ప్రతినాయకులే

రాజ్యమిపుడు మాటలతో మాయచేసి
అరచేతిలో వైకుంఠం చూపించే వాళ్ళ చేతుల్లో
మరణశాసనం లిఖిస్తుంది
జనంకోసం తపనపడే నాయకుడొకడులేడు
ఉత్తుత్తి మాటలతో కోటలుగట్టే
మోసగాళ్ళ చేతుల్లో తగలడుతున్న రావణకాష్టం
జనాలు కళ్ళింకా మూతబడేవున్నయ్
మూతబడుతూనే వున్నయ్ శాశ్వతంగా
దోచుకుని దాచుకునే కుటిలనాయకత్వమే
ఉన్నోడికెప్పుడూ చుట్టమే చట్టమైనా ఏదైనా
కాపాడిల్సినోళ్ళే బయటికిరాకుండా చేతులుముడుచుకున్నరు
చేతకానితనాన్ని ప్రదర్శిస్తున్నరు
పూటగడవని బతుకులకింత ఆసరా లేకపాయే
సినిమా కథానాయకులైతే అభిమానం మాటున కోట్లు గడించి
చడిచప్పుడులేకుండా
మన్నతిన్నపాములైరి వారురారు సహాయంచేయరు
ఆకాశహార్మ్యాల్లో కులుకుతున్నరు
ఎవరురా నాయకులు?
ఏదిరా అభిమానం?
గమనించుకోవాలందిరిపుడైనా
ఎవరికోసం ఎవరురారు
నీ కోసం నువ్వే బతకాలి
అందరూ సోనుసూదులు కారు
మానవత్వాన్ని మనసునిండా నింపుకున్న మనిషి
ఈ యుగానికొక్కడు