Home  
Latest News

తెలంగాణ సర్కార్ పై హైకోర్టు ఘాటు వ్యాఖ్యలు

కరోనా పరీక్షల నిర్వహణపై తెలంగాణ హైకోర్టు ఆగ్రహం వ్యక్తం చేసింది. జీవించే హక్కును కాలరాసేవిధంగా రాష్ట్ర‌ ప్రభుత్వం వ్యవహరిస్తోందని తీవ్ర వ్యాఖ్యలు చేసింది. గతంలో ఇచ్చిన ఆదేశాలను ఎందుకు పట్టించుకోవడం లేదని ప్రభుత్వాన్ని ప్రశ్నించింది. కరోనా మీడియా బులిటెన్‌లో వార్డుల వారీగా కీలక సమాచారం ఉండాలన్న ఆదేశాలు అమలు కావడంలేదని అసంతృప్తి వ్యక్తం చేసింది. ఆర్.ఏ.డీ. బ్లడ్ శాంపిల్స్ ఎందుకు తీసుకోవడం లేదని ప్రశ్నించిన హైకోర్టు..10 నిమిషాల్లో రిపోర్టులు వచ్చే పరీక్షలు చేయాలని ఆదేశించింది. మే 23 నుంచి జూన్ 23 వరకు ఎన్నిపరీక్షలు చేశారు? ప్రైమరీ, సెంకడరీ కాంటాక్ట్స్ శాంపిల్స్ ఎన్ని తీసుకున్నారు? జూన్ 26న ఐసీఎమ్మార్ గైడ్ లైన్ ప్రకారం లక్షణాలు ఉన్నవారికి, లేని వారికి ఎన్ని పరీక్షలు చేశారు? జూన్ 26న హైదరాబాద్‌లో పరీక్షలు ఎందుకు నిలిపివేశారో వివరాలను సమర్పించాలని ఆదేశించింది. సెంట్రల్  టీం ఎక్కడెక్కడ పర్యటించిందన్న అంశాలను ఈ నెల 17న తెలపాలని హైకోర్టు పేర్కొంది. జులై 17న పూర్తిస్థాయి నివేదిక సమర్పించాలని, దానిపై సంతృప్తి చెందకపోతే… జూన్ 26న చీఫ్ సెక్రటరీ, ప్రిన్సిపల్ సెక్రెటరీ హెల్త్, పబ్లిక్ హెల్త్ డైరెక్టర్, హెల్త్ కమిషనర్ కోర్టుకు హాజరుకావాలని ఆదేశించింది. నివేదిక సమర్పించకపోతే.. కోర్టు ధిక్కరణగా భావిస్తామని హైకోర్టు స్పష్టం చేసింది.

అసలు వైఎస్సార్ పార్టీ మాది

ఎంపీ రఘురామ కృష్ణంరాజుకి షోకాజ్ నోటిస్ ఇచ్చి వైసీపీనే ఇరుకున పడినట్టు అనిపిస్తోంది. అసలు మన పార్టీ పేరు యువజన శ్రామిక రైతు కాంగ్రెస్ పార్టీ అయితే, వైఎస్సార్ కాంగ్రెస్ పేరుతో నోటీసులు ఎలా ఇస్తారని ప్రశ్నించిన రఘురామ కృష్ణంరాజు.. ఈ విషయాన్ని ఎన్నికల సంఘం దృష్టికి తీసుకెళ్లిన సంగతి తెలిసిందే. అయితే ఈ పార్టీ పేరు వివాదం మరింత ముదిరేలా కనిపిస్తోంది.  తాజాగా అన్న వైఎస్సార్ కాంగ్రెస్ పార్టీ అధ్యక్షుడు మహబూబ్ బాషా.. ఢిల్లీలో చీఫ్ ఎన్నికల కమిషనర్‌ను కలిశారు. యువజన శ్రామిక రైతు కాంగ్రెస్ పార్టీని రద్దు చేయాలని కోరారు. వైఎస్సార్ అని రాయకుండా, పిలవకుండా ఆదేశాలు ఇవ్వాలని కోరారు.  అసలు వైఎస్సార్ పార్టీ తమదేనని మహబూబ్ బాషా అన్నారు. యువజన శ్రామిక రైతు కాంగ్రెస్ పార్టీ.. వైఎస్సార్ పార్టీ పేరుతో వాళ్ల ఎంపీలకు షోకాజ్ నోటీసులు ఇవ్వడం సరికాదన్నారు. దీనిపై సుప్రీం కోర్టులో కూడా స్పెషల్ లీవ్ పిటిషన్ వేస్తామని మహబూబ్ బాషా తెలిపారు.

మంత్రి పదవులకు మోపిదేవి, సుభాష్ చంద్రబోస్ రాజీనామా

ఇటీవల ఏపీలో నాలుగు రాజ్యసభ స్థానాలకు జరిగిన ఎన్నికల్లో వైసీపీ నాలుగూ గెలుచుకున్న సంగతి తెలిసిందే. వారిలో మంత్రులు మోపిదేవి వెంకటరమణ, పిల్లి సుభాష్ చంద్రబోస్ కూడా ఉన్నారు. రాజ్యసభ ఎన్నికల్లో విజయం సాధించడంతో ఆ ఇద్దరు నేతలు తమ ఎమ్మెల్సీ, మంత్రి పదవులకు రాజీనామా చేశారు.  రాజ్యసభకు ఎన్నికైన 14 రోజుల్లోగా వారి పదవులకు రాజీనామా చేయాల్సి ఉండడంతో.. ఎమ్మెల్సీ పదవుల రాజీనామా లేఖలను మండలి కార్యదర్శికి అందజేశారు. వీరి రాజీనామాకు మండలి చైర్మన్ ఆమోద ముద్ర వేశారు. అలాగే, మంత్రి పదవుల రాజీనామా లేఖలను సీఎం వైఎస్ జగన్‌కు పంపారు. మోపిదేవి వెంకటరమణ, పిల్లి సుభాష్ చంద్రబోస్ లు రాజ్యసభకు ఎన్నికైన నేపథ్యంలో వారి స్థానంలో సీఎం జగన్ ఎవరిని తన కేబినెట్ లోకి తీసుకుంటారోనన్న ఆసక్తి అధికారపార్టీ వర్గాల్లో నెలకొంది.

ఏపీలో 15 వేలు దాటిన కరోనా కేసులు

ఏపీలో కరోనా కేసుల సంఖ్య 15 వేల మార్క్ ని దాటింది. గత 24 గంటల్లో 657 మందికి కరోనా పాజిటివ్ గా తేలింది. వారిలో ఏపీ వాసులు 611 మంది కాగా, ఇతర రాష్ట్రాల నుంచి వచ్చిన వారు 39మంది, విదేశాల నుంచి వచ్చిన వారు ఏడుగురు ఉన్నారు. గత 24 గంటల్లో కరోనా కారణంగా ఆరుగురు చనిపోయారు. కర్నూల్ జిల్లాలో ముగ్గురు, కృష్ణా జిల్లాలో ముగ్గురు మృతి చెందారు. ఇప్పటి వరకు రాష్ట్రంలో నమోదైన మొత్తం కరోనా కేసుల సంఖ్య 15,252 కి చేరింది. మృతుల సంఖ్య మొత్తం 193కి చేరింది. ప్రస్తుతం 8071 యాక్టివ్ కేసులు ఉన్నాయి.

