Telangana News | Latest Telangana News, Politics & Updates

ఇరుముడి సినిమాకు తెలంగాణ కార్మిక శాఖ షాక్‌.. నిర్మాణ సంస్థకు నోటీసులు.!

టాలీవుడ్ మాస్ మహారాజ్ రవితేజ హీరోగా నటించిన తాజా సంచలన చిత్రం 'ఇరుముడి' చట్టపరమైన చిక్కుల్లో పడింది. ఈ సినిమా నిర్మాణ సంస్థకు రాష్ట్ర కార్మిక శాఖ నుంచి అధికారికంగా నోటీసులు జారీ కావడంతో సినీ వర్గాల్లో తీవ్ర చర్చనీయాంశమైంది. చిత్రీకరణ సమయంలో బాలనటి నక్షత్ర పట్ల అనుసరించిన విధివిధానాలు, భద్రతా ప్రమాణాలు ఆమె వేతనానికి సంబంధించిన అంశాలపై పలు ఫిర్యాదులు అందాయి. సోషల్ జస్టిస్ ఫోరం ప్రతినిధి చేసిన ఫిర్యాదును తీవ్రంగా పరిగణించిన అధికారులు ఈ నిర్ణయం తీసుకున్నారు. బాలనటి ప్రచార కార్యక్రమాల్లో పాల్గొన్న తీరు, ఆమె పనిచేసిన గంటల వివరాలపై లేబర్ డిపార్ట్‌మెంట్ ఆరా తీస్తోంది. మైనర్ నటుల విషయంలో చట్టపరమైన నిబంధనలను కచ్చితంగా పాటించాల్సి ఉండగా, వాటి ఉల్లంఘనపై విచారణ చేపట్టాలని అధికారులు నిర్ణయించారు. ఈ నేపథ్యంలో రంగారెడ్డి జోన్ సంయుక్త కార్మిక కమిషనర్ ఆధ్వర్యంలో విచారణ జరగనుంది. నవంబర్ 4వ తేదీన ఆర్టీసీ క్రాస్ రోడ్స్‌లోని అంజయ్య కార్మిక క్షేమ భవన్‌లో హాజరు కావాలని చిత్ర నిర్మాణ సంస్థ మైత్రీ మూవీ మేకర్స్‌ను ఆదేశించారు. బాలనటి రిమ్యూనరేషన్‌లో నిబంధనల ప్రకారం 20 శాతం మొత్తాన్ని ఆమె పేరు మీద ఫిక్స్డ్ డిపాజిట్ చేశారా లేదా అనే దానిపై కూడా ఆరా తీస్తున్నారు. అలాగే ప్రమోషన్ ఈవెంట్లలో జరిగిన కొన్ని సంభాషణలు, ప్రవర్తనా సరళిపై కూడా కమిటీ దృష్టి సారించినట్లు సమాచారం అందుతోంది. ప్రముఖ చిత్రాల నిర్మాణంలో ఇటువంటి బాలల హక్కుల అంశాలు తెరపైకి రావడం టాలీవుడ్‌లో కలకలం రేపుతోంది. కేవలం సినిమాల విజయమే కాకుండా, సెట్స్‌లో చిన్నపిల్లల రక్షణకు ఎంతటి ప్రాధాన్యత ఇస్తున్నారనే అంశంపై ఈ ఘటన మరోసారి పెద్ద ఎత్తున చర్చకు దారితీసింది. రానున్న విచారణలో చిత్ర యూనిట్ అందించే వివరణ ఏ విధంగా ఉంటుందనే దానిపై సర్వత్రా ఉత్కంఠ నెలకొంది. నిబంధనల ఉల్లంఘన నిజమని తేలితే నిర్మాణ సంస్థపై తదుపరి చర్యలు ఎలా ఉంటాయనేది వేచి చూడాలి. [ Irumudi movie controversy, Telangana Labour Department notice, Mythri Movie Makers notice, Ravi Teja child artist issue, Telugu cinema news updates, Baby Nakshatra ]

Published on: Sun Nov 1, 2026 1:23PM

బంగారం కోసం బరితెగింపు.. జోగినిని కట్టేసి కిరాతకంగా హత్య. !

