Andhra Pradesh News | AP Latest News, Politics & Updates

ఏపీకి మురసు ముప్పు: ఒంగోలు సమీపంలో తీరం దాటనున్న తీవ్ర తుపాను.!

పశ్చిమ మధ్య బంగాళాఖాతంలో కేంద్రీకృతమైన మురసు తుపాను, తీవ్ర తుపానుగా బలపడింది. ఇది సోమవారం (నవంబర్ 2 అర్ధరాత్రి లేదామంగళవారం (నవంబర్ 3) తెల్లవారుజామున నెల్లూరు - నర్సాపురం మధ్య ఒంగోలు సమీపంలో తీరం దాటే అవకాశం ఉంది. సోమవారం (నవంబర్ 2) ఉదయం ఈ మురసు తుపాను ఒంగోలుకు 330 కి.మీ, నెల్లూరుకు 290 కి.మీ దూరంలో కేంద్రీకృతమై ఉందని ఆంధ్రప్రదేశ్ రాష్ట్ర విపత్తుల నిర్వహణ శాఖ తెలిపింది. వాతావరణ శాఖ హెచ్చరికల మేరకు ఈ తుపాను తీరం దాటే సమయంలో . తీరం దాటే సమయంలో గంటకు 110 కిలోమీటర్లకు పైబడిన వేగంతో వేగంతో పెనుగాలులు వీచే అవకాశం ఉంది. ఈ తుపాను ప్రభావం దక్షిణ కోస్తా ఆంధ్ర, రాయలసీమ ప్రాంతాపై తీవ్రంగా ఉటుంది. తుపాను కారణంగా దక్షిణ కోస్తా, రాయలసీమలో భారీ నుంచి అత్యంత భారీ వర్షాలు కురిసే అవకాశం ఉంది. ఈ నేపథ్యంలో నెల్లూరు, ప్రకాశం, గుంటూరు, బాపట్ల, కృష్ణా జిల్లాలకు రెడ్ అలర్ట్ జారీ చేశారు. ముఖ్యంగా బాప (స్టార్మ్ సర్జ్) ఎగిసిపడే ప్రమాదం ఉందని ఏపీఎస్‌డీఎంఏ తెలిపింది. ప్రజలు అత్యంత అప్రమత్తంగా ఉండాలని, మత్స్యకారులు సముద్రంలోకి వేటకు వెళ్లకూడదని అధికారులు ఆదేశించారు. లోతట్టు ప్రాంతాల ప్రజలు సురక్షిత ప్రాంతాలకు తరలివెళ్లేందుకు సిద్ధంగా ఉండాలని సూచించారు. [Murasu CyClone Secere Effect Andhra Pradesh, South Coat, Rayalaseema, Red Elert, Heavy Rails, Wild, Winds]

Published on: Mon Nov 2, 2026 7:13AM

రాప్తాడు బాధిత బాలికకు అండగా నారా లోకేష్‌.. 48 గంటలు కీలకమన్న వైద్యులు. !

శ్రీ సత్యసాయి జిల్లా రాప్తాడులో అమానుష దాడికి గురై తీవ్రంగా గాయపడిన విద్యార్థినికి మెరుగైన వైద్యం అందించాలని విద్య, ఐటీ శాఖల మంత్రి నారా లోకేష్‌ వైద్యులను కోరారు. బెంగళూరులోని ఓల్డ్‌ ఎయిర్‌పోర్ట్‌ రోడ్డులో ఉన్న మణిపాల్‌ ఆసుపత్రికి వెళ్లిన ఆయన.. చికిత్స పొందుతున్న బాలిక ఆరోగ్య పరిస్థితిని వైద్యులను అడిగి తెలుసుకున్నారు.విద్యార్థినికి అందిస్తున్న చికిత్సపై వైద్యులతో సుదీర్ఘంగా చర్చించారు. బాలికకు అవసరమైన శస్త్రచికిత్సలను ఇప్పటికే విజయవంతంగా పూర్తిచేశామని, ప్రస్తుతం ఆమె ఆరోగ్య పరిస్థితి నిలకడగా ఉందని వైద్యులు మంత్రికి వివరించారు. అయితే, రాబోయే 48 గంటలు కీలకమని తెలిపారు. దీంతో వచ్చే 48 గంటల పాటు బాలిక ఆరోగ్య పరిస్థితిని నిరంతరం పర్యవేక్షించాలని మంత్రి లోకేష్‌ వైద్యులను కోరారు. బాలికను తమ బిడ్డలా భావించి, అవసరమైన అత్యుత్తమ వైద్యం అందించాలని విజ్ఞప్తి చేశారు. ఆమె ప్రాణాలను కాపాడేందుకు వైద్యులు చేస్తున్న కృషికి ధన్యవాదాలు తెలిపారు.అనంతరం బాలిక చికిత్స పొందుతున్న పీడియాట్రిక్‌ ఇంటెన్సివ్‌ కేర్‌ యూనిట్‌ (పీఐసీయూ)కు వెళ్లి పరిస్థితిని పరిశీలించారు. తీవ్ర గాయాలతో చికిత్స పొందుతున్న విద్యార్థిని ఆరోగ్య పరిస్థితిపై ఆరా తీశారు. బాలిక కుటుంబానికి భరోసా.! ఆసుపత్రి సందర్శన అనంతరం విద్యార్థిని తల్లిదండ్రులను మంత్రి లోకేష్‌ పరామర్శించారు. వారికి ధైర్యం చెప్పారు. ప్రభుత్వం, తాను అన్ని విధాలా అండగా ఉంటామని భరోసా ఇచ్చారు. ఘటన జరిగిన తీరును పాఠశాల ప్రిన్సిపాల్‌ను అడిగి తెలుసుకున్నారు. విద్యార్థినిపై దాడికి పాల్పడిన నిందితుడిని కఠినంగా శిక్షిస్తామని మంత్రి తెలిపారు. బాలిక త్వరగా కోలుకుని సంపూర్ణ ఆరోగ్యంతో తిరిగి రావాలని ఆకాంక్షించారు. మంత్రి నారా లోకేష్‌తో పాటు ఎమ్మెల్యేలు పరిటాల సునీత, బండారు శ్రావణి, మహిళా కమిషన్‌ చైర్‌పర్సన్‌ రాయపాటి శైలజ, విద్యాశాఖ కమిషనర్‌ తమీమ్‌ అన్సారియా తదితరులు ఉన్నారు. [ Nara Lokesh, Rapthadu School Attack, Girl Student Health Update, Manipal Hospital Bengaluru, Andhra Pradesh News, Student Safety, Medical Treatment, Paritala Sunitha ]

Published on: Sun Nov 1, 2026 3:38PM

రాష్ట్రానికి మరో తుఫాను ముప్పు.. అధికారులతో సీఎం చంద్రబాబు సమీక్ష.!

