TeluguOne Health
● # Tweets

Download the TeluguOne App

Choose your platform to continue

political-news-img

అగ్రరాజ్యాన్ని వెంటాడుతున్న వరుస సంక్షోభాలు: సాంకేతిక లోపంతో కుదేలైన బ్యాంకింగ్ వ్యవస్థలు.!

అమెరికాను వరుస సంక్షోభాలు వెంటాడుతున్నాయి. ఇవన్నీ సాంకేతిక వైఫల్యాల కారణంగా తలెత్తిన సంక్షోభాలే కావడం విశేషం. గత వారం ఒక రూటర్ వైఫల్యం కారణంగా దేశవ్యాప్తంగా విమాన సర్వీసులు అస్తవ్యస్తమైన సంగతి తెలిసిందే. వైలాది విమానాలు రద్దై ప్రయాణీకులు నానా అగచాట్లూ పడ్డారు. ఆ విమాన ప్రయాణాల సంక్షోభం ప్రభావం ఇంకా పూర్తిగా ముగియకముందే, ఇప్పుడు దేశంలోని బ్యాంకింగ్ వ్యవస్థలు సాంకేతిక లోపాల కరాణంగా కుదేలయ్యాయి. అమెరికాలోని దిగ్గజ ఆర్థిక సంస్థలైన జెపి మోర్గాన్ చేజ్ః, బ్యాంక్ ఆఫ్ అమెరికా, వెల్స్ ఫార్గో వంటి బ్యాంకుల సేవలు సోమవారం (నవంబర్ 16) ఒక్కసారిగా స్తంభించిపోయాయి. లక్షలాది మంది ఖాతాదారులు తమ మొబైల్ ఫోన్‌ల ద్వారా తమ ఖాతాల్లోని బ్యాలెన్స్‌లను చెక్ చేసుకోవడం, డబ్బులు బదిలీ చేయడంలో ఇబ్బందులు ఎదుర్కొన్నారు. మొబైల్ యాప్‌లు, ఆన్‌లైన్ పోర్టల్‌లలో లాగిన్ కావడానికి ప్రయత్నించిన మిలియన్ల మంది యూజర్లకు ఎర్రర్ మెసేజ్‌లు దర్శనమిచ్చాయి. ఈ పరిణామంతో జెపి మోర్గాన్ చేజ్ తక్షణమే స్పందించి హార్డ్‌వేర్ సిస్టమ్‌లలో తలెత్తిన తాత్కాలిక సాఫ్ట్‌వేర్ బగ్ కారణంగానే ఈ పరిస్థితితలెత్తిందని స్పష్టం చేసింది. ఖాతాదారులు ఎటువంటి ఆందోళనకు గురి కావద్దనీ, వారి సొమ్ము సురక్షితంగా ఉందనీ పేర్కొంది. ఈ టెక్నికల్ షట్ డౌన్ వెనుక సైబర్ దాడి, భద్రతా ఉల్లంఘన వంటివి ఏవీ లేవని స్పస్టం చేసింది. సాధ్యమైనంత త్వరగా నెట్‌వర్క్‌ను పునరుద్ధరించి సమస్య పరిష్కరిస్తామని పేర్కొంది, అమెరికాలో ఒకదాని తర్వాత ఒకటిగా సాంకేతిక లోపంతో వ్యవస్థల విధ్వంసం పట్ల సామాన్యులే కాదు, నిపుణులు కూడా ఆందోళన వ్యక్తం చేస్తున్నారు. దేశంలో డిజిటల్ మౌలిక వసతుల భద్రత మరియు నిర్వహణ తీరుపై పలు ప్రశ్నలు తలెత్తుతున్నాయి. ఇది కూడా చదవండి: అమెరికాలో స్తంభించిన విమానయానం: మూడో రోజు వేలాది విమానాలు రద్దు.! నిరంతరం టెక్నాలజీపై ఆధారపడే ఇటువంటి వ్యవస్థలు ఇలా అకస్మాత్తుగా కుప్పకూలడం ఆర్థిక మార్కెట్లలోనూ చర్చనీయాంశంగా మారింది. గతంలో జరిగిన విమాన ప్రయాణాల అస్తవ్యస్తత పరిస్థితుల నుంచి కోలుకుంటున్న తరుణంలోనే ఈ బ్యాంకింగ్ అంతరాయం తలెత్తడం అమెరికా ప్రజలను ఉక్కిరిబిక్కిరి చేసింది. డిజిటల్ సేవలు అత్యంత కీలకమైన ప్రస్తుత తరుణంలో, భవిష్యత్తులో ఇలాంటి సాంకేతిక లోపాలు పునరావృతం కాకుండా టెక్ దిగ్గజాలు, బ్యాంకింగ్ సంస్థలు మరింత పకడ్బందీ చర్యలు తీసుకోవాల్సిన అవసరం ఉందని ఆర్థిక విశ్లేషకులు అభిప్రాయపడుతున్నారు. వరుస సంక్షోభాల నేపథ్యంలో అమెరికా యంత్రాంగం ఏ విధమైన చర్యలు చేపడుతుందనేది వేచి చూడాలి. మీకు నచ్చవచ్చు: స్తంభించిన మైక్రోసాఫ్ట్ సేవలు: ప్రపంచ వ్యాప్తంగా వినియోగదారులు గగ్గోలు.! వాలంటరీ ఎగ్జిట్ ఆఫర్: ఉద్యోగుల తొలగింపునకు మైక్రో సాఫ్ట్ సరికొత్త వ్యూహం.! [USbankingcrisis, USflightchaos, JPMorganChase outage, softwarebug, TeluguOne]

Published on: Tue Nov 17, 2026 12:06PM

political-news-img

ట్రంప్ రికమెండ్ చేసినా నో: జెన్సన్ హువాంగ్ పునరాగమనంపై ఎన్విడియా కుండబద్దలు.!