60 తులాల బంగారం, రూ.10 లక్షల నగదు అపహరణ.! యాదాద్రి భువనగిరి జిల్లా చౌటుప్పల్‌లో అర్ధరాత్రి జరిగిన దారుణ హత్య తీవ్ర కలకలం రేపింది. బంగారు ఆభరణాలు, నగదు కోసం ఓ జోగినిని దుండగులు అత్యంత కిరాతకంగా హతమార్చిన ఘటన స్థానికంగా భయాందోళనలు సృష్టించింది. ఏకంగా ఇంట్లోకి చొరబడి కాళ్లు, చేతులు కట్టేసి ప్రాణాలు తీశారు. అనంతరం ఇంట్లో ఉన్న భారీ మొత్తంలో బంగారం, నగదుతో పాటు కారును కూడా ఎత్తుకెళ్లారు. చౌటుప్పల్‌లోని మార్కండేయ నగర్ కాలనీలో నివాసముంటున్న జోగిని రాళ్లబండి సుధాకర్ (48)ను గుర్తుతెలియని వ్యక్తులు లక్ష్యంగా చేసుకున్నారు. అర్ధరాత్రి సమయంలో ఇంట్లోకి ప్రవేశించిన దుండగులు.. సుధాకర్ కాళ్లు, చేతులు కట్టేసి హత్య చేశారు. అనంతరం ఇంట్లో ఉన్న సుమారు 60 తులాల బంగారం, రూ.10 లక్షల నగదును దోచుకున్నారు. అక్కడితో ఆగకుండా ఇంటి వద్ద ఉన్న కారును సైతం తీసుకుని పరారయ్యారు. ఒకవైపు ప్రాణాలు తీసి.. మరోవైపు భారీ మొత్తంలో సొత్తును దోచుకెళ్లడంతో ఈ ఘటన స్థానికంగా తీవ్ర సంచలనం సృష్టించింది. సమాచారం అందుకున్న పోలీసులు వెంటనే ఘటనా స్థలానికి చేరుకుని పరిశీలించారు. క్లూస్ టీమ్‌ను రంగంలోకి దించి వేలిముద్రలు, ఇతర ఆధారాలను సేకరించారు. హత్య జరిగిన తీరును పరిశీలించి నిందితుల కోసం గాలింపు చర్యలు చేపట్టారు. సిద్దిపేట సమీపంలో నిందితుల పట్టివేత.! ఇదిలా ఉంటే.. ఈ కేసులో కీలక పరిణామం చోటుచేసుకున్నట్లు సమాచారం. హత్య అనంతరం సుధాకర్ కారులో పరారవుతున్న నిందితులను సిద్దిపేట సమీపంలో పోలీసులు అదుపులోకి తీసుకున్నట్లు తెలుస్తోంది. పట్టుబడిన వారు అస్సాంకు చెందినవారిగా గుర్తించినట్లు సమాచారం. బంగారం, నగదు కోసమే ఈ హత్యకు పాల్పడ్డారా? సుధాకర్‌ను ముందుగానే లక్ష్యంగా చేసుకుని పథకం ప్రకారం హత్య చేశారా? ఈ దారుణం వెనుక ఇంకా ఎవరైనా ఉన్నారా? అనే కోణాల్లో పోలీసులు దర్యాప్తు చేపట్టారు. బంగారం, నగదు కోసం మనిషి ప్రాణాలనే బలితీసుకున్న ఈ ఘటన చౌటుప్పల్‌లో తీవ్ర విషాదాన్ని నింపింది. నిందితుల పట్టివేతకు సంబంధించిన పూర్తి వివరాలు, హత్యకు గల కారణాలు పోలీసుల అధికారిక ప్రకటనతో వెల్లడికావాల్సి ఉంది. [ Choutuppal Murder Case, Jogini Murder, Yadadri Bhuvanagiri Crime, Gold Robbery, 60 Tolas Gold Theft, Telangana Crime News, Choutuppal Crime, Siddipet Police, Assam Suspects, Murder for Gold, Rs 10 Lakh Cash Theft, Telangana Police Investigation, Robbery and Murder, Breaking Crime News ]

Published on: Sun Nov 1, 2026 9:35AM

అమిత్ షా హైదరాబాద్ పర్యటన: భారీ పాదయాత్ర పూర్తి షెడ్యూల్ ఇదే.!

తెలంగాణ రాజకీయాల్లో మరోసారి తీవ్ర ఉత్కంఠ నెలకొంది. దేశ రాజకీయాల్లో అత్యంత ప్రభావశీల నేతగా ఉన్న కేంద్ర హోంమంత్రి అమిత్ షా నవంబర్ 2వ తేదీన హైదరాబాద్‌లో పర్యటించనున్నారు. రాష్ట్రంలో రాజకీయంగా ప్రాధాన్యత సంతరించుకున్న ఈ పర్యటనకు సంబంధించి పూర్తి షెడ్యూల్ ఖరారైంది. కాంగ్రెస్ ప్రభుత్వం అనుసరిస్తున్న విధానాలు, ఓటర్ల ప్రత్యేక సమగ్ర సవరణ (SIR) ప్రక్రియపై విపక్షాలు చేస్తున్న దుష్ప్రచారాన్ని తిప్పికొట్టే లక్ష్యంతో భారతీయ జనతా పార్టీ ఈ భారీ కార్యక్రమానికి శ్రీకారం చుట్టింది. నవంబర్ 2వ తేదీ మధ్యాహ్నం 2:00 గంటలకు ప్రత్యేక విమానంలో బేగంపేట విమానాశ్రయానికి చేరుకోనున్న అమిత్ షా, అక్కడి నుంచి నేరుగా కాకతీయ హోటల్‌కు చేరుకుంటారు. మధ్యాహ్నం 2:00 గంటల నుంచి 4:00 గంటల మధ్య రిజర్వ్‌డ్ టైమ్‌లో భాగంగా తెలంగాణ బీజేపీ ముఖ్య నేతలు, రాష్ట్రంలోని పలువురు ప్రముఖులతో ఆయన సమావేశం కానున్నారు. ఈ భేటీలో రాష్ట్ర రాజకీయ పరిస్థితులు, స్థానిక అంశాలపై కీలక చర్చ జరిగే అవకాశం ఉంది. మధ్యాహ్నం సరిగ్గా 4:00 గంటలకు నిజాం కాలేజ్ వద్ద ఉన్న బాబూ జగ్జీవన్ రామ్ విగ్రహం నుంచి మొజాంజాహి మార్కెట్ (ఎంజే మార్కెట్) వరకు అమిత్ షా ప్రతిష్టాత్మక మహా పాదయాత్రను ప్రారంభించనున్నారు. ప్రజాస్వామ్యాన్ని "రక్షించడమే ధ్యేయంగా సాగే ఈ భారీ పాదయాత్రలో వేలాదిగా పార్టీ శ్రేణులు, కార్యకర్తలు, మేధావులు, జాతీయవాదులు స్వచ్ఛందంగా తరలిరానున్నారు. నిజాం కాలేజ్ నుంచి బయలుదేరే ఈ పాదయాత్ర రద్దీగా ఉండే ప్రధాన వీధుల మీదుగా సాగి మొజాంజాహి మార్కెట్ వరకు కొనసాగుతుంది. పాదయాత్ర ముగిసిన అనంతరం సాయంత్రం 5:00 గంటల నుంచి 5:30 గంటల వరకు మొజాంజాహి మార్కెట్ వద్ద జరిగే భారీ కార్నర్ మీటింగ్ (ప్రజా బహిరంగ సభ)లో కేంద్ర హోంమంత్రి అమిత్ షా ముఖ్య అతిథిగా పాల్గొని ప్రసంగించనున్నారు. ఈ బహిరంగ సభ వేదికగా ఆయన రాష్ట్ర ప్రభుత్వంపై రాజకీయ విమర్శలు గుప్పిస్తూ, బీజేపీ భవిష్యత్తు కార్యాచరణను శ్రేణులకు దిశానిర్దేశం చేయనున్నారు. అనంతరం సాయంత్రం 6:00 గంటలకు బేగంపేట విమానాశ్రయం నుంచి ప్రత్యేక విమానంలో ఆయన ఢిల్లీకి తిరుగుప్రయాణం కానున్నారు. అమిత్ షా పర్యటన నేపథ్యంలో హైదరాబాద్‌లో గట్టి భద్రతా ఏర్పాట్లు చేయడంతో పాటు, బీజేపీ క్యాడర్‌లో జోరు పెరిగింది. [ Amit Shah Hyderabad visit, Amit Shah padayatra, Telangana BJP news, Amit Shah schedule November 2, Begumpet airport, Mozamjahi Chowrasta rally, Kishan reddy, N. Ramachandra Rao, Bandi sanjay kumar ]