ప్రపంచమంతటా డాక్టర్లపై పూలు చల్లి ప్రశంసిస్తోంటే ఏపీలో డాక్టర్ల పరిస్థితి ఇది

జాతీయ వైద్యుల దినోత్సవం సందర్భంగా టీడీపీ అధినేత చంద్రబాబు ట్విట్టర్ వేదికగా వైద్యులకు శుభాకాంక్షలు తెలియజేశారు. అలాగే, ఏపీలో వైద్యుల పరిస్థితిపై ఆవేదన వ్యక్తం చేశారు. "వైద్యో నారాయణో హరిః అన్నారు. కరోనా విజృంభిస్తున్నప్పటికీ తమ ప్రాణాలను కూడా లెక్కచేయకుండా, అంకితభావంతో ప్రజలకు వైద్యసేవలందిస్తోన్న దేవుళ్ళకి జాతీయ వైద్యుల దినోత్సవం సందర్భంగా చేతులెత్తి మొక్కుతూ... హృదయపూర్వకంగా శుభాకాంక్షలను తెలియజేస్తున్నాను" అని చంద్రబాబు ట్వీట్ చేశారు. "ప్రాణదాతలైన వైద్యుల పట్ల ఏపీ ప్రభుత్వం చూపిస్తున్న నిర్లక్ష్యానికి బాధేస్తోంది. డాక్టర్లకు ఇప్పటికీ పిపిఈ కిట్లు అందించక పోవడం వైసీపీ ప్రభుత్వ బాధ్యతా రాహిత్యం. పిపిఈల కోసం విశాఖ ఇఎన్ టి ఆసుపత్రిలో డాక్టర్లు ధర్నా చేసారంటే ఎంత సిగ్గుచేటు!" అంటూ చంద్రబాబు రాష్ట్ర ప్రభుత్వాన్ని విమర్శించారు. "మాస్క్ అడిగిన పాపానికి డాక్టర్ సుధాకర్ ను సస్పెండ్ చేసి, నడిరోడ్డుపై అర్థనగ్నంగా, లాఠీలతో కొట్టించి, పిచ్చివాడని ముద్రవేసింది ప్రభుత్వం. ప్రపంచమంతటా డాక్టర్లపై పూలు చల్లి ప్రశంసిస్తోంటే ఏపీలో డాక్టర్ల పరిస్థితి ఇది. ఇప్పటికైనా ప్రభుత్వం వైద్యుల సేవను గుర్తించి గౌరవించాలి." అని చంద్రబాబు పేర్కొన్నారు.

1,088 కొత్త అంబులెన్స్‌లను ప్రారంభించిన సీఎం జగన్

108, 104 వాహనాలను సీఎం వైఎస్ జగన్‌ ప్రారంభించారు. విజయవాడలోని బెంజ్‌ సర్కిల్‌ దగ్గర ఏర్పాటు చేసిన కార్యక్రమంలో సీఎం జగన్ జెండా ఊపి అంబులెన్స్‌లను ప్రారంభించారు. ఈ కార్యక్రమంలో మంత్రులు ఆళ్ల నాని, పెద్దిరెడ్డి రామచంద్రారెడ్డి, కొడాలి నాని, పేర్ని నాని, వెలంపల్లి శ్రీనివాసరావు, ఎమ్మెల్యేలు, అధికారులు పాల్గొన్నారు. రాష్ట్రవ్యాప్తంగా వైద్య సేవలను అందించేందుకు 1,088 కొత్త వాహనాలను ప్రభుత్వం కొనుగోలు చేసింది. కొత్త అంబులెన్స్‌ల్లో అత్యాధునిక సౌకర్యాలు ఉన్నాయి. మండల కేంద్రానికి ఒక వాహనం ఏర్పాటు చేయనున్నారు.  108, 104 వాహనాలను ప్రారంభించిన తర్వాత సీఎం జగన్ మాట్లాడుతూ.. గతంలో ప్రతి 1,19,545 మందికి ఒక అంబులెన్స్ ఉండగా, ఇప్పుడు 74,609 మందికి ఒక అంబులెన్స్ ను అందుబాటులోకి తెచ్చామని తెలిపారు. 412 అంబులెన్స్ లు 108 సేవల్లో భాగంగా అనారోగ్యానికి, ప్రమాదాలకు గురైన వారిని ఆసుపత్రులకు చేరుస్తాయని చెప్పారు. మరో 282 అంబులెన్స్ లు బేసిక్ లైఫ్ సపోర్ట్ సిస్టమ్ ను కలిగివుంటాయని, మిగతావి అడ్వాన్డ్స్ లైఫ్ సపోర్టుతో ఉంటాయని తెలిపారు. 26 అంబులెన్స్ లు చిన్నారుల కోసం కేటాయించామని సీఎం పేర్కొన్నారు.

తెలంగాణలో జూలై 31 వరకు లాక్‌డౌన్‌ పొడిగింపు

తెలంగాణ రాష్ట్రంలో కరోనా మహమ్మారి రోజురోజుకూ విజృంభిస్తున్న నేపథ్యంలో లాక్‌డౌన్‌ను పొడిగిస్తూ రాష్ట్ర ప్రభుత్వం ఉత్తర్వులు జారీ చేసింది. కేంద్ర హోంశాఖ నిబంధనల ప్రకారం కంటైన్‌మెంట్ జోన్లలో జూలై 31 వరకు లాక్‌డౌన్‌ అమల్లో ఉంటుందని ప్రభుత్వ ప్రధాన కార్యదర్శి సోమేశ్‌ కుమార్‌ పేర్కొన్నారు. రాత్రి 10 గంటల నుంచి ఉదయం 5 గంటల వరకు కర్ఫ్యూ అమల్లో ఉంటుందని తెలిపారు.  వైద్యం, అత్యవసర విధుల్లో పాల్గొనేవారికి మాత్రమే కర్ఫ్యూ నుంచి ప్రభుత్వం మినహాయింపు ఇచ్చింది. రాత్రి 10 గంటల నుంచి ఉదయం 5 గంటల వరకు మెడికల్ ఎమర్జెన్సీ అయితే తప్ప ఎవరూ బయటకు రాకూడదు. ఆసుపత్రులు, మెడికల్ షాపులు, అత్యవసరాల దుకాణాలు మినహా మిగిలిన అన్ని వాణిజ్య సముదాయాలు రాత్రి 9.30 వరకు తమ కార్యకలాపాలను ముగించాలని ప్రభుత్వం ఉత్తర్వుల్లో పేర్కొంది.

