గయ్యాళి పాత్రలతో సూర్యకాంతం ఎంత పాపులర్ అయ్యారో చెప్పే విచిత్రమైన సంఘటన.!
(అక్టోబర్ 28 సూర్యకాంతం జయంతి సందర్భంగా..) సినిమాల్లో ఆమె కనిపిస్తే కోడళ్లకు హడల్‌.. అల్లుళ్లకు చెమటలు.. భర్తలకు వణుకు! అత్త పాత్రలో సూర్యకాంతం కనిపించారంటే చాలు.. ఆ ఇంట్లో ఏదో ఒక గొడవ జరగాల్సిందే. మాటలతోనే ఎదుటివారిని ముప్పుతిప్పలు పెట్టడం, కోపంతో ఊగిపోవడం ఆమెకు వెన్నతో పెట్టిన విద్య. అందుకే తెలుగు ప్రేక్షకుల మనసుల్లో గయ్యాళి అత్తగా చెరగని ముద్ర వేసుకున్నారు. ఆమె తర్వాత సూర్యకాంతం అనే పేరును పెట్టే ధైర్యం ఏ త‌ల్లిదండ్రులూ చెయ్య‌లేదు. దీన్నిబట్టి తన న‌ట‌న‌తో తెలుగు ప్రజల మనసుల్లో ఆమె ఎంతటి బలమైన ముద్ర వేశారో అర్థమవుతుంది. తెరపై తన గ‌య్యాళిత‌నంతో అందరూ భ‌య‌పెట్టే సూర్యకాంతం నిజజీవితంలో ఒక మ‌హిళ‌ను చూసి షాక్ అయింది, నోట మాట రానంత ప‌నైంది. ఈ విచిత్రమైన సంఘటన జరిగిన తర్వాత ఏ సినిమా షూటింగ్‌కి వెళ్లినా సూర్యకాంతం స‌హ‌న‌టీన‌టులు ఆమెను ఆట ప‌ట్టించేవార‌ట. అస‌లేం జరిగింది.. సూర్య‌కాంతంని అంత‌లా భ‌య‌పెట్టిన మ‌హిళ ఎవరు, ఇది ఎక్క‌డ జరిగింది అనే వివ‌రాల్లోకి వెళితే.. ఓసారి సూర్యకాంతం నెల్లూరుకు వెళ్లినప్పుడు ఆమె ప్రయాణిస్తున్న కారు మధ్యలో ఆగిపోయింది. మెకానిక్ వ‌చ్చి రిపేరు చేస్తుండ‌గా.. ఆమె కారు దిగి రోడ్డు మీదే ప‌చార్లు చేయడం మొద‌లు పెట్టారు. అదే సమయంలో అటుగా వెళ్తున్న ఓ మ‌హిళ సూర్య‌కాంతంని గుర్తుప‌ట్టి ద‌గ్గ‌ర‌కి వచ్చింది. ఆమెకు సూర్యకాంతం చేసిన గయ్యాళి పాత్రలు, కోడళ్లను రాచి రంపాన పెట్టే సీన్లు అన్నీ గుర్తు వ‌చ్చి ఉంటాయి. దాంతో ఒక్క‌సారిగా ఉగ్ర‌రూపం దాల్చి తిట్ల దండ‌కం మొద‌లు పెట్టింది. ‘ఇంకెన్ని కాపురాలు కూలుస్తావు?’, ‘కోడళ్లను ఎందుకలా రాచి రంపాన పెడతావు?’ అంటూ నోటికొచ్చిన తిట్ల‌న్నీ తిట్ట‌డం మొద‌లు పెట్టిందా మ‌హిళ. ఒక్క‌సారిగా షాక్ అయిన సూర్యకాంతం మారు మాట్లాడ‌కుండా ఆమె తిట్ల‌న్నీ భ‌రించారు. తిట్టి తిట్టి అల‌సిపోయిన ఆ మ‌హిళ అక్కడి నుంచి వెళ్లిపోయాక ఊపిరి పీల్చుకున్నారు సూర్యకాంతం. త‌ను చేసిన క్యారెక్ట‌ర్లు ప్రేక్షకులకు అంత‌గా కనెక్ట్ అయినందుకు ఆమె ఎంతో సంతోషించారు. ఈ విషయం సినీ వర్గాలకు తెలియడంతో షూటింగ్‌లలో సహనటులు ఆమెను ఆటపట్టించేవార‌ట. సినిమాల్లో ఆమె పాత్రలు ఎంత సహజంగా ఉండేవో చెప్పడానికి ఇలాంటి సంఘటనలే ఉదాహరణగా నిలుస్తాయి. నిజానికి సూర్యకాంతం వ్యక్తిగత జీవితంలో ఎంతో సున్నిత మనస్కురాలని, ఇతరుల కష్టాలకు స్పందించే మంచి మనసున్న వ్యక్తి అని ఆమెతో పనిచేసినవారు చెప్పేవారు. సూర్యకాంతం నటిగా ఎంత గొప్ప‌వారో, ఆమె చేసిన పాత్రలు ప్ర‌జ‌ల్లోకి ఎంతగా దూసుకెళ్లాయో చెప్పడానికి ఈ సంఘటన ఒక ఉదాహ‌ర‌ణ. గయ్యాళి అత్త అనే ఇమేజ్ వల్ల అప్పుడప్పుడు ఇలాంటి విచిత్రమైన అనుభవాలు ఎదురైనా, తెలుగు ప్రేక్షకులు మాత్రం ఆమెను ఎప్పటికీ మర్చిపోలేరు. అక్టోబర్ 28న సూర్యకాంతం జయంతి సందర్భంగా ఈ సరదా సంఘటనను గుర్తుచేసుకుంటే.. ఆమె నటన సాధార‌ణ ప్రేక్షకుల్లో ఎంతటి ప్రభావం చూపిందో మరోసారి అర్థమవుతుంది. [rare incident in actress suryakantham life, actress suryakantham jayanthi on october 28th, actress suryakantham characters, legendary actress suryakantham]
Oct 27, 2026 7:36PM
ఎన్టీఆర్ సినిమాల విజయానికి బాట‌లు వేసిన టి.వి.రాజు స్వరాల వెనుక కథ.!
జయకృష్ణ ముకుందా మురారి.. జయ గోవింద బృందావిహారీ.. స్వాగతం.. సుస్వాగతం.. కురుసార్వభౌమా స్వాగతం.. దేవతయే దిగివచ్చి మనుషులలో కలసిన కథ చెప్పాలని ఉంది.. వినవయ్యా రామయ్యా.. ఏమయ్యా భీమయ్యా.. తెలుగు జాతి మనది.. నిండుగ వెలుగు జాతి మనది.. ఇలా ఒకటా రెండా.. ఎన్నో సుమధుర గీతాలకు స్వరాలు అందించిన సంగీత దర్శకుడు టి.వి.రాజు. ఆయన బాణీ పలికితే పాటకు అందం.. ఆ పాట తెరపై కనిపిస్తే సినిమాకు ప్రత్యేక ఆకర్షణ! ఆ స్వరమాంత్రికుడి సినీ ప్రయాణాన్ని గుర్తు చేసుకుందాం. అసిస్టెంట్‌గా మొదలై.. స్వతంత్ర సంగీత దర్శకుడిగా ఎదిగిన టి.వి.రాజు అసలు పేరు తోటకూర వెంకటరాజు. 1921 అక్టోబర్ 25న రాజమహేంద్రవరం సమీపంలోని రఘుదేవపురంలో జన్మించారు. చిన్నతనం నుంచే సంగీతంపై ఆసక్తి పెంచుకున్న ఆయన, తన కలను నిజం చేసుకునేందుకు మద్రాసు చేరుకున్నారు. తొలినాళ్లలో ప్రముఖ సంగీత దర్శకుడు పి.ఆదినారాయణరావు వద్ద సహాయకుడిగా పనిచేశారు. 1950లో విడుదలైన ‘పల్లెటూరి పిల్ల’ సినిమాతో ఆయనకు చిత్రసీమతో అనుబంధం ఏర్పడింది. ఆ తర్వాత బి.ఏ.సుబ్బారావు రూపొందించిన ‘టింగురంగా’ చిత్రంతో స్వతంత్ర సంగీత దర్శకుడిగా అడుగుపెట్టారు. ఎన్టీఆర్ సొంత నిర్మాణ సంస్థ నేషనల్ ఆర్ట్ థియేటర్ (ఎన్‌ఏటీ) నిర్మించిన ‘పిచ్చి పుల్లయ్య’కు సంగీతం అందించడంతో ఆయన ప్రయాణంలో మరో కీలక మలుపు మొదలైంది. ఆ తర్వాత ‘తోడు దొంగలు’, ‘జయసింహ’ చిత్రాలకు స్వరాలు సమకూర్చారు. ముఖ్యంగా ‘జయసింహ’ విజయంతో టి.వి.రాజు పేరు సంగీతాభిమానుల్లో మార్మోగింది. పౌరాణికమైనా.. జానపదమైనా.. సాంఘికమైనా.. తనదైన బాణీ! టి.వి.రాజు సంగీతంలో ప్రత్యేకత ఏమిటంటే.. కథకు తగ్గట్టుగా పాటను తీర్చిదిద్దడం. పౌరాణిక చిత్రాల్లో భక్తిభావాన్ని పలికిస్తూనే, జానపద చిత్రాల్లో ఉత్సాహాన్ని నింపేవారు. సాంఘిక చిత్రాల్లో మెలోడీకి పెద్దపీట వేసేవారు. ‘పాండురంగ మహాత్మ్యం’లోని ‘జయకృష్ణ ముకుందా మురారి’, ‘శ్రీకృష్ణ పాండవీయం’లోని ‘స్వాగతం సుస్వాగతం’, ‘ఉమ్మడి కుటుంబం’లోని ‘చెప్పాలని ఉంది’, ‘శ్రీకృష్ణావతారం’లోని ‘నీ చరణ కమలాలు’, ‘భలే తమ్ముడు’లోని ‘నేడే ఈనాడే కరుణించె’, ‘కథానాయకుడు’లోని ‘వినవయ్యా రామయ్యా’, ‘తల్లా పెళ్లామా’లోని ‘తెలుగు జాతి మనది’ వంటి పాటలు ఆయన సంగీత వైవిధ్యానికి నిదర్శనాలు. హిందీ సంగీతంలోని కొన్ని బాణీల ప్రభావాన్ని స్వీకరించినా, వాటికి తెలుగు ప్రేక్షకుల అభిరుచికి తగ్గట్టుగా తనదైన శైలిని జోడించేవారు. ‘భలే తమ్ముడు’లో మహమ్మద్ రఫీతో పాట పాడించడం కూడా ఆయన సంగీత ప్రయాణంలో చెప్పుకోదగ్గ విశేషం. ఎన్టీఆర్‌తో అనుబంధం.. హిట్లకు బలమైన బంధం! టి.వి.రాజు పేరు చెప్పగానే ఎన్టీఆర్ గుర్తుకు రావడానికి కారణం వీరిద్దరి కలయికలో వచ్చిన సినిమాలే. ప్రారంభ దశలో ఒకే గదిలో ఉంటూ సినీ అవకాశాల కోసం ప్రయత్నించిన రోజుల నుంచి, అగ్రస్థానాలకు చేరిన తర్వాత కలిసి పనిచేసిన దశ వరకు వీరి అనుబంధం కొనసాగింది. ‘పిచ్చి పుల్లయ్య’, ‘జయసింహ’, ‘పాండురంగ మహాత్మ్యం’, ‘మంగమ్మ శపథం’, ‘శ్రీకృష్ణ పాండవీయం’, ‘పిడుగు రాముడు’, ‘ఉమ్మడి కుటుంబం’, ‘భలే తమ్ముడు’, ‘కథానాయకుడు’, ‘వరకట్నం’ తదితర చిత్రాలకు టి.వి.రాజు సంగీతం అందించారు. అందుబాటులో ఉన్న జీవితచరిత్రల ప్రకారం, ఎన్టీఆర్ హీరోగా నటించిన సుమారు 38 చిత్రాలకు ఆయన స్వరాలు సమకూర్చారు. మొత్తంగా తెలుగు, తమిళ, కన్నడ భాషల్లో దాదాపు 60 చిత్రాలకు సంగీతం అందించినట్లు సమాచారం. కొన్ని పాటల డేటాబేస్‌లలో ఆయన స్వరపరిచిన పాటల సంఖ్య 783గా నమోదైంది. అయితే పాటల లెక్కింపు పద్ధతి, భాషలు, అందుబాటులో ఉన్న రికార్డులను బట్టి సంఖ్యల్లో తేడాలు ఉండవచ్చు. చివరి సినిమా ఏది? చివరి బాణీ ఏది? 1973 ఫిబ్రవరి 20న టి.వి.రాజు కన్నుమూశారు. ఆయన సంగీతం అందించిన చివరి విడుదలైన చిత్రంగా ‘ధనమా? దైవమా?’ను పలు సినీ కథనాలు పేర్కొంటున్నాయి. ఎన్టీఆర్ నటించిన ఈ చిత్రం ఆయన మరణానంతరం 1973 మే 24న విడుదలైంది. ఇందులోని ‘రామా.. శ్రీరామా..’, ‘రా రా నవమోహనా’, ‘నీ మది చల్లగా స్వామీ నిదురపో’ వంటి పాటలు ప్రేక్షకులను అలరించాయి. మరో ఆసక్తికరమైన విషయం ఏమిటంటే, ఎన్టీఆర్ నటించిన ‘మనుషుల్లో దేవుడు’ చిత్రానికి ‘అహో.. హిమవన్నగమూ..’ అనే పాటకు టి.వి.రాజు చివరిసారిగా బాణీ కట్టారని సమాచారం. ఆ తర్వాత ఆ చిత్రానికి పూర్తి సంగీత బాధ్యతలను సాలూరు హనుమంతరావు నిర్వహించారు. ఇలా ఆయన జీవిత ప్రయాణం ముగిసినా, ఆయన స్వరపరిచిన పాటల ప్రయాణం మాత్రం ఆగలేదు. రాజు తనయుడు సోమరాజు, సంగీత ద్వయం రాజ్‌–కోటిలో ‘రాజ్‌’గా ప్రసిద్ధి చెందడం కూడా సంగీత వారసత్వానికి మరో గుర్తు. ఆయన వెళ్ళిపోయి ఐదు దశాబ్దాలు దాటినా.. రేడియోలోనో, పాత సినిమా పాటల కార్యక్రమాల్లోనో ‘జయకృష్ణ ముకుందా మురారి’ వినిపిస్తే చాలు.. ఆ స్వరాల వెనుక ఉన్న టి.వి.రాజు మళ్లీ మన ముందుకొచ్చినట్టే! [T V Raju, T V Raju Birth Anniversary, Telugu Music Directors, N T Rama Rao Movies, Jayakrishna Mukunda Murari, Panduranga Mahatyam Songs, Telugu Old Songs, Telugu Cinema History, Dhanama Daivama, Telugu Film Music]
Oct 27, 2026 12:31PM
ప్రభాస్ కెరీర్‌లో టాప్ 10 సినిమాలు: నంబర్ 1 ఏదో తెలుసా.?