అగ్రరాజ్యాధినేత ట్రంప్ స్వయంగా రికమెండ్ చేసినా తమ సంస్థ మాజీ సీఈవోను తిరిగి విధుల్లోకి తీసుకునేందుకు ఎన్విడియా నో చెప్పింది. గత కొద్ది రోజులుగా అంటే ఎన్విడియా మాజీ సీఈవో జెన్సన్ హువాంగ్ కు మద్దతుగా అమెరికా అధినేత డొనాల్డ్ ట్రంప్ నిలిచిన తరువాత నుంచి ఎన్విడియాలోకి జెన్సన్ హువాంగ్ పునరాగమనంపై పెద్ద ఎత్తున చర్చ జరుగుతోంది. తాజాగా ఎన్విడియా ఆ చర్చకు ఫుల్ స్టాప్ పెట్టేసింది. జెన్సన్ హువాంగ్ ను సంస్థలోకి తీసుకోవాలన్న డిమాండ్ సిలికాన్ వ్యాలీ నుంచి కూడా గట్టిగా వినిపించినప్పటికీ ఎన్విడియా ఖాతరు చేయలేదు. ఆయనను తిరిగి విధుల్లోకి తీసుకునే ప్రశ్నే లేదని కుండబద్దలు కొట్టినట్లు చెప్పింది. చైనా నిఘా సంస్థతో సంబంధాలున్నాయన్న ఆరోపణలు ఎదుర్కొంటున్న ఆలిస్ హువాంగ్ అనే మహిళతో జెన్సన్ హువాంగ్ కు సన్నిహిత సంబంధాలున్నాయన్న ఆరోపణలు వెల్లువెత్తడం, ఆ తరువాత ఆ విషయాన్ని ఆయనే స్వయంగా అంగీకరించడం తెలిసిందే. ఈ పరిణామాల నేపథ్యంలో జెన్సన్ హువాంగ్ తన పదవికి రాజీనామా చేశారు. అయితే ఆయన అనుభవాన్ని, టాలెంట్ ను దృష్టిలో ఉంచుకుని తిరిగి సంస్థ పగ్గాలు చేపట్టాలని సిలికాన్ వ్యాలీలోని పలువురు ప్రముఖులు గట్టిగా డిమాండ్ చేశారు. ఈ మేరకు తెరవెనుక ప్రయత్నాలు కూడా జరిగాయి. అగ్రరాజ్యాధినేత ట్రంప్ జెన్సన్ హువాంగ్ కు బహిరంగంగా మద్దతు పలికారు. ఆయనకు మరో అవకాశం ఇవ్వాలని పేర్కొన్నారు. అంతేకాకుండా ఆయనపై వస్తున్న గూఢచర్య ఆరోపణలను ట్రంప్ కొట్టిపారేశారు. అలాగే టెక్ దిగ్గజాలు ఎలాన్ మస్క్, టిమ్ స్వీనీ వంటి ప్రముఖులతో పాటు వేలాది మంది ఉద్యోగులు, వాటాదారులు స్టాండ్ విత్ జెన్సన్ పేరిట ఆన్‌లైన్ పిటిషన్‌పై సంతకాలు చేసి ఆయనకు సంఘీభావం తెలిపారు. ఇది కూడా చదవండి: భారీగా క్షీణించిన జెన్సన్ హవాంగ్ సంపద: భార్య కానీ విడాకుల కేసు వేస్తే.? అయితే ఈ ఒత్తిడులను ఎన్విడియా ఖాతరు చేయలేదు. సంస్థ ప్రయోజనాలను దృష్టిలో ఉంచుకుని జెన్సన్ హువాంగ్ పునరాగమనానికి ససేమిరా అంటూ ఎన్విడియా బోర్డు నిర్ణయం తీసుకుంది. ఎలాంటి ఒత్తిళ్లకు తలొగ్గకుండా, సంస్థకు నూతన దిశానిర్దేశం చేసేందుకు తదుపరి సీఈవో అన్వేషణ ప్రక్రియను బోర్డు వేగవంతం చేసింది. ఇందులో భాగంగా ఆర్మ్ హోల్డింగ్స్ సీఈవో రెనే హాస్ సహా పలువురు ప్రముఖుల పేర్లు పరిశీలనలో ఉన్నట్లు సమాచారం. కంపెనీ అంతర్గత వ్యక్తులతో పాటు బయటి వ్యక్తులను కూడా పరిగణనలోకి తీసుకుని సమర్థుడైన నాయకుడిని ఎంపిక చేయాలని బోర్డు నిశ్చయించుకుంది. ఈ నిర్ణయంతో ఎన్విడియాలో జెన్సన్ హువాంగ్ శకం ముగిసినట్లేనని విఅంటున్నారు. ఇక ఎన్విడియా కొత్త సీఈవో ఎవరు అన్న విషయంపై టెక్ ప్రపంచంలో ఆసక్తి వ్యక్తమౌతోంది. మీకు నచ్చవచ్చు. ఆమెతో వివాహేతర సంబంధం నిజమే.. సంచలన విషయం అంగీకరించిన ఎన్విడియా సీఈఓ.! ఇదో స్పై లవ్ స్టోరీ: ఎన్విడియో సీఈవోకు, అమెరికా గూఢచారితో లవ్ ఎఫైర్.! [JensenHuangNvidia, Reentry, Trump, Support, Silicon Valley Demand, , Nvidiaboardno,TeluguOne]

Published on: Tue Nov 17, 2026 9:13AM

political-news-img

భారత రక్షణ రంగానికి సరికొత్త డ్రోన్‌ ముప్పు: టర్కీతో పాకిస్థాన్‌ భారీ ఒప్పందం.!