కరోనాతో మరణించిన వారి మృతదేహాలను గోతిలో విసిరేసి పూడ్చి పెట్టారు

దేశ వ్యాప్తంగా కరోనా తన వికృత రూపాన్ని ప్రదర్శిస్తూనే ఉంది. కొన్ని నగరాల్లో కొత్తగా పాజిటివ్ గా తేలిన వారిని చేర్చుకునేందుకు హాస్పిటల్స్ లో బెడ్ లు ఖాళీ లేక పోవడం తో ఇంటి వద్దే ఉంచి ట్రీట్ మెంట్ ఇస్తున్నారు. ఇదే సమయంలో కరోనా తో ప్రాణాలు కోల్పోయిన వారికి అంత్య క్రియల విషయంలో కూడా తీవ్ర ఇబ్బందులు తలెత్తుతున్నాయి. ఇటువంటి పరిస్థితుల్లో కర్ణాటక లోని బళ్లారికి సంబంధించిన వీడియోలు రెండు వైరల్ అవుతున్నాయి. ఆ వీడియోలలో కొంత మంది పిపియి కిట్లు ధరించిన వ్యక్తులు కరోనా తో మరణించిన వారి మృతదేహాలను ప్లాస్టిక్ బ్యాగులలో చుట్టి రెండు పెద్ద గోతులలో విసిరేసి కప్పి పెట్టినట్లుగా కనిపిస్తోంది. బళ్లారి లోని కోవిడ్ ఆస్పత్రిలో చికిత్స తీసుకుంటూ గత రెండు రోజులలో 18 మంది మరణించారు. ఐతే ఆ మృత దేహాలకు అంత్యక్రియల పై స్థానికులు అభ్యతరం చెప్పడంతో అధికారులే అంత్యక్రియలు పూర్తి చేయాలని నిర్ణయించారు. దీనికోసం గుగ్గరహట్టి లోని తుంగభద్ర ఎగువ కాల్వ కు కొద్దీ దూరంలో ప్రొక్లైన్ తో రెండు పెద్ద గోతులు తీసి ఉంచగా పిపియి కిట్లు ధరించిన ప్రభుత్వ సిబ్బంది నల్లటి ప్లాస్టిక్ బ్యాగులలోచుట్టిన మృతదేహాలను తీసుకు వచ్చి ఒక గోతిలో 8 మరో గోతిలో 10 మృతదేహాలను విసిరేసి పూడ్చి పెట్టారు. ఈ వీడియోలో ఉన్న వారి సంభాషణలు కూడా దారుణంగా ఉండడంతో ఈ వ్యవహారం పై నెటిజన్లు మండి పడుతున్నారు. ఐతే వైరల్ అవుతున్న ఈ వీడియోల పై తీవ్ర విమర్శలు వస్తున్న నేపథ్యంలో బళ్లారి జిల్లా కలెక్టర్ స్పందించారు. కరోనా వైరస్ తో చనిపోయిన వారికి జరిగిన అంత్యక్రియల తీరు పై మృతుల బంధువులకు అయన బహిరంగ క్షమాపణ చెప్పారు. దీని పై విచారణకు ఆదేశించామని తప్పు చేసినట్లుగా తేలిన వారి పై చర్యలు తీసుకుంటామని అయన చెప్పారు. ఐతే ఇప్పటివరకు ఇటువంటి పరిస్థితి కేవలం విదేశాలలోనే చూశాం. ఐతే ఇపుడు వచ్చిన ఈ వీడియోతో మన దేశం లోని పరిస్థితుల పై ప్రజలలో ఆందోళన నెలకొంది.

ఏపీకి రావాలంటే పర్మిషన్ కావాల్సిందే.. డీజీపీ

కేంద్రం అన్ లాక్ 2 మార్గదర్శకాలు జారీ చేసిన సంగతి తెలిసిందే. వీటిలో భాగంగా రాష్ట్రాల మధ్య రాకపోకలకు ఆ రాష్ట్రాల నుండి ఎంటువంటి ముందస్తు అనుమతి అవసరం లేదని స్పష్టం చేసింది. ఇది ఇలా ఉండగా తెలంగాణ లో కొన్ని రోజులలో నిర్వహించవలసిన ప్రవేశ పర్రేక్షలను వాయిదా వేయడం తో పాటు, ఇటు హైదరాబాద్‌లో మళ్లీ లాక్‌డౌన్ విధిస్తారని వార్తలు వస్తున్ననేపథ్యంలో నగర వాసులు ఏపీలోని తమ స్వంత ఊళ్లకు క్యూ కట్టారు. దీంతో హైదరాబాద్, విజయవాడ హైవేపై ఉన్న టోల్ ప్లాజాలతో పాటు ఏపీ సరిహద్దుల్లోని చెక్ పోస్టుల దగ్గర భారీగా ట్రాఫిక్ జామ్ అవుతోంది. ఇదే సమయంలో తెలంగాణ నుంచి ఏపీకి వస్తున్న వారంతా నిబంధనలు పాటించాల్సిందే అని ఏపీ డీజీపీ గౌతమ్ సవాంగ్ వెల్లడించారు. పొరుగు రాష్ట్రాల నుంచి ఏపీకి వచ్చే వారిని అనుమతించే విషయంలో ఆంక్షలు కొనసాగుతున్నాయని స్పష్టం చేశారు. కరోనా నేపథ్యంలో రాష్ట్ర సరిహద్దుల్లో ఉన్న చెక్‌పోస్టుల వద్ద ఆంక్షలు కొనసాగుతున్నాయని ఆయన వివరించారు. ఇతర రాష్ట్రాల నుంచి ఏపీకి వచ్చే వారు కచ్చితంగా అనుమతి తీసుకోవాల్సిందేనని ఈ సందర్బంగా అయన తెలిపారు. దీని కోసం స్పందన ద్వారా దరఖాస్తు చేసుకొని అనుమతి పొందాలని అన్నారు. అలా అనుమతి తీసుకున్న వారిని ఉదయం 7 గంటల నుండి రాత్రి 7 గంటల వరకు మాత్రమే అనుమతిస్తామని డీజీపీ తెలిపారు. రాష్ట్ర సరిహద్దులో ఉన్న పోలీస్‌ చెక్‌పోస్టుల వద్ద థర్మల్‌ స్క్రీనింగ్‌ చేసిన తర్వాతే రాష్ట్రంలోకి ప్రజలను అనుమతిస్తామని అన్నారు. ఐతే అనుమతి తీసుకున్నప్పటికీ రాత్రి 7 నుంచి ఉదయం 7 గంటల వరకు అనుమతించేది లేదని వివరించారు. రాత్రి సమయం లో కేవలం అత్యవసర, నిత్యావసర సర్వీసులకు మాత్రం అనుమతి కొనసాగుతుందని తెలిపారు. ప్రస్తుతం ఉన్న పరిస్థితులను అర్థం చేసుకుని ప్రజలు సహకరించాలని డీజీపీ కోరారు.