Published on: Sat Oct 31, 2026 8:58PM

ర్యాపిడోలో బంగారం పార్సిల్.. మధ్యలోనే మాయం చేసిన రైడర్.!

అవసరానికి ఆదుకుంటుందనే నమ్మకంతో ఓ వ్యక్తి ర్యాపిడో పార్సిల్ సేవలను ఆశ్రయించాడు. తన బంధువుల ఇంటికి విలువైన బంగారు నగలను సురక్షితంగా పంపించాలని భావించాడు. కానీ అతడి నమ్మకమే చివరకు కొంపముంచింది. పార్సిల్ తీసుకెళ్లిన ర్యాపిడో రైడర్.. గమ్యస్థానానికి చేర్చాల్సిన నగలతో మధ్యలోనే ఉడాయించాడు. అంతేకాదు.. పెట్రోల్ ఖర్చుల పేరుతో అదనంగా డబ్బులు కూడా వసూలు చేశాడు. చివరకు ఫోన్ నంబర్ బ్లాక్ చేసి బాధితుడికి షాక్ ఇచ్చాడు. ఈ ఘటన హైదరాబాద్‌లోని జూబ్లీహిల్స్ పోలీస్‌స్టేషన్ పరిధిలో వెలుగుచూసింది. బంగారం పార్సిల్‌తో మాయమైన రైడర్.! వివరాల్లోకి వెళ్తే.. వివో సంస్థలో అడ్మిన్ మేనేజర్‌గా పనిచేస్తున్న ఓ వ్యక్తి తన వద్ద ఉన్న రూ.62,383 విలువైన బంగారు నగలను నాగోల్‌లో నివసిస్తున్న బంధువుల ఇంటికి పంపించాలని నిర్ణయించుకున్నాడు. ఇందుకోసం ర్యాపిడో పార్సిల్ సేవలను బుక్ చేశాడు. సెక్యూరిటీ గార్డు వద్ద నుంచి ర్యాపిడో రైడర్ పార్సిల్‌ను తీసుకున్నాడు. అయితే, పార్సిల్‌లో బంగారు నగలు ఉన్నట్లు గుర్తించిన రైడర్.. వాటిని గమ్యస్థానానికి చేర్చకుండా మధ్యలోనే మాయమయ్యాడు. మరోవైపు పెట్రోల్ ఖర్చుల పేరుతో బాధితుడి నుంచి ఫోన్‌పే ద్వారా అదనంగా రూ.100 కూడా తీసుకున్నాడు. ఫోన్ చేస్తే నంబర్ బ్లాక్.! పార్సిల్ గమ్యస్థానానికి చేరుతుందని ఎదురుచూసిన బాధితుడికి ఎంతసేపటికీ ఎలాంటి సమాచారం అందలేదు. దీంతో రైడర్‌కు ఫోన్ చేయగా.. అతడి నంబర్ బ్లాక్ చేసినట్లు గుర్తించాడు. పార్సిల్ ఎక్కడికి వెళ్లిందో తెలియక, రైడర్ నుంచి స్పందన లేక బాధితుడు ఆందోళనకు గురయ్యాడు. ర్యాపిడో కస్టమర్ కేర్‌ను సంప్రదించి సమస్యను పరిష్కరించుకోవాలని ప్రయత్నించినప్పటికీ ఫలితం లేకపోయింది. దీంతో చివరకు జూబ్లీహిల్స్ పోలీసులను ఆశ్రయించి ఫిర్యాదు చేశాడు. రైడర్ కోసం పోలీసుల గాలింపు.! బాధితుడి ఫిర్యాదు మేరకు జూబ్లీహిల్స్ పోలీసులు కేసు నమోదు చేసి దర్యాప్తు ప్రారంభించారు. రూ.62,383 విలువైన బంగారు నగలతో పరారైన ర్యాపిడో రైడర్ ఆచూకీ కోసం గాలిస్తున్నారు. ఒక చిన్న పార్సిల్‌లో బంగారం పంపించిన వ్యక్తి.. అది క్షేమంగా చేరుతుందని నమ్మాడు. కానీ ఆ నమ్మకాన్ని వమ్ము చేస్తూ నగలతో రైడర్ మాయమవడంతో బాధితుడు పోలీసులను ఆశ్రయించాల్సి వచ్చింది. ఈ ఘటనతో పార్సిల్ సేవలను వినియోగించుకునే వారి భద్రతపై మరోసారి చర్చ మొదలైంది. [ Rapido Delivery Boy Theft, Hyderabad Gold Parcel Theft, Jubilee Hills Police, Gold Jewellery Missing, Rapido Parcel Service Fraud, Hyderabad police, CP Sajjanar, DGP C.V. Anand, Telugu One, Telugu News ]