ఆధునిక యుద్ధ రంగంలో డ్రోన్ల ప్రాధాన్యం రోజురోజుకు విపరీతంగా పెరుగుతోంది. ఈ నేపథ్యంలో పొరుగు దేశం పాకిస్థాన్ తన సైనిక బలగాలను మరింత పటిష్టం చేసుకునే దిశగా అడుగులు వేస్తోంది. ఇందులో భాగంగా మిత్రదేశమైన తుర్కీతో భారీ రక్షణ ఒప్పందాన్ని కుదుర్చుకున్నట్లు సమాచారం. సరిహద్దు దేశాల మధ్య మారుతున్న వ్యూహాత్మక సమీకరణాల నడుమ ఈ పరిణామం ప్రాధాన్యం సంతరించుకుంది. తాజా ఒప్పందంలో భాగంగా పాకిస్థాన్ ఏకంగా లక్ష ఎఫ్‌పీవీ (ఫస్ట్ పర్సన్ వ్యూ) డ్రోన్లను కొనుగోలు చేయనున్నట్లు తెలుస్తోంది. దాదాపు మూడేళ్ల కాలపరిమితితో ఈ భారీ డ్రోన్ల సరఫరాకు సంబంధించిన ప్రణాళికలు రూపుదిద్దుకున్నాయి. కేవలం డ్రోన్ల దిగుమతి మాత్రమే కాకుండా, వాటిని స్థానికంగానే తయారు చేసేందుకు అవసరమైన సాంకేతికతను బదిలీ చేసుకోవడంపై కూడా ఇరు దేశాలు దృష్టి సారించినట్లు సమాచారం. ఈ ఒప్పందంలో కేవలం ఎఫ్‌పీవీ డ్రోన్లు మాత్రమే కాకుండా, ఇతర అత్యాధునిక మానవరహిత సైనిక వ్యవస్థలు కూడా చేర్చబడ్డాయి. ప్రధానంగా సుమారు 500 వరకు లాయిటరింగ్ మ్యూనిషన్ వ్యవస్థలతో పాటు, వివిధ రకాల మినీ హెలికాప్టర్లు, నిఘా పరికరాలు పాక్ సైన్యం అమ్ములపొదిలోకి చేరనున్నాయి. ఇవి తక్కువ ఖర్చుతో శత్రువుల స్థావరాలపై కచ్చితమైన దాడులు నిర్వహించగల సామర్థ్యాన్ని కలిగి ఉంటాయి. నిపుణుల అంచనాల ప్రకారం, ఈ మెర్కుట్ ఎఫ్‌పీవీ డ్రోన్లు సుమారు 8 కిలోమీటర్ల పరిధిలో అత్యంత ప్రభావవంతంగా పని చేయగలవు. వీటిలో అమర్చే ప్రత్యేక వార్‌హెడ్ల ద్వారా చిన్నపాటి పేలుళ్లతోనే భారీ నష్టాన్ని సృష్టించవచ్చు. గాల్లో నిర్దిష్ట సమయం పాటు తిరుగుతూ లక్ష్యాలను కచ్చితంగా ఛధించే ఈ మ్యూనిషన్లు ఆధునిక రక్షణ వ్యూహాల్లో కీలక పాత్ర పోషిస్తున్నాయి. ఇప్పటికే అంతర్జాతీయ స్థాయిలో జరుగుతున్న వివిధ సంఘర్షణల్లో డ్రోన్ల వినియోగం యుద్ధ రూపురేఖలనే పూర్తిగా మార్చేసింది. సంప్రదాయ ఆయుధాల కంటే తక్కువ ఖర్చుతో ఎక్కువ విధ్వంసం సృష్టించగలగడం వీటి ప్రధాన ప్రత్యేకత. సరిగ్గా ఇదే వ్యూహాన్ని అనుసరిస్తూ పాకిస్థాన్ తన సరిహద్దు బలగాలను టెక్నాలజీ పరంగా అప్‌గ్రేడ్ చేసుకునే ప్రయత్నం చేస్తోంది. ఈ పరిణామాలు భారత రక్షణ రంగంపై పరోక్షంగా అదనపు భారాన్ని, సవాళ్లను విసిరే అవకాశం ఉందని భద్రతా నిపుణులు భావిస్తున్నారు. ఇప్పటికే సరిహద్దు ప్రాంతాల్లో ఉగ్రకదలికలు, డ్రోన్ల ద్వారా ఆయుధాల అక్రమ రవాణా వంటి సమస్యలను ఎదుర్కొంటున్న భారత్.. ఈ తాజా పరిణామాలను నిశితంగా పరిశీలిస్తోంది. భవిష్యత్ యుద్ధాలు సాంకేతిక పరిజ్ఞానం, మానవరహిత వ్యవస్థల చుట్టూనే తిరిగే అవకాశం ఉండటంతో భారత్ కూడా తన కౌంటర్ డ్రోన్ టెక్నాలజీని వేగవంతం చేయాల్సిన అవసరం ఎంతైనా ఉంది. మీకు నచ్చవచ్చు: హైదరాబాద్‌లో బిర్యానీ ప్రియులకు షాక్..భారీగా పెరిగిన ధరలు.! మీకు నచ్చవచ్చు: కోట్ల విలువైన నగలు కొట్టేశాడు..ఒక్క టాటూతో అడ్డంగా దొరికాడు.! [ Pakistan Turkey defense deal, FPV drones Loitering munitions, Mercut FPV drones, Indian defense news ]

Published on: Mon Nov 16, 2026 2:55PM

political-news-img

అమెరికాలో స్తంభించిన విమానయానం: మూడో రోజు వేలాది విమానాలు రద్దు.!

అమెరికాలో విమానయాన సంక్షోభం కొనసాగుతోంది. వరుసగా మూడో రోజు ఆదివారం (నవంబర్ 15) కూడా వేలాది విమానాలు రద్దయ్యాయి. ఫెడరల్ ఏవియేషన్ అడ్మినిస్ట్రేషన్ ఎయిర్ ట్రాఫిక్ కంట్రోల్ కమ్యూనికేషన్ వ్యవస్థలో తలెత్తిన సాంకేతిక లోపం కారణంగా ఈ పరిస్థితి తలెత్తింది. శుక్రవారం నుంచి ఈ లోపం కారణంగా వేలాది విమానాలు రద్దయ్యాయి. లక్షలాది మంది ప్రయాణికులు విమానాశ్రయాల్లోనే చిక్కుకుపోయారు. చికాగో, న్యూయార్క్, శాన్ ఫ్రాన్సిస్కో సహా దేశంలోని విమానాశ్రయాలన్నీ దాదాపు మూతపడ్డాయి. విమాన రాకపోకలకు అవకాశం లేకుండా పోయింది. దీంతో ప్రయాణికులు తీవ్ర ఇబ్బందులు ఎదుర్కొంటున్నారు. విమానయాన ట్రాకింగ్ వెబ్‌సైట్ ఫ్లైట్ అవేర్ మేరకు , శనివారం (నవంబర్ 14) సాయంత్రానికి దేశవ్యాప్తంగా 6,150కి పైగా విమానాలు రదయ్యాయి, మరో 7,300 విమానాలు విపరీతమైన ఆలస్యంతో నడుస్తున్నాయి. అంతకు ముందు నడిచాయి. అంతకుముందు శుక్రవారం (నవంబర్ 13) కూడా దాదాపు 9 వేల 200కు పైగా విమానాలు రద్దయ్యాయి. 7 వేల 500 విమానాలు ఆలస్యమయ్యాయి. ఇక ఆదివారం (నవంబర్ 15) కూడా వేల సంఖ్యలో విమానాలు రద్దయ్యాయి. సాంకేతిక లోపం కారణంగా తలెత్తిన ఈ అంతరాయంపై ఎఫ్ఏఏ ప్రయాణికులకు క్షమాపణలు చెప్పింది. ఈ సంకేతిక లోపాన్ని సరిదిద్ది యథావిధిగా విమానరాకపోకల పునరుద్ధరణకు మరో రోజు పడుతుందని ఎఫ్ఏఏ ఒక ప్రకటనలో తెలిపింది. పాతకాలపు హార్డ్‌వేర్ సిస్టమ్స్, రూటర్లు, కాపర్ కేబుల్స్ పై అధిక డేటా భారం పడటమే ఈ సమస్యకు ప్రధాన కారణమని ప్రాథమికంగా గుర్తించారు. రాడార్, కమ్యూనికేషన్ వ్యవస్థలలో అస్థిరత ఏర్పడటంతో సిస్టమ్స్ మొరాయించినట్లు అధికారులు గుర్తించారు. ఈ ఘటన వెనుక ఎలాంటి సైబర్ దాడి లేదా ఉగ్ర చర్యలేదని అధికారులు వెల్లడించారు. అమెరికా వైమానిక చరిత్రలో ఇలాంటి పరిస్థితి గతంలో ఎన్నడూ ఉత్పన్న కాలేదని చెబుతున్నారు. ఇది కూడా చదవండి: బొమ్మ తుపాకీ, క్రికెట్ బంతితో విమాన హైజాక్: సెన్సేషనల్ పొలిటికల్ స్టంట్.! గతంలో కొన్ని అసాధారణ పరిస్థితుల్లో తప్ప ఇలా ఒకేసారి దేశవ్యాప్తంగా విమానాలను నిలిపివేయాల్సిన పరిస్థితి తలెత్తలేదు. ఈ తాజా పరిణామం అమెరికా రవాణా రంగంపై కొలుకోలేని దెబ్బగా పరిశీలకులు అభివర్ణిస్తున్నారు. విమానయాన సంస్థలు ప్రయాణికులకు ప్రత్యామ్నాయ ఏర్పాట్లు చేయడం, సమాచారం అందించడం వంటి చర్యలు చేపట్టినప్పటికీ, భారీ సంఖ్యలో విమానాలు రద్దు కావడం లేదా ఆలస్యం కావడంతో ఎయిర్‌పోర్టులలో రద్దీ విపరీతంగా పెరిగింది. సాంకేతిక సమస్యను పరిష్కరించినా నిలిచిపోయిన విమానాల షెడ్యూల్స్ అన్నీ గాడిన పడటానికి, ప్రయాణాల రద్దీ సాధారణ స్థితికి రావడానికి రోజుల సమయం తీసుకుంటుందని విమానయాన రంగ నిపుణులు చెబుతున్నారు. ఈ ఘటనతో అమెరికాలో సాంకేతిక మౌలిక వసతులను ఆధునీకరించాల్సిన అవసరంపై చర్చ మళ్లీ జోరందుకుంది. భవిష్యత్తులో ఇలాంటి వైఫల్యాలు పునరావృతం కాకుండా ఉండేందుకు ఎయిర్ ట్రాఫిక్ కంట్రోల్ వ్యవస్థలను పటిష్టం చేయాలని, అత్యాధునిక సాంకేతికతను జోడించాలని నిపుణులు అంటున్నారు. మీకు నచ్చవచ్చు: అగ్రరాజ్యం మధ్యంతర ఎన్నికల వ్యయం: కొత్త రికార్డు.. లక్ష కోట్లు దాటేసింది.! ఎయిర్ ఇండియా విమానానికి తప్పిన ముప్పు: 109 మంది ప్రయాణీకులు సురక్షితం.! [America flights grounded, FAA network outage, air travel disruption, Technicalerror, TeluguOne]