విదేశాల్లో గృహహింస కేసులకు తెలంగాణ ఎన్ఆర్ఐ సెల్ ద్వారా పరిష్కారాలు

ఎన్ఆర్ఐ గృహహింస కేసుల వివాదాలకు చెక్.. 360కోణాల్లో కేసులను పరిశీలిస్తున్న ఉమెన్ సేఫ్టీ వింగ్.. విదేశాల్లో గృహహింస కేసులకు తెలంగాణ ఎన్ఆర్ఐ సెల్ ద్వారా పరిష్కారాలు.. యువతులను రక్షించడమే లక్ష్యంగా ఉమెన్ సేఫ్టీ వింగ్ ప్రత్యేక శ్రద్ద.. నిందితులు ఎక్కడ ఉన్నా వివరాలు తెలుసుకునే ప్రయత్నం.. వెబినార్ ద్వారా విచారణ.. ఐదెంకల జీతం,  విదేశాల్లో విలాసవంతమైన జీవనంపై ఆసక్తిలో కొందరు, అమ్మాయి జీవితం బాగుంటుందని ఆశపడిన మరికొందరు ఎన్ఆర్ఐల సంబంధాలపై మక్కువ చూపిస్తారు. తీరా భారీ కట్నకానుకలతో పెండ్లి అయిన తర్వాత భార్యకు వీసా పంపిస్తామని ఉడాయించే వారు కొందరైతే దేశం కాని దేశం తీసుకువెళ్లి చిత్రహింసల పాలు చేసేవారు మరికొందరు ఉంటారు. ఆడపిల్లల జీవితాలతో ఆడుకుంటున్న ఈ ఎన్ఆర్ఐ పెండ్లికొడుకులను ఏమీ చేయలేక కుమిలిపోయే తల్లిదండ్రులకు ఊరట కలిగిస్తోంది తెలంగాణ ఉమెన్ సేప్టీ వింగ్. ప్రత్యేకంగా ఎన్ఆర్ఐ విభాగాన్ని... ఉమెన్ సేఫ్టీ వింగ్ లో ఎన్నారై ల గృహహింస కేసుల నమోదు, పరిష్కారం కోసం  గత ఏడాది జూలై 17న ప్రత్యేకంగా ఎన్నారై సెల్ ను ఏర్పాటు చేశారు. ఎన్ఆర్ఐ జీవిత భాగస్వాములు, బంధువులను నిందితులుగా పేర్కొన్న ఎన్ఆర్ఐ కేసులను పరిష్కరించడం కోసం ప్రత్యేకంగా ఈ విభాగాన్ని ఏర్పాటు చేశారు.  గత నాలుగైదు ఏండ్ల నుంచి రాష్ట్రంలో వివిధ ప్రాంతాల్లో నమోదు అయినా ఇప్పటికీ పరిష్కారం కాకుండా పెండింగ్ లో ఉన్న కేసులను పరిష్కరించే ప్రయత్నం చేస్తున్నారు. ఫిర్యాదుదారుల నుండి ఎన్ఆర్ఐ సెల్ పిటిషన్లను స్వీకరించి, కేసుకు సంబంధించిన  పూర్తి సమాచారాన్ని నిర్ణీత ఫార్మెట్ లో భద్రపరుస్తారు. సంబంధిత దర్యాప్తు అధికారులు, నిపుణుల బృందం  నిందితుల వివరాలన్ని సేకరిస్తారు. అయితే గతంలో ఎన్ఆర్ఐ జీవితభాగస్వామిపై ఫిర్యాదు చేస్తే పరిష్కారం లభించేది కాదు. ఉమెన్ సేఫ్టీ వింగ్ అడిషనల్ డిజిపి, ఐపిఎస్ అధికారి స్వాతిలక్రా ఈ కేసులు పరిష్కారానికి ప్రత్యేక శ్రద్ద తీసుకుంటున్నారు. ఎన్ఆర్ఐ ఫిర్యాదులపై న్యాయసూచనలు తీసుకుంటూ విదేశీ వ్యవహారాల శాఖ, రాయబారి కాార్యాలయాల అధికారులతో, జాతీయ మహిళా కమిషన్, కేంద్ర, రాష్ట్ర మహిళా సంక్షేమ శాఖ, ఎన్జీవోలతో సంప్రదింపులు జరిపి సమస్యను పరిష్కరించే ప్రయత్నం చేస్తున్నారు. ఇందుకోసం ప్రత్యేకంగా ఎల్ఓసి(లుక్ అవుట్ సర్క్యులర్) జారీ చేసి మరీ నిందితులను రప్పించే ప్రయత్నం చేస్తున్నారు. వెబినార్ ద్వారా.. ప్రపంచ వ్యాప్తంగా కరోనా కారణంగా అనేక కేసుల విచారణ వాయిదా పడింది. అయితే అందుబాటులో ఉన్న సాంకేతిక పరిజ్ఞానాన్ని ఉపయోగించి వెబినార్ ద్వారా ఎన్ఆర్ఐ కేసులను విచారిస్తున్నారు ఉమెన్ సేఫ్టీ వింగ్ అధికారులు. విదేశాల్లోనూ ఈ కేసుల పరిష్కారం కోసం పనిచేసే వివిధ సంస్థల సహాయంతో త్వరితగతిన కేసులను పరిష్కరించే ప్రయత్నం చేస్తున్నారు. వెబినార్ ద్వారా ఎన్నారై కేసుల్లో బాధితుల హక్కులను వివరిస్తున్నారు. విదేశాల్లో నివసిస్తున్న నిందితులపై చట్టపరంగా తీసుకోవల్సిన చర్యలపై దృష్టి సారిస్తున్నారు. మంగళవారం ఉమెన్ సేఫ్టీ వింగ్ అడిషనల్ డిజిపి స్వాతి లక్రా, డిఐజి సుమతి ఆధ్వర్యంలో నిర్వహించిన ఒకరోజు ఆన్ లైన్ వర్కషాప్ లోయునైటెడ్ కింగ్‌డమ్‌కు చెందిన ఉమెన్ ఎంపవర్‌మెంట్ నెట్‌వర్క్ (WEN)  ఎన్జీఓ కౌన్సిలర్ గీతా మోర్లా, చికాగోలోని కమ్యూనిటీ లీడర్ చాందిని ఎన్నారై బాధితుల సమస్య పరిష్కారానికి కృషి చేస్తామని చెప్పారు.  "మాడాడ్" పోర్టల్ ను ఉపయోగించుకోవడంలో అనుసరించాల్సిన విధానాల గురించి తెలియజేశారు. 80 కేసుల్లో బాధితులు.. ఉమెన్ సేఫ్టీ వింగ్ నిర్వహించిన వెబినార్ లో ఎన్‌ఆర్‌ఐ సెల్, ఉమెన్ సేఫ్టీ వింగ్ వద్ద నమోదు అయిన 101  పిటిషన్ దారుల్లో 80మంది బాధితులు పాల్గొన్నారు. వారి కేసులు సత్వరంగా పరిష్కారం కావడానికి తీసుకోవల్సిన చర్యలపై చర్చించారు.  ఎన్ఆర్ఐ విభాగం జిఏడి చిట్టిబాబు, ఎసిపిలు అపర్ణ, డానియల్, లీగల్ అడ్వరైజర్లు పార్వతి, నంద, తారాశర్మ,  తరుణి ఎన్జీవో మమతారఘువీర్, దాదాపు 45మంది ఎస్ఐ, సిఐలు, 80మందికి పైగా బాధితులు ఈ వెబినార్ లో పాల్గొన్నారు. ఎక్కడైనా ఫిర్యాదు చేయవచ్చు.. ఉమెన్ సేఫ్టీ వింగ్ ఎన్ఆర్ఐ గృహహింస కేసుల కోసం ప్రత్యేక విభాగం ఏర్పాటు చేసిందని డిఐజి సుమతి చెప్పారు. ఇప్పటివరకు రాష్ట్రవ్యాప్తంగా గృహహింస చట్టం 498ఏ కింద ఎన్ఆర్ఐపై 574 కేసులు నమోదు కాగా ఇందులో 417 కేసులు రాష్ట్రవ్యాప్తంగా ఉన్న 17 మహిళా పోలీస్ స్టేషన్లలో నమోదు అయ్యాయి. ఇప్పటివరకు ఎన్ఆర్ఐ సెల్, ఉమెన్ సేఫ్టీ వింగ్ లో101 పిటిషన్లు వచ్చాయి. ఇందులో 6 కేసుల్లో ఎన్నారై జీవిత భాగస్వాముల పాస్‌పోర్ట్‌లు స్వాధీనం చేసుకున్నాం.  మరో8 కేసులలో ఎన్నారై జీవిత భాగస్వాములపై ఎల్‌ఓసిలు జారీ చేశాం. 7 కేసులలో ఎన్‌ఆర్‌ఐ జీవిత భాగస్వాముల పాస్‌పోర్ట్‌లు కోర్టులో జమ చేశారు. 44 కేసులలో యజమాని వివరాలు సేకరించాం. ఎన్‌ఆర్‌ఐ నిందితుల విచారణకు చట్టపరమైన చర్యలు తీసుకుంటూ వారిని విచారణకు హాజరుకావాలని లేఖలు పంపామని చెప్పారు. ధైర్యంగా ముందుకు రావాలి.. విదేశాల్లో చిక్కుబడి పోయిన, ఎన్నారైల చేత మోసపోయిన తమ పిల్లల గురించి తల్లిదండ్రులు బాధపడవద్దని, గృహహింస ఎదుర్కోంటున్న వారెవరైనా ఫిర్యాదు చేయవచ్చు. బాధితులు ఎలాంటి భయం లేకుండా ఫిర్యాదు చేసి తమ సమస్యలను పరిష్కరించుకోవచ్చు అన్న ధైర్యాన్ని తెలంగాణ ఉమెన్ సేఫ్టీ వింగ్ కల్పిస్తోంది.

ఎవరీ బీసీ రాయ్.. డాక్టర్స్ డే ఎలా వచ్చింది?