Published on: Sat Oct 31, 2026 5:41PM

ఒక్క బిల్డర్ కోసం 4 వేల కుటుంబాలను బలి చేస్తారా? ప్రభుత్వంపై హరీశ్ రావు ఫైర్.!

బిగ్ బ్రదర్ ఆఫీసులో రియల్టర్‌కు ప్రత్యేక ఛాంబర్.. ఒక్క బిల్డర్ కోసం వేలాది కుటుంబాలను రోడ్డున పడేస్తారా? అంటూ మాజీ మంత్రి, బీఆర్ఎస్ ఎమ్మెల్యే హరీశ్ రావు నార్సింగి రోడ్డు అలైన్‌మెంట్ వివాదంపై తీవ్రస్థాయిలో విమర్శలు చేశారు. ముఖ్యమంత్రి కుటుంబానికి చెందిన స్కూల్, బిల్డర్‌కు చెందిన హై-రైజ్ భవనాల కోసమే 100 అడుగుల మాస్టర్ ప్లాన్ రోడ్డు అలైన్‌మెంట్‌ను మార్చారంటూ ఆరోపించారు. నార్సింగిలో హరీశ్ రావు పాదయాత్ర.! రంగారెడ్డి జిల్లా గండిపేట మండలం నార్సింగిలో 100 అడుగుల మాస్టర్ ప్లాన్ రోడ్డు అలైన్‌మెంట్ మార్పుతో నష్టపోతున్న సెవెన్ హిల్స్, వెస్ట్రన్ మెడోస్ తదితర కాలనీల్లో హరీశ్ రావు పర్యటించారు. కాలనీల్లో కాలినడకన తిరుగుతూ హెచ్ఎండీఏ అధికారులు వేసిన రెడ్ మార్కింగ్‌లను పరిశీలించారు. బాధిత కుటుంబాలతో నేరుగా మాట్లాడి వారి సమస్యలను తెలుసుకున్నారు. అన్ని అనుమతులు, ఆక్యుపెన్సీ సర్టిఫికెట్లు ఉన్నప్పటికీ తమ అపార్ట్‌మెంట్లను కూల్చేందుకు మార్కింగ్‌లు వేశారని కాలనీవాసులు ఆయనకు వివరించారు. దీంతో బాధితులకు అండగా ఉంటామని హరీశ్ రావు హామీ ఇచ్చారు. ఒక్క బిల్డర్ కోసం వేలాది కుటుంబాలా.? కోకాపేట, నార్సింగి ప్రాంతాల్లో భూముల ధరలు గజానికి రూ.2 లక్షల వరకు పలుకుతుంటే.. సుమారు రూ.110 కోట్ల విలువైన ప్రభుత్వ భూమిని గజానికి రూ.47 వేల చొప్పున కేవలం రూ.26 కోట్లకే కేటాయించారని హరీశ్ రావు ఆరోపించారు. ఇప్పుడు ఆ భూమికి హై-రైజ్ భవనాల అనుమతులు ఇచ్చేందుకు సామాన్యుల అపార్ట్‌మెంట్లను కూల్చివేస్తారా? అని ప్రశ్నించారు. జనవరి 7న ఒక జీవో, ఆ మరుసటి రోజు జనవరి 8న మరో గెజిట్ విడుదల చేయడం వెనుక ఉద్దేశం ఏమిటని నిలదీశారు. బాధితులు తమ వినతులు చెప్పుకోవడానికి కూడా అధికారులు భయపడుతున్నారని విమర్శించారు. కేసీఆర్ హయాంలో ఇళ్లకు నష్టం లేకుండా చర్యలు: హరీశ్ రావు గతంలో 400 ఏళ్ల చరిత్ర కలిగిన హనుమాన్ ఆలయాన్ని కాపాడే క్రమంలో ఏ ఒక్కరి ఇల్లు తొలగించకుండా 2018లో కేసీఆర్ ప్రభుత్వం గెజిట్ విడుదల చేసిందని హరీశ్ రావు గుర్తుచేశారు. ప్రస్తుత ప్రభుత్వం మాత్రం ఒక బిల్డర్ ప్రయోజనాల కోసం 10 అపార్ట్‌మెంట్లు, వేలాది మంది కుటుంబాల భవిష్యత్తును ప్రమాదంలోకి నెడుతోందని ఆరోపించారు. డబుల్ బెడ్‌రూమ్ ఇళ్లకు వెళ్లే దారిని కూడా రేకులతో మూసివేశారని, ప్రశ్నించిన వారిని పోలీసులతో బెదిరిస్తున్నారని విమర్శించారు. బాధితులకు అండగా ఉంటాం.. హెచ్ఎండీఏకు వెళ్తాం.! గతంలో హైదర్‌షాకోట్‌లో పేదల ఇళ్ల తొలగింపును అడ్డుకున్నామని గుర్తుచేసిన హరీశ్ రావు.. ఇప్పుడు నార్సింగి బాధితుల పక్షాన కూడా బీఆర్ఎస్ పోరాడుతుందని ప్రకటించారు. ఎమ్మెల్యేలందరితో కలిసి బాధిత కుటుంబాలను హెచ్ఎండీఏ కార్యాలయానికి తీసుకెళ్లి అధికారులను కలుస్తామని తెలిపారు. అర్ధరాత్రి ఫోన్ చేసినా తాను, కేటీఆర్, సబితా ఇంద్రారెడ్డి అందుబాటులో ఉంటామని చెప్పారు. బాధితుల భవనాలపై చర్యలు తీసుకుంటే ఊరుకునేది లేదని హెచ్చరించారు. 2026లో జారీ చేసినట్లు చెబుతున్న వివాదాస్పద గెజిట్‌ను వెంటనే రద్దు చేయాలని డిమాండ్ చేశారు. నార్సింగి రోడ్డు అలైన్‌మెంట్ వివాదంపై ప్రభుత్వం, హెచ్ఎండీఏ అధికారులు ఎలా స్పందిస్తారన్నది ఇప్పుడు ఆసక్తికరంగా మారింది. [ Narsingi Road Alignment Harish Rao, Narsingi Demolition Issue, HMDA, BRS Party, Telangana Politics, Seven Hills Narsingi, Western Meadows, 100 Feet Master Plan Road, Revanth Reddy, Hyderabad Real Estate, Narsingi Residents Protest ]