ఒకప్పుడు టాలీవుడ్‌లో లవర్ బాయ్‌గా అమ్మాయిల మనసులు గెలుచుకున్నాడు.. ఆ తర్వాత మాస్ సినిమాలతో థియేటర్లలో రచ్చ చేశాడు.. ఇక బాహుబలిగా మారిన తర్వాత పాన్ ఇండియా ప్రేక్షకుల దృష్టినే తనవైపు తిప్పుకున్నాడు. ఆయనే మన రెబల్ స్టార్ ప్రభాస్. అక్టోబర్ 23న ప్రభాస్ పుట్టినరోజు సందర్భంగా.. ఆయన కెరీర్‌ను మలుపు తిప్పిన టాప్ 10 సినిమాల గురించి ఇప్పుడు మాట్లాడుకుందాం. వర్షం: ప్రభాస్ కెరీర్‌లో మొదటి హిట్ ‘వర్షం’. శోభన్ దర్శకత్వంలో తెరకెక్కిన ఈ సినిమా యూత్ ను బాగా ఆకట్టుకుంది. ముఖ్యంగా లవ్ స్టోరీ, ప్రభాస్ స్క్రీన్ ప్రెజెన్స్ ప్రేక్షకులకు బాగా కనెక్ట్ అయ్యాయి. ఈ సినిమాతో ప్రభాస్ లవర్ బాయ్ ఇమేజ్‌తో పాటు యాక్షన్ చేయగల హీరోగా కూడా ప్రత్యేక గుర్తింపు తెచ్చుకున్నాడు. ఛత్రపతి: ప్రభాస్ అంటే మాస్ అనే ఇమేజ్‌ను బలంగా నిలబెట్టిన సినిమాల్లో ‘ఛత్రపతి’కి ప్రత్యేక స్థానం ఉంటుంది. రాజమౌళి తెరకెక్కించిన ఈ సినిమాలో ప్రభాస్ బాడీ లాంగ్వేజ్, డైలాగ్ డెలివరీ, యాక్షన్ సన్నివేశాల్లో చూపించిన ఇంటెన్సిటీ ఆయనను మాస్ ప్రేక్షకులకు దగ్గర చేశాయి. బుజ్జిగాడు మేడ్ ఇన్ చెన్నై: ఈ సినిమా ఆశించినంత విజయం సాధించకపోయినా ఈ సినిమాలోని ప్రభాస్ స్టైల్ అండ్ డైలాగ్ డెలివరీకి ఎందరో అభిమానులుగా మారిపోయారు. ఒక రకంగా చెప్పాలంటే ప్రభాస్ కామెడీని కూడా సూపర్ గా చెయ్యగలడని బుజ్జిగాడు మూవీ రుజువు చేసింది. డార్లింగ్: మాస్ ఇమేజ్ మాత్రమే కాదు.. తనలోని రొమాంటిక్ హీరోను కూడా ప్రేక్షకులకు గుర్తుండిపోయేలా చూపించిన సినిమా ‘డార్లింగ్’. కరుణాకరన్ దర్శకత్వంలో వచ్చిన ఈ సినిమాలో ప్రభాస్ లవర్ బాయ్ లా కనిపించాడు. ప్రభాస్‌లోని హ్యాండ్సమ్, కూల్, రొమాంటిక్ కోణాన్ని గుర్తుచేసుకోవాలంటే ‘డార్లింగ్’ తప్పకుండా చూడాల్సిన సినిమా. మిస్టర్ పర్ఫెక్ట్: దశరథ్ దర్శకత్వంలో తెరకెక్కిన ఈ సినిమాలో ప్రభాస్ పాత్ర మొదట్లో తనకు నచ్చినట్టుగా జీవించాలనుకునే వ్యక్తిలా కనిపిస్తుంది. కానీ ప్రేమ, కుటుంబ అనుబంధాలు, జీవితంలో ఎదురయ్యే పరిస్థితులు అతని ఆలోచనా విధానాన్ని మార్చేస్తాయి. భారీ యాక్షన్ సన్నివేశాలు లేకపోయినా.. తన కామెడీ టైమింగ్, ఎమోషన్స్ తో ప్రేక్షకులను మెప్పించగలనని ప్రభాస్ నిరూపించిన సినిమాల్లో ఇదొకటి. మిర్చి: ప్రభాస్ కెరీర్‌లో మాస్, క్లాస్, రొమాన్స్, ఫ్యామిలీ ఎమోషన్స్ అన్నీ కలిసిన సినిమా ఏదంటే చాలామందికి గుర్తొచ్చే పేరు ‘మిర్చి’. కొరటాల శివ డైరెక్ట్ చేసిన ఈ సినిమాలో ప్రభాస్ స్టైలిష్ లుక్ కి అందరూ ఫిదా అయ్యారు. మాస్ యాంగిల్ కు కూడా అదే రేంజ్ లో న్యాయం చేసి బాక్సాఫీస్ ను షేక్ చేశాడు. సలార్: ‘సలార్’తో ప్రభాస్ తన అసలైన మాస్ ఎనర్జీని మరోసారి ప్రేక్షకులకు గుర్తుచేశాడు. ప్రశాంత్ నీల్ దర్శకత్వంలో తెరకెక్కిన ఈ సినిమాలో ప్రభాస్ దేవ అనే పాత్రలో కనిపించాడు. ప్రభాస్ స్క్రీన్ ప్రజెన్స్, ఎలివేషన్స్ అభిమానులకు ట్రీట్‌గా నిలిచాయి. కల్కి 2898 AD: భారతీయ పురాణాలను సైన్స్ ఫిక్షన్‌తో ముడిపెడితే ఎలాంటి అద్భుతం సాధ్యమవుతుంది? ఈ ఆలోచనకు తెరరూపమే ‘కల్కి 2898 AD’. నాగ్ అశ్విన్ దర్శకత్వంలో తెరకెక్కిన ఈ సినిమాలో ప్రభాస్ భైరవ పాత్రలో కనిపించారు. ముఖ్యంగా కర్ణుడిగా సర్ప్రైజ్ చేశారు. బాహుబలి - ది బిగినింగ్: ప్రభాస్ కెరీర్‌ను పూర్తిగా మార్చేసిన సినిమా ‘బాహుబలి’. రాజమౌళి దర్శకత్వంలో తెరకెక్కిన ఈ సినిమా భారతీయ సినిమాను మరో స్థాయికి తీసుకెళ్లింది. శివుడు, అమరేంద్ర బాహుబలి పాత్రల ద్వారా ప్రభాస్ రెండు భిన్నమైన కోణాలను చూపించాడు. ఈ సినిమాతో ప్రభాస్ పేరు దేశవ్యాప్తంగా మారుమోగింది. బాహుబలి 2 - ది కన్‌క్లూజన్: ప్రభాస్ కెరీర్‌లో నంబర్ వన్ స్థానం అంటే.. చాలా మందికి మరో ఆలోచన లేకుండా గుర్తొచ్చే సినిమా ‘బాహుబలి 2: ది కన్‌క్లూజన్’. అమరేంద్ర బాహుబలి పాత్రలో ప్రభాస్ చూపించిన రాజసం, ప్రజల కోసం నిలబడే నాయకత్వం, కుటుంబం కోసం పడే సంఘర్షణ ప్రేక్షకులను కట్టిపడేశాయి. అదే సమయంలో మహేంద్ర బాహుబలిగా ప్రతీకారం తీర్చుకునే పాత్రలోనూ ప్రభాస్ తనదైన ముద్ర వేశాడు. ఈ సినిమా కేవలం భారీ కలెక్షన్లు సాధించిన చిత్రంగా మాత్రమే నిలవలేదు. భారతీయ సినిమా మార్కెట్‌ను ఎన్నో రెట్లు పెంచి, ప్రపంచస్థాయికి మన సినిమాను చేర్చింది. [Prabhas Top 10 Movies, Prabhas Best Movies, Prabhas Birthday Special 2026, Happy Birthday Prabhas, Prabhas Birthday, Rebel Star Prabhas, Prabhas Hit Movies, Prabhas Movie Journey, Prabhas Movies, Telugu Film News]
Oct 22, 2026 5:45PM.WEBP)
హాస్య నటుల్లో అప‌ర దాన కర్ణుడు.. నవ్వుల రారాజు రాజబాబు.!