Published on: Sun Nov 15, 2026 10:10AM

political-news-img

పులితో వీడియో షూటింగ్..ఊహించని విషాదం..19 ఏళ్ల యువకుడు మృతి.!

సోషల్ మీడియాలో నాలుగు లైకులు.. మరికొన్ని వేల వ్యూస్.. ఇంకాస్త పాపులారిటీ కోసం ఎంతటి సాహసానికైనా వెనుకాడటం లేదు కొందరు. కానీ ఆ సరదా ప్రయత్నాలు ఒక్కోసారి నిండు ప్రాణాలను బలిగొంటున్నాయి. పాకిస్థాన్‌లో టిక్‌టాక్ వీడియో షూటింగ్ కోసం బోనులో ఉన్న పులిని బయటకు తీయగా.. ఆ క్రూరమృగం దాడిలో 19 ఏళ్ల యువకుడు ప్రాణాలు కోల్పోయాడు. ఓ రీల్ కోసం మొదలైన ప్రయత్నం.. చివరకు ఓ కుటుంబానికి తీరని శోకాన్ని మిగిల్చింది. వివరాల్లోకి వెళితే.. పాకిస్థాన్‌లోని లాహోర్ శివారు ప్రాంతమైన కాహ్నాలో ఈ విషాద ఘటన చోటుచేసుకుంది. లక్షలాది మంది ఫాలోవర్లు ఉన్న సోషల్ మీడియా ఇన్‌ఫ్లుయెన్సర్ నోమాన్ హసన్ ఓ వైల్డ్‌లైఫ్ బ్రీడింగ్ ఫాంహౌస్‌కు వెళ్లాడు. అక్కడ వినూత్నంగా వీడియోలు చిత్రీకరించాలనే ఉద్దేశంతో బోనులో ఉన్న ఆడ పులిని బయటకు తీసుకురావాలని ఫాంహౌస్ నిర్వాహకులను కోరాడు. ఇన్‌ఫ్లుయెన్సర్ కోరిక మేరకు నిర్వాహకులు పులిని బోను నుంచి బయటకు వదిలారు. అంతే.. అక్కడ ఒక్కసారిగా పరిస్థితులు తారుమారయ్యాయి. కెమెరాల ముందు వీడియో షూటింగ్ జరుగుతుండగా పులి అకస్మాత్తుగా దాడికి దిగింది. అక్కడే పనిచేస్తున్న 19 ఏళ్ల తల్హాపై విరుచుకుపడింది. ఊహించని ఈ దాడితో అక్కడున్నవారంతా భయాందోళనకు గురయ్యారు. ఈ ఘటన జరిగిన సమయంలో తల్హా తండ్రి మునీర్ అహ్మద్, సోదరుడు హషిమ్ కూడా అక్కడే ఉన్నట్లు సమాచారం. తీవ్ర గాయాలపాలైన యువకుడిని వెంటనే ఆసుపత్రికి తరలించారు. కానీ అప్పటికే పరిస్థితి విషమించడంతో వైద్యులు అతడిని కాపాడలేకపోయారు. కళ్లముందే కొడుకు ప్రాణాలు కోల్పోవడంతో ఆ తండ్రి గుండె పగిలేలా విలపించాడు. తమ కుటుంబానికి అండగా ఉంటాడనుకున్న యువకుడు ఇలా అర్ధాంతరంగా తనువు చాలించడంతో ఆ కుటుంబం కన్నీరుమున్నీరవుతోంది. ఇది కూడా చదవండి: గిగ్ వర్కర్లకు రాహుల్ గాంధీ భరోసా.. ప్రతి డెలివరీపై 1 శాతం సంక్షేమ నిధికి.! అయితే ఈ ఘటన తర్వాత మరో సంచలన విషయం వెలుగులోకి వచ్చింది. యువకుడి మృతికి పులి దాడి కారణం కాదని, కుక్క కరిచినందువల్లే చనిపోయాడని నమ్మించేందుకు ప్రయత్నించినట్లు పోలీసులు వెల్లడించారు. ఈ క్రమంలో దర్యాప్తు చేపట్టిన అధికారులు అసలు విషయం బయటపెట్టారు. ఫాంహౌస్ యజమాని ఫయ్యాజ్, సోషల్ మీడియా ఇన్‌ఫ్లుయెన్సర్ నోమాన్ హసన్‌లను అదుపులోకి తీసుకున్నారు. మరోవైపు ఆ ఫాంహౌస్‌లో పులిని పెంచేందుకు అవసరమైన అనుమతులు ఉన్నాయా? ప్రమాదం జరిగిన తర్వాత వాస్తవాలను దాచిపెట్టేందుకు ఎవరు ప్రయత్నించారు? అనే అంశాలపై పోలీసులు విచారణ కొనసాగిస్తున్నారు. ప్రస్తుతం పులిని వన్యప్రాణి సంరక్షణ అధికారులకు అప్పగించినట్లు సమాచారం. ఒక వీడియో కోసం.. మరికొన్ని లైకుల కోసం.. ప్రాణాలతో చెలగాటం ఆడితే జరిగే పరిణామాలు ఎంత భయంకరంగా ఉంటాయో ఈ ఘటన మరోసారి గుర్తుచేస్తోంది. కెమెరా ముందు క్షణాలపాటు కనిపించే పాపులారిటీ కోసం ఓ యువకుడు తన నిండు జీవితాన్ని కోల్పోయాడు. అతడి కుటుంబానికి మాత్రం ఈ విషాదం జీవితాంతం మాయని గాయంగా మిగిలిపోనుంది. మీకు నచ్చవచ్చు: స్వీట్ అనుకుని నోట్లో పెట్టుకున్నాడు..క్షణాల్లో పేలిన నాటు బాంబు.! మీకు నచ్చవచ్చు: కంగనా రనౌత్‌పై కేసు నమోదు...ఎందుకంటే.! [ Pakistan TikTok Influencer, Noman Hassan, Lahore Tiger Attack, Social Media Reels Tragedy, 19 Year Old Youth Death ]