ఆంధ్రప్రదేశ్‌కు మరో తుఫాను ముప్పు పొంచి ఉంది. బంగాళాఖాతంలో ఏర్పడిన వాయుగుండం మరింత బలపడి తీవ్ర వాయుగుండంగా, ఆ తర్వాత తుఫానుగా మారే అవకాశం ఉందని వాతావరణ శాఖ అంచనా వేస్తోంది. ఈ నేపథ్యంలో రాష్ట్రంపై తుఫాను ప్రభావం, వర్షాలు, గాలుల తీవ్రత, జలాశయాల పరిస్థితిపై ముఖ్యమంత్రి చంద్రబాబు నాయుడు ఉన్నతాధికారులతో సమీక్ష నిర్వహించారు. తుఫాను ముప్పు దృష్ట్యా రేపు చేపట్టాల్సిన ఢిల్లీ పర్యటనను కూడా రద్దు చేసుకున్నారు. అధికారుల అంచనాల ప్రకారం.. నవంబర్‌ 2 నాటికి పశ్చిమ మధ్య బంగాళాఖాతంలో తుఫాను తీవ్ర రూపం దాల్చే అవకాశం ఉంది. నవంబర్‌ 3న ఉదయం బాపట్ల సమీపంలో తీవ్ర తుఫానుగా తీరం దాటవచ్చని అంచనా వేస్తున్నారు. తీరం దాటే సమయంలో గంటకు 100 నుంచి 110 కిలోమీటర్ల వేగంతో బలమైన గాలులు వీచే అవకాశం ఉందని అధికారులు సీఎంకు వివరించారు. కోస్తా జిల్లాలకు భారీ వర్ష సూచన.! నవంబర్‌ 2న దక్షిణ, మధ్య కోస్తా జిల్లాల్లో మోస్తరు నుంచి భారీ వర్షాలు కురిసే అవకాశం ఉంది. అక్కడక్కడ అతిభారీ వర్షాలు పడవచ్చని అంచనా. నవంబర్‌ 3, 4 తేదీల్లో పలు ప్రాంతాల్లో భారీ నుంచి అతిభారీ వర్షాలు కురిసే అవకాశం ఉందని అధికారులు తెలిపారు. అత్యంత భారీ వర్షాలు కురిసే అవకాశం ఉన్న 20 మండలాల్లో ఏలూరు జిల్లాలో 9, కృష్ణా జిల్లాలో 5, ఎన్టీఆర్‌ జిల్లాలో 5, బాపట్ల జిల్లాలో ఒక మండలం ఉన్నట్లు అంచనా వేశారు. నవంబర్‌ 3న జిల్లా సగటు వర్షపాతం ఏలూరులో 179 మిల్లీమీటర్లు, కృష్ణాలో 163, ఎన్టీఆర్‌లో 161, పశ్చిమ గోదావరిలో 147, గుంటూరులో 119, బాపట్లలో 104 మిల్లీమీటర్ల వరకు ఉండవచ్చని అధికారులు అంచనా వేశారు. వరదలు, విద్యుత్‌ అంతరాయాలపై అప్రమత్తం.! భారీ వర్షాల నేపథ్యంలో బుడమేరు వద్ద నవంబర్‌ 3న సుమారు 32,500 క్యూసెక్కుల వరద ప్రవాహం వచ్చే అవకాశం ఉందని అధికారులు తెలిపారు. ఎర్రకాల్వ, గోనెలవాగు, జల్లేరు, పంపా తదితర వాగులు, జలాశయాల పరిధిలోనూ భారీ వరదలు వచ్చే ప్రమాదం ఉందని వివరించారు. బలమైన గాలుల కారణంగా 12 జిల్లాల్లో సుమారు 12,102 నుంచి 15,128 వరకు విద్యుత్‌ స్తంభాలు దెబ్బతినే అవకాశం ఉందని ముందస్తు అంచనా వేశారు. ఈ నేపథ్యంలో విద్యుత్‌ శాఖ సిబ్బందిని అప్రమత్తం చేయాలని, అవసరమైన పరికరాలు సిద్ధంగా ఉంచాలని సీఎం సూచించారు. అర్నబ్‌ తుఫాను నష్టంపై ఆరా.! ఇదిలా ఉండగా, గతంలో వచ్చిన అర్నబ్‌ తుఫాను కారణంగా జరిగిన నష్టం, చేపట్టిన సహాయక చర్యల పురోగతిని కూడా అధికారులు ముఖ్యమంత్రికి వివరించారు. తుఫాను ప్రభావిత ప్రాంతాల్లో విద్యుత్‌ సరఫరా పునరుద్ధరణపై చంద్రబాబు ఆరా తీశారు. ఆ రోజు రాత్రికల్లా అన్ని ప్రాంతాల్లో విద్యుత్‌ సరఫరాను పునరుద్ధరిస్తామని అధికారులు సీఎంకు తెలిపారు. తాజా తుఫాను ముప్పు నేపథ్యంలో ప్రాణ, ఆస్తి నష్టం జరగకుండా ముందస్తు చర్యలు తీసుకోవాలని, ప్రజలకు ఎప్పటికప్పుడు హెచ్చరికలు జారీ చేయాలని ముఖ్యమంత్రి అధికారులను ఆదేశించారు. [ Andhra Pradesh Cyclone Alert, Cyclone Threat, CM Chandrababu Naidu, Bay of Bengal, Bapatla Coast, Heavy Rainfall, Weather Forecast, Budameru Flood, Andhra Pradesh Weather ]

Published on: Sun Nov 1, 2026 2:28PM

పులివెందుల ఆర్వో కార్యాలయం ఎదుట జగన్‌ ధర్నా.!