(అక్టోబర్ 20 రాజబాబు జయంతి సందర్భంగా..) క‌మెడియ‌న్‌గా ఎంతో పాపులారిటీ తెచ్చుకున్న రాజబాబు అసలు పేరు పుణ్య‌మూర్తుల అప్ప‌ల‌రాజు. 1960లో విడుదలైన ‘స‌మాజం’ చిత్రం ద్వారా న‌టుడిగా ప‌రిచ‌య‌మ‌య్యారు. ఆయన నటించిన చివరి సినిమా ‘గ‌డ‌స‌రి అత్త సొగ‌స‌రి కోడ‌లు’. 22 ఏళ్ళ కెరీర్‌లో 580కి పైగా సినిమాల్లో నటించారు రాజబాబు. ఆ తర్వాత నిర్మాత‌గా మారి కొన్ని మంచి సినిమాలు నిర్మించారు. ‘మ‌నిషి రోడ్డున ప‌డ్డాడు’, ‘ఎవ‌రికి వారే య‌మునా తీరే’.. చిత్రాలు రాజబాబు నిర్మించిన సినిమాల్లో ముఖ్య‌మైన‌వి. న‌టుడిగా అతని ప్ర‌తిభ ఏమిటో అంద‌రికీ తెలిసిందే. ఆయన జీవితంలోని మరో కోణం దాన‌గుణం. తన కెరీర్‌లో ఎంతో మందిని ఆర్థికంగా ఆదుకున్నారు. ఎన్నో సంస్థ‌ల‌కు విరాళాలు అందించారు. వాటికి సంబంధించిన విశేషాల గురించి తెలుసుకుందాం. సినిమా రంగంలో అడుగుపెట్టిన తొలినాళ్లలో ఆకలి బాధను అనుభ‌వించారు రాజబాబు. తాను ఎదుర్కొన్న ఆ కష్టాలే ఇతరుల బాధను అర్థం చేసుకునే త‌త్వాన్ని ఏర్ప‌రిచాయి. రాజబాబు దాతృత్వాన్ని అర్థం చేసుకోవాలంటే ఆయన ఎంత పెద్ద నటుడు అనే విషయాన్ని పక్కన పెట్టి.. తన చుట్టూ ఉన్న మనుషుల అవసరాలను ఎంతగా పట్టించుకునేవారో గమనించాలి. వాహిని స్టూడియోలో ఒకసారి షూటింగ్ జరుగుతున్న సమయంలో ఓ లైట్‌బాయ్ రాజబాబు నటనను మెచ్చుకుంటూ, భవిష్యత్తులో పెద్ద నటుడు అయినప్పుడు తనకు బట్టలు పెట్టాలని సరదాగా అడిగాడట. ఆ మాటను రాజబాబు తేలిగ్గా తీసుకోలేదు. ఆ వ్యక్తి ఎవరో గుర్తుంచుకోవడానికి ప్రయత్నించినా తర్వాత గుర్తుపట్టలేకపోయారు. అయితే ఆ మాటను మర్చిపోకుండా, ప్రతి ఏడాది తన పుట్టిన‌రోజున మద్రాసులోని వివిధ స్టూడియోలకు వెళ్లి లైట్‌బాయ్స్‌కు బట్టలతో పాటు బిర్యానీ ప్యాకెట్లు అందించేవారు. ఒక వ్యక్తికి ఇచ్చిన మాటను నిలబెట్టుకోవాలనే ఆలోచన.. ఎంతోమంది కార్మికులకు ఉపయోగపడే కార్యక్రమంగా మారింది. రాజబాబు సినీ పరిశ్రమలోని నటీనటులతోనే కాకుండా తెర వెనుక పనిచేసే కార్మికులతోనూ సన్నిహితంగా వ్యవహరించేవారు. ‘రాణి ఔర్ లాల్ పరీ’ అనే హిందీ చిత్రంలో లిల్లీపుట్‌గా నటించారు రాజబాబు. త‌ను చేసిన క్యారెక్ట‌ర్‌కి 5 వేలు ఇస్తే చాలు అనుకున్నారు. కానీ, ఆ నిర్మాత 40 వేలు ఇచ్చారు. త‌ను చేసిన దానికి 5 వేలు ఉంచుకొని.. మిగ‌తా డ‌బ్బును ఆ సినిమా షూటింగ్‌కి పనిచేసిన టెక్నీషియ‌న్స్‌కి పంచి పెట్టేసారు. రాజబాబు సుమారు 75 జంటల వివాహాలను తన సొంత డబ్బుతో చేశారు. అలాగే 65 మంది విద్యార్థులు డిగ్రీ స్థాయి వరకు చదువుకోవడానికి ఆర్థికంగా తోడ్పడ్డారు. తమ ఊరిలో పాఠశాల, కళాశాల నిర్మాణానికి కూడా ఆయన సొంతంగా డబ్బు ఖర్చు చేశారు. ఈ విషయాలు రాజబాబు సేవానిర‌తిని తెలియ‌జేస్తున్నాయి. పెళ్లి చేయడానికి ఆర్థిక స్థోమత లేని కుటుంబానికి సహాయం చేయడం అంటే ఒక కుటుంబానికి అండగా నిలబడటమే. చదువుకోవాలనే ఆసక్తి ఉన్నా డబ్బుల్లేక ఇబ్బంది పడుతున్న విద్యార్థికి తోడ్పడటం అంటే అతని భవిష్యత్తుకు బంగారు బాట వేయ‌డ‌మే. రాజబాబు చేసిన సామాజిక సేవల్లో పారిశుద్ధ్య కార్మికులకు సంబంధించిన సేవలు కూడా ఉన్నాయి. రాజమండ్రిలోని పారిశుద్ధ్య కార్మికులకు దానవాయిపేట ప్రాంతంలో భూమి ఇచ్చారు. తెలుగు ప్రేక్షకులకు రాజబాబు అంటే ఇప్పటికీ నవ్వులు గుర్తుకొస్తాయి. కానీ ఆయన జీవితంలోని సేవా కోణాన్ని పరిశీలిస్తే, ఆ నవ్వుల వెనుక ఇతరుల కష్టాన్ని అర్థం చేసుకునే మనసు కూడా కనిపిస్తుంది. మన దగ్గర ఉన్నదంతా మనకోసమే కాదు.. మన చుట్టూ ఉన్నవారికి ఉపయోగపడినప్పుడే దానికి మరింత విలువ వస్తుంది. తెరపై నవ్వులు పూయించ‌డం ద్వారానే కాదు, నిజజీవితంలో చేసిన సేవల కారణంగా కూడా ఎప్పటికీ గుర్తుండిపోతారు నవ్వుల రారాజు రాజబాబు. [comedian rajababu jayanthi on oct 20th, unknown facts of comedian rajababu, rare facts in rajababu life, telugu comedian rajababu, comedian rajababu life story]
Oct 19, 2026 7:05PM
చిరంజీవి మాస్ స్వాగ్‌కు 35 ఏళ్లు.. ఇప్పటికీ తగ్గని ‘రౌడీ అల్లుడు’ క్రేజ్!
మెగాస్టార్ చిరంజీవి కెరీర్‌లో ఎన్నిసార్లు చూసినా బోర్ కొట్టని మాస్ ఎంటర్‌టైనర్లు ఎన్నో ఉన్నాయి. అలాంటి సినిమాల్లో ‘రౌడీ అల్లుడు’కు ప్రత్యేక స్థానం ఉంది. చిరంజీవి తనదైన కామెడీ టైమింగ్, స్టైల్, డ్యాన్స్‌లు, అదిరిపోయే మాస్ యాక్షన్‌తో ప్రేక్షకులను అలరించిన ఈ సినిమా విడుదలై నేటితో 35 ఏళ్లు పూర్తయ్యాయి. 1991 అక్టోబర్ 18న విడుదలైన ఈ చిత్రాన్ని కె. రాఘవేంద్రరావు తెరకెక్కించారు. ఈ సినిమాలో చిరంజీవి ద్విపాత్రాభినయం చేయడం ప్రధాన ఆకర్షణగా నిలిచింది. పారిశ్రామికవేత్త కల్యాణ్‌గా, ముంబైలో ఆటో డ్రైవర్ జానీగా ఆయన చూపించిన రెండు భిన్నమైన షేడ్స్ అభిమానులను విశేషంగా ఆకట్టుకున్నాయి. ఒకవైపు క్లాస్ లుక్‌తో కనిపిస్తూనే.. మరోవైపు రౌడీ అల్లుడిగా మాస్ హంగామా చేయడం ఈ సినిమాకు ప్రత్యేకమైన క్రేజ్ తీసుకొచ్చింది. శోభన, దివ్యభారతి కథానాయికలుగా నటించగా, కోట శ్రీనివాసరావు, బ్రహ్మానందం, అల్లు రామలింగయ్య తదితరులు కీలక పాత్రల్లో కనిపించారు. దర్శకుడు కె. రాఘవేంద్రరావు రూపొందించిన ఈ యాక్షన్ కామెడీకి బప్పి లహరి సంగీతం అందించారు. వినోదం, యాక్షన్, పాటలు, చిరంజీవి స్టైల్.. ఇలా అన్ని అంశాలు కలగలిసిన ఈ చిత్రం అప్పట్లో మంచి విజయాన్ని అందుకుంది. ముఖ్యంగా చిరంజీవి పలికించిన కామెడీ, ఆయన స్క్రీన్ ప్రెజెన్స్, రెండు పాత్రల మధ్య చూపించిన వైవిధ్యం ‘రౌడీ అల్లుడు’ను ప్రేక్షకులకు మరింత దగ్గర చేశాయి. ఇక సినిమా విడుదలై 35 ఏళ్లు పూర్తయిన సందర్భంగా మెగాస్టార్ అభిమానులు ఈ క్లాసిక్‌ను మరోసారి గుర్తు చేసుకుంటున్నారు. ఒకే సినిమాలో రెండు భిన్నమైన పాత్రలతో చిరంజీవి సృష్టించిన సందడి, ఆయన ఎనర్జీ, మాస్ స్వాగ్ ఇప్పటికీ అభిమానులకు ప్రత్యేకమైన అనుభూతినిస్తాయి. కాలం మారినా చిరంజీవి కామెడీ, స్టైల్‌కు ఉన్న క్రేజ్ తగ్గదని ‘రౌడీ అల్లుడు’ మరోసారి గుర్తు చేస్తోంది. [Rowdy Alludu, Chiranjeevi, Megastar Chiranjeevi, Rowdy Alludu 35 Years, Rowdy Alludu Anniversary, K Raghavendra Rao, Chiranjeevi Dual Role, Telugu Cinema Classics]
Oct 18, 2026 1:34PM.webp)
175 డేస్ రికార్డు: టాలీవుడ్‌లో చరిత్ర సృష్టించిన టాప్10 సినిమాలు ఇవే.!
