పూరి జగన్నాథ్.. నేమ్ కాదు.. బ్రాండ్..!
on Apr 20, 2025
టాలీవుడ్ లో డైరెక్టర్ పూరి జగన్నాథ్ (Puri Jagannadh) అంటే ఒక బ్రాండ్. హీరోలతో సమానంగా అభిమానులను సంపాదించుకున్న అతికొద్ది మంది దర్శకులలో ఆయన ఒకరు. అప్పట్లో పూరితో సినిమా చేయడానికి స్టార్ హీరోలు సైతం పోటీ పడేవారు. హీరోలను సరికొత్తగా ప్రజెంట్ చేయడంలో ఆయన దిట్ట. అందుకే "హీరోలందు పూరి హీరోలు వేరయా" అనేవారు.
పవన్ కళ్యాణ్ హీరోగా నటించిన 'బద్రి' సినిమాతో డైరెక్టర్ గా పరిచయమైన పూరి జగన్నాథ్.. మొదటి సినిమాతోనే అందరి దృష్టిని ఆకర్షించారు. అందులో హీరో యాటిట్యూడ్ కి, డైలాగ్ లకి ప్రేక్షకులు ఫిదా అయిపోయారు. అక్కడి నుంచి పూరి వెనుతిరిగి చూడలేదు. భారీ విజయాలతో స్టార్ డైరెక్టర్ గా ఎదిగారు. ఇడియట్, అమ్మ నాన్న ఓ తమిళమ్మాయి, శివమణి, పోకిరి, దేశముదురు, నేనింతే, బిజినెస్ మ్యాన్, టెంపర్.. ఇలా ఎన్నో గుర్తుండిపోయే చిత్రాలను అందించారు పూరి. హీరోలను ఆయన చూపించే తీరు గురించి ఎంత చెప్పినా తక్కువే. ఎవరైనా ఆ హీరో పాత్రతో ప్రేమలో పడాల్సిందే. ఇక ఆయన సినిమాల్లో డైలాగ్ లకు సెపరేట్ ఫ్యాన్ బేస్ ఉంది. హీరోలతో పూరి పలికించే మాటలు.. తూటాల్లా ఉంటాయి. అయితే కొన్నేళ్లుగా ఆయన సినిమాల్లో మునుపటి పూరి మార్క్ కనిపించడం లేదు.
పూరి డైరెక్ట్ చేసిన 'బద్రి' సినిమా విడుదలై నేటికి సరిగ్గా 25 ఏళ్ళు. ఆ చిత్రం 2000 ఏప్రిల్ 20న విడుదలై ఘన విజయం సాధించింది. ఈ 25 ఏళ్లలో 'పోకిరి' వంటి ఇండస్ట్రీ హిట్ సహా ఎన్నో మెమొరబుల్ హిట్స్ అందుకున్నారు. అలాంటి పూరి.. కొన్నేళ్లుగా వెనుకబడిపోయారు. 2015 లో వచ్చిన 'టెంపర్' తర్వాత.. మళ్ళీ నాలుగేళ్లకు 2019 లో 'ఇస్మార్ట్ శంకర్'తో సక్సెస్ చూశారు. మధ్యలో ఆయన డైరెక్ట్ చేసిన ఆరు సినిమాలు నిరాశపరిచాయి. అలాగే 'ఇస్మార్ట్ శంకర్' కూడా మంచి వసూళ్లతో బ్లాక్ బస్టర్ అనిపించుకున్నప్పటికీ.. పూరి ఫ్యాన్స్ ని మాత్రం పూర్తిస్థాయిలో సంతృప్తి పరచలేకపోయింది. అది పూరి మార్క్ సినిమా కాదని ఫ్యాన్స్ అభిప్రాయపడ్డారు. ఆయన గత చిత్రాలు 'లైగర్', 'డబుల్ ఇస్మార్ట్' కూడా దారుణంగా నిరాశపరిచాయి. ఈ క్రమంలో పూరి తదుపరి సినిమాపై ఆసక్తి నెలకొంది.
పూరి తన నెక్స్ట్ మూవీని విజయ్ సేతుపతితో చేస్తున్నారు. ఈ సినిమాకి బెగ్గర్ అనే టైటిల్ ప్రచారంలో ఉంది. ఈ స్క్రిప్ట్ అదిరిపోతుందని, దీంతో మునుపటి పూరిని చూడబోతున్నామని ఇండస్ట్రీ వర్గాల్లో టాక్ ఉంది. మరి బెగ్గర్ మూవీతో పూరి కమ్ బ్యాక్ ఇస్తారేమో చూడాలి.
Also Read
Latest News
Video-Gossips
TeluguOne Service
Customer Service
Live Help 24/7Customer Care
Send your Queries to