పులివెందుల మున్సిపల్‌ ఎన్నికల వేళ ఉద్రిక్త పరిస్థితులు నెలకొన్నాయి. పోలింగ్‌లో అక్రమాలు జరుగుతున్నాయంటూ వైఎస్సార్‌సీపీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డి నిరసనకు దిగారు. పులివెందులలోని రిటర్నింగ్‌ అధికారి (ఆర్వో) కార్యాలయం ఎదుట పార్టీ శ్రేణులతో కలిసి బైఠాయించారు. ఆయనతో పాటు వైఎస్‌ అవినాష్‌రెడ్డి, వైఎస్సార్‌సీపీ పోలింగ్‌ ఏజెంట్లు కూడా ధర్నాలో పాల్గొన్నారు. పులివెందుల పరిధిలో మొత్తం 80 పోలింగ్‌ కేంద్రాలు ఉండగా.. కేవలం 10 కేంద్రాల్లో మాత్రమే తమ పార్టీ ఏజెంట్లను అనుమతించారని జగన్‌ ఆరోపించారు. మిగిలిన 70 కేంద్రాల్లో ఏజెంట్లను లోపలికి రానివ్వకుండా అడ్డుకున్నారని విమర్శించారు. తమ ఏజెంట్లు లేకుండానే అధికార పార్టీ నేతలు ఓట్లు వేసుకుంటున్నారని, పోలింగ్‌లో అక్రమాలకు పాల్పడుతున్నారని ఆరోపణలు చేశారు. పోలింగ్‌ కేంద్రాల వద్ద తమ పార్టీ ఏజెంట్లను అడ్డుకోవడంతో పాటు, ఓటర్లను భయభ్రాంతులకు గురిచేస్తున్నారని జగన్‌ మండిపడ్డారు. ఓటర్ల నుంచి బలవంతంగా ఓటర్‌ స్లిప్పులు లాక్కుంటున్నారని, మున్సిపల్‌ చైర్‌పర్సన్‌ అభ్యర్థి ప్రమీలపై కూడా దాడి జరిగిందని ఆరోపించారు. పోలీసులు నిష్పక్షపాతంగా వ్యవహరించకుండా అధికార పార్టీకి అనుకూలంగా పనిచేస్తున్నారని విమర్శించారు. పోలింగ్‌ కేంద్రాల్లో సరైన సీసీ కెమెరాలు, వీడియో రికార్డింగ్‌ ఏర్పాటు చేయలేదని, దీంతో అక్రమాలకు అవకాశం ఏర్పడిందని జగన్‌ ఆరోపించారు. ఎన్నికల ప్రక్రియ సజావుగా సాగడం లేదని పేర్కొంటూ.. ప్రస్తుత ఎన్నికలను రద్దు చేసి, రీపోలింగ్‌ నిర్వహించాలని డిమాండ్‌ చేశారు. పులివెందుల పోలింగ్‌లో జరిగినట్లు తాము ఆరోపిస్తున్న అక్రమాలపై ఇప్పటికే ఎన్నికల సంఘం దృష్టికి తీసుకెళ్లామని, ఈ వ్యవహారంపై సుప్రీంకోర్టును కూడా ఆశ్రయిస్తామని వైఎస్‌ జగన్‌ స్పష్టం చేశారు. ప్రజాస్వామ్య పరిరక్షణ కోసం న్యాయపోరాటం కొనసాగిస్తామని తెలిపారు. [ YS Jagan, Pulivendula Municipal Elections, YS Avinash Reddy, RO Office Protest, Polling Irregularities, Repolling Demand, YSRCP, Andhra Pradesh Politics ]

Published on: Sun Nov 1, 2026 12:37PM

వరుసకు బాబాయ్..పెళ్లికి నిరాకరించిందని బాలికపై కిరాతకం.!