Published on: Sat Oct 31, 2026 4:58PM

పేద మహిళలే టార్గెట్: సరూర్ నగర్ లోఅండాల అక్రమ సేకరణ దందా గుట్టురట్టు.!

విశ్వనగరం హైదరాబాద్ లో వైద్య నిబంధనలకు విరుద్ధంగా సాగుతున్న అక్రమ దందాలు ఒక్కొక్కటిగా వెలుగు చూస్తుండటం బెంబేలెత్తిస్తోంది. ప్రజల ప్రాణాలతో చెలగాటమాడుతూ, ఆర్థిక ఇబ్బందుల్లో ఉన్న అమాయక యువతులను లక్ష్యంగా చేసుకుని గుట్టు చప్పుడు కాకుండా నడుపుతున్న మరో అక్రమ ఫెర్టిలిటీ రాకెట్‌ను పోలీసులు రట్టు చేశారు. హైదరాబాద్‌లోని సరూర్‌నగర్ పోలీస్ స్టేషన్ పరిధిలో ఈ అక్రమ నెట్‌వర్క్ గుట్టురట్టయింది. సరూర్‌నగర్ తహసీల్దార్ కార్యాలయానికి కూతవేటు దూరంలో ఉన్న ఒక నివాసంలో అసాధారణ కార్యకలాపాలు సాగుతున్నట్లు అందిన పక్కా సమాచారంతో పోలీసులు శనివారం (అక్టోబర్ 31) ఆకస్మికంగా ఆ నివాసంపై దాడి చేశారు. ఈ ఆకస్మిక తనిఖీల్లో అక్కడ అనుమానాస్పద రీతిలో తలదాచుకున్న 18 మంది యువతులను పోలీసులు అదుపులోకి తీసుకున్నారు. ప్రాథమిక విచారణలో వీరంతా ఆర్థిక ఇబ్బందుల్లో ఉన్న కాలేజీ విద్యార్థినులు, నిరుపేద యువతులుగా గుర్తించారు. సులభంగా డబ్బు సంపాదించవచ్చని ఆశ చూపించి, ఈ ముఠా సభ్యులు వారి బలహీనతను ఆసరాగా చేసుకుని నిబంధనలకు విరుద్ధంగా వారి అండాలను (Oocytes) సేకరిస్తున్నట్లు గుర్తించారు. ఇలా సేకరించిన అండాలను నగరంలోని అనధికారిక ఐవీఎఫ్ సెంటర్లు, ప్రైవేట్ ఆసుపత్రులకు భారీ మొత్తాలకు విక్రయిస్తున్నట్లు ఆధారాలు లభించాయి. బేగంపేట, ప్రకాష్ నగర్ వంటి ప్రాంతాల్లో ఇలాంటి అక్రమ గ్యాంగ్‌ల గుట్టు రట్టయిన గంటల వ్యవధిలోనే సరూర్‌నగర్‌లో మరో అక్రమ దందా వెలుగులోకి రావడం ఆందోళన కలిగిస్తున్నది. పోలీసులు ఈ ఘటనపై కేసు నమోదు చేసి, అదుపులోకి తీసుకున్న యువతులను విచారిస్తున్నారు. ఈ అక్రమ నెట్‌వర్క్ వెనుక అసలు సూత్రధారులు ఎవరు, ఏయే ప్రముఖ ఆసుపత్రులు, ఐవీఎఫ్ సెంటర్లు ఈ ముఠాతో చేతులు కలిపాయి అనే కోణంలో లోతైన దర్యాప్తు ముమ్మరం చేశారు. [Saroornagar Illegal Oocyte Donation Racket, Police Busted, Oocyte Scam, Telugu One]

Published on: Sat Oct 31, 2026 2:22PM

అమ్మాయిల హాస్టల్ ముసుగులో ఫెర్టిలిటీ సెంటర్: గుట్టురట్టు చేసిన పోలీసులు.!

