తెలుగు ఇండియన్ ఐడల్ సీజన్ 3 ప్రతీ వారం మంచి పెర్ఫార్మెన్సెస్ తో దూసుకుపోతోంది. ఇక ఈ వారం ఎపిసోడ్ లో జడ్జ్, సింగర్ కార్తీక్ ఒక ఇంటరెస్టింగ్ విషయాన్నీ చెప్పుకొచ్చారు. తాను ఇంత గొప్ప సింగర్ కావడానికి కారణం మనో గారు అని అన్నారు.

"మీ మ్యూజికల్ జర్నీలో మీకు ఘనమైన మూమెంట్ ఏమిటి" అని శ్రీరామా చంద్ర అడిగేసరికి సింగర్ కార్తీక్ తన మ్యూజికల్ జర్నీలో అసలు విషయాలు చెప్పుకొచ్చాడు. "1995 లో మా నాన్నకు సంగీతం మీద ఉన్న ఇంటరెస్ట్ కారణంగా నేను ఒక రియాలిటీ షోలో పార్టిసిపేట్ చేయాల్సి వచ్చింది. ఆ షోలో నేను పాడాను. ఐదు నిమిషాల్లోనే నేను ఓడిపోయాను. అసలు నాకు సాంగ్స్ పాడడం మీద అవగాహన లేదు, బాగా పాడలేదు..ఓడిపోయాను. ఐతే ఆ ఎపిసోడ్ కి మనో గారు చీఫ్ గెస్ట్ గా వచ్చారు. ఆ క్షణం వరకు నా లైఫ్ లో మ్యూజిక్ లేదు. అంతా ఖాళి. ఆ ఎపిసోడ్ షూటింగ్ ఐపోయాక నేను, అమ్మ, నాన్న కలిసి బస్సు స్టాండ్ కి నడుస్తూ వస్తున్నాం. అదే సమయంలో ఒక ఒపెల్ ఆస్ట్రా కారు మా ముందు నుంచి వెళ్తూ కనిపించింది. నేను ఆ కార్ చూసి నాన్న మనో గారు కార్ లో వెళ్తున్నారు అని చెప్పా. అదే టైములో మనో గారి కార్ మా ముందు ఆగింది. ఆయన మమ్మల్ని చూసి మా కోసమే కార్ ఆపారు. వెంటనే మేము మనో గారి దగ్గరకు వెళ్లాం. వెంటనే ఆయన నన్ను మా పేరెంట్స్ కి చూపిస్తూ కుర్రాడికి మంచి భవిష్యత్తు ఉంది. మ్యూజిక్ నేర్పించండి...అదే అతన్ని నిలబెడుతుంది అని చెప్పి అక్కడి నుంచి వెళ్లిపోయారు. అలా ఆయన మాటలతో నా బుర్రలో ఒక ఆలోచనను వెలిగించారు. అంటే మనో గారు చెప్పారు కాబట్టి నేను మ్యూజిక్ నేర్చుకుంటే గొప్పవాడిని అవుతాను అనుకున్నాను. అలా నేను మ్యూజిక్ నేర్చుకున్నా..నాలుగేళ్ల తర్వాత నేను సింగర్ ని అయ్యాను." అని తన మ్యూజిక్ జర్నీ గురించి చెప్పుకొచ్చారు.