Published on: Sat Nov 14, 2026 3:32PM

political-news-img

మిసిసిప్పి నదిలో టైటానిక్ తరహా ప్రమాదం: టూరిజం షిప్ ను ఢీకొన్న ట్యాంకర్ నౌక.!

అమెరికాలోని మిసిసిప్పి జరిగిన ఘోర ప్రమాదం టైటానిక్ సినిమాలో ఓడ ప్రమాదాన్ని తలపించింది. అదృవశాత్తూ ఈ ప్రమాదంలో ఎటువంటి ప్రాణనష్టం సంభవించలేదు. కానీ ప్రమాదం జరిగిన తీరు మాత్రం భయాందోళనలు కలిగించేలా ఉంది. ఇంతకీ అసలేం జరిగిందంటే.. నదీ తీరంలో నిలిపి ఉంచిన ఒక పర్యాటక క్రూయిజ్ షిప్‌ను, ఒక భారీ ట్యాంకర్ నౌక బలంగా ఢీకొట్టింది. ఈ ఘటనలో క్రూయిజ్ తీవ్రంగా దెబ్బతినడమే కాకుండా, చూస్తుండగానే, నదిలో పూర్తిగా మునిగిపోయింది. ఈ ఘటనకు సంబంధించిన దృశ్యాలు సోషల్ మీడియాలో తెగ వైరల్ అయ్యాయి. ఆ దృశ్యాలను చూస్తున్న అందరికీ చరిత్రాత్మక టైటానిక్ నౌక ప్రమాదం కళ్లముందు కదలాడింది. ప్రమాదం జరిగిన సమయంలో క్రూయిజ్ షిప్‌లో పలువురు పర్యాటకులు ఉన్నారు. ట్యాంకర్ ఢీకొట్టిన తీవ్రతకు నౌక ఒక్కసారిగా ఒక వైపుకు ఒరిగిపోవడంతో లోపల ఉన్న వారంతా భయాందోళనలకు గురయ్యారు. నౌక పూర్తిగా మునిగిపోతోందని గ్రహించిన ప్రయాణికులు.. వెంటనే తమ వద్ద ఉన్న లైఫ్ జాకెట్లను ధరించి నదిలోకి దూకేశారు. నదీ ప్రవాహంలో ఈదుకుంటూ అతి కష్టం మీద ఒడ్డుకు చేరుకున్నారు. తొలుత ఈ ప్రమాద తీవ్రతకు కొందరు పర్యాటకులు నౌక నుంచి బయటపడే అవకాశం లేక, నౌకతో పాటు మునిగిపోయి జలసమాధి అయ్యారన్న ఆందోళన వ్యక్తమైనా, తరువాత అందరూ సురక్షితంగా బయటపడ్డారని తెలియడంతో అంతా ఊపిరి పీల్చుకున్నారు. ఈ ప్రమాదానికి సంబంధించిన వీడియోలు ప్రస్తుతం సామాజిక మాధ్యమాల్లో విపరీతంగా వైరల్ అవుతున్నాయి. భారీ నౌక నీటిలో నెమ్మదిగా మునిగిపోతున్న తీరు, ప్రయాణికులు ప్రాణభయంతో కేకలు వేస్తూ నీళ్లలోకి దూకుతున్న దృశ్యాలు హృదయాలను కదిలించేదిగా ఉంది. నెటిజనులు ఈ ప్రమాదాన్ని హాలీవుడ్ చిత్రం టైటానిక్ లోని ఓడ ప్రమాదంతో పోలుస్తూ కామెంట్లు చేస్తున్నారు. ఇది కూడా చదవండి: హర్మూజ్ లో కొత్త రూట్.. ఇరాన్, ఒమన్ మధ్యఒప్పందం.! రద్దీగా ఉండే మిసిసిప్పి జలమార్గంలో ట్యాంకర్ నౌక నియంత్రణ కోల్పోవడానికి గల కారణాలపై దర్యాప్తు చేపట్టారు. ట్యాంకర్ కెప్టెన్ నిర్లక్ష్యమా, సాంకేతిక లోపమా అన్న కోణంలో అమెరికా కోస్ట్ గార్డ్, రవాణా శాఖ అధికారులు విచారణ ప్రారంభించారు. ప్రస్తుతం ప్రమాద స్థలంలో సహాయక చర్యలు యుద్ధప్రాతిపదికన కొనసాగుతున్నాయి. మునిగిపోయిన క్రూయిజ్ షిప్ శిథిలాలను తొలగించడంపై యంత్రాంగం దృష్టి సారించింది. భవిష్యత్తులో ఇలాంటి ప్రమాదాలు పునరావృతం కాకుండా మిసిసిప్పి నదిలో నౌకల రాకపోకలపై భద్రతా నిబంధనలను అమలు చేయాలని పర్యాటకులు, నిపుణులు డిమాండ్ చేస్తున్నారు. ఈ ప్రమాదానికి గల కారణాలను తెలుసుకుని ఒక వేళ మానవ తప్పిదం ఉంటే అందుకు కారకులైన వారిపై కఠిన చర్యలు తీసుకోవాలని కోరుతున్నారు. మీకు నచ్చవచ్చు: హర్మూజ్ లో నౌకపై దాడి: అందులో భారత సిబ్బంది..అందరూ క్షేమం.! మూసీ ప్రాజెక్టు తొలి దశ పనులు ప్రారంభానికి ముహూర్తం ఖరారు.! [MississippiRiver, CruiseShipAccident, Titanic Like Incident, Ship Sink, Telugu One]

Published on: Sat Nov 14, 2026 8:16AM

political-news-img

స్తంభించిన మైక్రోసాఫ్ట్ సేవలు: ప్రపంచ వ్యాప్తంగా వినియోగదారులు గగ్గోలు.!