రాష్ట్ర వ్యాప్తంగా సంచలనం సృష్టించిన సృష్టి ఫెర్టిలిటీ సెంటర్కే వ్యవహారం మరిచిపోక ముందే హైదరాబాద్ లో మరో అక్రమ ఫెర్టిలిటీ దందా వెలుగులోకి వచ్చింది. .గరల్స్ హాస్టల్ ముసుగులో నిర్వహిస్తున్న అక్రమ ఫెర్టిలిటీ సెంటర్ బాగోతం వెలుగులోకి వచ్చింది. పక్కాగా అందిన సమాచారంతో హైదరాబాద్ ప్రకాశ్ నగర్ లో అమినీత గరల్స్ హాస్టల్ పై దాడి చేయడంలో అక్రమ ఫెర్టిలిటీ సెంటర్ గుట్టు రట్లైంది. పోలీసులు, మల్కాజ్‌గిరి స్పెషల్ ఆపరేషన్ టీమ్ (ఎస్ఓటీ) సంయుక్తంగా ఈ ఆకస్మిక దాడిలో వెలుగు చూసిన అంశాలు అధికారులను విస్మయానికి గురి చేశాయి. గత ఏడాది కాలంగా ఈ ప్రాంగణాన్ని మహిళల వసతి గృహంగా మభ్యపెడుతూ ఈ అక్రమ కార్యకలాపాలను నిర్వాహకులు కొనసాగిస్తున్నట్లు పోలీసులు గుర్తించారు. బిహార్, ఉత్తరప్రదేశ్, ఒడిశా తదితర ఇతర రాష్ట్రాల నుంచి ఆర్థికంగా వెనుకబడిన యువతులను వివిధ కారణాలరీత్యా ఇక్కడికి రప్పించి, వారి నుంచి అండాలను అక్రమంగా సేకరిస్తున్నట్లు ప్రాథమిక విచారణలో తేలింది. కేవలం మహిళా అండాల సేకరణ మాత్రమే కాకుండా, కొందరు పురుషుల నుంచి వీర్య నమూనాలను కూడా సేకరించి నగరంలోని వివిధ ఐవీఎఫ్ కేంద్రాలకు భారీ మొత్తాలకు విక్రయిస్తున్నట్లు ఈ తనిఖీలో బయటపడింది. నిరుద్యోగం, ఆర్థిక ఇబ్బందులను ఆసరాగా చేసుకుని ఈ దందా నడుపుతున్నట్లు తెలిసింది. ఈ సందర్భంగా బిహార్, ఉత్తరప్రదేశ్, ఒడిశా రాష్ట్రాలకు చెందిన 10 మంది యువతులను పోలీసులు అదుపులోకి తీసుకున్నారు. ప్రస్తుతం వారిని సురక్షిత ప్రాంతానికి తరలించి విచారిస్తున్నారు. ఈ దందాతో సంబంధం ఉన్న నిర్వాహకుల కదలికలపై అధికారులు నిఘా పెంచారు.. ఈ అక్రమ నెట్‌వర్క్ వెనుక ఏయే సంతాన సాఫల్య కేంద్రాలున్నాయి? దీని వెనుక ఉన్న అసలు సూత్రధారులు ఎవరు? అనే కోణంలో పోలీసులు దర్యాప్తు సాగుతోంది. [Hyderabad Fertility Racket, Begumpet Girls Hostel Raid, Illegal Surrogacy Egg donation racket, Malkajgiri SOT police Operation, Telugu One]

Published on: Sat Oct 31, 2026 8:14AM

భాగ్యనగరం గొంతెండుతోంది: వానా కాలంలోనే నీటి కరవు.. వేసవిలో తిప్పలు తప్పవు.!

గ్రేటర్ హైదరాబాద్ గొంతెండిపోయే పరిస్థితులు దాపురిస్తున్నాయి. పెరుగుతున్న జనాభాకు నీటి సరఫరాకు ఇసుమంతైనా పొంతన లేకుండా పోయింది. సరఫరా డిమాండ్ లో అంతరం రోజురోజుకూ తీవ్రమౌతోంది. విశ్వనగరంగా మన భుజాలు మనమే చరిచేసుకుంటున్న భాగ్యనగరంలో పలు కాలనీలు, బస్తీలలో నీటి ఎద్దడి రోజురోజుకూ తీవ్రమౌతోంది. వర్షాకాలంలోనే పరిస్థితి ఇలా ఉంటే.. ఇక రానున్న వేసవిలో జనం దప్పికతో అల్లాడకతప్పదన్న ఆందోళన వ్యక్తం అవుతోంది. ఈ విషయంలో ప్రజలూ, అధికారులూ, ప్రభుత్వం కూడా కలవరపడుతున్న పరిస్థితి. తీవ్ర వర్షా భావం కారణంగా భాగ్యనగర దాహార్తిని తీర్చే ప్రధాన జలాశయాలలో నీటి మట్టాలు దాదాపు అడుగంటిపోయిన పరిస్థితి నెలకొంది. రిజర్వాయర్లలో నిల్వలు అడుగంటుతుండటంతో జలమండలి అధికారులు నీటి సరఫరాపై ఆంక్షలు విధించేందుకు రెడీ అవుతున్నారు. పలు ప్రాంతాలలో ఇప్పటికే రోజూవారీ సరఫరా నిలిపివేశారు. రోజు విడిచి రోజు మాత్రమే నీటిని సరఫరా చేస్తున్నారు. ముందు ముందు ఇది రెండు రోజులు, మూడు రోజులు. వారం రోజులకు కూడా పెరిగే అవకాశం ఉందని జలమండలి అధికారులే ఆఫ్ ది రికార్డ్ చెడుతున్నారు. ఈ పరిస్థితికి తోడు బోర్‌వెల్స్‌ కూడా చాలా వరకూ ఎండిపోయిన, పోతున్న పరిస్థితి. దీంతో భాగ్యనగర వాసులు నీటి అవసరాల కోసం ట్యాంకర్ల మీదనే ఆధారపడాల్సిన దుస్థితి ఏర్పడుతోంది. భాగ్యనగర శివారు ప్రాంతాలలో ఇప్పటికే తాగునీటి కొరత పీక్స్ కు చేరింది. నిర్వహణ లోపం కారణంగా పైప్‌లైన్ల లీకేజీలు, సరఫరాలో సమన్వయ లోపాలు కూడా సమస్యను మరింత తీవ్రం చేస్తున్నాయి. హైదరాబాద్ శివారు ప్రాంతాలలో ఇప్పటికే నీటి కోసం జనం క్యూ కడుతున్న పరిస్థితి. రానున్న రోజులలో ఈ నీటికటకట మరింత ఎక్కువయ్యే ముప్పు ఉందని పరిశీలకులు విశ్లేషిస్తున్నారు. జలాశయాలకు నీరు చేరే మార్గాలు లేకపోవడం, భూగర్భ జలాలు అడుగంటుతుండటం నీటి కరవు తీవ్ర రూపం దాల్చే పరిస్థితులు నెలకొన్నాయని హెచ్చరిస్తున్నారు. ప్రభుత్వ ప్రణాళికా లోపం కూడా ఇందుకు కారణమని చెబుతున్నారు. [Hyderabad Drinking Water Crisis, Greater Hyderabad Water Scarcity,Severe Water Shortage, Telangana, Telugu One]