అనంతపురం జిల్లా రాప్తాడులోని పాఠశాలలో మైనర్ విద్యార్థినిపై జరిగిన ఉన్మాది దాడి ఘటన రాష్ట్రవ్యాప్తంగా తీవ్ర కలకలం రేపింది.పెళ్లి చేసుకోవాలంటూ వెంటపడటం.. బాలిక నిరాకరించడంతో కక్ష పెంచుకోవడం.. చివరకు ఏకంగా పాఠశాలలోకి చొరబడి ప్రాణాలు తీసే ప్రయత్నం చేయడం.. వెరసి ఈ ఘటన సభ్యసమాజాన్ని ఉలిక్కిపడేలా చేసింది. చదువుకోవాల్సిన తరగతి గదిలోనే పవర్ చైన్‌సాతో దాడికి తెగబడటంతో విద్యార్థులు, ఉపాధ్యాయులు భయాందోళనకు గురయ్యారు. పెళ్లికి నిరాకరించిందని పగ..! శ్రీ సత్యసాయి జిల్లా ధర్మవరం మండలం నాగలూరు గ్రామానికి చెందిన 21 ఏళ్ల హేమంత్ అలియాస్ డుమ్ము ఈ దారుణానికి పాల్పడినట్లు పోలీసులు గుర్తించారు. బాధిత బాలికకు బంధుత్వంలో పినతండ్రి వరుస అయ్యే హేమంత్.. కొంతకాలంగా తనను పెళ్లి చేసుకోవాలంటూ బాలికపై ఒత్తిడి తెస్తున్నట్లు ప్రాథమిక విచారణలో వెల్లడైంది. అయితే, హేమంత్ వేధింపులను బాలిక తీవ్రంగా వ్యతిరేకించింది. అతడి ప్రవర్తనపై తల్లిదండ్రులకు, ఉపాధ్యాయులకు ఫిర్యాదు చేస్తానని హెచ్చరించినట్లు సమాచారం. దీంతో బాలికపై కక్ష పెంచుకున్న హేమంత్.. ఆమెను అంతమొందించాలనే ఉద్దేశంతో పథకం వేసినట్లు తెలుస్తోంది. కూలీలా వచ్చి.. తరగతి గదిలోకి చొరబడి.! పాఠశాలలో జరుగుతున్న నిర్మాణ పనులను ఆసరాగా చేసుకున్న హేమంత్.. కూలీ వేషంలో పాఠశాల ప్రాంగణంలోకి ప్రవేశించినట్లు సమాచారం. అనంతరం నేరుగా పదో తరగతి గదిలోకి వెళ్లి వెంట తెచ్చుకున్న పవర్ చైన్‌సాతో బాలికపై విచక్షణారహితంగా దాడి చేశాడు. ఈ దాడిలో బాలిక ముఖం, మెడ, తల, కుడి చేతికి తీవ్ర గాయాలయ్యాయి. ముఖ్యంగా కుడి చేయి మణికట్టు వద్ద తీవ్రంగా తెగిపోవడంతో పరిస్థితి విషమంగా మారింది. స్నేహితురాలిపై జరుగుతున్న దాడిని అడ్డుకునేందుకు ముందుకొచ్చిన మరో విద్యార్థిని లక్ష్మిపై కూడా నిందితుడు దాడి చేయడంతో ఆమెకు సైతం తీవ్ర గాయాలయ్యాయి. కళ్లముందే జరిగిన ఈ భయానక ఘటనతో తరగతి గదిలోని విద్యార్థులు భయంతో కేకలు వేశారు. ఉపాధ్యాయులు వెంటనే అప్రమత్తమై పోలీసులకు సమాచారం అందించారు. గాయపడిన ఇద్దరు విద్యార్థినులను ఆసుపత్రికి తరలించారు. ధర్మవరం రైల్వే స్టేషన్‌లో నిందితుడి అరెస్ట్.! దాడి అనంతరం అక్కడి నుంచి తప్పించుకునేందుకు ప్రయత్నించిన హేమంత్‌ను పోలీసులు ధర్మవరం రైల్వే స్టేషన్‌లో అదుపులోకి తీసుకున్నట్లు సమాచారం. ఈ ఘటనపై కేసు నమోదు చేసి దర్యాప్తు చేపట్టారు. నిందితుడి నేపథ్యం, దాడికి ఉపయోగించిన ఆయుధం, ముందస్తు ప్రణాళిక తదితర అంశాలపై పోలీసులు విచారణ కొనసాగిస్తున్నారు. చిన్నారికి బెంగళూరులో మెరుగైన వైద్యం.! మరోవైపు తీవ్రంగా గాయపడిన ప్రధాన బాధితురాలికి మెరుగైన వైద్యం అందించేందుకు ప్రభుత్వం ప్రత్యేక చర్యలు చేపట్టింది. ఆమెను బెంగళూరులోని మణిపాల్ ఆసుపత్రికి తరలించారు. విద్యాశాఖ మంత్రి నారా లోకేశ్ వైద్యులతో ఎప్పటికప్పుడు మాట్లాడి చిన్నారి ఆరోగ్య పరిస్థితిని సమీక్షిస్తున్నారు. వైద్యులు రక్తస్రావాన్ని అదుపులోకి తీసుకొచ్చారని, ఆర్థోపెడిక్ శస్త్రచికిత్స అనంతరం ప్లాస్టిక్ సర్జరీ ద్వారా చికిత్స అందించనున్నట్లు లోకేశ్ వెల్లడించారు. ప్రస్తుతం చిన్నారి ఆరోగ్య పరిస్థితి నిలకడగా ఉందని వైద్యులు తెలిపినట్లు పేర్కొన్నారు. చిన్నారి త్వరగా కోలుకోవాలని ఆకాంక్షించారు. విద్యార్థులకు ధైర్యం చెప్పేందుకు 20 మంది కౌన్సెలర్లు.! ఈ ఘటనతో తీవ్ర భయాందోళనకు గురైన తోటి విద్యార్థులకు మానసిక ధైర్యం కల్పించేందుకు ప్రభుత్వం ప్రత్యేక చర్యలు చేపట్టింది. మంత్రి నారా లోకేశ్ ఆదేశాలతో 20 మంది కౌన్సెలర్లతో ప్రత్యేక బృందాన్ని ఏర్పాటు చేశారు. ఈ బృందం ఘటన జరిగిన పదో తరగతి 'ఏ' సెక్షన్‌లోని 32 మంది విద్యార్థుల ఇళ్లకు వెళ్లి వారితో పాటు తల్లిదండ్రులతో మాట్లాడుతోంది. 8, 9, 10 తరగతులకు చెందిన ఇతర విద్యార్థినులకు కూడా కౌన్సెలింగ్ అందించనున్నారు. విద్యార్థుల్లో భయాన్ని తొలగించి, తిరిగి ధైర్యంగా పాఠశాలకు వచ్చేలా చేయడమే ఈ కార్యక్రమం లక్ష్యం. నిందితుడిపై కఠిన చర్యలకు సీఎం ఆదేశాలు..! రాప్తాడు ఘటనపై ముఖ్యమంత్రి చంద్రబాబు నాయుడు, హోంమంత్రి వంగలపూడి అనిత తీవ్ర దిగ్భ్రాంతి వ్యక్తం చేశారు. నిందితుడిపై కఠినమైన చట్టపరమైన చర్యలు తీసుకోవాలని, బాధితురాలికి మెరుగైన వైద్యం అందించాలని అధికారులను ఆదేశించారు. ఒకవైపు ఆసుపత్రిలో చిన్నారి ప్రాణాలతో పోరాడుతుంటే.. మరోవైపు ఈ ఘటనను కళ్లారా చూసిన విద్యార్థులు ఇంకా భయాందోళనలోనే ఉన్నారు. బంధుత్వం ముసుగులో వేధింపులకు పాల్పడుతూ.. పెళ్లికి నిరాకరించిందనే కక్షతో పాఠశాలలోనే ఇంతటి దారుణానికి తెగబడటం సమాజంలో మహిళలు, బాలికల భద్రతపై తీవ్ర ప్రశ్నలు లేవనెత్తుతోంది. విద్యార్థినులకు రక్షణ కల్పించాల్సిన పాఠశాలల్లోనే ఇలాంటి ఘటనలు చోటుచేసుకోవడం ఆందోళనకరం. బాలికల భద్రతకు మరింత పటిష్టమైన చర్యలు తీసుకోవాల్సిన అవసరాన్ని రాప్తాడు ఘటన మరోసారి గుర్తుచేస్తోంది. [ Rapthadu School Attack, Anantapur Student Attack, Hemant Rapthadu Case, Minor Girl Attack, School Violence Andhra Pradesh, Chain Saw Attack, Student Safety, Nara Lokesh, Chandrababu Naidu, AP Home Minister Anitha, Manipal Hospital Bangalore, Student Counselling, School Security, Dharmavaram Arrest, Andhra Pradesh Crime News ]

Published on: Sun Nov 1, 2026 10:21AM

పార్టీలను పక్కన పెట్టండి.. ప్రజా సంక్షేమమే ముఖ్యం: నందమూరి బాలకృష్ణ పిలుపు.!

