక పత్రికలో పెద్దిరెడ్డి భూ కబ్జాలు, అటవీ భూముల ఆక్రమణల గురించిన వార్త వస్తే తప్ప చంద్రబాబు సర్కార్ కు ఆ విషయం తెలియలేదా? ఇంత కాలం ఆ ప్రాంతంలో అధికారులుగా ఉన్న వారు ఈ విషయాన్ని ప్రభుత్వానికి ఎందుకు నివేదించలేదు. వారంతా పెద్దిరెడ్డికి తొత్తులుగా వ్యవహరించారా అన్న అనుమానాలు సర్వత్రా వ్యక్తం అవుతున్నాయి. అంతే కాదు పేరుకు రాష్ట్రంలో కూటమి ప్రభుత్వం అధికారంలో ఉన్నా, పాలనా యంత్రాంగం అంతా ఇంకా జగన్ మనుషులతోనే నిండిపోయి ఉందా?  జగన్ హయాంలో ఆయన అండ చూసుకుని దోపిడీలకు, కబ్జాలకూ పాల్పడిన పెద్దిరెడ్డి వంటి వారిని కాపాడటం కోసమే ప్రభుత్వ యంత్రాంగం పని చేస్తోందా అన్న ప్రశ్నలు ఉత్పన్నమౌతున్నాయి. ఒక్క పెద్ది రెడ్డి ఉదంతమే కాదు.. కొద్ది రోజుల కిందట వైఎస్ వెంకటరెడ్డి అనే జగన్ సమీప బంధువుకు నిబంధనలకు తిలోకాలిచ్చి మరీ  అధికారులు సున్నపురాయి గని లీజును కట్టబెట్టారు.  తెలుగుదేశం కార్యకర్తలు ఆగ్రహం వ్యక్తం చేయడంతో ఆ తరువాత ఆ లీజును రద్దు చేశారనుకోండి అది వేరే విషయం. కానీ వరుసగా స్వల్ప వ్యవధిలో వెలుగులోకి వచ్చిన ఈ రెండు ఉదంతాలనూ చూస్తుంటే.. చంద్రబాబు సర్కార్ కు ప్రభుత్వ యంత్రాంగంపై పట్టే లేదా అన్న అనుమానాలు వ్యక్తం అవుతున్నాయి. మొత్తం ప్రభుత్వ యంత్రాంగానికి ప్రక్షాళన చేయాల్సిన అవసరం ఉందని లేకుంటే ప్రభుత్వ ప్రతిష్ఠ మసకబారడం తధ్యమని పరిశీలకులు విశ్లేషిస్తున్నారు.  

మ‌హా కుంభ‌మేళాలో తొక్కిస‌లాట‌ ఘ‌ట‌న‌.. సుప్రీంకోర్టులో పిల్

ప్ర‌యాగ్‌రాజ్‌లో జ‌రుగుతున్న మ‌హా కుంభ‌మేళాలో బుధ‌వారం (జనవరి 29) తెల్ల‌వారుజామున జరిగిన తొక్కిసలాటలో 30 మంది మరణించిన ఘటనపై సుప్రీం కోర్టులో ప్రజా ప్రయోజన  వ్యాజ్యం దాఖలైంది. ఈ ఘటనకు ఉత్తరప్రదేశ్ లో అధికారంలో ఉన్న యోగి ఆదిత్యనాథ్ సర్కారే బాధ్యత వహించాలంటూ విశాల్ తివారీ అనే న్యాయవాది సుప్రీం కోర్టులో పిటిషన్ దాఖలు చేశారు.  భవిష్యత్ లో ఇటువంటి దుర్ఘటనలు జరగకుండా  ప్రొసిడ్యురల్ గైడ్ లైన్స్ జారీ చేయాలని ఆయన తన పిటిషన్ లో సుప్రీం కోర్టును కోరారు. అంతే కాదు భక్తుల భ్రదత ప్రమాదంలో పడకుండా వీఐపీల కదలికలను నియంత్రించాలని కోరారు. ఈ పిటిషన్ నేపథ్యంలో తొక్కిసలాట ఘటనపై యూపీ సర్కార్ స్టేటస్ రిపోర్టు ఇవ్వాల్సి ఉంటుంది. 45 రోజుల పాటు జరిగే ఈ కుంభమేలాలో జనవరి 29 వరకూ 27 కోట్ల మంది పవిత్ర స్నానాలు ఆచరించారు. కుంభమేళా ముగింపు దశకు వచ్చే క్రమంలో భక్తుల తాకిడి మరింత పెరుగుతుందన్న అంచనాలు ఉన్నాయి. మొత్తం మీద కుంభమేళా 70 కోట్ల మంది వరకూ భక్తులు వస్తారని యూపీ సర్కార్ అంచనా వేసింది.   ఇలా ఉండగా తొక్కిసలాట ఘటన తరువాత అలర్ట్ అయిన యోగి ఆదిత్యనాథ్ సర్కార్  భక్తుల భద్రత మెరుగుపరచడం కోసం కొన్ని చర్యలు చేపట్టింది. వీవీఐపీలకు పాసులు రద్దు చేసింది. ట్రాఫిక్ నియంత్రణ కోసం వాహనాల ప్రవేశంపై ఆంక్షలు విధించింది. మౌని అమావాస్య నాడు స్నానమాచరించలేని భక్తులు వసంత పంచమి నాడు స్నానమాచరించాలన్న అఖాడా పిలుపు నేపథ్యంలో ఫిబ్రవరి 3 అంటే వసంత పంచమి రోజున, అలాగే మాఘ పౌర్ణమి అయిన ఫిబ్రవరి 12న, ఇక మహా కుంభ మేళా ముగింపు రోజైన ఫిబ్రవరి 26, ఆ రోజు మహాశివరాత్రి పర్వదినం కూడా కావడంతో భక్తులు పెద్ద సంఖ్యలో వస్తారన్న అంచనాతో యోగి ప్రభుత్వం పటిష్ట చర్యలు చేపట్టింది.  