టెక్ దిగ్గజం మైక్రోసాఫ్ట్ సంస్థ అందిస్తున్న సేవలు ప్రపంచ వ్యాప్తంగా నిలిచిపోయాయి. దీంతో లక్షలాది మంది వినియోగదారులు ఇబ్బంది పడ్డారు. ముఖ్యంగా కార్పొరేట్, వ్యక్తిగత కార్యకలాపాలలో అత్యంత కీలకంగా మారిన ఈమెయిల్ వ్యవస్థ, ఆఫీస్ కమ్యూనికేషన్ యాప్స్ అకస్మాత్తుగా పనిచేయకపోవడం టెక్ ప్రపంచంలో కలకలం రేపింది. సాంకేతికంగా తలెత్తిన ఇబ్బంది కారణంగానే సేవలు నిలిచిపోయినట్లు మైక్రోసాఫ్ట్ అధికారికంగా థృవీకరించింది. వినియోగదారులకు ఎదురైన ఇబ్బందులకు చింతిస్తున్నట్లు పేర్కొంది. ఈ గ్లోబల్ ఔటేజ్ సమయంలో మైక్రోసాఫ్ట్ ఈమెయిల్ సర్వీస్ ఔట్‌లుక్, అలాగే ఆఫీస్ వర్క్‌ప్లేస్ మెసేజింగ్ అప్లికేషన్ టీమ్స్ సేవలు నిలిచిపోయాయి. గంటల తరబడి ఈ సేవలు నిలిచిపోయాయి. యూజర్ల ఇన్‌బాక్స్‌లు లోడ్ కాకపోవడంతో సమాచార మార్పిడి స్తంభించింది. ఆన్‌లైన్ సేవలను ట్రాక్ చేసే సంస్థల నివేదికల ప్రకారం, వేలాది మంది ఒక్కసారిగా కనెక్టివిటీ సమస్యలు ఎదుర్కొన్నారు. ఈమెయిల్స్ మాత్రమే కాకుండా, మైక్రోసాఫ్ట్ 365 సూట్‌లోని ఇతర ప్రధాన సేవలతో పాటు ఏఐ అసిస్టెంట్ కో-పైలట్ వినియోగంలోనూ అంతరాయం ఏర్పడింది. ఈ వైఫల్యం కారణంగా ప్రపంచవ్యాప్తంగా అనేక కార్పొరేట్ కార్యాలయాలు, విద్యాసంస్థలు, ఐటీ రంగ కార్యకలాపాలకు ఆటంకం ఏర్పడింది. కార్యాలయాల్లో రోజువారీ విధులు నిర్వహించే ఉద్యోగులు కమ్యూనికేషన్ సాధనాలు అందుబాటులో ఇక్కట్లు పడ్డారు. అమెరికా తదితర దేశాల్లో ఎక్స్ఛేంజ్ ఆన్‌లైన్ మెయిల్‌బాక్స్‌లను యాక్సెస్ చేయడానికి యూజర్లు సమస్యలు ఎదుర్కొన్నారు. ఇది కూడా చదవండి: మైక్రోసాఫ్ట్‌లో భారీ సంచలనం: కీలక ఈవిపి అకస్మాత్తుగా రాజీనామా! పరిస్థితి తీవ్రతను గమనించిన మైక్రోసాఫ్ట్ యాజమాన్యం వెంటనే స్పందించి సాంకేతిక లోపాలను సరిదిద్దే పనిలో పడింది. తమ ఇన్‌ఫ్రాస్ట్రక్చర్‌లోని సర్వర్ల నిర్వహణ, ఆటోమేటెడ్ తనిఖీల సమయంలో తలెత్తిన వైఫల్యాల వల్లే ఈ సమస్య తలెత్తిందని ప్రాథమికంగా నిర్ధారించింది. సర్వర్లపై అసాధారణమైన లోడ్ పడటం వల్ల కొన్ని విభాగాలు మొరాయించినట్లు మైక్రోసాఫ్ట్ పేర్కొంది. సమస్య తీవ్రతను తగ్గించేందుకు సంస్థ ఇంజనీరింగ్ బృందాలు యుద్ధ ప్రాతిపదికన చర్యలు చేపట్టింది. ఉత్తర అమెరికా వంటి ప్రాంతాలలో టీమ్స్ సేవలను తిరిగి ట్రాక్‌లోకి తీసుకురాగలిగామనీ, ఇంకా కొన్ని ప్రాంతాల్లో యూజర్లు ఇంకా కనెక్టివిటీ సమస్యలను ఎదుర్కొంటూనే ఉన్నారనీ మైక్రోసాఫ్ట్ పేర్కొంది. భవిష్యత్తులో ఇలాంటి గ్లోబల్ స్థాయి సర్వర్ వైఫల్యాలు పునరావృతం కాకుండా ఉండేందుకు అవసరమైన చర్యలు తీసుకుంటామని భరోసా ఇచ్చింది. మీకు నచ్చవచ్చు: వాలంటరీ ఎగ్జిట్ ఆఫర్: ఉద్యోగుల తొలగింపునకు మైక్రో సాఫ్ట్ సరికొత్త వ్యూహం.! తెలంగాణ‌లో మైక్రోసాఫ్ట్‌ డేటాసెంటర్‌.. ఏపీకి అథోగ‌తే..నా? చంద్ర‌బాబు ఉండి ఉంటేనా.. [Microsoftoutage, Services Down, Outlook, Teams, Technews, Teluguone]

Published on: Fri Nov 13, 2026 8:04AM

political-news-img

బంగ్లాలో మళ్లీ అశాంతి: షేక్ ఘర్ వాపసీ ప్రకటనే కారణమా.?