హిందూపురంలో సతీమణితో కలిసి ఓటేసిన ఎమ్మెల్యే బాలయ్య.! ఆంధ్రప్రదేశ్‌లో పట్టణ స్థానిక సంస్థల ఎన్నికల పోలింగ్ వేళ.. హిందూపురం ఎమ్మెల్యే, ప్రముఖ సినీ నటుడు నందమూరి బాలకృష్ణ కీలక వ్యాఖ్యలు చేశారు. రాజకీయ పార్టీలను మాత్రమే దృష్టిలో పెట్టుకోకుండా.. ప్రజలకు సేవ చేసే నాయకులను ఎన్నుకోవాలని ఓటర్లకు పిలుపునిచ్చారు. ప్రజా సంక్షేమం, అభివృద్ధికి ప్రాధాన్యతనివ్వాలని సూచించారు.స్థానిక సంస్థల ఎన్నికల నేపథ్యంలో బాలకృష్ణ తన ఓటు హక్కును వినియోగించుకున్నారు. కుటుంబ సభ్యులతో కలిసి పోలింగ్ కేంద్రానికి చేరుకున్న ఆయన.. ఓటు వేశారు. అనంతరం మీడియాతో మాట్లాడారు.ప్రజాస్వామ్యంలో ఓటు హక్కు అత్యంత శక్తివంతమైనదని బాలకృష్ణ పేర్కొన్నారు. ప్రజల సమస్యలను అర్థం చేసుకుని, వారి సంక్షేమం కోసం నిరంతరం పనిచేసే నాయకులకే ప్రజలు పట్టం కట్టాలని సూచించారు. రాజకీయాలకు అతీతంగా ప్రజలకు అందుబాటులో ఉండే నేతలను ఎన్నుకోవడం ద్వారా స్థానిక ప్రాంతాలు అభివృద్ధి చెందుతాయని అభిప్రాయపడ్డారు.స్థానిక సంస్థల ఎన్నికలు ప్రజల రోజువారీ సమస్యల పరిష్కారంలో కీలక పాత్ర పోషిస్తాయి. తాగునీరు, రహదారులు, పారిశుధ్యం, మౌలిక వసతులు వంటి అంశాలపై ప్రజాప్రతినిధులు ప్రత్యేక దృష్టి పెట్టాల్సిన అవసరం ఉంది. ఈ నేపథ్యంలో ప్రజా సంక్షేమానికి ప్రాధాన్యతనివ్వాలంటూ బాలకృష్ణ చేసిన వ్యాఖ్యలు ప్రాధాన్యత సంతరించుకున్నాయి.ఓటర్లు తమ ఓటు హక్కును బాధ్యతాయుతంగా వినియోగించుకోవాలని, ప్రజలకు సేవ చేసే సమర్థులైన నాయకులను ఎన్నుకోవాలని ఆయన పిలుపునిచ్చారు. ఎన్నికల్లో ప్రజల తీర్పు స్థానిక అభివృద్ధికి దిశానిర్దేశం చేయనుంది. [ Nandamuri Balakrishna, Balakrishna Voting, Hindupur MLA, AP Municipal Elections, Andhra Pradesh Politics, Balakrishna Political Comments, Public Welfare, Local Body Elections, Voting Rights, TDP, Hindupur Elections, AP Election News ]

Published on: Sun Nov 1, 2026 9:53AM

జనం కోసం చంద్రబాబు.. చంద్రబాబు కోసం జనం.!