ముందు వరుసలో నిలబడి వైద్యసేవలందిస్తూ.. మన దేశంలో 1622 మందికి ఒక డాక్టర్.. ప్రజలు- డాక్టర్ల నిష్పత్తిలో పాకిస్తాన్ కన్న వెనుకబడి.. మందులు వ్యాధులను నయం చేస్తాయి. కానీ, డాక్టర్లు మాత్రమే రోగులను నయం చేయగలుగుతారు. - కార్ల్ జంగ్ మతాలు వేరైనా.. కులాలు వేరైనా అందరూ చేతులెత్తి మొక్కేది డాక్టర్ కే. కనిపించని దేవుడు ప్రాణం పోస్తే కనిపించే వైద్యుడు ఆ ప్రాణాలను కాపాడుతాడు. అందుకే  వైద్యో నారాయణో హరి అన్న నానుడి వచ్చింది. అన్ని వృత్తుల్లోకి డాక్టర్ వృత్తి అంటే ఎనలేని గౌరవం ప్రజల్లో ఈ నాటికీ ఉంది. ప్రపంచవ్యాప్తంగా అధికశాతం ప్రజలు కోవిడ్ 19 కారణంగా మృత్యువు అంచులదాక వెళ్లుతుంటే వారిని తమ ప్రాణాలకు తెగించి కాపాడుతున్నది డాక్టర్లే. ఈ విప‌త్క‌ర సమ‌యంలో సేవ చేస్తూ ప్రాణాలు కోల్పోతున్న వైద్యసిబ్బంది సంఖ్య తక్కువేమీ కాదు. త‌మ కుటుంబాల‌కు దూరంగా ఉంటూ, కరోనా బాధితుల‌కు 24/7 సేవ‌లందిస్తున్నారు.  కేవలం ఆరోగ్యాన్నే కాదు రోగుల్లో మానసిక స్థైర్యాల్ని అందిస్తున్న ఈ వైద్య నారాయణులకు  డాక్టర్స్ డే సందర్భంగా అక్షరాభిషేకం. అంతకన్న వారి రుణం మనం ఎలా తీర్చుకోగలం... ఇలామొదలైంది.. ప్రతి ఏడాది జూలై 1వ తేదీని జాతీయ వైద్యుల దినత్సవంగా నిర్వహిస్తాం. ఇందుకు కారణం వైద్యసేవకే వన్నెతెచ్చిన బీసీరాయ్. ఆయన జన్మదినం, మరణించిన రోజూ రెండూ జూలై1. అందుకే ఆయన స్మారకార్థం ప్రతీ ఏడాది జూలై ఒకటన తేదీన వైద్యుల దినోత్సవంగా నిర్వహించాలని భారత ప్రభుత్వం నిర్ణయించింది. అంతేకాదు ఆయన పేరు మీద వివిధ రంగా ల్లో సేవలు అందించిన వారికి 1976 నుంచి అవార్డులు అందిస్తున్నారు.  ఎవరీ బీసీ రాయ్.. వైద్యరంగంలో ఉన్నవారందరికీ, వృత్తిని దైవంగా భావించే వారందరికీ మార్గదర్శి డాక్టర్‌ బీసీ రాయ్‌. ఆయన పూర్తి పేరు బిధాన్‌ చంద్రరాయ్‌. 1882 జులై 1న బీహార్‌ రాష్ట్రంలోని బంకింపూర్‌లో ఆయన జన్మించారు. కలకత్తా మెడికల్‌ కళాశాలలో మెడిసిన్‌, 1909లో ఇంగ్లాండ్‌ లోని బర్త్‌ హోమ్‌ హాస్పిటల్‌లో ఎం.ఆర్‌.సి.పి, ఎఫ్‌.ఆర్‌. సీ.ఎస్‌ డిగ్రీలు పూర్తిచేశారు. 1911లో స్వదేశానికి తిరిగొచ్చి కలకత్తా వైద్య కళాశాలలో అధ్యాపకుడిగా చేరారు. పేదలకు వైద్య సేవలు అందించాలన్న ఆశయంతో ఆయన జాదవ్‌ పూర్‌ టీ.బీ హాస్పిటల్, ఆర్‌.జి.ఖార్‌ మెడికల్‌ కాలేజ్, విక్టోరియా ఇనిస్టిట్యూట్, చిత్తరంజన్‌ క్యాన్సర్‌ హాస్పిటల్‌ తదితర వైద్య సంస్థల్ని ఏర్పాటుచేశారు. అంతేకాదు వైద్యరంగంలో వస్తున్న పోకడలకు ఎప్పటికప్పుడు ప్రజలకు తెలియజేసేలా ఎన్నో వ్యాసాలు రచించారు. 1922 - 1928 మధ్య కాలంలో కలకత్తా మెడికల్‌ జర్నల్‌కు ఎడిటర్‌గా ఉన్నారు. కలరా విజృంభించిన సమయంలో వేలాదిమంది ప్రాణాల్ని ఆయన కాపాడారు. జాతిపిత మహాత్మా గాంధీకి వైద్యుడిగా, స్నేహితుడిగా ఉంటూ ఆయన ఆశయాలకు వెన్నంటి నడిచారు. ఆ తర్వాత 1928లో అఖిల భారత కాంగ్రెస్‌ కమిటీ సభ్యులుగా చేరి ఆ తర్వాత అంచెలంచెలుగా రాజకీయంగా ఎదిగి 1948 జనవరి 13న పశ్చిమ బెంగాల్‌ ముఖ్యమంత్రి పదవిని చేపట్టారు. ముఖ్యమంత్రి అయ్యాక కూడా రోజూ సాయంత్రం కొంత సమయాన్ని వైద్య సేవలకు కేటాయించారు. 1961లో ఫిబ్రవరి 4న ఈయన భారత రత్న అందుకున్నారు. వైద్యుడిగా సేవలందిస్తూ సిఎంగా ప్రజల మధ్యనే ఉన్న ఆయన  1962 జూలై 1న మరణించారు. ఆయన గౌరవార్థమే  1991 నుంచి జూలై 1న డాక్టర్స్ డేను భారత ప్రభుత్వం ప్రకటించింది. ప్రతి ఏటా కొత్త నినాదంతో డాక్టర్ డేను నిర్వహిస్తున్నారు. ప్రజలు - డాక్టర్ నిష్పత్తి మనదేశంలో వైద్యుల కొర‌త ఎక్కువగా ఉంద‌ని ప్ర‌పంచ ఆరోగ్య సంస్థ తన నివేదికలో ప్రకటించింది. ప్రతి 1622 మంది ప్రజలకు ఒక డాక్టర్ అందుబాటులో ఉన్నారు. ప్రపంచ ఆరోగ్య సంస్థ సిఫారస్స్ ల ప్రకారం ప్రతి వెయ్యి మందికి ఒక డాక్టర్ ఉండాలి. ప్రజలు డాక్టర్ నిష్పత్తి లో మన దేశం 57వ స్థానంలో ఉంది. తమ పొరుగుదేశం పాకిస్తాన్ కన్నా మనం వెనుకబడే ఉన్నాం. భారత్ లో 1000 : 0.62 పాకిస్తాన్ లో 1000 : 0.89 బంగ్లాదేశ్ లో 1000 : 0.91 అత్యధికంగా ఆస్ట్రేలియాలో 1000 : 3.37 ఉన్నారు. ఎదుటి వ్యక్తి ప్రాణాలు కాపాడడానికి తపన పడే వాడే నిజమైన వైద్యుడు. కానీ, వైద్యం వ్యాపారంగా మారిన ప్రస్తుత తరుణంలో డాక్టర్లు కూడా తయారు చేయబడుతున్నారు. మానవ సేవే మాధవ సేవ అన్నట్లు సాగే వైద్య వృత్తిలో ధనాపేక్ష లేకుండా సేవాభావంతో పనిచేస్తున్నవారి సంఖ్యే ఎక్కువ. కరోనా విజృంభిస్తున్న ప్రస్తుత తరుణంలో ముందువరుసలో నిలబడి ఈ మహమ్మారిని ఎదుర్కోంటూ రోగులకు సేవలందిస్తున్న డాక్టర్లకు మరోసారి పాదాభివందనం.