ఒక సినిమా హిట్ కావడం వేరు.. నెలల తరబడి థియేటర్లలో ప్రేక్షకులను అలరిస్తూ చరిత్ర సృష్టించడం వేరు. ఇప్పుడంటే రెండు మూడు వారాలు థియేటర్లలో ఆడితేనే గొప్పగా చెప్పుకుంటున్నారు. కానీ ఒకప్పుడు 100 రోజులు, 175 రోజులు, 200 రోజులు పాటు సినిమాలు ప్రదర్శితమవుతూ ఉండేవి. ముఖ్యంగా 175 రోజుల రన్ అనేది అప్పట్లో ఓ సినిమా విజయానికి కీలకమైన మైలురాయిగా నిలిచేది. అలా టాలీవుడ్‌లో అత్యధిక కేంద్రాల్లో నేరుగా 175 రోజులు ప్రదర్శితమైన సినిమాల జాబితాలో కొన్ని చిత్రాలు ఇప్పటికీ ప్రత్యేక స్థానాన్ని సంపాదించుకున్నాయి. టాప్ ప్లేస్‌లో ‘సింహాద్రి’ ఈ జాబితాలో జూనియర్ ఎన్టీఆర్ నటించిన ‘సింహాద్రి’ మొదటి స్థానంలో ఉంది. 2003లో విడుదలైన ఈ సినిమా అప్పట్లో బాక్సాఫీస్ వద్ద సంచలనం సృష్టించింది. ఎస్.ఎస్. రాజమౌళి దర్శకత్వంలో తెరకెక్కిన ఈ చిత్రం ఎన్టీఆర్ కెరీర్‌లోనే మైలురాయిగా నిలిచింది. ఏకంగా 52 కేంద్రాల్లో నేరుగా 175 రోజులు ప్రదర్శితమై అగ్రస్థానాన్ని దక్కించుకుంది. రెండో స్థానంలో ‘పోకిరి’ మహేశ్ బాబు, పూరీ జగన్నాథ్ కాంబినేషన్‌లో వచ్చిన ‘పోకిరి’ 2006లో విడుదలై తెలుగు సినిమా బాక్సాఫీస్ లెక్కలను మార్చేసింది. ఈ సినిమా భారీ వసూళ్లతో పాటు మహేశ్ బాబు స్టార్‌డమ్‌ను మరో స్థాయికి తీసుకెళ్లింది. ఈ సినిమా 48 కేంద్రాల్లో నేరుగా 175 రోజుల ప్రదర్శనతో రెండో స్థానంలో నిలిచింది. మూడో స్థానంలో ‘ఇంద్ర’ చిరంజీవి నటించిన ‘ఇంద్ర’ 2002లో విడుదలై ప్రేక్షకులను విశేషంగా ఆకట్టుకుంది. బి. గోపాల్ దర్శకత్వంలో తెరకెక్కిన ఈ చిత్రం అప్పట్లో వసూళ్ల పరంగా సరికొత్త రికార్డులు సృష్టించింది. ఈ జాబితాలో 31 కేంద్రాల్లో నేరుగా 175 రోజులు ప్రదర్శితమై మూడో స్థానాన్ని సంపాదించుకుంది. బాలయ్య సినిమాలకు ప్రత్యేక స్థానం నందమూరి బాలకృష్ణ నటించిన ‘సమరసింహారెడ్డి’, ‘నరసింహనాయుడు’ చిత్రాలు కూడా ఈ జాబితాలో చోటు దక్కించుకున్నాయి. 1999లో విడుదలైన ‘సమరసింహారెడ్డి’ 29 కేంద్రాల్లో 175 రోజుల రన్‌తో నాలుగో స్థానంలో ఉంది. 2001లో వచ్చిన ‘నరసింహనాయుడు’ 17 కేంద్రాల్లో ఈ ఘనత సాధించి ఎనిమిదో స్థానంలో నిలిచింది. ఫ్యాక్షన్ నేపథ్యంలో తెరకెక్కిన ఈ రెండు సినిమాలు బాలయ్య మాస్ ఇమేజ్‌ను మరింత బలోపేతం చేశాయి. కుటుంబ కథా చిత్రాలదీ అదే జోరు శ్రీకాంత్ నటించిన ‘పెళ్లి సందడి’ 27 కేంద్రాల్లో 175 రోజులు ప్రదర్శితమై ఐదో స్థానంలో నిలిచింది. తరుణ్ నటించిన ‘నువ్వే కావాలి’ 25 కేంద్రాల్లో ఈ ఘనత సాధించి ఆరో స్థానాన్ని దక్కించుకుంది. వెంకటేశ్ నటించిన ‘కలిసుందాం రా’ 14 కేంద్రాల్లో 175 రోజుల రన్‌తో తొమ్మిదో స్థానంలో ఉంది. పాత సినిమాల ప్రభంజనం 1981లో విడుదలైన అక్కినేని నాగేశ్వరరావు ‘ప్రేమాభిషేకం’ 19 కేంద్రాల్లో నేరుగా 175 రోజులు ప్రదర్శితమై ఏడో స్థానంలో నిలిచింది. ఇక 1963లో వచ్చిన ఎన్టీఆర్ ‘లవకుశ’ 13 కేంద్రాల్లో ఈ ఘనత సాధించి పదో స్థానాన్ని దక్కించుకుంది. నేరుగా 175 రోజుల రన్ సాధించిన టాప్ 10 సినిమాలు: 1. సింహాద్రి (2003) – 52 కేంద్రాలు 2. పోకిరి (2006) – 48 కేంద్రాలు 3. ఇంద్ర (2002) – 31 కేంద్రాలు 4. సమరసింహారెడ్డి (1999) – 29 కేంద్రాలు 5. పెళ్లి సందడి (1996) – 27 కేంద్రాలు 6. నువ్వే కావాలి (2000) – 25 కేంద్రాలు 7. ప్రేమాభిషేకం (1981) – 19 కేంద్రాలు 8. నరసింహనాయుడు (2001) – 17 కేంద్రాలు 9. కలిసుందాం రా (2000) – 14 కేంద్రాలు 10. లవకుశ (1963) – 13 కేంద్రాలు ఇది కూడా చదవండి: ఒకే ఏడాది 5 బ్లాక్‌బస్టర్స్.. శోభన్‌బాబుకి 'సోగ్గాడు' పేరు ఎలా వచ్చిందో తెలుసా.? [Tollywood 175 Days Movies, Top 10 Tollywood Movies, Simhadri 175 Days Record, Simhadri Movie, Pokiri Movie, Indra Movie, Samarasimha Reddy Movie, Pelli Sandadi Movie, Telugu Film News]
Oct 13, 2026 12:42PM.WEBP)
‘ఆది’లోనే అసాధార‌ణ విజయాన్ని అందుకున్న ప‌క్కా కమర్షియల్ డైరెక్ట‌ర్ వి.వి.వినాయక్.!
(అక్టోబర్ 9 వి.వి.వినాయక్ పుట్టినరోజు సందర్భంగా..) తెలుగు సినిమా ఇండస్ట్రీలో మాస్ కమర్షియల్ సినిమాలకు ఒక ప్రత్యేకమైన గుర్తింపు తీసుకొచ్చిన దర్శకుల్లో వి.వి. వినాయక్ ఒకరు. హీరో ఎలివేషన్లు, పవర్‌ఫుల్ డైలాగులు, అదిరిపోయే యాక్షన్ సన్నివేశాలతో ప్రేక్షకులను థియేటర్లకు రప్పించడంలో ఆయనది ప్రత్యేకమైన శైలి. జూనియర్ ఎన్టీఆర్‌ను మాస్ హీరోగా నిలబెట్టిన ‘ఆది’తో దర్శకుడిగా పరిచయమైన వినాయక్.. తొలి సినిమాతోనే ఇండస్ట్రీ దృష్టిని ఆకర్షించారు. ఆ తర్వాత వెనుదిరిగి చూసుకోవాల్సిన అవసరం లేకుండా వరుసగా స్టార్ హీరోలతో సినిమాలు చేసే అవకాశాలు అందుకున్నారు. నితిన్‌తో చేసిన ‘దిల్’ వినాయక్‌కు మరో విజయాన్ని అందించడమే కాకుండా, నిర్మాత దిల్ రాజుకు కూడా ప్రత్యేక గుర్తింపును తీసుకొచ్చింది. ఆ తర్వాత మెగాస్టార్ చిరంజీవితో తెరకెక్కించిన ‘ఠాగూర్’ ఆయన కెరీర్‌లోనే గుర్తుండిపోయే సినిమాగా నిలిచిపోయింది. అవినీతికి వ్యతిరేకంగా పోరాడే కథను కమర్షియల్ అంశాలతో మేళవించి ప్రేక్షకులను ఆకట్టుకున్నారు. ‘బన్నీ’, ‘లక్ష్మి’, ‘కృష్ణ’, ‘అదుర్స్’, ‘నాయక్’ వంటి సినిమాలతో తనదైన ముద్ర వేశారు. ముఖ్యంగా ఎన్టీఆర్, అల్లు అర్జున్, రవితేజ వంటి హీరోలతో ఆయన చేసిన సినిమాలు అభిమానులను విశేషంగా అలరించాయి. దర్శకుడిగా మంచి ఫామ్‌లో ఉన్న సమయంలోనే బాలకృష్ణ, వెంకటేష్, ప్రభాస్ వంటి స్టార్ హీరోలతోనూ సినిమాలు చేశారు వినాయక్. కొంతకాలం తర్వాత ఆయన సినిమాలు ఆశించిన స్థాయిలో విజయాలు అందుకోకపోయినా, ఆయన తెరకెక్కించిన పాత సినిమాలకు ఇప్పటికీ అభిమానుల్లో ప్రత్యేకమైన ఆదరణ ఉంది. పదేళ్ల విరామం తర్వాత చిరంజీవి హీరోగా నటించిన ‘ఖైదీ నంబర్ 150’తో మెగాస్టార్‌ను మళ్లీ వెండితెరపై ఘనంగా ఆవిష్కరించి మంచి విజయాన్ని అందుకున్నారు. అయితే ఆ తర్వాత వచ్చిన ‘ఇంటెలిజెంట్’తో పాటు హిందీలో తెరకెక్కించిన ‘ఛత్రపతి’ రీమేక్ ఆయనకు ఆశించిన ఫలితాలను ఇవ్వలేదు. ఒకప్పుడు స్టార్ హీరోలతో వరుస బ్లాక్‌బస్టర్లు అందించిన వినాయక్.. ఇప్పుడు మళ్లీ మెగా ఫోన్ పట్టి తన సత్తా చాటాలని అభిమానులు కోరుకుంటున్నారు. ఆయన దర్శకత్వంలో సినిమా వస్తుందంటే ఒకప్పుడు ప్రేక్షకుల్లో భారీ అంచనాలు ఉండేవి. ముఖ్యంగా ‘ఆది’, ‘ఠాగూర్’, ‘అదుర్స్’ వంటి చిత్రాలు తెలుగు కమర్షియల్ సినిమాల్లో ప్రత్యేక స్థానాన్ని సంపాదించుకున్నాయి. మరి వినాయక్ తన తదుపరి సినిమాతో మరోసారి పూర్వ వైభవాన్ని అందుకుంటారా? మళ్లీ బాక్సాఫీస్ వద్ద తనదైన మార్క్ చూపిస్తారా? అన్నది ఆసక్తికరంగా మారింది. [VV Vinayak Birthday Special, VV Vinayak Biography, VV Vinayak Hit Movies, Jr NTR Aadi Movie Director, Chiranjeevi Tagore Movie, VV Vinayak Career, Telugu Film Directors]
Oct 9, 2026 1:53PM
మెగాస్టార్ చిరంజీవి సూపర్హిట్ మూవీ ‘మంచి దొంగ’.. రెండు క‌థ‌ల‌తో తీశార‌ని మీకు తెలుసా??
