మేడే నాటి ముభారకులు

మేడే నాటి ముభారకులు

నాగలి పట్టే నాగన్న రెక్కలు తెగిన రైతన్న
సమ్మెట పట్టే సూరన్న సన్నాయి మేళం సంగన్న
మీసం మెలిలో మగ్గిపోతున్న మంగలి సత్తెన్న
మురికి బట్టలు చుట్టి మూటను కట్టే చాకలి చిమ్మన్న

రెక్కలు ముక్కలు చేసి రంగుల చీరలు నేసే దేవాంగి దానయ్య
కండలు కరిగించే కంసాలి కామయ్య
కంపును ఇంపుగా మోసే పాకీ పాపమ్మ
కావడి కుండలు మోసే కుమ్మరి కూనయ్య

బుగ్గిలో మగ్గి బుట్టలు తట్టలు అల్లే మేదరి ముసలయ్య
బుగ్గలు బుగ్గి అయ్యేదాకా శంకం ఊదే జంగాల సాంబయ్య
ఆకాశం నుండి అమృతం దించి ఆగమైపొతున్న గౌన్ల గురయ్య
అప్పడాలు అద్ది అంగట్లో అమ్మే కోమటోల కనకమ్మ

డప్పులుకొట్టి దండోరా వేసే మాలోల ముత్తయ్య
చెమటలు పట్టి చెప్పులు కుట్టే మాదిగ మల్లయ్య
చెత్తను చెరిపేసి చిత్రం గీసేసిన శుబ్బరాలు చుక్కమ్మ
నెత్తుటి చుక్కలు చిమ్మి బండలు పిండి చేసే పటానయ్య

మండే ఎండలతో ఎండే గుండెలతో
కాయా కష్టంతో వచ్చిన నష్టంతో కనుమరుగౌతున్న
కార్మిక కర్తలకు కాలే కడుపులకు కర్షక జీవులకు
మేడే నాటి ముభారకులు