ట్రంప్ కు మండింది.. చైనాకు మూడింది

కరోనా వైరస్ విలయతాండవం తో ప్రపంచం మొత్తం అతలాకుతలం అవుతోంది. ఈ వైరస్ చైనా లో మొదలైనా కూడా ప్రస్తుతం చైనాలో పెద్దగా దీని ప్రభావం లేదు కానీ ప్రపంచ దేశాలు మాత్రం అల్లకల్లోలం అవుతున్నాయి. మరి ముఖ్యంగా అమెరికాలో ఐతే గత ఐదు నెలలు గా పరిస్థితి దారుణంగా ఉంది. నిన్న ఒక్క రోజే అక్కడ 46,639 పాజిటివ్ కేసులు రాగా 764 మంది చనిపోయారు. అంతే కాకుండా అమెరికాలో ముందు ముందు రోజుకు లక్ష వరకు కొత్త కేసులు నమోదయ్యే ప్రమాదం ఉందని నిపుణుల హెచ్చరిస్తున్న నేపథ్యంలో అక్కడి ప్రజలు తీవ్ర భయాందోళనల కు గురి అవుతున్నారు. తాజాగా కరోనా ను కంట్రోల్ చేసే అంశంపై తీవ్ర విమర్శల్ని ఎదుర్కొంటున్న అధ్యక్షుడు ట్రంప్ ఇంకో సారి చైనాపై తీవ్ర ఆగ్రహం వ్యక్తం చేశారు. "కరోనా మహమ్మారి ప్రపంచవ్యాప్తంగా దారుణంగా వ్యాపించింది. అది అమెరికాకు చాల తీవ్ర నష్టం కలిగించింది. నాకు చైనా పై చాల తీవ్రమైన కోపం ఉంది. ప్రజలు కూడా దీన్ని చూస్తున్నారు. దీన్ని కూడా నేను ఫీల్ అవుతున్నాను" అని ట్రంప్ తన ట్విట్టర్ ఖాతాలో తాజాగా ట్వీట్ చేశారు. ఐతే ట్రంప్ ఇలా ఆగ్రహం వ్యక్తం చేయడం లో కొంత న్యాయం ఉంది. ఎందుకంటే ప్రపంచంలో నే కరోనా వల్ల తీవ్రంగా నష్టపోయిన దేశాల్లో అమెరికా ఒకటి. అక్కడ దాదాపు 27 లక్షల మంది వైరస్ బారిన పడ్డారు. వైరస్ బారిన పడిన వారందరికీ ట్రీట్‌మెంట్ అనేది చాలా ఖర్చుతో కూడిందే కాకుండా అటు హాస్పిటల్స్ లో ఫెసిలిటీస్ పిపియి కిట్లు, మందులు ఇతర ఖర్చులు తడిసి మోపెడవుతున్న పరిస్థితి. అంతే కాకుండా సాధారణ పరిస్థితులు లేక పోవడం తో ఆర్థికంగా కూడా ఎక్కడ లేని నష్టం జరుగుతోంది. దీనికంతటికి చైనాయే కారణం అని ట్రంప్ ఫైర్ అవుతున్నారు. దీనికి తోడు తాజాగా చైనాలో మరో భయంకరమైన G4 EA H1N1 అనే వైరస్ వెలుగులోకి రావడంతో... ప్రపంచ దేశాలన్నీ ఇపుడు "చైనా వారి ఆహారపు అలవాట్లతో ప్రపంచానికి చావొచ్చింది" అని ఫైర్ అవుతున్నారు. ఈ కొత్త వైరస్ పందుల నుంచే మనుషులకు సోకుతోందాని తెలుస్తోంది. మరో పక్క పొరుగు దేశం ఐన భారత్ తో సరిహద్దులో కుట్రలు పన్నుతున్న చైనాపై దాదాపు ప్రపంచ దేశాలన్నీ వ్యతిరేకంగా ఉన్నాయి. అంతే కాకుండా ఒక్క పాకిస్తాన్ తప్పించి తన చుట్టూ ఉన్న దేశాలతో చైనా ఏదో ఒక కారణం తో శత్రుత్వాన్ని పెంచుకుంటోంది. తాజాగా అసలు చైనాలో కరోనా వైరస్ ఎక్కడ పుట్టింది, ఎలా పుట్టిందో తేల్చేందుకు ప్రపంచ ఆరోగ్య సంస్థ (WHO) ప్రతినిధులు చైనాకు వెళ్లి పరిశోధించ బోతున్నారు. ఒక వేళ ఆ పరిశోధనలో కరోనా వైరస్‌ని చైనా స్వయంగా ల్యాబ్‌లో తయారుచేసిందని తేలితే మాత్రం ప్రపంచ దేశాలు చైనాపై చాలా పెద్ద ఎత్తున పరిహారం కోరుతూ కేసులు వేసే అవకాశం ఉంది. ఇక అమెరికా ఐతే యుద్ధం వంటి తీవ్ర నిర్ణయాన్ని ప్రకటించినా ఆశ్చర్య పోనవసరం లేదు. మరో పక్క చైనా మాత్రం ఈ వైరస్‌ని అమెరికాయే సృష్టించిందని ఆరోపిస్తోంది. ఏది ఏమైనా చైనా కు ఒక వైరస్‌ల దేశంగా మాత్రం కొత్తగా గుర్తింపు వచ్చింది.