Published on: Fri Oct 30, 2026 9:29AM

పుల్లారెడ్డి స్వీట్స్ లైసెన్స్ సస్పెండ్ చేసిన టీజీ సేఫ్: హైదరాబాద్ స్వీట్ షాపులపై తనిఖీలు.!

హైదరాబాద్ లోని ప్రముఖ స్వీట్ షాపులు, తయారీ కేంద్రాలపై తెలంగాణ స్టాండర్డ్స్ అథారిటీ ఫర్ ఫుడ్ అండ్ ఎసెన్షియల్ డ్రగ్స్ (టీజీ సేఫ్) ఏకకాలంలో ఆకస్మిక తనిఖీలు నిర్వహించింది. ఈ తనిఖీల్లో దిగ్భ్రాంతికరమైన విషయాలు వెలుగులోకి వచ్చాయి. అపరిశుభ్ర వాతావరణంలో మిఠాయిలను తయారు చేస్తున్నారనే ఆరోపణల నేపథ్యంలో జరిగిన ఈ తనిఖీల్లో దశాబ్దాలుగా నాణ్యతకు, రుచికీ బ్రాండ్ అన్న గుర్తింపు పొందిన జి. పుల్లారెడ్డి స్వీట్స్ లైసెన్స్‌ను టీజీ సేఫ్ అధికారులు సస్పెండ్ చేశారు. గ్రేటర్ హైదరాబాద్ మున్సిపల్ కార్పొరేషన్ పరిధిలోని 16 ప్రధాన స్వీట్ షాపులపై టీజీ సేఫ్ ఏకకాలంలో దాడులు చేసింది. ఈ తనిఖీల్లో నిబంధనలకు విరుద్ధంగా నిల్వ ఉంచిన, కల్తీ, పాడైపోయిన సుమారు 3 వేల 546 కిలోల ఆహార పదార్థాలను అధికారులు సీజ్ చేశారు. వీటి మార్కెట్ విలువ 16 లక్షల 86 వేల రూపాయలుగా అంచనా. ఆహార భద్రతా ప్రమాణాలను పాటించని 5 ప్రముఖ సంస్థల లైసెన్సులను రద్దు చేశారు. అలా లైసెన్సులను సస్పెండ్ చేసిన వాటిలో పుల్లారెడ్డి స్వీట్స్ కూడా ఉంది. సనత్‌నగర్‌లోని పుల్లారెడ్డి స్వీట్స్ తయారీ కేంద్రంలో అధికారులు తనిఖీలు నిర్వహించినప్పుడు నాణ్యతా లోపాలు బయటపడ్డాయి. వంటగదిలో కుళ్లిన కూరగాయలు, ఎలుకల వ్యర్థాలు ఉండటంతో పాటు గడువు ముగిసిన పదార్థాలను స్వీట్ల తయారీకి వాడుతున్నట్లు అధికారులు గుర్తించారు. ఆ తయారీ కేంద్రం నుంచి 15 లక్షల 3వేల రూపాయల విలువైన 3 వేల 133 కిలోల ఆహార పదార్థాలను సీజ్ చేసి, పుల్లారెడ్డి స్వీట్స్ లైసెన్స్ రద్దు చేశారు. ఇంకా చార్మినార్‌లోని ఆగ్రా మిఠాయి ఘర్, వనస్థలిపురంలోని స్వీట్ వన్ రుచులు, ఫలక్‌నుమాలోని బాలాజీ శ్రీ కిషన్ మిఠాయి భండార్, కాటేదాన్‌లోని హిరాణి ఫుడ్స్ వంటి సంస్థల లైసెన్స్ లను కూడా టీసీ సేఫ్ అధికారులు సస్పెండ్ చేశారు. ఇవే కాకుండా, ఎలాంటి లైసెన్సులు లేకుండా, అపరిశుభ్రత మధ్య నిర్వహిస్తున్న చాంపపేట్‌లోని బాలాజీ స్వీట్స్, సికింద్రాబాద్‌లోని మమతా స్వీట్ హౌస్ సహా మరో మూడు దుకాణాలను టీజీ సేఫ్ అధికారులు మూయించేశారు. ఈ తనిఖీల సందర్భంగా వివిధ కేంద్రాల నుంచి మొత్తం 22 ఆహార పదార్థాల నమూనాలను సేకరించిన అధికారులు, వాటిని నాణ్యత పరీక్షల కోసం పంపించారు. [TG Safe Suspend Lisence Of Pulla Reddy Sweets, Hyderabad Food Safety Raids, Hyderabad, Adulterated Sweets, TG Food Safety Inspections, Telangana, Telugu One]

Published on: Thu Oct 29, 2026 12:12PM

రైల్ నిలయం వద్ద కాంగ్రెస్ నేతల మెరుపు ధర్నా.. ఎందుకో తెలుసా?