చావు బతుకుల్లో డాక్టర్ ప్రణీత 

అత్తింటి వేధింపులు తాళలేక హైదరాబాద్  కర్మన్ ఘాట్ కు చెందిన గైనకాలజిస్ట్ డాక్టర్ ప్రణీత బుధవారం  ఆత్మహత్యయత్నం చేసుకున్న సంగతి తెలిసిందే. ఈ యత్నానికి ముందు డాక్టర్ ప్రణీత సెల్ఫీ వీడియో చేసి తల్లికి పంపింది. నిద్రమాత్రలు వేసుకోవడం వల్ల ప్రణీత  స్పృహ కోల్పోయింది. చికిత్స నిమిత్తం  స్థానిక ఆస్పత్రిలో చేర్చారు. అయితే ప్రణీత ఆరోగ్య పరిస్థితి విషమంగానే ఉంది. ప్రణీత మామయ్య కొట్టడం వల్లే ఆత్మహత్యాయత్నం  చేసుకున్నట్లు ప్రణీత  కుటుంబ సభ్యులు తెలిపారు. అత్తింటివారు అదనపు కట్నం కోసం తన కూతురును వేధింపులకు గురి చేసారని డాక్టర్ ప్రణీత తల్లి పేర్కొంది. 

శంషాబాద్ ఎయిర్ పోర్ట్ కు బాంబు బెదిరింపు 

శంషాబాద్ ఎయిర్​పోర్ట్​కు  గుర్తు తెలియని వ్యక్తులు  గురువారం బాంబు బెదిరింపు కాల్ చేశారు. అప్రమత్తమైన భధ్రతా సిబ్బంది  తనిఖీలు చేశారు. ఇది బూటకపు కాల్ అని వారు తేల్చారు. బెదిరింపు కాల్ చేసిన వ్యక్తి తెలంగాణ రాష్ట్రానికి చెందిన నిజామాబాద్ వాసి అని పోలీసుల ప్రాథమిక విచారణలో వెల్లడైంది.   మతిస్థిమితం కోల్పోయిన వ్యక్తి ఈ కాల్ చేసినట్టు వెల్లడైంది. బాంబు లేదని కన్ఫర్మ్ చేసుకున్న భద్రతా సిబ్బంది ఊపిరి పీల్చుకున్నారు.     

కుమారస్వామి కాన్వాయ్ లో ప్రమాదం... జీవీఎల్ వాహనం ధ్వంసం

కేంద్ర ఉక్కు శాఖ మంత్రి హెచ్ డి కుమారస్వామి విశాఖ పర్యటనలో స్వల్ప అపశ్రుతి చోటు చేసుకుంది. విశాఖ పర్యటన కోసం గురువారం (జనవరి 30) వచ్చిన కేంద్ర మంత్రి కుమారస్వామికి విశాఖ విమానాశ్రయంలో ఎంపీలు భరత్, అప్పలనాయుడు, పలువురు కూటమి పార్టీల నేతలు ఘనంగా స్వాగతం పలికారు. విశాఖ ఉక్కు కర్మాగారానికి కేంద్రం 11 వేల 440 కోట్ల భారీ ప్యాకేజీని విడుదల చేసిన తరువాత కుమారస్వామి విశాఖ పర్యటనకు రావడం ఇదే మొదటి సారి. విశాఖ స్టీల్ ప్లాంట్ కు బెయిలౌట్ ప్యాకేజి ప్రకటించిన తరువాత తొలి సారి విశాఖ పర్యటనకు వచ్చిన కేంద్ర మంత్రి కుమార స్వామికి విమానాశ్రయం వద్ద ఘన స్వాగతం లభించింది. విశాఖ విమానాశ్రయం నుంచి కుమార స్వామి నేరుగా వైజాగ్ స్టీల్ ప్లాంట్ సందర్శనకు బయలు దేరాలు. అలా వెళుతున్న క్రమంలో ఆయన కాన్వాయ్ లోని మూడు వాహనాలు ఒకదానికి ఒకటి ఢీ కొన్నాయి. ఈ సంఘటనలో ఎవరికీ ఎలాంటి గాయాలూ కాలేదు. అయితే ఈ ప్రమాదంలో రాజ్యసభ మాజీ సభ్యుడు, బీజేపీ నేత అయిన జీవీఎల్ నరసింహరావు వాహనం దెబ్బతింది. ఈ ఘటనలో మొత్తం మూడు కార్లు పాక్షికంగా ధ్వంసమయ్యాయి. అలా ధ్వంసమైన మూడు కార్లలో జీవీఎల్ నరసింహరావు వాహనం కూడా ఉంది.