కరోనా వ్యాక్సిన్ వస్తే దాని పంపిణి ఎలా.. మోడీ సమీక్ష

ప్రపంచవ్యాప్తంగా శాస్త్రవేత్తలు, ఫార్మా కంపెనీలు కరోనా వ్యాక్సిన్‌ కనుగొనేందుకు తీవ్రంగా కృషి చేస్తున్నాయి. ఇక మన దేశంలో భారత్ బయోటెక్ కంపెనీ కొవాక్సిన్ అనే వాక్సిన్‌ను తయారు చేసి కొన్ని ప్రయోగాలు కూడా జరిపింది. దీనికి భారత వైద్య పరిశోధనా మండలి , నేషనల్ ఇన్‌స్టిట్యూట్ ఆఫ్ వైరాలజీ సహకారం తీసుకొంది. ఇపుడు ఈ వ్యాక్సీన్‌ను మనుషులపై ప్రయోగించేందుకు గాను రెండు అంచెలలో క్లినికల్ ట్రయల్స్‌కు డ్రగ్స్ కంట్రోలర్ జనరల్ ఆఫ్ ఇండియా అనుమతి మంజూరు చేసింది. దీనిలో భాగంగానే వచ్చే జులైలో దేశవ్యాప్తంగా కొవాక్సిన్ పైన ప్రయోగాలు జరగనున్నాయి. ఇది ఇలా ఉంటే మన దేశం ‌తో పాటు ఇతర దేశాల్లో కరోనా వ్యాక్సిన్‌ కోసం శాస్త్రవేత్తలు చేస్తున్న పరిశోధనలు పై ప్రధాని మోడీ అధికారులతో చర్చించారు. కరోనా వ్యాక్సిన్ కనుక త్వరలో విజయవంతమైతే దానిని సరసమైన ధరలో ప్రతి ఒక్కరికి అందుబాటులో ఉంచేందుకు చర్యలు తీసుకోవాలని అయన సూచించారు. ఈరోజు మధ్యాహ్నం దేశంలో కరోనా వాక్సిన్ అభివృద్ధి, పంపిణీ సన్నద్ధతపై ప్రధాని మోదీ ఉన్నత స్థాయి సమీక్ష నిర్వహించారు. వాక్సీన్ తయారైన తర్వాత దేశమంతటా దానిని ఎలా డిస్ట్రిబ్యూట్ చేయాలి? దానిని ముందుగా ఎవరికి ఇవ్వాలి దీని కోసం వివిధ డిపార్ట్‌మెంట్ల మధ్య సమన్వయం ఎలా ఉండాలన్న దానిపై మోడీ అధికారులకు కొన్ని కీలక సూచనలు చేశారు. అందరికంటే ముందుగా కరోనా ముప్పు అధికంగా ఉండే డాక్టర్లు, వైద్య సిబ్బంది, పారిశుద్ధ్య కార్మికులు, వృద్ధులు, చిన్నపిల్లలకు ఈ టీకాలు ఇవ్వాలి. కరోనా వ్యాక్సిన్ తక్కువ ధరకు అందరికీ అందుబాటులో ఉండాలి. ధరల కారణంగా ఏ ఒక్కరు టీకాకు దూరం కాకూడదు. అదే సమయంలో కరోనా వాక్సీన్ ప్రతి ఒక్కరికీ అందేలా కార్యాచరణ ఉండాలి. దేశంలోని ప్రతి ప్రాంతానికి వాక్సిన్ పంపిణీ లో ఎలాంటి ఆంక్షలు అడ్డుతగలకుందా జాగ్రత్తలు తీసుకోవాలి. ప్రత్యేక టెక్నాలజీ సాయంతో కరోనా వాక్సిన్ ఉత్పత్తి నుంచి పంపిణీ వరకు ఎటువంటి లూప్ హొల్స్ లేకుండా అన్నింటినీ సమర్ధవంతంగా పర్యవేక్షించాలి. నిర్ణీత సమయంలో సమర్థంగా వాక్సీన్ వేసేందుకు అవసరమైతే టెక్నాలజీ టూల్స్‌ను అందుబాటులోకి తీసుకురావాలి. ఈ రోజు ఉదయమే భారత్ లోనే తయారైన మొదటి వ్యాక్సిన్ కోవాక్సిన్ మనుషుల పై ప్రయోగాలకు సిద్దమైన వార్త వచ్చింది. ఇపుడు ప్రధాని వ్యాక్సిన్ పంపిణీ పై సమీక్ష జరపడం.. దీన్ని బట్టి త్వరలోనే మనం ఒక గుడ్ న్యూస్ వినబోతున్నామా. దేవుడి దయవల్ల అదే నిజం కావాలని అందరం కోరుకుందాం.

మాస్క్ లేకుండా తిరిగేస్తున్నారు జాగ్రత్త: మోడీ 

దేశంలో కరోనా వైరస్ తీవ్రంగా వ్యాప్తి చెందుతున్న నేపథ్యంలో ప్రధాని మోడీ దేశాన్ని ఉద్దేశించి ప్రసంగించారు. సకాలంలో లాక్‌డౌన్ విధించడం వల్ల లక్షలాది మంది ప్రజల ప్రాణాలు కాపాడగలిగామని ప్రధాని చెప్పారు. కరోనాపై మొదట్లో జాగ్రత్తలు తీసుకున్నట్లు కనపడిన భారతీయులు ఇప్పుడు జాగ్రత్తలు తీసుకోడంలో పూర్తిగా నిర్లక్ష్యం వహిస్తున్నారని, ఇది ఎంత మాత్రం పనికిరాదని మోదీ హెచ్చరించారు. కరోనా విషయంలో ఇప్పుడు మరింత అప్రమత్తంగా ఉండాలని అయన సూచించారు. మాస్కు పెట్టుకోవడం, భౌతిక దూరం పాటించడం ఎటువంటి పరిస్థితుల్లోనూ తప్పక పాటించాలన్నారు. ఈ సందర్భంగా సాక్షాత్తు ఓ దేశ ప్రధాని మాస్క్ పెట్టుకోలేదని 13 వేల రూపాయల ఫైన్ వేసిన విషయాన్ని ప్రధాని గుర్తు చేశారు. గ్రామీణుడికైనా, దేశ ప్రధానికైనా నిబంధనలు ఒకేలా ఉండాలని అయన చెప్పారు. రాష్ట్ర ప్రభుత్వాలు కరోనా నిబంధనల విషయంలో కఠినంగా ఉండాలని మోడీ సూచించారు. ప్రస్తుతం మనం కరోనాతో పాటు, అన్ని రకాల వ్యాధులు సంభవించే సీజన్ వైపు పయనిస్తున్నామని, దీంతో ప్రతి ఒక్కరూ జాగ్రత్తగా ఉండాల్సిన అవసరం ఉందని మోదీ అన్నారు. ఈ సందర్భంగా ప్రధాన్ మంత్రి గరిబ్ కళ్యాణ్ యోజన కింద పేదలకు ఉచిత రేషన్ పథకాన్ని ఐదు నెలల పాటు పొడిగిస్తున్నట్లు ప్రధాని మోడీ ప్రకటించారు. ఇందులో భాగంగా పేదలకు 5 కిలోల ఉచిత గోధుమ లేదా బియ్యం, ఒక కిలో పప్పు దినుసులు ఇస్తున్నట్లు అయన ప్రకటించారు. నవంబర్ వరకు ఈ పథకాన్ని అమలు చేయడానికి 90 వేల కోట్లు అదనంగా ఖర్చు అవుతుందని ప్రధాని చెప్పారు. ఈ పథకం ప్రారంభంచినప్పటి నుండి నవంబర్ వరకు ఒకటిన్నర లక్షల కోట్ల వరకు ఖర్చవుతుందని ప్రధాని పేర్కొన్నారు. మరో పక్క పండుగల సమయం కూడా వస్తోందని, ఈసారి అవసరం, ఖర్చులను కూడా పెంచుతుందని ప్రధాని మోదీ అన్నారు.

కరోనా గుట్టు విప్పేందుకు చైనాకి డబ్ల్యూహెచ్‌వో బృందం...

కరోనా వైరస్ వ్యాప్తి మూలాన్ని పరిశోధించేందుకు తమ బృందాన్ని చైనాకి పంపనున్నట్టు ప్రపంచ ఆరోగ్యసంస్థ (డబ్ల్యూహెచ్‌వో) ప్రకటించింది. వైరస్ వ్యాప్తికి చైనానే కారణమనీ.. చైనాకి డబ్ల్యూహెచ్‌వో బృందాన్ని పంపి దర్యాప్తు జరపాలనీ అమెరికా డిమాండ్ చేస్తున్న నేపథ్యంలోనే డబ్ల్యూహెచ్‌వో ఈ నిర్ణయం తీసుకోవడం గమనార్హం. వైరస్ ఎక్కడి నుంచి వ్యాప్తి చెందిందో తెలుసుకోవడం చాలా చాలా కీలకమనీ... అది ఎలా మొదలైందో తెలిస్తేనే వైరస్‌తో పోరాడగలమని డబ్ల్యూహెచ్‌వో చీఫ్ టెడ్రోస్ అధనామ్ గేబ్రేయేసస్ పేర్కొన్నారు. ఇందుకోసం వచ్చేవారంలో చైనా వెళ్లేలా ఓ బృందాన్ని సిద్ధం చేస్తున్నామన్నారు. ఈ పర్యటన ద్వారా వైరస్ ఎలా ప్రారంభమైందన్న దానిపై సమగ్ర అవగాహన సాధించగలమని ఆయన ఆశాభావం వ్యక్తం చేశారు.  కాగా, ఈ మిషన్‌లో భాగంగా ఎవరెవరిని పంపుతారు, ఈ బృందం ఎలా పనిచేస్తుంది అన్న సమాచారం మాత్రం డబ్ల్యూహెచ్‌వో చీఫ్ వెల్లడించలేదు. చైనాలోని వుహాన్ కేంద్రంగా ఆరు నెలల క్రితం వెలుగుచూసిన ఈ మహమ్మారి ఇప్పటికే 5 లక్షల మందిని బలితీసుకుందనీ.. పాజిటివ్ కేసుల సంఖ్య కోటికి చేరుతోందని టెడ్రోస్ ఆందోళన వ్యక్తం చేశారు. ముందు ముందు మరింత విజృంభించే అవకాశం ఉందన్నారు.  "ఈ పరిస్థితి మారాలని కోరుకుంటున్నాం. మళ్లీ మన జీవితాలు సాధారణ స్థితికి రావాలి. అయితే చేదు నిజం ఏమిటంటే.. ఇది అంత త్వరగా ముగిసేది కాదు. కొన్ని దేశాలు వైరస్‌ను నిలువరించగలిగినా.. ప్రపంచ వ్యాప్తంగా ఇది మరింత వేగం పుంజుకుంటోంది.’’ అని ఆయన పేర్కొన్నారు.