ఢిల్లీలో కాంగ్రెస్ పార్టీ నిర్వహించనున్న జాతీయ స్థాయి నిరసన ర్యాలీకి తెలంగాణ నుంచి పార్టీ శ్రేణులను తరలించేందుకు ప్రత్యేక రైళ్లు కేటాయించకపోవడంపై కాంగ్రెస్ నేతలు ఆగ్రహం వ్యక్తం చేశారు. ఈ నేపథ్యంలో బుధవారం సికింద్రాబాద్‌లోని రైల్ నిలయం, దక్షిణ మధ్య రైల్వే జనరల్ మేనేజర్ కార్యాలయం ఎదుట కాంగ్రెస్ నేతలు, కార్యకర్తలు మెరుపు ధర్నా నిర్వహించారు. ఈ ఆందోళనలో టీపీసీసీ అధ్యక్షుడు మహేష్ కుమార్ గౌడ్, మంత్రి పొన్నం ప్రభాకర్, రాజ్యసభ సభ్యులు వేం నరేందర్ రెడ్డి, అనిల్ కుమార్ యాదవ్, ఎమ్మెల్యేలు నవీన్ యాదవ్, శ్రీ గణేష్‌తో పాటు పలువురు పార్టీ నేతలు పాల్గొన్నారు. ప్రత్యేక రైళ్లు కేటాయించలేదంటూ ఆగ్రహం.! నవంబర్ 1న న్యూఢిల్లీలోని చారిత్రాత్మక రామ్‌లీలా మైదానంలో కాంగ్రెస్ పార్టీ ‘ఓట్ బచావో – దేశ్ బచావో’ పేరుతో నిరసన ర్యాలీ నిర్వహించనుంది. ఈ కార్యక్రమానికి తెలంగాణ నుంచి పెద్ద సంఖ్యలో పార్టీ కార్యకర్తలను తరలించేందుకు ప్రత్యేక రైళ్లను కేటాయించాలని కాంగ్రెస్ నేతలు కోరినట్లు సమాచారం. అయితే, ప్రత్యేక రైళ్ల ఏర్పాటుకు అనుమతి లభించలేదని కాంగ్రెస్ నేతలు ఆరోపించారు. దీంతో ప్రత్యామ్నాయ ప్రయాణ ఏర్పాట్లపై దృష్టి సారించినట్లు తెలిపారు. మోదీ, అమిత్ షాకు వ్యతిరేకంగా నినాదాలు.! ప్రత్యేక రైళ్ల కేటాయింపు విషయంలో కేంద్ర ప్రభుత్వం రాజకీయ కారణాలతోనే తమ పార్టీకి అడ్డంకులు సృష్టిస్తోందని కాంగ్రెస్ నేతలు ఆరోపించారు. ఈ సందర్భంగా ప్రధాని నరేంద్ర మోదీ, కేంద్ర హోంమంత్రి అమిత్ షాకు వ్యతిరేకంగా కార్యకర్తలు నినాదాలు చేశారు. రైల్వే జీఎం కార్యాలయం ఎదుట బైఠాయించి తమ నిరసనను వ్యక్తం చేశారు. దీంతో రైల్ నిలయం పరిసరాల్లో కొంతసేపు ఉద్రిక్త పరిస్థితులు నెలకొన్నాయి. పీసీసీ చీఫ్ సహా పలువురు నేతల అరెస్ట్.! ధర్నా కొనసాగుతున్న సమయంలో పోలీసులు రంగంలోకి దిగి ఆందోళన చేస్తున్న కాంగ్రెస్ నేతలు, కార్యకర్తలను అదుపులోకి తీసుకున్నారు. టీపీసీసీ అధ్యక్షుడు మహేష్ కుమార్ గౌడ్, మంత్రి పొన్నం ప్రభాకర్, ఎంపీలు వేం నరేందర్ రెడ్డి, అనిల్ కుమార్ యాదవ్, ఎమ్మెల్యేలు నవీన్ యాదవ్, శ్రీ గణేష్ సహా పలువురు నాయకులను అరెస్ట్ చేశారు. అనంతరం వారిని సికింద్రాబాద్ మార్కెట్ పోలీస్ స్టేషన్‌కు తరలించారు. ఢిల్లీలో జరగనున్న నిరసన ర్యాలీకి వెళ్లకుండా ఎన్ని అడ్డంకులు ఎదురైనా తమ పార్టీ శ్రేణులు పెద్ద సంఖ్యలో తరలివెళ్తాయని కాంగ్రెస్ నేతలు స్పష్టం చేశారు. ప్రజాస్వామ్యాన్ని, రాజ్యాంగాన్ని పరిరక్షించడమే తమ ఆందోళన లక్ష్యమని పేర్కొన్నారు. [ Congress leaders stage a lightning protest at Rail Nilayam, Telangana Congress, Secunderabad Railway Station, Mahesh Kumar Goud, Ponnam Prabhakar, South Central Railway, Congress Protest, Vote Bachao Desh Bachao, Ramlila Maidan Rally, Congress Leaders Arrested ]

Published on: Wed Oct 28, 2026 4:25PM