53 రోజుల అక్రమ నిర్బంధం నుంచి విడుదలై మూడేళ్లు.! అందరూ రేపటి గురించి ఆలోచిస్తే.. చంద్రబాబు రెండు దశాబ్దాల ముందు గురించి ఆలోచిస్తారు. అదీ ఆయన విజన్. భవిష్యత్ అవసరాలను దృష్టిలో ఉంచుకుని ఆయన ఈ రోజే ప్రణాళికలు రూపొందిస్తారు. అదీ ఆయన దూరదృష్టి. రాజకీయాలకు అతీతంగా అన్ని పార్టీల నాయకులూ కూడా చంద్రబాబు అడ్మినిస్ట్రేషన్ ను, దూరదృష్టినీ ప్రశంసిస్తారు. ప్రస్తుతిస్తారు. సరే రాజకీయ విభేదాలతో మరుగుల పడేయాలని ప్రయత్నించిన నేతలూ ఉన్నారనుకోండి. వారి ప్రయత్నాలుఎన్నడూ ఫలించలేదు సరికదా వారే మరుగుల పడే పరిస్థితికి రావడం మనం చాశాం, చూస్తున్నాం. అటువంటి చంద్రబాబునాయుడిని వై స్కిల్ కేసు నెపంతో అక్రమంగా నిర్బంధించింది. 53 రోజుల పాటు ఆ అక్రమ నిర్బంధం కొనసాగింది. అయితే..ఆయన పులికడిగిన ముత్యంలా బయటకు వచ్చారు. సరిగ్గా మూడేళ్ల కిందట అక్టోబర్ 31న ఆయన రాజమహేంద్రవరం జైలు గేటు నుంచి బయటకు వచ్చారు. అప్పుడు ఆయనకు లభించిన స్వాగతం, ఆయనను చూడటం కోసం జన ఉప్పెన రోడ్లను ముంచెత్తింది. సరిగ్గా మూడేళ్ల కిందట జరిగిన ఈ సంఘటన ఒక చారిత్రక ఘట్టం. అది ఒక సాధారణ విడుదల కాదు.. కోట్లాది మంది తెలుగువారి గుండెల్లో పేరుకుపోయిన ఆవేదనకు తెరపడిన చారిత్రాత్మక సన్నివేశం. నిత్యం ప్రజల మధ్య ఉండే చంద్రబాబు నాయుడు 53 రోజులు నిర్బంధంలో ఉండటాన్ని తెలుగువారు జీర్ణించుకోలేకపోయారు. ఆయన ఎప్పుడు బయటకు వస్తారు? ఎలా ఉన్నారు? అనే ఆతృతతో, ఆందోళనతో ప్రపంచవ్యాప్తంగా ఉన్న తెలుగు ప్రజలు కళ్లు కాయలు కాచేలా ఎదురు చూశారు. జైలు గేటు ముందు కిక్కిరిసిన జనసందోహం. వారి మధ్య నుంచి ఉదయిస్తున్న సూర్యుడిలా చంద్రబాబు బయటకు నడుచుకుంటూ రావడాన్ని యావద్దేశం ఉద్వేగభరితంగా తిలకించింది. ఆ సమయంలో చంద్రబాబు మనవడు జనం మధ్య నుంచి పరుగెత్తుకుంటూ వచ్చి తాతను చుట్టేసుకోవడం ఆ తాతా, మనవళ్ల మధ్య అనుబంధానికి చిహ్నంగా నిలిచిపోతుంది. ఆ దృశ్యాన్ని ప్రత్యక్షంగా, టీవీల ద్వారా పరోక్షంగా వీక్షించిన జనాల కళ్లు చెమ్మగిల్లాయి. దాదాపు ఐదు దశాబ్దాల తన రాజకీయ ప్రయాణంలో చంద్రబాబు ముఖ్యమంత్రిగా, ప్రతిపక్ష నేతగా నిత్యం ప్రజలలోనే ఉన్నారు. వారితో మమేకమయ్యారు. అలాంటి జననేతను 53 రోజులుకు పైగా అక్రమ నిర్బంధంలో ఉండటం ప్రపంచవ్యాప్తంగా ఉన్న తెలుగువారిని ఆవేదనకు గురి చేసింది. వారిలో ఆగ్రహ జ్వాలను నింపింది. తమ కోసం దశాబ్దాలుగా అవిశ్రాంతంగా పనిచేసిన నాయకుడికి ఇదేనా బహుమతి? అంటూ ప్రజలు ఆగ్రహంతో రగిలిపోయారు. ఇక సరిగ్గా మూడేళ్ల కిందట ఆయన విడుదల వార్త వెలువడిన క్షణం నుంచి రాజమండ్రి నుంచి కరకట్ట వరకు జనప్రవాహం ఉప్పొంగింది. గోదావరి, కృష్ణా నదుల ప్రవాహాన్ని తలపించేలా ప్రజలు రోడ్లపైకి తరలివచ్చారు. పట్టిసీమ ప్రవాహానికి పదింతల జన ప్రవాహం చంద్రబాబు కోసం కదిలివచ్చింది. ప్రపంచవ్యాప్తంగా కోట్లాది మంది అభిమానులు, రాజకీయ ప్రత్యర్థులు, వివిధ పార్టీల నాయకులు, ప్రముఖులు టీవీలకు అతుక్కుపోయారు. ఇన్నిరోజుల తర్వాత తమ అభిమాన నాయకుడిని ఒక్కసారి చూడాలనే తపన ప్రతి తెలుగువాడిలో కనిపించింది. ఆ తర్వాత జరిగిన ఎన్నికల్లో చంద్రబాబు నాయకత్వానికి ప్రజలు అపూర్వమైన విజయాన్ని అందించారు. 2024 ఎన్నికల్లో టీడీపీ కూటమి 175 స్థానాలకు గాను 164 స్థానాలను కైవసం చేసుకోవడం ప్రజాభిమానానికి రాజకీయ రూపంగా నిలిచింది. చంద్రబాబు అరెస్టుతో జగన్ సర్కార్ వంద తప్పులూ చేసేసిందని భావించిన ప్రజ శ్రీకృష్ణుడు సుదర్శన చక్రంతో శిశుపాలుడి శరస్సు ఖండించిన చంద్రంగా తమ ఓటు ద్వారా జగన్ సర్కార్ ను గద్దె దించారు. చంద్రబాబు విడుదల కేవలం ఒక నాయకుడు జైలు నుంచి బయటకు రావడం మాత్రమే కాదు.. ప్రజాభిమానం, రాజకీయ విశ్వాసం, నాయకత్వంపై నమ్మకాన్ని చాటిచెప్పిన చారిత్రాత్మక సందర్భం. ఆ రోజు జ్ఞాపకాలు ఇప్పటికీ, ఎప్పటికీ తెలుగువారి మనసుల్లో సజీవంగానే ఉన్నాయి. ఉంటాయి. [Three Years, Cbn, Illegal Detention, Release, Telugu One]

Published on: Sun Nov 1, 2026 8:17AM

53 రోజుల నిర్బంధం.. కోట్లాది హృదయాల స్పందన మరువలేను: సీఎం చంద్రబాబు. !