మెగాస్టార్ చిరంజీవి కెరీర్‌లో ఎన్నో విభిన్నమైన సినిమాలు ఉన్నాయి. వాటిలో ‘మంచిదొంగ’ కూడా ఒకటి. కె. రాఘవేంద్రరావు దర్శకత్వంలో దేవి వర ప్రసాద్ నిర్మించిన ఈ చిత్రం 1988 జనవరి 14న ప్రేక్షకుల ముందుకు వచ్చింది. చిరంజీవి సరసన విజయశాంతి, సుహాసిని కథానాయికలుగా నటించగా.. రావు గోపాలరావు, మోహన్‌బాబు, అల్లు రామలింగయ్య, కైకాల సత్యనారాయణ తదితరులు కీలక పాత్రలు పోషించారు. ఈ సినిమా అప్పట్లో ప్రేక్షకులను ఆకట్టుకుని విజయాన్ని అందుకుంది. అయితే ‘మంచిదొంగ’ సినిమా గురించి చాలామందికి తెలియని ఓ ఆసక్తికరమైన విషయం ఉంది. ఈ సినిమా ఒకే కథతో తెరకెక్కినప్పటికీ.. ఫస్ట్ హాఫ్, సెకండాఫ్ చూస్తున్నప్పుడు రెండు విభిన్న కథలను చూస్తున్నట్టుగా అనిపిస్తుంది. దీనికి కారణం దర్శకుడు కె. రాఘవేంద్రరావు, రచయిత ఎం.వి.ఎస్. హరనాథరావు రూపొందించిన రెండు కథల ఆధారంగా సినిమాను తీర్చిదిద్దడమేనని చెబుతారు. అందుకే సినిమా ద్వితీయార్ధంలో కథ, హీరో పాత్ర ప్రయాణం మరో మలుపు తీసుకున్నట్టు కనిపిస్తుంది. ఇక సినిమాలో చిరంజీవి వీరేంద్ర అనే పాత్రలో కనిపిస్తారు. దొంగతనాలు చేసినప్పటికీ పేదలకు సాయం చేస్తూ తనకంటూ కొన్ని సిద్ధాంతాలను పాటించే వ్యక్తిగా ఆయన పాత్రను తీర్చిదిద్దారు. ఓ కీలకమైన ఆధారాన్ని పోలీసులకు అందించిన తర్వాత వీరేంద్ర జీవితంలో మార్పు మొదలవుతుంది. అనంతరం జైలుకు వెళ్లి అక్కడే చదువుకుని, బయటకు వచ్చిన తర్వాత పోలీస్ అధికారిగా మారి సంఘవిద్రోహ శక్తులపై పోరాడటం కథలో మరో ప్రధాన ఘట్టంగా నిలుస్తుంది. మొత్తంగా చూస్తే.. ఒకే సినిమాలో రెండు కథల మేళవింపుతో రూపొందిన ‘మంచిదొంగ’ అప్పటి ప్రేక్షకులకు కొత్త అనుభూతిని అందించింది. ఫస్ట్ హాఫ్‌లో ‘మంచిదొంగ’గా కనిపించే హీరో.. సెకండాఫ్‌లో పోలీస్ ఆఫీసర్‌గా ముందుకు సాగడం ఈ సినిమాకు ప్రత్యేకతగా నిలిచింది. చిరంజీవి, విజయశాంతి, సుహాసిని కాంబినేషన్‌తో పాటు కె. రాఘవేంద్రరావు దర్శకత్వం, ఎం.వి.ఎస్. హరనాథరావు రచన ఈ సినిమాను 1988లో గుర్తుండిపోయే చిత్రాల్లో ఒకటిగా నిలిపాయి. [Manchi Donga, Chiranjeevi Manchi Donga, Manchi Donga Movie, Chiranjeevi Movies, K Raghavendra Rao, MVS Haranatha Rao, Devi Vara Prasad, Manchi Donga Interesting Facts, Chiranjeevi 1988 Movies, Tollywood Classics]
Oct 5, 2026 1:04PM
ఒకే కథతో 4 భాషల్లోనూ తన న‌ట‌న‌తో మెప్పించిన శారద.. 'మనుషులు మారాలి' తెరవెనుక కథ ఇదే.!
తెలుగు సినీ చరిత్రలో కొన్ని సినిమాలు మాత్రమే ప్రేక్షకుల హృదయాల్లో శాశ్వతంగా నిలిచిపోతాయి. అలాంటి అపూర్వమైన సామాజిక దృశ్య కావ్యమే 1969లో విడుదలైన 'మనుషులు మారాలి'. మహాత్మా గాంధీ శతాబ్ది జయంతి సందర్భంగా 1969 అక్టోబర్ 2న ప్రేక్షకుల ముందుకు వచ్చిన ఈ చిత్రం తెలుగు సినిమా ప్రమాణాలను సరికొత్త ఎత్తుకు తీసుకెళ్ళింది. డబ్బు, హోదా, స్వార్థం మనుషుల మధ్య ఎలాంటి అడ్డుగోడలు కడతాయో.. పేదరికం మరియు సామాజిక అసమానతలు ఒక కుటుంబ జీవితాన్ని ఎంతటి విషాదాంతం చేస్తాయో దర్శకుడు వి. మధుసూదనరావు ఈ చిత్రంలో అత్యంత భావోద్వేగభరితంగా దృశ్యమానం చేశారు. ఈ సినిమా టైటిల్ కేవలం ఒక పేరు మాత్రమే కాదు, సమాజ మనస్సాక్షిని తట్టి లేపే ఒక బలమైన ప్రశ్నగా నిలిచింది. ఈ చిత్రంలో ఊర్వశి శారద నటించిన పార్వతి పాత్ర తెలుగు ప్రేక్షకుల గుండెలను పిండేసింది. పేదరికం వల్ల తన కన్న పిల్లలను సాకలేక విషమిచ్చి చంపేసే ఒక దుర్భరమైన తల్లి స్థితిని శారద తన సహజసిద్ధమైన అభినయంతో కళ్ళకు కట్టినట్లు చూపించారు. ప్రపంచ సినీ చరిత్రలోనే ఒకే కథ ఆధారంగా రూపొందిన నాలుగు భాషల చిత్రాల్లోనూ కథానాయికగా నటించి మెప్పించిన ఏకైక నటిగా ఊర్వశి శారద అరుదైన రికార్డు సృష్టించారు. కేరళ పీపుల్స్ ఆర్ట్ క్లబ్ సమర్పించిన 'తులాభారం' అనే ప్రసిద్ధ నాటకం ఆధారంగా 1968లో మలయాళంలో వచ్చిన 'తులాభారం' చిత్రంలో శారద మొదటిసారిగా నటించి జాతీయ స్థాయిలో ఉత్తమ నటిగా జాతీయ అవార్డును అందుకున్నారు. మలయాళంలో సాధించిన సంచలన విజయం తర్వాత, ప్రముఖ నిర్మాణ సంస్థ జెమినీ స్టూడియోస్ ఈ కథను తెలుగు మరియు తమిళ భాషల్లో 'మనుషులు మారాలి' మరియు 'తులాభారం' పేర్లతో రీమేక్ చేసింది. ఆ తర్వాత 1970లో హిందీలో 'సమాజ్ కో బదల్ డాలో' పేరుతో నిర్మించిన చిత్రంలో కూడా శారదే కథానాయికగా నటించడం విశేషం. వి మధుసూదనరావు దర్శకత్వంలో, కేవి మహాదేవన్ సంగీత సారథ్యంలో రూపుదిద్దుకున్న ఈ తెలుగు వెర్షన్‌లో శోభన్ బాబు, శారద మొదటిసారిగా జంటగా నటించారు. అలాగే హరనాథ్, కాంచనలు ఇతర ముఖ్య పాత్రల్లో మెప్పించారు. ఈ సినిమాలో కమర్షియల్ హంగులైన ఫైట్లు, డ్యూయెట్లు, కామెడీ ట్రాక్‌లు లేకపోయినా, కథలోని బలమైన భావోద్వేగాలు ప్రేక్షకులను థియేటర్లకు బ్రహ్మరథం పట్టేలా చేశాయి. 'మనుషులు మారాలి' చిత్రం బాక్సాఫీస్ వద్ద సృష్టించిన రికార్డులు అప్పట్లో ఒక సంచలనం. విజయవాడలోని శేష్ మహల్ థియేటర్లో వరుసగా 100 ఆటలు హౌస్ ఫుల్ అయి సినీ చరిత్రలోనే సరికొత్త రికార్డు నమోదైంది. అంతేకాకుండా శేష్ మహల్‌లో 108 రోజులు, లీలా మహల్‌లో 42 రోజులు దిగ్విజయంగా ప్రదర్శించబడింది. థియేటర్ల వద్ద ప్రేక్షకుల అపూర్వ రద్దీని తట్టుకోవడం సాధ్యం కాకపోవడంతో, ఒక థియేటర్ కేవలం మహిళలకు, మరో థియేటర్ పురుషులకు కేటాయించి ప్రత్యేకంగా ప్రదర్శనలు నిర్వహించడం విశేషం. విక్టరీ శోభన్ బాబు కెరీర్‌ను మలుపు తిప్పి ఆయనకు స్టార్ డమ్ తెచ్చిపెట్టిన చిత్రంగా ఇది చరిత్రకెక్కింది. ఈ సినిమా 100 రోజుల వేడుకను విజయవాడ గాంధీ హైస్కూల్ గ్రౌండ్స్‌లో అంగరంగ వైభవంగా నిర్వహించారు. ఈ వేడుకకు నటీనటులు శోభన్ బాబు, శారద, హరనాథ్, కాంచన, నాగభూషణం, దర్శక నిర్మాతలు మరియు మహానటుడు ఎస్వీ రంగారావు, దాశరథి, శ్రీశ్రీ, ఆరుద్ర, కేవి మహాదేవన్ లాంటి ప్రముఖులంతా 'సర్కార్ ఎక్స్‌ప్రెస్' రైలులో కలసి ప్రయాణించి విజయవాడ చేరుకున్నారు. ఈ చిత్రంలో నటించకపోయినా ఎస్వీ రంగారావు నటీనటులకు జ్ఞాపికలు అందించేందుకు ప్రత్యేకంగా విచ్చేసి సభలో ప్రసంగించారు. ఆ తర్వాత హైదరాబాద్‌లోని ప్రభాత్ టాకీస్‌లో జరిగిన కార్యక్రమంలో నటి షావుకారు జానకి, హిందీ నటుడు ప్రాణ్, ప్రేమ్ చోప్రా కూడా పాల్గొన్నారు. ఏళ్ళు గడిచినా, టెక్నాలజీ మారినా 'మనుషులు మారాలి' లేవనెత్తిన ప్రశ్నలు నేటి సమాజానికి కూడా సజీవంగా వర్తిస్తాయి. [Manushulu Maarali, Shobhan Babu, Urvasi Sharada, Tulabharam Remake, Gemini Studios, Old Telugu Movies]
Oct 3, 2026 10:59AM
ఒకే ఏడాది 5 బ్లాక్‌బస్టర్స్: శోభన్‌బాబుకి 'సోగ్గాడు' పేరు ఎలా వచ్చిందో తెలుసా.?
