ఆంధ్రప్రదేశ్‌లో రాజకీయ వాతావరణం వేడివేడిగా ఉంది. తిరుమల  లడ్డు ప్రసాదం తయారీలో కల్తీ నెయ్యి వాడకంపై సిట్ నివేదిక నేపథ్యంలో ఏపీలో రాజకీయ వేడి రగిలింది.  సిట్ కల్తీని ధృవీకరించిందని తెలుగుదేశం, నెయ్యిలో జంతువుల కొవ్వు కలవలేదని సిట్ విస్పష్టంగా పేర్కొందని వైసీపీ వాదిస్తున్నాయి. ఈ క్రమంలోనే వైసీపీ సీనియర్ నేత, మాజీ మంత్రి అంబటి రాంబాబు ఏపీ సీఎం చంద్రబాబుపై అసభ్య పదజాలంతో దూషణలకు పాల్పడ్డారు.

దీనిపై ఆయనపై రాష్ట్ర వ్యాప్తంగా 36కు పైగా కేసులు నమోదయ్యాయి. అది పక్కన పెడితే.. ఇదే దూషణల వ్యవహారంలో అంబటి రాంబాబును పోలీసులు అరెస్టు చేసి రాజమండ్రి సెంట్రల్ జైలుకు రిమాండ్  చేసిన సంగతి విదితమే. మరో కేసులో అంబటి రాంబాబును సోమవారం (ఫిబ్రవరి 9) పీటీ వారెంట్ పై గుంటూరు కోర్టుకు తీసుకువచ్చారు. ఆ కేసులో కూడా కోర్టు అంబటికి 14 రోజుల రిమాండ్ విధించింది. గతంలో ఓ నిరసన కార్యక్రమంలో   పెట్టిన బారికేడ్లను తోసేసి..పోలీసులపై చిందులు తొక్కి వారితో వాగ్వాదానికి దిగడమే కాకుండా వారి విధులకు ఆటంకం కలిగించినందుకు నమోదైన కేసులో   రాజమండ్రి జైల్లో  రిమాండ్ ఖైదీగా ఉన్న అంబటిని  పోలీసులు పీటీ వారెంట్ కింద గుంటూరు కోర్టులో హాజరు పరిచారు.  ఈ కేసులో కూడా ఆయనకు కోర్టు రిమాండ్ విధించింది.  

ఇలా ఉండగా అంబటి రాంబాబుపై పలు కేసులు నమోదు కావడంతో ఆయనకు ఒక కేసులో బెయిలు వచ్చినా మరో కేసులో అరెస్టు చేసే అవకాశాలున్నాయని న్యాయనిపుణులు అంటున్నారు.  తనపై నమోదు చేసిన కేసులను ఎత్తివేయాలంటూ అంబటి కోర్టులో క్వాష్ పిటిషన్ దాఖలు చేయనున్నట్లు తెలుస్తోంది. సపోజ్ ఫర్ సపోజ్ అంబటి క్వాష్ పిటిషన్ ను కోర్టు తోసి పుచ్చితే, అంటే అంబటిపై కేసులను క్వాష్ చేయకుంటే.. అంబటి ఇప్పట్లో జైలు నుంచి బయటకు వచ్చే అవకాశాలు అంతంత మాత్రమేనని అంటున్నారు.