గల్లా జయదేవ్ ‌కు షాకిచ్చిన ఏపీ ప్రభుత్వం

టీడీపీ ఎంపీ గల్లా జయదేవ్‌ కి చెందిన కంపెనీకి వైసీపీ ప్రభుత్వం భారీ షాకిచ్చింది. చిత్తూరు జిల్లాలో అమర్ రాజా ఇన్ఫోటెక్‌కు కేటాయించిన భూమిలో సగానికి పైగా ప్రభుత్వం వెనక్కి తీసుకుంది. కంపెనీకి ప్రభుత్వం కేటాయించిన 483.27 ఎకరాల్లో 253 ఎకరాలను వెనక్కు తీసుకుంటున్నట్లు మంగళవారం ఉత్తర్వులు జారీ చేసింది. ఈ మేరకు అమర్ రాజా ఇన్‌ఫ్రా టెక్ నుంచి భూమిని వెనక్కు తీసుకునేందుకు ఏపీఐఐసీకి పరిశ్రమల శాఖ ఆదేశాలు జారీ చేసింది. 2009లో చిత్తూరు జిల్లా యడమర్రి మండలం కొత్తపల్లిలో డిజిటల్ వరల్డ్ సిటీ ఇండస్ట్రియల్ పార్కు ఏర్పాటుకు 483.27 ఎకరాల భూమిని అమర్ రాజా ఇన్‌ఫ్రా టెక్ కు అప్పటి రోశయ్య ప్రభుత్వం కేటాయించింది. ఆ ఒప్పందం ప్రకారం అమర్ రాజా కంపెనీ రూ. 2,100 కోట్ల విలువైన పెట్టుబడులు తీసుకొస్తామని, తద్వారా 20వేల మందికి ఉపాధి కల్పిస్తామని చెప్పింది. కానీ అంత పెట్టుబడులు తీసుకురాక పోగా.. కేవలం 4,310 మంది మాత్రమే ఉపాధి కల్పించింది. దీంతో, పదేళ్లు దాటినా నిబంధనల ప్రకారం ఉద్యోగాల కల్పన, సంస్థ విస్తరణ లేకపోవడంతో 253 ఎకరాలను వెనక్కి తీసుకుంటున్నట్లు రాష్ట్ర ప్రభుత్వం జీవోలో పేర్కొంది.

పతంజలి యూటర్న్.. మేం కరోనా మందు తయారు చేయలేదు

కరోనాకు ఆయుర్వేద మందు కనిపెట్టామనంటూ పతాంజలి సంస్థ ఘనంగా ప్రకటించిన సంగతి తెలిసిందే. అయితే, ఇప్పుడు పతంజలి యూటర్న్ తీసుకుంది. తాము కరోనాకు ఎలాంటి మందును తయారు చేయలేదని తెలిపింది. ఈ మేరకు ఉత్తరాఖండ్ ఔషధ శాఖకు వివరణ ఇచ్చింది. కరోనా కిట్ పేరుతో తాము ఒక ప్యాకేజీని రెడీ చేశామని.. ఇందులో 'దివ్య స్వసరి వతి, దివ్య కొరోనిల్ ట్యాబ్లెట్, దివ్య అను తైల్' ఉంటాయని చెప్పింది. కరోనా కిట్ ను తాము ఇంత వరకు కమర్షిషల్ గా అమ్మలేదని, కరోనా వ్యాధిని ఈ మందు నయం చేస్తుందని తాము ఎక్కడా ప్రచారం చేసుకోలేదని చెప్పింది. ఈ మందు ట్రయల్స్ విజయవంతమయ్యాయని, ఈ మందు వల్ల కలిగే ప్రయోజనాల గురించి మాత్రమే తాము మీడియా సమావేశంలో వెల్లడించామని తెలిపింది.

ఎంసెట్ సహా అన్ని ప్రవేశ పరీక్షలు వాయిదా

తెలంగాణలో కరోనా విజృంభిస్తోన్న నేపథ్యంలో రాష్ట్ర ప్రభుత్వం కీలక నిర్ణయం తీసుకుంది. ఎంసెట్ సహా అన్ని ప్రవేశ పరీక్షలనూ వాయిదా వేస్తున్నట్టు ప్రకటించింది. వాస్తవానికి తెలంగాణలో రేపటి నుంచి ఈ నెల 15 వరకూ పలు కామన్ ఎంట్రెన్స్ టెస్టులు జరగాల్సి ఉంది. అయితే, కరోనా విజృభింస్తున్న తరుణంలో విద్యార్థుల ప్రాణాలతో ఆడుకోవద్దని కోరుతూ హైకోర్టులో పిటిషన్ దాఖలైంది. దీనిపై విచారణ సందర్భంగా తెలంగాణ ప్రభుత్వం హైకోర్టులో తన వాదనలు వినిపించింది. ఎంసెట్ సహా అన్ని ప్రవేశపరీక్షలు వాయిదా వేస్తున్నట్టు స్పష్టం చేసింది. రాష్ట్ర ప్రభుత్వ నిర్ణయంతో ఎంసెట్, లా సెట్, పాలీసెట్, ఈసెట్, పీజీఈసెట్, ఎడ్ సెట్ పరీక్షలు వాయిదా ప‌డ్డాయి.

ఆయన ఓ తేడా మనిషి.. వైసీపీ ఎమ్మెల్యే షాకింగ్ కామెంట్స్

వైసీపీ ఎంపీ రఘురామ కృష్ణంరాజు కొద్దిరోజులుగా సొంత పార్టీ వైసీపీని ముప్పుతిప్పలు పెడుతున్న సంగతి తెలిసిందే. పార్టీ నేతలు విమర్శించినా, పార్టీ నుంచి షోకాజ్ నోటిస్ వచ్చినా.. ఏ మాత్రం తడబడకుండా విమర్శకు కాస్త గోదావరి వెటకారం జోడించి కౌంటర్ ఇస్తున్నారు. అయితే తాజాగా రఘురామ కృష్ణంరాజుపై వైసీపీ నేత, తణుకు ఎమ్మెల్యే కారుమూరి నాగేశ్వరరావు తీవ్ర వ్యాఖ్యలు చేశారు. ఆయన ఒక తేడా మనిషి అంటూ పరుష పదజాలాన్ని ఉపయోగించారు. ఆయనను తాము మనిషిలా గుర్తించడం లేదని సంచలన వ్యాఖ్యలు చేశారు. రఘురామ కృష్ణంరాజు బీజేపీకి వెళ్లిపోతున్నారు కనుకనే ప్రధాని మోడీ భజన చేస్తున్నారని నాగేశ్వరరావు ఆరోపించారు.