బంగ్లాదేశ్‌ లో ప్రశాంతత భగ్నం కానుందా? దేశంలో గతంలో జరిగిన చారిత్రాత్మక జెన్ జీ ఉద్యమం కారణంగా పదవి నుంచి వైదొలిగి, భారత్‌లో ఆశ్రయం పొందుతున్న మాజీ ప్రధాన మంత్రి షేక్ హసీనా తాజాగా బంగ్లాదేశ్ లో అడుగుపెడతానని ప్రకటించడం ఆ దేశ రాజకీయ వర్గాల్లో పెను సంచలన సృష్టించింది. ఆమె రాక ప్రకటనతో బంగ్లాదేశ్ రాజకీయాలు మరో సారి వేడెక్కాయి. భారతదేశంలో ప్రవాస జీవితం గడుపుతున్న 79 ఏళ్ల షేక్ హసీనా, త్వరలోనే బంగ్లాదేశ్‌కు వెళ్లేందుకు సన్నాహాలు చేసుకుంటున్నారు. అయితే, ఆమె పాస్‌పోర్ట్, జాతీయ గుర్తింపు కార్డును గతంలో అధికారంలోకి వచ్చిన తాత్కాలిక ప్రభుత్వం రద్దు చేయడంతో, ఆమె కొత్త పాస్‌పోర్ట్ జారీ చేయాలని న్యూఢిల్లీలోని బంగ్లాదేశ్ రాయబార కార్యాలయాన్ని అభ్యర్థించారు. రాబోయే డిసెంబర్‌లో ఎలాగైనా స్వదేశానికి చేరుకుని, న్యాయస్థానం ముందు స్వచ్ఛందంగా లొంగిపోవాలని ఆమె భావిస్తున్నారు. మరోవైపు, షేక్ హసీనా దేశానికి తిరిగి రానున్నారన్న వార్త బంగ్లాదేశ్‌లో దుమారం రేపుతోంది. ఆమె పాలనా కాలంలో జరిగిన అణచివేత సంఘటనలు, విద్యార్థి ఉద్యమ సమయంలో జరిగిన హింసాకాండకు సంబంధించి ఆమెపై తీవ్రమైన ఆరోపణలు వెల్లువెత్తుతున్నాయి. ప్రస్తుత ప్రభుత్వం ఆమె రాకను వ్యతిరేకిస్తోంది. హసీనా తిరిగి వస్తే దేశంలో శాంతిభద్రతల సమస్యలు తలెత్తుతాయని, ఆమె మద్దతుదారులు మళ్లీ రోడ్లపైకి వచ్చి ఆందోళనలు చేసే అవకాశం ఉందని నిఘా వర్గాలు హెచ్చరిస్తున్నాయి. ఇది కూడా చదవండి: నన్ను చంపినా సరే బంగ్లాదేశ్‌కు వెళ్తా..షేక్ హసీనా సంచలన ప్రకటన..! గత ఏడాది కాలంగా బంగ్లాదేశ్ తీవ్రమైన ఆర్థిక సంక్షోభం, రాజకీయ పరివర్తన దశను ఎదుర్కొంటోంది. జెన్ జీ విప్లవం ద్వారా దేశంలో అధికార మార్పిడి జరిగి, కొత్త ప్రభుత్వం కొలువైనప్పటికీ, షేక్ హసీనా నేతృత్వంలోని అవామీ లీగ్ పార్టీని ఎన్నికల్లో నిషేధించడం వంటి పరిణామాలు సంభవించాయి. ఈ తరుణంలో హసీనా స్వదేశంలో అడుగుపెడతానన్న ప్రకటన ఇటు ప్రభుత్వానికి, అటు దేశంలోని ప్రధాన రాజకీయ పార్టీలకు పెద్ద సవాలుగా పరిణమించింది. షేక్ హసీనా రాకకు సంబంధించి బంగ్లాదేశ్, ఇండియా మధ్య దౌత్యపరమైన చర్చలు కూడా తెరపైకి వచ్చే అవకాశం ఉంది. హసీనాను తమకు అప్పగించాల్సిందిగా బంగ్లాదేశ్ ప్రభుత్వం ఇప్పటికే దౌత్య మార్గాల ద్వారా భారత్‌ను కోరిన నేపథ్యంలో, ఆమె స్వదేశానికి వెళ్లే పరిణామాలు రెండు దేశాల ద్వైపాక్షిక సంబంధాలపై కూడా ప్రభావం చూపే అవకాశం ఉంది. రాబోయే రోజుల్లో షేక్ హసీనా ఎలాంటి వ్యూహంతో ముందుకు వెళ్తారు, బంగ్లాదేశ్ ప్రభుత్వం ఎలాంటి చర్యలు తీసుకుంటుందనే అంశం అంతర్జాతీయ స్థాయిలో తీవ్ర ఆసక్తిని రేకెత్తిస్తోంది. మీకు నచ్చవచ్చు: బంగ్లాదేశ్ సంక్షోభం: ఇండియాలో రాజకీయ ఆరోపణలు.. వాస్తవాలు, అతిశయోక్తులు.! మళ్లీ కోవిడ్ కలకలం: ప్రపంచాన్ని కమ్మేస్తున్న కొత్త వేరియెంట్.. ప్రమాదమెంత.? [Sheikh Hasina, Bangladesh, Politicalinstability, GenZ, TeluguOne]

Published on: Thu Nov 12, 2026 11:48AM

political-news-img

మళ్లీ కోవిడ్ కలకలం: ప్రపంచాన్ని కమ్మేస్తున్న కొత్త వేరియెంట్.. ప్రమాదమెంత.?

కోవిడ్ మహమ్మారి మరోసారి పంజా విసురుతోందా? అంటే ప్రపంచ ఆరోగ్య సంస్థ ఔననే అంటున్నది. కోవిడ్ కొత్త వేరియెంట్ ప్రస్తుతం ప్రపంచాన్ని బెంబేలెత్తిస్తున్నది. పీజే.2.1గా పిలవబడే ఈ కోవిడ్ కొత్త వేరియెంట్ తొలుత కెనడాలో వెలుగు చూసింది. అది ఇప్పుడు అమెరికా, యూరప్, ఆస్ట్రేలియా సహా పలు దేశాలలో విస్తరించింది. ఈ కోవిడ్ కొత్త వేరియెంట్ వ్యాప్తి వేగం విస్మయ పరుస్తోందని వైద్య నిపుణులు చెబుతున్నారు. అయితే ఈ కొత్త వేరియెంట్ వల్ల తలెత్తే ఆరోగ్య సమస్యలు, ముప్పు తదితర అంశాలపై అంతర్జాతీయ ఆరోగ్య సంస్థలు నిఘా పెట్టాయి. పరిశోధనలు చేస్తున్నారు. నిరంతరం నిఘా ఉంచాయి. ఈ ఏడాది మేలో కెనడాలోని ఆంటారియో ప్రాంతంలో కోవిడ్ కొత్త వేరియెంట్ PJ.2.1కి సంబంధించిన తొలి కేసు వెలుగు చూసింది. అక్కడ నుంచి ఇది అతివేగంగా అల్బర్టా, బ్రిటిష్ కొలంబియా వంటి ప్రాంతాలకు విస్తరించింది. జూన్లో అగ్రరాజ్యానికి కూడా ఇది పాకింది. అమెరికాలోని న్యూయార్క్ నగరంలో కోవిడ్ కొత్త వేరియెంట్ తొలి నమోదు అయ్యింది. ఆ తర్వాత కాలిఫోర్నియా, ఫ్లోరిడా వంటి రాష్ట్రాలకు వ్యాపించింది. అక్టోబరు నాటికి ఆంటారియోలో సేకరించిన నమూనాల్లో 25 శాతానికి పైగా ఈ వేరియంట్ ఉండటంతో దీని వ్యాప్తి వేగం ఎంత తీవ్రంగా ఉందో తేటతెల్లమైంది. శాస్త్రవేత్తలు దీనిని ఒక సాల్టేషన్ వేరియంట్ గా చెబుతున్నారు. అంటే సాధారణంగా వైరస్‌లు నెమ్మదిగా మ్యూటేట్ అవ్వడానికి బదులుగా, ఒకేసారి అనేక జన్యుపరమైన మార్పులతో రూపాంతరం చెందడం అన్న మాట. ఇది JN 1 వంశానికి చెందిన MC.10.1.7 నుంచి ఉద్భవించిందని, దీని స్పైక్ ప్రోటీన్‌లో ప్రత్యేక మార్పులు ఉన్నాయని పరిశోధనలు పేర్కొన్నాయి. అయితే, ఈ వేరియంట్ కారణంగా గతంలో కంటే ప్రమాదకరమైన ముప్పు పొంచివుందని చెప్పడానికి ఇప్పటికిప్పుడు ఎలాంటి ఆధారాలు లేవని వైద్య నిపుణులు చెబుతున్నారు. జర్నల్ ఆఫ్ ఇన్ఫెక్షన్‌లో ప్రచురితమైన నివేదిక ప్రకారం.. ఇది మానవ కణాల్లోకి సులభంగా ప్రవేశించే సామర్థ్యాన్ని కలిగి ఉన్నప్పటికీ, టీకాల ద్వారా తయారైన యాంటీబాడీలను తప్పించుకోలేదు. అప్‌డేటెడ్ వ్యాక్సిన్లు తీసుకున్నవారిలో రోగనిరోధక శక్తి దీనిని సమర్థవంతంగా ఎదుర్కొంటుంది. ఇది కూడా చదవండి: కడపలో కరోనా కలకలం.!? ఈ కొత్త వేరియంట్‌ సోకిన వారిలో జ్వరం, దగ్గు, గొంతు నొప్పి, తలనొప్పి, ఒళ్లు నొప్పులు, అలసట లక్షణాలు కనిపిస్తాయి. సాధారణ ఫ్లూ లేదా జలుబు లక్షణాలను పోలి ఉండటం వల్ల కేవలం లక్షణాలను బట్టి ఇది ఏ వైరస్ అనేది గుర్తించడం కష్టమని, నిర్ధారణ కోసం పరీక్షలు తప్పనిసరి అని ప్రపంచ ఆరోగ్య సంస్థ వెల్లడించింది. ప్రస్తుతానికి PJ.2.1 వల్ల ఆసుపత్రుల్లో చేరికలు, మరణాల రేటు వంటి సమాచారం లేదు. వృద్ధులు, రోగనిరోధక శక్తి తక్కువగా ఉన్నవారు, దీర్ఘకాలిక అనారోగ్యాలతో బాధపడేవారు అప్రమత్తంగా ఉండాలని ప్రపంచ ఆరోగ్య సంస్థ హెచ్చరించింది. మీకు నచ్చవచ్చు: ఏపీలో కరోనా విజృంభణ.. సర్కార్ అలర్ట్.! ఎల్‌నినో ఎఫెక్ట్: ఆదివాసీలకు 125 రోజుల ఉపాధి పనులు.! [New COVID Variant Spread Rapid, WHO, Caution, Coronavirus Strain, Global Spread, WHO COVID Update, Saltation Variant, Telugu One]