ఒక స్టార్ నుంచి ఏడాదికి రెండు మూడు సినిమాలు వస్తేనే పెద్ద విషయంగా. అలాంటిది ఒకే ఏడాది ఏకంగా 8 సినిమాలు విడుదల చేసి.. అందులో 5 సినిమాలను ఘన విజయాలుగా నిలబెట్టడం అంటే మామూలు విషయం కాదు. అలాంటి అరుదైన రికార్డు శోభన్‌బాబు కెరీర్‌లో ఉంది. ఆయన కెరీర్‌లో 1975 సంవత్సరం ఈ కారణంగానే ప్రత్యేకంగా నిలిచిపోయింది. 1959లో ‘దైవబలం’తో సినిమాల్లోకి వచ్చిన శోభన్‌బాబు.. క్రమంగా తనకంటూ ప్రత్యేకమైన ఫ్యామిలీ ఇమేజ్‌ను సంపాదించుకున్నారు. అయితే 1975 నాటికి మాత్రం ఆయన స్టార్‌డమ్ మరో స్థాయికి చేరుకుంది. ఆ ఒక్క ఏడాదిలో శోభన్‌బాబు నటించిన 8 సినిమాలు ప్రేక్షకుల ముందుకొచ్చాయి. జనవరి 11న ‘దేవుడు చేసిన పెళ్లి’.. ఏప్రిల్ 11న ‘అందరూ మంచివారే’.. మే 2న ‘బాబు’.. మే 16న ‘జీవన జ్యోతి’.. జూలై 17న ‘బలిపీఠం’.. ఆగస్టు 14న ‘జేబుదొంగ’.. నవంబర్ 14న ‘గుణవంతుడు’.. డిసెంబర్ 19న ‘సోగ్గాడు’ విడుదలయ్యాయి. అంటే దాదాపు ప్రతి కొన్ని వారాలకోసారి శోభన్‌బాబు సినిమా థియేటర్లలోకి వచ్చింది. ఈ ఎనిమిది సినిమాల్లో ‘దేవుడు చేసిన పెళ్లి’, ‘జీవన జ్యోతి’, ‘బలిపీఠం’, ‘జేబుదొంగ’, ‘సోగ్గాడు’ సినిమాలు ఘన విజయాలు సాధించాయి. ముఖ్యంగా ‘జీవన జ్యోతి’ 12 కేంద్రాల్లో 100 రోజులకు పైగా ప్రదర్శితమైంది. ‘సోగ్గాడు’ అయితే 17 కేంద్రాల్లో 100 రోజులకు పైగా ఆడింది. ‘దేవుడు చేసిన పెళ్లి’, ‘జేబుదొంగ’ కూడా ఘన విజయం సాధించాయి. 1975 చివర్లో వచ్చిన ‘సోగ్గాడు’ మాత్రం ఈ విజయాలన్నింటికీ మరో హైలైట్‌గా నిలిచింది. కె. బాపయ్య దర్శకత్వంలో తెరకెక్కిన ఈ సినిమా ప్రేక్షకులను విపరీతంగా ఆకట్టుకుంది. ఏకంగా 17 కేంద్రాల్లో 100 రోజులకు పైగా ప్రదర్శితమవడంతో పాటు.. శోభన్‌బాబుకు వరుసగా మూడో ఫిల్మ్‌ఫేర్ బెస్ట్ యాక్టర్ అవార్డును కూడా అందించింది. ఈ సినిమా తర్వాత శోభన్‌బాబు పేరుకు ముందు ‘సోగ్గాడు’ అనే పేరు కూడా అభిమానుల్లో బలంగా స్థిరపడింది. ఇది కూడా చదవండి: బ్రాహ్మణ పాత్ర అనగానే గుర్తుకొచ్చే హీరో ఎవరు? [Sobhan Babu Records, Sobhan Babu 1975 Movies, Sobhan Babu Movies, Soggadu Movie, Jeevana Jyothi Movie, Jebu Donga Movie, Balipeetam Movie, Devudu Chesina Pelli Movie, Telugu Film News]
Sep 29, 2026 6:21PM
‘వానరుల భార్యలకు మనుషుల రూపాలేంటి?’..ఈ ప్రశ్నకు 50 ఏళ్ల క్రితం బాపు ఇచ్చిన జవాబు ఇదే.!
ఇటీవలికాలంలో కొన్ని సినిమాల్లోని సన్నివేశాలు, పాత్రల రూపకల్పన విషయంలో విమర్శలు వస్తున్నాయి. అయితే ఇది కొన్ని దశాబ్దాల కాలం క్రితమే ఉందని 1972లో వచ్చిన ‘సంపూర్ణ రామాయణం’ చిత్రం వల్ల తెలుస్తోంది. ఈ సినిమాలో శోభన్‌బాబు శ్రీరాముడిగా నటించారు. వాల్మీకి రామాయణాన్ని ఆధారంగా చేసుకుని బాపు తనదైన దృశ్యశైలిలో ఈ కథను తెరకెక్కించారు. అయితే ఈ సినిమా విషయంలో అప్పట్లో ఓ ఆసక్తికరమైన ప్రశ్న ఎదురైంది. రామాయణంలో వానరులు కీలక పాత్ర పోషిస్తారు. రాముడికి అండగా నిలిచిన వానర వీరుల గురించి, వారి కుటుంబాల గురించి కూడా కథలో ప్రస్తావనలు ఉంటాయి. అయితే సినిమాలో వానరుల భార్యలను పూర్తిగా వానర రూపంలో కాకుండా మానవ రూపంలో చూపించడంపై కొందరు సందేహం వ్యక్తం చేశారు. అదే విషయాన్ని బాపు దృష్టికి తీసుకెళ్లారు. దీనికి బాపు చెప్పిన సమాధానం అప్పటి సినీ వర్గాల్లో ఆసక్తిని కలిగించింది. ‘వానరులు కామరూపులు అని పురాణాలు చెప్తున్నాయి. వారు ఏ రూపం కావాలని కోరుకుంటే ఆ రూపంలో ఉండే అవకాశం ఉంది. అందుచేత వానరుల భార్యలను మనుషుల రూపంలో చూపించడం జరిగింది. అదీకాక, ఒక స్త్రీ రూపానికి కోతి ముఖం పెడితే బాగుండదు. అందుకే వానరుల భార్యలను నరరూపాల్లో చూపించాం’ అని సమాధానమిచారు. దీన్నిబట్టి కథా సందర్భానికి, తెరపై పాత్రల ప్రదర్శనకు అనుగుణంగా ఆ రూపకల్పన చేశారని తెలుస్తోంది. సినిమా అనేది కేవలం పుస్తకంలోని ప్రతి అంశాన్ని యథాతథంగా తెరపైకి తీసుకురావడం మాత్రమే కాదని, దృశ్య మాధ్యమానికి అనుగుణంగా కొన్ని విషయాలను ఎలా చూపించాలన్నది కూడా ముఖ్యమే అన్నది బాపు ఆలోచనగా కనిపిస్తుంది. రామాయణాన్ని తెరకెక్కించేటప్పుడు కథకు ఉన్న భక్తి భావాన్ని కాపాడుతూనే, ప్రేక్షకులకు సులభంగా అర్థమయ్యేలా పాత్రలను మలచడం ఆయన ప్రత్యేకత. ‘సంపూర్ణ రామాయణం’ విషయంలో ప్రారంభం నుంచే ఎన్నో చర్చలు జరిగాయి. అప్పటికే ఎన్టీఆర్ శ్రీరాముడిగా ప్రేక్షకుల మనసుల్లో బలమైన ముద్ర వేసుకున్న సమయంలో, శోభన్‌బాబును రాముడిగా చూపించడం కూడా బాపు-రమణల సాహసంగా చెప్పుకున్నారు. అయినప్పటికీ సినిమా తనదైన ప్రత్యేకతతో గుర్తింపు తెచ్చుకుంది. అలా చూస్తే.. దశాబ్దాల క్రితం తెరకెక్కిన ఒక పౌరాణిక సినిమాలోని చిన్న దృశ్య రూపకల్పనపై వచ్చిన ప్రశ్నకు బాపు ఇచ్చిన సమాధానం కూడా ఆయన సినిమాను ఎంత ఆలోచనతో రూపొందిస్తారు అనే విషయానికి నిదర్శనంగా నిలిచింది. [Bapu interesting answer on sampoorna ramayanam movie, sobhan babu, chandrakala, sv ranga rao, sampoorna ramayanam movie, director bapu]
Sep 25, 2026 5:04PM.WEBP)
మూవీ మొఘ‌ల్ డి.రామానాయుడికి పున‌ర్జన్మ నిచ్చిన ‘ప్రేమనగర్’ చిత్రానికి 55 ఏళ్లు.!
తెలుగు సినీ ప్రస్థానంలో క్లాసిక్ చిత్రాల ప్రస్తావన వస్తే 'ప్రేమనగర్' మూవీకి ప్రత్యేక స్థానం ఉంటుంది. 1971 సెప్టెంబర్ 24న విడుదలైన ఈ సంచలన చిత్రం 55 సంవ‌త్స‌రాలు పూర్తి చేసుకుంది. తెలుగు చిత్రసీమలోని ఎన్నో రికార్డులను తిరగరాయడమే కాకుండా నిర్మాత దగ్గుబాటి రామానాయుడు సినీ జీవితాన్ని పూర్తిగా మలుపు తిప్పింది. అసలు ఈ బ్లాక్ బస్టర్ సినిమా వెనుక ఉన్న ఆసక్తికరమైన వెనుకటి కథలు, తెరవెనుక జరిగిన విశేషాలు ప్రతి సినీ అభిమానికి ఎంతో ఆశ్చర్యాన్ని కలిగిస్తాయి. నిజానికి 'ప్రేమనగర్' చిత్రాన్ని ప్రముఖ నవలా రచయిత్రి తారకపూడి కౌసల్యదేవి రాసిన నవల ఆధారంగా నిర్మించారు. మొదట ఈ సినిమా హక్కులను తెలంగాణకు చెందిన ఒక వ్యక్తి కొనుగోలు చేసి, అక్కినేని నాగేశ్వరరావు హీరోగా, వి. మధుసూదనరావు దర్శకత్వంలో, కేఆర్ విజయ కథానాయికగా సినిమా ప్రారంభించాలని అనుకున్నారు. స్క్రిప్ట్ పనులు కూడా ఆచార్య ఆత్రేయ ఆధ్వర్యంలో మొదలయ్యాయి. కానీ, అనుకోకుండా ఆ ప్రొడ్యూసర్ కి తీవ్రమైన ఆర్థిక ఇబ్బందులు రావడంతో ప్రాజెక్ట్ ప్రారంభ దశలోనే ఆగిపోయింది. అదే సమయంలో సురేష్ ప్రొడక్షన్స్ అధినేత డి. రామానాయుడు తీవ్ర సంక్షోభంలో ఉన్నారు. ఆయన నిర్మించిన బొమ్మలు చెప్పిన కథ, ప్రతిజ్ఞా పాలన, సిపాయి చిన్నయ్య, అలాగే ద్రోహి వంటి చిత్రాలు బాక్సాఫీస్ వద్ద పరాజయం పాలయ్యాయి. ముఖ్యంగా జగ్గయ్యతో తీసిన 'ద్రోహి' సినిమా 'దసరా బుల్లోడు' ప్రభంజనం ముందు నిలవలేకపోయింది. దసరా బుల్లోడు హవాకు చుట్టుపక్కల విడుదలైన 3-4 సినిమాలు కొట్టుకుపోయాయి. విజయవాడ నవయుగ డిస్ట్రిబ్యూషన్ ఆఫీసులో డిస్ట్రిబ్యూటర్లు "మా పెట్టుబడి వచ్చేస్తుంది, మీ డబ్బులే అనుమానం" అని చెప్పడంతో రామానాయుడు తీవ్ర నిరాశకు గురయ్యారు. ఇది తన సినీ ప్రయాణంలో చివరి ప్రయత్నమని, ఈ సినిమా ఫలితాన్ని బట్టి ఇండస్ట్రీలో కొనసాగాలా లేదా మానేయాలా అనేది తేల్చుకోవాలని నిర్ణయించుకున్నారు. ఆ సమయంలో రామానాయుడు.. ఏఎన్నార్‌ని కలిసి తన పరిస్థితిని వివరించారు. దసరా బుల్లోడు బడ్జెట్ కంటే మరొక ₹1,00,000 (ఒక లక్ష రూపాయలు) ఎక్కువ ఖర్చు పెట్టైనా సరే ఒక లైఫ్ అండ్ డెత్ ప్రాజెక్ట్ చేస్తానని కోరారు. అప్పుడు ఏఎన్నార్.. రామానాయుడుకి ఈ 'ప్రేమనగర్' నవల గురించి చెప్పి ఆత్రేయతో మాట్లాడమని సలహా ఇచ్చారు. కథ నచ్చడంతో రామానాయుడు తనకు సెంటిమెంట్ ఉన్న దర్శకుడు కె.ఎస్.ప్రకాష్‌రావుని ఈ ప్రాజెక్ట్ కోసం ఎంచుకున్నారు. కథానాయికగా దసరా బుల్లోడు జోడీ అయిన వాణిశ్రీని తీసుకున్నారు. ఈ సినిమా తయారీలో పాటల విషయంలో ఆసక్తికర ఘట్టాలు జరిగాయి. సినిమా ఓపెనింగ్ బర్త్ డే సాంగ్ 'నేను పుట్టాను లోకం మెచ్చింది' పాట రాయడానికి మొదట ఆత్రేయ నిరాకరించారు. రెగ్యులర్ హ్యాపీ బర్త్ డే పాటలు రాయనని అనడంతో వేరే రచయితతో రాయించారు. కానీ అది సరిగ్గా కుదరకపోవడంతో 15 రోజుల కసరత్తు తర్వాత మళ్లీ ఆత్రేయ దగ్గరకే వెళ్లగా, ఆయన 'నేను పుట్టాను లోకం మెచ్చింది, నేను ఏడ్చాను లోకం నవ్వింది' అనే అద్భుతమైన సాహిత్యాన్ని అందించారు. అలాగే 'మనసు గతి ఇంతే' పాట ట్యూన్ విషయంలో ఏఎన్నార్ స్వయంగా జోక్యం చేసుకుని, సంగీత దర్శకుడు కె.వి.మహదేవన్ తో మాట్లాడి ఆత్రేయ ద్వారా మరింత లోతుగా తిరగరాయించారు. సినిమా ఓపెనింగ్ షాట్‌లో దువ్వూరి రామిరెడ్డి 'అంతము లేని ఈ భువనమంతా' అనే పద్యాన్ని ఘంటసాలతో విమానం బ్యాక్ డ్రాప్ లో పాడించి అద్భుతమైన క్లాసిక్ లుక్ ఇచ్చారు. ఆత్రేయ రాసిన 'తేట తేట తెలుగులా', 'ఎవరి కోసం' వంటి పాటలతో పాటు 'లేలే లేలే నా రాజా' అనే ఐటమ్ సాంగ్ కూడా అప్పట్లో పెద్ద కాంట్రవర్సీ అయ్యి విపరీతమైన జనాదరణ పొందింది. కేవీ చలం, రాజబాబు, రమాప్రభల కామెడీ ట్రాక్ సినిమా విజయంలో కీలక పాత్ర పోషించింది. మొత్తానికి 1971 సెప్టెంబర్ 24న విడుదలైన 'ప్రేమనగర్' సినిమా 'దసరా బుల్లోడు' రికార్డులను సైతం తుడిచిపెట్టేసి సురేష్ ప్రొడక్షన్స్ బ్యానర్ లోనే అతిపెద్ద విజయాన్ని నమోదు చేసింది. రాముడు భీముడు, ప్రేమ నగర్ సినిమాలు తన రెండు కళ్ళు అని రామానాయుడు చెప్పేవారు. ఈ చిత్రం రిపీట్ రన్స్ లో కూడా దాదాపు 5-6 రోజుల పాటు థియేటర్లను హౌస్ ఫుల్ చేస్తూ డిస్ట్రిబ్యూటర్లకు, ఎగ్జిబిటర్లకు కాసుల వర్షం కురిపించింది. దశాబ్దాలు గడిచినా 'ప్రేమనగర్' చరిత్ర సృష్టించిన విధానం తెలుగు సినీ పరిశ్రమలో ఎప్పటికీ చిరస్మరణీయమే!