మూడేళ్ల క్రితం ఇదే రోజు రాజమండ్రి జైలు నుంచి విడుదల.! 53 రోజుల నిర్బంధ సమయంలో తనకు అండగా నిలిచిన కోట్లాది తెలుగు ప్రజల మద్దతును జీవితాంతం మర్చిపోలేనని ముఖ్యమంత్రి చంద్రబాబు నాయుడు అన్నారు. మూడేళ్ల క్రితం ఇదే రోజున రాజమండ్రి జైలు నుంచి విడుదలైన సందర్భాన్ని గుర్తుచేసుకుంటూ సోషల్‌ మీడియా వేదికగా భావోద్వేగ ట్వీట్‌ చేశారు. నాడు తనకు మద్దతుగా నిలిచిన ప్రతి ఒక్కరికీ కృతజ్ఞతలు తెలిపారు. 53 రోజుల నిర్బంధం.. జీవితంలో మరిచిపోలేని ఘట్టం.! తన నాలుగున్నర దశాబ్దాల రాజకీయ జీవితంలో ఆ 53 రోజులు అత్యంత కఠినమైనవని చంద్రబాబు పేర్కొన్నారు. అప్పటి పాలకులు తనను నంద్యాలలో అర్ధరాత్రి కనీసం నోటీసు కూడా ఇవ్వకుండా అరెస్టు చేశారని, అది కుట్రపూరిత అరెస్టు అని తాను భావిస్తున్నట్లు తెలిపారు. న్యాయస్థానం తీర్పుతో జైలు నుంచి బయటకు వచ్చి తిరిగి ప్రజల్లోకి వచ్చిన రోజును గుర్తుచేసుకున్నారు. తనను నిర్బంధించి ఒంటరిని చేయాలనుకున్న ప్రయత్నాలు ప్రజల సంఘీభావంతో విఫలమయ్యాయని చంద్రబాబు వ్యాఖ్యానించారు. నాడు తనకు అండగా నిలిచిన కోట్లాది తెలుగు ప్రజల స్పందనను ఎప్పటికీ మర్చిపోలేనని స్పష్టం చేశారు. గచ్చిబౌలి స్టేడియంలో మద్దతు మరువలేనిది.! తనకు సంఘీభావం తెలిపేందుకు గచ్చిబౌలి స్టేడియంలో నిర్వహించిన 'సీబీఎన్ గ్రాటిట్యూడ్‌' కార్యక్రమానికి వేలాదిగా తరలివచ్చిన యువత, సాఫ్ట్‌వేర్‌ ఉద్యోగులు, వృత్తి నిపుణుల మద్దతు జీవితాంతం గుర్తుంటుందని చంద్రబాబు పేర్కొన్నారు. తాను ప్రవేశపెట్టిన సంస్కరణలు, కల్పించిన అవకాశాలతో మంచి ఉద్యోగాలు పొందినవారు స్వచ్ఛందంగా ముందుకు వచ్చి తనకు మద్దతుగా నిలవడం ఎంతో గొప్ప విషయమని అన్నారు. రాష్ట్రంతోపాటు దేశవ్యాప్తంగా, ప్రపంచంలోని 60కి పైగా దేశాల్లో తెలుగువారు, ప్రజాస్వామ్యవాదులు సంఘీభావం తెలిపారని ట్వీట్‌లో గుర్తుచేసుకున్నారు. ప్రతి వర్గం నుంచి సంఘీభావం.! రైతుల నుంచి సాఫ్ట్‌వేర్‌ నిపుణుల వరకు, విద్యార్థుల నుంచి ప్రవాసాంధ్రుల వరకు, సామాన్య మహిళల నుంచి కార్పొరేట్‌ సంస్థల ఉన్నతాధికారుల వరకు వివిధ వర్గాల ప్రజలు తనకు మద్దతుగా నిలిచారని చంద్రబాబు పేర్కొన్నారు. రాజకీయాలకు దూరంగా ఉండే తన సతీమణి, కుటుంబ సభ్యులు సైతం 'నిజం గెలవాలి' కార్యక్రమం ద్వారా ప్రజల్లోకి వచ్చారని గుర్తుచేసుకున్నారు. వారికి అండగా నిలిచిన ప్రజలు నిజాన్ని గెలిపించారని, ధర్మాన్ని నిలబెట్టారని వ్యాఖ్యానించారు. మీ నమ్మకమే నా బలం.. మీ భవిష్యత్తే నా సంకల్పం.! తనకు మద్దతు తెలిపిన ప్రతి పౌరుడికి, కార్యకర్తకు, అభిమానులకు, ప్రజాస్వామ్యవాదులకు, ప్రపంచవ్యాప్తంగా సంఘీభావం ప్రకటించిన వారందరికీ చంద్రబాబు మరోసారి కృతజ్ఞతలు తెలిపారు. తన కష్టాన్ని తమ కష్టంగా భావించి స్పందించిన ప్రతి ఒక్కరికీ శిరస్సు వంచి నమస్కరిస్తున్నానని పేర్కొన్నారు. ప్రజలు తనపై ఉంచిన ప్రేమ, అభిమానం, నమ్మకాన్ని జీవితాంతం నిలబెట్టుకుంటానని హామీ ఇచ్చారు. తన కోసం నిలిచిన ప్రజల కోసం చివరి వరకు నిలబడతానని స్పష్టం చేశారు. 'మీ నమ్మకం, అభిమానం నా బలం.. మీ భవిష్యత్తు నా సంకల్పం' అని పేర్కొన్న చంద్రబాబు.. ప్రజల మద్దతు, సహకారం, భాగస్వామ్యంతో 2047 నాటికి తెలుగు జాతిని నంబర్‌ వన్‌గా నిలబెడతానని పునరుద్ఘాటించారు. [ 53 Days Imprisonment Rajahmundry Central,[ CM Chandrababu Naidu, CBN Release, Three Years, TDP, Telugu Desam Party, CBN Gratitude, Gachibowli Stadium, Public Support, Telugu People, Global Telugu Community, 60 Countries, Political Arrest, Nara Bhuvaneswari, Nijam Gelavali, Andhra Pradesh Politics ]

Published on: Sat Oct 31, 2026 9:18PM

రాప్తాడు ఉన్మాది దాడి.. మెరుగైన వైద్యం కోసం విద్యార్థిని బెంగళూరుకు తరలింపు.!