Published on: Wed Nov 11, 2026 9:28AM

political-news-img

ఇజ్రాయెల్ ఎన్నికలు: నెతన్యాహుకు షాక్: ప్రభుత్వ ఏర్పాటుకు ఎనిమిది స్థానాలు తక్కువ.!

ఇజ్రాయెల్ సార్వత్రక ఎన్నికలలో ఆ దేశ ప్రధాని నెతన్యాహుకు గట్టి ఎదురుదెబ్బ తగిలింది. తుది ఫలితాలు ఎలాంటి స్పష్టమైన మెజారిటీని ఇవ్వకపోవడంతో దేశంలో హంగ్ ఏర్పడింది. సుదీర్ఘకాలం పాటు ప్రధానమంత్రిగా కొనసాగిన బెంజమిన్ నెతన్యాహు సారథ్యంలోని కూటమికి అవసరమైన సంఖ్యాబలం దక్కలేదు. దీంతో దేశంలో తదుపరి ప్రభుత్వాన్ని ఎవరు ఏర్పాటు చేస్తారనే అంశంపై ఉత్కంఠ నెలకొంది. ఎన్నికల ఫలితాల ప్రకారం, 120 స్థానాలు కలిగిన ఇజ్రాయెల్ పార్లమెంట్ లో ప్రభుత్వం ఏర్పాటు చేయడానికి కనీసం 61 మంది సభ్యుల మద్దతు అవసరం. అయితే బెంజమిన్ నెతన్యాహు కూటమి 53 స్థానాలను మాత్రమే కైవసం చేసుకోగలిగింది. మరోవైపు ప్రతిపక్ష నేత, యషార్ పార్టీ అధినేత గడి ఐసెన్‌కోట్ (Gadi Eisenkot) నేతృత్వంలోని కూటమి 48 స్థానాలను దక్కించుకుంది. మిగిలిన స్థానాలను అరబ్ నేతృత్వంలోని పార్టీలు గెలుచుకోవడంతో ఏ ఒక్క పార్టీకీ కూడా ప్రభుత్వాన్ని ఏర్పాటు చేసేందుకు అవసరమైన స్థానాలు దక్కలేదు. ఇది కూడా చదవండి: వరల్డ్ హీరో: ఫ్లై దుబాయ్ పైలట్ కెప్టెన్ స్మిత్ మచ్చర్: ఇజ్రాయెల్ స్వాతంత్ర్య వేడుకలకు ఆహ్వానం.! దీంతో ఇజ్రాయెల్ అధ్యక్షుడు ఐజాక్ హెర్జోగ్ రాజకీయ పార్టీలతో సంప్రదింపులు జరిపారు. పార్లమెంట్‌లో అత్యధిక మంది శాసనసభ్యుల సిఫార్సులు పొందిన విపక్ష నేత గడి ఐసెన్‌కోట్‌ను తదుపరి ప్రభుత్వాన్ని ఏర్పాటు చేయాల్సిందిగా అధ్యక్షుడు ఆహ్వానించారు. ఐసెన్‌కోట్‌కు మద్దతుగా లాబీయింగ్ బలపడటంతో ఆయనకు తొలి అవకాశం లభించింది. అయితే, గడి ఐసెన్‌కోట్ సులభంగా ప్రభుత్వాన్ని ఏర్పాటు చేసే పరిస్థితి లేదు. మైనారిటీ ప్రభుత్వాన్ని ఏర్పాటు చేయడం లేదా అరబ్ పార్టీలు బయటి నుంచి మద్దతు తీసుకోవడం వంటి మార్గాలు ఉన్నాయి. మరోవైపు నెతన్యాహు కూడా తన అధికారాన్ని నిలబెట్టుకోవడానికి మిత్రపక్షాలతో మంతనాలు జరుపుతున్నారు. ఒకవేళ ఏ పార్టీ కూడా బల నిరూపణ చేసుకోలేకపోతే ఇజ్రాయెల్ ప్రజలు మరోసారి ఎన్నికలను ఎదుర్కొనే అవకాశాలున్నాయి. మీకు నచ్చవచ్చు: అమెరికాపై సడలిన నమ్మకం: భారత్ తో బంధమే శ్రీరామరక్ష.. ఇండియాపై నెతన్యాహు పొగడ్తలు.! ఇరాన్‌ను సర్వనాశనం చేస్తా: యూఎన్ఓ వేదికగా ట్రంప్ హెచ్చరిక..! [Israel Election Results Shock Benjamin Netanyahu, Gadi Eisenkot, Israeli Prime Minister Mandate Israel Coalition Government, Telugu One]

Published on: Tue Nov 10, 2026 4:55PM