Sep 24, 2026 8:04PM
‘వద్దు సరోజా వద్దమ్మా’.. ఈ కామెడీ సీన్, రియ‌ల్ ఇన్సిడెంట్ అని మీకు తెలుసా?
కొన్ని సినిమాలు విడుదలై ఏళ్లు గడిచినా.. అందులోని కొన్ని కామెడీ సీన్లు, డైలాగులు మాత్రం ప్రేక్షకుల మదిలో అలాగే ఉండిపోతాయి. అలాంటి వాటిలో ‘ఉల్లాసంగా ఉత్సాహంగా’ సినిమాలోని ‘వద్దు సరోజా వద్దు’ కామెడీ సీన్ కూడా ఒకటి. యశో సాగర్, స్నేహా ఉల్లాల్ జంటగా నటించిన ఈ సినిమా 2008లో ప్రేక్షకుల ముందుకు వచ్చింది. ఈ చిత్రానికి ఏ. కరుణాకరణ్ దర్శకత్వం వహించారు. అయితే ఈ సినిమాలోని ‘వద్దు సరోజా’ ఎపిసోడ్ వెనుక తన నిజ జీవితంలోని ఓ సంఘటన ఉందని దర్శకుడు తాజాగా వెల్లడించారు. కరుణాకరణ్ ఓ ఇంటర్వ్యూలో మాట్లాడుతూ.. 1994లో చెన్న‌య్‌లోని కేకే నగర్‌లో నా స్నేహితుడు, బిచ్చ‌గాడు దర్శకుడు శశితో కలిసి టిఫిన్ చేసేందుకు ఒక బండి ద‌గ్గ‌ర‌కి వెళ్లాం. అక్క‌డ ఒక వ్యక్తి టిఫిన్ చేసి గొడవ చేశాడు. దాంతో ఆ టిఫిన్ బండి ఓన‌ర్ భార్య‌కు బాగా కోపం వచ్చింది. ఆ గొడవ చేసే వ్య‌క్తిని చిత‌క బాదింది. అది సినిమాలో పెట్టాలని ఎప్ప‌టి నుంచో అనుకుంటున్న‌ప్ప‌టికీ కుద‌ర‌లేదు. చివ‌రికి ఉల్లాసంగా ఉత్సాహంగా సినిమాలో పెట్టాను. దానికి మంచి రెస్పాన్స్ వచ్చింది అన్నారు. ‘ఉల్లాసంగా ఉత్సాహంగా’ విడుదలైన తర్వాత ‘వద్దు సరోజా’ డైలాగ్ బాగా పాపులర్ అయింది. ఈ సీన్ డబ్బింగ్ సమయంలో సౌండ్ ఇంజినీర్ కూడా నవ్వు ఆపుకోలేకపోయారని అప్పట్లో కరుణాకరణ్ వెల్లడించారు. సినిమాలో ఈ ఎపిసోడ్‌కు మంచి స్పందన రావడంతో ఆ డైలాగ్ దర్శకుడి కెరీర్‌లో గుర్తుండిపోయే కామెడీ ట్రాక్‌గా నిలిచిపోయింది. ఇదిలా ఉంటే.. ‘ఉల్లాసంగా ఉత్సాహంగా’ కరుణాకరణ్ దర్శకత్వంలో తెరకెక్కిన ప్రేమకథా చిత్రం. యశో సాగర్, స్నేహా ఉల్లాల్‌తో పాటు సునీల్, బ్రహ్మానందం, చంద్రమోహన్, ధర్మవరపు సుబ్రహ్మణ్యం, వేణుమాధవ్ తదితరులు కీలక పాత్రల్లో నటించారు. జీవీ ప్రకాశ్ కుమార్ సంగీతం అందించారు. ఈ సినిమాలోని కామెడీ, సంగీతం అప్పట్లో ప్రేక్షకులను ఆకట్టుకున్నాయి. ముఖ్యంగా ‘వద్దు సరోజా’ ఎపిసోడ్ మాత్రం ఇప్పటికీ తెలుగు సినిమా కామెడీ సన్నివేశాల్లో గుర్తుండిపోయే ట్రాక్‌గా నిలిచింది. [Ullasanga Utsahanga, Vaddu Saroja Vaddu, Vaddu Saroja Comedy, Karunakaran, A Karunakaran, Yasho Sagar, Sneha Ullal, Ullasanga Utsahanga Comedy, Telugu Cinema, Tollywood News, Vaddu Saroja Scene, Karunakaran Interview]
Sep 22, 2026 6:09PM.WEBP)
నటరత్న ఎన్టీఆర్ కెరీర్‌లో తొలి 'A' సర్టిఫికెట్ సినిమా వెనుక ఆసక్తికర విశేషాలు.!
తెలుగు సినిమా చరిత్రలో నటసార్వభౌమ నందమూరి తారక రామారావుకు ప్రత్యేక స్థానం ఉంది. పౌరాణికం, జానపదం, సాంఘికం.. ఇలా ఎన్నో రకాల పాత్రల్లో నటించి ప్రేక్షకులను అలరించారు ఎన్టీఆర్. ఆయన కెరీర్‌లో ఎన్నో ప్రయోగాత్మక సినిమాలు కూడా ఉన్నాయి. అలాంటి సినిమాల్లో ‘అగ్గిరవ్వ’ ఒకటి. ముఖ్యంగా ఎన్టీఆర్ నటించిన సినిమాల్లో తొలిసారి ‘ఏ’ సర్టిఫికెట్ అందుకున్న చిత్రంగా ఈ సినిమాకు ప్రత్యేక గుర్తింపు ఉంది. కె.బాపయ్య ఈ చిత్రానికి దర్శకత్వం వహించారు. ఆ రోజుల్లో ఒక స్టార్ హీరో సినిమా ‘ఏ’ సర్టిఫికెట్ పొందడం అనేది చాలా ఆసక్తికరమైన విషయంగా ఉండేది. కుటుంబ ప్రేక్షకులను దృష్టిలో పెట్టుకొని ఎన్టీఆర్ సినిమాలకు భారీగా ఆదరణ ఉండే సమయంలో.. ‘అగ్గిరవ్వ’కు మాత్రం పెద్దలకు మాత్రమే అనే సర్టిఫికెట్ రావడం చర్చనీయాంశమైంది. సినిమాలోని కథ, సన్నివేశాలు, వాటి చిత్రీకరణ కారణంగానే ఈ సర్టిఫికేషన్‌ వచ్చినట్టు అప్పట్లో చెప్పుకునేవారు. ఈ సినిమా నిర్మాణంలోనూ ఎన్నో ప్రత్యేకతలు ఉన్నాయి. ఎన్టీఆర్ వంటి అగ్ర కథానాయకుడు నటిస్తున్న సినిమా కావడంతో చిత్రబృందం కథ, సన్నివేశాల విషయంలో ప్రత్యేక శ్రద్ధ తీసుకుంది. సాధారణంగా ఆయన సినిమాల్లో కనిపించే పాత్రలకు భిన్నంగా ‘అగ్గిరవ్వ’లోని అంశాలు ఉండటంతో ప్రేక్షకుల్లో కూడా సినిమాపై ఆసక్తి ఏర్పడింది. ఈ సినిమాలో శ్రీదేవి కూడా కీలక పాత్రలో కనిపించారు. మరోవైపు ఈ సినిమాకు సినిమాటోగ్రఫీ అందించిన నందమూరి మోహ‌న‌కృష్ణ విషయంలోనూ ఒక ప్రత్యేకత ఉంది. కెమెరా విభాగంలో కొత్తగా అడుగుపెడుతున్న సమయంలోనే ఈ సినిమాకు అవకాశం రావడం విశేషం. ఆ రోజుల్లో అందుబాటులో ఉన్న సాంకేతిక పరిజ్ఞానంతో సినిమాకు అవసరమైన విజువల్స్‌ను అందించేందుకు కెమెరా బృందం చేసిన ప్రయత్నాలు ప్రత్యేకంగా నిలిచాయి. ‘అగ్గిరవ్వ’ నిర్మాణ సమయంలో ఎదురైన సవాళ్లు, సినిమా తీసిన విధానం, షూటింగ్‌కు సంబంధించిన అరుదైన ఫొటోలు ఇప్పుడు బయటకు రావడంతో ఈ చిత్రంపై ఆసక్తి మరోసారి పెరిగింది. ముఖ్యంగా ఎన్టీఆర్ నటించిన సినిమాల్లో ఇది ఎందుకు ప్రత్యేకమైనదో ఈ అరుదైన విశేషాలను పరిశీలిస్తే అర్థమవుతుంది. సినిమా నిర్మాణానికి అయిన ఖర్చు, విడుదల తర్వాత సాధించిన వసూళ్లు కూడా అప్పట్లో చర్చకు వచ్చాయి. భారీ అంచనాలతో తెరకెక్కినప్పటికీ సినిమా బిజినెస్‌ పరంగా ఎదురైన పరిస్థితులు కూడా ‘అగ్గిరవ్వ’ చరిత్రలో ఒక భాగంగా నిలిచాయి. ఒక స్టార్ హీరో సినిమా కావడంతో పెట్టుబడులు, థియేట్రికల్‌ బిజినెస్‌, వసూళ్లపై అప్పట్లో ప్రత్యేకంగా చర్చ జరిగింది. అలా ఎన్టీఆర్ కెరీర్‌లో ‘అగ్గిరవ్వ’కు ఒక ప్రత్యేకమైన స్థానం ఏర్పడింది. ‘ఏ’ సర్టిఫికెట్ అందుకున్న తొలి ఎన్టీఆర్ చిత్రంగా మాత్రమే కాకుండా.. నిర్మాణ పరంగా కొన్ని సాంకేతిక ప్రయోగాలు, శ్రీదేవి పాత్ర, కెమెరామెన్‌ అరంగేట్రం, సినిమా బిజినెస్‌ వంటి పలు ఆసక్తికర అంశాల కారణంగా ఈ చిత్రం ఇప్పటికీ సినీ అభిమానుల దృష్టిని ఆకర్షిస్తోంది. [NTR Aggiravva, N T Rama Rao Aggiravva, Aggiravva Movie, NTR First A Certificate Movie, NTR Movies, NTR Rare Movies, Aggiravva Interesting Facts, Aggiravva Movie Facts, NTR Sridevi Movie, Sridevi Aggiravva, NTR Movie History, Telugu Cinema History, NTR Rare Photos, Aggiravva Behind The Scenes]
Sep 21, 2026 8:12PM
ఒకే సినిమాలో ముగ్గురు మెగాస్టార్లు.. ఆ సినిమా కోసం ద‌ర్శ‌కేంద్రుడు చేసిన సాహసం ఇదే!
