ఇంగ్లీష్ మీడియంకు వ్యతిరేకంగా పార్టీ నేతలు ఎవరు మాట్లాడినా కఠినంగా చర్యలు తీసుకుంటామని ముఖ్యమంత్రి జగన్ హెచ్చరించినట్లు తెలిసింది. పేద పిల్లల అభ్యున్నతి కోసమే పాఠశాలల్లో ఇంగ్లీష్ మీడియం పెడుతున్నామని ప్రభుత్వం చెబుతుంది. లోక్ సభలో తమ ప్రభుత్వ వైఖరికి భిన్నంగా మాట్లాడిన ఎంపీ రఘురామకృష్ణం రాజు పై ఆగ్రహం వ్యక్తం చేసినట్లు సమాచారం. దీనిపై పశ్చిమ గోదావరి జిల్లా పార్టీ ఇన్ చార్జ్ వైవి సుబ్బారెడ్డితో మాట్లాడి రఘురామకృష్ణం రాజు వివరణ తీసుకోవాలని ఆదేశించారు జగన్. ఈ విషయం టీవీ చానళ్లలో రాగానే రఘురామకృష్ణం రాజు స్పందించారు. తాను పార్లమెంటులో తప్పేమీ మాట్లాడలేదని ప్రముఖ ఛానెల్ ఆంధ్రజ్యోతికి తెలిపారు. నేను ఇంగ్లిష్ మీడియం వద్దని కానీ తెలుగు మీడియమే కావాలని కానీ చెప్పలేదు.

మాతృభాషకు ప్రాధాన్యమివ్వాలన్న 350, 350 A అధికరణలు గురించే ప్రస్తావించాను. నా ప్రసంగంలో ఇంగ్లీష్ అనే పదమే రాలేదు. ప్రాచీన భాషా కేంద్రాన్ని మైసూరు నుంచి ఏపీకి మార్చడం గురించి నేను చేసిన ప్రశ్న అది. నాకు ఇష్టమైన తెలుగు భాషకు సంబంధించిన ప్రశ్న కావడంతో నేను మాట్లాడాను. రాష్ట్ర ప్రభుత్వం తెలుగుకు అన్యాయం చేస్తోందని తెలుగు మీడియం తీసేస్తోందని టిడిపి ఎంపి కేశినేని నాని అన్నారు. అయితే జగన్ సీఎం అయ్యాక తెలుగుకు ఉన్న ప్రాముఖ్యతను దృష్టిలో ఉంచుకొని తెలుగు వారికి గర్వకారణమైన ఎన్టీఆర్ సతీమణి లక్ష్మీ పార్వతిని తెలుగు అకాడమి అధ్యక్షురాలిగా నియమించారని చెప్పాను. తెలుగు అకాడమీ విభజన ఇంకా జరగలేదని ఆస్తుల విభజన జరిగితే ఏపీకి 200 కోట్లు వస్తాయని కేంద్రం దృష్టికి తెచ్చారు. మాతృభాషకు సంబంధించి రాజ్యాంగంలోని 350,350A ప్రకారం కేంద్రమే ఈ బాధ్యత తీసుకోవాలని అన్నాను. ఇంతకు మించి ఆంగ్ల మాధ్యమానికి వ్యతిరేకంగా నేను ఒక్క మాట కూడా మాట్లాడలేదని రఘురామ కృష్ణంరాజు తెలిపారు. 350,350A అధికరణంలోని మాతృభాష బోధన గురించి ప్రస్తావించారు కదా అని అడిగినప్పుడు రాజ్యాంగం ప్రకారం మాతృ భాష పరిరక్షణ చర్యలు తీసుకోవాలని కేంద్రాన్ని కోరాను. ఆ మాతృభాష ఏదైనా కావచ్చు అని తెలిపారు. తెలుగు భాష వేరు..మాధ్యమం వేరు.. తెలుగును పరిరక్షించుకోవాలన్నది మా పార్టీ సిద్ధాంతం కూడా అందుకే తెలుగు అకాడమీని జగన్ పునరుద్ధరించారని తెలిపారు. అయితే పార్లమెంట్లో తాను ఆంగ్లంలో చేసిన ప్రసంగాన్ని అర్ధం చేసుకోలేక జగన్ కి ఎవరైనా తప్పుగా చెప్పారేమోనని సందేహం వ్యక్తం చేశారు. తననెవరూ సంజాయిషీ అడగలేదని అడిగితే ఇదే వివరణ ఇస్తానన్నారు.

నేను తెలుగు భాషకు మద్దతుగా మాట్లాడాను. ఇంగ్లీష్ మీడియంను వ్యతిరేకించలేదు, తరవాత జరిగిన ఓ టీవీ చర్చలోనూ సీఎం నిర్ణయాన్ని సమర్థించారు. అయినా నిప్పులేనిదే పొగరాదు అంటారు. నన్ను సంజాయిషీ అడిగితే వీడియోలతో సహా వివరణ ఇస్తాను, ఆ బాధ్యత నాపై ఉంది. అలాగే నన్ను అపార్థం చేసుకుంటే అర్థం చేసుకోవాల్సిన బాధ్యత వారిపైనే ఉంటుందని రఘురామ కృష్ణంరాజు చెప్పారు.తనపై సీఎం ఆగ్రహం వ్యక్తం చేశారన్న వార్తలు రాగానే రఘురామకృష్ణం రాజు తానే వైవీ సుబ్బారెడ్డికి ఫోన్ చేసినట్లు తెలిసింది. లోక్ సభలో మాట్లాడేటప్పుడు చట్టాలను నిబంధనలకు కోట్ చేయాల్సి ఉంటుంది. అందుకే రాజ్యాంగంలోని అధికరణలను ప్రస్తావించానని చెప్పినట్లు సమాచారం. దీనిపై ఈరోజు ( నవంబర్ 20న ) మాట్లాడదామని వైవి సుబ్బారెడ్డి బదులిచ్చినట్లు తెలిసింది. నిజానికి రఘురామకృష్ణం రాజు స్వతంత్రంగా వ్యవహరిస్తున్నారంటూ జగన్ అసహనంతో ఉన్నట్టు తెలుస్తోంది. పార్టీకి సమాచారం ఇవ్వకుండా కేంద్ర మంత్రులను.. ప్రధానిని కలుస్తున్నారని.. దీనిని దృష్టిలో ఉంచుకొని ఎంపీలతో జరిగిన భేటీలో పరోక్ష హెచ్చరికలు చేశారని చెబుతున్నారు. ఈలోపే మాతృ భాషపై ఎంపీ చేసిన ప్రసంగం జగన్ కు మరింత ఆగ్రహం తెప్పించినట్లు సమాచారం