విద్యార్థినికి అండగా నిలిచిన లోకేష్. గ్రీన్ ఛానల్ ద్వారా మణిపాల్ ఆస్పత్రికి.! అనంతపురం జిల్లా రాప్తాడు జెడ్పీ హైస్కూల్‌లో ఉన్మాది దాడిలో తీవ్రంగా గాయపడిన పదో తరగతి విద్యార్థినిని మెరుగైన వైద్యం కోసం బెంగళూరులోని మణిపాల్ ఆస్పత్రికి తరలించారు. విద్యార్థినికి అత్యుత్తమ వైద్యం అందించేందుకు విద్య, ఐటీ శాఖల మంత్రి నారా లోకేష్ ప్రత్యేక చొరవ తీసుకున్నారు. బాధితురాలికి మెరుగైన వైద్యం అందించాలని మంత్రి నారా లోకేష్ ముందుగానే మణిపాల్ ఆస్పత్రి ఉన్నతస్థాయి వైద్యులతో మాట్లాడారు. బాలికను వేగంగా బెంగళూరుకు తరలించేందుకు ఎలాంటి ఆటంకాలు ఎదురుకాకుండా గ్రీన్ ఛానల్ ఏర్పాటు చేయాలని కర్ణాటక ప్రభుత్వంతోనూ సంప్రదింపులు జరిపారు. ఈ ఘటన వెలుగులోకి వచ్చిన క్షణం నుంచే మంత్రి లోకేష్ అప్రమత్తమయ్యారు. పోలీసు, విద్యాశాఖ, జిల్లా అధికార యంత్రాంగంతో నిరంతరం మాట్లాడుతూనే ఉన్నారు. బాలిక ఆరోగ్య పరిస్థితి, వైద్య చికిత్స, తరలింపు ఏర్పాట్లపై అధికారులతో, వైద్యులతో ఎప్పటికప్పుడు సమీక్షించారు. బాధిత విద్యార్థినికి మెరుగైన వైద్య సహాయం అందించడమే లక్ష్యంగా మంత్రి లోకేష్ స్వయంగా పరిస్థితిని పర్యవేక్షిస్తూ జిల్లా యంత్రాంగంతో సమన్వయం చేస్తున్నారు. [ Rapthadu Incident, Anantapur, Student Attack, Class 10 Student, Nara Lokesh, Andhra Pradesh Government, Bengaluru Manipal Hospital, Green Channel, Better Medical Treatment, School Attack, Student Health Condition ]

Published on: Sat Oct 31, 2026 5:59PM

పులివెందులలో జగన్ తిరగడానికి అనుమతి లేదు: డీఐజీ

ఓటు వేసిన వెంటనే ఇంటికి వెళ్లాలి.! పులివెందుల మున్సిపల్ ఎన్నికల వేళ వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి వైఎస్ జగన్ మోహన్ రెడ్డి పర్యటనపై డీఐజీ కోయ ప్రవీణ్ కీలక వ్యాఖ్యలు చేశారు. జగన్ ఓటు వేసేందుకు పులివెందుల రావచ్చని, అయితే ఓటు హక్కును వినియోగించుకున్న వెంటనే తన నివాసానికి వెళ్లాలని స్పష్టం చేశారు. మాజీ ముఖ్యమంత్రి హోదాలో ఉన్న జగన్ చట్టాన్ని ఉల్లంఘించరని ఆశిస్తున్నట్లు పేర్కొన్నారు. ఎన్నికల వేళ పోలీసుల అప్రమత్తం.! పులివెందుల నియోజకవర్గంలో మున్సిపల్ ఎన్నికల నేపథ్యంలో ఎలాంటి అవాంఛనీయ ఘటనలు చోటుచేసుకోకుండా పోలీసు యంత్రాంగం అప్రమత్తమైంది. ఎన్నికలు ప్రశాంతంగా జరిగేలా అధికారులు పటిష్టమైన భద్రతా ఏర్పాట్లు చేపట్టారు. శాంతిభద్రతలకు విఘాతం కలగకుండా ముందస్తు చర్యలు తీసుకుంటున్నారు. కడప నగరంలోని ఆర్ట్స్ కాలేజీలో ఎన్నికల సామగ్రి పంపిణీ ప్రక్రియను పరిశీలించిన అనంతరం డీఐజీ కోయ ప్రవీణ్ మీడియాతో మాట్లాడారు. పోలింగ్ రోజున జగన్ తన ఓటు హక్కును వినియోగించుకోవచ్చని, అయితే పులివెందుల పట్టణంలో తిరగడానికి అనుమతి లేదని వెల్లడించారు. ఓటు వేసిన వెంటనే ఇంటికి వెళ్లాలని స్పష్టం చేశారు. జగన్ వ్యాఖ్యలతో రాజకీయ వేడి.! పోలింగ్ రోజున తాను పులివెందులలోనే ఉంటానంటూ గతంలో వైఎస్ జగన్ చేసిన వ్యాఖ్యలు రాజకీయంగా చర్చనీయాంశమయ్యాయి. ఈ వ్యాఖ్యల నేపథ్యంలో అధికార, ప్రతిపక్ష పార్టీల మధ్య మాటల యుద్ధం కొనసాగింది. దీంతో ఎన్నికల సమయంలో ఎలాంటి ఉద్రిక్తతలు చోటుచేసుకోకుండా పోలీసులు ప్రత్యేక దృష్టి సారించారు. 3 వేల మంది పోలీసులతో బందోబస్తు.! పులివెందులతో పాటు జమ్మలమడుగు, కడప ప్రాంతాల్లోనూ పోలీసులు భద్రతను కట్టుదిట్టం చేశారు. జిల్లా వ్యాప్తంగా సుమారు 3 వేల మంది పోలీసు సిబ్బందితో బందోబస్తు ఏర్పాటు చేసినట్లు డీఐజీ కోయ ప్రవీణ్ వెల్లడించారు. ఎన్నికల సమయంలో శాంతిభద్రతలకు విఘాతం కలిగించేలా వ్యవహరించినా, అల్లర్లకు పాల్పడినా చట్టప్రకారం కఠిన చర్యలు తీసుకుంటామని హెచ్చరించారు. ప్రజాస్వామ్యబద్ధంగా ఎన్నికలు జరిగేలా రాజకీయ పార్టీలు, ప్రజలు పోలీసులకు సహకరించాలని అధికారులు కోరారు. [ YS Jagan Mohan Reddy, Pulivendula Municipal Elections, DIG Koya Praveen, Pulivendula News, AP Municipal Elections, YSRCP, Chandrababu Naidu, AP Police Security, Pulivendula Polling, Jammalamadugu, Kadapa Police, Police Restrictions on Jagan, Andhra Pradesh Politics, Election Security, AP Breaking News ]

Published on: Sat Oct 31, 2026 4:08PM