మహిళలకోసం చిన్న విశ్రాంతి గొప్ప అద్భుతాలు!
మహిళలకోసం చిన్న విశ్రాంతి గొప్ప అద్భుతాలు!
రోజువారీ జీవనశైలిని బట్టి పనులలో ఆక్టివ్ ఉండటం జరుగుతుంది. అయితే ఆడవారు ఇంట్లో పనులు, బయట ఉద్యోగాలు చేస్తూ మానసికంగా అలసిపోతూ ఉంటారు. మరీ ముఖ్యంగా పిల్లల తల్లులలో ఈరకమైన అలసట స్పష్టంగా కనబడుతూ ఉంటుంది. ఈ అలసట అనేది ఆడవారిని చాలా డిస్టర్బ్ చేస్తుంది. మైండ్ ను ఆక్టివ్ చేయడానికి కనీసం సరైన సమయం కూడా దొరకనంతగా మారిపోతుంది ఒక్కోసారి.
ఇలా జరగడం వల్ల ఒకోసారి చేయాల్సిన పనుల మీద ఏకాగ్రత తగ్గవచ్చు, శారీరకంగా కూడా అలసిపోయినట్టు అనిపించవచ్చు. ఒత్తిడి వల్ల తీసుకోవలసిన నిర్ణయాలు సరిగా తీసుకోలేకపోవడం జరగవచ్చు. ఇదంతా మనకు తీరిక లేకపోవడం వల్ల జరుగుతున్న సమస్య కాదు. ప్రస్తుతం కాలమే వేగవంతమైనది. పనులన్నీ ఒకదాని తరువాత మరొకటి వెంటవెంటనే జరిగిపోతుండటం వల్ల నాన్ స్టాప్ గా రన్నింగ్ చేసిన అనుభూతి కలుగుతుంది. ఈ అలసట కారణంగా రోజు మొత్తం డిస్టర్బ్ అయిపోవచ్చు. అయితే ఈ సమస్యను అధిగమించాలంటే మహిళలు చిన్న చిన్న బ్రేక్స్ తీసుకోవాలని. తీసుకునే కొద్దిపాటి విశ్రాంతి అయినా చెప్పలేనంత ఫలితాన్ని ఇస్తుందని ఆరోగ్య నిపుణులు స్పష్టం చేశారు.
రోజులో చిన్నపాటి విశ్రాంతి వల్ల కలిగే అద్భుతమైన అయిదు మార్పులు ఇవే:-
మరింత ఉత్సహం!!
చాలామంది ఒక ఫ్లో లో పని చేస్తున్నప్పుడు దాన్ని మధ్యలో ఆపితే చాలా డిస్టర్బ్ అవుతారు. విశ్రాంతి తరువాత దాన్ని అదే వేగంతో కొనసాగించడంలో ఇబ్బంది పడతారు. అయితే ఇలా విరామం తీసుకుని, ఆ విరామంలో కాసింత విశ్రాంతి తీసుకోవడం అలవాటు అయితే అది అద్భుతమైన ఫలితాలను ఇస్తుంది. విశ్రాంతి తరువాత మరింత ఉత్సహంగా పనిని కొనసాగించే శక్తి వస్తుంది. కాబట్టి చిన్న పాటి విశ్రాంతి మెదడును రిఫ్రెష్ చేస్తుంది.
ఒత్తిడికి మంచి బ్రేక్!!
పనులు ఎక్కువ అయితే సాధారణంగానే మానసికంగా అలసిపోయి ఒత్తిడికి లోనవుతారు. అలా నిరంతరం ఒత్తిడి ఎదుర్కొనే వారు అయితే చేస్తున్న పని మధ్యలో ఒక క్రమమైన బ్రేక్ తీసుకుని విశ్రాంతి తీసుకోవడం వల్ల ఆ ఒత్తిడిని కూడా ఒక క్రమంలో తగ్గించడానికి అలవాటు పడతారు. ఒత్తిడి మానసిక ఆరోగ్యం పైన మాత్రమే కాకుండా శారీరక ఆరోగ్యం పై కూడా ప్రభావం చూపుతుంది. కాబట్టి విశ్రాంతి ఆ రెండింటిని పరిష్కరిస్తుంది.
క్రియేటివిటీ!!
పనులు చేసేటప్పుడు ఏదైనా కష్టంగా లేక తరువాత ఏమిటి అని ఆలోచన, ఇదింకా అవ్వలేదే అనే చిరాకు ఉన్నప్పుడు చిన్న బ్రేక్ దానిలో కాస్త విశ్రాంతి తీసుకుంటే పనిలో చేయాల్సిన మార్పులు, ఆ పనిలో చేస్తున్న తప్పులు అర్థమైపోతాయి. విశ్రాంతి తరువాత ఉత్సహంగా పని చేసే అవకాశం దొరుకుతుంది.
జ్ఞాపకశక్తి పెరుగుతుంది!!
ఆగకుండా ఏదో పని చేస్తున్నప్పుడు శరీరమే కాదు మెదడు కూడా తొందరగా అలసిపోతుంది. ఆ మెదడుకు కాసింత విశ్రాంతి ఇచ్చామంటే రిలాక్స్ అయ్యి దాని పనితీరు పెరుగుతుంది. ఫలితంగా జ్ఞాపకశక్తి స్థాయి కూడా మెరుగవుతుంది.
ఏకాగ్రత!!
చేసేపని మీద ఏకాగ్రత అనేది ఎంతో ముఖ్యం. ఏకాగ్రత లేకపోతే గంటలో చెయ్యాల్సిన పనిని ఇరవై నాలుగు గంటల సమయం ముందుంచినా చెయ్యలేము. అందుకే పని మధ్యలో చిన్న బ్రేక్ తీసుకుంటే తరువాత పనిమీద ఏకాగ్రత పెరుగుతుంది. ఆ ఏకాగ్రత పని సులువుగా సమర్థవంతంగా పూర్తి అయ్యేలా చేస్తుంది.
ఈవిధంగా మహిళలు తమ రోజువారీ పనులలో చిన్న చిన్న బ్రేక్ లు తీసుకుంటూ ఆ సమయంలో ఒత్తిడిని తగ్గించుకోవడం వల్ల రోజుమొత్తం ఎలాంటి గందరగోళం లేకుండా సజావుగా గడిచిపోతుంది. చిన్న బ్రేక్స్ ఆడవారి ఆరోగ్యానికి పెద్ద ఉపశమనాన్ని ఇస్తాయి. అంతేకాదు చేస్తున్న పని విషయంలో ఆ బ్రేక్స్ లో కొన్నిసార్లు అద్భుతమైన ఆలోచనలు కూడా రావచ్చు. ఎవరు చెప్పొచ్చారు ఆ ఆలోచనలే పనిని మరొక స్థాయికి తీసుకెళ్లి అద్భుతాన్ని సృష్టించవచ్చేమో. అందుకే విశ్రాంతి అనేది మానసిక శారీరక ఆరోగ్యానికే కాదు పని సవ్యంగా జరగడానికి కూడా ముఖ్యమే!!
◆నిశ్శబ్ద.