మెగాస్టార్ చిరంజీవి కెరీర్‌లో ఎన్నో ప్రయోగాత్మక చిత్రాలు ఉన్నాయి. అందులో ఒకే సినిమాలో మూడు విభిన్న పాత్రల్లో నటించిన ‘ముగ్గురు మొనగాళ్లు’ కూడా ప్రత్యేకంగా నిలుస్తుంది. ఒకే నటుడు మూడు పాత్రల్లో కనిపించడం అనేది ఇప్పుడు సాధారణమైన విషయంగా అనిపించినా.. ఆ రోజుల్లో మాత్రం అది అంత సులభమైన విషయం కాదు. ముఖ్యంగా ఒకే ఫ్రేమ్‌లో చిరంజీవి మూడు పాత్రలు కనిపించేలా సన్నివేశాలను తెరకెక్కించడం దర్శకుడు, రచయితలతోపాటు సాంకేతిక బృందానికి కూడా పెద్ద సవాలుగా ఉండేది. ‘ముగ్గురు మొనగాళ్లు’ కథను సిద్ధం చేసే సమయంలోనే మూడు పాత్రలకు సంబంధించిన స్వభావాలు, వాటి మధ్య ఉండే సంబంధాలు, కథలో అవి కలిసే విధానం వంటి అంశాలపై ప్రత్యేకంగా దృష్టి పెట్టారు. మూడు పాత్రలు ఒకేలా కాకుండా.. ఒక్కో పాత్రకు ప్రత్యేకమైన బాడీ లాంగ్వేజ్, ప్రవర్తన, నటన ఉండేలా డిజైన్ చేశారు. దీంతో ఒకే సినిమాలో చిరంజీవిని మూడు విభిన్న కోణాల్లో చూసే అవకాశం ప్రేక్షకులకు లభించింది. అయితే ఈ మూడు పాత్రలను తెరపై చూపించడం మాత్రం దర్శకుడు కె.రాఘ‌వేంద్ర‌రావుకు అంత తేలికైన పని కాదు. ముఖ్యంగా ఒకే సన్నివేశంలో ముగ్గురు చిరంజీవులు కనిపించాల్సిన సందర్భాల్లో అప్పటి సాంకేతిక పరిజ్ఞానాన్ని ఉపయోగించి ఎంతో జాగ్రత్తగా చిత్రీకరణ చేయాల్సి వచ్చేది. ఒక పాత్రకు సంబంధించిన షాట్ పూర్తయిన తర్వాత.. అదే కెమెరా యాంగిల్, లైటింగ్, ఫ్రేమింగ్ ఏమాత్రం మారకుండా మరో పాత్రను చిత్రీకరించాల్సి ఉండేది. ఆ తర్వాత మూడో పాత్రను కూడా అదే విధంగా షూట్ చేసి.. ఈ మూడు చిత్రాలను కలిపి ఒకే సన్నివేశంగా ప్రేక్షకులకు చూపించేవారు. ఇలాంటి సన్నివేశాల్లో చిరంజీవి నటనతోపాటు సాంకేతిక బృందం పనితీరు కూడా చాలా కీలకం. మూడు పాత్రలకు సంబంధించిన కదలికలు, చూపులు, టైమింగ్‌లో చిన్న తేడా వచ్చినా సన్నివేశం సహజంగా కనిపించదు. అందుకే దర్శకుడు, కెమెరా విభాగం, ఎడిటింగ్ టీమ్‌తో పాటు నటుడు కూడా ఎంతో సమన్వయంతో పనిచేయాల్సి వచ్చేది. ఈ సినిమా నిర్మాణ ప్రయాణాన్ని పరిశీలిస్తే.. అప్పటి చిత్రబృందం చేసిన సృజనాత్మక ప్రయత్నాలు ప్రత్యేకంగా కనిపిస్తాయి. ముఖ్యంగా మూడు పాత్రలను ఒకే తెరపైకి తీసుకురావడానికి చేసిన సాంకేతిక ప్రయోగాలు ‘ముగ్గురు మొనగాళ్లు’ను చిరంజీవి కెరీర్‌లో ఒక ప్రత్యేకమైన సినిమాగా నిలబెట్టాయి. ఈ సినిమాకు సంబంధించిన అరుదైన షూటింగ్ ఫొటోలు బయటకు రావడంతో అప్పట్లో ఈ సన్నివేశాలను ఎలా తెరకెక్కించారనే ఆసక్తి మరింత పెరిగింది. ఇప్పుడు ఉన్న ఆధునిక గ్రాఫిక్స్, వీఎఫ్‌ఎక్స్ టెక్నాలజీ అందుబాటులో లేని సమయంలోనే.. పరిమితమైన సాంకేతిక వనరులతో ఒకే నటుడిని మూడు పాత్రల్లో చూపించేందుకు చిత్రబృందం చేసిన కృషి ఈ ఫొటోల్లో కనిపిస్తుంది. చిరంజీవి మూడు పాత్రల్లో నటించడం మాత్రమే కాకుండా.. ఆ మూడు పాత్రలు ఒకే కథలో కీలకంగా ఉండేలా స్క్రీన్‌ప్లేను రూపొందించడం ఈ సినిమాకు మరో ప్రత్యేకత. ఒక్కో పాత్రను ప్రేక్షకులకు స్పష్టంగా గుర్తుండేలా నటనలో తేడాలను చూపించేందుకు చిరంజీవి చేసిన ప్రయత్నం కూడా ఈ సినిమాను ప్రత్యేకంగా నిలబెట్టింది. అలా కథ, నటన, దర్శకత్వం, అప్పటి సాంకేతిక పరిజ్ఞానం.. అన్నింటి సమన్వయంతో తెరకెక్కిన ‘ముగ్గురు మొనగాళ్లు’ చిరంజీవి చేసిన అరుదైన ప్రయోగాల్లో ఒకటిగా గుర్తుండిపోయింది. ఒకే హీరోను మూడు పాత్రల్లో చూపించడం వెనుక ఎంతటి కష్టం ఉంటుందో.. ఈ సినిమా నిర్మాణ విశేషాలను, అరుదైన షూటింగ్ ఫొటోలను చూస్తే అర్థమవుతుంది. [Chiranjeevi, Mugguru Monagallu, Mugguru Monagallu Movie, Chiranjeevi Triple Role, Chiranjeevi Triple Role Movies, Megastar Chiranjeevi Movies, Mugguru Monagallu Making, Mugguru Monagallu Behind The Scenes, Chiranjeevi Rare Photos, Telugu Cinema Classics, Chiranjeevi Movies History, Mugguru Monagallu Story]
Sep 21, 2026 7:04PM
అక్కినేని అరుదైన రికార్డు.. 1955లో 7 సినిమాలు, 6 సూపర్హిట్.!
న‌ట‌సామ్రాట్ అక్కినేని నాగేశ్వరరావు న‌టుడిగా ఎన్నో విభిన్నమైన పాత్రలు పోషించి ప్రేక్షకులకు ద‌గ్గ‌ర‌య్యారు. ముఖ్యంగా ఆయన కెరీర్ ప్రారంభంలో చేసిన కొన్ని సినిమాల గురించి ప్రత్యేకంగా చెప్పుకోవాలి. త‌ను చేసే ప్రతి సినిమా విభిన్నంగా వుండాల‌ని కోరుకునే అక్కినేని కథలో వైవిధ్యం ఉండేలా చూసుకునేవారు. అలా 1955లో ఎఎన్నార్ చేసిన 7 సినిమాల్లో 6 సినిమాలు సూప‌ర్‌హిట్‌గా నిలిచాయి. ఒకే ఏడాది ఆరు సినిమాలు సూపర్హిట్ అవ్వ‌డం అనేది అప్ప‌ట్లోనే కాదు, ఇప్పటికీ ఒక రికార్డుగానే చెప్పాలి. ఆ గోల్డెన్ ఇయర్‌లో విడుదలైన క్లాసిక్స్ జాబితా చూస్తే ఇప్పటి తరానికి కూడా ఆశ్చర్యం కలగక మానదు. ‘మిస్సమ్మ’, ‘అర్ధాంగి’, ‘రోజులు మారాయి’, ‘అనార్కలి’, ‘వదిన’, ‘దొంగరాముడు’ వంటి ఆల్ టైమ్ క్లాసిక్స్ అన్నీ కూడా ఆ ఒక్క ఏడాదిలోనే రావడం విశేషం. ఈ చిత్రాల్లోని పాత్రల వైవిధ్యం అక్కినేని నటనలోని కొత్త కోణాలను ఆవిష్కరించాయి. క‌మెడియ‌న్‌గా, ప్రేమికుడిగా, రైతుగా, అమాయకపు యువకుడిగా.. ఇలా ప్రతి పాత్రలో ఒదిగిపోయి బాక్సాఫీస్ వద్ద సరికొత్త రికార్డులను తిరగరాశారు. అక్కినేని అభిమానులు, సినీ ప్రియులు పాత జ్ఞాపకాలను నెమరువేసుకుంటున్నారు. నేటి తరం హీరోలకు ఒకే ఏడాది ఇన్ని విభిన్నమైన చిత్రాల‌తో స‌క్సెస్‌ సాధించడం ఒక కల అని కామెంట్లు పెడుతున్నారు.
Sep 20, 2026 5:56PM
INTERESTING NEWS
.WEBP)
Customer Service
For support : teluguone.teluguone@gmail.com | For Queries : support@teluguone.com